Sokese’a Ti Sɛba N Kaali La Sɔkera
Nɛrebani ti ba wan isige ba tinparɛ wa zuo ge bem kum isigere ti ba wan nyɛ?
Geele bisɛ Baabule la n lebese soke ana wa se’em.
Tooma 24:15 yele to yeti ba “wan isige tontɔɔdoma la sɛba n daɣɛ tontɔɔdoma kum poan.” Tontɔɔdoma la dela nɛresɛba n yuun nani Naayinɛ nɔɔrɛ ge nyaa ki, bala zuo la ba yu’ura boi vom gɔŋɔ la poan mɛ. (Ma. 3:16) Nɛresɛba n daɣɛ tontɔɔdoma dela sɛba n yuun ka nyɛ yɔ’ɔ soŋa soŋa zamesɛ baŋɛ Yehowa yele ge nyaa ki, bala zuo la, ba yu’ura ka boi vom gɔŋɔ la poan.
Yon 5:28, 29 la Tooma 24:15 laɣum tɔɣera la nɛreba sugumnɔɔrɛ buyi yele. Yezu yeti “sɛba n tum tuunsoma la wan isige ge vɔna ti sɛba n tum tuunbe’ero la wan isige ge nyɛ gãkerɛ.” Tontɔɔdoma la yuun tum la tuunsoma ge nyaa ki. Ba wan isige ge vɔna se’ere n sɔi la, ba yu’ura kelum bɔna vom gɔŋɔ la poan mɛ. Ge sɛba n daɣɛ tontɔɔdoma la yuun tum la tuunbe’ero ge nyaa ki. Ba wan isige ge nyɛ gãkerɛ. Ba yu’ura nan ka boi vom gɔŋɔ la poan, ba wan dekɛ saŋa gãkɛ ba bii viisɛ ba bisɛ. Sankaŋa la, ba wan nyɛ yɔ’ɔ zamesɛ baŋɛ Yehowa ge ti ba yu’ura ta’an bɔna vom gɔŋɔ la poan.
Liligere 20:12, 13 la tɔɣɛ pa’alɛ ti sɛba woo ti ba isige ba la wan nara ti ba nana “sɛla n boi gɔnkila la poan la,” bala pa’alɛ ti ba nana lɔɔ paala la n wan ta bɔna tinpaalega la poan la. Sɛba n zaɣesɛ ka dɔla la wan ta nyɛ sa’aŋɔ.—Isa. 65:20.
Daniel 12:2 yeti nɛresɛba n ki la basɛba wan isige “nyɛ daarewoo nyɔvore, ti basɛba nyɛ ɛregerɛ la zɛregerɛ wuusa.” Kaalegɔ zɛ’an wa pa’alɛ la ki’i gãkerɛ la n wan paɛ sɛba ti ba wan isige la. Ba wan nyɛ la “daarewoo nyɔvore” bii “zɛregerɛ wuusa.” Bala la, yuun 1,000 la san ta ba’asɛ, basɛba wan nyɛ daarewoo nyɔvore ge ti basɛba me nyɛ sa’aŋɔ wuusa.—Lil. 20:15; 21:3, 4.
Geele makerɛ wa bisɛ. To ta’an dekɛ nɛreba sugumnɔɔrɛ bayi ti ba wan isige ba la makɛ la nɛreba n boti ba nɔɣɛ keŋɛ tiŋa kayima. Tontɔɔdoma la ani wuu nɛresɛba ti ba bo ba gɔŋɔ n bo ba yɔ’ɔ ti ba bɔna fai ge tuna bii kɛ̃’ɛra tiŋa la poan. Ge sɛba n daɣɛ tontɔɔdoma la ani wuu saama sɛba ti ba bo ba gɔŋɔ ti ba kɛ̃ tiŋa la poan dabesa fii wa bii kaɛ ka bisɛ. Saama bana nari ti ba tum pa’alɛ ti ba tari halisoma ge ti ba nyaa bo ba yɔ’ɔ ti ba kelum kɛ̃’ɛra tiŋa la poan. Bala mea nɔɔ, sɛba n daɣɛ tontɔɔdoma ti ba wan isige ba la nari ti ba nana Yehowa lɔɔ ge eŋɛ pa’alɛ ti ba tuni tontɔɔ tuuma, la wan eŋɛ se’em ti ba ta’an kelum bɔna Paradiisi poan. La ka pakɛ la ba bo saama la gɔnseko, basɛba wan ta’an ta dɛna tiŋa la nɛreba ge ti ba me ta’an sa’ɛ basɛba yese tiŋa la poan. Saama la n wan tara halise’a ge tuna tuunse’a tiŋa la poan la n wan pa’alɛ sɛla n wan paɛ ba. Bala mea nɔɔ la, sɛba woo n wan isige la itigɔ la ba sakerɛ tinpaalega la poan la n wan pa’alɛ sɛla n wan paɛ ba.
Yehowa daɣɛ Naayinɛ n tari nimbɔzore ma’a ge a dela Naayinɛ n gãkeri yɛla tontɔɔ. (Tɛɛ. 32:4; Ym. 33:5) A wan isige tontɔɔdoma la sɛba n daɣɛ tontɔɔdoma ti la sirum pa’alɛ ti a tari nɔŋerɛ. Ge a wan kelum ɛɛra ti ba za’a nana a pa’alegɔ la. Nɛresɛba n nɔŋɛ en ge dɔla a pa’alegɔ la ma’a n wan nyɛ yɔ’ɔ ti ba kelum bɔna tinpaalega la poan.