ZASEŊƆ 15
YUUNƐ 30 My Father, My God and Friend (Mam Sɔ, Mam Naayinɛ la Mam Zɔ)
‘La Ani Soŋa Ti To Ana Du’a Du’a La Naayinɛ’!
“Ge han dɛna mam, la ane soŋa bo mam te n lɛna Yenɛ.”—YM. 73:28.
YELEKPINE
Ton wan eŋɛ se’em ta’an vurege lɛm Yehowa, la nyuurɔ se’a ti to wan nyɛ to san ita bala.
1-2. (a) To san bɔta ti to nyɔɣɛ nɛra zɔtɔ, la nari ti to tiregɛ eŋɛ la bem? (b) To wan geele la bem zaseŋɔ wa poan?
HON tari zɔsonkɔ? Ho eŋɛ la wani ti ya ta’an dɛna zɔtɔ? Daase’ere ho nyɛti la nɛŋa sɔsa la en, ta’an baŋɛ ho zɔ la soŋa ge me mina ho zɔ la n boti yelese’a la eŋa n ka boti yelese’a. Ho nyaa baŋɛ ti a tari la halesoma ti ho bɔta ti ho tɔɣesa en. Bala n sɔi ti ho nɔŋɛ en la.
2 Ho san bɔta ti ho nyɔɣɛ nɛra zɔtɔ, la nari ti ho tiregɛ nyɛ nɛŋa ti ya sɔsa. Bala mea ti to san bɔta ti to nyɔɣɛ Yehowa zɔtɔ ge me ana du’a du’a la en, la me nari ti to sɔsa la en. Zaseŋɔ wa poan to wan baŋɛ to wan eŋɛ se’em ta’an ana du’a du’a la Naayinɛ ge me bisɛ ton wan nyɛ nyuurɔ se’em to san ita bala. Yia la, to geele ya bisɛ sɛla n sɔi ti la ana soŋa ti to ana du’a du’a la Yehowa n de to Zɔ la.
3. Beni n sɔi ti la nara ti to ti’isa taɣesa to wan nyɛ nyuurɔ seto to san ana du’a du’a la Yehowa? Bo makerɛ.
3 La yele pakɛ mɛ ti to ti’isɛ taɣesɛ bɔkɛ lan wan ana soŋa se’em bɔ’ɔra tɔ ti to dɛna Yehowa zɔdoma. (Ym. 63:6-8) Bem zuo? Makerɛ, nɛreba mi ti la ani soŋa ti to dita dinɔ’ɔma, kpɛmesa to giila, gisa zɔ’ɔra ge me nyuura ko’om zɔ’ɔra daarewoo. Ge zo’e zo’e ka iti yele ana wa. Bala n sɔi ti ba ka tara imma’asum soŋa la. Ge nɛresɛba n ti’iseri yele ana wa ge mina ti la wan basɛ ti ba tara imma’asum la, kɔ’ɔn dɔla a la soŋa. Bala mea nɔɔ, to mi ti la dela yelesonɛ ti to dɛna Yehowa zɔdoma ge to san ti’isɛ bɔkɛ lan tari nyuurɔ se’em bɔ’ɔra to la, to wan kɔ’ɔn ana du’a du’a la en.—Ym. 119:27-30.
4. Wuu Yooma 73:28 n pa’alɛ se’em la, la yuun ani yuumadaana la wani?
4 Kaalɛ Yooma 73:28. Se’em n gulesɛ Yooma 73 yuun dela Levi nɛra ti ba loe en ti a yuuna yuuma Yehowa pu’usegɔ yire la poan. Daanse’ere a yuun dekɛ la yuuma zo’e zo’e pu’usa Yehowa. Ge la yuun nari ti a tɛ̃ra ti a san “lɛna Yenɛ,” la wan ana soŋa bo en. A me yuun le bɔta ti a basɛ ti nɛreba baŋɛ ti ba san lɛna Naayinɛ la wan ana soŋa bɔ’ɔra ba. Beni n sɔi ti la yele pakɛ ti to baŋɛ Yehowa soŋa ge basɛ ti to zɔtɔ nyɔka la kpe’em?
TO SAN “LƐNA YINƐ” TO WAN TARA PUPEELUM
5. (a) Beni n sɔi ti to wan ta’an tara pupeelum, to san ana du’a du’a la Yehowa? (b) Wuu Magaha 2:6-16 n pa’alɛ se’em la, Yehowa n bo’ori ho yɛm sebo la soŋeri ge tɛ’ɛla hon la wani?
