Yehowa N Soŋeri To Se’em Ti To Ta’an Ŋmibera

1. Beni n sɔi ti la daɣɛ naana ti to ŋmibe ta paɛ ba’asegɔ ge ani n wan soŋɛ tɔ? (1 Peter 5:10)

TO ZA’A n tari yeledaaŋɔ la zuo, saŋa ase’a la ta’an kpe’em bo to ti to ŋmibera ta paɛ ba’asegɔ. Mabiisi basɛba bɛ̃ yue mɛ ge ti basɛba me nɛreba ki. Basɛba me yire nɛreba bii gɔmɛt kpɛ’ɛndoma n yaɛ ba. (Mt. 10:​18, 36, 37) Tara suure lua ti hali la yeledaaŋɔ se’a n paari ho la, Yehowa wan bo ho paŋa ti ho ta’an kelum ŋmibera.—Kaalɛ 1 Peter 5:10.

2. Bem n wan soŋɛ Kristakɔma ti ba ta’an ŋmibera?

² Ŋmibega vuurɛ dela to kelum tara yelemɛŋɛrɛ bɔ’ɔra Yehowa ge pu’usa en la pupeelum hali yaarɛ bii gurɛbisɛ poan. La me dela to tara putɛsonɛ ti yɛla wan ta ana soŋa beere sa’am. Bala n wan soŋɛ tɔ ti to ta’an ŋmibera. Tomam mea kan ta’an tara paŋa ŋmibera ge la dela Yehowa n bo’ori to “paŋa la n gane zan’an la.” (2 Ko. 4:7) Zaseŋɔ wa poan, to wan sɔsɛ yɛla anaasi ti Yehowa dekɛ bo to ti la soŋɛ tɔ ti to ta’an ŋmibera. To me wan zamesɛ baŋɛ ton wan dekɛ yele ana tum tuuma se’em ta’an nyɛ nyuurɔ.

ZUSEGA

3. Beni n sɔi ti zusega dɛna yelekirega?

³ Yehowa eŋɛ la sɛla n de yelekirega bo to ti la soŋɛ tɔ ti to ta’an ŋmibera. Hali la ton de be’emdoma la, a bo to la yɔ’ɔ ti to ni zusɛ en. (Heb. 4:16) Ti’isɛ bisɛ: To ta’an zusɛ Yehowa sansɛka ti to bɔta ge me yele en sɛla ti to bɔta. Yehowa keleseri to zusega mɛ la ka pakɛ la ton tɔɣeri yetɔɣesebo, ton kɛ̃’ɛri zɛ’an hali to san puɣum bɔna sarega poan. (Yona 2:​1, 2; Tm. 16:​25, 26) Putɛyiila san ba’ɛ tara tɔ ti to ka mina to wan zusa se’em, Yehowa ni bɔkɛ lan ani to se’em mɛ. (Arom 8:​26, 27) Yelemɛŋɛrɛ, zusega dela yelekirega!

4. Beni n sɔi ti to wan ta’an yeti ton zuseri Yehowa ti a soŋɛ to ti to ta’an ŋmibe la makɛ mɛ la a puti’irɛ?

⁴ Baabule la poan Yehowa basɛ ti to baŋɛ ti, “sɛla te to sohɛ la han dɛna a sunboolom, a kelehere to.” (1 Yo. 5:14) To wan ta’an zusɛ Yehowa ti a soŋɛ tɔ ti to ŋmibera? Ɛɛ! To san zusa en bala, la makɛ mɛ la a puti’irɛ n boti sɛla. Beni n sɔi ti to wan ta’an yele bala? To san nyaŋɛ ŋmibe yeledaaŋɔ poan, la ni basɛ ti Yehowa nyɛ la sɛla ta’an lebese Sitaana, Kolekpabɛ’a la. (Mag. 27:11) Leyɛ’ɛsa, Baabule la yeti Yehowa “behere mɛ zen’an woo teŋparɛ wa zuo te a te’ele sɛba n dekɛ ba sunya zan’an bo en.” (2 Yel. 16:9) Bala la, to tara suure lua ti Yehowa kɔ’ɔn bɔta ti a soŋɛ to mɛ, a me tari paŋa n wan eŋɛ bala.—Isa. 30:18; 41:10; Lu. 11:13.

