ZASEŊƆ 14
YUUNƐ 8 Jehovah Is Our Refuge (Yehowa Dela To Suka Zɛ’an)
“Loe Yan Wan Tona Bɔ’ɔra Se’em Bo Ya Mɛhe”
“Han dɛna mam la n yiredoma, tomam wan tona bɔ’ɔra la Na’ayenɛ.”—YOS. 24:15.
YELEKPINE
To wan zamesɛ baŋɛ sɛla n sɔi ti to loe ti to pu’usa Yehowa.
1. La nari ti to eŋɛ la bem ta’an tara pupeelum ge beni n sɔi? (Isaiah 48:17, 18)
TO SAAZUO Sɔ la nɔŋɛ to mɛ paa. A me boti la to tara vom somɔ ti la beere ta ana to soŋa. (Pa. 3:12, 13) A naam to mɛ ti to ta’an ita yɛla zo’e zo’e. Ge a ka naam tɔ ti to bisa tomea bii mina sɛla n de be’em bii som. (Pa. 8:9; Yer. 10:23) A mi ti to san wan tara pupeelum, la nari ti to pu’usa en ge me dɔla a pa’alegɔ.—Kaalɛ Isaiah 48:17, 18.
2. Sitaana boti to sakɛ la bem ge Yehowa me eŋɛ la wani la a pumpɔreŋɔ la?
2 Sitaana boti la to sakɛ ti Yehowa san puɣum ka bisa tɔ, to wan ta’an bisa tomea ge tara pupeelum. (Pin. 3:4, 5) Yehowa n boti a basɛ ti Sitaana pumpɔreŋɔ la niɛ peelumi la zuo, a bo asaaleba la yɔ’ɔ ti ba bisa bamea saŋa fii poan. To kɔ’ɔn nyɛta asaala bisega n ka ta’an loe yele se’em mɛ. Baabule la tɔɣɛ nɛreba basɛba n yuun pu’useri Yehowa ge tara pupeelum yele mɛ. Ba poan ayima dela Yezu Krista. A yuun tari la pupeelum paa. Zaseŋɔ wa poan, to wan bisɛ sɛla n sɔi ti Yezu yuun loe ti a pu’usa Yehowa. To wan le nyɛ sɛla n sɔi ti la nara ti to pu’usa to saazuo Sɔ Yehowa. Leyɛ’ɛsa, to wan bisɛ sɛla n sɔi ti tomam me loe ti to pu’usa Yehowa.
SƐLA N SƆI TI YEZU YUUN LOE TI A PU’USA YEHOWA
3. Sitaana yuun yele Yezu la bem ge Yezu me yuun eŋɛ la wani?
3 Yezu n yuun boi tinparɛ wa zuo la, a yuun loe la eŋa n wan pu’usa mina. Yezu n yuun muse ko’om la, la yuun ka yue ti Sitaana yele en yeti, a san ku’ure tiŋa pu’usɛ en, a wan dekɛ tingɔŋɔ wa za’a kpe’eŋo bo en. Yezu yuun lebese yeti: “Keŋɛ ha, Dima wa! La golehɛ yeti, zote ya Na’ayenɛ ya Yenɛ la, ge tona bɔ’ɔra enŋa ma’an.” (Mt. 4:8-10) Beni n sɔi ti Yezu yuun yele bala? To bisɛ yelese’a n sɔi.
4-5. Bem zuo ti Yezu yuun loe ti a pu’usa Yehowa?
4 Yezu n yuun nɔŋɛ Yehowa ge ana tapilapi la en la n sɔi ti a pu’usa en. (Yon 14:31) Leyɛ’ɛsa, la nari mɛ ti Yezu pu’usa Yehowa. (Yon 8:28, 29; Lil. 4:11) A mi ti Yehowa n naam vom, dɛna Mina n bo’ori yɛri yɛri ge me nara pɛ̃ka. (Ym. 33:4; 36:9; Yam. 1:17) Yehowa kɔ’ɔn tɔɣera la yelemɛŋɛrɛ bɔ’ɔra Yezu saŋa woo ge me bo en yɔ’ɔ ti a sɔna sɛla woo. (Yon 1:14) Ge Sitaana kɔ’ɔn bɔna la a to’ore la Yehowa. Eŋa n ta’asɛ be’em la kum. A dela pumpɔrema ge me tara punya’anɛ. (Yon 8:44) Yezu n mi yele ana wa la zuo, a puɣum ka bɔta ti a tɔɣesa Sitaana la fii me ti a eŋɛ sɛla giisɛ Yehowa.—Flp. 2:5-8.
