**Baabule La Yeti Bem La Nuclear Zaberɛ?**

Dabeem yele la dela, nuclear zaberɛ ta’an kɔ, sɛla n sɔi la tisi n tari kpe’eŋo tari la nuclear zaberɛ lɔɣɔrɔ ge kelum maala basɛba pa’asa. Nɛreba paleŋa n ɛ̃ɣeri ti nuclear zaberɛ lɔɣɔrɔ n zo’e se’em la zuo, la wan ta basɛ ti nuclear zaberɛ bɔna. Hali nɛreba paleŋa ɛ̃ɣeri mɛ ti tiŋa kayima san puɣum lobe nuclear bomb pika ayina, bala ta’an basɛ ti nɛreba dekɛ nuclear zaberɛ lɔɣɔrɔ zabɛ sa’am to tingɔŋɔ wa. Bulletin of the Atomic Scientists gɔŋɔ la yeti to boi la sansɛka ti “nuclear zaberɛ ta’an kɔ.”

Nuclear zaberɛ wan ta’an kɔ yoi? La san dɛna bala, tinparɛ wa wan piɛ̃ sa’aŋɔ? To wan eŋɛ la wani kan ba’ɛ fabela nuclear zaberɛ yele? Baabule la yeti bem?

Zaseŋɔ yele wa poan to wan geele sokere ana wa

**Baabule la tɔɣɛ nuclear zaberɛ yele yoi?**

Baabule la ka tɔɣɛ nuclear zaberɛ yele wana mɔpi. Ge Baabule la pa’alɛ la nɛreba hala, la yelese’a n wan ta ita. Yele aŋa me ta’an basɛ ti nuclear zaberɛ kɔ.

Dekɛ Baabule kaalegɔ zɛ’ɛsi wa n yele sɛla la makɛ la yelese’a n iti zina beere wa:

Baabule kaalegɔ zɛ’ɛsi: Yezu podɔleba la yuun soke en yeti: ‘Bem n wan daalɛ pa’alɛ ho saŋa la, la tinparɛ wa ba’asegɔ yɛla?’ Yezu yuun lebese yeti: “Teŋa kayema wan ihege zabɛ la teŋa kayema, te sɔ’ɔlom me deyema wan ihege zabɛ la sɔ’ɔlom deyema.”—Matu 24:3, 7.

Tingɔŋɔ wa yɛla: Tinse’esi n ta’an maala nuclear zaberɛ lɔɣɔrɔ la, saŋa zo’e zo’e ba ni nɔŋɛ la ba zabera.

“Yuuma ana wa poan, gbiregeri la zaberɛ kɔ’ɔn zo’e mɛ paa.”—The Armed Conflict Location & Event Data Project.

Baabule kaalegɔ zɛ’ɛsi: “Ba’ahegɔ saŋa la poan, Gɔbega teŋa naba la wan zabɛ la Zuɔ teŋa naba.”—Daniel 11:40.

Tingɔŋɔ wa yɛla: Baabule la tɔɣɛ biŋe ti tisi wan zabera la taaba ti ba pa’alɛ se’em n tari paŋa, la me sirum ani la bala. La boi bim ti sɛba n tari nuclear zaberɛ lɔɣekãra la ka tari zabera taaba ge ba kɔ’ɔn maala la nuclear zaberɛ lɔɣese’a n tari paŋa.

“Yuuma pia n tole, tisi zo’e zo’e n kɔ’ɔn zabera la taaba, hali ti tinse’esi n tari paŋa paa laɣum soŋera zaberɛ la.”—The Uppsala Conflict Data Program.

Baabule kaalegɔ zɛ’ɛsi: “Teŋa ba’ahegɔ dabeha la han ta pɔnra, la wan kpe’em bo nɛreba. Se’ere n sɔe la, toonbe’erodoma . . . [kan tara nɔyinɛ, sa’ana nɛreba yu’ura, ka tara nyɔkɛ n mea, tuna gbirigbiri tuuma.]”—2 Timoti 3:1-3.

Tingɔŋɔ wa yɛla: Wuu nɛreba zo’e zo’e n ka tari nɔyinɛ la taaba se’em la, bala mea ti saŋa ase’a nɛŋadoma ka tara nɔyinɛ la taaba. Ban wan tuɣum maalɛ ni ba yɛla suma’asum poan la, ba ni tuɣum vuusa la taaba. Yele ana n basɛ ti la ka kpe’em ti nuclear zaberɛ la pɔsɛ.

“To san ka mina ton wan naɛ taaba tuna soŋa se’em, gbiregeri wan kɔ’ɔn bɔna mɛ.”—S. Saran la J. Harman, World Economic Forum.

**Naayinɛ wan bo yɔ’ɔ ti nuclear zaberɛ kɔ?**

Baabule la ka pa’alɛ. La yeti yɛla n tari “dabeem” wan ita tomam dabesa wa poan. (Luke 21:11) Makerɛ dela ban yuun lobe atomic bombedoma Tingɔŋɔ Wa Za’a Zaberɛ Buyi la poan la. Baabule la pa’alɛ sɛla zuo ti Naayinɛ bo yɔ’ɔ ti zaberɛ bɔna. Ho san bɔta ti ho baŋɛ yɛla pa’asɛ, bisɛ vidiyo la zuo n de Beni N Sɔi Ti Naayinɛ Bo Yɔ’ɔ Ti Namesegɔ Bɔna?

