-
Bem N Wan Soŋɛ Hɔ Ti Ho Kɔ’ɔn Zamesa Baabule La?Tara Vom Somɔ Daarewoo!—Baabule Zamesegɔ N Wan Soŋɛ Hɔ
-
-
ZASEŊƆ 12
Bem N Wan Soŋɛ Hɔ Ti Ho Kɔ’ɔn Zamesa Baabule La?
Baabule zamesegɔ ani wuu sore kenɛ n tari nyuurɔ. Ge daɣɛ saŋa woo ti la dɛna naana. Saŋa ase’a, ho ta’an ti’isa ti ho kan ta’an kelum zamesa Baabule la. Beni n sɔi ti nyuurɔ bɔna bim ti ho kelum zamesa? Yeledaaŋɔ san puɣum paara hɔ, bem n wan soŋɛ hɔ ti ho kan basɛ?
1. Beni n sɔi ti Baabule zamesegɔ tara nyuurɔ?
“Naayinɛ yetɔɣum la vɔi mɛ ge tara paŋa.” (Hebru 4:12) Baabule la tari nyuurɔ mɛ se’ere n sɔi la, la pa’ali la Naayinɛ n ti’iseri ho yele se’em. La soŋeri ho mɛ ti ho yeen ka nyɛta la mi’ilum ma’a ge la bo’ori ho la yɛm somɔ la beere sa’am puti’irɛ. Sɛla n gani za’a dela, Baabule la wan soŋɛ hɔ ti ho ta’an dɛna Yehowa zɔ. Ho san zamesa Baabule la, ho basɛ ti ku soŋera ho mɛ ti ho tara vom somɔ.
2. Beni n sɔi ti la dɛna ninmɔ’ɔrɛ ti to baŋɛ Baabule la n tari nyuurɔ se’em?
Baabule yelemɛŋɛrɛ la ani wuu tuulum lɔɣɔrɔ. Bala n sɔi ti Baabule la yele to ti to “da yelemɛŋɛrɛ ge da makɛ koose bu.” (Magaha 23:23) To san tɛra Baabule yelemɛŋɛrɛ la n tari nyuurɔ se’em la to wan kelum zamesa, yɛla san puɣum gu’ura tɔ.—Kaalɛ Magaha 2:4, 5.
3. Yehowa wan eŋɛ la wani ta’an soŋɛ hɔ ti ho kɔ’ɔn zamesa?
Naaŋɔ Za’adaana Yehowa, n de ho Zɔ la, boti a soŋɛ ho mɛ ti ho zamesɛ a yele. A wan bo ho “konkomaasum la paŋa ti [ho] tuna.” (Kaalɛ Filipi 2:13.) Bala la, ho san ɛɛra soŋerɛ ti ho zamesɛ bii ho tara hon zameseri sɛla la tuna tuuma, a wan soŋɛ hɔ. Ho san ɛɛra paŋa pa’asɛ ti ho gu homea la yelese’a n paari ho la, a wan bo ho. Zusa Yehowa saŋa woo ti a soŋɛ hɔ ti ho kɔ’ɔn zamesa Baabule la.—1 Tesalonika 5:17.
VIISƐ PA’ASƐ
Zamesɛ baŋɛ hon wan eŋɛ se’em ta’an kelum zamesa Baabule la, la san puɣum dɛna ti tuuma n gaŋɛ hɔ bii nɛreba n giiseri hɔ. Nyaa bisɛ Yehowa n wan soŋɛ ho se’em ti ho ta’an ŋmibe.
4. Basɛ ti Baabule zamesegɔ dɛna ninmɔ’ɔrɛ bo ho
Saŋa ase’a, tuuma ta’an gaŋɛ to mɛ ti la ana wuu to kan nyɛ nɛŋa zamesɛ Baabule la. Bem n wan ta’an soŋɛ tɔ? Kaalɛ Filipi 1:10 ge nyaa sɔsɛ sokere ana wa:
Hon ti’isɛ ti yele ani n de “ninmɔ’ɔrɛ tuuma la” to vom poan?
