Tara Suure Lua Ti Yehowa Di Sugeri Bo Ho

1-2. To san baŋɛ ti Yehowa di sugeri bo to, la ni ana to la wani? (Bisɛ foote.)

NABA David mi nɛra n ni tabelɛ tum be’em ti la ana en se’em. (Ym. 40:12; 51:3; saazuo yelesum) A yuun tum la be’em ti a suure sa’am. Ge a yuun basɛ a be’em la mɛ ti Yehowa me di sugeri bo en. (2 Sa. 12:13) David puurɛ yuun pee mɛ la eŋa n baŋɛ ti Yehowa di sugeri bo en la.—Ym. 32:1.

² Wuu David la, tomam me puurɛ wan pee to san baŋɛ ti Yehowa zɔ to nimbu’ɔ ge di sugeri bo to. To san tum be’em, to tari la subuɣelegɔ ti to san zusɛ Yehowa, yele keendoma la ge me tiregɛ ti to kan le eŋɛ bala, a wan di sugeri bo to! (Mag. 28:13; Tm. 26:20; 1 Yo. 1:9) To puurɛ pee mɛ la ton baŋɛ ti Yehowa san di sugeri bo to, la ni ana wuu to ka tabelɛ tum la be’em la!—Eze. 33:16.

3-4. La yuun ani mabipɔka ayima la wani a ko’om musega pooren ge to wan sɔsɛ la bem zaseŋɔ wa poan?

³ Saŋa ase’a la ta’an ni kpe’em bo to ti to sakɛ ti Yehowa sirum di sugeri bo to. La yuun ani mabipɔka Jennifer la bala. A dɔɣereba yuun pa’alɛ en la Yehowa yɛla ge eŋa n yuun ta zo’e la, a yuun pɔsɛ ita la yelese’a n ka ani soŋa ge tara suɣera a dɔɣereba la. Yuuma fii pooren, ti a yuun tee ge kã amea bo Yehowa nyaa muse ko’om. A yeti: “Mam yuun kɔ’ɔn tuna la yalumtuuma, bugera daam, nɔŋɛ zaberɛ ge me nɔŋɛ ligeri. Mam yuun mi ti Baabule la yeti Yezu kum la zuo Yehowa wan di sugeri bo to. Ge mam yuun ka sakɛ n suuren ti a di sugeri bo mam.”

⁴ Saŋa ase’a la ni kpe’em bo ho mɛ ti ho sakɛ ti Yehowa sirum di sugeri bo ho la hon tabelɛ tum be’em se’a la? Yehowa dela nimbɔzɔta. David yuun tari sakerɛ ti Yehowa di sugeri bo en mɛ. Yehowa me boti la to tara pupeelum wuu lan yuun ani David se’em ti a di sugeri bo en la. Zaseŋɔ wa poan, to wan sɔsɛ sɛla n sɔi ti la nara ti to sakɛ ti Yehowa di sugeri bo to, la sɛla n wan soŋɛ tɔ ti to ta’an eŋɛ bala.

BENI N SƆI TI LA NARA TI TO TARA SUURE LUA TI YEHOWA WAN DI SUGERI BO TO?

5. Sitaana boti to tara la bem puti’irɛ? Tɔɣɛ pa’alɛ.

⁵ To san sirum sakɛ ti Yehowa nɔŋɛ tɔ ge me di sugeri bo to, to kan kɛlesa Sitaana pumpɔreŋɔ la. Tɛ̃ra ti Sitaana wan tiregɛ ti a bisɛ eŋa n wan eŋɛ se’em gu to ti to kan pu’usa Yehowa. Makerɛ, Sitaana ni tiregɛ bɔta ti a pã’asɛ to ti Yehowa ka di sugeri bo to. Ti’isɛ bisɛ sɛla n yuun eŋɛ buraa la n boi Korint ge tum yalumtuuma ti ba yese en tansugere la poan la. (1 Ko. 5:​1, 5, 13) Eŋa n yuun basɛ a be’em la, Sitaana yuun boti la mabiisi la da di sugeri bo buraa la ge me da le to’e en tansugere la poan. Tansugere la me san ka di sugeri bo en, buraa la ta’an ti’isa ti Yehowa kan malum di sugeri bo en. Bala ta’an basɛ ti a suure sa’am ti a kan le pu’usa Yehowa. Sitaana kelum ana la bala mea nɔɔ, a ka tee a pã’asegɔ yɛla la. Ge “to mi Dima sɔrɔtɔ n ane se’em mɛ.”—2 Ko. 2:​5-11.

