Kɔ’ɛ Ho Puti’irɛ Soŋa Ti La Pa’alɛ Ti Ho Tari Sakerɛ

1. Beni n sɔi ti tuntuna Paul puurɛ yuun pee la eŋa n dekɛ a vom tum sɛla la?

SAŊA kayima, tuntuna Paul yuun mi ti la kan yue ba wan ku en ge eŋa n yuun tiɛ eŋa n dekɛ a vom tum sɛla la, a puurɛ yuun pee mɛ. A yuun yeti: “Mam zɔ n zo’a la. Mam gorɛ mam nam Yesu se’em” la mɛ. (2 Tim. 4:​6-8) Paul yuun kɔ’ɛ a puti’irɛ soŋa mɛ la eŋa n dekɛ a vom pu’usa Yehowa la. A yuun mi ti Yehowa puurɛ pee mɛ la en. Tomam me boti la to kɔ’ɛ to puti’irɛ soŋa ti Naayinɛ puurɛ pee la tɔ. To wan eŋɛ la wani ta’an eŋɛ bala?

2. Paul n yuun tɔɣɛ sɛla ti la bɔna 2 Korint 5:7 la vuurɛ?

² Paul yuun tɔɣɛ amea, la a mabiisi yele ti: “Tomam boe mɛ la tomam n nam bo sɛla, ge dagɛ tomam n nyɛte sɛla.” (2 Ko. 5:7) Paul yetɔɣum wa vuurɛ? Nɛresɛba n ka tari sakerɛ Yehowa poan la ni kɔ’ɛ ba puti’irɛ doose la bamam n nyɛti bii wuna sɛla, la bamam n wuni dama se’em. Ge nɛresɛka n tari sakerɛ Yehowa poan ni ti’isɛ la Yehowa n boti sɛla ge nyaa kɔ’ɛ a puti’irɛ. A itigɔ pa’alɛ ti a tari sakerɛ ti a san dɔla Yehowa pa’alegɔ, a vom wan ana soŋa nananawa ge ti Yehowa me wan kã bo en beere sa’am.—Ym. 119:66; Heb. 11:6.

3. To san tara sakerɛ ge kɔ’ɛ to puti’irɛ soŋa to wan nyɛ la bem nyuurɔ? (2 Korint 4:18)

³ Saŋa ase’a to za’a ni kɔ’ɛ to puti’irɛ doose la ton nyɛti bii wuna sɛla, la ton wuni dama se’em. Ge to san ni kɔ’ɛ to puti’irɛ doose la tomam n nyɛti bii wuna sɛla ma’a, la wan basɛ ti daaŋɔ paɛ tɔ. Beni n sɔi? Sɛla n sɔi la, ton nyɛti bii wuna sɛla ma’a ta’an pã’asɛ tɔ ti to eŋɛ sɛla n ka nari. To san ni bɔta ti to kɔ’ɛ to puti’irɛ doose la ton nyɛti bii wuna sɛla, la ton wuni dama se’em, la ta’an ta basɛ ti to ita sɛla ti Yehowa ka bɔta. (Pa. 11:9; Mt. 24:​37-39) Ge to san tara sakerɛ, to wan ta’an kɔ’ɛ to puti’irɛ soŋa ti la eŋɛ “Na’ayenɛ suunre nyɛlom.” (Ep. 5:10) To san dɔla Naayinɛ pa’alegɔ, la wan basɛ ti to tara pupeelum la suma’asum. (Ym. 16:​8, 9; Isa. 48:​17, 18) To me san tara sakerɛ ge kɔ’ɛ to puti’irɛ soŋa, to wan ta vɔna daarewoo.—Kaalɛ 2 Korint 4:18.

4. Nɛra ni geele la bem yɛla ge nyaa kɔ’ɛ a puti’irɛ?

⁴ To za’a waabi nari ti to soke tomea yeti: Mam ni geele la bem yɛla ge nyaa kɔ’ɛ n puti’irɛ tum tuunɛ? Mam ni geele la yelese’a ti mam nini nyɛta bii sɛla ti Yehowa bɔta? Basɛ ya ti to geele ton wan ta’an dekɛ tomea delum Yehowa se’em yɛla atã wa poan: To san ɛɛra tuuma, to san ɛɛra luɣerɛ kpɛ’a, la tigere la san bo to pa’alegɔ. Yɛla atã wa poan, to wan bisɛ lan nari ti to geele yelese’a ge ta’an kɔ’ɛ to puti’irɛ soŋa.

