Baabule La Yeti Bem La Ko’om N Eŋɛ Nɔŋɔ Se’em Tingole Wa Za’a Poan La?
To za’a waabi nari ti to tara kosomɔ ta’an vɔna. António Guterres n de UN Secretary-General la yeti: “Nɛra woo n kɔ’ɔn ɛɛra ko’om tingɔŋɔ wa za’a poan la zuo, la kan yue ko’om nɔŋɔ wan bɔna.” La kpe’em bo nɛreba tusa tusa n boi tingɔŋɔ wa za’a poan ti ba nyɛ kosomɔ.
Strdel/AFP via Getty Images
To wan ta tara ko’om n wan seke nɛra woo? Bii ko’om nɔŋɔ wan kɔ’ɔn bɔna mɛ? Baabule la yeti bem?
Baabule la n tɔɣɛ ko’om n wan ta bɔna yele se’em
Baabule la pa’alɛ ti saŋa wan ta bɔna ti la kan kpe’em ti to nyɛta ko’om. Yelemɛŋɛrɛ, kosomɔ wan ta bɔna zɛ’an woo.
‘Ko’om wan bula goo poan, ti bɔɣesi bɔna pɔɣetia poan. Tontɔnɔ tuulega la wan lebege kolaa ge ti tinsɛka n ku’ɛ wan bula la ko’om ma’a.’—Isaiah 35:6, 7.
Beni n sɔi ti to tara sakerɛ Baabule pu’ulumbiŋere wa poan? Geele Baabule la n tɔɣɛ Naayinɛ n maalɛ to planet ayima yele se’em.
Baabule la n tɔɣɛ tingɔŋɔ la, la ko’om n teere niira saa yele se’em
‘Naayinɛ ka naam tingɔŋɔ la basɛ yoo ge a naam ku mɛ ti nɛreba bɔna bim.’—Isaiah 45:18.
Naayinɛ n na’am tingɔŋɔ la ti to vɔna ka poan la zuo, a maasum la yɛla ase’a n basɛ ti to nyɛta ko’om zo’e zo’e.
‘Naayinɛ ve’ere la ko’om la zɔna; ti a koyɔra la ni lebege saa; sangbana la nyaa ka’ɛ basɛ na; nyaa niira basera asaala zuo.’—Yob 36:27, 28.
Gulesegɔ wa pa’alɛ ti Naayinɛ eŋɛ la maaseŋɔ ti saa niira ti to ta’an nyɛta ko’om. Ko’om n boi ateko bii tiŋa wa zuo la ni ve’e keŋɛ la saazuo, nyaa ni lebege saa ka’ɛ basɛ na. Wana basɛ ti asaaleba la dusi za’a nyɛta la kosomɔ saŋa woo.—Pa’ala 1:7; Amos 5:8.
‘Mam wan basɛ ti saa ni lan nari se’em ti dia maalɛ ti tiisi wɔm.’—Malema 26:4.
Diimi Israeldoma la yuun kɔ’ɔn dɛna la kaareba. Naayinɛ yuun pu’ulum biŋe ti a wan kã bo ba ti saa niira ti ba dia ta’an maalɛ soŋa. A mi ti dia san wan maalɛ, la dela saa niira sansɛka n nari poan.
La kan yue, Naayinɛ n yuun eŋɛ sɛla bo Israeldoma la, a wan eŋɛ bala mea nɔɔ tingɔŋɔ wa za’a zuo. (Isaiah 30:23) Ge sankaŋa n nan ka paɛ la, tingɔŋɔ wa zɛ’ɛsi zo’e zo’e ti nɛreba ka nyɛta ko’om ti saa me ka niira. Bem ti Baabule la le yeti la wan maalɛ ko’om nɔŋɔ n boi zina beere wa la?
Ko’om nɔŋɔ n kan le ta bɔna se’em
Baabule la pa’alɛ ti Naayinɛ Na’am la wan yese yeledaaŋɔ se’a woo n paari to planet la ti ko’om nɔŋɔ n boi zina beere wa me laɣum pa’asɛ. (Matu 6:9, 10) Naayinɛ Na’am la dela saazuo gɔmɛt n wan bisera tingɔŋɔ wa za’a waabi. (Daniel 2:44; Liligere 11:15) Leyɛ’ɛsa, Naayinɛ Na’am la wan eŋɛ sɛla ti asaala gɔmɛt kan ta’an eŋɛ n de a yese yelese’a n ta’asɛ ti nɛreba ka nyɛta ko’om la.