5. Zusega wan ta’an basɛ ti to tara suma’asum la wani? (Isaiah 26:3)

⁵ Baabule la yeti to san zusɛ Yehowa ge yele en yelese’a woo n daani tɔ, ‘Naayinɛ suma’asum la n gaŋɛ asaala bɔkerɛ la, wan basɛ ti to suure la to puti’ira bɔna ma’a.’ (Flp. 4:7) To puurɛ pee mɛ la eŋa n yele to sɛla wa. Yeletooro me paari nɛresɛba n ka pu’useri Yehowa la mɛ. Ba zo’e zo’e kɔ’ɔn tiregera mɛ ti ba bisɛ ban wan eŋɛ se’em ta’an tamɛ ba yeledaaŋɔ la. Makerɛ, basɛba ni ma’ɛ la bamea ana sim ge sãleŋera ti ba ta’an yese yelese’a n daani ba la, ba puti’irɛ poan ti la ana ba mama. Bala me dela dɛŋa bɔ’ɔra ba. (Dekɛ makɛ Matu 12:​43-45.) Hali nɛreba san sãleŋera ti ba tara suma’asum, ba suma’asum la kan ta’an paɛ suma’asum sebo ti Yehowa tara bɔ’ɔra to la. To kɔ’ɔn dekɛ tomea delum la Yehowa. Bala la, to zuseri ɛɛra la suma’asum. Wuu eŋa n pu’ulum biŋe se’em la, a wan bo to “sunma’ahom.” (Kaalɛ Isaiah 26:3.) Sore deyima poan ti Yehowa bɔ’ɔra to suma’asum dela, a ni soŋɛ to mɛ ti to tɛ̃ra gulesegɔ se’a n buɣeli to suure. Gulesegɔ ana wa ni pa’alɛ la Yehowa n nɔŋɛ to se’em ge bɔta ti a soŋɛ tɔ. Bala n ni basɛ ti la ana to mama.—Ym. 62:​1, 2.

6. Hon wan ta’an dekɛ la bem pa’asɛ ho zusega poan? (Bisɛ foote la.)

⁶ Hon wan ta’an eŋɛ sɛla. Yele san paɛ hɔ ti ho ŋmibera, “dekɛ ho zeero bo Na’ayenɛ” ge zusɛ en ti a bo ho suma’asum. (Ym. 55:22) Zusɛ en ti a bo ho yɛm ti ho baŋɛ hon wan ta’an maalɛ yele la se’em. (Mag. 2:​10, 11) Leyɛ’ɛsa, pu’usɛ Yehowa la eŋa n eŋɛ sɛla bo ho la. (Flp. 4:6) Dabeserɛ woo poan, ti’isɛ bisɛ sose’a poan ti Yehowa soŋera hɔ ti ho ta’an ŋmibera ge me pu’usɛ en la yelese’a ti a ita bɔ’ɔra ho la. Da basɛ ti yeledaaŋɔ la pĩ ho nini ti ho ka nyɛta Yehowa n kã’ari bɔ’ɔra ho se’em la.—Ym. 16:​5, 6.

NAAYINƐ YELESUM

7. To san zamesa Baabule la, la wan soŋɛ to la wani ti to ta’an ŋmibera?

⁷ Yehowa dekɛ la a Yelesum la bo to ti la soŋera tɔ ti to ta’an ŋmibera. Baabule kaalegɔ zɛ’ɛsi zo’e zo’e pa’alɛ ti Yehowa kɔ’ɔn bɔta ti a soŋɛ to mɛ. To geele ya ayima. Matu 6:8 yeti: “Ya Sɔ pon diŋɛ mina sɛla te ya bɔta, ge te ya nya sɔkera en.” Yezu n yuun tɔɣɛ yele ana wa, a me mi Yehowa gana asaala woo. Bala la, to mi ti to san namesa, Yehowa mi yelese’a n pakɛ tɔ ge me wan soŋɛ tɔ. Baabule la tari la pu’ulumbiŋ’a zo’e zo’e n soŋeri tɔ ti to nyɛta paŋa ta’an ŋmibera yeletooro poan.—Ym. 94:19.

8. (a) Bo makerɛ pa’alɛ Baabule naresum yele n wan soŋɛ to se’em ti to ta’an ŋmibe. (b) Bem n wan ta’an soŋɛ tɔ ti to tiɛ Baabule naresum yɛla, la yele san ta pakɛ?