TO SAN ƐƐRA TUUMA

5. To nari ti to tɛ̃ra la bem to san ɛɛra tuuma?

⁵ To za’a waabi boti la to ta’an bisa tomea la to deodoma soŋa. (Pa. 7:12; 1 Tim. 5:8) Tuuma ase’a ni basɛ ti to nyɛta la ligeri zo’e zo’e. Tuun aŋa taaba ta’an basɛ ti nɛra bisera a deodoma soŋa ge kelum biŋera sũsu. Ge tuuma ase’a ligeri ka zo’e. La ni basɛ ti se’em n tuni la nyɛ la ligeri fii ta’an bisa yelese’a n pakɛ a deodoma ma’a maɣesɛ wuu dia, lɔɣeyɛɛtɔ, la ban wan gã’arɛ zɛ’an. To san ɛɛra tuuma, to ni geele la ton wan nyɛta ligeri se’em bim. Ge nɛra san ti’isa la ligeri ma’a yele, la pa’alɛ ti a kɔ’ɔn ti’isa la sɛla ti a nini nyɛta.

6. To wan eŋɛ la wani eŋɛ pa’alɛ ti to tari sakerɛ to san ɛɛra tuuma? (Hebru 13:5)

⁶ To san tara sakerɛ, to wan geele tuunɛ la n wan ta’an basɛ ti tomam la Yehowa zɔtɔ nyɔka la ana se’em. To wan ta’an soke tomea yeti: ‘Yehowa puurɛ wan pee la tuunɛ wa bii la wan basɛ ti n tum sɛla ti Yehowa yaɛ?’ (Mag. 6:​16-19) ‘La wan basɛ ti n vi’ira zamesegɔ, kan ta’an kena na’am mɔɔlegɔ soŋa ge me kan nyɛta nɛŋa kaala Baabule la? La me wan ta’an basɛ ti n kan nyɛta nɛŋa bɔ’ɔra n deodoma?’ (Flp. 1:10) Soke ana wa lebesego san dɛna ɛɛ, la wan ana soŋa ti ho basɛ tuunɛ la hali la san puɣum kpe’em bo ho ti ho nyɛ tuuma. Ton tari sakerɛ la zuo, to ni loe la loore se’a n pa’alɛ ti to tari suure lua ti Yehowa wan bisa tɔ.—Mt. 6:33; kaalɛ Hebru 13:5.

7-8. Mabia Javier yuun eŋɛ la bem ti la pa’alɛ ti a tari sakerɛ? (Bisɛ foote la.)

⁷ Javiera dela mabia n ze’ele South America. A yuun baŋɛ lan de ninmu’urɛ se’em ti a tara sakerɛ. A yeti: “Mam yuun nyɛ la tuunɛ ti ba yɔɔra mam sugumnɔɔrɛ buyi gana mam n daa puɣum tuna tunse’ere la yɔɔrɛ. Ligeri la yuun dela laɣegoleŋo n wan ta’an basɛ ti n vom ana lumta.” Ge Javier yuun boti a tuna la sore ŋmɛ’a tuuma la. A tɔ̃kɛ yeti: “Tuuma la kpɛ’ɛma yuun yi mam ti n wa’ana ti a soke mam sɛla. Ge ti a nyaa soke mam yɛla la, mam yuun zusɛ Yehowa mɛ ti a soŋɛ mam. Mam yuun tari suure lua ti Yehowa n mi sɛla n wan soŋɛ mam. Mam yuun boti n tuna zɔ’ɔra mɛ lan wan eŋɛ se’em ti ba yɔɔra mam zɔ’ɔra. Ge mam ka boti tuunɛ n wan gu mam ti n kan ta’an tum n vo’osum poan tuuma.”

⁸ Javier yeti: “Mam la tuumadaana la n yuun sɔseri la, a yele mam yeti la nari ti saŋa woo n tuna zɔ’ɔra gana mam n puɣum tuna se’em la. Mam kɔ’ɔn basɛ ti la niɛ peelumi bilam bilam ti, mam pu’usegɔ la zuo mam kan ta’an eŋɛ bala.” Bala, Javier yuun zaɣesɛ tuuma la mɛ. Bakwai ayi pooren ti a pɔsɛ sore ŋmɛ’a tuuma la. Yuunɛ la ba’asegɔ bɔba ti a nyɛ tuunɛ ti a wan tuna dabesa fii bakwai poan. A yeti: “Yehowa yuun kelese mam zusega mɛ ge basɛ ti n nyɛ tuunɛ n wan basɛ ti n ta’an tuna sore ŋmɛ’a tuuma la. Mam puurɛ pee mɛ la mam nyɛ tuunɛ n wan basɛ ti n ta’an nyɛ saŋa zo’e zo’e pu’usa Yehowa ge soŋera n mabiisi la.”

