Vom La Na’am Tuuma Zamesegɔ Viisegɔ Gɔŋɔ

JANUARY 4-10

NAAYINƐ TUULUM YƐLA | MALEMA 18-19

“Kɔ’ɔn Tara Sarum Soŋɔ”

w19.06-E 28 ¶1

To Nyɛti Te’elego Se’em Ti Sitaana Bɛregɔ La Ka Nyɔkera Tɔ

Yehowa n yuun tɔɣeri pa’ala tinse’a n lɛm Israeldoma la n tari tuunfɛ̃’ɛsa se’em la, a yuun ka’am Israeldoma la ti: “Ya da eta wo Kanaan teŋa la te n tare ya yɛ’a ka poan na la nɛreba n ete se’em la. . . . Ba toonfɛn’ɛha la ganlom teŋa la mɛ, te mam dekɛ namehegɔ bahɛ ka zuo na.” Israel zilam Naayinɛ la yuun bisɛ nyɛ ti Kanaandoma la tuuma yuun fɛ̃’ɛ mɛ ti ka nɛreba la za’a dɛna dɛɣerɔdoma.​—Mal. 18:3, 25.

w17.02-E 20 ¶13

Yehowa Biseri A Nɛreba Mɛ

Bisɛ nadoma wa n yuun tari yelemɛŋɛrɛ ge me bɔna ba tɔka se’em nyana tinse’esi n yuun lɛm ba ge me tara asaala yɛm tuna yɛm pɔ’ɔrɛ tuuma la! Kanaandoma bisega poan, nɛreba la yuun tuni la tuunfɛ̃’ɛsa n de wuu nɛra la a suɔ n gã taaba, buraa la buraa bii pɔka la pɔka n gã taaba, nɛra n gã la dusi, tara kɔma kaabera bɔ’ɔra baɣa. (Mal. 18:6, 21-25) Leyɛ’ɛsa, Babilon la Egypt bisegadoma yuun ka basɛ ti ba nɛreba bɛɣesa bamea wuu Naayinɛ n yuun bo Israeldoma la nɔɔrɛ ti ba bɛɣesa bamea se’em la. (Kan. 19:13) Ba boi la ba tɔka la Naayinɛ nɛreba la n yuun nyɛ ba nɛŋadoma la n basɛ ti ba vo’osum poan, ba sareŋɔ poan la ba inganɛ bɔŋa ana filam se’em la. La niɛ peelum ti, Yehowa yuun biseri ba mɛ.

w14-E 7/1 7 ¶2

Naayinɛ N Wan Eŋɛ Be’em Se’em

Ge nɛresɛba n ka boti ba tee ge kelum kirɛ tuba tuna tuunfɛ̃’ɛsa, ita bamam n boti sɛla la? Ti’isɛ bisɛ Naayinɛ n yele se’em wa: “Nɛre tontɔɔdoma la wan vɔna teŋa la poan, sɛba n ka tare tuure wan yee teŋa la poan, ge ba wan ŋma potɔpa la bahɛ, ge vɔn nɛre wuruba la ka poan.” (Magaha 2:21, 22) Sankaŋa la, tuunfɛ’ɛsadoma la kan le bɔna. Bɔnkaŋa poan la, asaaleba sɛba n nani Naayinɛ nɔɔrɛ la wan bɔna la fai ti be’em kan le paara ba.​—Arom 6:17, 18; 8:21.

Vo’osum Poan Yɛla

w06-E 6/15 22 ¶11

“Mam Nɔŋɛ Ho Pa’alegɔ La Mɛ!”

Yelese’ere n pa’asɛ buyi Moses Lɔɔ la poan n pa’alɛ ti Naayinɛ fabeli a nɛreba la yele mɛ dela eŋa n yuun bo yɔ’ɔ ti tarendoma yi’isa dia la. Yehowa yuun bo nɔɔrɛ ti Israel kaara san kɛ̃ dia a va’am poan, a basɛ ti sɛba n ka tari la yi’isɛ sɛla n gee la. Kaareba yuun ka nari ti ba kɛ̃ ba va’am la kinkɛlesi la za’a bii ba lebe ta pi’ise daam bii kaam tiwɔla la n gee la. Ba yuun san tamɛ ki bɔbena ase’a, la ka nari ti ba lebe va’am la poan ta dekɛ. Wana wa yuun dela sɛla n soŋeri nasedoma, saama, kiibesi la pɔkɔ̃pa. La boi bim ti yi’isegɔ dela tuunkãtɛ ge wana wa yuun soŋɛ nɛreba mɛ ti ba ka ɛɛra zusa.​—Malema 19:9, 10; Tɛɛnhegɔ 24:19-22; Yooma 37:25.

JANUARY 11-17

NAAYINƐ TUULUM YƐLA | MALEMA 20-21

“Yehowa Nɛreba Boi La Ba Tɔka”

w04-E 10/15 11 ¶12

Hon Wan Kɛ̃ Paradiisi La Poan?