Hon wan eŋɛ la wani ta’an basɛ ti ho Baabule zamesegɔ dɛna ninmɔ’ɔrɛ bunɔ?
Ho san vaɛ tontɔnɔ pirɛ bɔɣetɛ ge ziɣera ti ho dekɛ kuga kãra pa’asɛ, ba kan ta’an kɛ̃
Ho san dekɛ kuga kãra la eŋɛ bim yia, ho wan nyɛ fole vaɛ tontɔnɔ zo’e pa’asɛ bim. Bala mea la, ho san tuna “ninmɔ’ɔrɛ tuuma la” yia ho vom poan, ho wan nyɛ nɛŋa tuna yelese’a n gee la
To san zamesa Baabule la, la basɛ ti to nyɛta la yelese’a n de ninmɔ’ɔrɛ to vom poan n de to mina Naayinɛ ge pu’usa en. Kaalɛ Matu 5:3 ge nyaa sɔsɛ sokere wa:
To wan nyɛ nyuurɔ la wani to san basɛ ti to Baabule zamesegɔ dɛna ninmɔ’ɔrɛ bɔ’ɔra tɔ?
5. Ŋmibe nɛreba giisegɔ poan
Saŋa ase’a, nɛreba ta’an kɔ’ɔsɛ ho giila ti ho da zamesa Baabule la. Bisɛ Francesco yele wa. Ŋmɛ VIDIYO la ge nyaa sɔsɛ sokere ana wa:
Vidiyo la poan la, Francesco n yele a zɔdoma la a deodoma eŋa n zamesɛ sɛla Baabule la poan la, ba eŋɛ en la wani?
Bem nyuurɔ ti a nyɛ la eŋa n nyaŋɛ ŋmibe la?
Kaalɛ 2 Timoti 2:24, 25 ge nyaa sɔsɛ sokere ana wa:
La ani ho deodoma la ho zɔdoma la wani la hon zameseri sɛla la?
Wuu kaalegɔ zɛ’ɛsi wa n pa’alɛ se’em la, hon wan eŋɛ la wani nɛra puurɛ san ka pee la hon zameseri Baabule la? Bem zuo?
6. Dekɛ homea delum Yehowa ti a soŋɛ hɔ
To san vurege lɛm Yehowa, to wan kɔ’ɔn bɔta ti to ita sɛla ti a puurɛ pɛɛra. Ge la ta’an kelum kpe’em bo to ti to eŋɛ teere to vom poan ge dɔla a pa’alegɔ la. La san ana ho bala, da basɛ ti ho giila kɔ’ɔsɛ. Yehowa wan soŋɛ hɔ. Ŋmɛ VIDIYO la ge nyaa sɔsɛ sokere ana wa:
Vidiyo la poan la, bem teere ti Jim eŋɛ ti Yehowa puurɛ pee?
A yele wa kɛ̃ hon suure la wani?
Kaalɛ Hebru 11:6 ge nyaa sɔsɛ sokere ana wa:
Yehowa wan eŋɛ la bem bo sɛba n “ãregeri bamesi ɛɛra” ti ba baŋɛ en la ge me tiregera ti ba eŋɛ sɛla ti a puurɛ pee la?
Yele wa pa’alɛ ti, la ani Yehowa la wani a san nyɛ ti ho tiregeri mɛ ti ho zamesa Baabule la?
NƐRA TA’AN SOKE YETI: “Beni n sɔi ti hon zamesa Baabule la?”
Hon wan lebese la wani?
YELEKPINE
La nɔɔ daɣɛ naana saŋa woo ge Baabule zamesegɔ ta’an soŋɛ hɔ ti ho tara vom somɔ daarewoo. Kɔ’ɔn dekɛ homea delum Yehowa ge a wan kã bo ho.
Tiisegɔ Sokere
Beni n sɔi ti Baabule yelemɛŋɛrɛ la dɛna tuulum bo ho?
Ho wan eŋɛ la wani ta’an “tuna ninmɔ’ɔrɛ tuuma la”?
