Hon Basɛ Ti “Sɛla” Ti Ho Tara La Seke Ho?

1. Hon basɛ ti sɛla ti ho tara la seke ho vuurɛ ge bala ka pa’alɛ la bem?

HON basɛ ti sɛla ti ho tara la seke ho? Nɛra san basɛ ti sɛla ti a tara la seke en, a wan tara pupeelum la suma’asum la sɛla ti a tara la. A sunsɔa ka nyiiri la eŋa n ka tari sɛla la. Ge nɛra san basɛ ti sɛla ti a tara la seke en bala ka pa’alɛ ti a vom yele ka pakɛ en. Makerɛ, la daɣɛ be’em ti Kristabia dekɛ yɔ’ɔ woo tum yalegɛ a na’am tuuma la. (Arom 12:1; 1 Tim. 3:1) Hali la bala la, a suure kan sa’am ba san ka bo en tunse’ere ti a bɔta la.

2. Beni n sɔi ti la wan ta’an dɛna daaŋɔ bɔ’ɔra tɔ to san ka basɛ ti sɛla ti to tara la seke to?

² To san ka basɛ ti sɛla ti to tara la seke to, bala ta’an basɛ ti to ita yelese’a n ka nari. Sɛba n ka basɛ ti sɛla ti ba tara la seke ba la, ni dekɛ la awa zo’e zo’e tuna ti ba ta’an nyɛ lɔɣese’a yele n ka ba’ɛ pakɛ. Nimbaalega la dela, Kristakɔma fii tabelɛ zu la ligeri bii lɔɣese’a ti ba bɔta la. Daanse’ere ba ni yele bamea yeti, ‘la kɔ’ɔn nara la mam,’ ‘mam ba’ɛ gura ti la yue mɛ,’ bii ‘pooren mam wan lebese yɔ.’ Ge Yehowa yaɛ nayigum woo mɛ sɛla n sɔi la, la sa’ani la a yu’urɛ. (Mag. 30:9) Mabiisi basɛba suure sa’am mɛ la ban ka nyɛ yɔ’ɔ ase’a Yehowa pu’usegɔ poan la, bala basɛ ti ba pisegɛ la Yehowa pu’usegɔ basɛ. (Ga. 6:9) Beni n wan basɛ ti nɛra n kã amea bo Yehowa sakɛ eŋɛ bala? Daanse’ere la ta’an dɛna ti a ka basɛ ti sɛla ti a tara la seke en.

3. To zamesɛ la bem giile kpeŋere yele Filipi 4:​11, 12 la poan?

³ To za’a dela to tiregɛ basɛ ti sɛla ti to tara la seke to. Tuntuna Paul yeti eŋa “mi soŋa soŋa te sɛla woo te [a] tara, la seke” ya. (Kaalɛ Filipi 4:​11, 12.) A yuun boi la sarega poan ge gulesɛ bala. Hali la bala la, a suure yuun ka sa’am. A yuun basɛ ti “sɛla” ti a tara la seke en mɛ. La san kpe’em bo to, Paul n yele sɛla la, la a zi’irego poan yɛla la, wan soŋɛ tɔ ti to ta’an basɛ ti sɛla ti to tara la seke to. To da ti’isa ti la wan dɛna naana ti to basɛ ti sɛla ti to tara la seke to. Ge la dela to tiregɛ basɛ ti sɛla ti to tara la seke to. Wani wani? Basɛ ya ti to sɔsɛ ya baŋɛ halese’a n wan soŋɛ tɔ ti to ta’an basɛ ti sɛla ti to tara la seke to.

BASƐ TI HO PUURƐ PEE LA HON TARI SƐLA LA

4. To san basɛ ti to puurɛ pee la ton tari sɛla la, la wan soŋɛ to la wani? (1 Tesalonika 5:18)

⁴ Nɛra puurɛ san pee la eŋa n tari sɛla la, a wan basɛ ti la seke en. (Kaalɛ 1 Tesalonika 5:18.) Makerɛ, to puurɛ san pee la ton tari yelese’a n pakɛ tɔ la, to kan ba’ɛ fabela la yelese’a ti to ka tara la. To san basɛ ti to puurɛ pee la yɔ’ɔ se’a ti to tara Yehowa pu’usegɔ poan nananawa la, to wan ti’isa la to wan tum tuunɛ la soŋa soŋa se’em ge daɣɛ ti ba bo to tunse’ere ti tomam bɔta. Bala n sɔi ti Baabule la kpɛmesa to giila ti to ni pɛ̃ɣɛ Yehowa zusega poan! To san basɛ ti to puurɛ pee la ton tari sɛla la, to wan tara “Yenɛ sunma’ahom la n gaŋɛ la asaala bɔkerɛ la.”—Flp. 4:​6, 7.

