BƆBERƐ 9
Deodoma Dela Ba Laɣum Pu’usa Yehowa
“Na’ahera ya se’emdaana n naam saazuo, la teŋa wa.”—Liligere 14:7
Wuu hon zamesɛ sɛla gɔnlɛmlɛm wa poan la, Baabule la tari la naresum yɛla zo’e zo’e n wan ta’an soŋɛ hon la ho deodoma. Yehowa boti la ho tara pupeelum. A pu’ulumbiŋe ti ho san dekɛ a pu’usegɔ deŋɛ nɛŋa, ‘a wan bo ho sɛla woo pa’asɛ.’ (Matu 6:33) A kɔ’ɔn bɔta ti ho dɛna la a zɔ. Basɛ ti hon la Naayinɛ zɔtɔ la kpe’em doose yɔ’ɔ seko woo ti ho nyɛ. Wana n de yelesonɛ za’a ti nɛra wan ta’an nyɛ.—Matu 22:37, 38.
1 BASƐ TI HON LA YEHOWA BƆŊA LA KPE’EM
BAABULE LA N YELE SE’EM: Yehowa yeti, “n wan dɛna ya sɔ te yamam me dɛna n dayɔɔhe la n pɔyɔɔhe.” (2 Korint 6:18) Naayinɛ boti ho dɛna la a zɔ. Sɛla n wan soŋɛ ho dela zusega. Yehowa yeti ho ‘sohora en daarɛ woo.’ (1 Tesalonika 5:17) A boti a wum la sɛla n boi ho puti’irɛ poan. (Filipi 4:6) Ho san ni naɛ la ho deodoma zusa Naayinɛ, ba wan baŋɛ ti a sirum boi.
Ho san zusa Naayinɛ, la dela ho me nana en. Ho wan ta’an eŋɛ wana doose la hon zameseri Baabule gɔnɔ la a Yetɔɣum la. (Yooma 1:1, 2) Ti’isa taɣesa sɛla ti ho zamesa la. (Yooma 77:11, 12) Krista zamesegɔ me kenɛ pa’alɛ ti ho kelese Naayinɛ.—Yooma 122:1-4.
Sarɔɔ kuyima me poan ti hon la Yehowa bɔŋa wan ta’an kpe’em dela ho tɔɣera a yɛla bɔ’ɔra nɛreba. Ho san ita wana, ho wan vurege lɛm en.—Matu 28:19, 20.
HON WAN TA’AN EŊƐ SƐLA:
Ee tɛm zusa ge kaala Baabule la daarewoo
Wuu deodoma la, la nari ti ya basɛ ti pu’usegɔ bɔna nɛŋa gana de’eŋo la vo’osego yɛla
2 TARA PUPEELUM HO DEODOMA PU’USEGƆ POAN
BAABULE LA N YELE SE’EM: “Vuruge ya lɛm Na’ayenɛ te a me wan vuruge lɛm ya.” (Yames 4:8) La dela ya maasum ya wan ita ya deodoma pu’usegɔ la se’em ge dɔla bala. (Pin’ileŋɔ 18:19) La kelum nara ti ho eŋɛ sɛla pa’asɛ. Ya dela ya tɛra Naayinɛ yele ya daarewoo woo vom poan. Ya deodoma bɔŋa wan kpe’em Naayinɛ poan ya san ‘pa’ala ya kɔma, tɔgɔra a yele yan zin ya yiya poan bii yan kene sore zuo. Yan ze bii ya gan mɛ.’ (Tɛɛnhegɔ 6:6, 7) Tara puti’irɛ wuu Yesua n yuun yeti: “Ge han dɛna mam la n yiredoma, tomam wan tona bɔ’ɔra la Na’ayenɛ.”—Yosua 24:15.
HON WAN TA’AN EŊƐ SƐLA:
Maasum ya sɛla n wan soŋɛ nɛra woo deo la poan