Pigera Zontua INTANƐT TUUMA ZƐ'AN GƆNƆ ZAALEŊA
Pigera Zontua
INTANƐT TUUMA ZƐ'AN GƆNƆ ZAALEŊA
Farefare
Ɛ
  • ã
  • ɛ
  • ɛ̃
  • ɣ
  • ŋ
  • ɔ
  • ɔ̃
  • BAABULE
  • GƆNƆ
  • ZAMESEGƆ
  • w25 April gɔn. 26-31
  • Burasa’ara Wa, Tɔɣesa Ya Mark La Timoti

Vidiyo ka boi kalam.

Gaafara, daaŋɔ fii n boi vidiyo la poan.

  • Burasa’ara Wa, Tɔɣesa Ya Mark La Timoti
  • Pigera Zontua N Mɔɔli Yehowa Na’am La—2025
  • Zupiɣesi
  • Ka Taaba
  • WUU MARK LA, ÃREGƐ HOMEA TUNA BƆ’ƆRA YEHOWA GE SOŊERA MABIISI
  • WUU TIMOTI LA, TI’ISA NƐREBA YELE
  • PAUL KA’AŊƆ LA WAN TA’AN SOŊƐ HƆ
  • HO WAN NYƐ KÃ’A ZO’E ZO’E HO SAN SOŊERA NƐREBA
  • ‘Basɛ Ti Tansuga La Malum Tara Paŋa’
    ‘Mu’ɛ Nini Mɔɔla’ Naayinɛ Na’am La Yɛla
  • Mabiburaasi, Yamam Tiregeri Ti Ya Ta’an Dɛna Keendoma Soŋeredoma?
    Pigera Zontua N Mɔɔli Yehowa Na’am La (Zamesegɔ)—2024
  • Hon Wan Kɔ’ɛ Ho Puti’irɛ Se’em Ti La Pa’alɛ Ti Ho Dekɛ Homea Delum Yehowa
    Tomam Kristakɔma Vom La To Na’am Tuuma—Zamesegɔ Gɔŋɔ—2023
  • Tɛ̃ra Ti ‘Yehowa Boi’ Mɛ
    Pigera Zontua N Mɔɔli Yehowa Na’am La (Zamesegɔ)—2024
Bisɛ Ase'a Pa'asɛ
Pigera Zontua N Mɔɔli Yehowa Na’am La—2025
w25 April gɔn. 26-31

ZASEŊƆ 18

YUUNƐ 65 Move Ahead! (Nyɛta Nɛŋa Tɔlega!)

Burasa’ara Wa, Tɔɣesa Ya Mark La Timoti

“Ho han yɛ’ɛha na, ho tare Mark wa’ana te a dela se’em n wan ta’an soŋɛ mam.”—2 TIM. 4:11.

YELEKPINE

To wan sɔsɛ baŋɛ Mark la Timoti makesonɛ la n wan ta’an soŋɛ burasa’ara ti ba tum zo’e zo’e bo Yehowa la ba mabiisi.

1-2. Bem n yuun wan ta’an gu Mark la Timoti ti ba kan ãregera bamea soŋera nɛreba?

BURASA’ARA wa, yamam boti ya ãregera yamea Yehowa pu’usegɔ poan ge me kɔ’ɔn soŋera mabiisi? Nɔkpe’ene kai ti ya boti bala. La dela pupeelum la ton mi ti burasa’ara zo’e zo’e boti la ba soŋera mabiisi la! (Ym. 110:3) Ge yɛla ase’a ta’an kpe’em bo ya. Hon ka mi Yehowa n wan dekɛ ho tum tuuma se’em la zuo dabeem n tari hɔ ti ho yalegɛ ho na’am tuuma la? Ba tabelɛ bo ho tuunɛ ti ho zaɣesɛ se’ere n sɔi la ho ti’isɛ ti ho kan ta’an tum? San dɛna bala, la daɣɛ hon ma’a ti la tabelɛ ana ho bala.