5. Bem zuo ti Israeldoma la yuun nara ti ba basɛ ti ba puurɛ pee la sɛla ti ba tara la? (Bisɛ foote la.)

⁵ To geele ya bisɛ Israeldoma la n yuun eŋɛ sɛla. Saŋa zo’e zo’e poan ba yuun nyɔni bɔ’ɔra la Yehowa ti ba ka nyɛti disɛka ti ba yuun dita Egypt tiŋa la. (Kan. 11:​4-6) Yelemɛŋɛrɛ, la yuun daɣɛ naana bɔ’ɔra ba pɔɣetia la poan. Bem n yuun wan ta’an soŋɛ ba ti ba basɛ ti sɛla ti ba tara la seke ba? Ba yuun ta’an ti’isɛ ni taɣesɛ Yehowa n yuun puɣum eŋɛ sɛla bo ba la ti ba puurɛ pee. Ban yuun de yamesi Egypt tiŋa ti ba mɛlesa ba la ti Yehowa yuun basɛ ti too pia sige ba kpɛ’ɛndoma la zuo. Israeldoma la n yuun nyɛ yɔ’ɔ yesera la, Yehowa yuun soŋɛ ba mɛ ti “Mizraim nɛreba” la bo ba sanlenpeelega, sanlema la futo. (Yɛh. 12:​35, 36) Egyptdoma la n yuun tabegɛ Israeldoma la ta paɛ Mɔɣerɛ Mɔlega la nɔɔren la, Yehowa yuun doose la yelekirega sore poan ga’ɛ ko’om la ti ba keŋɛ tole. Se’em ma’a ti ba yuun bɔna pɔɣentia la poan yɛ’ɛsa la, a yuun tari la manna diisa ba. Ge yele la yuun dela bem? La boi bim ti Yehowa yuun bo ba la dia zo’e zo’e ti ba dita ge ba puurɛ yuun ka pee la sɛla ti ba tara la.

6. Sarɔtuni poan ti to wan ta’an eŋɛ pa’alɛ ti to puurɛ pee ya la sɛla ti to tara la?

⁶ Ho wan eŋɛ la wani ta’an basɛ ti ho puurɛ pee la hon tari sɛla la? Yia, ni nyɛ saŋa dabeserɛ woo poan ti’isɛ yelese’a n basɛ ti ho puurɛ pɛɛra. Ho ta’an gulesɛ yɛla ayi bii atã n basɛ ti ho puurɛ pee. (Fab. 3:​22, 23) N yi’i, eŋɛ pa’alɛ ti ho puurɛ pee ya. Pu’usɛ nɛresɛba n eŋɛ sɛla bo ho la ge sɛla n gaŋɛ za’a dela, ni pu’usɛ Yehowa daarewoo la eŋa n eŋɛ sɛla bo ho la. (Ym. 75:1) N tã’a, nyɔɣɛ sɛba puurɛ n pee la sɛla ti ba tara la ti ba dɛna ho zɔdoma. To san tara zɔdoma sɛba n kɔ’ɔn wiila la sɛla ti ba tara la, tomam me wan ana la bala ge to san tara zɔdoma sɛba n basɛ ti ba puurɛ pee la sɛla ti ba tara la, tomam me puurɛ wan pee la sɛla ti to tara la. (Tɛɛ. 1:​26-28; 2 Tim. 3:​1, 2, 5) Nɛra san eŋɛ sɛla bo to ti to dekɛ yɔ’ɔ la pu’usɛ en, la wan basɛ ti to puurɛ pee la sɛla ti to tara la ge me kan wiila.