Tinparɛ wa wan piɛ̃ sa’aŋɔ?

Ɛɛ. Nɛreba san puɣum tara nuclear zaberɛ lɔɣɔrɔ zabera, Naayinɛ kan bo yɔ’ɔ ti ba dekɛ sa’am tinparɛ wa za’a. Baabule la yeti tinparɛ wa wan pĩɛ sa’aŋɔ ti nɛreba me bɔna ka poan daarewoo.

“Teŋparɛ wa gan la bala yɛ’ɛha.”—Pa’ala 1:4.

“Yenɛ n naam saazuo la teŋparɛ wa, . . . nɛreba wan ta’an bɔna ka poan. A ka maalɛ ka te ka dɛna pɔgɔtia.”—Isaiah 45:18.

Nɛreba basɛba ti’isɛ ti beere sa’am nɛreba fii n wan ta bɔna tinparɛ wa poan. La me wan kpe’em bo ba ti ba bɔna bim se’ere n sɔi la nuclear zaberɛ wan sa’am tinparɛ la. Ge Baabule la pa’alɛ ti sɛla woo n basɛ ti tinparɛ la sa’am la, ba wan maalɛ ka ti ka ana soŋa.

“Pɔgɔtia teŋhe wan tara popeelom, teŋsɛka te se pue mɔɔ ka puhura ka poan la wan bule tiihe te se pue wɔla.”—Isaiah 35:1.

Nɛreba puurɛ n pee ti ba naɛ taaba tuna paradiisi poan tingɔŋɔ wa zuo. — Naayinɛ boti la to tara pupeelum bɔna tinpaalega poan

To Naaŋɔdaana la maalɛ tinparɛ wa mɛ ti ka ta’an tibera kamea. To me mi ti Naayinɛ wan dekɛ a paŋa la maalɛ tinparɛ la ti la dɛna zɛsoŋa bɔ’ɔra asaaleba ti ba kɛ̃’ɛra wuusa.—Yooma 37:11, 29; Liligere 21:5.

**Ho wan eŋɛ la wani kan ba’ɛ fabela nuclear zaberɛ yele?**

Nɛreba basɛba ta’an fabela nuclear zaberɛ la yele. Ba zoti la nuclear zaberɛ la n wan ta’asɛ yelese’a la. Baabule ka’aŋɔ, la pu’ulumbiŋere yɛla la ta’an soŋɛ sɛba n zoti dabeem la ti la ana ba mama. Wani wani?

Baabule la pa’alɛ tinparɛ la n wan ta ana se’em bɔ’ɔra sɛba n wan bɔna bim la. To beere sa’am puti’irɛ wa wan ta’an dɛna ‘ba’arɛ n bo’ori to vom’ ge soŋɛ tɔ ti to kan ba’ɛ fabela. (Hebru 6:19) Sɛla n wan le soŋɛ tɔ ti to kan ba’ɛ fabela dela to basɛ ti to puti’irɛ bɔna dabeserɛ la poan yɛla ge daɣɛ yelese’a n wan ta’an ta eŋɛ beere sa’am. Wuu Yezu n yele se’em la, “da dekɛ ya beere yɛla lagom la zina wa yɛla.”—Matu 6:34.

La yele pakɛ mɛ ti to bisa tomea soŋa lan wan eŋɛ se’em ti to ti’isa soŋa soŋa ti la ta’an ana to mama. To san wan ta’an ita bala, la ka nari ti to ba’ɛ kaala, bisa, bii kɛlesa yelese’a n wan basɛ ti putɛyiila tara tɔ. Yele ana wa ta’an dɛna nuclear zaberɛ la yɛla, la nɛreba n tɔɣeri zaberɛ lɔɣɔrɔ la yele se’em. Wana ka pa’alɛ ti to buri la poore basɛ yelese’a n iti la. Ge to soŋeri la tomesi lan wan eŋɛ se’em ti to kan fabela saŋa woo la yelese’a n iti la bii yelese’a n ta’an kan eŋɛ.

“Dabeem lobere la nɛra, ge yetɔgɔsomɔ bo’ore en la nyeeŋɔ.”—Magaha 12:25.

Dekɛ ho saŋa la ti’isa yelesoma ge daɣɛ susa’aŋɔ yɛla.

“Yenɛ se’em n bahere te nɛreba din’inha sunya gura, bahɛ ya te ya tara popeelom la sunma’ahom yan nam en se’em la zuo.”—Arom 15:13.

