Na’am Mɔɔlegɔ Sɔsega N Wan Kpemesɛ, Kumesɛ Ge Maasum To Se’em

1. Bem zuo ti to ita na’am mɔɔlegɔ sɔsega?

¹ Yezu yuun sɔsɛ mɛ la a podɔleba 70 ge nyaa basɛ ti ba keŋɛ na’am mɔɔlegɔ. (Luke 10:1-11) A daa kpeŋe ba giila ti ba da fabela ti Yehowa, “Va’amdaana” la wan bɔna la ba. A daa le pa’alɛ ba sɛla n wan kumesɛ ba ge nyaa pu ba “bayi bayi.” Zina, to na’am mɔɔlegɔ sɔsega la me ni kpemesɛ, kumesɛ ge maasum tɔ la bala mea nɔɔ.

2. Na’am mɔɔlegɔ sɔsega nyaa dela mita a lɛ?

² Nananawa to ni dekɛ la mita 10 ta paɛ 15 eŋɛ na’am mɔɔlegɔ sɔsega, pu mabiisi, bo ba zɛ’an ti ba wan tum ge pu’usɛ. Ge la nyaa tee mɛ. Kɔ’ɔn pɔsera April poan, na’am mɔɔlegɔ sɔsega wan dɛna la mita anuu ta paɛ ayopɔi. Hali la kan paɛ bala la san dɛna ti ya kɔ’ɔn ba’asɛ la tansugere zamesegɔ, sɛla n sɔi la mabiisi la puɣum deŋɛ zamesɛ Gulesegɔ la yɛla zo’e zo’e mɛ. Na’am mɔɔlegɔ sɔsega la san dɛna gi’a gi’a, la wan soŋɛ to ti to tum yue na’am mɔɔlegɔ poan. Leyɛ’ɛsa, la san dɛna ti sore ŋmɛ’adoma bii na’am mɔɔlegɔdoma te’ele pɔsɛ mɛ ge nyaa wa’an na’am mɔɔlegɔ sɔsega la na la kan gu’um ba.

3. Ba wan maasum na’am mɔɔlegɔ sɔsega la wani ti la soŋɛ na’am mɔɔlegɔdoma?

³ Na’am mɔɔlegɔ sɔsega dela ya eŋɛ ti la soŋɛ na’am mɔɔlegɔdoma. Tansuga zo’e zo’e bisɛ ti la ani soŋa ti na’am tuuma tigesego woo laɣesɛ ba ma’a ge da laɣum taaba. Bala wan basɛ ti ba ta’an kena na’am mɔɔlegɔ sɔsega, la zɛ’an ti ba wan tum la kalam. La wan basɛ ti na’am tuuma tigesego bisega daana la ta’an maasum ba soŋa ge mina ba boi zɛ’an. Keendoma tigere la n wan bisɛ bɔŋa la poan n ani se’em ge pa’alɛ sɛla n nari. La nari ti nɛra woo mina se’em ti a wan doose keŋɛ la zɛ’an ti ba wan tum ge ti ya nyaa pu’usɛ.

4. Bem zuo ti na’am mɔɔlegɔ sɔsega dɛna ninmɔ’ɔrɛ wuu tansugere zamesegɔ?

⁴ La De Ninmɔ’ɔrɛ Wuu Tansugere Zamesegɔ: Ba ni eŋɛ na’am mɔɔlegɔ sɔsega ti la soŋɛ la sɛba n wan keŋɛ na’am mɔɔlegɔ ge daɣɛ tansugere la za’a n wan laɣesɛ. Wana wa ka pa’alɛ ti la yele ka pakɛ bii la ka de ninmɔ’ɔrɛ wuu tansugere zamesegɔ la. To san bisɛ to zamesegɔ za’a n ani se’em la, na’am mɔɔlegɔ sɔsega dela maalegɔ ti Yehowa eŋɛ bo to ti la soŋɛ tɔ ti to ta’an soŋera taaba, tara nɔŋerɛ ge me ita sɛla n ani soŋa. (Heb. 10:24, 25) La nari ti mina n wan bisɛ na’am mɔɔlegɔ sɔsega la maasum soŋa soŋa ta’an tɔɣɛ ti la tara na’asegɔ bɔ’ɔra Yehowa ge ti mabiisi la me nyɛ nyuurɔ. La ani soŋa ti na’am mɔɔlegɔdoma sɛba n wan keŋɛ na’am mɔɔlegɔ la mɔ ge keŋɛ ta kelese.

