ZASEŊƆ 49
Ho Deodoma Wan Eŋɛ La Wani Ta’an Tara Pupeelum?—Bɔberɛ 1
Nɛra la pɔɣa n di taaba ti la ka yue, ta’an ni ti’isa ti pupeelum sebo ti ba daa tara ba pɔɣedire daarɛ la wan kelum bɔna wuusa. La me wan ta’an eŋɛ. Kristakɔma sɛba n boi pɔɣedire poan ti la yue ge me kɔ’ɔn tiregɛ tara Baabule ka’aŋɔ tuna tuuma la, mi ti wana wa wan ta’an tum.
1. Baabule la ka’am sireba la wani?
Yehowa loe la sira ti a dɛna zuodaana deo la poan. (Kaalɛ Epesus 5:23.) Yehowa boti la a loe loore n wan soŋɛ deo la. Baabule la ka’am sireba ti: “Kɔ’ɔn nɔŋɛ ya pɔɣeba.” (Epesus 5:25) Wana wa vuurɛ? Sira n nɔŋɛ a pɔɣa iti en la soŋa ba san bɔna yire ba ma’a la nɛreba zɛ’an. A te’ele en mɛ daaŋɔ poan ge me mɔɔra bisa a pɔɣa inganɛ poan yɛla la eŋa n wuni dama se’em. (1 Timoti 5:8) Sɛla n gani za’a dela, a kɔ’ɔn bisa a vo’osum poan yɛla mɛ. (Matu 4:4) Makerɛ, a ta’an naɛ la a pɔɣa la zusa ge kaala Baabule la. Sira san nɔŋɛ ge bisera a pɔɣa, la ni basɛ ti a tara la bɔnsoŋa la Yehowa.—Kaalɛ 1 Peter 3:7.
2. Baabule la ka’am pɔɣeba la wani?
Naayinɛ Yetɔɣum la yeti pɔɣa nari ti a “bɔ’ɔra a sira gilema zo’e zo’e.” (Epesus 5:33) A wan eŋɛ la wani ta’an eŋɛ bala? A ta’an ti’isa a sira la halesoma yele la eŋa n mɔɔri bisera en la ba kɔma la se’em la. A me ta’an eŋɛ pa’alɛ ti a bo’ori gilema, a san soŋera a sira n loe ti ba eŋɛ sɛla ge me tɔɣera gilema sore poan bɔ’ɔra en, a sira la san puɣum ka pu’usa Yehowa.
3. Nɛra la a pɔɣa wan eŋɛ la wani ti ba pɔɣedire la ana soŋa?
Baabule la tɔɣɛ nɛra la a pɔɣa yele ti: “Bayi la wan dɛna inganɛ yinɛ.” (Matu 19:5) Wana wa pa’alɛ ti ba ka nari ti ba ita sɛla n wan sa’am ba nɔŋerɛ la. Ba iti wana doose la ba nyɛti nɛŋa bɔ’ɔra taaba ge sɔsera ba puti’irɛ n de se’em bɔ’ɔra taaba nɔŋerɛ sore poan ge ka suɣera sɛsɛla. Ba kan basɛ ti sɛsɛla bii nɛresɛka yele pakɛ ba gana ba sira bii ba pɔɣa san daɣena Yehowa ma’a. La nari ti ba bisɛ bamea soŋa ti ba da ba’ɛ ana du’a du’a la buraa bii pɔka yiŋa.
VIISƐ PA’ASƐ
Bisɛ Baabule naresum yɛla n wan ta’an soŋɛ ho pɔɣedire la.
4. Sireba—nɔŋɛ ya pɔɣeba ge bisera ba soŋa
Baabule la yeti “sireba nari ti ba nɔŋɛ ba pɔɣeba wuu bamesi iinsi la.” (Epesus 5:28, 29) Bala vuurɛ? Ŋmɛ VIDIYO la ge nyaa sɔsɛ sokere wa:
Sore ani poan ti sira wan ta’an eŋɛ pa’alɛ ti a nɔŋɛ a pɔɣa mɛ ge bisera en?
Kaalɛ Kolose 3:12 ge nyaa sɔsɛ sokere wa:
Sira wan ta’an dekɛ hala ana wa tum tuuma la wani a pɔɣedire poan?