9. Hon zamesɛ la bem Trésor yele la poan?

⁹ To san baŋɛ ti ton tuni tunse’a la ka basɛ ti to tara bɔnsoŋa la Yehowa, to wan eŋɛ la wani? To geele ya mabia Trésor n ze’ele Congo yele la bisɛ. A yeti: “Mam yuun nyɛ la tunsɛka ti mam bɔta. Ba yuun yɔɔri mam la sugumnɔɔrɛ butã gana mam n daa puɣum tuna tunse’ere la. Nɛreba me yuun bo’ori mam gilema mɛ.” Ge Trésor ni kɔ’ɔn vi’ira la zamesegɔ a tuuma la zuo. Saŋa ase’a me, a tuntuneba tadaandoma ni pɛ̃regera en mɛ ti a parum lan wan eŋɛ se’em ti nɛreba kan baŋɛ ba kinkisum tuuma la. Trésor yuun boti a basɛ tuunɛ la mɛ. Ge a paleŋa n yuun ɛ̃ɣeri ti daanse’ere a kan le nyɛ tuunɛ. Bem n yuun soŋɛ en? A yeti: “Habakuk 3:​17-19 yuun soŋɛ mam ti n baŋɛ ti mam san puɣum ka le tɔ’ɔsa yɔɔrɛ zɔ’ɔra, Yehowa wan bisera mam. Bala la, mam yuun basɛ tuuma la mɛ.” A le yeti: “Kpɛ’ɛndoma zo’e zo’e ti’isɛ ti nɛra san nyɛ tuunɛ ti ba yɔɔra en soŋa, a wan dekɛ sɛla woo basɛ tuuma la zuo. Mam puurɛ pee mɛ la mam n kelum tara bɔnsoŋa la Yehowa, la n deodoma la. Yuunɛ pooren, Yehowa yuun soŋɛ mam mɛ ti n nyɛ tuunɛ ta’an bisera n mea ge kelum nyɛta nɛŋa tuna Yehowa tuuma. To san dekɛ Yehowa tuuma deŋɛ nɛŋa, la ta’an ni kpe’em mɛ ti to nyɛ laɣehɔ ge Yehowa kan basɛ tɔ.” To san dɔla Yehowa pa’alegɔ ge sakɛ bo a pu’ulumbiŋ’a la, to wan kɔ’ɛ to puti’irɛ soŋa ti Yehowa me kã bo to.

TO SAN ƐƐRA LUƔERƐ KPƐ’A

10. Nɛra san ɛɛra luɣerɛ kpɛ’a, a ta’an ni bisera la bem yɛla?

¹⁰ Pɔɣedire dela bo’olum n ze’ele Yehowa zɛ’an. A naam to mɛ ti to bɔta ti to ta’an di pɔɣa bii ele sira. Mabipɔka san ti’isa ti a ele mabia, a ta’an bisera mabia la nɛŋa n ani se’em, eŋa n basɛ ti a tara pupeelum se’em, mabia la n iti a yɛla se’em, nɛreba n geele mabia la se’em, eŋa n tari ligeri se’em, bii eŋa n biseri a deodoma se’em.b La ani soŋa ti a ti’isa yele ana wa. Ge a san ti’isa yele ana wa ma’a, la pa’alɛ ti a biseri la a nini n nyɛti sɛla.

11. To san ɛɛra luɣerɛ kpɛ’a to wan eŋɛ la bem pa’alɛ ti to tari sakerɛ? (1 Korint 7:39)

¹¹ Bisɛ Yehowa puurɛ n ni pee se’em la to mabiisi n doli a pa’alegɔ la, se’em ma’a ti ba ɛɛra luɣerɛ kpɛ’a la! Makerɛ, ba doli la Baabule la n ka’am tɔ ti to zo’e kura ge nyaa di pɔɣa bii ele sira la. (1 Ko. 7:36) Ba ni ɛɛra la luɣerɛ kpɛ’a n tari halese’a ti Yehowa bɔta ti siresonkɔ bii pɔɣesonkɔ tara. (Mag. 31:​10-13, 26-28; Ep. 5:33; 1 Tim. 5:8) Ba ka boti se’em n daɣɛ mabia ge ba doli la 1 Korint 7:39 (Kaalɛ) n yeti ele bii di “se’em n dole Yesu sore” la. Ba kɔ’ɔn tara la sakerɛ ti Yehowa wan bisera ba soŋa soŋa gana asaala.—Ym. 55:22.

