Ba Loe La Mabiisi Bayi Pa’asɛ Tigere Zuo Bisegadoma La Poan

OCTOBER 5, 2024, ti ba daa bo lasebaarɛ yuunɛ woo sɔsega la poan ti to Mabia Jody Jedele la Mabia Jacob Rumph nyaa pa’asɛ la Tigere Zuo Bisegadoma la poan. Yuuma zo’e zo’e n wana ti to mabiisi wa tara sakerɛ pu’usa Yehowa.

Ba dɔɣɛ Mabia Jedele la Missouri, U.S.A. A dɔɣereba dela Yehowa Sɛɛradoma. A deodoma yuun kɛ̃’ɛri lɛm la zɛsɛka n eeri soŋerɛ ti mabiisi zo’e zo’e yuun ni wa’ana soŋɛ. Bala zuo la, a yuun seke la mabiisi zo’e zo’e n ze’ele zɛ’ɛsi to’ore to’ore n ni wa’an bim na mɔɔla. Mabiisi la n yuun tari nɔŋerɛ la nɔyinɛ se’em la yuun kɛ̃ la a suure. A yuun muse ko’om la October 15, 1983. A yuun keni na’am mɔɔlegɔ mɛ paa. Eŋa n yuun ba’asɛ high school September 1989 la ti a pɔsɛ sore ŋmɛ’a tuuma.

Mabia Jedele n yuun de bia la, a dɔɣereba ni tari la eŋa la a tã keŋɛ ti ba ta bisɛ Betel. Bala yuun soŋɛ eŋa la a tã la mɛ ti ba bɔta ti ba ta tuna Betel. Pooren, ba yuun ta tuna la Betel. Mabia Jedele yuun keŋɛ Wallkill Betel la September 1990. A yuun tuni la Duusegɔ Yɛla Wele la ge nyaa ta tuna Imma’asum Yɛla Wele.

Sankaŋa la, Spain yetɔɣum tansuga yuun eeri la mabiburaasi ti ba soŋɛ ba. Bala la, Mabia Jedele yuun zamesɛ la Spain yetɔɣum nyaa ta bɔna tansuga la ayima poan. La ka yue ti a nyɛ Damaris me n de sore ŋmɛ’adaana ge me bɔna ba gingilega la poan. A yuun di en ti ba nyaa naɛ taaba bɔna la Betel.

Yuun 2005 poan, ba yuun yese Betel mɛ ti ba ta bisera ba dɔɣereba n kuregɛ. Sankaŋa la, ba yuun dela sore ŋmɛ’adoma. Mabia Jedele yuun soŋɛ mɛ pa’ala Sore Ŋmɛ’adoma Sukuu poan. A me yuun soŋeri la Imma’asum Yɛla Bisegadoma, la Regional Building Committee.

Yuun 2013, ba yuun yele Mabia Jedele la a pɔɣa ti ba wa’an Betel na soŋɛ Warwick mɛa tuuma la. Kɔ’ɔn ze’ele sankaŋa, ba le keŋɛ la Patterson la Wallkill ta tum. Mabia Jedele tum la Local Design/Construction Department, la Hospital Information Services. March 2023 ti ba yuun loe en ti a dɛna Na’am Tuuma Bisegadoma Soŋera. Tuunse’a za’a ti Mabia Jedele nyaŋɛ tum la, a yeti: “Ba san bo ho tuunɛ ti ho tum, ho paleŋa ta’an ɛ̃kɛ ti ho ka mina hon wan tum de se’em. Ge sankaŋa n nari ti ho dekɛ homea delum Yehowa se’ere n sɔi la, eŋa n basɛ ti la ita.”

Ba dɔɣɛ Mabia Rumph la California, U.S.A. Eŋa n yuun de bia la, a ma yuun ma’ɛ mɛ ge a yuun kelum tiregera mɛ ti a pa’ala en Baabule yɛla. Yuunɛ woo, a ni tiregɛ keŋɛ ta bisɛ la a mayaaba n de Yehowa Sɛɛradaana. A mayaaba la yuun soŋɛ en mɛ ti a puurɛ pee la yelemɛŋɛrɛ la. Bala la, eŋa n yuun de yuun 13 la ti a basɛ ti nɛra zamesa en Baabule la. September 27, 1992 ti a muse ko’om. A ma me yuun le pɔsɛ kena na’am mɔɔlegɔ mɛ ti ba deodoma sɛba n gee la za’a yuun nyaa nyɛta nɛŋa tɔlega ta muse ko’om.

Mabia Rumph n yuun de bunbilipaalega la, a yuun nyɛ sore ŋmɛ’adoma n tari pupeelum se’em. Bala la, eŋa n yuun ba’asɛ high school September 1995 la ti a pɔsɛ sore ŋmɛ’a tuuma. Yuun 2000 ti a keŋɛ Ecuador ta soŋera zɛsɛka n eeri na’am mɔɔlegɔdoma zo’e zo’e. Bilam ti a seke Inga n de sore ŋmɛ’adaana ze’ele Canada. Pooren ti a di en. Ba yuun keŋɛ la Ecuador tinpika ayima poan ta soŋera. Na’am mɔɔlegɔdoma fii ma’a n yuun boi bim. Nananawa, tansugere la kɔ’ɔn nyɛ la nɛŋa tɔlega.

La yuun ka yue ti ba loe Mabia Rumph la a pɔɣa ti ba dɛna sore ŋmɛ’adoma n boi ba to’ore. Pooren ti ba yuun nyaa ta tuna kaarɛ tuuma la. Yuun 2011 ti ba beem ba ti ba keŋɛ Gilead kilaasi sɛka n pa’asɛ 132 la. Ban yuun ba’asɛ sukuu la, ba keŋɛ la tisi zo’e zo’e ta tum tuuma to’ore to’ore. Makerɛ, ba yuun keŋɛ ta tum la Betel, tum satiŋa na’am yetɔɣum yalegerɛ tuuma, la kaarɛ tuuma. Mabia Rumph me yuun nyɛ yɔ’ɔ mɛ pa’ala Na’am Mɔɔlegɔdoma Sukuu poan.

COVID-19 bã’a la zuo, ba yuun basɛ ti Mabia Rumph la a pɔɣa lebe la United States. Ba yuun boi la Wallkill Betel. Bilam ti ba yuun kumesɛ Mabia Rumph Na’am Tuuma Wele la poan. Pooren, ba yuun tari ba lebe la Ecuador tigere yile la poan ti Mabia Rumph nyaa ta pa’asɛ Tigere Yile Bisegadoma la poan. Yuun 2023, ba yuun tari ba lebe la Warwick. January 2024 ti ba loe Mabia Rumph ti a dɛna Na’am Tuuma Bisegadoma Soŋera. Eŋa n tiisɛ eŋa n nyaŋɛ keŋɛ zɛse’esi ta tum la, a yeti, “La daɣɛ hon boi zɛsɛka tuna la n basɛ ti ho tuunɛ la bɔna de to’ore ge la dela nɛresɛba ti ho naɛ la ba tuna la.”

To puurɛ pee mɛ la mabiisi wa n ãregeri bamea tuna se’em la. To wan bɔ’ɔra “nɛrebama taaba woo na’ahegɔ.”—Flp. 2:29.