Laɣesegɔ Tiisegɔ Yɛla
Yeletigesego Tɛm: Dabesa atã la za’a waabi poan, to wan pɔsɛ yuuma la 9:20 a.m. Yuuma la san ta pɔsɛ, to za’a waabi keŋɛ ta ee to zi’irego zɛ’an la wan eŋɛ se’em ti ba ta’an pɔsɛ soŋa. Ba wan ba’asɛ Azumadaarɛ la Asibidaarɛ laɣesegɔ la 5:00 p.m. ge ti Alaserɛdaarɛ me dɛna 4:00 p.m.
‘Yuum Pɛɣɛ Yehowa’: Diimi sa, Naayinɛ nɛreba yuun ni dekɛ la yuuma pɛɣɛ Yehowa, bala mea nɔɔ ti zina beere wa yuuma kelum dɛna ninmɔ’ɔrɛ bɔ’ɔra to. (Yoom 28:7) To wan pɔsɛ to teŋkatɛ laɣesegɔ wele la woo la yuuma. La daɣɛ yuuma ti to yeen ni ŋmɛ’ɛra ge la dela sɛla n wan basɛ ti to maasum ta’an pu’usɛ Yehowa soŋa. Bala la, kuka zuo daana la san yeti yuuma la wan pɔsɛ, la nari ti to ee zɛ’an zi’ire ge kɛlesa yuuma la ge daɣɛ to kelum zea sɔsa. To san eŋɛ bala, la pa’alɛ ti to puurɛ pee mɛ la to mabiisi sɛba n boi Watchtower maalɛ yuuma la. To mabiisi wa ni eŋɛ la sanɛ keŋɛ Patterson, New York, sugumnɔɔrɛ buyi yuunɛ woo poan ta maasum yuunsoma wa bo to. Yuuma la san ta go’e, to za’a waabi nari ti to laɣum yuum to Na’am yuuma la pɛɣɛ Yehowa.
Ze’elego Zɛ’an: San daɣena ti ho bɛ̃’ɛri mɛ bii sɛla n ba’a pakɛ, la wan ani soŋa ti to zi’ire zɛ’an ti to wan ta’an kelese yetɔɣum la soŋa soŋa nyana to zi loore poan kan nyaŋɛ kelese soŋa ti gɔɔm ta zɛɛ tɔ. To san laɣum la to mabiisi la kɛlesa yetɔɣum la, bala wan pa’alɛ ti to puurɛ pee Yehowa n bo’ori to vo’osum dia se’em la. Ze’elego zɛ’an n ni ka ba’a yalegɛ la, la wan ani soŋa ti to sɛba basɛ to lɔa yire ge laɣum doose basɛba wa’ana.
Ee Zi’irego Zɛ’an: Ho wan ta’an deŋɛ kuka bo la sɛba ti hon la bamam laɣum zom loore, ho deodoma bii sɛba ti ho zamesa ba Baabule la ma’a. Soso da dekɛ lɔɣɔrɔ biŋe kuɣese’a n lɛm ho la zuo. Ho san doose ba pa’alɛ se’em wa, la wan basɛ ti basɛba baŋɛ ti nɛreba ka zi kuɣesi wa poan. Sɛba n kuregɛ la sɛba inya n ka barɛ wan tara ba zi’irego zɛ’an mɛ laɣesegɔ la poan. Zi’irego zɛ’an wa n pɔ’ɛ la, la ka nari ti nɛra zi’ire bim san daɣena la se’em ti ho bisera en la ma’a ti ho wan zi’ire lɛm en.
To Wan Yɛ To Lɔɣɔrɔ Se’em: To laɣesegɔ la poan, la nari ti to doose yɛm sore poan pɛ’ɛra to lɔɣɔrɔ ti la makɛ ma’a ge da tɔɣesɛ teŋgɔŋɔ la n yɛɛri ba lɔɣɔrɔ se’em la. (1 Tim. 2:9) To san bɔna ga’aregɔ zɛ’an ge ni yeti to yese ta eŋɛ sɛla, to yɛ lɔɣɔrɔ n nari. Bala wan basɛ ti to ta’an gba to laɣesegɔ kaati la ta’an di sɛɛra to san nyɛ yɔ’ɔ. To san yɛ to lɔɣɔrɔ soŋa ge tara sareŋɔ soŋɔ, la wan basɛ ti putɛsonɛdoma bɔta ti ba baŋɛ Baabule yelesum la ge ti Yehowa me puurɛ wan pee.—Zep. 3:17.
To Wan Dekɛ Electronic Lɔɣɔrɔ Tum Tuuma Se’ema: Laɣesegɔ la san pɔsɛ, to wan bɔta ti to ti’isa basɛba yele ge mina to wan eŋɛ to telefon bii electronic lɔɣɔrɔ se’em ti la da daam basɛba. To san tara camera bii tablet ŋmata fɔɔra bii nyɔɣera vidiyo, to beleni ya mɛ ti ya da zɛkɛ bu saazuo lile sɛba n boi ya pooren la. To wan le eŋɛ se’em ti la pa’alɛ ti to ti’isi basɛba yele dela to da zi’a ge tara telefon di’isa laɣesegɔ la poan.
Wuntɛɛŋa Dia: Soso, tari ho wuntɛɛŋa dia wa’an laɣesegɔ la na la wan eŋɛ se’em ti ho da basɛ laɣesegɔ la poan ge yese ta da dia. To ta’an dekɛ to dia la eŋɛ cooler n makɛ ma’a ti to wan ta’an dekɛ ze’ele kuka leŋen. La ka nari ti to tara cooler kara la glass wa’an laɣesegɔ la poan na.