6. To san kelum ti’isa ti Yehowa ka di sugeri bo to la ton tabelɛ tum be’em se’a la, to wan eŋɛ la wani?

⁶ To san sirum sakɛ ti Yehowa di sugeri bo to, to kan le ti’isa to be’em la yele ti la daana tɔ. To san tum be’em, to suure n ni sa’am. (Ym. 51:17) Bala ani soŋa. To san eŋɛ sɛla ge nyaa baŋɛ ti la dela be’em, to ni tee mɛ ita sɛla n ani soŋa. (2 Ko. 7:​10, 11) Ge to san ti’isa ti Yehowa ka di sugeri bo to, to giila ta’an kɔ’ɔsɛ ti to basɛ Yehowa pu’usegɔ. To san sirum sakɛ ti Yehowa di sugeri bo to mɛ, bala wan basɛ ti to tamɛ to be’em la yele. To nyaa wan ta’an tara putɛkeeŋa n ani fa’a pu’usa Yehowa la pupeelum. (Kol. 1:​10, 11; 2 Tim. 1:3) Ge to wan eŋɛ la wani ta’an tee to ti’isegɔ ge sakɛ ti Yehowa di sugeri bo to?

BEM N WAN SOŊƐ TƆ TI TO TA’AN SAKƐ TI YEHOWA DI SUGERI BO TO?

7-8. Yehowa yuun tɔɣɛ amea yele la wani bo Moses ge bala basɛ ti to tara suure lua la wani? (Yɛhega 34:​6, 7)

⁷ Ti’isɛ taɣesɛ Yehowa n tɔɣɛ amea yele se’em. Bisɛ Yehowa n yuun tɔɣɛ amea yele se’em bo Moses Sinai Zoore la zuo.a (Kaalɛ Yɛhega 34:​6, 7.) La boi bim ti Yehowa tari la halisoma zo’e zo’e ge a yuun yele Moses ti eŋa dela ‘nimbɔzɔta, la zu’usegɔ Naayinɛ.’ Hon ti’isɛ ti se’em n nɔŋɛ Yehowa ge basɛ a be’em, Yehowa kan di sugeri bo en? Yehowa san ka di sugeri bo en, bala pa’alɛ ti a dela putɔa. A me kan sakɛ eŋɛ bala.

⁸ To wan ta’an tara suure lua ti Yehowa n yeti eŋa dela nimbɔzɔta la dela yelemɛŋɛrɛ. (Ym. 31:5) Bala la, to wan ta’an sakerɛ eŋa n yele sɛla la. La san kpe’em bo ho ti ho tamɛ be’em sebo ti ho tabelɛ tum la, soke homea yeti: “Mam sakɛ ti Yehowa dela nimbɔzɔta, tara giile ge me wan di sugeri bo se’em woo n basɛ a be’em?” Ho san sakɛ bala, mina ti Yehowa me di sugeri bo ho mɛ.

9. Yooma 32:5 pa’alɛ ti Yehowa ni di sugeri bo to la wani?

⁹ Ti’isɛ bisɛ Baabule la n pa’alɛ to Yehowa n diti sugeri bɔ’ɔra to se’em. David pa’alɛ Yehowa n diti sugeri se’em bɔ’ɔra tɔ. (Kaalɛ Yooma 32:5.) David yeti: “Hom Na’ayenɛ seren bahɛ mam be’em ganleŋɔ wa.” Hebru yelebire la n de “bahɛ” la vuurɛ me ta’an dɛna “to’e,” “dekɛ,” bii “zɛ.” Yehowa n yuun di sugeri bo David la, la yuun ani wuu Yehowa to’e David zeero la mɛ. David puurɛ yuun pee mɛ sɛla n sɔi la a yuun mi ti Yehowa di sugeri bo en. (Ym. 32:​2-4) La me ta’an ana to bala. To san basɛ to be’em, la ka nari ti to le ti’isa to be’em la yele ti la daana tɔ. Ge la nari ti to tara pupeelum la Yehowa n dekɛ to be’em la basɛ la.

10-11. Yelesum la n de “sugurom dita” la pa’alɛ tɔ Yehowa yele la wani? (Yooma 86:5)

¹⁰ Kaalɛ Yooma 86:5. David yeti Yehowa dela sugurum dita. Bala pa’alɛ ti to san tue Yehowa, a sunsɔa ka nyiiri tɔtɔ tɔtɔ. A me ni kɔ’ɔn bɔta la a di sugeri bo sɛba n basɛ ba be’em la. Beni n sɔi ti a ita bala? Kaalegɔ la tɔ̃kɛ yeti: “Ho perɛ mɛ la nɔŋerɛ kantɛ bɔ’ɔra sɛba woo n yi’ire ho.” Wuu zaseŋɔ seko n tole la n pa’alɛ se’em la, Yehowa n tari yelemɛŋɛrɛ nɔŋerɛ la n basɛ ti a ana tapilapi la a yamesi. Eŋa n tari yelemɛŋɛrɛ nɔŋerɛ la zuo, a wan “di suguru bo” sɛba woo n basɛ ba be’em. (Isa. 55:7) La san kpe’em bo ho ti ho sakɛ ti Naayinɛ di sugeri bo ho, ho ta’an soke homea yeti: ‘Mam tari sakerɛ ti Yehowa dela sugurum dita n wan di sugeri bo sɛba woo n basɛ ba be’em ge ɛɛra a nimbɔzore la? La san dɛna bala, hon wan ta’an tara suure lua ti a me wan di sugeri bo ho la hon zuseri ɛɛra a nimbɔzore la.’