5. (a) Na’am tuuma bisega daana la wan eŋɛ la wani ti mina n wan bisɛ na’am mɔɔlegɔ sɔsega la maasum soŋa? (b) Mabia n de pɔka nari ti a eŋɛ la wani ge bisɛ na’am mɔɔlegɔ sɔsega?

⁵ Mina N Wan Bisɛ Na’am Mɔɔlegɔ Sɔsega N Wan Maasum Se’em: La wan eŋɛ se’em ti mabia ta’an maasum soŋa soŋa pa’alɛ nɛreba zamesegɔ poan ti ba bɔkɛ, see ti ba te’ele dekɛ tuunɛ la bo en kalam. Na’am mɔɔlegɔ sɔsega la me ani la bala mea nɔɔ. Na’am tuuma tigesego woo san ni laɣesɛ, na’am tuuma tigesego bisegadoma la bii sɛba n soŋeri ba la n wan bisɛ. Tansugere la za’a san yeti ba laɣum keŋɛ na’am mɔɔlegɔ, na’am tuuma bisega daana la n wan loe mabia ti a bisɛ. Na’am tuuma bisegadoma basɛba ni maasum la sɛba woo n tari tuunɛ bo ba ge dekɛ labelɛ. Na’am tuuma bisega daana la dela a mina eŋa n wan bo tuunɛ la se’em ge tɛra ti sɛba n wan bo sɔsega wa nari ti ba mina pa’alegɔ soŋa. Keenma, keendoma soŋerɛ daana bii mabia n de buraa muse ko’om ge kumesɛ san ka bɔna, na’am tuuma bisega daana la ta’an yele mabia n de pɔka muse ko’om ge wan ta’an bisɛ.​—Bisɛ zɛ’an n yeti, “La San Nara Ti Mabia N De Pɔka Bisɛ Na’am Mɔɔlegɔ Sɔsega.”

6. Bem zuo ti la dɛna ninmɔ’ɔrɛ ti se’em n wan bisɛ na’am mɔɔlegɔ sɔsega la maasum soŋa?

⁶ To san tara tuunɛ Tiokrasi Sukuu Tuuma bii Na’am Tuuma Zamesegɔ poan, to ni mɔ’ɛ la nini maasum soŋa. To ni ka gura to san yɛ’ɛsa zamesegɔ ge nyaa pɔsɛ maasena. Na’am mɔɔlegɔ sɔsega dela to me ni te’ele maasum. Nananawa ti na’am mɔɔlegɔ sɔsega nyaa dɛna gi’a gi’a wa, maaseŋɔ dela ninmɔ’ɔrɛ la wan eŋɛ se’em ti ho ta’an pa’alɛ ti mabiisi la bɔkɛ. Sɛla n wan le pa’alɛ ti ho maasum soŋa dela ho te’ele mina zɛ’an ti ya wan tum.

7. Bem yɛla n nari ti se’em n wan bisɛ na’am mɔɔlegɔ sɔsega la tɔɣɛ?

⁷ Sɛla N Nari Sɔsega: Teŋa woo la ka zombune la zuo n sɔi ti ‘sakerɛ’ yameŋa la ka pa’alɛ to sɛla mɔpi ti to tɔɣɛ na’am mɔɔlegɔ sɔsega woo poan. “Yelese’a N Nari Na’am Mɔɔlegɔ Sɔsega” daka la, pa’alɛ to wan eŋɛ se’em. Na’am mɔɔlegɔ laɣesegɔ dela sɔsega. Tɛm busebo ho ta’an eŋɛ itipa’alegɔ bii ho yese vidiyo n makɛ bɔna jw.org poan. Se’em n wan bisɛ na’am mɔɔlegɔ sɔsega la san maasena, la nari ti a ti’isɛ bisɛ eŋa n wan tɔɣɛ sɛla ti la kpemesɛ ge kumesɛ mabiisi la n ye na’am mɔɔlegɔ la.

