Tɔɣesa Malesi La

1-2. (a) Tomam la malesi boi to’ore to’ore la wani? (b) Sodeni poan ti tomam la malesi dɛna buyina?

TOMAM n de Yehowa nɛreba la zuo, to laɣum pa’asɛ la a yizuo la poan pu’usa en. To mabiisi n boi tingole wa za’a poan, la malesi tusa tusa la me pa’asɛ bim mɛ. (Da. 7:​9, 10) To san ti’isa malesi la yele, to ni baŋɛ ti tomam la bamam boi la to’ore to’ore. Makerɛ, ba yuun naam malesi wa mɛ yuuma zo’e zo’e pooren ti ba nyaa naam tomam. (Yob 38:​4, 7) Ba tari paŋa gana to mɛ. Ba ani la zilam ge me dɛna tontɔɔ gana tomam se’ere n sɔi la, tomam ka di mi’a.—Lu. 9:26.

² La boi bim ti tomam la malesi la boi la to’ore to’ore ge yɛla ase’a poan, to dela buyina. Makerɛ, tomam la malesi la wan ta’an tɔɣesa Yehowa hala la. Tomam me wan ta’an kɔ’ɛ to puti’irɛ wuu malesi la. Tomam la malesi la za’a tari yu’ura mɛ, tara hala to’ore to’ore ge ti to tuuma me bɔna tɔka tɔka. Tomam me nari ti to pu’usa to Naaŋɔdaana la wuu malesi la.—1 Pe. 1:12.

3. To wan ta’an zamesɛ la bem malesi la zɛ’an?

³ Tomam la malesi la n de buyina sarɔtɔ ase’a poan la zuo, ba makesonɛ la wan ta’an kpemese to giila ge me pa’alɛ tɔ yɛla zo’e zo’e. Zaseŋɔ wa poan, to wan sɔsɛ baŋɛ ton wan eŋɛ se’em ta’an tɔɣesa malesi la n siregeri bamea, nɔŋɛ nɛreba, ŋmibera ge me basɛ ti tansugere la ana filam se’em.

MALESI LA SIREGERI LA BAMEA

4. (a) Sodeni poan ti malesi la siregera bamea? (b) Beni n sɔi ti malesi la siregera bamea? (Yooma 89:7)

⁴ Malesi sɛba n tari yelemɛŋɛrɛ la siregeri la bamea. La boi bim ti ba mi la yɛla zo’e zo’e, tara paŋa la yɛm ge ba kelum nana Yehowa pa’alegɔ mɛ. (Ym. 103:20) Yehowa san ni bo ba tuunɛ ti ba tum de ba’asɛ, ba ni ka ŋmɛ̃’ɛra ba nyũ’ɔ bii ba tara ba kpe’eŋo la pa’ala bamea. Ba puurɛ ni pee mɛ ti ba tum Yehowa n bo ba tuunse’ere la, hali nɛreba san puɣum ka mina ba yu’ura.a (Pin. 32:​24, 29; 2 Na. 19:35) Ba yuun ni ka bɔta ti ba to’e na’asegɔ seko n de Yehowa denɛ. Beni n sɔi ti malesi la siregera bamea bala? Ba nɔŋɛ la Yehowa ge me bɔ’ɔra en gilema.—Kaalɛ Yooma 89:7.

5. Sodeni poan ti maleka ayima yuun sirege amea, eŋa n yuun ka’ani tuntuna Yon la? (Bisɛ foote la.)

⁵ To geele ya malesi n iti se’em pa’ala ti ba siregeri la bamea. Yuun 96 Y.B. bɔba ti maleka ti to ka mina a yu’urɛ yuun lilige yɛla bo tuntuna Yon. (Lil. 1:1) Yon n yuun nyɛ liligere yɛla la, a yuun eŋɛ la wani? A yuun ku’ure mɛ ti a pu’usɛ maleka la. Maleka la yuun ka sakɛ ge yele en yeti, ‘Bisɛ homea soŋa! Da eŋɛ bala! Mam yeen dɛna la yameŋa wuu hon la ho suurɔ la . . . Pu’usa Naayinɛ!’ (Lil. 19:10) Maleka la yuun siregeri la amea paa! Maleka la yuun ka boti a to’e na’asegɔ bii pɛ̃ka. A yuun tuɣum yele Yon ti a pu’usa Yehowa Naayinɛ. Maleka la yuun ka bisɛ ti eŋa gani Yon. La boi bim ti maleka wa yuun pu’usɛ Yehowa ti la yue ge me tara kpe’eŋo ge a yuun sirege amea mɛ yele Yon ti eŋa me dela yameŋa wuu eŋa la. Maleka wa yuun ka tãseri Yon eŋa n yuun ka’ani en la. A yuun tɔɣeri la bãla bãla. Daanse’ere, maleka la yuun mi ti Yon n nyɛ sɛla ti la eŋɛ n pakerɛ la n sɔi ti a yuun ku’ure.