¹¹ Baabule la le yeti Yehowa mi soŋa soŋa ti to ka di mi’a. (Ym. 139:​1, 2) Basɛ ya ti to bisɛ David n le tɔɣɛ sɛla ti la wan ta’an soŋɛ tɔ ti to tara sakerɛ ti Yehowa boti la a di sugeri bo to.

YEHOWA TƐ̃RI TOMAM YELE LA WANI?

12-13. Wuu Yooma 103:14 n pa’alɛ se’em la, Yehowa tɛ̃ri to yele la wani ge bala basɛ ti a ita to la wani?

¹² Kaalɛ Yooma 103:14. David yeti Yehowa “mi te to dela tentɔnɔ.” David n yele sɛla wa pa’alɛ la sɛla n sɔi ti Yehowa kɔ’ɔn bɔta ti a di sugeri bo sɛba n basɛ ba be’em: A mi ti to ka di mi’a. To san wan bɔkɛ yele wa, basɛ ya ti to malum bisɛ Divid n yele sɛla la soŋa.

¹³ David yuun yeti Yehowa “mi tomam n pɔhɛ se’em me na.” A yuun dekɛ la “tentɔnɔ yagom” Adam. Bala la, Yehowa mi ton pɔsɛ se’em mɛ na la yelese’a n pakɛ tɔ. Makerɛ, a mi ti dia, gɔɔm la vo’osego yele pakɛ to mɛ. Hali asaala n yuun puɣum di mi’a la, yuun eeri yele ana mɛ. (Pin. 2:7) Baabule la n yeti asaala dela tontɔnɔ la ge ti Adam la Hawa yuun tum be’em la, le pa’alɛ la sɛla. Tomam n de ba yaasi la zuo, ba be’em la taɛ to mɛ ti to ka yaɣesa ge tuura. Yehowa mi bala mɛ soŋa soŋa. David n yuun yeti Yehowa mi ti to dela tontɔnɔ la pa’alɛ ti Yehowa mi ti to dela be’emdoma. Bala n sɔi ti a kɔ’ɔn tara to giile la. To nyaa ta’an kilese David yetɔɣum la ti la vuurɛ dɛna: Yehowa mi ti to tuuri en mɛ saŋa ase’a; to me san tue en ge basɛ to be’em, a ni zɔ la to nimbu’ɔ ge di sugeri bo to.—Ym. 78:​38, 39.

14. (a) David le tɔɣɛ pa’alɛ ti Yehowa diti sugeri bɔ’ɔra to la wani? (Yooma 103:12) (b) Yehowa n yuun di sugeri bo David se’em la pa’alɛ to la bem? (Bisɛ daka la zuo n de “Yehowa N Diti Sugeri Se’em Bɔ’ɔra Tɔ.”)

¹⁴ To wan ta’an le zamesɛ la bem Yooma 103 poan n pa’alɛ Yehowa n diti sugeri bɔ’ɔra to se’em la? (Kaalɛ Yooma 103:12.) David yeti Yehowa san di sugeri bo to, A ni dekɛ to be’em la “lobe zaan mɛ wo dapoore bɔba n zaan la zanɔɔrɛ bɔba se’em la.” Dapɔya bɔba la zaanɔya bɔba kɔ’ɔn zaɛ mɛ la taaba. Ba ka makɛ lɛm taaba. Bala pa’alɛ to la bem la Yehowa n diti sugeri bɔ’ɔra to la? Gɔŋɔ ayima tɔɣɛ kaalegɔ zɛ’an wa yele ti: “Naayinɛ ni dekɛ to be’em la lobe zaɛ mɛ ti la ana wuu sɛla nyuuŋo n ka le bɔna la. Bala basɛ ti to tara puti’irɛ ti a kan le ti’isɛ de yele bii a tĩɛ to be’em la yele.” Saŋa ase’a, dia bii sɛla nyuuŋo ta’an basɛ ti ho tĩɛ sɛla n tabelɛ eŋɛ. Ge Yehowa san di sugeri bo to, la ni ana wuu be’em la nyuuŋo la n wan basɛ ti a tɛ̃ra yele la, puɣum ka le bɔna.—Eze. 18:​21, 22; Tm. 3:19.