Beni n sɔi ti la nara ti ho zusa Yehowa ti a soŋɛ hɔ ti ho kɔ’ɔn zamesa Baabule la?
Ɛ BISƐ
Geele sarɔtɔ anaasi n soŋɛ nɛreba ti ba tara ba saŋa tuna tuuma soŋa se’em.
“Hon Wan Eŋɛ Se’em Ta’an Tara Ho Saŋa Tuna Soŋa Soŋa” (Awake!, February 2014)
Bisɛ Yehowa n soŋɛ pɔka ayima se’em, se’em ma’a ti a sira ka bɔkɛ sɛla n sɔi ti a ita ania pu’usa Naayinɛ la.
Bisɛ buraa ayima n nyɛ nyuurɔ se’em a pɔɣa ŋmibega poan.
Saŋa ase’a, ba ni parum ti Yehowa Sɛɛradoma gbi’iri la yɛa. Ge bala dela yelemɛŋɛrɛ?
“Yehowa Sɛɛradoma Gbi’iri La Yɛa Bii Ba Soŋeri La Nɛreba?” (La boi jw.org)
-
-
To Wan Eŋɛ Se’em Ta’an Kɔ’ɛ Puti’irɛ SoŋaTara Vom Somɔ Daarewoo!—Baabule Zamesegɔ N Wan Soŋɛ Hɔ
-
-
ZASEŊƆ 35
To Wan Eŋɛ Se’em Ta’an Kɔ’ɛ To Puti’irɛ Soŋa
To za’a nari ti to kɔ’ɛ to puti’irɛ yɛla ase’a poan. To ni kɔ’ɛ to puti’irɛ yele poan se’em la ta’an soŋɛ bii sa’am tomam la Yehowa zɔtɔ nyɔka la. Makerɛ, to ta’an loe zɛ’an ti to bɔta ti to kɛ̃’ɛra, to wan eŋɛ se’em nyɛ laɣehɔ ta’an bisera tomesi bii to ta’an loe ti to wan di pɔɣa bii ele sira. Ho san kɔ’ɛ ho puti’irɛ soŋa, ho wan tara vom somɔ ti Yehowa me puurɛ pee.
1. Ho wan eŋɛ la wani ta’an basɛ ti Baabule la soŋɛ hɔ ti ho kɔ’ɛ ho puti’irɛ soŋa?
Ge ti ho nyaa kɔ’ɛ ho puti’irɛ la, zusɛ Yehowa ti a soŋɛ hɔ ge viisɛ Baabule la poan bisɛ eŋa n geele yele la se’em. (Kaalɛ Magaha 2:3-6.) Yɛla ase’a poan, Yehowa ni kɔ’ɔn pa’alɛ la to wan eŋɛ se’em. La san dɛna bala, hon doose Yehowa nɔɔrɛ n pa’alɛ se’em la n nari.
Ge la san dɛna ti Baabule la kɔ’ɔn ka pa’alɛ to wan eŋɛ se’em mɔpi, to wan eŋɛ la wani? Yehowa wan kelum pa’alɛ hɔ “hon nari ti ho kena sore sɛka poan.” (Isaiah 48:17) Sore kani poan? Daanse’ere naresum yɛla boi n wan ta’an soŋɛ hɔ. Baabule naresum yɛla dela yelemɛŋɛrɛ se’a n pa’alɛ Naayinɛ puti’irɛ ge le paʼalɛ la ani en se’em yɛla poan. To san kaala Baabule la, to ni baŋɛ la ani Naayinɛ se’em mɛ yele poan. To san ti’isɛ baŋɛ la ani Yehowa se’em yele poan, to wan ta’an kɔ’ɛ to puti’irɛ soŋa ti a puurɛ pee.
