Imagination World/stock.adobe.com
Yelesum N Ze’ele Baabule La Poan—Sɛla N Wan Soŋɛ Nɛresɛba N Zɔ Loŋe Tiŋa!
Yuunɛ woo, nɛreba zo’e zo’e ni bisɛ ti la nari ti ba zɔ loŋe tiŋa ta’an bɔna fai. La me ani hon la bala? La san dɛna bala, basɛ ti ho suure ga’a ma’asumi se’ere n sɔi la Naayinɛ yeti a wan soŋɛ hɔ. A wan basɛ ti ho tara putɛsonɛ ti beere sa’am wan ta ana soŋa. Ho wan ta’an zamesɛ de yele Baabule la poan.
Christos Stylianides n de European Union kpɛ’ɛmaa la yeti, “Sɛba n zɔ loŋe tiŋa, la sɛba n zɔ ge basɛ ba yɛab ka yeen ɛɛra la to soŋerɛ nananawa ma’a ge . . . ba me nari ti ba tara beere sa’am puti’irɛ.” Nɛresɛba n tari beere sa’am puti’irɛ ka zoti dabeem la yelese’a n wan paɛ ba beere sa’am. Ge sɛba n zɔ loŋe tiŋa ka eeri la beere sa’am puti’irɛ ma’a. Ba me eeri la nɛra n wan buɣelɛ ba suure ti ba ta’an ŋmibe.
“Lan yuun nari ti n basɛ n yidoma ge zɔ loŋe tiŋa la, mam yuun kɔ’ɔn ana la bura. Mam suure n yuun sa’am ti dabeem tara mam, ti putɛyiila me kɔ’ɔn daana mam.”—Emmanuel, Haiti.
La tabelɛ ana hon wuu la yuun ani Emmanuel se’em la? Ho san basɛ ho yire ge zɔ loŋe tiŋa, ho wan ɛɛra subuɣelegɔ, la beere sa’am puti’irɛ. Naayinɛ Yelesum n de Baabule la wan ta’an soŋɛ ho la wani?
Baabule la n buɣeli ho suure se’em
Baabule la yeti: ‘Yehowac nɔŋɛ saama mɛ.”—Tɛɛnhegɔ 10:17, 18.
Bala pa’alɛ ti ho ka boi ho ma’a. Yehowa Naayinɛ n de se’em n basɛ ti ba gulesɛ Baabule la. A bɔkɛ lan ani ho se’em mɛ. A nɔŋɛ ho mɛ ge me kɔ’ɔn fabela ho yele.
Baabule la yeti: “Na’ayenɛ lɛm mɛ la se’em woo n wan kaahɛ bo en.”—Yooma 145:18.
Bala pa’alɛ ti ho san zusɛ Yehowa, a wan kelese. A wan soŋɛ hɔ ti ho tara pupeelum. A me wan doose Baabule la poan soŋɛ hɔ ti ho tara yɛm ta’an ŋmibe ho yele la poan.
Baabule la yeti: “Yenɛ ka tone be’em . . . Gaŋɛ Zan’an Yenɛ wa ka [tuni ŋmɛlema tuuma].”—Yob 34:10, 12.
Bala pa’alɛ ti la daɣɛ Naayinɛ n ta’asɛ ti ho namesa. La daɣɛ ti a dɔlegeri la ho tuberɛ bii a basɛ ti yɛla kpe’em bo ho mɛ ti a makɛ ho bisɛ.
Baabule la n basɛ ti ho tara beere sa’am puti’irɛ se’em
Baabule la pa’alɛ la Naayinɛ n wan eŋɛ sɛla bo to beere sa’am. Bisɛ beere sa’am puti’irɛ wa n soŋeri sɛba n zɔ loŋe tiŋa se’em.
Baabule la yeti: “[Naayinɛ] wan duuhe ba nintam ba nini poan bahɛ. Kum, la sunsagaŋɔ la kɛlega bii iŋduŋa ka maan bɔna.”—Liligere 21:4.
Bala pa’alɛ ti saŋa keni na ti to kan le namesa. Naayinɛ yeti a wan yese yelese’a woo n basɛ ti to vom ana wuu la ka tari vuurɛ la.