Sɛla n le bɔna ti la nara ti to tɛra de yele. Naayinɛ yuun yele Israeldoma la ti: “Dole ya nɔse’a woo te n bɔ’ɔra ya zina wa. Bala te ya wan nyɛ paŋa ta sɔe teŋsɛka te ya yeti ya wan yakɛ sɔna la.” (Tɛɛnhegɔ 11:8) Malema 20:22, 24, me tɔɣɛ teŋa wa yele mɛ ti: “Tare ya mam malema wa la n nɔze’elego wa, la ya dɔla a, te teŋsɛka poan te n tare ya yɛ’a wa da ta zagahɛ ya. Mam mɛŋa n yele yamam yeti, ya wan sɔe ba teŋa la. N wan dekɛ ka bo ya te ka dɛna ya sɔ’ɔlom. Ka dela teŋa n zote la iilom la seerom wo ko’om la.” Yelemɛŋɛrɛ, ba san wan kɛ̃ Pu’ulumbiŋe Teŋa la poan, la nari ti ba tara bɔnsoŋa la Yehowa Naayinɛ. Israeldoma tubekirega la zuo ti Naayinɛ yuun bo yɔ’ɔ ti Babilondoma zabɛ nyaŋɛ ba ge sa’ɛ ba teŋa la poan.

it-1-E 1199

Tɔ̃tɛ

Nɛra san ki ge basɛ a lɔɣɔrɔ, a bikeema bii sɛba n nari ti ba vaɛ lɔɣɔrɔ la n wan tee soe; nɛra sɔ bii sɔyaaba san ki, bikeema la bii nɛresɛba n nari la n wan tee soe vaɛ lɔɣɔrɔ la. Ba dekɛ la Hebru itigɔ yelebire na·chalʹ (yu’urɛ yelebire, na·chalahʹ) tum tuuma. La pa’alɛ la hon wan dekɛ sɛla bo bii tee soe lɔɣɔrɔ kinɔ zuo. (Kan 26:55; Eze 46:18) Saŋa ase’a, ba ni dekɛ itigɔ yelebire ya·rashʹ tum tuuma ti la pa’alɛ la nɛra n “sɔe” sɛla eŋa n de keenma la zuo. (Pin 15:3; Mlm 20:24) La me ta’an ze’ele bo hon dekɛ lengima “dige” nɛreba yese teŋa poan. (Tɛ 2:12; 31:3) Greek yelebɛa la n pa’alɛ tɔ̃rɛ la makɛ me la yelebire la n de kleʹros la, ti la yuun ze’ele bo “gbaŋa” nyaa ta ze’ele bo ‘kinɔ’ ge ti pooren la nyaa dɛna ‘tɔ̃rɛ.’​—Mt 27:35; Tm 1:17; 26:18.

it-1-E 317 ¶2

Niisi

Kokemɔ la pooren la, Noah yuun dekɛ la “niihe se’ehe n de toolom” la dusi kaabɛ bo Naayinɛ. (Pin 8:18-20) Bala pooren ti Naayinɛ yuun bo yɔ’ɔ ti nɛresaala me ta’an kɔregɛ niiŋa ge obe ka. (Pin 9:1-4; dekɛ makɛ Mlm 7:26; 17:13.) Niisi ase’a n yuun de ‘tuulum’ dusi la pa’alɛ ti Naayinɛ n yuun loe niisi bamam taaba ti ba tara kaabera bɔ’ɔra en. Baabule la pa’alɛ ti ba yuun ka tari niisi se’a ti ba dita la niisi se’a ti ba ka dita san daɣɛ la Moses Lɔɔ la poan ti ba yuun tara “ganleŋɔ” niisi. (Mlm 11:13-19, 46, 47; 20:25; Tɛ 14:11-20) Ba ka pa’alɛ Baabule la poan ba yuun ni eŋɛ se’em ta’an baŋɛ niiŋa sɛka n de “ganleŋɔ” niiŋa. La boi bim ti niisi bana zo’e zo’e yuun dela niisi se’a n diti nɛnɔ ge la daɣɛ ba za’a n de bala. (Bisɛ HOOPOE.) Ge se’em ma’a ti nɔbiŋere paalega la yuun pɔsɛ tuna tuuma la, kisigo wa yuun ka le bɔna wuu Naayinɛ n yuun basɛ ti Peter baŋɛ liligere poan se’em la.​—Tm 10:9-15.

Vo’osum Poan Yɛla

it-1-E 563

Ŋmata Inya

Naayinɛ Lɔɔ la kisere nɛra n ki ti nɛreba ŋmata bamea kum la zuo. (Mlm 19:28; 21:5; Tɛ 14:1) Sɛla n sɔi ti bala ka ana soŋa dela Israeldoma la yuun dela zilam nɛreba bɔ’ɔra Yehowa. (Tɛ 14:2) Bala zuo la, Israeldoma la yuun dela ba da gãlum bamea la baɣa yɛla. Nɛra n ni ki ti baɣɛkaabereba la yuun ni kaasa ge ŋmata bamea se’em la, bala yuun ka nari ti Israeldoma ita yele ana wa la bamam n mi kum n ani se’em ge me tara beere sa’am kum isigere puti’irɛ la. (Da 12:13; Heb 11:19) Leyɛ’ɛsa, Israeldoma la n yuun ka nari ti ba ŋmata bamea la, wan basɛ ti ba tara gilema bɔ’ɔra Naayinɛ naaŋɔ lɔɣɔrɔ, asaala inya la.

