Bɔ’ɔra Nɛreba Gilema

1. Beni n sɔi ti nɛreba puurɛ ni pee ba san bɔ’ɔra ba gilema? (Magaha 22:1)

HON puurɛ ni pee nɛreba san bɔ’ɔra ho gilema? Nɔkpe’ene kai ti ho puurɛ ni pee mɛ. Nɛra woo boti la ba bɔ’ɔra en gilema. To puurɛ ni pee mɛ nɛreba san bɔ’ɔra to gilema. Bala n sɔi ti Baabule la yeti, “na’ahegɔ gana sanlema la sanlenpeelega”!—Kaalɛ Magaha 22:1.

2-3. Beni n sɔi ti saŋa ase’a la ni daɣɛ naana ti to bɔ’ɔra nɛreba gilema ge to wan sɔsɛ la bem zaseŋɔ wa poan?

² Saŋa ase’a, la ni daɣɛ naana ti to bɔ’ɔra nɛreba gilema. Yele deyima dela, ton ka di mi’a la zuo, to kɔ’ɔn nyɛta la nɛreba tuure yɛla. Leyɛ’ɛsa, sɛba ti to naɛ la ba bɔna la zo’e zo’e ka bo’ori gilema. Ge la nari ti to bɔna to to’ore. Beni n sɔi? Se’ere n sɔi la, Yehowa boti la to bɔ’ɔra “nɛra woo” gilema.—1 Pe. 2:17.

³ Zaseŋɔ wa poan, to wan baŋɛ to wan bɔ’ɔra gilema vuurɛ n de sɛla, la ton wan eŋɛ se’em ta’an bɔ’ɔra (1) to deodoma, (2) to mabiisi, la (3) sɛba n daɣɛ to mabiisi gilema. To wan le zamesɛ baŋɛ to wan bɔ’ɔra nɛreba gilema se’em hali la san puɣum kpe’em bo to.

TO BƆ’ƆRA GILEMA VUURƐ?

4. To bɔ’ɔra nɛreba gilema vuurɛ?

⁴ Gilema vuurɛ? “Gilema” pa’alɛ la ton geele nɛreba se’em la ton iti ba se’em. To san nyɛ ti nɛra tara halesoma bii a eŋɛ la sɛla n ani soŋa bii a tari la kpe’eŋo gana tɔ, to ni bɔ’ɔra en la gilema. La yele pakɛ mɛ ti to ni yese to suuren bɔ’ɔra nɛreba gilema.—Mt. 15:8.

5. Bem n wan soŋɛ tɔ ti to ta’an bɔ’ɔra nɛreba gilema?

⁵ Yehowa boti la to bɔ’ɔra nɛreba gilema. Makerɛ, a boti la to bɔ’ɔra “zuodoma” la gilema. (Arom 13:​1, 7) Ge nɛreba basɛba ta’an ti’isa ti, “Nɛra san tuna sɛla n nari ma’a ti la nara ti n bɔ’ɔra en gilema.” Ban ti’iseri se’em wa ani soŋa? Aayi. To bɔkɛ ti daɣɛ nɛra n ta’an ita sɛla bii eŋa n ka ta’an ita sɛla n wan basɛ ti to bɔ’ɔra en gilema. Yehowa n boti to bɔ’ɔra nɛreba gilema. To me boti la a puurɛ pee n sɔi ti to ita bala.—Yos. 4:14; 1 Pe. 3:15.