5 Leyɛ’ɛsa, sɛla n sɔi ti Yezu loe ti a pu’usa Yehowa dela, a nyɛ la a yelemɛŋɛrɛ tuuma la n wan ta basɛ ti beere sa’am ana se’em. (Heb. 12:2) A yuun mi ti a san kelum tara yelemɛŋɛrɛ, a wan basɛ ti a Sɔ la yu’urɛ ana zilam ge me maalɛ yelese’a woo ti Kolekpabɛ’a la ta’asɛ la.
SƐLA N SƆI TI LA NARA TI TO PU’USA YEHOWA
6-7. Zina beere wa, beni n sɔi ti nɛreba zo’e zo’e ka pu’usa Yehowa ge beni n sɔi ti la nara ti to pu’usa en?
6 Zina beere wa, nɛreba zo’e zo’e ka pu’useri Yehowa se’ere n sɔi la, ba ka mi Yehowa hala la, la yelese’a za’a ti a eŋɛ bo ba la. Nɛresɛba ti tuntuna Paul yuun mɔɔlɛ bo ba Atens tiŋa la me yuun ani la bala.—Tm. 17:19, 20, 30, 34.
7 Paul yuun yele Atensdoma la ti yelemɛŋɛrɛ Naayinɛ la “n de se’em [n] bo’ore asaala vom la sɛla woo te a bɔta.” A le yeti: “Yenɛ n sɔe te to vɔ’ɔha ge ɛɛra ge bɔna.” Naayinɛ n de Naaŋɔdaana la, doose la “boraa ayena poan . . . naam buuri zo’e zo’e.” Bala la, la nari ti to pu’usa la eŋa ma’a.—Tm. 17:25, 26, 28.
8. Yehowa kan malum eŋɛ la bem? Tɔɣɛ pa’alɛ.
8 Yehowa n de to Naaŋɔdaana, la Sɔ’ɔlum Za’adaana la zuo, a ta’an pɛ̃regɛ ni tɔ ti to pu’usa en. Ge Yehowa kan malum eŋɛ bala. A tuɣum basɛ ti to baŋɛ la yelese’a n pa’alɛ ti a boi ge me nɔŋɛ tomam ayima ayima woo. A boti la nɛreba zo’e zo’e ta’an dɛna a zɔdoma wuusa. (1 Tim. 2:3, 4) Bala n sɔi ti a kumesɛ tɔ ti to pa’ala nɛreba eŋa n wan ta eŋɛ sɛla bo nɛresaaleba. (Mt. 10:11-13; 28:19, 20) A tigese to mɛ ti to bɔna tansuga poan pu’usa en ge me basɛ ti keendoma soŋera tɔ.—Tm. 20:28.
9. Sarɔtuni poan ti Yehowa eŋɛ pa’alɛ ti a nɔŋɛ nɛra woo?
9 Yehowa tari la nɔŋerɛ n ka tari makerɛ bɔ’ɔra sɛba n mi fii ge zaɣesɛ ti a ka boi la. Geele yele ana wa bisɛ: Asaala zi’irego poan, nɛreba zo’e zo’e tamɛ Yehowa yele mɛ ge ita sɛla ti ba ti’isa ti bamam mi sɛla n ani soŋa. Hali la bala za’a, Yehowa bo’ori ba la sɛla n pakɛ ba ti ba tara pupeelum. (Mt. 5:44, 45; Tm. 14:16, 17) A basɛ ti ba dɔɣera, tara deodoma la zɔdoma n nɔŋɛ ba ge me nyɛta nyuurɔ ba tuuma poan. (Ym. 127:3; Pa. 2:24) Wana wa za’a niɛ peelumi ti to saazuo Sɔ la nɔŋɛ nɛra woo mɛ. (Yɛh. 34:6) Nyaa basɛ ya ti to bisɛ sɛla n sɔi ti to pu’usa Yehowa, la eŋa me n kã’ari bɔ’ɔra to se’em.