2 La me yuun ani Mark la Timoti la bala. La boi bim ti ba yuun ta’an ti’isa ti ba ka kumesɛ bii ba ka mi ba vom n wan ta ana se’em ge bala yuun ka gu ba ti ba ka soŋera ba mabiisi la. Se’em ma’a ti tuntuna Paul la Barnabas beem Mark ti a doose ba keŋɛ zɛ’ɛsi ase’a ta mɔɔlɛ la, daanse’ere Mark yuun naɛ la a ma kɛ̃’ɛra yisoŋa poan. (Tm. 12:​12, 13, 25) Ge Mark yuun basɛ la yire la, lan wan eŋɛ se’em ti a ta’an yalegɛ a na’am tuuma la. Yia la, a yuun keŋɛ la Antiok. A yuun nyaa le doose la Paul la Barnabas keŋɛ zɛse’esi n zaaɛ. (Tm. 13:​1-5) Bala mea nɔɔ ti daanse’ere Timoti me yuun kɛ̃’ɛri mɛ la a dɔɣereba se’em ma’a ti Paul beem en ti a naɛ la en ti ba ta mɔɔlɛ la. Timoti yuun dela bunbilipaalega, bala la a yuun ta’an ti’isa ti a ka kumesɛ seke ti a doose Paul ti ba ta mɔɔlɛ. (Dekɛ makɛ 1 Korint 16:​10, 11 la 1 Timoti 4:12.) Ge a yuun sakɛ doose Paul mɛ ge me yuun nyɛ kã’a zo’e zo’e.—Tm. 16:​3-5.

3. (a) To eŋɛ la wani baŋɛ ti Paul yuun nɔŋɛ Mark la Timoti? (2 Timoti 4:​6, 9, 11) (Bisɛ fɔɔra la.) (b) To wan geele la soke ani zaseŋɔ wa poan?

3 Mark la Timoti n yuun de bunbilipaalesi la, ba yuun zamesɛ baŋɛ ban wan tuna tunkãra se’a ti ba bo ba tansugere la poan. Paul yuun nɔŋɛ bunbilipaalesi wa mɛ ge yuun bɔta ti ba wa’an a zɛ’an na se’em ma’a ti a yuun pɔ̃ra kum la. (Kaalɛ 2 Timoti 4:​6, 9, 11.) Mark la Timoti yuun tari la bem hala n basɛ ti Paul nɔŋɛ ba bala? Burasa’ara wan ta’an tɔɣesa ba la wani? Paul ka’aŋɔ la wan ta’an soŋɛ burasa’ara la wani?

Fɔɔra: 1. Mark n dekɛ dia la daam bɔ’ɔra Paul la Barnabas. 2. Timoti n boi bim kaala gɔŋɔ ti keendoma ana kɛli kɛlesa.

Mark la Timoti n yuun de bunbilipaalesi ge zamesɛ baŋɛ ban wan tuna tunkãra se’em la yuun basɛ ti Paul nɔŋɛ ba mɛ paa (Bisɛ kaalegɔ zɛ’an 3)b


WUU MARK LA, ÃREGƐ HOMEA TUNA BƆ’ƆRA YEHOWA GE SOŊERA MABIISI

4-5. Mark yuun eŋɛ la wani pa’alɛ ti a boti la a soŋera mabiisi?

4 Hon soŋeri nɛreba vuurɛ dela ho tuna bɔ’ɔra ba, hali la san puɣum kpe’em bo ho ti ho eŋɛ bala. Mark yuun iti la bala. Paul n yuun ka sakɛ ti a doose ba keŋɛ yi’i satiŋa na’am yetɔɣum yalegerɛ tuuma la, daanse’ere la yuun daam en mɛ ti a suure sa’am. (Tm. 15:​37, 38) Ge bala yuun ka gu Mark ti a kan soŋera a mabiisi la.

5 Mark yuun doose la a suɔ Barnabas ta mɔɔlɛ. Yuuma 11 pooren, se’em ma’a ti ba yuun paɣɛ Paul Arom tiŋa la, Mark yuun keŋɛ bim mɛ ta kpemese a giila. (Flm. 23, 24) Yelemɛŋɛrɛ, Paul puurɛ yuun pee mɛ la Mark n soŋɛ en la ge yeti Mark ‘buɣelɛ eŋa suure mɛ paa.’—Kol. 4:​10, 11.

6. Bem nyuurɔ ti Mark yuun nyɛ se’em ma’a ti a yuun naɛ la Kristakɔma n kumesɛ tuna la? (Bisɛ tiŋanɔɔrɛ yelesum la.)

6 Mark yuun nyɛ nyuurɔ mɛ la eŋa n tari bɔnsoŋa la Kristakɔma n kumesɛ la. Eŋa n yuun keŋɛ Arom ta bisɛ Paul ba’asɛ la, a yuun doose la Peter keŋɛ Babilon. Mark la Peter suure n yuun kɛ̃ taaba ti Peter yi en ti “Mark se’em n wone te a dela n dayɔa la.” (1 Pe. 5:13) Ban yuun naɛ taaba tuna la, Peter yuun tɔɣɛ Yezu vom la a na’am tuuma yɛla bo a zɔ Mark mɛ. Da’anse’ere bala n yuun soŋɛ en ti a gulesɛ a Yelesoma gɔŋɔ la.a

