Pa’alekãtɛ Daana N Gaŋɛ Za’a La N Kɔ’ɔn Pa’ala Tomam Saŋa Woo

MAM DƆƔEREBA EŊƐ LA MAKESONƐ

Yuun 1957 poan, mam dɔɣereba yuun ze’ele la Italy keŋɛ Kindersley n boi Saskatchewan, Canada tiŋa poan. La yuun ka yue ti ba baŋɛ yelemɛŋɛrɛ la. Yelemɛŋɛrɛ la yuun dela ninmu’urɛ yele bɔ’ɔra ba. Mam n yuun de bia la, mam la mam deodoma san keŋɛ na’am mɔɔlegɔ dabeserɛ la poan, to ni yue mɛ paa. Saŋa ase’a mam ni tɔɣera dɛ’ɛna yeti, mam pɔsɛ tuna “sore ŋmɛ’a soŋerɛ tuuma” la se’em ma’a ti mam yuun dɛna yuuma anii!

Mam dɔɣereba yuun dela nasedoma ge ba yuun dekɛ la ba paŋa za’a tuna bɔ’ɔra Yehowa. Makerɛ, yuun 1963 poan ba yuun koose la ba lɔɣɔrɔ zo’e zo’e ta’an nyɛ laɣehɔ keŋɛ satiŋa laɣesegɔ Pasadena tiŋa n boi California, U.S.A. tiŋa poan. Yuun 1972, to yuun keŋɛ wuu mɛɛla 620 (1,000 km) ta kɛ̃’ɛra Trail, British Columbia n boi Canada tiŋa. To yuun keŋɛ bim ti to ta mɔɔlɛ bo la nɛresɛba n tɔɣeri Italy tiŋa yetɔɣum. Mam sɔ yuun tuni la duusego tuuma. A yuun zaɣesɛ la tuunse’a n wan basɛ ti a nyɛ ligeri zo’e zo’e. A yuun kɔ’ɔn dekɛ a puti’irɛ kpa la Yehowa tuuma poan.

Mam puurɛ pee mɛ la mam dɔɣereba n yuun eŋɛ makesonɛ se’em bo mam, la mam suurɔ batã la. Ba makesonɛ la n yuun kumesɛ mam Yehowa tuuma poan ti mam baŋɛ ti: N san tuna Na’am tuuma la yia n vom poan, Yehowa wan bisa mam.—Mt. 6:33.

TON YUUN PƆSƐ TUM TƐM WOO NA’AM TUUMA LA SE’EM

Yuun 1980 ti mam yuun di Debbie. A yuun dela mabipɔka n som ge me loe vo’osum poan yɛla ti a tum. To yuun boti la to pɔsɛ tuna tɛm woo na’am tuuma la. Bala la, ton yuun ba’asɛ to pɔɣedire la, ŋmaresi sitã pooren ti Debbie yuun pɔsɛ tuna sore ŋmɛ’a tuuma la. Mam n yuun di en la, yuunɛ pooren ti to yuun keŋɛ ta soŋɛ tansugere pika ayima n yuun eeri soŋerɛ, bilam ti mam yuun naɛ la n pɔɣa ti to laɣum tuna sore ŋmɛ’a tuuma la.

