Hon Wan Eŋɛ Se’em Nɛra San Tum Ho Ŋmɛlema Tuuma

1-2. La ani nɛreba zo’e zo’e la wani ba san ita ba bii basɛba sɛla n ka ani soŋa ge to wan zamesɛ la bem?

TO BOI la ŋmɛlema tiŋa poan. Nɛreba zo’e zo’e biseri la yɛla ase’a ge ita nɛreba sɛla n ka ani soŋa. Ban de nasedoma la zuo bii ban ze’ele zɛ’an la ti ba ni ita ba sɛla n ka ani soŋa ge me nɛ’ɛsa ba. Mɛlesegɔ n paari nɛreba zo’e zo’e sɛla n sɔi la, buntateba bii gɔmɛt nɛŋadoma puti’irɛ kɔ’ɔn bɔna la ligeri ma’a poan ti nɛreba yele ka pakɛ ba. Yele ana bii ŋmɛlema yɛla ase’a me paari to za’a mɛ.

² Nɛreba zo’e zo’e sunsɔa nyie mɛ la ban iti ba se’em la bii ban nyɛti nɛreba ti ba ita se’em la. Nɛra woo boti la ba ita ba soŋa ti ba tara suma’asum. Nɛreba basɛba kɔ’ɔn tiregera mɛ ti ba maalɛ yeledaaŋɔ se’a n boi tingɔŋɔ wa bii ba tisi poan. Ba ni giisa la gɔmɛt, la ku lɔɔ la ge me ni di’e nu’o loe nalɛɣereba sɛba n yeti ba wan maalɛ ba yɛla. Ge tomam Kristakɔma mi ti to ‘ka pa’asɛ tingɔŋɔ wa poan’ ge to guri la Naayinɛ Na’am ti la yese ŋmɛlema tuuma za’a basɛ. (Yon 17:16) Ge to suure ni sa’am mɛ, ti saŋa ase’a me ti to sunsɔa ni nyie to san nyɛ ti ba ita nɛreba sɛla n ka ani soŋa. To ta’an ti’isa ti: ‘Mam wan eŋɛ la wani? N wan ta’an eŋɛ la bem nananawa ŋmɛlema tuuma poan?’ To san wan nyɛ soke ana wa lebesego, basɛ ya ti to bisɛ lan ani Yehowa la Yezu se’em la ŋmɛlema tuuma wa.

YEHOWA LA YEZU KA BOTI ŊMƐLEMA TUUMA

3. Beni n sɔi ti to sunsɔa ni nyie nɛreba san ita tomam bii basɛba sɛla n ka ani soŋa? (Isaiah 5:7)

³ Baabule la pa’alɛ sɛla n sɔi ti to suure ni sa’am ba san eŋɛ to sɛla n ka ani soŋa. Yehowa naam to la a wɔ̃nɛ poan ge me ‘nɔŋɛ tontɔɔ tuuma la yelemɛŋɛrɛ.’ (Ym. 33:5; Pin. 1:26) A ka iti nɛreba sɛla n ka ani soŋa, a me ka boti tomam me ita nɛreba sɛla n ka ani soŋa. (Tɛɛ. 32:​3, 4; Mik. 6:8; Zek. 7:9) Makerɛ, nɔdɛ’ɛsa Isaiah saŋa la, Yehowa yuun wum la “muguhego koonɔ” Israeldoma la zo’e zo’e poan se’em ma’a ti ba tiŋa nɛreba basɛba yuun ita ba sɛla n ka ani soŋa la. (Kaalɛ Isaiah 5:7.) Sɛba woo n yuun mi fii ge ita nɛreba sɛla n ka nari la, Yehowa yuun dɔlegɛ la ba tuba la ban ka nani a lɔɔ la.—Isa. 5:​5, 13.

4. La yuun ani Yezu la wani a san nyɛ ti ba ita nɛra sɛla n ka ani soŋa? (Bisɛ foote la.)

⁴ Wuu Yehowa la, Yezu nɔŋɛ la tontɔɔ tuuma ge yaɛ ŋmɛlema tuuma. Daarɛ deyima na’am mɔɔlegɔ poan ti Yezu nyɛ buraa ti a nu’o ki. Yezu yuun tari la giile bɔ’ɔra buraa la nyaa tibɛ en. Ge pu’usegɔ nɛŋadoma la n yuun nyɛ bala la, ba sunsɔa n nyie. Ba yuun yeti Yezu sa’am la Vo’osegɔ Daarɛ lɔɔ la. Buraa la n yuun nameseri la yele yuun ka pakɛ ba. La yuun ani Yezu la wani la ba itigɔ la? “Sunkanberɛdoma” wa itigɔ yuun basɛ ti la wuŋɛ en mɛ.—Mr. 3:​1-6.