7. Seung-Woo tɔɣesɛ Mark la wani? (Bisɛ foote la.)

7 Mark yuun kɔ’ɔn mu’ɛ la nini pu’usa Yehowa ge me ana du’a du’a la mabisɛba n kumesɛ. Ho wan eŋɛ la wani ta’an tɔɣesa Mark? Daanse’ere ho boti la ho dɛna keema bii keendoma soŋera ge ho nan ka nyɛ yɔ’ɔ la. San dɛna bala, da basɛ ti ho giila kɔ’ɔsɛ. Tuɣum bisɛ hon wan ta’an eŋɛ sɛla bo Yehowa ge soŋɛ tansugere la. Geele Seung-Woo n nyaa de keema la yele bisɛ. Eŋa n yuun de bunbilipaalega la, a yuun tari la amea makera la a taaba. Basɛba yuun nyɛ yɔ’ɔ mɛ tuna tuuma ase’a ge ti a nan kelum ka nyɛ. Seung-Woo yuun bisɛ ti ba tamɛ a yele mɛ ge ti a yuun yele keendoma la lan ani en se’em. Keema ayima yuun yele en yeti a tiregɛ soŋera nɛreba hali nɛreba san puɣum ka nyɛta a tunsoma la. Seung-Woo yuun dekɛ ka’aŋɔ wa tum la tuuma ge pɔsɛ soŋera bunkureba, la sɛba ti la kpe’em bo ba ti ba nyaŋɛ keŋɛ zamesegɔ la. Nananawa a yeti: “Mam yuun nyaa bɔkɛ soŋa soŋa la vuurɛ n de se’em ti ho soŋera nɛreba. Mam n yuun soŋeri nɛreba la yuun basɛ ti mam puurɛ pee mɛ paa.”

Mabia n de bunbilipaalega n dekɛ mabia n de bunkutɛ keŋɛ tansugere zamesegɔ.

Burasa’ara wan nyɛ nyuurɔ la wani ba san soŋera mabisɛba n kumesɛ? (Bisɛ kaalegɔ zɛ’an 7)


WUU TIMOTI LA, TI’ISA NƐREBA YELE

8. Bem zuo ti Paul yuun loe Timoti ti a doose en? (Filipi 2:​19-22)

8 Paul yuun boti la burasa’ara n tari sukpe’ene doose en lebe tinse’esi ti ba yuun giisɛ en la. A yuun deŋɛ nɛŋa loe la Silas n tum bo Yehowa yuuma zo’e zo’e la ti a doose en. (Tm. 15:​22, 40) Pooren, Paul yuun le loe la Timoti ti a doose en. Bem zuo ti a yuun loe Timoti? Yele deyima dela mabiisi yuun pɛ̃ɣeri en mɛ. (Tm. 16:​1, 2) A me yuun kɔ’ɔn ti’isa la nɛreba yele.—Kaalɛ Filipi 2:​19-22.

9. Timoti yuun eŋɛ la wani pa’alɛ ti a sirum ti’isɛ a mabiisi la yele?

9 Se’em ma’a ti Timoti yuun naɛ la Paul tuna na’am mɔɔlegɔ tuuma la, a yuun eŋɛ pa’alɛ ti a ti’iseri la nɛreba yele gana amea. Bala la, Paul n yuun basɛ Beroea tiŋa la, a yuun mi ti Timoti wan bisera mabiisi la soŋa. (Tm. 17:​13, 14) Sankaŋa la, Timoti yuun zamesɛ la yɛla zo’e zo’e Silas zɛ’an se’em ma’a ti ba yuun laɣum bɔna Beroea la. Pooren, Paul yuun tum la Timoti ti a keŋɛ Tesalonika ta kpemese Kristakɔma n yuun boi bim la giila. (1 Tes. 3:2.) Yuuma 15 n taɣelɛ la, Timoti yuun baŋɛ ti la dela a “kɛla la sɛba n kele” ge tara nimbũ’ɔ bɔ’ɔra sɛba n nameseri. (Arom 12:15; 2 Tim. 1:4) Bunbilipaalesi wan eŋɛ la wani ta’an tɔɣesa Timoti?