Pooren, to giila yuun kɔ’ɔsɛ mɛ ti to bɔta ti to lebe. Yia la, to yuun sɔsɛ bo la gingilega kaarɛ bisegadaana la. A yuun kɔ’ɔn yele to la yelemɛŋɛrɛ la. A yuun yeti: “Yamam mea n laɣum basɛ ti ya bɔŋa la kpe’em. Ya kɔ’ɔn ti’isa la ya daaŋɔ yɛla la ma’a. Ya san tuɣum ti’isa yelese’a n ani soŋa la yele, ya wan baŋɛ ti ya bɔŋa la sirum ani soŋa.” A ka’aŋɔ la yuun ani soŋa mɛ paa. (Ym. 141:5) To yuun dekɛ ka’aŋɔ la tum tuuma. La puɣum ka yue ge ti to baŋɛ ti to tari yɛla zo’e zo’e n ani soŋa. Mabiisi la yuun boti la ba dekɛ ba saŋa zo’e zo’e tum bo Yehowa. Mabiisi wa basɛba yuun dela kɔma la mabipɔɣesi sɛba sireba n ka pu’useri Yehowa. Bala yuun dela makesonɛ bo to. To yuun baŋɛ ti, la nari ti to bisera yelese’a n ani soŋa la ge me tara sakerɛ ti Yehowa wan soŋɛ tɔ ti to ta’an ŋmibera to yeledaaŋɔ la poan. (Mik. 7:7) Bala yuun basɛ ti to puurɛ pee mɛ ge ti yɛla nyaa kena soŋa soŋa.

Mam yia sore ŋmɛ’a sukuu pa’alegɔdoma la yuun tabelɛ tum tisi ase’a poan mɛ. Ba yuun pa’alɛ to la fɔɔra ge me tɔɣɛ yeledaaŋɔ se’a la kã’a se’a ti ba yuun nyɛ. Bala n yuun soŋɛ tɔ ti to inya nyaa kita ti to dɛna satiŋa na’am yetɔɣum yalegerɛdoma. To yuun kɔ’ɛ to puti’irɛ bɔta ti to tum la tuunɛ wa.

Bala zuo la, yuun 1984 poan ti to yuun ze’ele British Columbia tiŋa keŋɛ mɛɛla 2,485 (4,000 km) ta bɔna Quebec tiŋa, zɛsɛka ti ba tɔɣera French yetɔɣum. La yuun nari ti to zamesɛ tiŋa la yetɔɣum, la ba malema. Yeledaaŋɔ ayima dela to yuun ka tari ligeri zo’e zo’e. Saŋa busebo, buraa ayima n yuun ni bo to yɔ’ɔ ti to yi’isa nyubento a va’am poan. Debbie yuun ni dekɛ nyubento wa duɣera la dia to’ore to’ore! La ka pakɛ la yeledaaŋɔ la, to yuun ŋmiberi mɛ ge tara pupeelum. Sɛla n le pa’asɛ dela, to yuun baŋɛ ti Yehowa n kɔ’ɔn bisera tɔ.—Ym. 64:10.

Daarɛ deyima ti ba yuun yi to fon zuo yeti, to wa’ana tuna Canada Betel. La yuun eŋɛ to la liɣebi. To yuun puɣum gulesɛ la gɔŋɔ tisɛ ti to boti to keŋɛ la Gilead Sukuu. La boi bim ti to puurɛ yuun pee mɛ la Betel la ge to puti’irɛ me yuun boi la Gilead Sukuu la poan. Ge to yuun sakɛ keŋɛ Betel mɛ. Ton yuun paɛ Betel la, to yuun soke la Mabia Kenneth Little n pa’asɛ Tigere Yile Bisegadoma la poan ti, “Ba san yi to ti to keŋɛ Gilead me, to nyaa wan eŋɛ la wani?” A yuun lebese to yeti, “Ba san yi ya, to wan bisɛ to wan eŋɛ se’em.”

Bakwai pooren, ba yuun yi mam la Debbie ti to keŋɛ Gilead Sukuu. Bala la, la yuun nari ti to kɔ’ɛ to puti’irɛ eŋɛ sɛla. Mabia Little yuun yele to ti: “La ka pakɛ la ton loe sɛla, saŋa ase’a to ta’an ni ti’isa ti la nari ni ti to tee loe sɛla n boi de to’ore. La ka pakɛ la ton loe vo’osum poan tunsɛka ti to tum, sɛla n pakɛ dela Yehowa kã’a.” To yuun sakɛ ti to keŋɛ la Gilead. Yuuma zo’e zo’e n wana ti tomam baŋɛ ti Mabia Little n yuun yele to sɛla la dela yelemɛŋɛrɛ. Tomam ni tɔɣɛ mabia wa yetɔɣum la bo la mabisɛba n ni nyɛ yɔ’ɔ ti ba loe bamam n boti ba tum sɛla bo Yehowa.