5. Beni n sɔi ti la ka nara ti to sunsɔa kelum nyie ba san tuna to bii basɛba ŋmɛlema tuuma?

⁵ Yehowa la Yezu sunsɔa ni nyie mɛ la ŋmɛlema tuuma. Bala la, la daɣɛ be’em la tomam me sunsɔa n ni nyie la. (Ep. 4:26) Ge la nari ti to ta’an nyɔkera tomea to sunsɔa san nyie ge tɛ̃ra ti to kan ta’an yese namesegɔ basɛ. To san basɛ ti to sunsɔa nyie ti la yue, la ta’an basɛ ti bã’asi bii putɛyiila tara tɔ. (Ym. 37:​1, 8; Yam. 1:20) Bala la, la nari ti to eŋɛ la wani ba san eŋɛ tɔ bii basɛba sɛla n ka ani soŋa? To wan ta’an tɔɣesa Yezu.

YEZU N YUUN EŊƐ SE’EM ŊMƐLEMA TUUMA POAN

6. Yezu n yuun boi tiŋa wa zuo la, bem ŋmɛlema yɛla n yuun iti? (Bisɛ foote la.)

⁶ Yezu yuun nyɛ ŋmɛlema tuuma zo’e zo’e mɛ se’em ma’a ti a yuun bɔna tiŋa wa zuo la. A yuun le nyɛta pu’usegɔ nɛŋadoma la n yuun mɛleseri nɛreba se’em. (Mt. 23:​2-4) Leyɛ’ɛsa, a yuun nyɛti Arom nɛŋadoma la n yuun iti nɛreba se’em ti la ka ana soŋa. Yudadoma la zo’e zo’e yuun boti la ba faaɛ bamea yese Aromdoma bisega poan. Hali basɛba yuun biŋe la tigere n de wuu Zealot, zabera la Aromdoma. Ge Yezu yuun ka pa’asɛ tigere ana poan bii a soŋera ba. Yezu n yuun ta baŋɛ ti nɛreba la boti la ba bobe en na’am la, a yuun fɔregɛ ba zɛ’an mɛ.—Yon 6:15.

7-8. Yezu n yuun boi tiŋa wa zuo la, beni n sɔi ti a yuun ka yese ŋmɛlema tuuma basɛ? (Yon 18:36)

⁷ Yezu n yuun boi tiŋa wa zuo la, a yuun ka naɛ la nalɛɣereba tuna ti ba ta’an yese ŋmɛlema tuuma basɛ. Beni n sɔi? A yuun mi ti asaala ka tari sore bii paŋa n wan ta’an bisa amea. (Ym. 146:3; Yer. 10:23) Asaala me kan ta’an maalɛ yelese’a n ta’asɛ ŋmɛlema tuuma la. Sitaana Kolekpabɛ’a la n biseri tingɔŋɔ wa. A dela putɔa ti nɛreba zo’e zo’e me tɔɣesa en. (Yon 8:44; Ep. 2:2) Hali nɛresondoma la kan ta’an maalɛ tingɔŋɔ wa yɛla sɛla n sɔi la, ba ka iti yɛla ma’a ma’a.—Pa. 7:20.

⁸ Yezu yuun mi ti Naayinɛ Na’am la ma’a n wan ta’an maalɛ yelese’a n ta’asɛ ŋmɛlema tuuma la. Bala zuo ti a yuun dekɛ a saŋa la a paŋa “mɔɔla Yelesoma la yɛhera Na’ayenɛ Sɔ’ɔlom la.” (Lu. 8:1) “Sɛbadoma n teregɛ ɛɛra tontɔɔ bɔŋa wo nɛreba n eere dia la ko’om se’em la” Yezu yuun yele ba ti la kan yue, kinkisum la ŋmɛlema tuuma kan le bɔna. (Mt. 5:6; Lu. 18:​7, 8) La daɣɛ la asaala gɔmɛt n wan nyaŋɛ basɛ ti teere ana bɔna ge la dela Naayinɛ Na’am la ma’a n “dagɛ teŋa wa zuo denɛ” la n wan basɛ ti teere ana bɔna.—Kaalɛ Yon 18:36.