“La kan yue, Naayinɛ wan yese ŋmɛlema tuuma, la tunfɛ̃’ɛsa za’a basɛ. Bala n soŋeri mam ti n kɔ’ɔn ti’isa sansɛka ti namesegɔ kan le ta bɔna la yele.”—Karla, El Salvador.
Baabule la yeti: “Ba kan le tɛnra yele kɛgehe la yele.”—Isaiah 65:17.
Bala pa’alɛ ti to kan le tɛ̃ra susa’aŋɔ yɛla. Naayinɛ wan basɛ ti ho kan le tĩɛ susa’aŋɔ yelese’a n tabelɛ paɛ hɔ ti la le daana hɔ.
“Baabule la yeti to kan le tɛ̃ra susa’aŋɔ yelese’a n paɛ tɔ bii ton koŋe yelese’a. Bala n soŋeri mam ti n ta’an ŋmibera yele n kpe’em wa poan se’ere n sɔi la mam mi ti la kan yue, sɛla woo wan tee.”—Natalia, Ukraine.
Baabule la yeti: “Saazuo Yenɛ wa wan sɛ sɔ’ɔlom te bo . . . sagom sɔ’ɔlom woo n boe.”—Daniel 2:44.
Bala pa’alɛ ti saazuo gɔmɛt n di mi’a n wan ta bisera tingɔŋɔ wa. La kan yue, Naayinɛ Na’am la wan tee soe asaala gɔmɛtdoma za’a. Eŋa Na’am la n wan ta basɛ ti to sirum tara suma’asum, ti dabeem ka bɔna. Ŋmɛlema tuuma kan le bɔna ge ti nɛra woo wan ta tara pupeelum.—Mikah 4:3, 4.
“Mam mi ti la kan yue, Yehowa Na’am la wan yese yɛla n de wuu mɛlesegɔ, buuri yelesego, nɛreba nɛ’ɛsegɔ, la nɛreba n siisini yɛla bɔ’ɔra taaba. Wana n bo’ori mam paŋa ti n ta’an ŋmibera.”—Mustafa, Middle East.
Baabule la n pa’alɛ beere sa’am yele se’em la buɣeli la suure
Baabule la n tari yɛm sebo
Baabule la n tari yɛm sebo la wan soŋɛ hɔ ti ho ta’an ŋmibera la yelese’a n paɛ ho la. La wan soŋɛ hɔ, hali la ho bɔŋa n nyaa tee ge ti ho lɔɣɔrɔ me sa’am la. Bisɛ naresum yɛla wa n soŋɛ nɛreba basɛba n zɔ loŋe tiŋa se’em:
Baabule la yeti: ‘Nɛra san puɣum tara lɔɣɔrɔ zo’e zo’e, daɣɛ a lɔɣɔrɔ la ti a tara la n bo’ori en vom.’—Luke 12:15.
Yɛm yetɔɣum wa n wan soŋɛ ho se’em: Nɔkpe’ene kai ti ho ani la bura ge ti ho suure me sa’am la hon basɛ yelese’a woo ge zɔ la. Ge ho san ma’ɛ homea geele vom n tari tuulum se’em, la wan soŋɛ hɔ ti ho tara putɛsonɛ la hon koŋe yelese’a woo la.
“Vom yele n pakɛ gana lɔɣɔrɔ. Yɛla ase’a kɔ’ɔn bɔna mɛ ti ligeri bii lɔɣɔrɔ kan ta’an soŋɛ hɔ.”—Natalia, Ukraine.
Baabule la yeti: “Da yeti, wane te deemen deemen ha la ana soŋa gana zina?”—Pa’ala 7:10.
Yɛm yetɔɣum wa n wan soŋɛ ho se’em: La boi bim ti hon nyaa boi bɔnsɛka poan la kpe’em mɛ paa ge ho san ka tara bala makera la ho bɔŋa n yuun ani se’em la, la wan soŋɛ hɔ ti ho sunsɔa kan nyie.
“Mam n kɔ’ɔn sakɛ n bɔŋa la n nyaa ani se’em la n soŋeri mam ti n tara putɛsonɛ.”—Eli, Rwanda.