10. Mabia ayima yu’urɛ n de Woo Jae yuun zamesɛ baŋɛ eŋa n wan ti’isa mabiisi yele se’em la wani?

10 Mabia ayima yu’urɛ n de Woo Jae yuun zamesɛ baŋɛ eŋa n wan ti’isa mabiisi la yele se’em. Woo Jae n yuun de bunbilipaalega la, la yuun kpe’em bo en mɛ ti a naɛ la bunkureba n boi tansugere la poan sɔsa. A yuun ni yeen pu’usɛ ba mɛ ge tole. Keema ayima yuun yele en yeti a ta’an pɔsɛ sɔsega doose la eŋa n wan pɛɣɛ mabiisi la, la ban eŋɛ sɛla. Keema la yuun le yele en ti a ta’an ti’isɛ bisɛ mabiisi la n boti sɛla. Woo Jae yuun dekɛ ka’aŋɔ la tum tuuma mɛ. Woo Jae nyaa dela keema. A yeti: “Nananawa la ka kpe’em bo mam ti n sɔsa la mabiisi, la ka pakɛ la ba yuuma. Mam puurɛ pee mɛ la mam n baŋɛ mabiisi la bɔŋa n ani se’em la. Wana basɛ ti n baŋɛ la yelese’a n pakɛ ba, la mam n wan ta’an eŋɛ sɛla soŋɛ ba.”

11. Burasa’ara wan ta’an zamesɛ baŋɛ ban wan ti’isa mabiisi yele se’em la wani? (Bisɛ foote la.)

11 Burasa’ara wan ta’an zamesɛ baŋɛ ban wan ti’isa nɛreba yele se’em. Ho san bɔna zamesegɔ poan, ni naɛ la bunkureba, la kɔma za’a sɔsa. Ni soke baŋɛ lan ani ba se’em ge kelese ba. Wana wan basɛ ti ho baŋɛ hon wan ta’an soŋɛ ba se’em. Daanse’ere ho wan baŋɛ ti bunkureba basɛba ka mi ban wan tara JW Library® app la tuna tuuma se’em. Bii ho ta’an baŋɛ ti ba ka maasum ti ba doose nɛra keŋɛ na’am mɔɔlegɔ. Ho wan ta’an soŋɛ ba ti ba mina ban wan tara ba fon tuna tuuma se’em bii ho naɛ la ba keŋɛ na’am mɔɔlegɔ? Ho san soŋera wana, mabiisi la za’a wan tɔɣesa hɔ.

Mabia n de bunbilipaalega, la mabia n de bunkutɛ n boi yire la yire na’am mɔɔlegɔ tuuma la poan. Mabia la n de bunkutɛ la n tɔɣeri la yidaana la ti mabia la n de bunbilipaalega la zãla tablet pa’ala en vidiyo.

Burasa’ara wan ta’an soŋɛ tansugere la sarɔtɔ zo’e zo’e poan (Bisɛ kaalegɔ zɛ’an 11)


PAUL KA’AŊƆ LA WAN TA’AN SOŊƐ HƆ

12. Paul n yuun ka’am Timoti se’em la wan ta’an soŋɛ burasa’ara la wani?

12 Paul yuun ka’am la Timoti ti la soŋɛ en ti a tara pupeelum tuna a na’am tuuma la. (1 Tim. 1:18; 2 Tim. 4:5) Paul ka’aŋɔ la wan ta’an soŋɛ burasa’ara. Wani wani? Kaala gɔnɔ toyi la ti Paul yuun gulesɛ bo Timoti la wuu a gulesɛ bo la hon la ge bisɛ hon wan ta’an dekɛ ka’aŋɔ se’a n boi bim la tum tuuma se’em. Geele yele ana wa bisɛ.

13. Bem n wan soŋɛ hɔ ti ho ta’an tara yelemɛŋɛrɛ bɔ’ɔra Yehowa?

13 “Zamehɛ ya ya mɛhe [ge tara pu’usegɔ n di mi’a bɔ’ɔra Naayinɛ.]” (1 Tim. 4:7b) Bem n de pu’usegɔ n di mi’a? La dela hon tari yelemɛŋɛrɛ bɔ’ɔra Yehowa ge ita sɛla n wan basɛ ti a puurɛ pee. La nari ti to tiregɛ ta’an tara halɛ wa. Wani wani? Paul n yuun yeti “zamehɛ ya ya mɛhe” la, a yuun boti a pa’alɛ la zɔteba n nari ti ba kumesɛ bamesi se’em gura ba de’eŋo daarɛ la. Zɔteba wa nari ti ba ita yelese’a n wan soŋɛ ba ti ba ta’an zɔ di. Tomam me nari ti to ita yelese’a n wan basɛ ti to ana du’a du’a la Yehowa.

