Bem Zuo Ti Ba Yi’ira Yezu Naayinɛ Dayɔa?
Baabule la lebesego
Baabule la yi’iri Yezu la “Na’ayenɛ Dayɔa.” (Yon 1:49) Yelebire la n de “Na’ayenɛ Dayɔa” la pa’ali ti Naayinɛ n de Yezu Naaŋɔdaana la sɛla woo vom daana. (Yooma 36:9; Liligere 4:11) Baabule la ka pa’alɛ ti Naayinɛ dɔɣɛri la kɔma wuu nɛresaaleba n dɔɣeri ba kɔma se’em la.
Baabule la me yi’iri malesi la “Yenɛ dayɔɔhe.” (Yob 1:6) Leyɛ’ɛsa, Baabule la yeti yia buraa, Adam yuun dela “Yenɛ dayɔa.” (Luke 3:38) Yezu n deŋɛ nɛŋa Naayinɛ naaŋɔ poan la ge ti la dɛna eŋa ma’a ti Naayinɛ mea naam la n sɔi ti Baabule la yeti eŋa n de Naayinɛ Dayɔsɛka n boi a to’ore.
Yezu yuun boi la saazuo ge ti ba nyaa dɔɣɛ en tingɔŋɔ wa zuo?
Ɛɛ. Yezu yuun dela vo’osum nɛra n boi saazuo sa ge ti ba nyaa dɔɣɛ en tingɔŋɔ wa zuo. Yezu mea yuun yeti: “mam ze’ele [la] saazuo sige na.”—Yon 6:38; 8:23.
Naayinɛ yuun naam la Yezu ge nyaa naam sɛla woo. Baabule la tɔɣɛ Yezu yele yeti:
“Sɛla woo te Yenɛ naam la Krista n de Dayɔdeeŋa sɔna behera”—Kolose 1:15.
“Enŋa daa pɔhɛ sɛla woo poan te Yenɛ naam la.”—Liligere 3:14.
Yezu n de mina ti yetɔɣebiŋere la tɔɣɛ a yele ti, “a tuunhom pon bɔna la deemen deemen ha.”—Mikah 5:2; Matu 2:4-6.
Yezu yuun iti la bem ge nyaa wa’an tingɔŋɔ wa zuo na?
A yuun tari la kpe’eŋo zo’e zo’e saazuo sa. Yezu yuun tɔɣeri la a kpe’eŋo la yele la eŋa n yuun zusɛ yeti: “N Sɔ, bahɛ te n nyɛ pɛnka . . . pɛngɛsɛka taaba te n daa pon nyɛ ho zen’en ge te ho daa nya baŋɛ naam teŋa wa zuo la.”—Yon 17:5.
A yuun soŋɛ a Sɔ mɛ ti a naam sɛla woo. Yezu yuun naɛ mɛ la Naayinɛ tuna ‘wuu tuuntuna n dole la a kpɛ’ɛma.’ (Magaha 8:30) Baabule la tɔɣɛ Yezu yele ti: “Krista poan te Yenɛ naam sɛla woo n boe saazuo ha la teŋa wa.”—Kolose 1:16.
Naayinɛ yuun doose la Yezu poan naam sɛla woo n de wuu malesi, saazuo la tingɔŋɔ wa. (Liligere 5:11) Naayinɛ n yuun naɛ la Yezu tuna se’em la ani me wuu kpɛ’ɛma la a tuuntuna n naɛ taaba tuna se’em. Kpɛ’ɛma la n wan pa’alɛ eŋa n boti a eŋɛ sɛla ge tuuntuna la n wan tum tuunɛ la.
Eŋa n yuun de Yelesum la. Baabule san tɔɣera Yezu n yuun boi saazuo sa la yele, la ni yeti Yezu n de “Yelehom la.” (Yon 1:1) La niɛ peelum ti Naayinɛ yuun ni doose la a Dayɔa la poan tɔɣɛ a pa’alegɔ yɛla bo malesi la.
La me ani wuu Yezu n yuun de Naayinɛ Kpana tɔɣera bɔ’ɔra nɛreba tingɔŋɔ wa zuo. Daanse’ere Naayinɛ yuun doose Yezu n yuun de Yelesum la poan tɔɣɛ bo Adam la Hawa Eden gaadin la poan. (Pin’ileŋɔ 2:16, 17) Daanse’ere Yezu n yuun de maleka la n yuun boi Israeldoma la nɛŋa goo la poan ti la yuun nara ti ba nana en la.—Yɛhega 23:20-23.a
a Daɣɛ Yelesum la ma’a n de maleka sɛka ti Naayinɛ dɔla a poan tɔɣera. Makerɛ, a yuun doose la malesi basɛba poan dekɛ Lɔɔ la bo daami Israeldoma la.—Tooma 7:53; Galatia 3:19; Hebru 2:2, 3.