Yeledaaŋɔ: Yeledi’ima basɛ ti la kpe’em mɛ ti ko’om tee ni saa. Wana basɛ ti warɛ n bɔna. Sakãtɛ me n ni ta ni se’em, la ateko ko’om n ni ta pirɛ labasɛ ti ko’om ni dita sa’ana lɔɣɔrɔ mɛ.
Lan wan maalɛ se’em: Naayinɛ Na’am la wan maalɛ tingɔŋɔ la n sa’am se’em la ti la le ana soŋa. Naayinɛ yeti: ‘Bisɛ! Mam iti sɛla woo la paalega.’ (Liligere 21:5) Ko’om zo’e zo’e wan ta bɔna daɣelega zɛ’an ge basɛ ti vom ana soŋa, hali la zɛse’esi ti to kan ta’an kɛ̃’ɛra bim zina wa la. (Isaiah 41:17-20) Yezu n wan ta dɛna Naayinɛ Na’am la bisegadaana la wan yese yeledi’ima basɛ.
Yezu n yuun boi tingɔŋɔ wa zuo la, a yuun basɛ ti kusebego ana la siim ti la pa’alɛ Naayinɛ n bo en paŋa se’em. (Mark 4:39, 41) Krista n de Naayinɛ Na’am la Naba la bisega poan, yeledi’ima kan le bɔna. Nɛreba wan ta tara suma’asum la gu’a ge kan zɔta yeledi’ima.
Yeledaaŋɔ: Nɛresɛba n ka ti’iseri ba itigɔ la n ta’asɛ yelese’a, la nɛŋadoma n tari punyã’anɛ sa’ani la kolaasi la bulesi ko’om. Wana basɛ ti kosomɔ ka le bɔna.
Lan wan maalɛ se’em: Naayinɛ wan maalɛ tinparɛ la ge basɛ ti ku kolaasi, ateko ko’om la ku tontɔnɔ ana soŋa. Baabule la yeti: ‘Daɣelega zɛ’an wan tara pupeelum, ti pɔɣetia poan wan nyɛɛna ge maalɛ soŋa wuu puuro la.’—Isaiah 35:1.
Bem n wan paɛ sɛba n ka biseri tinparɛ la soŋa ge ka ti’isa nɛreba yele la? Naaynɛ pu’ulum biŋe ti a wan ‘sa’am sɛba n sa’ani tinparɛ la.’—Liligere 11:18; Magaha 2:21, 22.
Yeledaaŋɔ: Nɛresaleba ka tari ko’om tuna soŋa, ti bala basɛ ti ba sa’ana la ko’om zo’e zo’e gana tingɔŋɔ la n wan ta’an bo to ko’om se’em la.
Lan wan maalɛ se’em: To puurɛ pee mɛ la Naayinɛ Na’am la n wan ta basɛ ti a puti’irɛ n boti sɛla ‘tum tinparɛ wa zuo’ ge daɣɛ nɛresɛba n de punyã’anɛdoma la n boti sɛla la. (Matu 6:9, 10) Naayinɛ wan pa’alɛ a nɛreba soŋa soŋa a Na’am la poan. Isaiah 11:9 yeti, ‘Tingɔŋɔ wa wan pirɛ la Yehowa mi’ilum.’a Mi’ilum kaŋa la nɔŋerɛ zo’e zo’e ti nɛresaaleba wan ta tara bɔ’ɔra Naayinɛ la a naaŋɔ lɔɣɔrɔ la wan basɛ ti ba bisera to planet la, la sɛla woo n wan bɔna ka poan la soŋa soŋa.
Ho san bɔta ti ho baŋɛ Naayinɛ Na’am la n wan eŋɛ sɛla pa’asɛ, kaalɛ zaseŋɔ yele la zuo n de “What Will God’s Kingdom Accomplish?” (Naayinɛ Na’am La Wan Eŋɛ La Bem?)
Kaalɛ Baabule gɔŋɔ la n de Isaiah, a zuo 35 ge baŋɛ tingɔŋɔ la n wan lebege paradiise se’em.
Bisɛ vidiyo la zuo n de Beni Zuo Ti Naayinɛ Naam Teŋgɔŋɔ Wa? ta’an baŋɛ Naayinɛ puti’irɛ n de se’em bɔ’ɔra tingɔŋɔ wa la nɛresaaleba.
a Yehowa dela Naayinɛ yumɛŋɛrɛ. (Yooma 83:18) Kaalɛ zaseŋɔ yele la zuo n de “Ani N De Yehowa?”