TƆƔESA YEZU HO SAN NYƐTA ŊMƐLEMA TUUMA

9. Beni n sɔi ti hon tara suure lua ti Naayinɛ Na’am la ma’a n wan yese ŋmɛlema tuuma basɛ?

⁹ Zina beere wa, to nyɛti ŋmɛlema tuuma gana Yezu n yuun nyɛti sɛla tinparɛ wa zuo la. Ge “ba’asegɔ dabesa” wa poan, Sitaana la a nɛreba n kelum basɛ ti ŋmɛlema tuuma bɔna. (2 Tim. 3:​1-5, 13; Lil. 12:12) Wuu Yezu la, tomam me mi ti Naayinɛ Na’am la ma’a n wan yese yelese’a woo n ta’asɛ ŋmɛlema tuuma la. Ton mɔɔli Naayinɛ Na’am yelesoma la zuo, to ka iti tawai la gɔmɛt bii dekɛ tomea delum en ti a yese ŋmɛlema tuuma basɛ. Geele mabipɔka Stacy yele la bisɛ.a Ge ti a nyaa zamesɛ yelemɛŋɛrɛ la, a yuun ni tɔɣera giisa la gɔmɛt ti ba gu ŋmɛlema tuuma. Ge a yuun tari la puti’ira ayi ayi la eŋa n iti sɛla la. A yeti: “Saŋa ase’a mam yuun ni ti’isa ti mam n iti sɛla la kan ta’an maalɛ yele la. Ge nananawa ti mam pa Naayinɛ Na’am la poore la, mam tari suure lua ti mam boi la bɔbese’ere n ani soŋa. Mam mi ti Yehowa wan yese namesegɔ woo basɛ gana mam n iti sɛla la.”—Ym. 72:​1, 4.

10. Wuu Matu 5:​43-48 n pa’alɛ se’em la, beni n sɔi ti to ka tiregera ti to basɛ ti ba tee lɔɔ bii gɔmɛt? (Bisɛ foote la.)

¹⁰ Zina beere wa, nɛreba zo’e zo’e dekɛ bamea pa’asɛ la tiga poan tiregera ti ba tee gɔmɛt. Ge ba zo’e zo’e sunsɔa ni nyie mɛ ti ba ka nana lɔɔ la ge me tara daaŋɔ paara nɛreba. Daɣɛ bala ti Yezu pa’alɛ tɔ ti to ita. (Ep. 4:31) Mabia ayima yu’urɛ n de Jeffrey yeti: “Mam mi ti nɛreba san yeti ba eŋɛ tawai, ba sunsɔa ta’an ni nyie kalam ti ba sa’ana lɔɣɔrɔ, zuura ge pɔɣena taaba.” Ge Yezu yuun pa’alɛ tɔ ti to ita nɛreba soŋa, hali la sɛba n ka nani bɔ’ɔra tɔ bii yaɛ to la. (Kaalɛ Matu 5:​43-48.) Tomam n de Kristakɔma la, to tiregeri tɔɣesa la Yezu.

11. Beni n sɔi ti saŋa ase’a la ni kpe’em bo to ti to tɔɣesa Yezu?

¹¹ La boi bim ti to mi ti Naayinɛ Na’am la wan yese to yeledaaŋɔ za’a ge la ta’an kpe’em bo to ti to tɔɣesa Yezu nɛreba san ita to sɛla n ka ani soŋa. To bisɛ lan yuun ani Janiya se’em, nɛreba n yuun iti en sɛla n ka ani soŋa, la a inganɛ n boi de to’ore la. A yeti: “Mam suure yuun sa’am mɛ la ban tɔɣeri mam yele se’em la. Mam sunsɔa n yuun nyie ti mam bɔta ti ba dɔlegɛ nɛrebana wa tuba. Bala la, mam yuun keŋɛ ta naɛ la nɛresɛba n tɔɣeri giisa buuri yelesego yɛla. Mam yuun ti’isɛ ti n san eŋɛ bala la wan sɔna mam bɛ’ɛna.” Ge pooren, Janiya yuun baŋɛ ti la nari ti a tee a puti’irɛ. A yeti, “Lan yuun nari ti mam tuɣum dekɛ n mea delum Yehowa la, mam ni sakɛ la nɛreba n ni yele sɛla la ge dekɛ n mea delum ba. Mam yuun kɔ’ɛ n puti’irɛ ti n wan basɛ tigere ana wa lan wan eŋɛ se’em ti n kan dekɛ n mea pa’asɛ yele ana poan.” La boi bim ti to sunsɔa ni nyie mɛ to san nyɛ ti ba ita nɛra sɛla n ka ani soŋa. Ge la nari ti to ta’an nyɔkera tomea ti to sunsɔa da nyiira ge me da dekɛ tomea pa’asɛ tiŋa wa yɛla poan.—Yon 15:19.

