BUNBILIPAALESI SOKE YETI
N Wan Eŋɛ La Wani Ti N Dɔɣereba Ta’an Tɔresɛ Mam?
Hon nari ti ho mina sɛla
Ho san tara yelemɛŋɛrɛ, ho dɔɣereba wan tɔresɛ hɔ. Ho san nana ho dɔɣereba, la ani wuu ho yɔɔri la sanɛ. Ho tari la ho dɔɣereba sanɛ n de ho nana ba. Nɛra san peŋe ligeri ge nyaŋɛ yɔ, a san le bɔta a wan nyɛ. Bala mea nɔɔ ti ho san nana ho dɔɣereba, ba wan tɔresɛ hɔ ge basɛ ti ho bɔna fai. Ge ho san ka nana ba, ba kan tɔresɛ hɔ.
La ni yue me fii ge ti nɛra ta’an tɔresɛ hɔ. La nari ti ho tara halesoma. Bala wan basɛ ti ho dɔɣereba bo ho yɔ’ɔ ti ho bɔna fai.
ZI’IREGO POAN YELE: “Mam n yuun mi mam dɔɣereba n boti n eŋɛ sɛla la, mam yuun iti la bala ge me ni suɣera ita mam n boti sɛla. Bala yuun basɛ ti la kpe’em bo mam dɔɣereba mɛ ti ba tɔresɛ mam. Pooren ti mam yuun baŋɛ ti n kan ta’an pã’asɛ n mea. N san tara yelemɛŋɛrɛ, bala n wan basɛ ti n dɔɣereba tɔresɛ mam.”—Craig.
Hon wan ta’an eŋɛ sɛla
Tara yelemɛŋɛrɛ, la san puɣum kpe’em bo ho. To za’a tuuri mɛ ge ho san parena bii ita yɛla suɣera, bala ta’an basɛ ti ho dɔɣereba kan tɔresɛ hɔ. Ge ho san tɔɣera yelemɛŋɛrɛ saŋa woo, bala wan basɛ ti ho dɔɣereba baŋɛ ti ho sakɛ ho tuure ge me tɔresɛ hɔ.
“Daɣɛ ton tuuri la n wan basɛ ti nɛreba kan tɔresɛ tɔ ge to san tara to tuure la suɣera, bala n wan basɛ ti ba kan tɔresɛ tɔ.”—Anna.
Baabule la yeti: “To bote la to tona sɛla n de ma’an yelese’ere woo poan.”—Hebru 13:18.
Ti’isɛ yele wa bisɛ: Ho san yɛsera ti ho dɔɣereba soke ho ti ho ye la bɛ bii ho yeti ho eŋɛ la bem, ho wan tɔɣɛ yelemɛŋɛrɛ? Ho dɔɣereba san soke ho ti ho keŋɛ la bɛ bii ho eŋɛ la bem, hon ni tɔɣɛ yelemɛŋɛrɛ?
Tuna ho tuuma soŋa. Nana ho dɔɣereba pa’alegɔ. Tuna ban bo ho tuunse’a la. Tara ho saŋa la tuna soŋa soŋa. Ni eŋɛ ho homework. Dɔla ban pa’alɛ ho se’em la.
“Ho dɔɣereba san bo ho yɔ’ɔ ti ho naɛ la ho zɔdoma yese ge yele ho ti ho lebe kulena 9:00 p.m., la ka nari ti ho kulena 10:30p.m. Ho san eŋɛ bala, beere sa’am ba ka le bo ho yɔ’ɔ!”—Ryan.
Baabule la yeti: “Nɛra woo tare a zeero mɛ te a zi.”—Galatia 6:5.
Ti’isɛ yele wa bisɛ: Hon tari ho saŋa tuna soŋa, tuna ho yire tuuma ge me nana pa’alegɔ hali la san puɣum kpe’em bo ho?
Di’isa suure. Ho san eŋɛ sɛla ti la daam ho dɔɣereba, la wan yue fii ge ti ba le malum tɔresɛ hɔ. Bala la, di’isa suure.
“Mam n yuun zo’ori la, mam dɔɣereba yuun ka ba’ɛ bɔ’ɔra mam tuuma zo’e zo’e ge la yuun ka yue ti mam bɔkɛ ti ho san zɔ’ɔra, la ka pa’alɛ ti ho kãsegɛ mɛ. Mam yuun yele mam dɔɣereba ti ba bo mam yɔ’ɔ ti n pa’alɛ ba ti mam kãsegɛ mɛ. La boi bim ti la yuun yue mɛ ge la yuun soŋɛ mam mɛ. Mam yuun nyaa baŋɛ ti ho san zɔ’ɔra la ka pa’alɛ ti nɛreba wan ta’an tɔresɛ hɔ ge la dela ho tuuma n wan pa’alɛ.”—Rachel.
Baabule la yeti: “Gankɛ ya, ya mɛhe de zuo behɛ yan ane se’em.”—2 Korint 13:5.
Ti’isɛ yele wa bisɛ: Ho san bɔta ti ho dɔɣereba tɔresɛ hɔ, bem yɛla ti ho wan ta’an eŋɛ ti ba baŋɛ ‘hon ani se’em’?
SƐLA N WAN SOŊƐ HƆ: Kɔ’ɛ ho puti’irɛ ti ho wan tara ho saŋa tuna soŋa, tuna ho yire tuuma ge me nana ho dɔɣereba pa’alegɔ, la yɛla ase’a me. Basɛ ti ho dɔɣereba baŋɛ hon kɔ’ɛ ho puti’irɛ ti ho eŋɛ sɛla la. Soke ho dɔɣereba hon wan eŋɛ se’em ti ba ta’an tɔresɛ hɔ. Tiregɛ dekɛ Baabule pa’alegɔ wa tum tuuma. La yeti: “Bahɛ ya nɛrekɛka la n daa bahɛ te ya bɔna yan bote se’em la.” (Epesus 4:22) La kan yue, ho dɔɣereba wan baŋɛ ti ho nyɛti nɛŋa tɔlega!