ZASEŊƆ 48
Mina Zɔtɔ Nyɔka Soŋa
Zɔsonɔ ni basɛ ti to tara pupeelum mɛ se’em ma’a ti la ana to soŋa ge me ni kpemese to giila se’em ma’a ti to suure sa’am. Ge Baabule la kaɣɛ tɔ ti daɣɛ zɔ woo n de zɔsonkɔ. Bala la, hon wan eŋɛ la wani ta’an nyɔɣɛ zɔsonɔ? Geele sokere ana wa.
1. Sore kani poan ti ho zɔdoma wan ta’an soŋɛ bii sa’am hɔ?
To ta’an tɔɣesa nɛresɛba ti to nyɔɣɛ ba zɔtɔ la mɛ. Ba wan ta’an soŋɛ bii sa’am tɔ—la ka pakɛ la tomam la bamam n laɣum ɛɛra bii to sɔseri la ba mɛ intanɛt poan. Wuu Baabule la n yele se’em la, “se’em n doli la yɛmdoma wan tara yɛm ge seʼem n doli la gbeto [nɛresɛba n ka nɔŋɛ Yehowa] wan nyɛ namesegɔ.” (Magaha 13:20) Zɔdoma sɛba n nɔŋɛ Yehowa ge pu’usa en wan ta’an soŋɛ hɔ ti ho vurege du en ge me wan ta’an soŋɛ ti ho kɔ’ɛ ho puti’irɛ soŋa yɛla poan. Ge zɔdoma sɛba n ka boi tansugere la poan wan ta’an basɛ ti ho zaaɛ la Yehowa. Bala n sɔi ti Baabule la yeti to nyɔɣɛ to zɔdoma yɛm sore poan! To zɔdoma san nɔŋɛ Naayinɛ, tomam la bamam za’a nyɛti soŋerɛ mɛ. To wan ta’an ‘kɔ’ɔn kpemesa taaba giila ge me soŋera taaba.’—1 Tesalonika 5:11.
2. Hon nyɔɣɛ ho zɔdoma se’em la wan ta’an daam bii pee Yehowa puurɛ la wani?
Yehowa nyɔɣeri a zɔdoma la yɛm sore poan. “A tari la bɔnsoŋa la tontɔɔdoma la.” (Magaha 3:32) La wan ana Yehowa la wani to san nyɔɣɛ zɔdoma sɛba n ka nɔŋɛ en? A suure wan sa’am paa! (Kaalɛ Yames 4:4.) Ge to san zaɣesɛ zɔtɔ be’ero ge vurege du Yehowa la sɛba n nɔŋɛ en la, a puurɛ wan pee ti to dɛna a zɔdoma.—Yooma 15:1-4.
VIISƐ PA’ASƐ
Viisɛ baŋɛ sɛla n sɔi ti to zɔdoma nyɔka yele pakɛ ge bisɛ hon wan nyɔɣɛ zɔdoma sɛba ti la bo ho pupeelum ho vom poan.
3. Mina sɛba n de zɔtɔ be’ero
Nɛresɛba n ka nɔŋɛ Yehowa la a pa’alegɔ la dela zɔtɔ be’ero. Ŋmɛ VIDIYO la ge nyaa sɔsɛ sokere wa:
To wan eŋɛ la wani ta’an nyɔɣɛ zɔtɔ be’ero ge puɣum ka mina?
Kaalɛ 1 Korint 15:33 ge nyaa sɔsɛ sokere ana wa:
Nɛrekani n wan ta’an dɛna zɔ be’o? Bem zuo?
Kaalɛ Yooma 119:63 ge nyaa sɔsɛ sokere wa:
Nɛrekani ti hon wan bɔta ti a dɛna ho zɔ?
Apple ayima san pɔ̃’ɛ, a ta’an sa’am bana la mɛ. Zɔ be’o wan ta’an sa’am ho la wani?