12. Beni n sɔi ti la nara ti to bisɛ tomea soŋa la ton kaali sɛla, ton biseri sɛla bii ton keleseri yelese’a?

¹² Bem n wan soŋɛ tɔ ti to ta’an ana baalam ba san ita tɔ bii basɛba sɛla n ka ani soŋa? Sɛla n wan soŋɛ tɔ dela to ni bisɛ tomea soŋa la ton kaali sɛla, ton biseri sɛla la ton keleseri yelese’a. Nɛreba basɛba ni gulesɛ la yɛla social media poan ti la eŋɛ nɛreba pakerɛ ti ba nyɔna gɔmɛt la. Lasebaarɛ bɔ’ɔreba ni tɔɣera la bamam n ti’iseri sɛla ge daɣɛ yele la n sirum eŋɛ se’em. Hali yele la san puɣum dɛna yelemɛŋɛrɛ ti to kelum kɛlesa ba, to kan nyaŋɛ maalɛ yele la. To san kɔ’ɔn dekɛ saŋa zo’e zo’e kɛlesa bii kaala yele aŋa, la ta’an basɛ ti putɛyiila tara tɔ ti to suure sa’am ti to sunsɔa nyie. (Mag. 24:10) La ta’an basɛ ti to kan le dekɛ Naayinɛ Na’am la deŋɛ nɛŋa to vom poan ge me tamɛ ti Naayinɛ Na’am la ma’a n wan maalɛ to yeledaaŋɔ la.

13. To san kaala Baabule la daarewoo la wan soŋɛ to la wani, to san nyɛ ti ba ita nɛreba sɛla n ka ani soŋa?

¹³ To san kaala Baabule la ge ti’isa taɣesa ton kaali sɛla la, la wan soŋɛ tɔ ti to mina ton wan eŋɛ se’em ba san ita tɔ bii basɛba sɛla n ka ani soŋa. Alia suure yuun sa’am mɛ la eŋa n yuun nyɛ ti ba ita nɛreba sɛla n ka ani soŋa la. A sunsɔa yuun nyie mɛ la ban ka dɔlegɛ sɛba n iti nɛreba sɛla n ka ani soŋa la tuba la. A yeti, “N san sakɛ ti Yehowa n wan maalɛ yeledaaŋɔ la woo, la yi nari ti n tee n puti’irɛ. Sankaŋa la ti mam yuun kaalɛ Yob 34:​22-29. Kaalegɔ zɛ’ɛsi wa tĩɛ mam ti Yehowa nyɛti sɛla woo mɛ. Eŋa ma’a n mi sɛla n de tontɔɔ ge ti a me wan maalɛ nɛra woo yeledaaŋɔ bo en.” Ton guri ti Naayinɛ Na’am la ta maalɛ to yeledaaŋɔ woo la, to wan eŋɛ la bem nananawa?

TON WAN TA’AN EŊƐ SƐLA NANANAWA ŊMƐLEMA TUUMA POAN

14. To wan ta’an eŋɛ la bem nananawa? (Kolose 3:​10, 11)

¹⁴ To kan nyaŋɛ pa’alɛ nɛreba n nari ti ba ita tomam bii basɛba se’em ge to wan ta’an ita nɛreba soŋa. Wuu ton puɣum baŋɛ se’em la to san tara nɔŋerɛ, to tɔɣeseri la Yezu. Bala la, to kɔ’ɔn tiregera mɛ ti to ita nɛra woo soŋa hali la sɛba n yaɛ to la. (Mt. 7:12; Arom 12:17) Yehowa puurɛ ni pee mɛ to san ita nɛra woo soŋa ge ka gãsera.—Kaalɛ Kolose 3:​10, 11.

