Arom 15:13​—“Naayinɛ Se’em N Basɛ Ti To Tara Beere Sa’am Puti’irɛ La Basɛ Ti Ya Tara Pupeelum La Suma’asum Zo’e Zo’e”

“Naayinɛ se’em n basɛ ti to tara beere sa’am puti’irɛ la basɛ ti ya tara pupeelum la suma’asum zo’e zo’e la yamam n dekɛ yamea delum en la, la wan eŋɛ se’em ti zilam vo’osum la paŋa basɛ ti ya tara beere sa’am puti’irɛ malum pa’asɛ.”​—Arom 15:13, New World Translation.

“Basɛ ti beere sa’am puti’irɛ Naayinɛ la basɛ ti ya tara pupeelum la suma’asum, la yamam n dekɛ yamea delum en la, la wan eŋɛ se’em ti Zilam Vo’osum la paŋa basɛ ti ya tara beere sa’am puti’irɛ malum pa’asɛ.”​—Arom 15:13, New International Version.

Arom 15:13 Vuurɛ

Yetɔɣebuna wa basɛ ti to baŋɛ ti Paul yuun boti la Naayinɛ bo sɛba n tari sakerɛ la “pupeelum la suma’asum.” Beere sa’am puti’irɛ, la Naayinɛ zilam vo’osum la paŋa laɣum pa’asɛ halesoma wa poan mɛ.

To zamesɛ la Naayinɛ Yelesum Baabule la baŋɛ ti, a wan bo to beere sa’am puti’irɛ. Arom 15:4 pa’alɛ ti, “Sɛla woo ti ba gulesɛ biŋe [Baabule la poan] la, ba gulesɛ ti la dɛna la pa’alegɔ bɔ’ɔra tomam, la wan eŋɛ se’em ti doose la to ŋmibega, la subuɣelegɔ la n boi Gulesegɔ la poan la, to wan tara beere sa’am puti’irɛ.” Baabule la poan, ti Naayinɛ pu’ulumbiŋe ti a wan maalɛ yelese’a n basɛ ti vom ka tari vuurɛ zina wa n de wuu nɔŋɔ, ŋmɛlema tuuma, ba’asi la kum. (Liligere 21:4) Naayinɛ wan doose la Yezu Krista poan basɛ ti a pu’ulumbiŋa wa tum. Bala zuo la, to wan ta’an tara beere sa’am puti’irɛ ti vom wan ta ana soŋa.​—Arom 15:12.

To san dekɛ tomea delum Naayinɛ, to wan ta’an ‘tara’ beere sa’am puti’irɛ wa. To san zamesɛ baŋɛ Naayinɛ soŋa soŋa, ton tari suure lua a poan se’em la wan kpe’em. (Isaiah 46:10; Titus 1:2) To puurɛ pee mɛ la Naayinɛ n bo to beere sa’am puti’irɛ la. Hali nɛra san puɣum bɔna wuŋerɛ poan, a wan ta’an tara pupeelum la suma’asum.​—Arom 12:12.

“Zilam vo’osum” la n de Naayinɛ paŋa ti a tara tuna tuuma la me bo’ori to la suma’asum, pupeelum la beere sa’am puti’irɛ.a Naayinɛ doose la a zilam vo’osum la poan basɛ ti a pu’ulumbiŋa la tuna tuuma. Bala me basɛ ti to tara la beere sa’am puti’irɛ. Vo’osum wa ta’an basɛ ti nɛreba tara pupeelum la suma’asum.​—Galatia 5:22.

Arom 15:13 Yelesum

Ba yuun gulesɛ Arom gɔŋɔ la bo la Kristakɔma sɛba n yuun boi Arom tiŋa poan la. Kristakɔma wa basɛba yuun dela Yudadoma ti basɛba me dɛna buuri ase’a. La ka pakɛ la ba malema la ba buuri n de yima yima la, Paul yuun kpemese ba za’a giila ti ba tuna la nɔyinɛ la putɛyinɛ.​—Arom 15:6.

Paul yuun tiɛ Kristakɔma n boi Arom la ti, Naayinɛ puɣum tɔɣɛ biŋe mɛ ti saŋa keni na ti sɛba n boi tisi to’ore to’ore wan pɛɣera Eŋa Naayinɛ la nɔyinɛ. Paul n yuun boti ba baŋɛ eŋa n tɔɣeri sɛla la zuo, a yuun tɔɣɛ la Hebru Gulesegɔb la poan yɛla sugumnɔɔrɛ bunaasi. (Arom 15:9-12) A yuun boti a yeti: Yudadoma la nɛreba n ze’ele tisi woo poan wan ta’an nyɛ nyuurɔ Krista na’am mɔɔlegɔ tuuma la poan. Naayinɛ bo ba za’a la beere sa’am putɛyiŋa. Bala, la ka pakɛ la bamam n ze’ele zɛ’an la, tansuga la za’a n boi Arom la yuun nari ti ba ‘to’ose taaba soŋa soŋa’ ti la pa’alɛ ti ba tari la itisonkɔ ge tɔ’ɔsa saama soŋa.​—Arom 15:7.