Tɔɣesa Nɔdɛ’ɛsadoma La—Habakuk
1. Tomam dabesa wa yɛla makɛ la wani la nɔdɛ’ɛsa Habakuk dabesa la?
1 Wuu to tu’useri yeledaaŋɔ to bɔŋa poan la, la wan ta’an basɛ ti to ti’isa wuu Habakuk n yuun soke Yehowa ti: “Bene te ho bahɛ te mam nini nyɛta yelese’a n dagɛ tontɔɔ? Bene te ho [basɛ ti mɛlesegɔ bɔna]?” (Hab. 1:3; 2 Tim. 3:1, 13) To san ti’isa taɣesa Habakuk yɛla la, la a makesonɛ la wan ta’an soŋɛ tɔ ti to ma’ɛ tomea gura Yehowa gankerɛ dabeserɛ la.—2 Pet. 3:7.
2. To wan eŋɛ la wani pa’alɛ ti to tari sakerɛ zina beere wa?
2 Tara Sakerɛ Ho Vom Poan: Habakuk n yuun wan basɛ ni ti a puti’irɛ bɔna a yeledaaŋɔ poan la a yuun pige mɛ ge mɔɔra vo’osum poan. (Hab. 2:1) Yehowa yuun yele Habakuk ti sɛla woo ti eŋa yele la wan sirum tum tuuma de saŋa poan ge “tontɔɔdoma wan vɔna mɛ la ba sakerɛ la poan.” (Hab. 2:2-4) Wana wa vuurɛ dela bem bɔ’ɔra Kristakɔma n boi ba’asegɔ dabesa wa poan? Sɛla n pakɛ la dela to sakɛ ti ba’asegɔ la wan sirum wa’ana ge daɣɛ to ti’isa sansɛka ti la wan wa’ana. Sakerɛ n basɛ ti to piga ge ti na’am mɔɔlegɔ tuuma la me bɔna nɛŋa to vom poan.—Heb. 10:38, 39.
3. Beni n sɔi ti la nara ti to tara pupeelum pu’usa Yehowa?
3 Tara Pupeelum Yehowa Poan: Gog n boi Magog san zabɛ la Yehowa nɛreba la, la wan tari gurebisɛ wa’an to sakerɛ poan. (Ezek. 38:2, 10-12) Zaberɛ basɛ ti wuŋerɛ paara tɔ hali la sɛba n ni zabɛ nyaŋɛ la. Dia ta’an ta pɔ’ɛ, lɔɣɔrɔ ta’an sa’am ge ti to bɔŋa poan me kpe’em. To wan eŋɛ la wani yeledaaŋɔ san paɛ tɔ? Habakuk yuun mi ti a wan tu’usɛ yeledaaŋɔ, bala la a yuun lu a suure mɛ pu’usa Yehowa la pupeelum. (Hab. 3:16-19) Tomam me san ‘pu’usa [Yehowa] la pupeelum’ la wan soŋɛ tɔ ti to ta’an ŋmibe ze’ele beere sa’am gurebisɛ poan.—Neh. 8:10; Heb. 12:2.
4. To wan eŋɛ la wani ta’an nyɛ pupeelum zina la beere sa’am?
4 Sɛba ti Yehowa wan faɛ ba basɛ a gankerɛ daarɛ la wan kelum zamesa Naayinɛ n boti sɛla. (Hab. 2: 14) Hali sɛbadoma ti ba wan isige ba kum poan la wan zamesɛ Yehowa yɛla. Zina beere wa, basɛ ya ti to dekɛ yɔ’ɔ woo ti to wan nyɛ tɔɣɛ Yehowa yelenyalema la bo nɛreba!—Yoom 34:1; 71:17.