8. Asibidaarɛ la Alaserɛdaarɛ na’am mɔɔlegɔ sɔsega poan, bem yɛla n nari ti to tɔɣɛ la yele?

⁸ Asibidaarɛ woo, na’am mɔɔlegɔdoma zo’e zo’e ni tara la The Watchtower la Awake! bɔ’ɔra nɛreba. Mabiisi n ni maasum sɛla ba Deodoma Pu’usegɔ poan ti ba mɔɔlɛ ge ka nyaŋɛ keŋɛ bakwai la poan la, ta’an basɛ ti ba zo’e zo’e tamɛ ba san yɛa na’am mɔɔlegɔ Asibidaarɛ. Bala la mina n wan bisɛ na’am mɔɔlegɔ sɔsega la, ta’an dekɛ ba pa’alɛ to sɛla ti la bɔna To Na’am Tuuma gɔŋɔ la pooren tiɛ ba. Sɛla ti ho wan ta’an le eŋɛ dela ho tɔɣɛ sɛla n pakɛ nɛreba la bii sɛla n eŋɛ gingilega la poan ge dekɛ magazines la bo bii hon wan eŋɛ se’em lebe ta nyɛ en a san to’e magazines la. Mabiisi la san deŋɛ tara magazines la tuna tuuma, se’em n wan bisɛ na’am mɔɔlegɔ sɔsega la ta’an soke ba ti ba tɔɣɛ gi’a gi’a bamam n dekɛ magazines la tum tuuma ti la tara nyuurɔ se’em. Alaserɛdaarɛ me, se’em n wan bisɛ na’am mɔɔlegɔ sɔsega la ta’an dekɛ sɛla ti to wan bo ŋmarega la poan eŋɛ bala mea nɔɔ. Ho ta’an dekɛ Yelesoma la Kɛlesa Naayinɛ gɔnlɛmlɛm, la Bible Teach gɔŋɔ la ti to ni tara zamesa nɛreba la bo dabeserɛ woo. Bala la, na’am mɔɔlegɔ sɔsega poan ho ta’an pa’alɛ to wan dekɛ gɔnɔ wa bo se’em.

9. Bem yɛla n nari ti to sɔsɛ, tansugere la san tara gɔŋɔ n boi de to’ore bɔ’ɔra nɛreba Asibidaarɛ la Alaserɛdaarɛ?

⁹ Tansugere la san tara gɔŋɔ n boi de to’ore bɔ’ɔra nɛreba Asibidaarɛ la Alaserɛdaarɛ, mina n wan bisɛ na’am mɔɔlegɔ sɔsega la ta’an pa’alɛ ba wan dekɛ magazines paala, beeŋɔ gɔŋɔ bii gɔnpika bo se’em. A ta’an le pa’alɛ hon wan yele sɛla nɛra la san kelese ho. Sarɔɔ kuyima me dela a tɔɣɛ pa’alɛ to ni ta tara gɔŋɔ n boi de to’ore bɔ’ɔra nɛreba ti la tara nyuurɔ se’em.

10, 11. Bem zuo ti na’am mɔɔlegɔdoma san te’ele maasum la wan basɛ ti na’am mɔɔlegɔ sɔsega la ana soŋa?

¹⁰ Na’am Mɔɔlegɔdoma N Wan Maasum Se’em: Na’am mɔɔlegɔdoma me wan nyaŋɛ soŋɛ ti na’am mɔɔlegɔ sɔsega ana soŋa. Ba deodoma pu’usegɔ poan, ba san ni te’ele maasum soŋa ba wan ta’an soŋɛ ba tadaandoma na’am mɔɔlegɔ poan. Sɛla n wan le pa’alɛ ti ho maasum soŋa dela ho te’ele ee magazines la gɔnɔ ge nyaa keŋɛ na’am mɔɔlegɔ sɔsega la, la wan eŋɛ se’em ti ho da gu’um ba san ta pu ba’asɛ.