⁸ Baabule la bo’ori to la ka’aŋɔ ti la soŋera tɔ ti to ta’an ŋmibera yeletooro poan. Yelese’a n boi bim la bo’ori la yɛm ti to ta’an ni kɔ’ɛ to puti’irɛ soŋa tum tuunɛ. (Mag. 2:​6, 7) Makerɛ, Baabule la yele to yeti to da fabela yelese’a n wan ta eŋɛ beere sa’am ge to tuɣum dekɛ tomea delum Yehowa dabeserɛ woo poan. (Mt. 6:34) To san kaala Baabule la daarewoo ge ti’isa taɣesa ton kaali sɛla la, bala wan soŋɛ tɔ ti to tɛ̃ra ge kɔ’ɛ to puti’irɛ soŋa bii to ta’an ŋmibe yelese’ere poan.

9. To san ni kaalɛ Baabule la nyɛta Yehowa n yuun soŋɛ a yamesi se’em, la ni ana to la wani?

⁹ To san kaala Baabule la, to ni baŋɛ la nɛreba n ani wuu tomam n yuun dekɛ bamea delum Yehowa ti a soŋɛ ba la. (Heb. 11:​32-34; Yam. 5:17) To san ti’isa taɣesa Yehowa n soŋɛ ba se’em la, bala ni basɛ ti to tara la sakerɛ ti Yehowa wan soŋɛ tomam me. Yehowa dela ‘tomam suka zɛ’an, la to paŋa. Daaŋɔ saŋa, hon de tomam soŋera.’ (Ym. 46:1) To san ti’isɛ bisɛ Yehowa n yuun soŋɛ a yamesi diimi se’em la, bala n wan soŋɛ tɔ ti to ta’an tɔɣesa ba ge me ŋmibera.—Yam. 5:​10, 11.

10. Hon wan eŋɛ la wani ti Baabule la soŋɛ hɔ soŋa soŋa?

¹⁰ Hon wan ta’an eŋɛ sɛla. Kaala Baabule la daarewoo ge gulesa kaalegɔ zɛse’esi n wan soŋɛ hɔ biŋera. Nɛreba zo’e zo’e ni kaalɛ la Baabule gulesegɔ la, la pa’alegɔ yɛla la n boi daily text la poan bulika. Bala n ni kpɛmesa ba giila dabeserɛ la poan. Mabipɔka ayima yu’urɛ n de Mariea yuun baŋɛ ti bala dela yelemɛŋɛrɛ se’em ma’a ti a dɔɣereba yuun tara ɔberega bã’a la. Bem n yuun soŋɛ en ti a ta’an bisa a dɔɣereba la ta paɛ ba kum? A yeti; “Bulika woo mam ni kaala Daarewoo Gulesegɔ Viisegɔ la mɛ ge ti’isa taɣesa. Mam n iti bala daarewoo la basɛ ti mam tɛ̃ra la Baabule gulesegɔ n soŋɛ mam ti mam ti’isa Yehowa yele la yelekiresi se’a ti a pa’ala mam Baabule la poan la.”—Ym. 61:2.

NYƐTA NƐŊA BƆ’ƆRA TO MABIISI

11. La ani hon la wani ho san ti’isa mabiisi n nyaŋɛ ŋmibera se’em yeledaaŋɔ poan la?

¹¹ Yehowa basɛ ti to tara la mabinɔɔrɛ n boi tingɔŋɔ wa poan ti ba soŋera tɔ ti to ta’an ŋmibera. To mi ti “Yesu dɔlɔba sɛba woo me n boe teŋa wa zuo me nyɛte la namehe seto te yamam me nyɛta” la. Bala pa’alɛ ti la daɣɛ tomam ma’a. (1 Pe. 5:9) Yelemɛŋɛrɛ, to mi soŋa soŋa ti yelese’a n paari tomam la, bala nɔɔ n paari to mabiisi ge ti ba kelum tara sakerɛ bɔ’ɔra Yehowa. Wana wa pa’alɛ ti tomam me wan ta’an ŋmibera!—Tm. 14:22.

