Baabule La Yeti Bem La Nɛreba N Ti’isɛ Ti World Cup Wan Ta’an Basɛ Ti Nɔyinɛ Bɔna La?

Nɛreba n de wuu tus tustusa anuu n wan bisɛ FIFA World Cup la kɔ’ɔn pɔsɛ November 20 ta paɛ December 18, 2022. Nɛreba zo’e zo’e tari puti’irɛ ti la wan basɛ ti sɛba n biseri boole la tara nɔyinɛ. Ge daɣɛ bala ma’a.

• Nelson Mandela, n yuun de South Africa president yeti: “Sports wan ta’an tee tingɔŋɔ wa. La ta’an basɛ ti nɛreba puurɛ pee. La ta’an basɛ ti nɛreba tara nɔyinɛ.”

• Gianni Infantino n de FIFA president yeti: Boole basɛ ti nɛreba tara la nɔyinɛ se’ere n sɔi la, la basɛ ti ba tara la “putɛsonɛ, pupeelum la nɔŋerɛ ge me wan ta’an naɛ taaba la ka pakɛ la ban ze’ele zɛ’an.”a

World Cup la bii sports deene wan ta’an basɛ ti yele ana za’a eŋɛ? To wan ta’an tara suma’asum la nɔyinɛ?

World Cup la sirum basɛ ti nɔyinɛ bɔna mɛ?

Yuunɛ wa World Cup la daɣɛ boole ma’a yele. De’eŋo la basɛ ti nɛreba zo’e zo’e tɔɣera la yɛla n de wuu nalɛɣerɛ yɛla, asaala woo n tari yɔ’ɔ ti a eŋɛ sɛla, nɛreba nɛ’ɛsegɔ la nɔŋɔ yele.

Hali la bala za’a, nɛreba zo’e zo’e nɔŋɛ la ba bisa sports yɛla n de wuu World Cup la. Ge yele ana wa kan ta’an basɛ ti nɔyinɛ bɔna wuusa wuu nɛreba n ti’isɛ se’em la. Yele ana tuɣum basɛ ti yelesego n bɔna. Baabule la yeti yele ana wan pa’alɛ ti to boi la ‘ba’asegɔ dabesa la.’​—2 Timoti 3:1-5.

Nɔyinɛ Wan Sirum Bɔna Tingɔŋɔ Wa Za’a

Baabule la pa’alɛ ti nɔyinɛ wan bɔna tingole wa za’a. La pu’ulumbiŋe ti nɛresaaleba za’a wan ta tara nɔyinɛ saazuo gɔmɛt n de ‘Naayinɛ Na’am la’ poan.​—Luke 4:43; Matu 6:10.

Yezu Krista n de Na’am la Naba la wan basɛ ti suma’asum bɔna tingɔŋɔ wa za’a. Baabule la yeti:

• ‘Tontɔɔ vom la suma’asum wan bɔna zɛ’an woo, ka tara ba’asegɔ.’​—Yooma 72:7.

• ‘A wan faaɛ sɛba n naseri ge kaasa ɛɛra soŋerɛ la basɛ. A wan faaɛ ba namesegɔ la gbiregere tuuma poan basɛ.’​—Yooma 72:12, 14.

Hali zina beere wa, Yezu pa’alegɔ basɛ ti nɛreba tustusa n boi tisi 239 poan tara la nɔyinɛ. Ba nɔŋɛ nɛra woo mɛ. Ho san bɔta ti ho zamesɛ yɛla pa’asɛ, kaalɛ zaseŋɔ yɛla la zuo n de “Breaking the Cycle of Hatred.” (Nɛreba Kan Le Dina Taaba)