6. Ho wan ta’an bo nɛra gilema, a san ka bɔ’ɔra ho gilema? Tɔɣɛ pa’alɛ. (Bisɛ foote.)

⁶ Nɛreba basɛba ta’an ti’isa ti, ‘Mam wan nyaŋɛ bo nɛra gilema a san ka bɔ’ɔra mam gilema?’ Ɛɛ. Geele nɛreba wa yele bisɛ. Naba Saul yuun tɔɣɛ la yetɔɣepɔ’ɔsa bo a dayua Yonatan nɛreba nɛŋan. (1 Sa. 20:​30-34) Ge Yonatan yuun kelum tara la gilema bɔ’ɔra Saul ge me soŋera en zaberɛ poan ta paɛ Saul kum. (Yɛh. 20:12; 2 Sa. 1:23) Malema Nɛŋadaana Eli yuun yele Hana yeti a buge mɛ. (1 Sa. 1:​12-14) La boi bim ti nɛra woo yuun mi ti Eli n de Malema nɛŋadaana la yuun ka ka’ani a kɔma la soŋa ge Hana yuun bo’ori en gilema mɛ. (1 Sa. 1:​15-18; 2:​22-24) Atens tiŋa nɛreba yuun to tuntuna Paul ti a dela “yirenmoa.” (Tm. 17:18) Ge la bala za’a, Paul yuun kelum bɔ’ɔra ba la gilema. (Tm. 17:22) La niɛ peelumi ti ton nɔŋɛ Yehowa ge ka bɔta ti to sa’am a suure la wan basɛ ti to tara gilema bɔ’ɔra nɛreba la san puɣum kpe’em bo to ti to eŋɛ bala. Basɛ ya ti to sɔsɛ nɛresɛba n nari ti to bɔ’ɔra ba gilema, la sɛla n sɔi.

BƆ’ƆRA HO DEODOMA GILEMA

7. Bem n wan ta’an basɛ ti la kpe’em bo to ti to bɔ’ɔra to deodoma gilema?

⁷ Sɛla n wan ta’an basɛ ti la kpe’em. Saŋa zo’e zo’e, to ni naɛ la to deodoma bɔna. Bala ni basɛ ti to mina la ba halesoma, la ba tuure yɛla. Basɛba ta’an bɛ̃’ɛra ti la kpe’em bo to ti to bisa ba, bii putɛyiila zo’e zo’e n daani ba. Basɛba ta’an tɔɣɛ bii eŋɛ sɛla ti la daam tɔ. Deodoma nari ti ba naɛ taaba sɔsera soŋa soŋa ge ba san ka bɔ’ɔra taaba gilema, ba ka yaɣeseri ge ŋmɛ̃’ɛra nɔkpe’ene. Bala ni basɛ ti ba ka tara nɔyinɛ. To wan ta’an dekɛ deodoma makɛ la to inya. Bã’a ta’an basɛ ti nɛra inya ka tuna soŋa soŋa. Deodoma me san ka bɔ’ɔra taaba gilema, ba kan ta’an naɛ taaba bɔna. Wuu bã’asi zo’e zo’e n tari tibegɔ se’em la, deodoma me wan ta’an zamesɛ ban wan bɔ’ɔra taaba gilema se’em.

8. Beni n sɔi ti la dɛna ninmu’urɛ ti to bɔ’ɔra to deodoma gilema? (1 Timoti 5:​4, 8)

⁸ Beni n sɔi ti la nara ti to bɔ’ɔra to deodoma gilema? (Kaalɛ 1 Timoti 5:​4, 8.) Paul n yuun gulesɛ a yia gɔŋɔ bo Timoti la, a yuun pa’alɛ la deodoma n nari ti ba bisera taaba soŋa se’em. A yuun pa’alɛ ti ton bo’ori to deodoma gilema la daɣɛ ti la yeen nara mɛ ge la pa’asɛ la to “po’ohegɔ” poan. Ton nɔŋɛ Yehowa la n sɔi ti to bɔ’ɔra ba gilema. Yehowa n basɛ ti deodoma bɔna. (Ep. 3:​14, 15) Bala la, to san bɔ’ɔra to deodoma gilema, la pa’alɛ ti to bo’ori la Yehowa, Se’em n basɛ ti deodoma bɔna la gilema. (Bisɛ zamesegɔ yele la n boi 1 Timoti 5:4.) Wana wa pa’alɛ la, la yele n pakɛ se’em ti to bɔ’ɔra to deodoma gilema!