15. To san zamesa nɛreba Baabule la, la wan soŋɛ ba la wani?

¹⁵ Sɛla n pakɛ paa dela to soŋɛ nɛreba ti ba zamesɛ baŋɛ Yehowa. Beni n sɔi ti to wan ta’an yele bala? Se’ere n sɔi la, nɛra san zamesɛ baŋɛ Yehowa, a wan bɔta ti a ita sɛla n peeri A puurɛ ge eŋɛ teere ta’an tara nɔŋerɛ ge me ita nɛreba soŋa. (Isa. 11:​6, 7, 9) Ge ti buraa ayima yu’urɛ n de Jemal nyaa zamesɛ yelemɛŋɛrɛ la, a yuun naɛ la tigere ti ba zabɛ la gɔmɛt la sɛla n sɔi la, ba ti’isɛ ti gɔmɛt la ka iti sɛla n ani soŋa. A yeti: “Ho kan nyaŋɛ pɛ̃regɛ ti nɛreba tee. Ge ba san zamesɛ Baabule yelemɛŋɛrɛ la, ba wan ta’an tee. Sɛla n tee mam n bala.” Jemal n yuun zamesɛ Baabule la n soŋɛ en ti a basɛ zaberɛ. To san zamesa nɛreba Baabule la, la wan soŋɛ ba ti ba kan ita sɛla n wan daam nɛreba.

16. Beni n sɔi ti hon bɔta ti ho tɔɣɛ Naayinɛ Na’am la yɛla bo nɛreba?

¹⁶ Wuu Yezu la, to kɔ’ɔn bɔta la to soŋɛ nɛreba ti ba baŋɛ ti Naayinɛ Na’am la wan yese to yeledaaŋɔ za’a. Yele wa wan kpemese sɛba ti ba ka ita ba soŋa la giila. (Yer. 29:11) Stacy ti to puɣum tɔɣɛ a yele la yeti: “Mam n mi ti Naayinɛ wan yese to yeledaaŋɔ la basɛ la zuo, mam ni ana la baalam ba san ita mam bii nɛreba sɛla n ka ani soŋa. Yehowa tari la Baabule la buɣela to suure.” La nari ti to kɔ’ɔn maasum soŋa ta’an ni dekɛ Baabule pu’ulumbiŋ’a la buɣelɛ nɛreba suure. Ho san mina Baabule la n tɔɣɛ namesegɔ yele se’em la, la wan basɛ ti ho sakɛ bo Baabule pa’alegɔ la. Bala me wan soŋɛ hɔ ti ho ta’an pa’alɛ ho sukuu tadaandoma bii ho tuuma tadaandoma sɛla n sɔi ti to namesa, la Yehowa n yeti a eŋɛ se’em yese to namesegɔ la basɛ.b

17. Yehowa soŋeri to la wani, ba san ita to sɛla n ka ani soŋa?

¹⁷ Sitaana n de “se’em n behere teŋa wa zuo la” n sɔi ti to kɔ’ɔn namesa. Ge to mi ti yɛla wan tee se’ere n sɔi la Yehowa pu’ulum biŋe ti a wan soŋɛ tɔ ge yese Sitaana la putotuuma za’a basɛ. (Yon 12:31) Makerɛ, a yele to Baabule la poan sɛla n sɔi ti to namesa ge me basɛ ti to baŋɛ ti a fabeli sɛba ti ba ka ita ba soŋa la yele mɛ. (Ym. 34:​17-19) To zamesɛ baŋɛ to wan ta’an eŋɛ sɛla nɛreba san ita to sɛla n ka ani soŋa. To le baŋɛ ti la kan yue, Naayinɛ Na’am la wan yese namesegɔ ti nɛreba kan le namesa. (2 Pe. 3:13) Basɛ ya ti to kɔ’ɔn tiregɛ mɔɔlɛ Naayinɛ Na’am la yɛla ge me kɔ’ɔn gura se’em ma’a ti tingɔŋɔ wa wan ta pirɛ la “yelemɛŋɛrɛ la tontɔɔ vom.”—Isa. 9:7.