TO SATIŊA NA’AM YETƆƔUM YALEGERƐ TUUMA LA POAN

To puurɛ yuun pee mɛ la ton pa’asɛ mabiisi 24 n boi Gilead sukuu kilaasi sɛka n pa’asɛ 83 poan la. Ba yuun eŋɛ sukuu wa la April 1987 Brooklyn n boi New York tiŋa. Sukuu la poan, Mabia Ulysses Glass la Jack Redford n yuun ni pa’ala tɔ saŋa zo’e zo’e. La yuun ani wuu ŋmaresi sinuu la ti to bɔna sukuu la poan la zɔ la kalam. To yuun ba’asɛ sukuu wa la September 6, 1987. Ba yuun dekɛ tomam la John la Marie Goode basɛ la Haiti tiŋa.

Yuun 1962 ti ba sa’ɛ satiŋa na’am yetɔɣum yalegerɛdoma Haiti tiŋa. Kɔ’ɔn ze’ele sankaŋa ba ka le tum Gilead yetɔɣum yalegerɛdoma bim. Ton ba’asɛ sukuu la, bakwai atã pooren ti to yuun keŋɛ Haiti ta naɛ la tansugere pika tuna. Mabiisi la yuun dela 35 ge me kɛ̃’ɛra tinkpɛŋa poan. Mam la n pɔɣa yuun nan dela bunbilipaalesi ge yuun nara ti to kelum zamesɛ yɛla zo’e zo’e. Tomam ma’a n yuun kɛ̃’ɛri yire sɛka ti to yuun bɔna bim la poan. Nɛreba la yuun ba’ɛ nasera mɛ, ba zo’e zo’e me yuun ka tã kaala. Se’em ma’a ti to yuun bɔna bim la, nalɛɣerɛ yɛla yuun basɛ ti nɛreba la tuna la gbiregere tuuma. Basɛba me yuun tiregɛ ti ba sa’ɛ la gɔmɛt la, ti basɛba me ita kpenkpasi. Sabeo kãra me n yuun daani tiŋa la poan.

Ge mabiisi la n yuun tari sukpe’ene la pupeelum la yuun dela makesonɛ bo to. Ba zo’e zo’e yuun boi la bɔŋa n kpe’em poan ge ba yuun nɔŋɛ Yehowa la na’am mɔɔlegɔ tuuma la mɛ. Mabipɔka ayima n kuregɛ, dɛna pɔkuurɛ ge me ka ta’an kaala. Hali la bala za’a, a yuun tɛ̃ri la gulesegɔ n paɛ 150 a zuo poan. Ba bɔŋa la n yuun kpe’em la yuun basɛ ti to bɔta la to pa’alɛ ba ti Naayinɛ Na’am la ma’a n wan ta’an maalɛ ba yeledaaŋɔ la. To puurɛ pee mɛ la to Baabule zamesegɔdoma n nyaa de tɛm woo sore ŋmɛ’adoma, sore ŋmɛ’adoma n boi ba to’ore la keendoma la.

Ton yuun boi Haiti la, mam yuun seke la bunbilipaalega ayima yu’urɛ n de Trevor n de Mormon pu’usegɔ nɛŋadaana ayima. To yuun nyɛ la nɛŋa sɔsɛ Baabule yɛla sugumnɔɔrɛ zo’e zo’e. Yuuma ase’a pooren, a yuun gulesɛ la gɔŋɔ bo mam ti la eŋɛ mam pakerɛ. A yuun gulesɛ yeti: “Mam yeti n muse la ko’om laɣesegɔ sɛka n keni na la poan! Mam boti la n lebe Haiti ta dɛna sore ŋmɛ’adaana n boi a to’ore zɛsɛka nɔɔ ti n yuun dɛna Mormon pu’usegɔ nɛŋadaana la.” Eŋa la a pɔɣa me yuun sirum eŋɛ la bala yuuma zo’e zo’e.