JANUARY 18-24

NAAYINƐ TUULUM YƐLA | MALEMA 22-23

“De’eŋo Saŋa La Tari Vuurɛ Mɛ Bɔ’ɔra Tomam”

it-1-E 826-827

Boroboro N Ka Tari Mi’isum De’eŋo

Boroboro N Ka Tari Mi’isum De’eŋo yia dabeserɛ la yuun dela tuulum laɣesegɔ ge me dɛna vo’osego dabeserɛ. Yi’i dabeserɛ la n de Nisan 16 la, ba ni dekɛ la ki n de Palestine teŋa didiiŋa la bɔbenɛ bo malema nɛŋadaana la. Ge ti ba nyaa pɔsɛ de’eŋo wa la, ba yuun ka nari ti ba di didiiŋa la. Wɔ̃sum sore poan ti malema nɛŋadaana la wan dekɛ didiiŋa wa bɔbenɛ yuulum Yehowa nɛŋa ge nyaa dekɛ peraa soŋa n de yuunɛ ti la dɛna nyɔ̃’a bo’olum kaabɛ. A wan le dekɛ ki zom nɔm bu la kaam ti daam bo’olum laɣum pa’asɛ. (Mlm 23:6-14) Ba yuun ka bo nɔɔrɛ ti ba nyɔ̃’ara ki la bii zom la kaabegɔ daka la zuo wuu malemadoma la n yuun iti se’em yuuma pooren la. Daɣɛ teŋa la za’a ma’a n yuun tari didiiŋa bo’olum bɔ’ɔra ge yɔ’ɔ yuun boi mɛ ti Israel yire woo bii nɛra woo wan ta’an dekɛ a bo’olum ta bo ti la dɛna fara bo’olum de’eŋo la saŋa poan.​—Yɛh 23:19; Tɛ 26:1, 2; bisɛ FIRSTFRUITS.

La Yele N Pakɛ Se’em. Ba yuun diti boroboro n ka tari mi’isum sankaŋa la, yuun kɔ’ɔn makɛ mɛ la Yehowa n yuun dekɛ pa’alegɔ seko bo Moses ti la bɔna Yɛhega 12:14-20, ti la tara ninmɔ’ɔrɛ yele a kaalegɔ zɛ’an 19 la: “Dabeha ayopɔe, ya da bahɛ te mi’ihom pon pota ya zen’an.” Tɛɛnhegɔ 16:3 la, ba me yi’iri boroboro n ka tari mi’isum la “namehegɔ boroboro,” la me dela sɛla n tiiseri Yudadoma la yuunɛ woo pa’ala ba yuun eŋɛ kalam se’em yese Egypt teŋa (ti ba yuun ka tara nɛŋa ti ba mi’ilum ba zom [Yɛh 12:34]). Bala yuun basɛ ti Israeldoma la tiɛ la ba yuun boi yamenɛ poan ti la wuna ba se’em la ti Yehowa yuun yeti “bala te ya wan tɛnra ya vom poan se’em ma’an te ya yehe Mizraim teŋa poan la.” Ba yuun nyaa boi fai la wan basɛ ti ba baŋɛ ge me mina ti Yehowa n de ba Fãara ti la nara ti yuunɛ woo poan, ba dekɛ yia laɣesegɔ kãra atã la dɛ’ɛna de’eŋo pɛɣera en.​—Tɛ 16:16.

it-2-E 598 ¶2

Dabesa Ayopɔi De’eŋo (Pentecost)

Dabesa Ayopɔi De’eŋo daarɛ la, ba yuun ni dekɛ la mui didiiŋa tari ta bo Yehowa. Ge mui didiiŋa malema yuun boi la de to’ore la ki didiiŋa la. Mui zom la wɔla mɛ’ɛ pia puregerɛ poan sugumnɔɔrɛ buyi (4.4 L; 4 dry qt) ti ba wan dekɛ pa’asɛ mi’isum poan maalɛ boroboro bayi. Ba yuun dela ba maalɛ a, ba “bɔŋa zen’an” ti la pa’alɛ ti ba wan maalɛ ba wuu ba ni maala boroboro ba yɛa poan se’em la ge daɣɛ ba ni maalɛ zilam boroboro la se’em la. (Mlm 23:17) Ba yuun ni dekɛ la nyɔ̃’a bo’olum la be’em kaabegɔ bo’olum laɣum bo ge me ni le dekɛ peraasi siyi kaabɛ ti la dɛna suma’asum bo’olum. Malemadaana la ni dekɛ boroboro bayi la ge ŋma piisi siyi la eŋɛ la a nu’usin yuulum Yehowa nɛŋa ti la pa’alɛ ti a dekɛ kaabɛ bo la Yehowa. A san dekɛ boroboro bo ge kaabɛ piisi la ba’asɛ, malemadaana la n wan dekɛ di ti la dɛna suma’asum bo’olum.​—Mlm 23:18-20.

w14-E 5/15 29 ¶11

Hon Kelum Naɛ La Yehowa Tigere La Bɔna?