Baabule la yeti: “To han tara dia la futo, to wan tara popeelom.”—1 Timoti 6:8.
Yɛm yetɔɣum wa n wan soŋɛ ho se’em: Tiregɛ la ho basɛ ti hon tari yelese’a n pakɛ la seke ho. Bala wan soŋɛ hɔ ti ho puti’irɛ ga’a bɔbeyinɛ ge ti ho kan ba’ɛ daana homea.
“Baabule la n soŋeri mam ti n ta’an gɛɛla yɛla soŋa, la wan eŋɛ se’em ti n kan ti’isa yelese’a ti n koŋe la yele. Mam la mam pɔɣa puurɛ pee mɛ la ton kelum vɔna ge me ta’an bɔna zɛ’an ti daaŋɔ ka boi la.”—Ivan, Ukraine.
Baabule la yeti: “Hon bote nɛreba eta sɛla bɔ’ɔra hɔ la, eta bala me bɔ’ɔra ba.”—Matu 7:12.
Yɛm yetɔɣum wa n wan soŋɛ ho se’em: Ho san di’isa suure ge me soŋera nɛreba, ho wan tara bɔnsoŋa la nɛreba. Bala me wan basɛ ti la dɛna naana bo nɛreba ti ba to’e ho soŋa ge kan nɛ’ɛsa hɔ.
“Nɛreba zo’e zo’e puurɛ ni pee mɛ ho san bɔ’ɔra ba gilema, soŋera ba ge me nɔŋɛ ba. Bala wan basɛ ti ho tara bɔnsoŋa la tiŋa la nɛreba.”—Angelo, Sri Lanka.
Baabule la yeti: “Sohora [Naayinɛ] daarɛ woo. . . . Yenɛ sunma’ahom la . . . wan bahɛ te ya suunre la ya potɛn’ɛra bɔna ma’an.”—Filipi 4:6, 7.
Yɛm yetɔɣum wa n wan soŋɛ ho se’em: Zusɛ Naayinɛ ge yele en lan ani ho se’em, yelese’a n pakɛ hɔ, la yelese’a n daani hɔ ti dabeem tara hɔ. Ho san zusɛ bala, ho suure wan ga’a ma’asumi ti ho ta’an ŋmibe ho bɔŋa la poan.
“Yele san ni paɛ mam, mam ni zusɛ la Naayinɛ. A me ni kelese mɛ. Mam n zamesɛ sɛla Baabule la poan la basɛ ti mam tara la suma’asum.”—Yol, South Sudan.
“Baabule la ka’aŋɔ n soŋeri mam ti n tara suma’asum ta’an ŋmibera bɔŋa n kpe’em wa poan.”—Valentina, Ukraine.
“Mam n baŋɛ ti Yehowa Naayinɛ wan ta basɛ ti vom ana soŋa la n bo’ori mam paŋa.”—Emmanuel, Haiti
Hon wan bɔta ti ho zamesɛ Baabule la n le buɣela to suure ge basɛ ti to tara beere sa’am puti’irɛ se’em, la sɛla n sɔi ti ho wan ta’an dekɛ homea delum yele aŋa? Yele mina n dekɛ gɔŋɔ wa bo ho la ti a wa’an ho zɛ’an bii ho yele Yehowa Sɛɛradaana ti a wa’an ho zɛ’an. La dela zaŋa. Ba puurɛ wan pee ti ba soŋɛ hɔ.
a European Union Commissioner for Humanitarian Aid and Crisis Management.
b UN Refugee Agency la pa’alɛ ti ton tɔɣeri sɛba yele wa ta’an dɛna nɛreba n zɔ loŋe zɛ’an kayima bamea tiŋa poan, la sɛba n zɔ loŋe tiŋa kayima sa ge ban loŋe tinsɛka la ka bo ba gɔŋɔ n pa’alɛ ti ba loŋe bim.
c Yehowa dela Naayinɛ yumɛŋerɛ. (Yooma 83:18) Kaalɛ zaseŋɔ yele la zuo n de “Ani N De Yehowa?”