TO YUUN KEŊƐ LA EASTERN EUROPE NYAA TA KEŊƐ AFRICA

La yuun ka le ba’ɛ kpe’em ti mabiisi tuna Na’am mɔɔlegɔ tuuma la Eastern Europe poan. Bala la, ba yuun tum tomam mɛ ti to keŋɛ bim. Yuun 1992 poan ti to yuun paɛ Ljubljana n boi Slovenia tiŋa. Bilam yuun lɛm la zɛsɛka ti mam dɔɣereba yuun bɔna ta zo’e kura ge nyaa ta keŋɛ Italy tiŋa la. Zaberɛ n yuun boi zɛse’esi ti ba yuun yi’ira ti Yugoslavia la. Tigere yile la n boi Vienna n boi Austria tiŋa, la to tuuma zɛ’ɛsi n boi Zagreb n boi Croatia tiŋa, la Belgrade n boi Serbia tiŋa n yuun biseri na’am mɔɔlegɔ tuuma Yugoslavia poan. Ge nananawa tin-aŋa za’a nyaa tari bamea Betel mɛ.

Bala yuun pa’alɛ ti la nari ti to le zamesɛ tiŋa kayima yetɔɣum la ba malema. Tiŋambiisi la yuun ni yeti, “Ježik je težik,” bala vuurɛ dela “Yetɔɣum la kpe’em mɛ.” Yetɔɣum la me yuun sirum kpe’em mɛ! To puurɛ yuun pee mɛ la mabiisi la n yuun sakɛ dɔla teere se’a ti tigere la yuun ni tee la, to me yuun ni nyɛ Yehowa n kã’ari bɔ’ɔra ba se’em mɛ. To yuun ni nyɛ Yehowa n ni doose nɔŋerɛ sore poan demese yɛla se’em mɛ sansɛka n nari poan. Yelese’a ti to yuun puɣum zamesɛ la yuun soŋɛ to mɛ ti to ta’an ŋmibe daaŋɔ seto n yuun paari tɔ Slovenia tiŋa la.

Ge teere ase’a n yuun kelum bɔna. Yuun 2000 poan, ba yuun basɛ ti to keŋɛ la Côte d’Ivoire, n boi West Africa. Ge zaberɛ n yuun kɔ tiŋa la poan la zuo, to yuun basɛ bim la November 2002 ge nyaa keŋɛ Sierra Leone. Zaberɛ me n yuun puɣum bɔna Sierra Leone tiŋa paɛ yuun 11 ge se’em ma’a ti to yuun paɛ bim la, la yuun ma’ɛ mɛ. La yuun kpe’em bo to mɛ la ton yuun nari ti to kɔ’ɔn basɛ Côte d’Ivoire tiŋa bala kalam la. Ge ton yuun zamesɛ yelese’a la basɛ ti to tara la pupeelum.

To puti’irɛ yuun kɔ’ɔn bɔna la to soŋɛ nɛreba zo’e zo’e ti ba baŋɛ yelemɛŋɛrɛ la ge me soŋɛ to mabiisi la n yuun ŋmibe zaberɛ la poan la. Mabiisi la yuun naseri mɛ ge ba yuun kelum bɔ’ɔra la bamam n tari sɛla. Mabipɔka ayima yuun dekɛ la lɔɣeyɛɛtɔ bo Debbie. Debbie yuun nan ka boti a to’e lɔɣɔrɔ la ge mabipɔka la yuun yele en ti: “Zaberɛ la saŋa la, mabiisi n ze’ele tisi ase’a yuun soŋɛ tomam mɛ ge nananawa, tomam me n nari ti to soŋɛ.” Tomam yuun kɔ’ɛ la to puti’irɛ ti to tɔɣesa mabiisi wa makesonɛ la.