12. To mabiisi wan ta’an soŋɛ to la wani ge tomam me wan ta’an eŋɛ la bem bo ba? (2 Korint 1:​3, 4)

¹² To mabiisi wan nyaŋɛ kpemese to giila ti to ŋmibera doose la ba yetɔɣum la ba itigɔ poan. Mabiisi yuun eŋɛ la bala soŋɛ tuntuna Paul. Ban yuun paɣɛ en amea yire la, a yuun gulesɛ gɔnɔ pu’usɛ mabiisi sɛba woo n yuun soŋɛ en la. Mabiisi la yuun buɣelɛ Paul suure, kpɛmesa a giila ge me bo en yelese’a n pakɛ en. (Flp. 2:​25, 29, 30; Kol. 4:​10, 11) Zina beere wa, to mabiisi la wan ta’an buɣelɛ to suure ge soŋɛ tɔ ti to ta’an ŋmibe yeledaaŋɔ poan. Tomam me wan ta’an soŋɛ ba ti ba ŋmibe yeledaaŋɔ poan.—Kaalɛ 2 Korint 1:​3, 4.

13. Bem n yuun soŋɛ mabipɔka Maya ti a ta’an ŋmibe?

¹³ Mabinɔɔrɛ la yuun kpemese mabipɔka n ze’ele Russia ti a yu’urɛ dɛna Maya giila mɛ paa. Yuun 2020 poan ti ba yuun saasɛ a yire ge tara en zom kootin la eŋa n tɔɣeri a sakerɛ yɛla bɔ’ɔra nɛreba la zuo. Maya yeti, “sankaŋa la mam suure n yuun sa’am ti mabiisi la yuun ni yi’ira mam fon zuo ge gulesa gɔnɔ pa’ala bamam n nɔŋɛ mam se’em. “Mam yuun mi ti mam boi la yizukãtɛ poan ti mabiisi la me nɔŋɛ mam. Ge la dela yuun 2020 poan ti mam sirum baŋɛ mabiisi la n tari nɔŋerɛ se’em bɔ’ɔra mam.”

14. La nari ti to eŋɛ la bem ti mabiisi la ta’an soŋɛ tɔ? (Bisɛ foote la.)

¹⁴ Hon wan ta’an eŋɛ sɛla. Yeledaaŋɔ san paɛ hɔ ti ho ŋmibera, la yele pakɛ mɛ ti ho naɛ la mabiisi la sɔsera. Da zɔta valum ti ho yele keendoma la ti ba soŋɛ hɔ. Ba ani “wo soka zen’an te . . . sabekantɛ lɔbeha la.” (Isa. 32:2) Tɛ̃ra ti to mabiisi me ŋmiberi mɛ yeledaaŋɔ poan. Ho san eŋɛ som bo nɛra, ho puurɛ wan pee ge ti la me soŋɛ hɔ ti ho ta’an ŋmibera ho yeledaaŋɔ poan.—Tm. 20:35.

TO BEERE SA’AM PUTI’IRƐ LA

15. Beere sa’am puti’irɛ la yuun soŋɛ Yezu la wani ge la me soŋeri tomam la wani zina beere wa? (Hebru 12:2)

¹⁵ Yehowa basɛ ti to tara la beere sa’am puti’irɛ ti to mina ti la wan sirum tum. Bala n soŋeri tɔ ti to ta’an ŋmibera. (Arom 15:13) Tɛ̃ra ti Yezu n yuun boi tinparɛ wa zuo la, daarɛ deyima ti la yuun wuna en ge beere sa’am puti’irɛ la zuo ti a yuun nyaŋɛ ŋmibe. (Kaalɛ Hebru 12:2.) Yezu yuun mi ti a san tara yelemɛŋɛrɛ, la wan basɛ ti Yehowa yu’urɛ la ana fa’a. Yezu yuun mi ti a wan ta naɛ la a Sɔ la bɔna ge ti pooren ti eŋa la a suurɔ la wan ta bɔna saazuo Na’am la poan. Tomam me n tari puti’irɛ ti to wan ta bɔna Naayinɛ tinpaalega la poan la, soŋeri to mɛ ti to ta’an ŋmibera Sitaana tingɔŋɔ la n basɛ ti yeletooro paara to la.