15. To san tabelɛ tum be’em ti la daana tɔ, to wan eŋɛ la wani?

¹⁵ La san kpe’em bo to ti to sakɛ ti Yehowa di sugeri bo to, David n tɔɣɛ sɛla ti la bɔna Yooma 103 la wan ta’an soŋɛ to la wani? To san ti’isa ton tabelɛ tum be’em se’a ti la daana tɔ, to ta’an soke tomea yeti: ‘Mam tamɛ ti Yehowa mi ti n ka di mi’a ge me wan di sugeri bo mam n san basɛ n be’em? Mam kelum ti’isa la be’em se’a ti Naayinɛ saalum basɛ ge ka le tɛ̃ra ba yele la?’ Yehowa ka le ti’isa be’em sebo ti ho tabelɛ tum la. Tomam me ka nari ti to ti’isa de yele. (Ym. 130:3) To san sakɛ ti Yehowa di sugeri bo to, to kan le zɛregera tomea la ton tabelɛ tum be’em se’a la ge to wan kelum pu’usa Yehowa la pupeelum.

16. Bo makerɛ pa’alɛ lan wan dɛna dɛŋa se’em to san kɔ’ɔn ti’isa be’em sebo ti to tabelɛ tum la. (Bisɛ foote la.)

¹⁶ Geele makerɛ wa bisɛ. Ho san kelum ti’isa ho be’em la yele, la wan ana wuu ho tukeri la loore ge kɔ’ɔn kpa bisa loore la biseŋa. La ani soŋa ti ho ni makɛ bisɛ biseŋa la ta’an mina homea lɔɣesegɔ ti dɛŋa da paɛ hɔ. Ho san wan paɛ soŋa, la nari ti ho bisera ho nɛŋa tontɔɔ. Bala mea nɔɔ, la ani soŋa ti to ni makɛ tĩɛ sɛla ti to tabelɛ tue. Bala wan basɛ ti to ta’an nyɔɣɛ yɛm to tuure la poan. Ge to san kɔ’ɔn ti’isa be’em sebo ti Yehowa di sugeri bo to la, bala ta’an basɛ ti to giila kɔ’ɔsɛ ti to kan ta’an pu’usa Yehowa soŋa. Basɛ ya ti to puti’irɛ kɔ’ɔn bɔna Yehowa pu’usegɔ poan ge me ti’isa beere sa’am tinpaalega la yele, se’em ma’a ti to “kan le tɛnra” yelekɛɣesi la.—Isa. 65:17; Mag. 4:25.

TARA SUURE LUA

17. Beni n sɔi ti to wan ta’an tara suure lua ti Yehowa nɔŋɛ tɔ ge me dita sugeri bɔ’ɔra tɔ?

¹⁷ La nari ti to tara suure lua ti Yehowa nɔŋɛ tɔ ge me dita sugeri bɔ’ɔra tɔ. (1 Yo. 3:19) Bem zuo? Sɛla n sɔi la, Sitaana kɔ’ɔn tiregera mɛ ti a pã’asɛ tɔ ti to ti’isa ti Yehowa ka nɔŋɛ tɔ ge me ka dita sugeri bɔ’ɔra tɔ. Lan yeen dɛna se’em, Sitaana puti’irɛ dela a basɛ ti to da le pu’usa Yehowa. Tomam mi ti Sitaana kɔ’ɔn ãregera la amea sɛla n sɔi la, a mi ti a saŋa la pɔ’ɛ mɛ. (Lil. 12:12) To da makɛ basɛ ti Sitaana nyaŋɛ tɔ!

18. Ho wan eŋɛ la wani ta’an tara suure lua ti Yehowa nɔŋɛ hɔ ge me dita sugeri bɔ’ɔra hɔ?

¹⁸ Zaseŋɔ seko n tole la pa’alɛ la hon wan eŋɛ se’em ta’an tara suure lua ti Yehowa nɔŋɛ hɔ. Zaseŋɔ wa me pa’alɛ la hon wan eŋɛ se’em ta’an tara suure lua ti Yehowa di sugeri bo ho. Makerɛ, ti’isɛ Yehowa n tɔɣɛ amea yele se’em. Ti’isɛ taɣesɛ Baabule la n tɔɣɛ Yehowa n diti sugeri bɔ’ɔra to se’em. Tɛ̃ra ti Yehowa mi ti to ka di mi’a ge me wan zɔ to nimbu’ɔ. A san di sugeri bo to, a ni kɔ’ɔn saalum ba basɛ mɛ. Ho nyaa wan tara pupeelum zo’e zo’e sɛla n sɔi la, ho mi ti Yehowa di sugeri bo ho. Wuu David la ho me wan ta’an yeti, “N pu’usɛ ya Yehowa la hon ‘bahɛ mam be’em ganleŋɔ wa’!”—Ym. 32:5.