To wan nyɛ nyuurɔ to san dɔla Yehowa tigere la n kpemeseri to giila ti to tara tuntuna Paul ka’aŋɔ wa tum tuuma la: “Bahɛ ya te to tɛnra taaba yele, ete dena wa la to soŋora taaba, tara nɔŋerɛ ge me eta sɛla n an soŋa. Da bahɛ te to tare ya eteseko te nɛreba basɛba tara ka bɔta ba lagom na la taaba la, ge ton bahɛ ya te to soŋora taaba maan pa’aha te ya nyɛ te dabahese’ere te to Daana Yesu lɛbera na la pɔnre.” (Heb. 10:24, 25) Yuunɛ woo de’eŋo la laɣesegɔ ase’a ti ba yuun ni laɣesɛ taaba pu’usa Naayinɛ la yuun kpemese Israeldoma la giila mɛ vo’osum poan. Leyɛ’ɛsa, Paɣesi Tĩ’a De’eŋo la n yuun boi Nehemia saŋa la yuun tari la pupeelum. (Yɛh. 23:15, 16; Ne. 8:9-18) Tomam me nyɛti nyuurɔ la bala to zamesegɔ la to laɣebibisi la laɣesekãra poan. Basɛ ya ti to dɔla maaseŋɔ ana wa soŋa ta’an tara imma’asum la pupeelum vo’osum poan.​—Titus 2:2.

Vo’osum Poan Yɛla

w19.02-E 3 ¶3

Kɔ’ɔn Tara Ho Birikinte La!

Naayinɛ yamesi n tari birikinte pa’alɛ la ba wan yese ba suure za’a nɔŋɛ Yehowa ge ana tapilapi la en ta’an ita sɛla ti a bɔta la. Bisɛ la vuurɛ n de sɛla. Baabule la poan “birikinte” vuurɛ dela: za’a bii kasi. Makerɛ n wana, Lɔɔ la yuun yeti la nari ti Israeldoma la dekɛ dusi n ani kasi kaabɛ bo Yehowa. (Mal. 22:21, 22) Naayinɛ nɛreba yuun ka nari ti ba dekɛ duŋa n bɛ̃’ɛri bii duŋa ti ka na’arɛ bii niho bii tuberɛ ka bɔna kaabɛ bo Naayinɛ. La yuun dela ninmɔ’ɔrɛ bo Yehowa ti duŋa la ana kasi bii duŋa la da see. (Ma. 1:6-9) Bala n basɛ ti to bɔkɛ sɛla n sɔi ti Yehowa bɔta ti duŋa la ana kasi bii da see la. To san ni yeti to da sɛla, daanse’ere tiwɔla, gɔŋɔ bii lɔkɔ, to ni ka bɔta ti to da se’em n sa’am. To ni bɔta la se’em n ani soŋa bii kasi. La ani Yehowa me la bala la to tari nɔŋerɛ la yelemɛŋɛrɛ bɔ’ɔra en la. La nari ti to sɛla woo ana kasi ge me di mi’a.

JANUARY 25-31

NAAYINƐ TUULUM YƐLA | MALEMA 24-25

“Peraa Iila Peebego Yuunɛ La Beere Sa’am Fai Bɔŋa La”

it-1-E 871

Fai Bɔŋa

Fai Bɔŋa Naayinɛ. Yehowa n de fai bɔŋa Naayinɛ la. Eŋa n yuun faaɛ Israeldoma la yese yamenɛ poan Egypt teŋa. A yuun yele ba ti ba san nana a nɔya la, ba wan bɔna fai ge me kan koŋe sɛsɛla. (Tɛ 15:4, 5) David yuun yeti Yerusalem yɛa la wan ‘bɔna fai’ ti sɛla kan daana ba. (Ym 122:6, 7) Ge Lɔɔ la yuun yeti buraa san dɛna nasa, a ta’an dekɛ amea tisɛ yamenɛ poan ta’an bisa amea la a deodoma. Lɔɔ la yuun le yeti, yuuma ayopɔi poan la Hebru nɛra wa wan bɔna la fai a yamenɛ la poan. (Yɛh 21:2) Peraa iila peebego yuunɛ la (yuun 50 woo poan), nɛra woo yuun boi la fai teŋa la poan. Hebru yameŋa woo yuun boi la fai ge ti buraa woo yuun tara yɔ’ɔ ti a lebe kule a yire.​—Mlm 25:10-19.

it-1-E 1200 ¶2

Tɔ̃tɛ

Samanɛ n yuun de yizuo woo buuri saŋa nɛreba lɔkɔ la zuo, la yuun ka nari ti se’em dekɛ de koose. Ba yuun ni geele la samanɛ la n wan ta’an maalɛ dia se’em ge nyaa koose de gura Peraa Iila Peebego saŋa la, ti ba ni dekɛ nɛra woo zɛ’an bo en hali zɛ’an la daana san puɣum ka nyaŋɛ yɔ to’e ka. (Mlm 25:13, 15, 23, 24) Tinse’a n yuun ka tari lalesi la yuun laɣum dɛna la samana. Ge tinse’a n yuun tari lalesi la, nɛra san da zɛ’an la, la wan dekɛ la yuunɛ ti zɛ’an la daana wan le to’e a zɛ’an la. La me san dɛna la Levidoma yɛa la, bamam n kɔ’ɔn sɔna ba zɛ’ɛsi la saŋa woo sɛla n sɔi la, ba ka tari zɛ’an le leyɛ’ɛsa.​—Mlm 25:29-34.