5. Pɔɣeba—nɔŋɛ ya sireba ge tara gilema bɔ’ɔra ba
Baabule la yele pɔɣa ti a bɔ’ɔra a sira gilema, a sira la pu’useri Yehowa bii a ka pu’useri woo. Kaalɛ 1 Peter 3:1, 2 ge nyaa sɔsɛ sokere ana wa:
Ho sira san ka pu’usa Yehowa, nɔkpe’ene kai ti ho wan bɔta ti a pu’usa En. Hon ti’isɛ ti bem n wan soŋɛ ho sira la—hon kɔ’ɔn tɔɣera Baabule yɛla bɔ’ɔra en saŋa woo bii hon tari halesoma ge bɔ’ɔra en gilema? Bem zuo?
Sira la a pɔɣa ta’an naɛ taaba kɔ’ɛ puti’irɛ soŋa. Ge saŋa ase’a pɔɣa la ta’an kan sakɛ bo a sira la puti’irɛ la. A ta’an tɔɣɛ a puti’irɛ n de se’em gilema sore poan ge a nari ti a tɛra ti Yehowa dekɛ tuunɛ la bo la a sira la ti a loe sɛla n wan soŋɛ a deodoma. Pɔɣa la nari ti a soŋɛ mɛ ti a sira n loe sɛla la tum. Pɔɣa la san ita bala, a ni basɛ ti pupeelum bɔna yire la poan mɛ. Kaalɛ 1 Peter 3:3-5 ge nyaa sɔsɛ sokere wa:
La ni ana Yehowa la wani pɔɣa san bɔ’ɔra a sira gilema?
6. Ya wan ta’an maalɛ yeledaaŋɔ la n bo ya pɔɣedire la poan la
Pɔɣedire ka boi ana kasi. Bala la, nɛreba la ba pɔɣeba nari ti ba naɛ taaba maala ba yeledaaŋɔ. Ŋmɛ VIDIYO la ge nyaa sɔsɛ sokere ana wa:
Vidiyo la poan la, bem yɛla n eŋɛ pa’alɛ ti nɛra la a pɔɣa la zaaɛ mɛ la taaba?
Bem yɛla ti ba eŋɛ ta’an basɛ ti ba pɔɣedire la ana soŋa?
Kaalɛ 1 Korint 10:24 la Kolose 3:13. Ho san kaalɛ gulesegɔ woo ba’asɛ, sɔsɛ sokere wa:
Nɛra la a pɔɣa san dɔla pa’alegɔ kana wa, la wan soŋɛ ba pɔɣedire la wani?
Baabule la yeti to tara na’asegɔ bɔ’ɔra taaba. Ho san na’asa nɛra, ho iti en la soŋa ge bɔ’ɔra en gilema. Kaalɛ Arom 12:10 ge nyaa sɔsɛ sokere ana wa:
Sira bii pɔɣa nari ti a gura ti a luɣerɛ kpɛ’a la na’asɛ en yia? Bem zuo?
NƐREBA BASƐBA YETI: “Mam la n luɣerɛ kpɛ’a ka le ana du’a du’a wuu to daa ani se’em la.”
Hon wan tɔɣɛ la bem pa’alɛ ti Baabule la wan ta’an soŋɛ ba?
YELEKPINE
Nɛra la a pɔɣa wan ta’an tara pupeelum ba san nɔŋɛ taaba, bɔ’ɔra taaba gilema ge me tara Baabule naresum yɛla tuna tuuma.
Tiisegɔ Sokere
Buraa wan eŋɛ la wani ti pupeelum bɔna pɔɣedire la poan?
Pɔka wan eŋɛ la wani ti pupeelum bɔna pɔɣedire la poan?
Ho san tara sira bii pɔɣa, bem Baabule naresum yele n wan ta’an soŋɛ ho pɔɣedire la?
Ɛ BISƐ
Zamesɛ baŋɛ yelese’a ti ho wan ta’an eŋɛ ti la basɛ ti hon la ho deodoma tara pupeelum.
Bisɛ vidiyo yuunɛ n pa’alɛ ti hon la ho luɣerɛ kpɛ’a san tara Naayinɛ ka’aŋɔ tuna tuuma ya pɔɣedire poan, ya nyɛti la kã’a.
Viisɛ baŋɛ la vuurɛ n de sɛla ti ho nana ho sira n de zuodaana la.
“Beni N Sɔi Ti La Nara Ti Pɔɣeba Siregera Bamesi Bɔ’ɔra Ba Sireba?” (The Watchtower, May 15, 2010)
Nɛra la a pɔɣa yuun eŋɛ la wani taʼan maalɛ ba pɔɣedire yeledaaŋɔ?