Fɔɔra: Buraa n eŋɛ pa’alɛ ti a tari sakerɛ. 1. Zaberɛ n boi pooren sa ti alupele, la nuclear zaberɛ lɔɣɔrɔ ze’a bim ge ti ba lobe bombedoma ti zu’usi gulegera. 2. Ge sɛla n boi a nɛŋan la dela zɛ’an n ani soŋa ti zɔya, kulega la niisi bɔna.. — Baabule la basɛ ti to tara sakerɛ ti beere sa’am wan ta ana soŋa

Ho san bɔta ti ho tara beere sa’am puti’irɛ, pupeelum la suma’asum, zamesɛ Naayinɛ pu’ulumbiŋ’a yɛla la pa’asɛ.

**Baabule la tɔɣɛ biŋe ti ba wan dekɛ nuclear zaberɛ lɔɣɔrɔ zabɛ Armagedon poan yoi?**

Nɛreba basɛba ti’isɛ ti Armagedon dela nuclear zaberɛ n wan kɔ tingɔŋɔ wa za’a poan. Nɔkpe’ene kai ti ba ti’iseri la zaberɛ la n wan sa’am yɛla se’em.

Ge Baabule la pa’alɛ ti “Armagedon” dela zaberɛ ti “teŋa woo nadoma” bii asaala gɔmɛtdoma, la Naayinɛ wan zabɛ.a (Liligere 16:14, 16) Armagedon zaberɛ la yeen kan sa’am la nɛreba, la tinparɛ la wuu nuclear bomb n wan ta’an eŋɛ se’em la. Ge Armagedon poan, Naayinɛ wan sa’am la putɔpa la ma’a ge basɛ ti suma’asum la gu’a bɔna.—Yooma 37:9, 10; Isaiah 32:17, 18; Matu 6:10.

Baabule la pa’alɛ ti ba wan eŋɛ zaberɛ la wani?

“Teŋ parɛ wa zen’an woo, se’em ka le bɔta zaberɛ. A kɔ tiini bahɛ mɛ, ge nyɛlegɛ kana, ge nyɔ zaba tɛ’ɛlehe la bugum bahɛ.”—Yooma 46:9.

Yehowab Naayinɛ wan pa’alɛ a paŋa doose la eŋa n wan gu zaberɛ woo ge sa’am zaberɛ lɔɣɔrɔ za’a. A wan doose la a Na’am la poan tum tundena wa. A Na’am la dela saazuo gɔmɛt n wan ta soe bisera tingɔŋɔ wa za’a waabi.—Daniel 2:44.

Naayinɛ Na’am la wan pa’alɛ nɛreba ban wan tara suma’asum la nɔyinɛ bɔna la taaba se’em. Nɔkpɛ’ɛma n boi gɔmɛtdoma tiŋasuka la kan le bɔna se’ere n sɔi la, gɔmɛt ayina ma’a n wan bisera tingɔŋɔ wa za’a. Hali, nɛreba kan le mina zaberɛ! (Mikah 4:1-3) To wan nyɛ nyuurɔ la wani? “Nɛra woo wan dɛla a yire tia teŋa fai, te se’em ka bɔna wan vuunhe en.”—Mikah 4:4.

a Kaalɛ zaseŋɔ yele la zuo n de “Bem N De Armagedon Zaberɛ La?”

b Yehowa dela Naayinɛ yumɛŋɛrɛ. (Yooma 83:18) Kaalɛ zaseŋɔ yele la zuo n de “Ani N De Yehowa?”

**Liligere gɔŋɔ la tɔɣɛ nuclear zaberɛ yele me yoi?**

Nɛreba basɛba ti’isɛ ti Liligere gɔŋɔ la tɔɣeri la nuclear zaberɛ n wan ta’an sa’am sɛla woo la yele. (Liligere 6:14; 8:7-12; 16:1-21) Makerɛ, la pa’alɛ ti “bugum ze’ele [la] saazuo ha wa’an teŋa wa zuo na.” (Liligere 13:11-13) Yehowa Sɛɛradoma bɔkɛ ti yele wa vuurɛ dela ban yuun loberi atomic bombedoma Tingɔŋɔ Wa Za’a Zaberɛ Buyi la poan la ge daɣɛ nuclear zaberɛ n wan sa’am sɛla woo.

La boi bim ti Liligere gɔŋɔ la tɔɣɛ nuclear zaberɛ wa yele mɛ ge la ka tɔɣɛ dɛ nima nima ti dabeem kɛ̃ tɔ. Ho san kaala Liligere gɔŋɔ la, tɛ̃ra ti:

Gɔŋɔ la dekɛ la wɔ̃sum yɛla zo’e zo’e tum tuuma ti to kan ta’an bɔkɛ dɛ wuu yele la n gã se’em la.—Liligere 1:1.
Ba ka gulesɛ gɔŋɔ la ti la basɛ ti dabeem kɛ̃ sɛba n kaali de la. Ge yelese’a n boi bim la tuɣum basɛ ti sɛba n bɔkɛ a ge tara a tuna tuuma la puurɛ pee.—Liligere 1:3.

Ho san bɔta ti ho baŋɛ yɛla pa’asɛ, kaalɛ zaseŋɔ yele la zuo n de “The Book of Revelation—What Does It Mean?”