it-2-E 122-123

Peraa Iila Peebego Saŋa

Ba san dɔla Peraa Iila Peebego saŋa lɔɔ la soŋa, la wan gu ti teŋa la nɛreba kan tara bɔɣesegɔ ba teŋasuka ti la nyaa ta basɛ ti nasedoma la buntateba bɔna wuu to nyɛti se’em zina beere wa la. Lɔɔ la yuun basɛ ti teŋa la bɔŋa ana la soŋa ti se’em ka bɔna ti la wan wuŋɛ en ti a ka tara ŋmɛregerɛ zɛ’an ge nɛra woo wan tuɣum dekɛ la a mi’ilum la a paŋa laɣum soŋɛ teŋa la. Yehowa n yuun pa’ali Israeldoma la ge kã’ara bɔ’ɔra ba la zuo ti ba teŋa la yuun maala dia soŋa la. Israeldoma la me yuun san nana Yehowa ba yuun wan nyɛ gɔmena sɛka bisega n di mi’a ti suma’asum la pupeelum bɔna.​—Isa 33:22.

Vo’osum Poan Yɛla

w09-E 9/1 22 ¶4

Nɛra San Eŋɛ Ho Sɛla Ti La Daam Hɔ

Israel nɛra san zabɛ la atadaana ti nɛra la niho pusege, Lɔɔ la bo yɔ’ɔ ti ba dɔlegɛ a tuberɛ wuu la nari se’em la. Ge mina ti ba pɔɣelum la yuun ka tari sore ti a eŋɛ mina n pɔɣelum en la sɛla bii a zabɛ la nɛra la suɔ. Lɔɔ la yeti la nari ti a tari yele la keŋɛ kpɛ’ɛndoma la n de gãkereba la zɛ’an ti ba maalɛ yele la soŋa. Ba san mina ti nɛra la mi mɛ fii ge tum be’em la bii pɔɣelum atadaana la, bala wan basɛ ti ba dɔlegɛ a tuberɛ ti nɛra woo nyɔɣɛ yɛm yele wa poan. Ge la daɣɛ la bala ma’a.

FEBRUARY 1-7

NAAYINƐ TUULUM YƐLA | MALEMA 26-27

“To Wan Eŋɛ Se’em Ti Yehowa Kã Bo To”

w08-E 4/15 4 ¶8

Zaɣesɛ “Yeleyooro”

‘Ligeri’ wan ta’an eŋɛ la wani dɛna to yinɛ? Aatɔ, makɛ bisɛ kugere n gã diimi Israeldoma samanɛ poan. Ba ta’an dekɛ kugere wa mɛ yire bii lalega. Ge ba san dekɛ kugere wa biŋe ti ku dɛna “bagarɛ” bii “bakologo,” la wan basɛ ti Yehowa nɛreba lui. (Mal. 26:1) Bala mea nɔɔ ti ligeri me ana. To eeri ligeri ti la soŋɛ to mɛ ti to ta’an pu’usa Yehowa. (Pa. 7:12; Luke 16:9) Ge to san dekɛ ligeri ti la dɛna ninmɔ’ɔrɛ gana to Krista tuuma la, bala ta’an basɛ ti ligeri me dɛna to yinɛ. (Kaalɛ 1 Timoti 6:9, 10.) Teŋgɔŋɔ wa poan ti nɛreba dekɛ ligeri ti la dɛna ninmɔ’ɔrɛ ba vom poan se’em la, tomam nari ti to ita sɛla woo ti la makɛ ma’a ligeri poan.​—1 Tim. 6:17-19.

it-1-E 223 ¶3

Ɔmi’isa

Yehowa n yuun ani la Moses se’em ge dekɛ en tum tuuma la zuo, Naayinɛ nɛreba yuun tari la ɔmi’isa (Heb., moh·raʼʹ) la Moses. (Tɛ 34:10, 12; Yɛh 19:9) Sɛba n yuun tari sakerɛ la yuun tari zoolum bɔ’ɔra Moses kpe’eŋo la mɛ. Ba yuun baŋɛ ti Naayinɛ yuun doli la a poan tɔɣera bɔ’ɔra ba. Yehowa sogorɛ la me yuun dela ɔmi’isa bɔ’ɔra Israeldoma la. (Mlm 19:30; 26:2) Wana wa pa’alɛ ti la yuun nari ti ba bisa sogorɛ la soŋa, ba pu’usa Yehowa eŋa n boti se’em ge ti ba sareŋɔ me makɛ la a nɔya la za’a.

w91-E 3/1 17 ¶10

Basɛ Ti “Yenɛ Sunma’ahom La” Bɔna Ho Suuren

Yehowa yuun yele a nɛreba la ti: ‘Ya san nam mam malema la n nɔya la, mam wan basɛ ti saa ni la n nari se’em ti dia maalɛ ti tiisi wɔm wɔla. Mam wan basɛ ti suma’asum bɔna ya teŋa wa poan, ti ya gã’a ti dabeem ka bɔna. N wan sa’ɛ mɔen bunbɛ’ɛsi ge ti zaberɛ kan bɔna ya teŋa la poan. Mam wan dɛna ya Naayinɛ dɔla ya poore ti ya dɛna n nɛreba.’ (Malema 26:3, 4, 6, 12) Israeldoma la wan tara suma’asum, bɔna fai ti ba dinedoma kan daana ba, tara taresum zo’e zo’e ge me tara bɔnsoŋa la Yehowa. Ba san nana Yehowa Lɔɔ la, bala n wan basɛ ti ba nyɛ kã’a wa.​—Yooma 119:165.

