“Paul Po’ohɛ Naayinɛ Ge Maan Nyɛ Paŋa”

Arom tansugere la n yuun wum ti Paul ye la ba zɛ’an na la, ba yuun tum la mabiisi ti ba dekɛ mila 40 (km 64) tu’usɛ en sore. La yuun ani Paul la wani la mabiisi la n yuun aaregɛ bamea tara nɔŋerɛ se’ere bɔ’ɔra en la? “Paul n nyɛ wana wa la, a po’ohɛ Yenɛ ge maan nyɛ paŋa.” (Tm 28:15) La boi bim ti Paul yuun dela mina n eeri kaara kpɛmesa tansuɣa la ge sankaŋa wa ti a bɔna sarega poan la, eŋa n tuɣum nara ti ba kpemesɛ a giila.​—2Kor 13:10.

Zina beere wa, kaarɛ bisegadoma n eeri kaara tansuɣa kpɛmesa to mabiisi giila. Wuu Naayinɛ nɛreba ti yelese’a paara ba la, saŋa a se’a tɔregɔ, putɛyiila la giilekɔ’ɔsegɔ n ni tara ba. Kaarɛ bisegadaana la a pɔɣa san wa’an ho tansugere na, ho wan eŋɛ la bem kpemese ba giila ti ya za’a “nyɛ paŋa pa’ahɛ”?​—Arom 1:11, 12.

• 

  Laɣum keŋɛ na’am mɔɔlegɔ. Na’am mɔɔlegɔdoma san maasum bamea laɣum soŋɛ na’am tuuma bakwai la poan, kaarɛ bisegadaaana la puurɛ ni pee mɛ. (1Tes 1:2, 3; 2:20) Ho ta’an eŋɛ sore ŋmɛ’a soŋerɛ tuuma, a kaarɛ ŋmarega la poan. Ho wan bɔta ti ho naɛ eŋa la a pɔɣa keŋɛ na’am mɔɔlegɔ bii ho tari ayima keŋɛ ho Baabule zamesegɔdaana zɛ’an? Ba puurɛ ni pee mɛ ti ba laɣum la mabiisi tum hali la sɛba n nam pɔsɛ na’am mɔɔlegɔ bii sɛba n ka kumesɛ soŋa.

• 

  Tɔ’ɔsa Saama. Ho wan ta’an bo ba ga’aregɔ zɛ’an bii ho eŋɛ dia bo ba? Wana wa wan pa’alɛ ti ho nɔŋɛ kaarɛ bisegadaana la a pɔɣa la mɛ. Ba ka eeri ti ho eŋɛ sɛla zo’e zo’e bo ba.​—Lu 10:38-42.

• 

  Kelese a ka’aŋɔ ge dekɛ tum tuuma. Kaarɛ bisegadaana la puurɛ ni pee ti a kumesɛ tɔ ti to nyɛ nɛŋa tɔlega Yehowa pu’usegɔ poan. Saŋa a se’a, la ta’an ni dɛna ti a ka’am tɔ la ninmɔ’ɔrɛ. (1Kor 5:1-5) To san to’e ka’aŋɔ la ge sirege to mea, a puurɛ ni pee mɛ.​—Heb 13:17.

• 

  Eŋɛ pa’alɛ ti ho puurɛ pee ya. Yele kaarɛ bisegadaana la a pɔɣa la ba ania itigɔ la n soŋɛ hɔ se’em. Ho ta’an yele ba bii ho gulesɛ gɔŋɔ bii card bo ba.​—Kol 3:15.