9. Buraa la a pɔɣa wan eŋɛ la bem pa’alɛ ti ba bo’ori taaba gilema? (Bisɛ fɔɔra la.)

⁹ Ton wan eŋɛ se’em bɔ’ɔra to deodoma gilema. Sira n na’aseri a pɔɣa wan eŋɛ pa’alɛ ti a pɔɣa dela tuulum bɔ’ɔra en ba san bɔna ba ma’a bii ba boi la nɛreba poan. (Mag. 31:28; 1 Pe. 3:7) A kan makɛ ŋmɛ̃ a pɔɣa, diisi en vi bii eŋɛ sɛla n wan basɛ ti a ti’isa ti a ka tari vuurɛ. Ariel,a n kɛ̃’ɛri Argentina yeti: “Mam pɔɣa tari la bã’a n ni basɛ ti saŋa ase’a, a ni tɔɣera yelese’a n daani mam. A san ni tɔɣera mam bala, mam ni tĩɛ ti a ka nɔŋɛ ge tɔɣera. La daɣɛ ti a boti la a daam mam. La san ni ta gaŋɛ, mam ni tĩɛ la sɛla n boi 1 Korint 13:5. Bilam yeti n tɔɣera la gilema bɔ’ɔra n pɔɣa ge da zɛɛna en.” (Mag. 19:11) Pɔka n na’aseri a sira wan pɛ̃ɣera en nɛreba nɛŋan. (Ep. 5:33) A kan zɛregera a sira, ita en sia sia bii tuura en. A san ita yele ana, la wan sa’am eŋa la a sira la bɔŋa. (Mag. 14:1) Mabipɔka ayima n ze’ele Italy ti putɛyiila daana a sira yeti: “Saŋa ase’a, la ni ana mam wuu mam sira ni ba’ɛ fabela mɛ la. Mam n yuun ni tɔɣɛ yelese’a bii eŋɛ n nɛŋa se’em la yuun ni pa’alɛ ti mam ka bo’ori en gilema. Ge mam nyaa baŋɛ ti n san naɛ la sɛba n bo’ori nɛreba gilema bɔna, bala wan soŋɛ mam ti n bɔ’ɔra n sira gilema.”

10. Bunbilipaalesi wan eŋɛ la bem pa’alɛ ti ba bo’ori ba dɔɣereba gilema?

¹⁰ Bunbilipaalesi, nana ya dɔɣereba n pa’ali ya sɛla. (Ep. 6:​1-3) Tɔɣeri ya la gilema bɔ’ɔra ya dɔɣereba. (Yɛh. 21:17) Ho dɔɣereba san ta kuregɛ, nyɛta nɛŋa soŋera ba ti la pa’alɛ ti ho bo’ori ba gilema. Tiregɛ la ho bisa ba soŋa. To geele María yele la bisɛ. A sɔ daɣɛ Yehowa Sɛɛradaana. A sɔ la n yuun ta bɛ̃’ɛra la, a yuun basɛ ti la kpe’em mɛ bo María ti a bisa en. María yeti: “Mam yuun zusɛ la Yehowa ti a soŋɛ mam ti n ta’an eŋɛ pa’alɛ ti n bo’ori n sɔ gilema. Mam yuun bɔkɛ ti Yehowa san yeti n na’asa n dɔɣereba, a yi wan bo mam paŋa ti n ta’an eŋɛ bala. La nari ti n bɔ’ɔra en gilema, a san puɣum ka tee.” La san puɣum kpe’em bo to ge ti to kelum bɔ’ɔra to deodoma gilema, la pa’alɛ ti to bo’ori la Yehowa gilema.

BƆ’ƆRA HO MABIISI GILEMA

11. Bem n wan ta’an basɛ ti la kpe’em bo to ti to bɔ’ɔra to mabiisi gilema?

¹¹ Sɛla n wan ta’an basɛ ti la kpe’em. To mabiisi la tiregeri mɛ ti ba tara Baabule pa’alegɔ tuna tuuma ge saŋa ase’a, ba ta’an ni eŋɛ to sɛla bii tɔɣɛ sɛla ti to sunsɔa nyie. Tomam la to mabia san “tara yele la taaba,” la ta’an kpe’em bo to ti to bo en gilema. (Kol. 3:13) Bem n wan ta’an soŋɛ tɔ ti to kelum bɔ’ɔra en gilema?