Vo’osum Poan Yɛla

it-2-E 617

Bã’asi

Ba Zaɣesɛ Naayinɛ Lɔɔ La N Ta’asɛ. Naayinɛ yuun kã’am Israeldoma la ti ba san zaɣesɛ eŋa nɔbiŋere la, a wan basɛ ti ‘bã’asi sige ba zuo.’ (Mlm 26:14-16, 23-25; Tɛ 28:15, 21, 22) Baabule la poan, nɛra san tara imma’asum, daanse’ere inganɛ poan bii vo’osum poan a ti’isɛ ti la dela Naayinɛ kã’a (Tɛ 7:12, 15; Ym 103:1-3; Mag 3:1, 2, 7, 8; 4:21, 22; Lil 21:1-4) ge ba de be’emdoma ge me ka di mi’a la zuo ti bã’asi yuun paara ba la. (Yɛh 15:26; Tɛ 28:58-61; Isa 53:4, 5; Mt 9:2-6, 12; Yon 5:14) La de yelemɛŋɛrɛ ti yɛla ase’a poan Yehowa Naayinɛ mea n yuun ni basɛ ti bã’asi sige nɛreba la zuo wuu konkom n yuun sige Miriam la Uzia la Gehazi zuo se’em la. (Kan 12:10; 2Ye 26:16-21; 2Na 5:25-27) Ge yɛla ase’a zo’e zo’e poan, la dela bamea be’em la zuo ti bã’asi la yuun paara ba la. Ba yuun burɛ sɛla la ti ba kɛ’ɛra; ti la pa’alɛ ti ba be’em tuuma la n yuun basɛ ti la wuna ba. (Ga 6:7, 8) Sɛba n yuun tuni yalumtuuma la, tuntuna Paul yuun yeti Naayinɛ “dekɛ ba tehɛ te ba eta toonbe’sebo woo te ba sunya bɔta, ge te ba tona vitooma la taaba. . . . Bala, te Yenɛ nameha ba ba toonbe’ero la zuo.”​—Arom 1:24-27.

FEBRUARY 8-14

NAAYINƐ TUULUM YƐLA | KANLƐ 1-2

“Yehowa Tigeseri A Nɛreba Mɛ”

w94-E 12/1 9 ¶4

Yehowa Pu’usegɔ N Nari Ti La Bɔna To Vom Poan Se’em

Ho san bisa nyɛta la zãzaarɛ ge ta’an bisɛ nyɛ Israeldoma la n yuun boi goo la poan se’em la, ho wan nyɛ la bem? Ho wan nyɛ la nɛrekuuŋɔ n de tusa tusa atã bii gaŋɛ bala, n tigese bamea soŋa soŋa ge tĩ ba tɛnti yɛa nyaa pu taaba buuri sugumnɔɔrɛ butã kɛ̃’ɛra saazuo bɔba, teŋanɔɔrɛ bɔba, dapɔa bɔba la zaɣenɔya bɔba. Ho san bisera ba bɔŋa la soŋa, ho wan nyɛ tigesego ayima n lɛm tiiseŋɔ la teŋasuka. Tigesego sugumnɔɔrɛ bunaasi wa n pɔ’ɛ ge dɛna tɛnti yɛa wa dela Levi buuri nɛreba la n bala. Tiiseŋɔ la teŋasuka poan, ba tĩ la sɛla n boi de to’ore ge dekɛ tana pile ku. Deo wa yuun dela “sogorɛ” la, ti Israeldoma ‘sɛba n mi lɔɣɔmaalegɔ la, maalɛ’ ku wuu Yehowa n pa’alɛ se’em la.​—Kanlɛ 1:52, 53; 2:3, 10, 17, 18, 25; Yɛhega 35:10.

it-1-E 397 ¶4

Tiiseŋɔ

Israeldoma tiiseŋɔ la yuun zo’e mɛ paa. Ba kãlɛ yuun dela buraasi 603,550 n mi zaberɛ, pɔɣesi la kɔma, buranya’asi la pɔɣenya’asi la tarendoma. Levidoma yuun dela 22,000 nyaa dekɛ “nɛresɛba n dagɛ Israel buuri la me zo’e” ti ba za’a kãlɛ dɛna 3,000,000 bii gaŋɛ bala. (Yɛh 12:38, 44; Kan 3:21-34, 39) To ka mi ba yuun wan ɛɛra zɛ’an n yalegɛ se’em ti ba zi’ire; nɛreba n geele zɛ’an la yaleŋa n zoni se’em la boi la tɔka tɔka. Ba yuun ta tĩ ba tɛnti la Moab bɔ̃’ɔ la poan lɛm Yeriko. Ba yuun pa’alɛ ti ba tĩ ba tɛnti la bala “ze’ele Bet Yesimot ta paɛ Abel Sitim.”​—Kan 33:49.