5 To san ana du’a du’a la Yehowa, to wan tara pupeelum zo’e zo’e. (Ym. 65:4) Yɛla zo’e zo’e zuo ti bala dɛna yelemɛŋɛrɛ. Makerɛ, to san kaala Baabule la ge tara sɛla n boi bim la tuna tuuma, to wan tara yɛm. Yɛm bumo te’eli to mɛ ti to ka ita yelese’a n wan dɛna dɛŋa bɔ’ɔra tɔ. (Kaalɛ Magaha 2:6-16.) Bala n sɔi ti Baabule la yeti: “Popeelom boe mɛ la sɛba n nyɛ yam, la sɛba n bɔkere.”—Mag. 3:13.
6. La eŋɛ la wani ti yuumadaana la ka le tara pupeelum?
6 Saŋa ase’a Yehowa zɔdoma suure ni sa’am mɛ. Se’em n gulesɛ Yooma 73 la, suure yuun sa’am mɛ eŋa n yuun pɔsɛ ti’isa yelese’a n ka ani soŋa la. A yuun pɔsɛ ti’isa ti putɔpa la kɔ’ɔn tara la vom somɔ hali la ban ka nani Naayinɛ la. Bala yuun basɛ ti a sunsɔa nyie mɛ. A me yuun boti la a tara ban tari lɔɣɔse’a la. A yuun ti’isɛ ti nɛresɛba n nɔŋɛ gbire gbire ge zɛ̃kera bamea la, tari la ligeri la imma’asum ti wuŋerɛ ka paara ba ge me kɔ’ɔn nyɛta sɛla woo ti ba bɔta. (Ym. 73:3-7, 12) Yele wa yuun daam yuumadaana la mɛ ti a yuun pɔsɛ ti’isa ti Yehowa pu’usegɔ ka tari nyuurɔ. A suure n yuun sa’am ti a yeti: “Mam suunre wa de tontɔɔ la yoo. Mam nu’uhen n ka tare dɛngerɔ wa dela yoo.”—Ym. 73:13.
7. To suure san sa’am, la nari ti to eŋɛ la bem? (Bisɛ foote.)
7 Yuumadaana la yuun ka basɛ ti a suure n sa’am la kɔ’ɔsɛ a giila. A yuun “keŋɛ la Yenɛ Yire la poan.” Bilam ti Yehowa yuun demese a puti’irɛ. (Ym. 73:17-19) To suure san sa’am, Yehowa n de to Zɔ la mi lan ani to se’em. To san zusera en ɛɛra pa’alegɔ ge me nana Eŋa n ka’ani tɔ sɛla doose a Yelesum la tansugere la poan la, la wan basɛ ti to tara paŋa ta’an ŋmibera pu’usa en. Hali to suure san sa’am, to ta’an zusɛ Yehowa ti a buɣelɛ to suure ti la ana to mama.—Ym. 94:19.a
Levi nɛra la n gulesɛ Yooma 73 la n ze “Yenɛ Yire la poan” (Bisɛ kaalegɔ zɛ’an 7)
TO SAN “LƐNA YENƐ” TO WAN TARA VOM SOMƆ LA BEERE SA’AM PUTI’IRƐ
8. Leyɛ’ɛsa, sarɔkuni poan ti to wan ta’an vurege du Naayinɛ ti la soŋɛ tɔ?
8 To san vurege du Naayinɛ la wan soŋɛ tɔ sarɔtɔ ayi poan. Yia, la wan basɛ ti to tara vom somɔ. Nyi’i, la wan basɛ ti to tara beere sa’am puti’irɛ. (Yer. 29:11) Basɛ ya ti to geele yele ana wa soŋa soŋa bisɛ lan tari nyuurɔ se’em.
9. Ton ani du’a du’a la Yehowa la basɛ ti to vom ana soŋa la wani?
9 To san vurege du Yehowa, to wan tara vom somɔ. Nɛreba zo’e zo’e zina beere wa ti’isɛ ti Naayinɛ ka boi. Bala la, ba ka mi sɛla n sɔi ti asaala bɔna tinparɛ wa zuo ge me ti’isa ti la keni na ti asaala kan le bɔna tinparɛ wa zuo. Ge ton zamesɛ Naayinɛ Yelesum la, to tari suure lua ti Naayinɛ boi mɛ. “A dela se’em n boe ge sɛba me n eere en la, a wan bahɛ ba te ba nyɛ en.” (Heb. 11:6) Hali la zina beere wa, to tari la pupeelum zo’e zo’e se’ere n sɔi la, to pu’useri la to saazuo Sɔ Yehowa.—Tɛɛ. 10:12, 13.