16. Beere sa’am puti’irɛ la soŋɛ mabipɔka ayima la wani ti a ta’an ŋmibe ge hon zamesɛ la bem eŋa n yele sɛla la poan?

¹⁶ Bisɛ ton tari beere sa’am puti’irɛ ti to wan ta bɔna tinpaalega la poan la n soŋɛ mabipɔka n ze’ele Russia ti a yu’urɛ dɛna Alla se’em. A sira ti ba yuun nyɔkɛ en paɣɛ sarega gura ti ba gãkɛ en. Alla yeti: “Mam yuun zuseri la Yehowa ge ti’isa taɣesa beere sa’am puti’irɛ la yele. Bala n basɛ ti mam giila ka ba’ɛ kɔ’ɔsɛ. Mam mi ti yeletooro ana wan tole ti to nyɛ yelesoma. Yehowa wan zabɛ nyaŋɛ a dindoma ge kã bo to.”

17. To wan eŋɛ la wani pa’alɛ ti to puurɛ pee ya la to beere sa’am puti’irɛ la? (Bisɛ foote la.)

¹⁷ Hon wan ta’an eŋɛ sɛla. Nyɛta nɛŋa ti’isa taɣesa beere sa’am puti’irɛ la ti Yehowa pu’ulum biŋe la. Ti’isɛ bisɛ hon wan ta nyɛ kã’a se’em tinpaalega la poan. Yelese’a n paari ho nananawa la “kan bɔna bala wuuha.” (2 Ko. 4:17) Leyɛ’ɛsa, tiregɛ tɔɣera ho sakerɛ yɛla bɔ’ɔra nɛreba. Ti’isɛ bisɛ lan kpe’em se’em bo nɛresɛba n ka pu’useri Yehowa la. Ba tari yeledaaŋɔ zo’e zo’e mɛ ge ba ka mi yelesoma se’a ti Naayinɛ pu’ulum biŋe la. Ho san puɣum tɔɣɛ sɛla fii bo ba, la wan kpemese ba giila ti ba bɔta ti ba zamesɛ baŋɛ Naayinɛ, la a pu’ulumbiŋ’a la.

18. Beni n sɔi ti la nara ti to dekɛ tomea delum Yehowa pu’ulumbiŋ’a la?

¹⁸ Yob n yuun nyaŋɛ ŋmibe yeletooro zo’e zo’e poan ba’asɛ la, a yuun yele Yehowa ti: “Mam mi te ho ta’an eŋɛ sɛla woo, te sɛla woo te ho eta, nɛra kan ta’an gu de.” (Yob 42:2) Yob yuun baŋɛ ti sɛsɛla ka boi n wan ta’an gu Yehowa ti a pu’ulumbiŋ’a la kan tum. Ton mi ti Yehowa wan basɛ ti a pu’ulumbiŋ’a la tum ge yese to yeledaaŋɔ la woo basɛ la, basɛ ti to tara la paŋa ŋmibera. Makerɛ, ti’isɛ bisɛ ti pɔka n bɛ̃’ɛri ti la yue. A giila n kɔ’ɔsɛ sɛla n sɔi la, a keŋɛ la dɔgetadoma zo’e zo’e zɛ’an ge ka nyɛ tibegɔ. Ti a nyaa ta nyɛ dɔgeta ayima n yele en sɛla n ta’asɛ a bã’a la, la eŋa n wan eŋɛ se’em ta’an tibɛ en. A puurɛ wan pee bilam bilam ge la wan nara ti a gu’use fii ge ti dɔgeta la nyaa tibɛ en. A nyaa wan ta’an ŋmibera sɛla n sɔi la, a tari puti’irɛ ti a wan nyɛ a bã’a la tibegɔ. Bala mea nɔɔ, tomam me n tari suure lua ti Paradiisi wan ta bɔna la soŋeri to mɛ ti to ta’an ŋmibera.

19. La nari ti to eŋɛ la bem ta’an ŋmibera?

¹⁹ Wuu ton baŋɛ se’em la, Yehowa soŋeri to mɛ ti to ta’an ŋmibera yeletooro woo poan. A doli la to zusega poan, a Yelesum la poan, to mabiisi, la to beere sa’am puti’irɛ la poan soŋera tɔ. To san dekɛ yele ana za’a tum tuuma, Yehowa wan soŋɛ tɔ ti to ta’an ŋmibe yeletooro poan ge nyaa gura se’em ma’a ti Yehowa wan sa’am Sitaana tingɔŋɔ wa ti namesegɔ kan le bɔna.—Flp. 4:13.