6. To wan eŋɛ la wani ta’an tɔɣesa malesi la n siregeri bamea se’em la?

⁶ To wan eŋɛ la wani ta’an tɔɣesa malesi la n siregeri bamea se’em la? Wuu malesi la, tomam me nari ti to tiregɛ tuna Yehowa tuuma ge da zɛ̃kera tomea bii to ti’isa ti tomam n ba’ɛ mina. (1 Ko. 4:7) Leyɛ’ɛsa, la ka nari ti to ti’isa ti tomam n pu’usɛ Yehowa ti la yue bii ton nyɛti yɔ’ɔ tansugere la poan la zuo, tomam nyani basɛba. Yelemɛŋɛrɛ la dela, to san nyɛta yɔ’ɔ tansugere la poan, la nari ti to siregera tomea. (Lu. 9:48) Wuu malesi la, tomam me nari ti to tuna bɔ’ɔra nɛreba. La ka nari ti to paɣera.

7. To san ka’ana nɛra, to wan eŋɛ la wani pa’alɛ ti to siregeri tomea?

⁷ To san ka’ana mabia bii to bia, la nari ti to siregera tomea. Saŋa ase’a, la ta’an nara ti ho ka’am nɛra, la ninmu’urɛ. Ge wuu maleka la n yuun ka’am Yon se’em la, tomam me ta’an ka’am nɛra ge kan kɔ’ɔsɛ a giila. To san ka ti’isa ti tomam gani nɛreba, la wan soŋɛ tɔ ti to doose nɔŋerɛ la gilema sore poan dekɛ Baabule la ka’am nɛra.—Kol. 4:6.

MALESI LA NƆŊƐ LA NƐREBA

8. (a) Wuu Luke 15:10 n pa’alɛ se’em la, bem n pa’alɛ ti malesi la nɔŋɛ nɛreba? (b) Malesi la soŋeri to la wani na’am mɔɔlegɔ tuuma la poan? (Bisɛ gɔŋɔ wa foote.)

⁸ Malesi la ka bisɛ pɔ’ɛ nɛreba ge ba tuɣum nɔŋɛ ba mɛ. Ba puurɛ ni pee mɛ nɛra san basɛ a be’em ge lebe Yehowa zɛ’an na bii nɛra n tee a vom ge nyaa pu’usa Yehowa. (Kaalɛ Luke 15:10.) Malesi la me kɔ’ɔn soŋera to mɛ na’am mɔɔlegɔ tuuma la poan. (Lil. 14:6) Daɣɛ Malesi la mea n kɔ’ɔn mɔɔla bɔ’ɔra nɛreba ge ba tuɣum soŋera to mɛ ti to kena sɛba n boti ba zamesɛ baŋɛ Yehowa la zɛ’an. Tɛ̃ra ti, Yehowa ka doli la malesi poan ma’a soŋera tɔ ge a me ni tara la zilam vo’osum la soŋera tɔ. Bala la, to kan ta’an yeti zina, Yehowa basɛ ti maleka n soŋɛ mam ti mam nyɛ nɛra. (Tm. 16:​6, 7) Ge to mi ti Yehowa ni basɛ ti malesi la soŋera to mɛ na’am mɔɔlegɔ poan. Bala la, to tari puti’irɛ ti malesi la kɔ’ɔn bɔta ti ba soŋera to mɛ.—Bisɛ daka la zuo n de “Ba Yuun Nyɛ Ba Zusega La Lebesego.”b

