Yehowa Ani La Wani?

Ho san ti’isa Yehowa Naayinɛ yele, bem n ni wa’an ho puti’irɛ na? A dela mina n tari hɔ dabeem ge zãɛ la hɔ wuu ŋmarebibisi n zãɛ se’em sa la? Bii hon ti’isɛ ti a tari la paŋa ge yeen kɔ’ɔn ita yɛla wuu saa n tãseri se’em la? Yehowa tuɣum ana la wani? Baabule la poan, Yehowa pa’alɛ tɔ eŋa n tari halese’a ge me le basɛ ti to baŋɛ eŋa n fabeli to yele se’em.

1. Beni n sɔi ti to kan ta’an nyɛ Naayinɛ la to nini?

“Naayinɛ dela vo’osum.” (Yon 4:​24) Yehowa ka tari inganɛ. A dela Vo’osum n boi saazuo sa, zɛsɛka ti to kan ta’an nyɛ la to nini.

2. Yehowa hala ase’a dela ani?

To nɔɔ ka nyɛti Yehowa ge a dela Nɛra n tari halesoma n basɛ ti sɛba n mi en la nɔŋɛ en. Baabule la yeti: “Yehowa nɔŋɛ la tontɔɔ gãkerɛ, a me kan basɛ a yelemɛŋɛrɛdoma la.” (Yooma 37:​28) A me dela mina n tari “giile la nimbɔzore” bɔ’ɔra nɛreba yele yele wuu sɛba n nameseri la. (Yames 5:​11) “Yehowa ani la du’a du’a la sɛba suure n sa’am la; a faari la sɛba giila n kɔ’ɔsɛ la basera.” (Yooma 34:​18, tiŋanɔɔrɛ yelesum) Ge hon mi ti, to iti sɛla la ta’an daam Yehowa bii la basɛ ti a puurɛ pee? Nɛra san mina fii ge tuna tuunbe’ero la ni sa’am a suure mɛ. (Yooma 78:​40, 41) Ge nɛra san ita sɛla n ani soŋa, a puurɛ ni pee mɛ.​—Kaalɛ Magaha 27:11.

3. Yehowa iti la bem pa’ala ti a nɔŋɛ tɔ?

Nɔŋerɛ n de Yehowa halese’ere n gani za’a. Yelemɛŋɛrɛ, “Naayinɛ dela nɔŋerɛ.” (1 Yon 4:8) Daɣɛ Baabule la poan ma’a n pa’alɛ ti Yehowa tari nɔŋerɛ ge a naaŋɔ lɔɣɔrɔ la me niɛ de pa’alɛ mɛ. (Kaalɛ Tooma 14:​17.) Makerɛ, yeen geele bisɛ eŋa n maalɛ to se’em. A basɛ ti to ta’an nyɛta mu’uŋɔ n som, wuna yuuma ge baŋera dinɔ’ɔma n za’asum se’em. A boti la to tara pupeelum to vom poan.

VIISƐ PA’ASƐ

4. Zilam vo’osum la dela Naayinɛ paŋa

Wuu to tari to nu’usi tuna tuuma se’em la, Yehowa me tari la a zilam vo’osum la tuna. Baabule la pa’alɛ ti zilam vo’osum la daɣɛ nɛra ge la dela paŋsɛka ti Naayinɛ tara tuna tuuma. Kaalɛ Luke 11:​13 la Tooma 2:​17 ge nyaa sɔsɛ sokere ana wa:

• Naayinɛ wan “ka’ɛ” a zilam vo’osum la eŋɛ nɛresɛba n zusɛ ɛɛra bu la zuo. Bala la, hon ti’isɛ ti zilam vo’osum la dela nɛra bii la dela Naayinɛ paŋa? Beni n sɔi ti hon yele bala?