Pooren, to yuun lebe la Côte d’Ivoire ge nalɛɣerɛ yɛla la yuun le basɛ ti gbiregere n pɔsɛ. Bala la November 2004 poan, alopele n yuun dekɛ to keŋɛ. To me yuun nyaŋɛ dekɛ la baagi bayi ma’a. To yuun keŋɛ la French soogɛpa n boi zɛ’an la ge gã’arɛ tiŋa yu’unkuŋɔ. Beere n yuun yilegɛ la, ba yuun tari to keŋɛ la Switzerland. Se’em ma’a ti to yuun paɛ tigere yile la yu’uŋɔ la, Tigere Yile Bisegadoma la, la Ministerial Training School pa’alegɔdoma la, la ba pɔɣeba yuun to’e to la soŋa, kɔkɛ tɔ, bo to dituulega la chocolate. To puurɛ yuun pee mɛ paa.

Ba yuun basɛ ti to keŋɛ la Ghana ge ti pooren to yuun le keŋɛ Côte d’Ivoire se’em ma’a ti zaberɛ la yuun ma’ɛ la. Mabiisi la itisoŋɔ la yuun soŋɛ to mɛ ti to ta’an ŋmibera se’em ma’a ti tigere la yuun ni tee to tuuma ti to ka yuura ge lɔŋera tisi la. Mam la Debbie yuun mi ti Yehowa tigere la poan, mabiisi kɔ’ɔn nɔŋɛ taaba mɛ ge to ka bisɛ ti la dela pɛ̃regerɛ ti mabiisi la soŋera tɔ. La boi bim ti daaŋɔ yuun paɛ tɔ ge la yuun kumesɛ to la soŋa soŋa.

TO YUUN KEŊƐ LA MIDDLE EAST SƆ’ƆLUM

Yuun 2006 ti tigere zuo la yuun gulesɛ gɔŋɔ bo to ti to keŋɛ Middle East. La yuun nari ti to zamesɛ tiŋa la yetɔɣum la ba malema. To me yuun le nyɛ la yelepaala la daaŋɔ ase’a. To yuun zamesɛ la yɛla zo’e zo’e tiŋa wa ti ba nalɛɣerɛ yɛla, la ba pu’usegɔ yɛla basɛ ti la kpe’em bo nɛreba la. To puurɛ yuun pee mɛ la mabiisi la n tɔɣeri yetɔɣum to’ore to’ore la. To me yuun baŋɛ ti to san dɔla Yehowa pa’alegɔ, to wan tara nɔyinɛ. To yuun nɔŋɛ mabiisi wa mɛ, sɛla n sɔi la ba yidoma, sukuudoma, tuntuneba tadaandoma, la ba kpɛ’ɛsi yuun giiseri ba mɛ ge ti ba yuun kelum ŋmibera.

Yuun 2012 ti to yuun keŋɛ laɣesegɔ n boi de to’ore Tel Aviv n boi Israel tiŋa. Kɔ’ɔn ze’ele Pentekost 33 Y.B. poan sa, ba nan ka eŋɛ laɣesegɔ ti nɛreba zo’e paɛ wuu yuun 2012 laɣesegɔ la. La yuun dela sɛla ti to kan makɛ tamɛ!

Yuun aŋa poan la, tigere la yuun tum to mɛ ti to ta kaɛ tiŋa kayima ti ba gu to tuuma la. To yuun dekɛ to gɔnɔ ase’a keŋɛ mɛ, keŋɛ na’am mɔɔlegɔ, hali keŋɛ laɣesegɔ bibisi. Soogɛpa n yuun ni zãla bugumdɔɔrɔ ze’a pala zuto ge to yuun ni naɛ la to mabiisi la n ka zo’e la tuna to tuuma yɛm sore poan.