10. Wuu Yooma 37:29 n pa’alɛ se’em la, Yehowa pu’ulum la bem bo sɛba n tari sakerɛ bɔ’ɔra en la?
10 Nɛreba zo’e zo’e ka tari beere sa’am puti’irɛ. Ba kɔ’ɔn tuna mɛ, dita pɔɣeba bii ela, dɔɣera kɔma ge ni maasum gura ba kuregerɛ. Ba ka mi Naayinɛ n pu’ulum sɛla biŋe beere sa’am la. Ge tomam mi ti Yehowa biseri a yamesi mɛ. (Ym. 25:3-5;1 Tim. 6:17) To tari sakerɛ bɔ’ɔra to Naayinɛ la mɛ ge me mina ti a wan basɛ ti a pu’ulumbiŋ’a la za’a tum tuuma. To tari puti’irɛ ti to wan ta pu’usa en daarewoo Paradiisi poan.—Kaalɛ Yooma 37:29.
11. To san dɛna Naayinɛ zɔdoma, la wan ana tomam la eŋa la wani?
11 To san ana du’a du’a la Naayinɛ, la dela yelesonɛ bɔ’ɔra tɔ yɛla zo’e zo’e poan. Makerɛ, Yehowa yeti a wan di sugeri bo sɛba n basɛ ba be’em ge ana du’a du’a la en la. (Isa. 1:18) Bala zuo la, la ka nari ti to basɛ ti to puti’irɛ daana tɔ la be’em sebo ti to tabelɛ tum la. (Ym. 32:1-5) To puurɛ me ni pee mɛ to san eŋɛ sɛla ti Yehowa puurɛ pee. (Mag. 23:15) Yelemɛŋɛrɛ, yelesoma ase’a boi mɛ n basɛ ti to tara pupeelum tomam n de Yehowa zɔdoma la zuo. Ge ho wan eŋɛ la wani ta’an ana du’a du’a la Naayinɛ?
TON WAN EŊƐ SE’EM TA’AN “LƐNA YENƐ”
12. Hon eŋɛ la bem ta’an ana du’a du’a la Naayinɛ?
12 Ho san dɛna Kristabia n muse ko’om, ho deŋɛ eŋɛ pa’alɛ ti ho vurege homea du Yehowa mɛ. Ho zamesɛ Yehowa Naayinɛ la Krista Yezu yɛla zo’e zo’e mɛ, basɛ ho be’em, tara sakerɛ bɔ’ɔra Naayinɛ ge me tiregera nana en. Ge to san bɔta ti to ana du’a du’a la Naayinɛ, la nari ti to kelum ita yele ana wa.—Kol. 2:6.
13. Bem yɛla atã n wan soŋɛ tɔ ti to kelum ana du’a du’a la Yehowa?
13 Bem n wan soŋɛ tɔ ti to kelum ana du’a du’a la Yehowa? (1) La nari ti to kelum kaala ge zamesa Baabule la. To san kaala Baabule la, la daɣɛ ti to yeen zamesa Naayinɛ yɛla ma’a ge to boti la to baŋɛ Naayinɛ puti’irɛ n de se’em yɛla poan ge me tara a naresum yɛla la tuna tuuma. (Ep. 5:15-17) (2) La nari ti to zamesɛ baŋɛ Naayinɛ n nɔŋɛ tomam ayima ayima woo yele se’em ti to sakerɛ kpe’em. (3) La nari ti to kelum yaɛ yelese’a ti Yehowa yaɛ ge me da nyɔɣɛ nɛresɛba n iti yele aŋa zɔtɔ.—Ym. 1:1; 101:3.
14. Wuu 1 Korint 10:31 n pa’alɛ se’em la, bem ti to wan ta’an ita daarewoo ti Yehowa puurɛ pee? (Bisɛ fɔɔra la.)
14 Kaalɛ 1 Korint 10:31. La yele pakɛ mɛ ti to ita yelese’a n wan basɛ ti Yehowa puurɛ pee. La daɣɛ ti to yeen kena na’am mɔɔlegɔ la tansugere zamesegɔ ma’a. La nari ti to basɛ ti yelese’a ti to ita daarewoo pɛɛra Yehowa puurɛ. Makerɛ, to san tara yelemɛŋɛrɛ sɛla woo poan ge me bɔ’ɔra yɛri yɛri, la wan basɛ ti Yehowa puurɛ pee. (2 Ko. 8:21; 9:7) To me wan bɔta ti to eŋɛ pa’alɛ ti to puurɛ pee ya la vom la ti Naayinɛ dekɛ bo to la. To san dita ge nyuura maɣesa, bala wan pa’alɛ ti to iti yɛla woo la ma’a ma’a ge me wan soŋɛ tɔ ti to ana du’a du’a la Naayinɛ. Yehowa san baŋɛ ti to tiregeri ti to ita sɛla woo ti a puurɛ pɛɛra, bala wan basɛ ti a nɔŋɛ tɔ pa’asɛ.—Lu. 16:10.