Yehowa tari la zilam vo’osum la tuna tuunkirisi. Kaalɛ Yooma 33:6 la 2 Peter 1:​20, 21 ge nyaa sɔsɛ sokere wa:

• Sore aŋa bɛɛ ti Yehowa dekɛ a zilam vo’osum la tum?

5. Yehowa dela nɛresonkɔ

Moses yuun pu’useri Naayinɛ mɛ soŋa soŋa ge a yuun kelum bɔta ti a baŋɛ a Naaŋɔdaana la mɛ soŋa. Bala la, Moses yuun yele en yeti: “Basɛ ti n baŋɛ ho sarɔtɔ la, la wan eŋɛ se’em ti n ta’an baŋɛ hɔ.” (Yɛhega 33:​13) Yehowa yuun basɛ ti Moses baŋɛ Eŋa n de nɛresɛka taaba mɛ. Kaalɛ Yɛhega 34:​4-6 ge nyaa sɔsɛ sokere ana wa:

• Yehowa halɛ ani ti a yuun basɛ ti Moses baŋɛ?

• Yehowa halɛ ani n ba’ɛ kɛ̃ hon suure?

6. Yehowa fabeli nɛreba yele mɛ

Naayinɛ nɛreba n de Hebrudoma la, yuun dela yamesi Egypt tiŋa. La yuun ani Yehowa la wani la a nɛreba la n yuun nameseri la? Ŋmɛ KƆ̃A YETƆƔUM la ge dɔla bii ho kaala Yɛhega 3:​1-​10. Nyaa sɔsɛ sokere ana wa:

KƆ̃A YETƆƔUM: Ba Namesegɔ La Yuun Pakɛ Yehowa Mɛ (2:45)

• Kaalegɔ wa pa’alɛ hon ti la ni ana Yehowa la wani nɛreba san namesa?​—Bisɛ kaalegɔ zɛ’ɛsi 7 la 8.

• Hon ti’isɛ ti Yehowa sirum boti a soŋera nɛreba? A wan ta’an eŋɛ bala? Bem zuo bii bem zuo ti la daɣɛ bala?

7. To wan ta’an baŋɛ Yehowa hala la a naaŋɔ lɔɣɔrɔ poan

Yehowa n naam lɔɣeseto la basɛ ti a hala la niɛ peelum mɛ. Ŋmɛ VIDIYO la. Nyaa kaalɛ Arom 1:​20 ge sɔsɛ sokere wa:

VIDIYO: Yehowa Naaŋɔ La Pa’ali La A Nɔŋerɛ​—Nɛresaala Inya (1:57)

• Yehowa halɛ ani ti hon nyɛ a naaŋɔ lɔɣɔrɔ la poan?

YELEKPINE

Yehowa dela Vo’osum nɛra ti to ka nyɛta ge me tara hala n di mi’a yele yele wuu nɔŋerɛ.

Tiisegɔ Sokere

• Beni n sɔi ti to kan ta’an nyɛ Yehowa?

• Bem n de zilam vo’osum la?

• Yehowa hala la ase’a dela ani?

Ɛ BISƐ

Zamesɛ baŋɛ Yehowa hala anaasi la soŋa soŋa.

“Naayinɛ Ani La Wani?” (The Watchtower No. 1 2019)

Geele yelese’a n pa’alɛ ti Yehowa ka boi zɛ’an woo.

“Naayinɛ Dela Kusebego Bɔna Zɛ’an Woo?” (La boi jw.org)

Zamesɛ baŋɛ sɛla n sɔi ti Baabule la yeti zilam vo’osum la dela Naayinɛ nu’usi.

“Zilam Vo’osum La Dela Bem?” (La boi jw.org)

La yuun kpe’em bo fua ayima mɛ ti a sakɛ ti Naayinɛ fabeli a yele. Bisɛ sɛla n tee a puti’irɛ la.

“Mam Nyaa Baŋɛ Ti Mam Wan Ta’an Soŋɛ Nɛreba” (The Watchtower, October 1, 2015)