12. To zamesɛ la bem Rosa yele la poan?

¹² To geele Rosa n ze’ele Colombia tiŋa ge dɛna sore ŋmɛ’adaana yele la bisɛ. A tuuma tadaana ayima n yuun boti en ge daɣɛ mabia. Rosa me yuun nɔŋɛ a yele mɛ. Rosa yeti: “Buraa wa yuun soŋeri la nɛreba a gingilega poan. La ani wuu a yuun dela nɛresonkɔ la. Mam yuun nɔŋɛ eŋa n iti mam se’em mɛ. Mam n boti n ele burasɛka taaba n bala ge a daɣɛ mabia.” A le yeti: “La yuun kpe’em mɛ ti n zaɣesɛ en. Sankaŋa la, la yuun ani wuu mam boi la n ma’a la. Mam yuun boti n ele mɛ ge mam yuun ka nyɛ mabia.” Ge Rosa yuun ka basɛ ti a puti’irɛ bɔna a nini n nyɛti sɛla la poan. A yuun ti’isɛ ti a san lɛɣera a tuuma tadaana wa, la wan sa’am eŋa la Yehowa bɔnsoŋa la. Bala la, Rosa yuun ka le sɔsa la buraa wa ge a yuun mu’ɛ la nini tuna Yehowa tuuma. La yuun ka yue, ti ba beem en ti a keŋɛ Na’am Mɔɔlegɔdoma Sukuu. A nyaa dela sore ŋmɛ’adaana n boi a to’ore. Rosa yeti: “Yehowa kã bo mam mɛ ti mam tara pupeelum zo’e zo’e.” La daɣɛ naana ti to eŋɛ sɛla ti Yehowa bɔta, yele yele wuu to suure san kɛ̃ sɛla. Ge to san dekɛ Yehowa pa’alegɔ tum tuuma, to wan nyɛ nyuurɔ zo’e zo’e.

TIGERE LA SAN BO TO PA’ALEGƆ

13. Tigere la san bo to pa’alegɔ, to ta’an ni eŋɛ la bem?

¹³ Keendoma la, bii gingilega kaarɛ bisegadaana bii tigere yile la, bii Tigere Zuo Bisegadoma la ta’an bo to pa’alegɔ ti la soŋɛ tɔ ti to ta’an pu’usa Yehowa. Saŋa ase’a, to ta’an ni ka bɔkɛ sɛla n sɔi ti mabiisi la bɔ’ɔra to pa’alegɔ la. To ta’an ni ti’isa ti pa’alegɔ la ti ba dekɛ bo to la ta’an basɛ ti yɛla kpe’em bo to. Hali to ta’an ni ti’isa mabiisi la n bo to pa’alegɔ la tuure yɛla.

14. Bem n wan soŋɛ tɔ ti to nana pa’alegɔ seto ti tigere la tara bɔ’ɔra to la? (Hebru 13:17)

¹⁴ To san tara sakerɛ, to wan tara suure lua ti Yehowa n pa’ali a tigere la ge me mina to bɔŋa zɛ’ɛsi n ani se’em. To san ita bala, to wan tara putɛsonɛ ge me ni eŋɛ kalam nana Yehowa. (Kaalɛ Hebru 13:17.) To san dɔla tigere la pa’alegɔ, nɔyinɛ wan bɔna tansugere la poan. (Ep. 4:​2, 3) La boi bim ti mabiisi la ka di mi’a ge to tari sakerɛ ti to san dɔla ban pa’alɛ to sɛla la Yehowa wan kã bo to. (1 Sa. 15:22) To me mi ti yele san ta bɔna nara teere, Yehowa wan basɛ ti la tee.—Mik. 7:7.

15-16. Bem n yuun soŋɛ mabia ayima ti a dekɛ sakerɛ tum tuuma, la boi bim ti a yuun tari la puti’irɛ ayi ayi la tigere la n yuun bo pa’alegɔ se’em la? (Bisɛ foote la.)