Sɛla Ti To Wan Ta’an Dekɛ Bo: Sɛla ti to wan eŋɛ pa’alɛ ti to puurɛ pee laɣesegɔ la poan dela to yese to suure poan soŋɛ teŋgɔŋɔ wa za’a waabi na’am tuuma la. Mina n boti a dekɛ banki-gɔŋɔ (cheque) bo laɣehɔ, a gulesɛ bo “Watch Tower.”
Tiim: Ho san bɛ̃’ɛra ti ba bo ho tiim ti ho myuura, soso tari bo wa’ana sɛla n sɔi la to kan tara tiim wa taaba laɣesegɔ la poan.
Tara Homea Soŋa: Soso, la wan ana soŋa ti to tara tomea soŋa la wan eŋɛ se’em ti to da ta sɛregɛ bii pirɛ lui pɔɣelum. Yuunɛ woo to nyɛti pɔɣeleŋɔ laɣesegɔ poan doose la to piti taɣewogero la. La wan ana soŋa ti to san yea laɣesegɔ, to pire taɣera n ka wɔɣɛ ge makɛ ma’a ti to ta’an zona kura ge kena fai fai zɛ’an woo.
Pɔɣeleŋɔ La Yeledi’ima: Sɛla san eŋɛ nɛra laɣesegɔ la poan, soso nyɛ sɛba n soŋeri la ti ba yele Imma’asum Soŋerɛdoma la ti ba wa’ana bisɛ ba wan eŋɛ se’em.
Bɛɣesegɔ: Nɛra woo nari ti a piisɛ a zi’irego zɛ’an a san di ba’asɛ. Soso, kɔ’ɔn pi’ise pipa, ko’om rɔba la sɛla woo n zɔkɛ teŋa za’a eŋɛ sɔɣɔrɔ bɔɣetɛ la poan. To san ita bala, la pa’alɛ ti to dela nɛreba n ka boti dɛɣerɔ.
Nama Dɔbelegɔ Zɛ’an: Da basɛ ti ho kɔma kena nama dɔbelegɔ zɛ’an la yoo yoo ba san bɔ’ɔra yetɔɣum. Ho kɔma san bɔta ti ba keŋɛ ta dɔbelɛ nama bii ba du’urɛ, soso tara ba keŋɛ bii ho basɛ ti ba doose bunkutɛ keŋɛ.
Ba San Yese Lɔɣepaala: Naayinɛ Yetɔɣum la yeti to ‘tuna to tuuma nɔŋerɛ sore poan.’ (1 Kor. 16:14) To tari nɔŋerɛ ge ti basɛba yele pakɛ to la zuo, ba san yese lɔɣepaala laɣesegɔ la poan, to kan bɔta ti to zɔta bii za’ara to tadaandoma ti to to’e lɔɣepaala la yia. Bala la, to san nyɔkera tomea, la pa’alɛ ti to dela Kristakɔma n bi vo’osum poan ge tara nɔŋerɛ bɔ’ɔra taaba.—Yon 13:35.
Please Follow Up (S-43) Sokere Gɔnɔ: Ho san bɔna laɣesegɔ la poan ge ta di sɛɛra ti nɛra la bɔta yele la, dekɛ Please Follow Up sokere gɔŋɔ la gulesɛ nɛra la address. Ho san gulesɛ ba’asɛ, dekɛ tisɛ Gɔnɔ Bu’a Zɛ’an la bii ho dekɛ ta bo ho tansugere gɔngulesa.
Dia Koosego Zɛ’an: Ho san keŋɛ zɛ’an ti ho ta di, basɛ ti ho sareŋɔ tara na’asegɔ bɔ’ɔra Yehowa. Yɛ ho lɔɣɔrɔ soŋa ti la pa’alɛ ti ho dela Kristabia. Ho san bisɛ ti la nari, bo sɛba n tuni bim la sɛla.
Ga’aregɔ Zɛ’an:
Ho san yɔ ge kɛ̃’ɛra deo poan, soso la ka nari ti to zo’e deo la poan gaŋɛ ba pa’alɛ se’em la.
Mabia me san dekɛ deo bo ho ti ho ga’arɛ, mina homea bɛɣesegɔ ti la pa’alɛ ti ho puurɛ pee ya.
Buraasi la pɔɣesi ka nari ti ba laɣum ga’a san daɣena ti ba dela suurɔ.
Ho san bɔta ti ho duɣɛ, keŋɛ ba pa’alɛ ho zɛ’an la.
La ka nari ti to sɔɔra inya yiŋa. Ya san yeti ya sɔ yiŋa, maalɛ ya insɔɔseŋa.
Tomam n de Kristakɔma la to kan bɔta ti to sa’am lɔɣɔrɔ.
Basɛ ti ho halisonɛ la niɛ pa’alɛ ho san kɛ̃’ɛra mabia zɛ’an bii zɛ’an ti ho yɔ.
Dɔɣereba nari ti ba bisa ba kɔma soŋa ba kɛ̃’ɛri zɛ’an la.
Daaŋɔ san bɔna hon kɛ̃’ɛri zɛ’an la, yele Sɛba N Biseri Deto laɣesegɔ la poan.
Laɣum Soŋɛ Tuuma: Mina san bɔta ti a laɣum soŋɛ tuuma laɣesegɔ wa poan, a keŋɛ Laɣum Soŋɛ Tuuma Wele wa ge ba wan pa’alɛ en tuunɛ n boi zɛ’an. Kɔma san ka paɛ yuun 16, ba dɔɣereba bii bunkutɛ ta’an bisa ba ti ba laɣum soŋɛ. Tuuma wele bisegadoma la n nari ti ba te’ele loe teŋgirega la poan, sɛba n wan soŋɛ ge ti laɣesegɔ la nyaa paɛ.