14. Bem n nari ti ho tɛ̃ra ho san kaala Baabule la? Bo makerɛ.

14 Ho san kaala Baabule la, tɛ̃ra ti sɛla zuo ti ho kaala dela la basɛ ti ho ana du’a du’a la Yehowa. Makerɛ, ho wan ta’an zamesɛ la bem Yezu la buntata la yele la poan? (Mr. 10:​17-22) Buraa la yuun sakɛ ti Yezu n de Mɛzaaya la ge a yuun ka tari sakerɛ n wan basɛ ti a dɔla en. Hali la bala za’a, Yezu “suunre daa kɛ en” mɛ. Yezu n daa sɔsɛ la en se’em la kɛ̃ hon suure? La niɛ peelumi ti Yezu yuun boti la buraa la pu’usa Yehowa ge tara pupeelum. Yezu n yuun sɔsɛ la buraa la se’em la pa’alɛ la Yehowa me n nɔŋɛ buraa la se’em. (Yon 14:9) Ho san ti’isa gulesegɔ wa la ho bɔŋa n ani se’em, soke homea yeti, ‘Bem n nari ti n eŋɛ ta’an ana du’a du’a la Yehowa ge ãregera n mea soŋera nɛreba?’

15. Beni n sɔi ti la nara ti burasa’arɛ dɛna makesonɛ bɔ’ɔra nɛreba? Bo makerɛ. (1 Timoti 4:​12, 13)

15 ‘Tara makesonɛ bɔ’ɔra sakeredoma la.’ (Kaalɛ 1 Timoti 4:​12, 13.) Paul yuun yele Timoti ti a zamesɛ kaalegɔ la pa’alegɔ soŋa ge me tara hala n de wuu nɔŋerɛ, sakerɛ la sarensoŋɔ. Beni n sɔi? Se’ere n sɔi la, itigɔ nyani yetɔɣum. Makɛ bisɛ ti ho yeti ho bo la yetɔɣum n pa’alɛ ton wan tulegera na’am mɔɔlegɔ poan se’em. La kan kpe’em bo ho ti ho yese ho suure poan tɔɣɛ ho san tulegera na’am mɔɔlegɔ tuuma la poan. Hon tari makesonɛ la wan kpemese mabiisi la giila ti ba dekɛ hon tɔɣɛ sɛla la tum tuuma.—1 Tim. 3:13.

16. (a) Sarɔtɔ tunuu ani poan ti burasa’ara wan ta’an tara makesonɛ? (b) Sodeni poan ti burasa’arɛ wan ta’an tara makesonɛ ‘yetɔɣum poan’?

16 Wuu 1 Timoti 4:12 n pa’alɛ se’em la, Paul pa’alɛ la sarɔtɔ tunuu poan ti burasa’arɛ wan ta’an dɛna makesonɛ bɔ’ɔra nɛreba. La wan ana soŋa ti ho nyɛ saŋa zamesɛ ba woo yele. Makɛ bisɛ ti ho boti la ho tara makesonɛ ho ‘yetɔɣum poan.’ Ti’isɛ bisɛ hon wan ta’an tɔɣɛ sɛla kpemese nɛreba giila. Ho san kelum kɛ̃’ɛra la ho dɔɣereba, ho wan ta’an basɛ ti ba baŋɛ ho puurɛ n pee la ban biseri ho se’em la? Tansugere zamesegɔ san ba’asɛ, ho wan ta’an yele mabia bii mabipɔka a tuunɛ la n kalum ho suure se’em? Zamesegɔ poan, ho me ta’an bo lebesego hon bɔkɛ zaseŋɔ la se’em. Ho san tiregera ti ho tara makesonɛ ho yetɔɣum poan, mabiisi wan baŋɛ ti ho nyɛti la nɛŋa tɔlega vo’osum poan.—1 Tim. 4:15.