SƐLA N SƆI TI TO LOE PU’USA YEHOWA
10. (a) Beni n sɔi ti to pu’usa Yehowa? (Matu 22:37) (b) Yehowa n diti sugeri bɔ’ɔra ho la basɛ ti hon nyɛta nyuurɔ la wani? (Yooma 103:13, 14)
10 Wuu Yezu la, ton nɔŋɛ Yehowa ge ana tapilapi la en la n sɔi ti to pu’usa En. (Kaalɛ Matu 22:37.) To san zamesa Yehowa hala la, to ni ana la du’a du’a la en. Makerɛ, a kɔ’ɔn maasum mɛ ti a di sugeri bo to. Se’em ma’a ti Israeldoma la yuun zaɣesɛ a nɔɔrɛ la, a yuun yele ba yeti: “Ya zan’an ŋmɛregɛ nananawa yehe ya be’em sɔya la poan.” (Yer. 18:11) Yehowa mi ti to ka di mi’a. (Kaalɛ Yooma 103:13, 14.) Ho san ti’isa Yehowa n di sugeri bo ho se’em, la a hala la, hon kan bɔta ti ho pu’usa en?
11. Bem zuo ti to le pu’usa to saazuo Sɔ la?
11 Sɛla n kalum to suure ti to bɔta ti to pu’usa Yehowa dela to mi ti la nari ti to ita la bala. (Mt. 4:10) Leyɛ’ɛsa, to mi ti to san tara yelemɛŋɛrɛ bɔ’ɔra Yehowa, to wan nyɛ nyuurɔ zo’e zo’e. To san tara yelemɛŋɛrɛ pu’usa Yehowa, a yu’urɛ la wan ana fa’a. La me wan basɛ ti Kolekpabɛ’a la pumpɔreŋɔ niɛ peelumi ti Naayinɛ puurɛ pee. To me san loe ti to pu’usa Yehowa nananawa, to wan pu’usa en la bala wuusa!—Yon 17:3.
12-13. To zamesɛ la bem Jane la Pam yele la poan?
12 To wan ta’an tara nɔŋerɛ zo’e zo’e bɔ’ɔra Yehowa to bunbilemen. Nɔŋerɛ wa wan kpe’em mɛ to san ta kuregera. To geele Jane la Pam n de nɛra la a suɔ yele la bisɛ.a Jane daa dela yuun 11 ti Pam me dɛna yuun 10 ban daa pɔsɛ zamesa Baabule la. La boi bim ti ba dɔɣereba daa ka boti Baabule zamesegɔ la ge ba daa bo Jane la Pam yɔ’ɔ ti Yehowa Sɛɛradoma zamesa ba Baabule la, ba san wan dɔla ba deodoma la kena church bakwai woo. Jane yeti, “Yehowa Sɛɛradoma la n pa’alɛ mam sɛla Baabule la poan la soŋɛ mam mɛ ti n ta’an zaɣesɛ tadaandoma pɛ̃regerɛ n wan basɛ ni ti n dekɛ n mea kɛ̃’ɛsɛ tiyooro nyua la yalumtuuma poan la.”
13 Ban daa ta paɛ yuun pia la sɛla la, ba daa dela na’am mɔɔlegɔdoma. Pooren ti ba daa pɔsɛ tuna sore ŋmɛ’a tuuma la ge me bisa ba dɔɣereba n kuregɛ. Jane tɔɣɛ pa’alɛ lan ani en se’em la Yehowa n eŋɛ yelese’a bo ba la. A yeti: “Mam baŋɛ ti Yehowa kɔ’ɔn bisa a zɔdoma la wuu 2 Timoti 2:19 n yeti, ‘Na’ayenɛ wan pa’alɛ sɛba n de a nɛreba’ la.” Nɔkpe’ene kai ti Yehowa kɔ’ɔn fabela sɛba n nɔŋɛ en ge pu’usa en la yele mɛ!
