1925​—Yuun Kɔbega N Tole

LA YUUN NARI TI BA GURA

Baabule Zamesegɔdoma la yuun ti’isɛ ti tingɔŋɔ la wan lebege Paradiisi yuun 1925 poan. Beni n sɔi? Mabia Albert Schroeder, n yuun pa’asɛ Tigere Zuo Bisegadoma la poan la yuun yeti: “To yuun ti’isɛ ti loore Kristakɔma sɛba n gee la wan keŋɛ saazuo ta naɛ la Yezu di Na’am ge ti Yehowa yamesi n de wuu Abraham, David la basɛba wan ta isige kum poan dɛna nabiisi bisera tinparɛ wa.” Ban yuun ti’iseri sɛla ti la ka tum la, mabiisi la basɛba giila yuun kɔ’ɔsɛ mɛ.—Mag. 13:12.

Hali la ba giila n yuun kɔ’ɔsɛ la, Baabule Zamesegɔdoma la zo’e zo’e yuun kɔ’ɔn tulegera mɛ na’am mɔɔlegɔ tuuma la poan. Ba yuun mi ti na’am mɔɔlegɔ tuuma la n pakɛ gana za’a ti la nara ti ba tum. Makerɛ, to bisɛ ban yuun dekɛ walesi mɔɔlɛ se’em bo nɛreba zo’e zo’e.

BA YUUN YU’Ɛ LA RADIO STATION ZO’E ZO’E

Yuun 1924 poan, nɛreba zo’e zo’e yuun kelese la WBBR radio station la. Bala la, yuun 1925 poan, Baabule Zamesegɔdoma la yuun yu’ɛ la radio station ayima n lɛm Chicago, Illinois. Ba yuun yi’iri station wa la WORD. Ralph Leffler n de walesi tuntuna ge me yuun soŋɛ ti ba maalɛ ku la yeti, “Hali ɔɔrɔ saŋa yu’uŋɔ, WORD station la kɔ’ɔn paara la zɛ’an woo.” Makerɛ, deodoma ayima n yuun kɛ̃’ɛri Pilot Station, Alaska ti la zaɛ gaŋɛ kilometer 5,000 (mɛɛla 3,000) yuun kelese yia yetɔɣum la ase’a. Ban yuun kelese ba’asɛ la, deodoma la yuun gulesɛ la gɔŋɔ bo stationdoma la pu’usɛ ba la ban soŋɛ ba ti ba baŋɛ Naayinɛ yelesum la se’em la.

December 1, 1925 The Watch Tower la tɔɣɛ pa’alɛ sɛla n sɔi ti station la ta’an paara zɛ’an woo. La yeti: “WORD laɣum pa’asɛ la radio station kãra la n boi United States tiŋa la. Nɛreba n boi United States zaɣanyɔa la dapɔya bɔba za’a, Cuba la Alaska tisi n yuun keleseri station wa. Nɛresɛba n ka tabelɛ wum yelemɛŋɛrɛ la, yuun boti la ba zamesɛ Baabule la, la ban kelese station wa la zuo.”

Sankaŋa mea la, Baabule Zamesegɔdoma la yuun le bɔta la ba tara radio station la mɔɔla Canada tiŋa. Yuun 1924 poan, ti ba yu’ɛ CHUC radio station la Saskatoon, Saskatchewan tiŋa. A laɣum pa’asɛ la pu’usegɔ radio stationdoma n deŋɛ nɛŋa Canada tiŋa poan. Yuun 1925 poan, la yuun nari ti ba ɛ zɛ’an n yalegɛ. Bala la, Watch Tower Society la n yuun biseri station wa ge nyaa tee tari ku keŋɛ Regent Building n boi Saskatoon n de zɛsɛka ti ba da ge malum maalɛ ku ti ba tara tuna radio tuuma.

Station wa zuo ti nɛreba zo’e zo’e n boi Saskatchewan tinkpɛsi wum yelesoma la. Makerɛ, tinkpɛŋa ayima poan, pɔka yu’urɛ n de Mrs. Graham n yuun kelese station la ge nyaa gulesɛ gɔŋɔ bo ba ti ba bo en Baabule gɔŋɔ. Mabia George Naish yeti, “Eŋa n yuun eeri gɔŋɔ la yuun dela a tɔtɔ yele ti to me yuun eŋɛ kalam dekɛ Studies in the Scriptures la za’a bo en.” La yuun ka yue ti Mrs. Graham yuun kɔ’ɔn pɔsɛ mɔɔla Na’am yelesum la yiregera zɛ’an woo.

