Ho Wan Tɔɣesɛ Yehowa La Yezu La Wani, Tiirɛ Dia Tɛm La?

1. Yehowa Sɛɛradoma ni tiregɛ eŋɛ la bem Tiirɛ Dia tɛm la?

¹ Yehowa tuni a tuuma mɛ la ninmɔ’ɔrɛ. Isaiah yuun tɔɣɛ Naayinɛ Na’am la n wan ana se’em ti la bɔna Isaiah 9:7 ti: “Pɛɛntɛɛnreba Na’ayenɛ la ninmɔ’ɔrɛ n wan tom wana wa.” Bala mea nɔɔ ti Naayinɛ Dayɔa la yuun mɔ’ɛ nini la yelemɛŋɛrɛ pu’usegɔ la eŋa n yuun boi teŋgɔŋɔ wa zuo la. (Yon 2:13-17; 4:34) Yuunɛ woo Tiirɛ Dia tɛm la, na’am mɔɔlegɔdoma tusa tusa ni eŋɛ la ania tɔɣesɛ Yehowa la Yezu n mɔ’ɛ nini ba tuuma poan se’em la. Ho wan laɣum tum?

2. To tuulegeri tuuma la poan se’em la, wan basɛ ti to eŋɛ la bem March 7 poan?

² Tɔɣɛ Tiirɛ Dia La Yele: Yuun dena, to wan pɔsɛ la Asibidaarɛ, March 7 tɔɣɛ Tiirɛ Dia la yele bo nɛreba. Maasum nananawa ta’an laɣum tum na’am mɔɔlegɔ tuuma la. Tansuga puurɛ wan pee ti ba mɔɔlɛ bo nɛra woo ba sɔ’ɔlum la poan. Kpeŋe homea dekɛ tiirɛ dia beeŋo gɔŋɔ la bo sɛba ti ho lebe ta limese, sɛba ti ho zamesa ba Baabule la, ho suurɔ, ho zɔdoma, ho tuuma la ho sukuu tadaandoma bii ho pa’alɛ ba jw.org.

3. To wan eŋɛ la wani ta’an yalegɛ na’am tuuma la March la April poan?

³ Tum Sore Ŋmɛ’a Soŋeredoma Tuuma: To san mɔ’ɛ nini, bala wan basɛ ti to ta’an yalegɛ to na’am tuuma la. Nɔkpe’ene ka boi ti mabiisi zo’e zo’e wan tum sore ŋmɛ’a soŋeredoma tuuma March la April poan sɛla n sɔi la to ta’an dekɛ karefa 30 bii sɛla n gaŋɛ bala tisɛ. Ho san ta ita ho deodoma zamesegɔ bii homea zamesegɔ ti’isɛ bisɛ hon wan eŋɛ se’em nyaŋɛ laɣum dekɛ homea kɛ̃’ɛsɛ tuunɛ wa poan. (Maga. 15:22) Ho san mɔ’ɛ nini tuunɛ wa poan la wan kpeŋe ba sɛba giila ti ba laɣum tum. Ho san ŋmɛresɛ homea bisɛ ti ho wan ta’an laɣum tum la pa’alɛ ti ho tɔɣeseri Yezu.​—Mark 6:31-34.

4. Bem nyɔɔrɔ ti to wan nyɛ to san tɔɣesa Yehowa la Yezu n mɔ’ɛ nini se’em la?

⁴ Tiirɛ Dia tɛm la, to san tɔɣesɛ Yehowa la Yezu n tuulegeri se’em la to nyɛ nyuurɔ. Bala ta’an basɛ ti to di sɛɛra bo nɛreba zo’e zo’e. To puurɛ wan pee la to pu’useri Yehowa ge soŋera basɛba se’em la. (Tooma 20:35) Sɛla n gani bala dela to wan basɛ ti Naayinɛ la a Dayɔa puurɛ pee.