14. To wan eŋɛ la wani ta’an tɔɣɛ po’e Yehowa yu’urɛ la? (Bisɛ fɔɔra la.)
14 To boti la to soŋɛ nɛreba ti ba baŋɛ Yehowa. Geele makerɛ wa bisɛ: Ho tari la ho zɔ n iti ho soŋa, bɔ’ɔra ho lɔɣɔrɔ ge me ni di sugeri bo ho. Daarɛ deyima ti ho wum ti nɛra parum bo en ti a dela putɔya la nigum nigumdaana. Hon wan eŋɛ la wani? Ho wan tɔɣɛ po’e en. Bala mea nɔɔ, Sitaana la a nɛreba san tiregera ti ba parum yɛla sa’am Yehowa yu’urɛ, to wan tɔɣɛ po’e A yu’urɛ la ge me basɛ ti nɛreba baŋɛ yelemɛŋɛrɛ la. (Ym. 34:1; Isa. 43:10) To yetɔɣum la to itigɔ n wan pa’alɛ ti to nɔŋɛ Yehowa ge me loe ti to pu’usa en.
Hon wan tɔɣɛ po’e Yehowa yu’urɛ la? (Bisɛ kaalegɔ zɛ’an 14)b
15. Tuntuna Paul nyɛ nyuurɔ la wani la eŋa n yuun eŋɛ teere a vom poan la? (Filipi 3:7, 8)
15 To ni yese la to suuren eŋɛ teere to vom poan ta’an pu’usa Yehowa soŋa soŋa. Makerɛ, tuntuna Paul yuun tari la kpe’eŋo Yuda pu’usegɔ poan ge Krista zuo, a yuun dekɛ yele aŋa za’a basɛ mɛ ge pu’usa Yehowa. (Ga. 1:14) Bala zuo la, a yuun tari la vom somɔ ge me yuun nyɛ yɔ’ɔ ti a naɛ la Krista di na’am saazuo. A yuun ka makɛ yeti a daa san baŋɛ ni la eŋa n pu’useri Yehowa la. Tomam me kan malum yele bala.—Kaalɛ Filipi 3:7, 8.
16. To zamesɛ la bem Julia yele la poan? (Bisɛ fɔɔra la.)
16 To san basɛ ti Yehowa pu’usegɔ dɛna sɛla n pakɛ tɔ, to wan nyɛ kã’a nananawa la beere sa’am. Basɛ ya ti to geele mabipɔka Julia yele bisɛ. Julia yuun yuuni la church poan a bunbilimen ge nyaa ta zamesɛ yelemɛŋɛrɛ la. Nɛra n mi yuuma n yuun nyɛ en, tari en keŋɛ yuuma sukuu ta kumesɛ en pa’asɛ. La yuun ka yue ti Julia mina yuuma ŋmɛ’a soŋa soŋa, nyaa ta ŋmɛ̃’ɛra zɛkãra poan. Eŋa n yuun boi sukuu zamesa la, a kilaasi bia n yuun pɔsɛ tɔɣera Naayinɛ yɛla bɔ’ɔra en ge yeti Naayinɛ yu’urɛ dela Yehowa. La ka yue ti Julia pɔsɛ zamesa Baabule la sugumnɔɔrɛ buyi bakwai woo poan. Pooren, a yuun kɔ’ɛ a puti’irɛ pu’usa la Yehowa ge basɛ yuuma la ŋmɛ’a. Eŋa n yuun kɔ’ɛ a puti’irɛ se’em la daɣɛ naana. A yeti, “Nɛreba zo’e zo’e yuun yele mam yeti n wan basɛ yoo. Ge mam yuun boti la n dekɛ n vom la za’a pu’usa Yehowa.” La ani en la wani la eŋa n yuun loe sɛla yuun 30 n tole la? A yeti, “Mam tari la suma’asum ge me tara puti’irɛ ti Yehowa wan bo mam sɛla ti mam suure bɔta beere sa’am.”—Ym. 145:16.