TO YUUN ZAMESƐ LA NINMU’URƐ YELE

March 1, 1925 The Watch Tower la tari la zaseŋɔ yele n de “Birth of the Nation.” Beni n sɔi ti zaseŋɔ yele wa yuun pakɛ? Baabule Zamesegɔdoma la yuun mi ti Sitaana n sɔi kolekpabɛ’ɛsi, pumpɔreŋɔ pu’usegɔ, gɔmɛtdoma la leebego tiga bisera. Ge sakerɛ la yɛm yameŋa la yuun doose la zaseŋɔ wa poan soŋɛ mabiisi la ti ba bɔkɛ ti Yehowa tari la tigere. Tigere wa boi la de to’ore la Sitaana tigere la ge ku me ka nam bo Sitaana tigere la. (Mt. 24:45) Leyɛ’ɛsa, yameŋa la tɔɣɛ pa’alɛ ti Naayinɛ Na’am la pɔsɛ bisega la yuun 1914. Yuun kaŋa mea nɔɔ poan, ‘zaberɛ n yuun kɔ saazuo sa’ ti ba yuun sa’ɛ Sitaana la a kolekpabɛ’ɛsi la basɛ tinparɛ wa zuo na.—Lil. 12:​7-9.

La yuun kpe’em bo basɛba mɛ ti ba sakɛ pa’alegɔ wa. Bala la, zaseŋɔ yele la yuun yeti, “Sɛba n kaali The Watch Tower wa san ka sakɛ bo pa’alegɔ wa, la nari ti ba tara sakerɛ pu’usa Yehowa, di’isa suure ge dekɛ bamea delum en.”

Tom Eyre, n ze’ele Britain ge dɛna colporteur (ti nananawa ba yi’ira sore ŋmɛ’adaana) la yuun tɔɣɛ pa’alɛ lan yuun ani Baabule Zamesegɔdoma la zo’e zo’e se’em la zaseŋɔ yele wa. A yeti: “Mabiisi la puurɛ yuun pee mɛ la ban pa’alɛ Liligere 12 se’em la. Ton yuun bɔkɛ ti Naayinɛ Na’am la pɔsɛ bisega saazuo la, to puurɛ yuun pee mɛ ti to mɔɔlɛ yelesoma la bo nɛreba. La yuun kpemese to giila ti to kɔ’ɔn bɔta ti to mɔɔla ge me soŋɛ tɔ ti to baŋɛ ti Yehowa wan tum yelekiresi zo’e zo’e beere sa’am.”

BA YUUN DITI LA SƐƐRA BƆ’ƆRA YEHOWA

Zina beere wa, Yehowa Sɛɛradoma me kɔ’ɔn tɔɣera la sɛla n boi Isaiah 43:10 la: “Na’ayenɛ yeti, N nɛreba wa, yamam [n de] mam yameŋa wa te n loe wa n de mam seradoma.” Ge ba yuun ka tɔɣeri Isaiah 43:10 la yele to gɔnɔ la poan san daɣena yuun 1925 poan. Bala yuun yeti la tee mɛ. Yuun 1925 poan, to yuun zamesɛ la Isaiah 43:10 la 12 The Watch Tower sugumnɔɔrɛ 11 poan!

August yuun 1925 n yuun ta pɔ̃ra ba’asegɔ la, Baabule zamesegɔdoma la yuun eŋɛ la laɣesegɔ Indianapolis, Indiana tiŋa. Mabia Joseph F. Rutherford yuun gulesɛ la sɛla bo sɛba woo n boi laɣesegɔ la poan la. Sɛla ti a yuun gulesɛ la boi la laɣesegɔ yeletigesego gɔŋɔ la poan. La yeti: “To wa’an laɣesegɔ wa na ti to nyɛ la . . . paŋa to Daana la zɛ’an ta’an lebe kule ta mɔɔlɛ na’am yelesoma la.” Dabesa anii laɣesegɔ la za’a, ba kpemese nɛra woo giila ti ba dekɛ yɔ’ɔ woo tɔɣera Yehowa yɛla bɔ’ɔra nɛreba.

Asibidaarɛ, August 29, Mabia Rutherford yuun bo la yetɔɣum zuo n de “Kɔ’ɔn Mɔɔla Ya.” A yuun tɔɣɛ pa’alɛ la yele n pakɛ se’em ti to mɔɔla: “Yehowa yele a nɛreba yeti . . . : ‘Yamam n de mam seradoma. . . Mam n de Yenɛ.’ A le bo la nɔɔrɛ ti la niɛ peelumi yeti: ‘Zɛnkɛ [bu] sɛ danlehom bo teŋhe la.’ Nɛresɛba ma’a n wan ta’an di sɛɛra bo Yehowa dela a nɛreba la, se’ere n sɔi la a tari la a zilam vo’osum la soŋera ba.”—Isa. 43:12; 62:10.