¹¹ La me le nari ti to te’ele paɛ ge ti na’am mɔɔlegɔ sɔsega la pɔsɛ. To za’a mɔɔri mɛ kena tansugere zamesegɔ kalam. To san ni ka paɛ na’am mɔɔlegɔ sɔsega poan kalam la tari la daaŋɔ zo’e zo’e. Bem zuo? Mabia la n biseri na’am mɔɔlegɔ sɔsega la ni geele la yɛla zo’e zo’e ge nyaa pu. Na’am mɔɔlegɔdoma san ka zo’e wa’an na, a ta’an basɛ ti ba za’a keŋɛ zɛ’an ti ba ka ba’a kena bini. Basɛba san keŋɛ nama wa’ana ge ti zɛ’an ti ya yea la zaɛ, a ta’an pu ba ti ba doose sɛba n tari lɔa la. Nɛreba san tuna tuunfi’isa zɛ’an ti ya yea la, a ta’an basɛ ti buraasi naɛ la pɔɣesi la tum bii ba lɛm ba. Na’am mɔɔlegɔdoma sɛba inya n ka bari ta’an tum yɛa se’a n ka tari kura bii zɛ’an ti kunkuma ka bɔna. Na’am mɔɔlegɔdoma sɛba n ka ba’a kumesɛ ta’an tum la sɛba n kumesɛ. Ge na’am mɔɔlegɔdoma la san wa’an pooren na see ti a le malum pu. To ta’an ni ta yibegɛ kan wa’an na’am mɔɔlegɔ kalam na. Ge la san dɛna ti tɛm woo to ka keni kalam na, la dela to soke tomea bisɛ, to ka tari la na’asegɔ bɔ’ɔra na’am mɔɔlegɔ sɔsega la bii to ni ka te’ele maasum mɛ.

12. Ho san dɛna la mina n nɔŋɛ ho dɔla mabia ayima ma’a kena na’am mɔɔlegɔ tɛm woo, bem n nari ti ho eŋɛ?

¹² Na’am mɔɔlegɔ daana ta’an te’ele loe mina ti a wan doose en keŋɛ ge ti na’am mɔɔlegɔ sɔsega la pɔsɛ bii ba bo en nɛra. Ho san dɛna la mina n nɔŋɛ ho dɔla mabia ayima ma’a kena na’am mɔɔlegɔ tɛm woo la wan ana soŋa ti ho ni ‘tee doose’ na’am mɔɔlegɔdoma basɛba me keŋɛ. (2 Kor. 6:11-13) Ho wan ta’an maasum doose la mina n ka ba’a kumesɛ keŋɛ na’am mɔɔlegɔ ti a me ta’an mina pa’alegɔ? (1 Kor. 10:24; 1 Tim. 4:13, 15) Kelese mina n biseri na’am mɔɔlegɔ sɔsega la soŋa, yele yele wuu zɛ’an ti ya wan tum. Sɔsega la san ba’asɛ da tee n pu ya se’em la, keŋɛ ya kalam.

13. To za’a waabi san eŋɛ sɛla n nari ti to eŋɛ, bem nyuurɔ ti to wan nyɛ na’am mɔɔlegɔ sɔsega poan?

¹³ Nɛreba 70 la ti Yezu yuun maasum ba ti ba keŋɛ na’am mɔɔlegɔ la, ‘ba yuun lebena la, ba puurɛ pee mɛ.’ (Luke 10:17) Nɔkpe’ene ka boi ti la dela Yezu n yuun maasum ba la n sɔi ti ba ta’an tum tuunɛ la. Zina me, na’am mɔɔlegɔ sɔsega soŋeri to la bala mea nɔɔ. To za’a waabi san eŋɛ sɛla n nari ti to eŋɛ, na’am mɔɔlegɔ sɔsega wan nyaŋɛ kpemesɛ, kumesɛ ge maasum tɔ ti to ta’an mɔɔlɛ yelesoma ti la “dɛna aseradaana bo teŋhe zan’an.”​​—Matu 24:14.