17. Bem n wan ta’an soŋɛ burasa’arɛ ti a loe vo’osum poan tuunɛ ge me ta’an tum dɛ? (2 Timoti 2:22)

17 ‘Yese homea bunbilipaalemen kunkoma’asum yooro poan ge dɔla tontɔɔ tuuma.’ (Kaalɛ 2 Timoti 2:22.) Paul yuun yele Timoti ti a zaɣesɛ yelese’a woo n wan ta’an sa’am eŋa la Yehowa bɔŋa la. Daanse’ere ho sa’ani la saŋa yelese’a n ka ba’ɛ pakɛ poan ti ho ka nyɛta yɔ’ɔ tuna zo’e zo’e bɔ’ɔra Yehowa. Makerɛ, ti’isɛ bisɛ hon sa’ani saŋa se’em de’eŋo yɛla poan, intanɛt poan bii ŋmɛ’ɛra vidiyo games. Ho wan ta’an dekɛ saŋa wa basɛba tuna bɔ’ɔra Yehowa ge soŋera nɛreba? Ho ta’an soŋɛ ti ba maalɛ Na’am Pu’usegɔ Deo bii ho tara gɔnɔ toroko la mɔɔla. Ho san ita yele ana, ho wan ta’an nyɛ zɔtɔ n wan kpɛmesa ho giila ti ho loe vo’osum poan tuunɛ ge me ta’an tum dɛ.

HO WAN NYƐ KÃ’A ZO’E ZO’E HO SAN SOŊERA NƐREBA

18. Beni n sɔi ti to wan ta’an yeti Mark la Timoti yuun tari la pupeelum?

18 Mark la Timoti yuun eŋɛ la teere zo’e zo’e lan wan eŋɛ se’em ti ba ta’an soŋera nɛreba. Wana yuun basɛ ti ba tara la pupeelum. (Tm. 20:35) Mark yuun keŋɛ la zɛ’ɛsi zo’e zo’e ta soŋɛ a mabiisi la. A me yuun gulesɛ la Yezu vom, la a na’am tuuma yɛla ti la kɛ̃’ɛra suure. Timoti yuun soŋɛ la Paul ti a yu’usɛ tansuga ge me kpemese mabiisi la giila. La niɛ peelumi ti Yehowa puurɛ yuun pee la Mark la Timoti n yuun eŋɛ teere se’a ti ba ta’an soŋera nɛreba la.

19. Beni n sɔi ti la nara ti burasa’ara tara Paul n yuun ka’am Timoti se’em la tuna tuuma ge ba wan nyɛ nyuurɔ la wani ba san eŋɛ bala?

19 Gɔnseto ti Paul gulesɛ bo Timoti la basɛ ti to baŋɛ eŋa n yuun nɔŋɛ a zɔ wa se’em. Gɔntuna wa me pa’alɛ ti Yehowa nɔŋɛ yamam n de burasa’ara mɛ paa. A boti la ya puurɛ pee a pu’usegɔ poan. Bala la, tiregɛ ya tara Paul ka’aŋɔ la tuna tuuma ge ãregera yamea soŋera nɛreba. Ya san ita bala, ya wan tara pupeelum nananawa ge me kɔ’ɔn ‘gurɛ vom somɔ la kankaŋi.’—1 Tim. 6:​18, 19.

HON WAN LEBESE LA WANI?

  • Hon zamesɛ la bem Mark yele la poan?

  • Ho wan eŋɛ la wani ti’isa nɛreba yele ti la pa’alɛ ti ho tɔɣeseri la Timoti?

  • Paul ka’aŋɔ kuni n wan ta’an soŋɛ burasa’arɛ ti a tuna zo’e zo’e bɔ’ɔra Yehowa?

YUUNƐ 80 “Taste and See That Jehovah Is Good” (‘Ho Wan Baŋɛ Ti Yehowa Ani Soŋa’)

a Peter n yuun de nɛresɛka taaba la zuo, a yuun yele Mark lan yuun ani Yezu se’em, la Yezu n yuun tɔɣɛ ge eŋɛ sɛla. Bala zuo ti Mark n yuun gulesɛ Yezu vom yɛla la, a yuun tɔɣɛ Yezu n yuun iti a yɛla se’em ti la me ana en se’em.—Mr. 3:5; 7:34; 8:12.

b FOOTE LA VUURƐ: Mark n soŋeri Paul la Barnabas ba satiŋa na’am yetɔɣum yalegerɛ tuuma la poan. Timoti n kaɛ tansugere ayima ta kpɛmesa ba giila.

    Frafra Gɔnɔ (2000-2025)
    Yese
    Yu'ɛ
    • Farefare
    • Tɔ̃rɛ
    • Hon boti sɛla
    • Copyright © 2025 Watch Tower Bible and Tract Society of Pennsylvania
    • Yelese'a N Nari Ti Ho Mina
    • Suɣelum Yɛla
    • Privacy Settings
    • JW.ORG
    • Yu'ɛ
    Tɔ̃rɛ