Sore Kani Poan Ti Yezu Lua Bunɔ La Ta’an “Yɔ To’e Nɛreba Zo’e Zo’e Basɛ”?
Baabule la lebesego
Naayinɛ doose la Yezu lua bunɔ la poan faaɛ nɛresaaleba yese be’em la kum poan. Baabule la tɔɣɛ pa’alɛ ti Yezu ziim ka’asegɔ wa dela yɔa bo to. (Epesus 1:7; 1 Peter 1:18, 19) Bala, Yezu yeti eŋa wa’ana ti a “dɛkɛ a vom yɔ to’e nɛreba kekeko bahɛ.”—Matu 20:28, King James Version.
Sore kani poan ti Yezu lua bunɔ la yele pakɛ tɔ?
Ba yuun naam yia buraa Adam la ti a dɛna la kasi. A yuun tari la yɔ’ɔ ti a vɔna daarewoo ge la yuun piɛ a nu’usi mɛ. (Pin’ileŋɔ 3:17-19) Sansɛka ti a yuun dɔɣɛ kɔma la a yuun dekɛ a be’em la loŋe ba mɛ. (Arom 5:12) Wana wa zuo, Baabule la pa’alɛ ti Adam yuun ‘koose’ amea la a kɔma bo la be’em yamenɛ tuuma poan n de wuu kum. (Arom 7:14) Ba yuun ka ani kasi la zuo, ba mina sa’am kan nyaŋɛ yɔ sɛla n bɔregɛ la.—Yooma 49:7, 8.
Adam yaasi wa n yuun ka tari beere sa’am puti’irɛ la basɛ ti Naayinɛ yuun zɔ ba la nimbɔ̃’ɔ. (Yon 3:16) Dene poan, Naayinɛ n de tontɔɔ gãkerɛdaana la zuo a yuun kan nyaŋɛ di sugeri bo ba ge ka nyɛ yele la vuurɛ. (Yooma 89:14; Arom 3:23-26) Naayinɛ n nɔŋɛ asaaleba la zuo la, a eŋɛ la maaseŋɔ bo ba ti a ta’an doose bim di sugeri bo ba nananawa ge soŋɛ ba ti ba kan le tum be’em beere sa’am. (Arom 5:6-8) Yezu lua bunɔ la n wan ta’an basɛ ti bala eŋɛ.
Lua bunɔ la tuni la wani wani?
Baabule la san tɔɣera “lua bunɔ” yele la pa’alɛ la yele ana atã wa:
La dela sɛla ti ba yɔ.—Kanlɛ 3:46, 47.
La dela sɛla n faaɛ to basɛ bii la basɛ ti to bɔna la fai.—Yɛhega 21:30.
La kɔ’ɔn makɛ mɛ la sɛla ti ho yɔ bii lĩ sɛla.a
Bisɛ yɛla wa n pa’alɛ Yezu Krista lua bunɔ la se’em.
Yɔa. Baabule la yeti ba da Kristakɔma mɛ la “toolom lɔkɔ.” (1 Korint 6:20; 7:23) Lua bunɔ la dela Yezu ziim la ti a dekɛ “da buuri woo, la yetɔgom woo, la nɛreba woo, la teŋhe woo bo Yenɛ.”—Liligere 5:8, 9.
Faaɛ. Yezu n yuun “ki la fan” nɛreba mɛ be’em poan basɛ.—1 Korint 1:30; Kolose 1:14; Hebru 9:15.
La kɔ’ɔn makɛ mɛ. Yezu lua bunɔ la kɔ’ɔn makɛ la kasi vom sebo n yuun piɛ Adam nu’usin la. (1 Korint 15:21, 22, 45, 46) Baabule la yeti: “Nɛra yene [Adam] n zagahɛ Yenɛ nɔɔrɛ la zuo te nɛreba dɛna be’emdoma, bala mea te Yenɛ yi nɛreba tontɔɔdoma yɛhera la nɛra yene Yesu Krista wa, n ka zagahɛ Yenɛ nɔɔrɛ la zuo.” (Arom 5:19) Gulesegɔ wa pa’alɛ la, la eŋɛ se’em ti nɛra ayima kum wa ta’an yɔ to’e be’emdoma zo’e zo’e. Yelemɛŋɛrɛ, Yezu kum la dela ‘lua bunɔ n kɔ’ɔn makɛ bo sɛba woo’ n tiregeri ti ba nyɛ nyuurɔ de poan.—1 Timoti 2:5, 6.
a Baabule la poan, Hebru la Greek yelebire la ti ba lerege ti “lua bunɔ” la vuurɛ dela tuulum lɔkɔ ti ba dekɛ yɔ sɛla. Makerɛ, Hebru itigɔ yelebire ka·pharʹ vuurɛ dela “lĩ.” Saŋa zo’e zo’e la vuurɛ dela be’em duusego. (Yooma 65:3) Hebru yelebire koʹpher vuurɛ dela sɛla ti nɛra wan yɔ ta’an duuse a be’em bii faaɛ amea basɛ. (Yɛhega 21:30) Bala mea nɔɔ ti Greek yelebire lyʹtron ti ba ni lerege ti ‘lua bunɔ’ la vuurɛ ta’an dɛna “yɔ to’e.” (Matu 20:28) Greek gɔnguleseba yuun dekɛ yelebire wa tɔɣɛ pa’alɛ la sɛla ti ba wan yɔ basɛ ti yameŋa bii nɛra n boi paka deo poan ta’an bɔna fai.