9. To wan eŋɛ la wani ta’an tɔɣesa malesi la n nɔŋɛ nɛreba se’em la?

⁹ To wan eŋɛ la wani ta’an tɔɣesa malesi la n nɔŋɛ nɛreba se’em la? To san wum ti ba le to’e la nɛra tansugere la poan, to puurɛ ni pee mɛ wuu malesi la. To ta’an basɛ ti a baŋɛ ti to nɔŋɛ en mɛ ge ti to puurɛ me pee la eŋa n le lebe na la. (Lu. 15:​4-7; 2 Ko. 2:​6-8) To wan ta’an tɔɣesa malesi la ge mu’ɛ nini na’am mɔɔlegɔ tuuma la poan. (Pa. 11:6) Wuu malesi la n soŋeri to se’em la, tomam me ta’an soŋɛ to mabiisi na’am mɔɔlegɔ tuuma la poan. Makerɛ, ho ta’an naɛ la se’em n nan pɔsɛ na’am mɔɔlegɔ ti ya keŋɛ ta di sɛɛra. To wan ta’an naɛ la mabiisi n de bunkureba bii sɛba inya n ka bare keŋɛ na’am mɔɔlegɔ.

10. To wan ta’an zamesɛ la bem Sara yele la poan?

¹⁰ To wan eŋɛ la wani to bɔŋa la san ka bo to yɔ’ɔ ti to tum zo’e Yehowa pu’usegɔ poan? To wan ta’an doose sarɔtɔ ase’a poan ti tomam la malesi la tuna na’am mɔɔlegɔ tuuma la. To geele ya mabipɔka Sarac n boi India yele la bisɛ. Eŋa n yuun pɔsɛ sore ŋmɛ’a tuuma la, yuun 20 poan ti bã’a ŋmɛ en ti a gã bɔbeyinɛ. A suure yuun sa’am mɛ paa. Sara n yuun kaali Baabule la daarewoo ge ti mabiisi la me soŋera en la, yuun basɛ ti a tara la pupeelum. A bɔŋa la zuo, a yuun nari ti a tee eŋa n mɔɔli se’em la. A yuun kan ta’an zi’ire gulesɛ gɔŋɔ. Bala la, a yuun ni tara la fon dita sɛɛra. A yuun ni yi la a Baabule zamesegɔdoma ti ba pa’alɛ en sɛba n boti a zamesɛ ba Baabule la ti a sɔsɛ la ba. A nyɛ nyuurɔ la wani? Ŋmaresi fii pooren, Sara yuun tari la Baabule zamesegɔdoma 70. Eŋa ma’a yuun kan ta’an zamesɛ la nɛreba wa za’a. Bala la, a yuun dekɛ basɛba bo la mabiisi ti ba zamesa ba. Baabule zamesegɔdoma wa zo’e zo’e nyaa keni zamesegɔ mɛ. Bisɛ malesi la puurɛ n pee se’em ti ba naɛ la mabiisi n tiregeri wuu Sara mɔɔla yelesoma la!

MALESI LA ŊMIBERI MƐ

11. Malesi la ŋmiberi la bem yɛla poan?

¹¹ Malesi la n ŋmiberi se’em la dela makesonɛ bɔ’ɔra tɔ. Ŋmɛlema tuuma la putotuuma n paari Yehowa yuuma zo’e zo’e la basɛ ti la daana malesi la mɛ ge ti ba me ŋmibera. Ba yuun nyɛ Sitaana la a kolekpabɛ’ɛsi la n yuun eŋɛ kpenkpasi la Yehowa se’em mɛ. (Pin. 3:1; 6:​1, 2; Yude 6) Baabule la tɔɣɛ Kolekpabɛ’a ayima n yuun zabɛ la maleka ayima yele mɛ. (Da. 10:13) Kɔ’ɔn pɔsɛ Adam la Hawa saŋa la, malesi la nyɛ ti nɛreba fii ma’a n pu’useri Yehowa. La ka pakɛ la yele ana wa za’a, malesi la kelum pu’usa la Yehowa la pupeelum. Ba mi ti sansɛka n nari poan, Naayinɛ wan yese ŋmɛlema tuuma za’a basɛ.