7. Beni n soŋɛ Aci ti a ka wiila?

⁷ To geele ya yelese’ere n paɛ Aci n ze’ele Indonesia. A yeti: “COVID-19 bã’a la poan, mam yuun tari n bɔŋa la n ani se’em la makera la mabiisi basɛba. Bala yuun basɛ ti mam wiila mɛ.” (Ga. 6:4) Bem n soŋɛ en ti a tee a puti’irɛ? Aci yeti: “Mam yuun pɔsɛ ti’isa la Yehowa n kã’ari bɔ’ɔra mam se’em daarewoo, la yelesoma se’a ti mam nyɛta, mam laɣum pa’asɛ a tigere la poan la. Ti mam nyaa pu’usɛ Yehowa la eŋa n eŋɛ yele ana bo mam la. Bala basɛ ti mam ka le wiila.” Daanse’ere ho san willa la sɛla ti ho tara la, tɔɣesɛ Aci n eŋɛ sɛla la ti la basɛ ti ho puurɛ pee la hon tari sɛla la.

KƆ’ƆN SIREGERA HOMEA

8. Bem n yuun paɛ Baruk?

⁸ Nɔdɛ’ɛsa Yeremia gɔngulesa Baruk yuun wiili mɛ la a bɔŋa la. Baruk yuun tari la tunkpe’eŋo. A yuun yeti a soŋɛ la Yeremia ti ba basɛ ti Israeldoma la baŋɛ sɛla n wan paɛ ba, la ban ka nam Yehowa la. Eŋa n yuun nari ti a basɛ ti a puti’irɛ bɔna Yehowa n boti a eŋɛ sɛla poan la, Baruk yuun tuɣum ti’isa la eŋa n boti a eŋɛ sɛla yele. Yehowa yuun doose la Yeremia poan yele Baruk yeti: ‘Ho eeri la lɔɣekãra bɔ’ɔra homea. Da ɛɛra lɔɣetunɔ.’ (Yer. 45:​3-5) Yehowa yuun yele Baruk ti: A ‘basɛ ti eŋa n tari sɛla la seke en.’ Baruk yuun to’e ka’aŋɔ la mɛ ti Yehowa puurɛ pee la en.

9. Wuu 1 Korint 4:​6, 7 n pa’alɛ se’em la, to san siregera tomea, la wa basɛ ti to baŋɛ la bem? (Bisɛ fɔɔra la.)

⁹ Saŋa ase’a, Kristabia ta’an ni ti’isa ti la nari ti eŋa nyɛ yɔ’ɔ ase’a Yehowa pu’usegɔ poan. Sɛla n sɔi ti Kritabia ta’an ti’isa bala dela, a ta’an mina gɔŋɔ, mina tuuma soŋa soŋa bii pu’usɛ Yehowa ti la yue. Ge mabiisi basɛba ta’an nyɛ yɔ’ɔ seko ti eŋa bɔta la. Bem n wan soŋɛ en ti a suure kan sa’am? A ta’an ti’isɛ taɣesɛ tuntuna Paul n gulesɛ sɛla ti la bɔna 1 Korint 4:​6, 7. (Kaalɛ.) Yɔ’ɔ seko woo ti to tara, la sɛla woo ti to mina ze’ele la Yehowa zɛ’an na. La daɣɛ la ton boi to to’ore la zuo ti Yehowa bɔ’ɔra to yele ana. Yehowa zu’useri to mɛ zuo ti a bɔ’ɔra to yele ana.—Arom 12:​3, 6; Ep. 2:​8, 9.

10. To wan eŋɛ la wani ta’an siregera tomea?

¹⁰ To san tɔɣesa Yezu, la wan soŋɛ to ti to siregera tomea. Geele bisɛ sɛla n yuun eŋɛ yu’uŋɔ seko ti Yezu yuun pee a podɔleba nama la. Tuntuna Paul yuun yeti: “Yesu daa mi [1] te a Sɔ bo en paŋa. [2] A mi te a ze’ele la Na’ayenɛ zen’en na ge me [3] le lɛbera a zen’en la, . . . pɔhɛ pɛɛra a dɔlɔba la natala.” (Yon 13:​3-5) Yezu yuun ta’an ti’isa ti a tuntuneba la nari ti ba pee eŋa nama. Ge Yezu yuun ka ti’isɛ ti eŋa n de Naayinɛ Dayua la zuo, a tara yisonɛ, a vom ana lumta bii a tara ligeri zo’e zo’e. (Lu. 9:58) Yezu yuun sirege la amea ge me ka wiila. A eŋɛ la makesonɛ bo to.—Yon 13:15.