Vo’osum Poan Yɛla

it-2-E 764

Kãlɛ

Ba yuun ni doose la yizuo woo tuusum la ba buuri la poan kaalɛ nɛreba la. La yuun daɣɛ la ba yeen kɔ’ɔn ɛɛra kaala nɛreba la ma’a. Baabule la pa’alɛ sɛla n sɔi ti ba yuun kaala nɛreba teŋa la poan mɛ. La ta’an dɛna lampo yɔa, lengima tuuma bii (Levidoma) la ti ba yuun ni loe ba ti ba tuna sogorɛ la poan la.

FEBRUARY 15-21

NAAYINƐ TUULUM YƐLA | KANLƐ 3-4

“Levidoma Tuuma”

it-2-E 683 ¶3

Malemadaana

Nɔbiŋere Lɔɔ La Poan. Israeldoma n yuun boi yamenɛ poan Egypt teŋa la, Yehowa yuun dekɛ Israeldoma dayɔkeema woo ti ba dɛna la a denɛ ge yuun ku Egyptdoma dayɔkeema woo too pia la poan. (Yɛh 12:29; Kan 3:13) Dayɔkeendoma wa yuun dela Yehowa denɛ ti a yuun loe ba ti ba tuna a tuuma. Naayinɛ yuun ta’an dekɛ ni Israel dayɔkeema woo ti ba dɛna malemadoma la sɛba n wan bisera sogorɛ la. Ge a yuun tuɣum dekɛ la Levi buuri buraasi la ti ba tuna a tuuma la. Bala zuo ti a yuun dekɛ Levidoma dayɔkeema woo tee teŋa la buuri 12 (Yosef dayɔɔsi Efraim la Manase buuri bayi) dayɔkeema woo la. Kaalegɔ la poan la, ba yuun baŋɛ ti dayɔkeendoma 273 n yuun daɣɛ Levi dayɔɔsi la, dela buraasi n de ŋmarega poan kɔ’ɔn yɛ’ɛsa gana Levidoma buraasi la. Bala n sɔi ti Naayinɛ yuun yeti la dela pɛregerɛ ti dayɔkeendoma 273 la yɔɔra ba be’em duusego lampo sanlenpeelega kpila anuu ($11) bɔ’ɔra Aron la a dayɔɔsi. (Kan 3:11-16, 40-51) Yehowa yuun loe la Aron yizuo la n boi Levi buuri la poan la ti ba dɛna malemadoma ge nyaa bo nɔɔrɛ ti ba yɔɔra lampo la bɔ’ɔra ba.​—Kan 1:1; 3:6-10.

it-2-E 241

Levidoma

Ba Tuuma. Levidoma yizuto la yuun dela batã, kɔ’ɔn pɔsera Levi dayɔɔsi Gerson (Gersom), Kohat la Merari. (Pin 46:11; 1Ye 6:1, 16) Goo la poan la, ba yuun bo yizuto batã wa la zɛ’an n lɛm sogorɛ la. Kohatdoma la n yuun de Aron yizuo la, yuun boi la sogorɛ la dapɔa bɔba. Kohatdoma basɛba la me yuun boi la teŋanɔɔrɛ bɔba, ti Gersondoma la me bɔna zaɣenɔya bɔba ge ti Meraridoma la bɔna saazuo bɔba. (Kan 3:23, 29, 35, 38) Levidoma la n yuun tĩ’iri, fuɣesa ge ziira sogorɛ la. Ba san ni yeti ba isige keŋɛ, Aron la a dayɔɔsi la n ni pilege tana la n pĩ Zilam zɛ’an la Zilam Saraa la ge ni pĩ nɔbiŋere daka nɔze’elego la, daka bimbina la, tuulum kuɣesi la laasi la. Kohatdoma la n yuun ziiri lɔɣɔrɔ ana wa. Gersondoma n ziiri tana la, sogorɛ la tana la, la ka mi’isi la (sogorɛ la mi’isi) ge ti Meraridoma bisera dɔɔrɔ seto ti ba ni sele, dɔpaɣelesi la se ze’elesi, kpa’asi la ba mi’isi (sogorɛ la zinzaka la mi’isi).​—Kan 1:50, 51; 3:25, 26, 30, 31, 36, 37; 4:4-33; 7:5-9.

it-2-E 241

Levidoma

Moses saŋa la, Levi nɛra san paɛ yuuma 30 ti a wan ta’an tum a zugbere tuuma, n de wuu a ziira sogorɛ la lɔɣɔrɔ ba san fuɣesɛ ka ti ba keŋɛ. (Kan 4:46-49) A san dɛna yuun 25 a ta’an tum tuuma ase’a ge daɣɛ tuunkãra n de wuu a ziira sogorɛ la lɔɣɔrɔ. (Kan 8:24) Naba David saŋa la, ba yuun sigese yuuma la mɛ ti la nyaa dɛna yuuma 20. Sɛla n sɔi ti David yuun sigese yuuma la dela, ba yuun ka le ziira sogorɛ la (n tee dɛna pu’usegɔ deo la) ɛɛra. Levi nɛra yuun san paɛ yuun 50, la dela a basɛ a pɛregerɛ tuuma la sogorɛ la poan. (Kan 8:25, 26; 1Ye 23:24-26; bisɛ AGE.) Levidoma la yuun nari ti ba zamesa Lɔɔ la soŋa se’ere n sɔi la, bamam n yuun kaali ku bɔ’ɔra nɛreba la ge pa’ala ba.​—1Ye 15:27; 2Ye 5:12; 17:7-9; Ne 8:7-9.