12. Beni n sɔi ti la dɛna ninmu’urɛ ti to bɔ’ɔra to mabiisi gilema? (2 Peter 2:​9-12)

¹² Beni n sɔi ti la nara ti to bɔ’ɔra to mabiisi gilema? (Kaalɛ 2 Peter 2:​9-12.) Peter gɔnseko n pa’asɛ buyi la poan, a yuun yeti yuun kɔbesɛka n deŋɛ nɛŋa Kristakɔma la basɛba yuun ka bo’ori keendoma gilema. La yuun ani malesi la, la wani ban yuun nyɛ sɛla n iti la? Malesi la n ‘tari gilema bɔ’ɔra Yehowa’ la zuo, ba yuun ka zɛregɛ pumpɔreŋɔdoma la. Bisɛ lan de yelepakerɛ se’em! Hali malesi la n ani kasi la yuun bisɛ bamea soŋa mɛ ti ba kan tɔɣɛ zɛregɛ buraasi wa n zɛ̃keri bamea la. Ba yuun tuɣum basɛ yele la bo la Yehowa ti a gãkɛ. (Arom 14:​10-12; dekɛ makɛ Yude 9.) To wan ta’an zamesɛ sɛla malesi la n yuun eŋɛ sɛla la poan. To san ka zɛregera sɛba n giiseri tɔ, to mabiisi ti to wan tuɣum zɛregera? Aayi. La nari ti to deŋɛ nɛŋa na’asa ba. (Arom 12:10) To san ita bala, la pa’alɛ ti to bo’ori la Yehowa gilema.

13-14. To wan eŋɛ la bem pa’alɛ ti to bo’ori to mabiisi gilema? Bo makerɛ. (Bisɛ fɔɔra la.)

¹³ Ton wan eŋɛ se’em bɔ’ɔra to mabiisi gilema. Keendoma, ya san pa’ala, ya ita bala nɔŋerɛ sore poan. (Flm. 8, 9) La yele san pakɛ ti ho ka’am nɛra, la ka nari ti ho eŋɛ bala se’em ma’a ti ho sunsɔa nyie ge ni tuɣum ma’ɛ homea. Mabipɔɣesi, ya wan ta’an soŋɛ ya tansugere nɛreba ti ba bɔ’ɔra taaba gilema doose la yan kan bibisa nɛreba yɛla bii ya sa’ana nɛreba yu’ura. (Titus 2:​3-5) To wan ta’an eŋɛ pa’alɛ ti to bo’ori keendoma gilema doose la ton wan dɔla ba pa’alegɔ ge me eŋɛ pa’alɛ ti to nini tiɣɛ mɛ la ban biseri to na’am mɔɔlegɔ tuuma, la tansugere zamesegɔ ge me soŋera sɛba n “tue” la.—Ga. 6:1; 1 Tim. 5:17.

¹⁴ Mabipɔka ayima yu’urɛ n de Rocío yeti la yuun kpe’em bo en mɛ ti a bo keema ayima n yuun ka’am en gilema. A yeti, “Mam sunsɔa n yuun nyie, se’ere n sɔi la mam yuun ti’isɛ ti a ka tɔɣɛ mam soŋa. Mam san bɔna yire, mam ni kɔ’ɔn zɛregera en mɛ. La boi bim ti mam yuun ka iti pa’ala ti mam zɛregeri en ge mam suuren, mam yuun ti’isɛ ti a ka fabeli mam yele. Mam yuun ka doose a ka’aŋɔ la.” Bem n yuun soŋɛ Rocío? A yeti: “Mam Baabule kaalegɔ poan ti mam yuun ta kaalɛ paɛ 1 Tesalonika 5:​12, 13. Mam n yuun baŋɛ ti mam ka bo’ori mabia la gilema la, mam putɛkeeŋa n yuun daani mam. Mam yuun zusɛ la Yehowa ge me viisɛ to gɔnɔ la poan ti n nyɛ yelese’a n wan soŋɛ mam ti n tee. Bala yuun soŋɛ mam ti n baŋɛ ti la daɣɛ mabia la n tari yele ge la tuɣum dɛna la mam n zɛ̃keri n mea. Mam nyaa bɔkɛ ti n san siregera n mea, la wan soŋɛ mam ti n bɔ’ɔra nɛreba gilema. Mam kelum tiregera mɛ ti n bɔ’ɔra nɛreba gilema. Yehowa me puurɛ pee mɛ la mam n iti bala la.”

BƆ’ƆRA SƐBA N DAƔƐ MABIISI GILEMA

15. Bem n wan ta’an basɛ ti la kpe’em bo to ti to bɔ’ɔra sɛba n daɣɛ mabiisi gilema?

¹⁵ Sɛla n wan ta’an basɛ ti la kpe’em. To san ni bɔna na’am mɔɔlegɔ poan, saŋa zo’e zo’e to ni seke la nɛreba n ka nɔŋɛ Naayinɛ bii Baabule la. (Ep. 4:18) Nɛreba basɛba me ka keleseri yelesum la. Sɛba ti to naɛ la ba tuna bii to sukuu tadaandoma ta’an ka bɔ’ɔra to gilema. To kpɛ’ɛma bii to sukuu tikiya nini ta’an kan tiɣɛ la ton tuni se’em la. Fii fii, to ta’an kan le bɔ’ɔra nɛrebana wa gilema bii kan ita ba soŋa.