11. Sirege n mea yuun soŋɛ Dennis la wani ti a ka wiila?

¹¹ Dennis n ze’ele Netherlands yeti eŋa tiregeri tɔɣesa la Yezu n yuun siregeri amea se’em la ge la daɣɛ naana. A yeti: “Nɛra san ni nyɛ yɔ’ɔ seko ti mam bɔta la, saŋa ase’a mam suure n ni sa’am ti mam ti’isa ti la nari ni la mam. La san ni ana mam bala, mam ni zamesɛ la sirege n mea yele. Mam gulesɛ la Baabule kaalegɔ zɛ’ɛsi ase’a n tɔɣeri sirege n mea yele JW Library^® app la poan ti n wan nyɛ ba kalam ta’an kaalɛ. Mam ni le ve’e la sirege n mea yetɔɣum eŋɛ n fon poan kɛlesa.a Mam baŋɛ ti tuunɛ woo ti to tuna, to iti bala ti Yehowa yu’urɛ la nyɛ la pɛ̃ka ge daɣɛ tomam mea. Yehowa bo to za’a waabi la yɔ’ɔ ti to laɣum tuna fii fii ti a puti’irɛ la ta’an tum.” Ho puurɛ san ka pee la yɔ’ɔ se’a ti ho tara la, tiregɛ baŋɛ hon wan eŋɛ se’em ta’an siregera homea. Bala wan basɛ ti hon la Yehowa zɔtɔ nyɔka la kpe’em, ti ho kan wiila.—Yam. 4:​6, 8.

TI’ISA BEERE SA’AM PUTI’IRƐ LA YELE

12. Beere sa’am puti’irɛ la soŋeri to la wani ti to ka wiila? (Isaiah 65:​21-25)

¹² To san ti’isa to beere sa’am puti’irɛ la yele, to kan wiila. Isaiah gɔŋɔ la poan Yehowa basɛ ti to bɔkɛ ti la wan kpe’em bo to ge a me kelum pu’ulum biŋe ti a wan yese yelese’a n daani to la basɛ. (Kaalɛ Isaiah 65:​21-25.) To wan ta mɛ yɛa soma ge kɛ̃’ɛra a poan. To wan ta tara tuuma n ani soŋa ge me dita dinɔ’ɔma. To kan le ta fabela ti dɛŋa wan paɛ to bii to kɔma. (Isa. 32:​17, 18; Eze. 34:25) To tari puti’irɛ ti pu’ulumbiŋ’a wa wan sirum tum.

13. Yele ani n kpe’em bo to ti la nara ti to ti’isa to beere sa’am puti’irɛ la yele?

¹³ Beni n sɔi ti la nara ti to ti’isa beere sa’am puti’irɛ la yele? Sɛla n sɔi la, ton boi “ba’ahegɔ dabeha” la poan la n basɛ ti la “kpe’em bo” to. (2 Tim. 3:1) Yehowa pa’ali tɔ, bɔ’ɔra tɔ paŋa ge me soŋera tɔ ti to ta’an ŋmibera daarewoo. (Ym. 145:14) Lɛyɛ’ɛsa, to beere sa’am puti’irɛ la soŋeri to mɛ ti to ta’an ŋmibera biɣi biɣi saŋa. Daanse’ere la ta’an kpe’em bo ho ti ho nyɛ ga’aregɔ zɛ’an bo ho deodoma, ho diisa ba bii ho da’ara lɔɣeyɛɛto bɔ’ɔra ba. Bala pa’alɛ ti saŋa woo ho yeti ho dɛna la nasa? La daɣɛ bala la fii me! Yehowa pu’ulum biŋe ti a wan bo ho sɛla woo n pakɛ hɔ Paradiisi poan. (Ym. 9:18; 72:​12-14) Daanse’ere bã’a ta’an tara hɔ ti ho inya duna bii ho suure sa’am ti putɛyiila tara hɔ. Ge hon ti’isɛ ti ho yeti ho namesa la bala kan malum nyɛ vo’osego? La daɣɛ bala. Tinpaalega la poan, bã’asi la kum kan le bɔna. (Lil. 21:​3, 4) Beere sa’am puti’irɛ wa soŋeri to mɛ ti putɛyiila ka tara to. To wan ta’an kelum tara pupeelum la suma’asum nɛra san eŋɛ to sɛla n ka ani soŋa, hali to nɛra san ki bii yeledi’ire n paɛ to. Bem zuo? Sɛla n sɔi la, to san puɣum namesa la se’em me to mi ti la “ka boe yuura.” Tinpaalega la poan, to wan ta vo’ose fai.—2 Ko. 4:​17, 18.