Mabia Rutherford n yuun bo a yetɔɣum la ba’asɛ la, a yuun kaalɛ la yelese’a ti ba yeti ba naɛ nɔɔrɛ dekɛ tum tuuma ti la zuo dɛna “Message of Hope,” n pa’ali ti Naayinɛ Na’am la ma’a n wan basɛ ti to nyɛ kã’a beere sa’am n de wuu “suma’asum, taresum, imma’asum, vom, fai bɔŋa la pupeelum.” Ba yuun lerege yelese’a ti ba yeti ba naɛ nɔɔrɛ dekɛ tum tuuma la yetɔɣum zo’e zo’e poan ge me printɛ ku gɔnpika poan ti ba tara tuna tuuma na’am mɔɔlegɔ poan. Ba yuun tɔ̃rɛ gɔnpika wa paɛ la tusa tusa 40.

Baabule Zamesegɔdoma la yuun nan ka yi’iri bamea ti Yehowa Sɛɛradoma. Ge ba yuun bɔkeri ba zugbere tuunɛ n de ba mɔɔla la mɛ.

BA YUUN NI LEBE TA BISƐ PUTƐSONƐDOMA LA MƐ

Baabule Zamesegɔdoma la n yuun zo’ori tingɔŋɔ wa poan la zuo, ba yuun kpemese ba giila ti ba ni lebe ta bisɛ putɛsonɛdoma la n boti yelesum la. Ban yuun bo nɔɔrɛ ti ba ɛ tɔ̃rɛ gɔnpika la zuo n de Message of Hope la, Bulletina la yuun yeti: “Lebe ya ta kaɛ bisɛ yɛa se’a ti ba dekɛ gɔnpika la zuo n de Message of Hope bo la.”

January 1925 Bulletin la tɔɣɛ Baabule Zamesegɔdaana ayima n ze’ele Plano, Texas n yuun yele sɛla. A yeti: “To san ni lebe ta bisɛ nɛresɛba ti to ni puɣum mɔɔlɛ bo ba la, ba ni kelese la soŋa gana sɛba ti to nan ka mɔɔlɛ bo ba la. To nyaŋɛ lebe ta kaɛ tinpika n boi to gingilega la poan sugumnɔɔrɛ bunuu yuun pia poan. . . . La ka yue ti mabipɔka Hendrix la mam ma lebe tiŋa la poan ta bo gɔnɔ zo’e zo’e ti la ka tara makerɛ.”

Panama tiŋa poan, buraa ayima n de colporteur yeti: “Nɛreba zo’e zo’e ni zaɣesɛ mɛ ti ba kan kelese mam pɔsega daarɛ la ge mam san ni lebe ba zɛ’an, ba puti’irɛ ni tee mɛ. Yuunɛ wa poan, mam dekɛ n saŋa la zo’e zo’e ɛɛra kaara la sɛba ti mam yuun puɣum mɔɔlɛ bo ba la. Mam n nyɛ yelese’a nɛreba la zɛ’an la basɛ ti mam puurɛ pee mɛ.”

TI’ISA BEERE SA’AM YELE

Mabia Rutherford n yuun ni gulesɛ yuunɛ woo gɔŋɔ bo colporteurs la, a yuun ni tɔɣɛ ban nyaŋɛ tum sɛla yuunɛ la poan ge ni pa’alɛ ba tuunse’a n gã ba nɛŋan. A yeti: “Yuun sɛka n tole la, ho nyɛ la yɔ’ɔ buɣelɛ sɛba suure n sa’am la. Tuunɛ wa basɛ ti ho puurɛ pee mɛ paa . . . Yuunɛ wa poan ho wan nyɛ yɔ’ɔ zo’e zo’e mɔɔlɛ na’am la yɛla ge me pa’alɛ sɛba n sirum de Naayinɛ nɛreba. . . . Basɛ ya ti to yuum ya pɛ̃ɣɛ Naayinɛ la to Naba la.”

Yuun 1925 n yuun ye ba’asegɔ la, mabiisi la yuun eŋɛ la maaseŋɔ ti ba yalegɛ Brooklyn Betel. Yuun 1926 ti ba pɔsɛ mɛa tuunɛ wa. Mɛa kana n tabelɛ dɛna mɛa tuunkãtɛ ti to tigere la tum.