TO YUUN LEBE LA AFRICA

Yuun 2013 poan, tigere la yuun bo to la tuunɛ n boi de to’ore. Ba yuun yeti to keŋɛ ta tuna Congo Kinshasa tigere yile la poan. Tiŋa wa som mɛ ge yalegɛ ge nɔŋɔ la zaberɛ zo’e zo’e n yuun daani nɛreba la. Pɔsega la to yuun yeti, “Tomam puɣum mina Africa n ani se’em sɛla n sɔi la to tabelɛ kɛ̃ bim mɛ.” Ge la yuun nari ti to zamesɛ yɛla pa’asɛ sɛla n sɔi la, zɛ’ɛsi ase’a pala yuun ka ani soŋa ge me ka tara kudɔregɔ soma. Tomam yuun nyɛ giilekpeŋere yɛla mɛ. La boi bim ti mabiisi la yuun naseri mɛ ge ba yuun ŋmiberi mɛ, tara pupeelum, kena na’am mɔɔlegɔ ge me tiregɛ kena zamesegɔ la laɣesegɔ. Tomam yuun kɔ’ɔn baŋɛ ti Yehowa n kã’ari ge soŋera to la zuo ti Na’am tuuma la tɔla nɛŋa. Tomam n dekɛ yuuma se’a tum tɛm woo na’am tuuma Congo tiŋa la pa’alɛ to la yɛla zo’e zo’e ge me basɛ ti to nyɛ zɔdoma n ani wuu to deodoma la.

Yuun 2017 ki’ileŋɔ bɔba, tigere la yuun basɛ ti to keŋɛ la South Africa tiŋa. Tigere yile kaŋa n karegɛ ti tomam tum kurum. To yuun ka tabelɛ tum tuun seto ti ba dekɛ bo to la kurum. La yuun le nara ti to zamesɛ la yelepaala ge tomam yuun dekɛ yelese’a ti to zamesɛ kurum la tum la tuuma. To nɔŋɛ mabiisi la n dekɛ yuuma zo’e zo’e ŋmibera ge tara yelemɛŋɛrɛ la. La me dela yelesonɛ la ton nyɛti Betel deodoma la n ze’ele buuri to’ore to’ore ge tara nɔyinɛ la. La niɛ peelum ti Yehowa n kã’ari bɔ’ɔra a nɛreba ti ba tara suma’asum, se’ere n sɔi la ba dekɛ la halepaalega la yɛ ge me tara Baabule naresum yɛla tuna tuuma.

Yuuma zo’e zo’e n wana ti mam la Debbie tum tuuma n bo’ori to pupeelum, naɛ la mabiisi n ze’ele buuri to’ore to’ore tum ge me zamesɛ yetɔɣum n boi to’ore to’ore. La ni daɣɛ naana ge to baŋɛ ti Yehowa doli la a tigere, la mabinɔɔrɛ la poan ita pa’ala ti a nɔŋɛ to. (Ym. 144:2) Tomam baŋɛ ti yelese’a woo ti to zamesɛ to tɛm woo na’am tuuma poan la n kumesɛ tɔ ti to ta’an pu’usa Yehowa soŋa soŋa.

Mam puurɛ pee mɛ la mam dɔɣereba n uge mam se’em la. Mam puurɛ me pee mɛ la mam pɔɣa Debbie n soŋɛ mam se’em la, la to mabiisi la n tari makesonɛ se’em tingɔŋɔ wa za’a poan la. Mam la n pɔɣa san ti’isa to vom n wan ana se’em beere sa’am, to ni kɔ’ɔn lu la to suure ti to wan zamesa yelese’a woo ti to Pa’alekãtɛ Daana n Gaŋɛ Za’a la pa’ala to la.