2. Bem yɛla n nari ti ho ti’isɛ de yele ho san yeti ho kɔ’ɛ puti’irɛ?
Baabule la yeti: “Yɛmdaana ni ma’ɛ la amea ti’isa sɛla woo ti a ita.” (Magaha 14:15) Wana wa vuurɛ dela, to ni ma’ɛ tomesi ti’isɛ yele la poan soŋa soŋa ge nyaa kɔ’ɛ puti’irɛ. Ho san ti’isa yele woo poan bisa, soke homea yeti: ‘Baabule naresum yele deni ti n wan ta’an dekɛ tum tuuma? N wan loe la bem ti la bo mam suma’asum? La wan ana nɛreba la wani la mam n loe sɛla wa? Sɛla n gani za’a dela, la wan basɛ ti Yehowa puurɛ pee?’—Tɛɛnhegɔ 32:29.
Yehowa tari sore ti a pa’alɛ tɔ sɛla n ani soŋa la sɛla n de be’em. To san mina a lɔɔ la, la a naresum yɛla ge kɔ’ɛ to puti’irɛ dɔla a, la wan basɛ ti to tara putɛkeeŋa n ani filam. Putɛkeeŋa la dela sɛla n boi to poan, pa’ala to sɛla n ani soŋa la sɛla n de be’em. (Arom 2:14, 15) To san kumesɛ to putɛkeeŋa la soŋa, la wan taʼan soŋɛ tɔ ti to kɔʼɛ to putiʼirɛ soŋa.
VIISƐ PA’ASƐ
Malum zamesɛ baŋɛ Baabule naresum yɛla la putɛkeeŋa la yele n pakɛ se’em to san yeti to kɔ’ɛ puti’irɛ.
3. Basɛ ti Baabule la pa’ala hɔ
Baabule naresum yɛla wan ta’an soŋɛ to la wani, to san yeti to kɔ’ɛ puti’irɛ? Ŋmɛ VIDIYO la ge nyaa sɔsɛ sokere ana wa:
Fai puti’irɛ dela bem?
Beni n sɔi ti Yehowa bo to fai puti’irɛ?
A dekɛ la bem bo to ti la soŋɛ tɔ ti to tara to fai puti’irɛ la tuna soŋa?
Ho san ɛɛra ho nyɛ naresum yele ayima, kaalɛ Epesus 5:15, 16 ge nyaa sɔsɛ hon wan eŋɛ se’em dekɛ ho saŋa “tuna soŋa soŋa” ta’an . . .
kaala Baabule la daarewoo.
dɛna sirasonkɔ, pɔɣesonkɔ, bisonkɔ la dɔɣera sonkɔ.
kena tansugere zamesegɔ.
4. Kumesɛ ho putɛkeeŋa ti la basɛ ti ho ta’an kɔ’ɛ puti’irɛ soŋa
Baabule Gulesegɔ san bo nɔɔrɛ pa’alɛ yele vuurɛ la ni ka tɔna ti ho loe loesonɛ. Ge Baabule la san ka bo nɔɔrɛ yele la poan, ho wan eŋɛ la wani? Ŋmɛ VIDIYO la ge nyaa sɔsɛ sokere wa:
Vidiyo la poan la, mabipɔka la eŋɛ la bem yɛla kumesɛ a putɛkeeŋa la ta’an kɔ’ɛ a puti’irɛ soŋa ti Yehowa puurɛ pee?
Beni n sɔi ti la ka nara ti to yele nɛreba ti ba kɔ’ɛ puti’irɛ yele poan bo to? Kaalɛ Hebru 5:14 ge nyaa sɔsɛ sokere ana wa:
La ta’an dɛna naana ti to yele nɛreba ti ba kɔ’ɛ puti’irɛ yele poan bo to ge bem ti la nara ti to mina soŋa?
Beni n boi wan ta’an soŋɛ hɔ ti ho kumesɛ ho putɛkeeŋa la ta’an kɔ’ɛ puti’irɛ soŋa?
To putɛkeeŋa la ani wuu map soŋera tɔ ti to ta’an kɔ’ɛ puti’irɛ soŋa to vom poan
5. Tara gilema bɔ’ɔra nɛreba putɛkeeŋa
Nɛreba n boi to’ore to’ore ni loe la yɛla n boi to’ore to’ore. To wan eŋɛ la wani tara gilema bɔ’ɔra nɛreba putɛkeeŋa? Geele yɛla ayi wa bisɛ:
Makerɛ 1: Mabipɔka n nɔŋɛ nɔnɔm n keŋɛ tansugere deyima poan ti mabipɔɣesi zo’e zo’e bɔna bim ka bɔta a nɔnɔm la taaba.