12. Bem n wan soŋɛ tɔ ti to ta’an ŋmibera?

¹² To wan eŋɛ la wani ta’an tɔɣesa malesi la n ŋmiberi se’em la? Wuu malesi la, ba ta’an tum to ŋmɛlema tuuma. Ge to tari puti’irɛ ti Naayinɛ wan yese putotuuma sansɛka n nari poan. Wuu malesi la, ‘to kan taregɛ la itisoŋɔ.’ (Ga. 6:9) Naayinɛ me yeti a wan soŋɛ tɔ ti to ŋmibera. (1 Ko. 10:13) To wan ta’an zusɛ Yehowa ti a soŋɛ tɔ la a vo’osum la ti to di’isa suure ge me tara pupeelum. (Ga. 5:22; Kol. 1:11) Ho wan eŋɛ la wani, ba san giisa hɔ? Dekɛ homea delum Yehowa ge da zɔta dabeem. Yehowa wan soŋɛ hɔ ti ho ze’a kankaŋi.—Heb. 13:6.

MALESI LA SOŊERI MƐ TI TANSUGERE LA ANA FILAM

13. Ba’asegɔ dabesa wa poan, bem tuunɛ n boi de to’ore ti Yehowa dekɛ bo malesi la? (Matu 13:​47-49)

¹³ Yehowa bo malesi la tuunɛ n boi de to’ore ba’asegɔ dabesa wa poan. (Kaalɛ Matu 13:​47-49.) Nɛreba zo’e zo’e n boi tingɔŋɔ wa poan n boti ba kelese yelesoma la. Nɛreba wa basɛba ni eŋɛ teere mɛ nyaa dɛna Kristakɔma ge ti basɛba me zaɣesɛ. Yehowa bo malesi la tuunɛ ti ba ‘yelege tontɔɔdoma la, putɔpa poan.’ Wana pa’alɛ ti ba bo ba la tuunɛ ti ba basɛ ti tansugere la ana filam. Ge bala ka pa’alɛ ti sɛba n ka le bɔna tansugere la poan la kan le makɛ lebe na. La me ka pa’alɛ ti daaŋɔ kan makɛ bɔna tansugere la poan. To tari suure lua ti malesi la kɔ’ɔn tuna mɛ ti ba basɛ ti tansugere la ana filam.

14-15. To wan eŋɛ la wani ta’an tɔɣesa malesi la ge basɛ ti tansugere la ana filam? (Bisɛ fɔɔra la.)

¹⁴ To wan eŋɛ la wani ta’an tɔɣesa malesi la ge basɛ ti tansugere la ana filam? La nari ti to tiregɛ ta’an tara bɔnsoŋa la Yehowa. To iti bala mɛ to san nyɔɣɛ sɛba n nɔŋɛ Yehowa zɔtɔ ge kan ita sɛla n wan sa’am a suure. (Ym. 101:3) To me wan ta’an soŋɛ mabiisi ti ba tara yelemɛŋɛrɛ bɔ’ɔra Yehowa. Makerɛ, to san baŋɛ ti to mabia tum la be’em, to wan eŋɛ la wani? Ton nɔŋɛ en la zuo, to wan yele en ti a keŋɛ ta yele keendoma la. Ge a san zaɣesɛ, tomea wan keŋɛ ta yele keendoma la. To boti la to soŋɛ to mabia la ti eŋa la Yehowa bɔŋa la le ana soŋa!—Yam. 5:​14, 15.

¹⁵ Nimbaalega yele la dela, nɛra san tum be’em ge ka tee, ba ni yese en mɛ tansugere la poan. Bala zuo, to ni ‘ka le dekɛ tomea laɣum’ la nɛrekana wa.d (1 Ko. 5:​9-13) Wana wa ni basɛ ti tansugere la ana la filam. Leyɛ’ɛsa, to san ka le naɛ la sɛba ti ba yese ba tansugere la poan bɔna, to soŋeri ba mɛ. Bala wan soŋɛ ba ti ba baŋɛ ti la nari ti ba lebe na pu’usa Yehowa. Ba san lebe na, tomam, la Yehowa, la malesi la za’a puurɛ wan pee.—Lu. 15:7.

16. Sodeni poan ti ho wan ta’an tiregɛ tɔɣesa malesi la?

¹⁶ La dela yɔ’ɔ kãtɛ la Naayinɛ n basɛ ti to baŋɛ malesi la n tuni se’em, la mam me n naɛ la ba tuna la. Basɛ ya ti to tɔɣesa ban tari halese’a la: ba siregeri la bamea, nɔŋɛ nɛreba, ŋmibera ge me soŋera ti tansugere la ana filam. To san tɔɣesa malesi la, to wan kɔ’ɔn bɔna Yehowa yizuo la poan wuusa.