Tari Ya Tɛm Tuna Soŋa Na’am Mɔɔlegɔ Poan
Yehowa Sɛɛradoma dekɛ la karefa 1,945,487,604 mɔɔlɛ na’am yelesoma la 2014 na’am tuuma yuunɛ la poan. Wana pa’alɛ ti to nini mɔ’ɛ mɛ la Yehowa tuuma la! (Yoom 110:3; 1 Kor. 15:58) ‘Tɛm la n ka le gee zo’e bo to’ la, la kan ana soŋa ti to mɔ’ɛ nini ɛɛ nɛreba na’am mɔɔlegɔ poan?—1 Kor. 7:29.
La dela to mina to wan eŋɛ se’em ta’an dekɛ to tɛm tum soŋa na’am mɔɔlegɔ poan. La san dɛna ti ho ni bɔna la na’am mɔɔlegɔ poan ge ni dekɛ karefa ayina bii sɛla n gaŋɛ bala ka nyaŋɛ tɔɣɛ bo nɛra, la kan ana soŋa ti ho bisɛ ho wan eŋɛ se’em ta’an tɔɣɛ bo nɛreba? Nɛreba boi la tɔka tɔka. Ho san dekɛ pa’alegɔ wa tum tuuma, la wan soŋɛ ho ti ho ta’an dekɛ ho tɛm tum soŋa la “ninmɔ’ɔrɛ.”—1 Kor. 9:26.
Di Sɛɛra Yire-La-Yire: Yuuma zo’e zo’e n wana ti to ni pɔsɛ na’am mɔɔlegɔ tuuma bulika yire la yire poan. Ge nɛreba n ni bɔna tuuma poan la, la wan ani soŋa ti to me ni mɔɔla yire la yire poan zaanɔɔrɛ bɔba sɛla n sɔi la tɛm bumɔ ti nɛreba zo’e zo’e ni bɔna yire. Dabeserɛ la poan, to ta’an dita sɛɛra koosego zɛ’an bii sore zuo.
Di Sɛɛra Nɛreba Zɛ’an: La nari ti ya dekɛ gɔnɔ torego bii teebule ze’ele tansugere la zɛsɛka ti nɛreba zo’e. (Bisɛ July 2013 To Na’am Tuuma, gɔn. 5.) Nɛreba san kan le zo’e bini, Tansugere Na’am Tuuma Bisegadoma la ta’an pa’alɛ zɛ’an n nari ti ba tee dekɛ teebule la bii gɔnɔ torego la ze’ele.
Lebe Ta Limese La Baabule Zamesegɔ: Ho san bɔna zɛ’an mɔɔla na’am yelesoma la ti la ka nɛ nini, ho ta’an tee lebe ta limese bii eŋɛ Baabule zamesegɔ. Makerɛ n wana, la san dɛna ti Asibidaarɛ bulika ti yire la yire na’am mɔɔlegɔ ani soŋa ho ta’an ba’asɛ ge tee eŋɛ ho Baabule zamesegɔ la wuntɛɛŋa bii zaanɔɔrɛ bɔba. Ya san yeti ya lebe ta limese, la wan ana soŋa ti mabiisi la laɣum doose taaba keŋɛ zɛ’an kayima.
La boi bim ti to san keŋɛ na’am mɔɔlegɔ to ni gulesɛ la tɛm ge to puurɛ wan pee gaŋɛ bala to san paɛ nɛreba la. Ho san bɔna na’am mɔɔlegɔ poan tɛm busebo ti la ka nɛ nini, tiregɛ bisɛ sɛla ti ho wan eŋɛ. Pu’usɛ bo Yehowa, “Va’amdaana la” ti a soŋɛ ho ti ho ta’an dekɛ ho tɛm la tum soŋa na’am mɔɔlegɔ poan!—Matu 9:38.