Kaalɛ Arom 15:1 la 1 Korint 10:23, 24 ge nyaa sɔsɛ sokere ana wa:
Kaalegɔ zɛ’ɛsi wa wan ta’an soŋɛ mabipɔka wa la wani? Ho wan eŋɛ la wani se’em ma’a ti ho bɔna la nɛra ti a putɛkeeŋa la ka bɔta a ita sɛla ti ho putɛkeeŋa la bo ho sore ti ho eŋɛ la?
Makerɛ 2: Mabia n mi ti Baabule la ka kisi ti a nyuura daam makera ge amea n kɔ’ɔn zaɣesɛ daam. Ti mabiisi tara ba zi’irego ge beem en ti a nyɛ ti mabiisi la nyuura daam.
Kaalɛ Pa’ala 7:16 la Arom 14:1, 10 ge nyaa sɔsɛ sokere ana wa:
Kaalegɔ zɛ’ɛsi wa wan ta’an soŋɛ mabia wa la wani? Ho wan eŋɛ la wani se’em ma’a ti ho nyɛ ti nɛra ayima iti la sɛla ti homea putɛkeeŋa la ka bɔta?
Bem yɛla n wan ta’an soŋɛ hɔ ti ho kɔ’ɛ puti’irɛ soŋa?
1. Zusɛ Yehowa ti a soŋɛ hɔ ti ho ta’an kɔ’ɛ puti’irɛ.—Yames 1:5.
2. Viisɛ Baabule, la Baabule gɔnɔ poan nyɛ naresum yɛla ta’an dekɛ tum tuuma. Ho me ta’an sɔsɛ la Kristakɔma sɛba n kumesɛ.
3. Geele bisɛ ho loore la n wan basɛ ti ho putɛkeeŋa la nɛreba me putɛkeeŋa ana se’em.
NƐREBA BASƐBA YETI: “Ho ta’an eŋɛ sɛla woo ti ho bɔta. Nɛreba basɛba n ti’isɛ se’em yele ka pakɛ?”
Beni n sɔi ti la nara ti to gɛɛla la wan ana Naayinɛ se’em la nɛreba me se’em?
YELEKPINE
To san baŋɛ la ani Yehowa se’em yele poan, to wan ta’an kɔ’ɛ puti’irɛ soŋa. To me wan bisɛ to itigɔ la n wan soŋɛ bii daam nɛreba se’em.
Tiisegɔ Sokere
To wan eŋɛ la wani ta’an kɔ’ɛ puti’irɛ soŋa ti Yehowa puurɛ pee?
Ho wan eŋɛ la wani ta’an kumesɛ ho putɛkeeŋa la?
Ho wan eŋɛ la wani ta’an tara gilema bɔ’ɔra nɛreba me putɛkeeŋa?
Ɛ BISƐ
Ho wan eŋɛ la wani ta’an kɔ’ɛ ho puti’irɛ soŋa ti hon la Naayinɛ zɔtɔ nyɔka la kpe’em?
“Kɔ’ɛ Ho Puti’irɛ Soŋa Ti Naayinɛ Puurɛ Pee” (The Watchtower, April 15, 2011)
Zamesa pa’asa ta’an bɔkɛ Yehowa n bo’ori to ka’aŋɔ se’em.
Bisɛ yɛla ase’a n soŋɛ buraa ayima ti a ta’an kɔʼɛ a puti’irɛ yele n kpe’em poan.
Zamesɛ pa’asɛ ge baŋɛ ho wan eŋɛ se’em ti Yehowa puurɛ pee a san ka bo pa’alegɔ wana mɔpi yele poan.
“Saŋa Woo Ti La Nara Ti Ho Nyɛ Baabule Lɔɔ?” (The Watchtower, December 1, 2003)
-