To san basɛ ti Yehowa pu’usegɔ pakɛ tɔ, to wan nyɛ kã’a zo’e zo’e (Bisɛ kaalegɔ zɛ’an 16)c
KƆ’ƆN PU’USA YEHOWA
17. Ton boi ba’asegɔ dabesa wa poan la, la yele pakɛ sɛba n pu’useri Yehowa la sɛba n ka pu’useri en la wani?
17 To kɔ’ɔn bɔna la ba’asegɔ dabesa la poan. Tuntuna Paul yuun yeti: “Yeen gura ge la wan tom a wan ba’ahom wa’ana la kan yuue.” (Heb. 10:37) Yele wa pakɛ to la wani? Saŋa la ka le gee zo’e bo nɛreba ti ba ta’an loe pu’usa Yehowa. (1 Ko. 7:29) To me san loe ti to pu’usa Naayinɛ, la boi bim ti la wan nara ti to ŋmibera yeledaaŋɔ poan ge ‘la kan yue.’
18. Yezu la Yehowa boti la to ita bem?
18 Yezu ka yeen yele a podoleba la ti ba dɔla en ge ba kɔ’ɔn ana tapilapi la en. (Mt. 16:24) Bala la, la san dɛna la yuuma zo’e zo’e n wana ti to pu’usa Yehowa, basɛ ya ti to kelum pu’usa en ge da pisegɛ basɛ. La dela to tiregɛ kɔ’ɔn ita sɛla n pa’alɛ ti to pu’useri la Yehowa. La boi bim ti la daɣɛ naana ge kã’a la ti to wan nyɛ nananawa la wan basɛ ti to tara pupeelum!—Ym. 35:27.
19. To zamesɛ la bem Gene yele la poan?
19 Nɛreba basɛba ti’isɛ ti ho san pu’usa Yehowa ho kan tara pupeelum ho vom poan. Hon ti’isɛ ti ho san pu’usa Yehowa, ho kan nyɛ sɛla ti ho bɔta la? Bia ayima yu’urɛ n de Gene yeti: “Mam yuun ti’isɛ ti mam n de Yehowa Sɛɛradaana la zuo, n kan ta’an nyɛta yɔ’ɔ dɛ’ɛna mam n boti se’em. Mam tadaandoma zo’e zo’e ti mam zo’e la ba la, nɔŋɛ la de’eŋo, zaba lɛka bii ba ŋmɛ’ɛra vidiyo games n tari gbire gbire yɛla ge mam yuun kɔ’ɔn kena la zamesegɔ la na’am mɔɔlegɔ.” Gene n yuun ti’iseri bala la basɛ ti la ana en la wani? A yeti: “Mam yuun pɔsɛ ita la mam tadaandoma la n iti yelese’a ti la ka ana soŋa la. Mam yuun nyɛ pupeelum mɛ saŋa fii poan ge pupeelum la yuun ka ze’ele mam suuren. Mam yuun pɔsɛ ti’isa la mam yuun doli Baabule pa’alegɔ ge nyɛta nyuurɔ se’em. Mam yuun nyaa kɔ’ɛ n puti’irɛ ti n wan pu’usa Yehowa la n suure za’a. Kɔ’ɔn pɔsɛ sankaŋa, la ani wuu Yehowa kɔ’ɔn kɛlesa mam zusega woo mɛ la.”
20. To kɔ’ɛ to puti’irɛ ti to eŋɛ la bem?
20 Yuumadaana la yuum bo Yehowa yeti: “Popeelomdoma dela sɛba te hom mɛŋa loe ba te ba bɔna ho Yire la poan la.” (Ym. 65:4) Basɛ ya ti to kɔ’ɛ to puti’irɛ wuu Yosua n yele se’em la: “Han dɛna mam la n yiredoma, tomam wan tona bɔ’ɔra la Na’ayenɛ.”—Yos. 24:15.
YUUNƐ 28 Gaining Jehovah’s Friendship (Dɛna Yehowa Zɔ)
a Ba tee yu’ura ase’a mɛ.
b FOOTE LA VUURƐ: Nɛresɛba n yaɛ to la n tɔɣɛ to yɛla bo pɔka ayima n boi to laɣesegɔ zɛ’an kenkɛleŋa. Pooren ti pɔka la paɛ to gɔnɔ toroko zɛ’an ti ba tɔɣɛ yelemɛŋɛrɛ la bo en.
c FOOTE LA VUURƐ: Julia n basɛ ti Yehowa pu’usegɔ dɛna sɛla n pakɛ en a vom poan la ti ba eŋɛ itipa’alegɔ.