¹⁵ To geele ya zi’irego poan yele wa n pa’alɛ ti to san tara sakerɛ ge dɔla pa’alegɔ seto ti tigere la bɔ’ɔra to la, to wan nyɛ nyuurɔ. Peru tiŋa nɛreba tɔɣeri la Spanish yetɔɣum ge nɛreba zo’e zo’e ni tɔɣera la bamea tiŋa yetɔɣum. Ba yetɔɣum ayima dela Quechua. Yuuma zo’e zo’e n tole la, mabiisi n tɔɣeri Quechua yetɔɣum yuun mu’ɛ nini mɔɔla bɔ’ɔra la nɛreba n tɔɣeri Quechua yetɔɣum ba gingilega la poan. Tigere la yuun nyaa pa’alɛ mabiisi la bamam n nari ti ba tee dɔla sarɔɔ seko mɔɔla bɔ’ɔra nɛreba la ti la makɛ la gɔmɛt lɔɔ. (Arom 13:1) Bala zuo la, mabiisi basɛba yuun ti’isɛ ti bala kan basɛ ti na’am mɔɔlegɔ tuuma la keŋɛ soŋa. Ge mabiisi la n yuun doose pa’alegɔ la, Yehowa yuun soŋɛ ba mɛ ti ba ta’an nyɛ nɛreba zo’e zo’e n yuun tɔɣeri Quechua yetɔɣum.

¹⁶ Kevin dela keema n boi Quechua tansugere poan. A yuun laɣum bisɛ ti la wan kpe’em ti ba doose tigere la pa’alegɔ. Kevin yeti: “Mam yuun soke n mea yeti, ‘To nyaa wan eŋɛ la wani nyɛta nɛreba n tɔɣeri Quechua yetɔɣum?’” Kevin yuun eŋɛ la wani? A yeti: “Mam yuun tiɛ la sɛla n boi Magaha 3:5 ge me le ti’isɛ Moses yele. Yehowa yuun pa’alɛ Moses ti a eŋɛ sɛla ti la ana wuu yɛm ka boi bim la. A yuun yele Moses ti a tari Israeldoma la ze’ele Egypt ta paɛ Mɔɣɛ Mɔlega la poan. Bala yuun ta’an basɛ ti la dɛna naana bo Egyptdoma la ti ba dige nyɔkɛ Israeldoma la. Ge Moses yuun nam mɛ, ti Yehowa yuun kã bo en ge tum kirega faaɛ Israeldoma la.” (Yɛh. 14:​1, 2, 9-11, 21, 22) Kevin yuun sakɛ mɛ doose tigere la n pa’alɛ ti ba nyaa mɔɔla se’em la. Bem nyuurɔ ti ba nyɛ? A yeti: “La yuun eŋɛ mam la pakerɛ la Yehowa n yuun kã bo to se’em la. Yia la, to yuun ni keŋɛ yue mɛ ge nyaa ni ta nyɛ nɛra ayima bii bayi n tɔɣeri Quechua yetɔɣum. Ge nananawa, to puti’irɛ nyaa boi la to mɔɔla zɛse’esi ti nɛresɛba n tɔɣeri Quechua yetɔɣum la zo’e bim. To nyaŋɛ sɔsera bɔ’ɔra la nɛreba zo’e zo’e ge me ni lebe ta bisɛ ba. To me tari la Baabule zamesegɔdoma zo’e zo’e. Sɛba n keni zamesegɔ nyaa zo’e mɛ.” Yelemɛŋɛrɛ la dela, to san tara sakerɛ tuna tuuma, Yehowa me ni kã bo to mɛ.

17. To zamesɛ la bem zaseŋɔ wa poan?

¹⁷ To sɔsɛ la ninmu’urɛ yɛla atã ti la nara ti to ni baŋɛ Yehowa n boti to eŋɛ sɛla ge nyaa kɔ’ɛ to puti’irɛ. La nari ti to kɔ’ɛ to puti’irɛ ti la makɛ la Yehowa n boti to eŋɛ sɛla to vom poan, maɣesɛ wuu ton loori de’eŋo seto, ton wan keŋɛ sukuu paɛ se’em, la ton ugeri to kɔma se’em. To san bɔta ti to kɔ’ɛ to puti’irɛ yele poan, la ka nari ti to yeen bisera to nini n nyɛti sɛla la ma’a. Ge la nari ti to ni geele Yehowa ka’aŋɔ, eŋa n pu’ulum biŋe ti a wan soŋera to la, la tomam la eŋa n tari bɔnsoŋa la yele ge nyaa kɔ’ɛ puti’irɛ. To san ita bala, to wan “dɔla la Na’ayenɛ to Yenɛ la” wuusa.—Mik. 4:5.