4. Nɛresɛba n boi ba to’ore la tomam ta’an dɛna to zɔsonɔ
Baabule la tɔɣɛ la David la Yonatan n yuun boi diimi Israel tiŋa la yele. Ba yuuma la ba bɔŋa zɛ’ɛsi yuun boi la to’ore to’ore ge ba yuun dela zɔsonɔ. Kaalɛ 1 Samuel 18:1 ge nyaa sɔsɛ sokere wa:
Beni n sɔi ti la ka nara ti saŋa woo tomam la to zɔdoma yuuma zuna bii to bɔŋa zɛ’an dɛna buyina?
Kaalɛ Arom 1:11, 12 ge nyaa sɔsɛ sokere wa:
Zɔdoma san nɔŋɛ Yehowa, ba ni kpemese taaba giila la wani?
Itipa’alegɔ vidiyo wa poan, bisɛ mabia ayima n de bunbilipaalega n nyɛ zɔdoma zɛse’esi ti a ka ti’isɛ poan. Ŋmɛ VIDIYO la ge nyaa sɔsɛ sokere ana wa:
Vidiyo la poan, beni n sɔi ti Akuurɛ n yuun nyɔɣɛ zɔdoma sɛba sukuu poan la yele yuun pakɛ a dɔɣereba?
Beni n sɔi ti pɔsega la, a yuun nɔŋɛ zɔtɔ bamam?
A yuun eŋɛ la wani nyɔɣɛ zɔsonɔ?
5. To wan eŋɛ se’em ta’an nyɔɣɛ zɔsonɔ
Geele bisɛ hon wan eŋɛ se’em ta’an nyɔɣɛ zɔsonɔ ge me ta’an dɛna zɔsonkɔ. Ŋmɛ VIDIYO la.
Kaalɛ Magaha 18:24 la 27:17 ge nyaa sɔsɛ sokere ana wa:
Zɔsonɔ soŋeri taaba la wani?
Hon tari zɔdoma n ani bala? Ho san ka tara, ho wan eŋɛ la wani nyɛ ba?
Kaalɛ Filipi 2:4 ge nyaa sɔsɛ sokere wa:
Ho san wan nyɛ zɔsonɔ, ho nari ti ho me dɛna zɔsonkɔ. Ho wan eŋɛ la wani ta’an eŋɛ bala?
Ho san wan nyɛ zɔsonɔ, la nari ti ho me dɛna zɔsonkɔ
NƐREBA BASƐBA YETI: “Ho san yeen nyɔɣɛ nɛresɛka deene zɔtɔ, la nyani hon ka tari zɔ.”
Hon wan yeti bem?
YELEKPINE
To san mina zɔtɔ nyɔka, la ni basɛ ti Yehowa puurɛ pee mɛ ti tomam me puurɛ ni pee.
Tiisegɔ Sokere
Beni n sɔi ti to nyɔɣeri zɔtɔ seto la yele pakɛ Yehowa?
Nɛrebani ti la ka nara ti to nyɔɣɛ ba zɔtɔ?
Ho wan eŋɛ la wani ta’an nyɔɣɛ nɛresondoma zɔtɔ?
Ɛ BISƐ
Bisɛ zɔdoma sɛba n wan ta’an soŋɛ hɔ ho san ta bɔna yele poan.
Ti’isɛ bisɛ hon wan ta’an eŋɛ sɛla nyɔɣɛ zɔsonɔ.
Bem n nari ti ho mina la intanɛt poan zɔdoma?
Zamesɛ baŋɛ buraa ayima n yuun malum ti’isɛ bisɛ eŋa n wan nyɔɣɛ zɔtɔ sɛba, n boi zi’irego poan yele la n de “Mam Yuun Kɔ’ɔn Bɔta La N Tara Sɔ” la poan.
“Baabule La Teeri Nɛreba Vom Mɛ” (The Watchtower, April 1, 2012)