ZASEŊƆ 29

Nɛra Ni Ki Ana La Wani?

Gɔnseko Ti Ba Printɛ

Ho nɛra tabelɛ ki kurum? Susa’aŋɔ saŋa wa poan, daanse’ere ho ta’an ti’isa ti: ‘Nɛra ni ki ana la wani? To tari puti’irɛ ti to wan le nyɛ to nɛresɛba n ki la?’ Zaseŋɔ wa la sɛla n taɣelɛ la, to wan geele Baabule la subuɣelegɔ lebesego la bisɛ.

1. Nɛra ni ki ana la wani?

Yezu yuun dekɛ kum makɛ la nɛra n gĩsi. Nɛra san gĩsa a ka mi sɛla n iti a zɛ’an. Kum la guum wɔni taaba la wani? Nɛra san ki a ka le wuna too. A daa san puɣum nɔŋɛ a yidoma la a zɔdoma la se’em me ge ki, a ka le mina ti eŋa boi la a ma’a. Baabule la yeti, “sɛba n ki la ka mi sɛsɛla.”—Kaalɛ Pa’ala 9:5.

2. To nyɛti nyuurɔ la wani la to mi kum n sirum ani se’em la?

Nɛreba zoti kum mɛ, hali ge me zɔta sɛba n ki la! Ge ho wan ta’an nyɛ subuɣelegɔ la Baabule la n pa’alɛ kum n ani se’em la. Yezu yuun yeti: “Yelemɛŋɛrɛ la wan faaɛ ya basɛ.” (Yon 8:32) Baabule la ka pa’alɛ ti nɛra san ki a tari la sia n kelum vɔna wuusa wuu pu’usegɔdoma basɛba n pa’ali se’em la. Bala la, nɛra san ki a ka le namesa. Leyɛ’ɛsa me, sɛba n ki la san ka mina sɛsɛla, ba me kan ta’an daam tɔ. Bala la, la ka tari vuurɛ ti ho bɛlena sɛba n ki la bii ho kaabera ba, la yele me ka pakɛ ti ho pu’usa bɔ’ɔra ba.

Nɛreba basɛba yeti bamam ta’an sɔsɛ la ki’indoma. Ge yele dena wa kan ta’an eŋɛ. To nan kɔ’ɔn zamesɛ baŋɛ ti, “sɛba n ki la ka mi sɛsɛla.” Sɛba n ti’isɛ ti bamam sɔseri mɛ la ba nɛresɛba n ki la, daanse’ere ba tuɣum sɔsa mɛ la kolekpabɛ’ɛsi n pareni ti bamam dela ba nɛresɛba n ki la. Bala la, to san sirum mina kum n ani se’em, la te’eli to mɛ la kolekpabɛ’ɛsi wa. Yehowa ka’am to mɛ ti to da tiregera ti to sɔsɛ la sɛba n ki la se’ere n sɔi la a mi ti, to san sɔsa la kolekpabɛ’ɛsi la ba wan daam tɔ.—Kaalɛ Tɛɛnhegɔ 18:10-12.

VIISƐ PA’ASƐ

Zamesɛ baŋɛ Baabule la n pa’alɛ kum yele se’em ge me basɛ ti ho sakerɛ kpe’em la nɔŋerɛ Naayinɛ la n ka nameseri sɛba n ki la.

Nɛra pɔɣa n ki ti eŋa la a kɔma bayi zĩ’a kuka zuo kuurɛ la poan. Ba zɔdoma la ba suurɔ n soŋeri ba ge buɣela ba suure.

3. Zamesɛ baŋɛ nɛra n ni ki ana se’em

Tingɔŋɔ wa poan, nɛreba tari la puti’ira to’ore to’ore la nɛra n ni ki ana se’em. Puti’ira wa za’a kan ta’an dɛna yelemɛŋɛrɛ.

Puti’ira ani ti nɛreba tara la nɛra n ni ki ana se’em ya gingilega la poan?

