Hon Wan Dekɛ Gɔnpiɣesi La Pɔsɛ Sɔsega Se’em

Kɔ’ɔn pɔsɛ January 2018 poan, Vom La Na’am Tuuma Zamesegɔ Gɔŋɔ la nɛŋa la tari la na’am mɔɔlegɔ sɔsega. Ba yele to ti to basɛ ti to puti’irɛ kɔ’ɔn bɔna to wan eŋɛ se’em ta’an pɔsɛ sɔsega la nɛreba gana to wan yeen bɔ’ɔra gɔnɔ. La wan eŋɛ se’em ti la soŋɛ na’am mɔɔlegɔdaana la, na’am mɔɔlegɔ sɔsega vidiyodoma la pa’alɛ tɔ to wan eŋɛ se’em ta’an dekɛ Baabule la pɔsɛ sɔsega. Wana wa pa’alɛ ti to ka nari ti to tara to gɔnɔ la tuna tuuma yire la yire na’am mɔɔlegɔ la poan? Daɣɛ bala la fii me! Makerɛ n wana, gɔnpiɣesi la dela lɔɣɔsoma ti to wan ta’an dekɛ a pɔsɛ sɔsega. To wan ta’an dekɛ yele ana wa tum tuuma to san bɔta ti to dekɛ gɔnpiɣesi la tum tuuma:

1. Dekɛ sokese’a n boi gɔŋɔ la nɛŋa la tum tuuma.

2. Dekɛ Baabule lebesego la n boi gɔnlaka buyi la saazuo bɔba la pa’alɛ en. Saŋa san bɔna, ho ta’an kaalɛ ge sɔsɛ yelese’a n boi gɔnpika la poan.

3. Dekɛ gɔnpika la bo yidaana la ge kpemese a giila ti a kaalɛ sɛla n gee la.

4. Ge ti ho nyaa yese la, pa’alɛ en sokere la n boi “Ti’isɛ Bisɛ” ge yele en ti ho wan lebe na dekɛ Baabule la bo en lebesego.

Ho san lebe a zɛ’an, sɔsɛ lebesego la n boi gɔnpika la poan ge le soke en sokere ti ya wan sɔsɛ daanse’ere. Ho wan ta’an loe sokere n boi to intanɛt tuuma zɛ’an bii gɔnseko ti ba tɔɣɛ de yele gɔnpika la pooren la. Bisɛ sansɛka n nari ge nyaa pɔsɛ Yelesoma N Ze’ele Naayinɛ Ze’an Na! gɔnlɛmlɛm la bii gɔnseko ti to tara ita zamesegɔ ti la bɔna Pa’alegɔ Lɔɣɔrɔ Daka la poan.