14. To wan eŋɛ la wani basɛ ti to sakerɛ kpe’em Yehowa pu’ulumbiŋ’a la poan?

¹⁴ To beere sa’am puti’irɛ la n basɛ ti to ka wiila la zuo, to wan eŋɛ la wani ta’an tara sakerɛ ti Yehowa pu’ulumbiŋ’a la za’a wan sirum tum? Wuu nɛra n ni vuge nimbisi ti la soŋɛ en ti a nyɛta zãara la, to san ti’isa to vom n wan ta ana se’em Paradiisi poan, la wan soŋɛ tɔ ti to sakerɛ kpe’em. Makerɛ, to san fabela la ligeri yele, to ta’an ti’isɛ bisɛ vom n wan ta ana se’em, se’em ma’a ti nɔŋɔ kan le bɔna. To san fabela la ton ka tari yɔ’ɔ se’a Yehowa pu’usegɔ poan yele, to ta’an ti’isɛ bisɛ yele ana n ka seke sɛsɛla se’em la ton wan ta ana kasi kɔ’ɔn pu’usa Yehowa wuusa la. (1 Tim. 6:19) Yɛla zo’e zo’e n daani tɔ zina beere wa, bala ta’an basɛ ti la kpe’em bo ti to ti’isɛ bisɛ vom n wan ta ana se’em beere sa’am. Ge to san kɔ’ɔn ti’isa vom n wan ta ana se’em tinpaalega la poan, to kan ba’ɛ fabela la yelese’a n paari tɔ zina beere wa la.

15. Hon zamesɛ la bem Christa yele la poan?

¹⁵ To geele ya beere sa’am puti’irɛ la n soŋɛ Christa se’em, mina n ele Dennis ti to puɣum tɔɣɛ a yele la. A yeti: “Mam bɛ̃’ɛri mɛ ti bã’a la basɛ ti mam inya ki. Mam ka ta’an kena. Mam zĩ la kɔɔreŋɔ kee kee zuo ge ti saŋa zo’e zo’e mam ni gã’a gɔregɔ zuo. Mam inya n duni daarewoo. Dɔgeta la yele mam ti bã’a la n ani se’em la, la kan sɔ̃na mam bɛ’ɛna. Ge bilam bilam ti mam ti’isɛ yeti, ‘A ka biseri nyɛta beere sa’am wuu mam n nyɛti de se’em la.’ Mam ti’iseri la beere sa’am yele, bala n basɛ ti mam tara suma’asum. Zina beere wa, la dela n ŋmibera ge tinpaalega la poan, n wan ta tara vom somɔ!”

“SƐBA WOO N ZOTE NA’AYENƐ, SƐLA KA DAANE BA”

16. Beni n sɔi ti Naba David yuun ta’an yeti sɛba woo n zoti Yehowa la, “sɛla ka daane ba”?

¹⁶ Hali to san ka wiila, daaŋɔ ta’an kelum paɛ tɔ. Naba David kɔma batã n yuun ki. Ba yuun parum la yɛla bo en, a zɔdoma n yuun dɔ̃rɛ en ti naba ayima me yuun ɛɛra en yuuma zo’e zo’e ti a ku. Hali la bala za’a, David yuun ka wiili. A yuun tɔɣɛ Yehowa yele ti: “Sɛba woo n zote Na’ayenɛ, sɛla ka daane ba.” (Ym. 34:​9, 10) Beni n sɔi ti a yuun ta’an yele bala? A yuun mi ti Yehowa kan gu en ti yeledaaŋɔ kan paɛ en ge a wan kelum bɔ’ɔra en sɛla n pakɛ en. (Ym. 145:16) Wuu David la, tomam me mi ti Yehowa wan soŋɛ tɔ ti to ta’an ŋmibera yeledaaŋɔ woo poan. Bala la, to kan wiila.

17. Beni n sɔi ti hon bɔta ti ho basɛ ti hon tari sɛla la seke ho?

¹⁷ Yehowa boti la to basɛ ti ton tari sɛla la seke to. (Ym. 131:​1, 2) Bala la, tiregɛ bisɛ hon wan eŋɛ se’em basɛ ti sɛla ti ho tara la seke ho. Ho san basɛ ti ho puurɛ pee la hon tari sɛla la, siregera homea ge me basɛ ti ho beere sa’am puti’irɛ la kpe’em, ho wan ta’an yeti: ‘Ɛ̃ɛ, mam puurɛ pee ya’ la mam n tari sɛla la.—Ym. 16:​5, 6.