16. Beni n sɔi ti la dɛna ninmu’urɛ ti to bɔ’ɔra sɛba n ka pu’useri Yehowa gilema? (1 Peter 2:12; 3:15)

¹⁶ Beni n sɔi ti la nara ti to bɔ’ɔra sɛba n daɣɛ mabiisi gilema? Tɛ̃ra ti Yehowa nyɛti ton iti sɛba n daɣɛ mabiisi se’em mɛ. Tuntuna Peter yuun yeti Kristakɔma san tara halesoma, nɛreba wan “pɛngɛ Na’ayenɛ.” Bala zuo la, a yuun yeti ba san yeti ba tɔɣɛ po’e ba sakerɛ, ba tɔɣɛ ‘mama ge me bɔ’ɔra gilema zo’e zo’e.’ (Kaalɛ 1 Peter 2:12; 3:15.) Kristakɔma san tɔɣera pɔ’ɔra ba sakerɛ kootin bii ba tɔɣeri bɔ’ɔra la nɛresɛka deeni, la nari ti ba tɔɣera ti gilema bɔna bim. Se’ere n sɔi la Yehowa nyɛti ge me wuna ton tɔɣeri sɛla, la ton tɔɣeri de se’em. Wana wa pa’alɛ la, la yele n pakɛ se’em ti to bɔ’ɔra sɛba n daɣɛ mabiisi gilema.

17. To wan eŋɛ la bem pa’alɛ ti to bo’ori sɛba n daɣɛ mabiisi gilema?

¹⁷ Ton wan eŋɛ se’em bɔ’ɔra sɛba n daɣɛ mabiisi gilema. To san bɔna na’am mɔɔlegɔ poan, to ka boti to eŋɛ sɛla ti la ana wuu to ka bo’ori sɛba n ka mi Baabule la gilema. Ge to geele ba ti ba dela tuulum nɛreba bɔ’ɔra Naayinɛ ge ti to me ka gana ba. (Hag. 2:7; Flp. 2:3) Nɛra san to hɔ la hon sakɛ bo sɛla la zuo, la ka nari ti ho me lerege bii ho eŋɛ sɛla n wan daam en. (1 Pe. 2:23) Ho san yele sɛla ge baŋɛ ti ho tue mɛ, belum nɛra la bilam bilam. Ho wan eŋɛ la bem pa’alɛ ti ho bo’ori sɛba ti ho naɛ la ba tuna la gilema? Tuna ho tuuma soŋa soŋa ge me tara putɛsonɛ bɔ’ɔra ho kpɛ’ɛndoma, la sɛba ti ho naɛ la ba tuna. (Titus 2:​9, 10) Ho san tara yelemɛŋɛrɛ ge tuna ho tuuma soŋa, nɛreba puurɛ ta’an kan pee ge Naayinɛ puurɛ wan pee.—Kol. 3:​22, 23.

18. Beni n sɔi ti la nara ti to bɔ’ɔra nɛreba gilema?

¹⁸ To zamesɛ la yɛla zo’e zo’e n pa’alɛ la yele n pakɛ se’em ti to bɔ’ɔra nɛreba gilema! To zamesɛ baŋɛ ti to san bɔ’ɔra to deodoma gilema, to bo’ori la Yehowa gilema. Bala mea nɔɔ ti to san bɔ’ɔra to mabiisi gilema, to bo’ori la Yehowa me gilema. To me san bɔ’ɔra sɛba n daɣɛ mabiisi gilema, bala ta’an basɛ ti ba pɛ̃ɣɛ Naayinɛ. Nɛreba basɛba san puɣum ka bɔ’ɔra to gilema, la nari ti to bɔ’ɔra ba gilema. Bem zuo? Se’ere n sɔi la Yehowa wan kã bo to. A yeti: “Sɛba n na’ahere mam la te n wan na’ahɛ ba.”—1 Sa. 2:30.