Ho san bɔta ti ho baŋɛ Baabule la n pa’alɛ sɛla, ŋmɛ VIDIYO la.

VIDIYO: Nɛra Ni Ki Ana La Wani?—Ase’a (1:19)

Fɔɔra:‘Nɛra Ni Ki Ana La Wani? vidiyo la yɛla ase’a. 1. Kum n gã asibitin. 2. Nɛreba n boi zireŋa zuo yea sore ti ayima gĩsa.

Kaalɛ Pa’ala 3:20 ge nyaa sɔsɛ sokere ana wa:

Kaalegɔ kuna wa pa’alɛ ti nɛra ni ki ana la wani?
Nɛra san ki sɛla le bɔna a poan vɔna?

Baabule la yele to Yezu zɔsonkɔ ayima n de Lazarus kum yele. Ho san kaalɛ Yon 11:11-14, daalɛ basɛ Yezu n yuun pa’alɛ la yuun ani Lazarus se’em ge nyaa sɔsɛ sokere ana wa:

Yezu yuun dekɛ kum makɛ la bem?
A makerɛ wa pa’alɛ ti, nɛra ni ki ana la wani?
Hon ti’isɛ ti yɛm boi bim la Baabule la n pa’alɛ kum yele se’em la?

4. To mi kum n sirum ani se’em la soŋeri to mɛ

To mi kum n sirum ani se’em la soŋeri to mɛ ti to ka zɔta ki’indoma. Kaalɛ Pa’ala 9:10 ge nyaa sɔsɛ sokere wa:

Ki’indoma wan ta’an daam tɔ?

Baabule yelemɛŋɛrɛ la te’eli to mɛ ti to ka bɛlena ki’indoma bii kaabera ba. Kaalɛ Isaiah 8:19 la Liligere 4:11 ge nyaa sɔsɛ sokere wa:

Hon ti’isɛ ti la ani Yehowa la wani nɛra san kaabera bii a eeri la soŋerɛ nɛra n ki zɛ’an?

Fɔɔra: Yaabedoma kaabegɔ malema ase’a. 1. Nɛreba n maalɛ nɛreba zuwama vuga ge me zãla nɛreba kɔ̃ba. 2. Nɛra n kpa duma yɔɔ zɛ’an pu’usa ge me tara dia bɔ’ɔra ka. 3. Nɛreba batã n yɛ ba buuri de’eŋo lɔɣɔrɔ wa’ara. — To mi kum n sirum ani se’em la faaɛ to mɛ yaabedoma yelese’a n dɛɣeri Yehowa suure

5. To mi kum n sirum ani se’em la buɣeli la to suure

Ba pa’alɛ nɛreba zo’e zo’e yeti nɛra san ki a wan namesɛ mɛ yɔ a be’em. Ge la dela subuɣelegɔ ti to baŋɛ ti nɛra san ki a ka nameseri, hali nɛra la daa san tum yelebe’ero la se’em me. Kaalɛ Arom 6:7 ge nyaa sɔsɛ sokere wa:

Wuu to kaalɛ Baabule la nyɛ sɛla la, nɛra san ki a vo’ose mɛ la a be’em la, ho ti’isɛ ti nɛra san ki, a wan namesa ti a yɔ a be’em la ti a daa tum la?

To san zamesɛ mina Yehowa soŋa, to wan baŋɛ ti a kan malum basɛ ti ki’indoma namesa. Kaalɛ Tɛɛnhegɔ 32:4 la 1 Yon 4:8 ge nyaa sɔsɛ sokere ana wa:

Naayinɛ san tara halesoma wa wuu to kaalɛ nyɛ se’em la, hon ti’isɛ ti a wan sakɛ ti sɛba n ki la namesa?
Hon ti’isɛ ti to mi kum n sirum ani se’em la dela subuɣelegɔ bɔ’ɔra tɔ? Bem zuo?

NƐREBA BASƐBA YETI: “Dabeem n tari mam ti n san ki sɛla wan ta’an eŋɛ mam.”