ZASEŊƆ 14

Basɛ Ti Yelezura La Niɛ Peelum

Hebru 8:1

YELEKPINE: Soŋɛ ho kɛleseriba la ti ba dɔla ho yetɔɣum la soŋa ge basɛ ti ba bɔkɛ ti yelezure woo makɛ mɛ la yetɔɣum la zuo.

Maasum hon wan yele sɛla. Ti’isɛ bisɛ ho yetɔɣum la n wan soŋɛ ba se’em. Ho boti la ba baŋɛ lasebaarɛ yɛla, tara sakerɛ, bii kpemese ba giila, maasum bala mea nɔɔ. Bisɛ soŋa ti yelezuto la woo ti ho sɔsera la basɛ ti ho kɛleseriba la bɔkɛ ho yetɔɣum la vuurɛ.

Soke homea yeti: ‘Bem yɛla ti kɛleseriba la ti’isa yetɔɣum wa poan? Ba wan soke ba yɛla wa la wani wani?’ Nyaa maasum ho yelezuto la me bala mea nɔɔ la wan eŋɛ se’em ti ho kɛleseriba la ta’an bɔkɛ ge sakɛ sɔsega la.
Taɣesa ho yetɔɣum la zuo. Ho yetɔɣum la poan, ni loe ho yetɔɣum la zuo yelebire tɔɣɛ taɣesɛ.
Basɛ ti yelezura la dɛna naana ge niɛ peelum. Loe yelezura n makɛ la ho yetɔɣum la zuo ti ho wan ta’an pa’alɛ soŋa, da basɛ ti ho yelezura la zo’e, tɔɣɛ ti yelezure woo niɛ peelum, ni su’use ge loŋe ayima tɔɣɛ ge basɛ ti yelezure woo naɛ soŋa la yelezure se’ere n taɣeli la.

Ho pɔsega yetɔɣum la poan ho ta’an pa’alɛ ho yetɔzura la, la wan eŋɛ se’em ti ho kɛleseriba dɔla sɔsega la bii ho ta’an malum pa’alɛ ho yelezuto la ho ki’ileŋɔ yetɔɣum la poan la wan eŋɛ se’em ti ho kɛleseriba la tɛra a.