To san mina loore tukera soŋa, ita exercise, dita dinɔ’ɔma ge me bɔ’ɔra yɛri yɛri Yehowa puurɛ wan pee (Bisɛ kaalegɔ zɛ’an 14)
15. Yehowa boti to ita nɛreba la wani?
15 Yehowa iti la som bɔ’ɔra nɛra woo. (Mt. 5:45) A me boti la to ita bala bɔ’ɔra nɛreba. Makerɛ, to “da tɔgɔra sɛla n ka an soŋa bɔ’ɔra nɛreba. Ge [to] tara sunma’ahom la ba, . . . ge me eta sɛla n de na’ahegɔ etegɔ daarɛ woo bɔ’ɔra nɛra woo.” (Titus 3:2) Bala la, nɛra san puɣum ka pu’usa Yehowa to kan zeem en. (2 Tim. 2:23-25) To san ita som bɔ’ɔra nɛra woo, to wan ana du’a du’a la Yehowa.
TO WAN TA’AN “LƐNA YENƐ” HALI TO SAN PUƔUM TUE
16. Mina n gulesɛ Yooma 73 la yuun ti’isɛ la bem saŋa ase’a?
16 Saŋa ase’a, to ta’an ti’isa ti Yehowa ka le nɔŋɔ tɔ, to tuure la zuo. Wuu ton puɣum sɔsɛ se’em la, bala n yuun paɛ mina n gulesɛ Yooma 73 la. A fabelɛ yeti: “Mam deŋɛ bɔregɛ mɛ, mam na’ma deŋɛ serom mɛ.” (Ym. 73:2) Amea yuun sakɛ ti a ‘suure n sa’am’ ti a “gerege ka mina sɛsɛla, ana wo mɔen duŋa la” Yehowa nɛŋan. (Ym. 73:21, 22) A yuun ti’isɛ ti a tuure la zuo, Yehowa ka le nɔŋɛ en ge me kan di sugeri bo en?
17. (a) Yuumadaana la giila n yuun kɔ’ɔsɛ la, a yuun eŋɛ la bem? (b) To wan ta’an zamesɛ la bem a yele la poan? (Bisɛ fɔɔra la.)
17 Yuumadaana la yuun san puɣum ti’isa ti Yehowa zaɣesɛ en mɛ, la yuun ani en bala la saŋa fii poan. Se’em ma’a ti a suure yuun sa’am la, a yuun baŋɛ ti la nari ti a ana du’a du’a la Naayinɛ. Bala n sɔi ti a yuun yeti: “Ge la kan malom dɛna bala, mam boe mɛ la hom [Yehowa] saŋa woo. Ho gorɛ mam nu’o mɛ. Ho ne dekɛ la ho kan’aŋɔ la gu mam, ge ne to’e mam la nu’uhe seyi.” (Ym. 73:23, 24) To giila san kɔ’ɔsɛ la nari ti to yele Yehowa ti a soŋɛ tɔ. (Ym. 73:26; 94:18) Hali to san puɣum tue, to wan ta’an lebe Yehowa zɛ’an na ge mina ti a “dela sugurom dita.” (Ym. 86:5) La nari ti to ana du’a du’a la to Naayinɛ la, yele yele wuu to giila san kɔ’ɔsɛ.—Ym. 103:13, 14.
To san baŋɛ ti to sakerɛ la ma’ari mɛ, la nari ti to zusa zɔ’ɔra ge me kena zamesegɔ saŋa woo ta’an ana du’a du’a la Yehowa (Bisɛ kaalegɔ zɛ’an 17)
“LƐNA YENƐ” DAAREWOO
18. Beni n sɔi ti, ton wan ana du’a du’a la Yehowa la ka tara beene?
18 Ton wan ana du’a du’a la Yehowa se’em la ka tari beene. To me kan malum zamesɛ a yɛla ba’asɛ. Baabule la yeti nɛra kan “ta’an bɔkɛ” Yehowa sarɔtɔ, a yɛm la a mi’ilum la za’a.—Arom 11:33.
19. Yuumadaana la tɔɣɛ beere sa’am yele la wani?
19 Yooma 79:13 yeti: “Tomam n de ho nɛreba wa, dɛna ho mɛŋa yaama piihe wa, wan pɛngɛ ho bala ka tara ba’ahegɔ. To buuri saŋa woo wan tɛɛnha de yele, dekera pɛnka bɔ’ɔra hɔ.” Ho san ana du’a du’a la Naayinɛ, hon me wan ta’an tara puti’irɛ ti ho wan nyɛ kã’a. Ho me wan ta’an yeti: “Yenɛ n de mam suunre wa paŋa, la mam tɔntɛ yɛ’ɛha.”—Ym. 73:26.
YUUNƐ 32 Take Sides With Jehovah! (Kɔ’ɔn Pa Yehowa Poore!)
a Sɛba n tari putɛyiila bii ba suure n sa’am ti la yue la, nari ti ba keŋɛ ta nyɛ dɔgeta. Ho san bɔta ti ho baŋɛ yɛla pa’asɛ, bisɛ The Watchtower, No. 1 2023.