Vo’osum Poan Yɛla

w06-E 8/1 23 ¶13

Tara Yɛm Ge Zɔta Naayinɛ!

David n yuun boi daaŋɔ poan ti Yehowa soŋɛ en se’em la yuun basɛ ti a zɔta Naayinɛ mɛ ge dekɛ amea delum en. (Yooma 31:22-24) Sugumnɔɔrɛ butã poan ti David yuun ka le tara zoolum bɔ’ɔra Naayinɛ la yuun basɛ ti yeledaaŋɔ zo’e zo’e n yuun paɛ en. Yia la dela eŋa n yuun basɛ ti ba dekɛ Yehowa nɔbiŋere daka la yaɣelɛ toroko zuo keŋɛ Yerusalem ge yeti Levidoma la da zi ka wuu Naayinɛ Lɔɔ la n yele se’em la. Uzah n yuun biseri toroko la ge ti daka la yuun yeti la lu la, a yuun gurɛ Daka la mɛ, ti Naayinɛ ku en bilam bilam la eŋa n “kalom daka la.” Yelemɛŋɛrɛ, Uzah yuun tum la be’em paa ge la yuun dela David n ka dekɛ Naayinɛ Lɔɔ la tum tuuma la n ta’asɛ ti yele wa yuun sige ba zuo la. To zoti Naayinɛ vuurɛ dela to tara yelese’a ti a pa’alɛ to la tuna tuuma soŋa.​—2 Samuel 6:2-9; Kanlɛ 4:15; 7:9.

FEBRUARY 22-28

NAAYINƐ TUULUM YƐLA | KANLƐ 5-6

“Ho Wan Eŋɛ La Wani Ta’an Tɔɣesa Nazardoma La?”

it-2-E 477

Nazar Nɛra

Nazar nɛra yuun san biŋe nɔɔrɛ, a yuun tari la kisego atã n de ninmɔ’ɔrɛ: (1) Ba yuun ka nari ti ba nyu daam; ba di daam tiisi tiwɔla, bunkãsa, bunbĩ’ima, bunkɛ’ɛsi bii ba nyu ba daam, ba me da nyu tiwɔla daam n kele bii ba nyu ba mi’isego. (2) Ba ka nari ti ba kɛ ba zuo zonto. (3) Ba yuun ka nari ti ba kalam kum hali la san puɣum dɛna la ba yire nɛra, ba sɔ, ma bii suɔ.​—Kan 6:1-7.

Nɔbiŋa Se’a N Boi De To’ore. Nɛresɛka n yuun biŋe nɔɔrɛ n boi de to’ore wa “te a yehe a mɛŋa [kã amea bɔna a tɔka] bo mam Na’ayenɛ dɛna Nazar” nɛra dela a bɔna wuu la nari se’em la ge daɣɛ ti nɛreba pɛɣera en la eŋa n zaɣesɛ amea yɛla ase’a la zuo la. Ge “saŋsɛka te a bɔkɛ a mɛŋa tɔka bo Na’ayenɛ la woo, a dela Na’ayenɛ toolom bonɔ.”​—Kan 6:2, 8; dekɛ makɛ Pin 49:26.

Nazardoma la n yuun nari ti ba dɔla pa’alegɔ se’a la yuun dela ninmɔ’ɔrɛ paa Yehowa pu’usegɔ poan. Wuu malema nɛŋadaana la n yuun tari zilam tuuma la zuo, a yuun ka nari ti a kalam kum la san puɣum dɛna la a yire nɛra la, Nazar nɛra me yuun ani la bala mea nɔɔ. Malema nɛŋadaana la a soŋereba la tuuma la n yuun de ninmɔ’ɔrɛ la zuo, ba yuun ka nari ti ba nyu daam ba san tuna ba zilam tuuma la Yehowa nɛŋa.​—Mlm 10:8-11; 21:10, 11.

Leyɛ’ɛsa, Nazar nɛra (Heb., na·zirʹ) yuun nari ti “a bahɛ te a zuo zonto wɔgɛ yula,” bala wan dɛna daalesum ti nɛra woo baŋɛ ti a dela Nazar nɛra. (Kan 6:5) Hebru yelebire n de na·zirʹ la mea nɔɔ ti ba dekɛ tum tuuma la tiisi se’a ti ba “ka maalɛ se” zilam Vo’osegɔ Daarɛ la, la Peraa Iila Peebego saŋa la. (Mlm 25:5, 11) Sɛla n le basɛ ti la dɛna pakerɛ dela sanlema bonlamehega la n labi malema nɛŋadaana zuvɔka la zuo la ti ba gulesɛ yeti ‘Yehowa ma’a n de zilam’ la, yuun dela “zilam kã’a bunɔ [Heb., neʹzer, ze’ele la na·zirʹ yelebire la poan].” (Yɛh 39:30, 31) Bala mea nɔɔ, ti Israel nadoma n yuun vugi munsɛka la dɛna neʹzer. (2Sa 1:10; 2Na 11:12; bisɛ CROWN; DEDICATION.) Krista tansugere la poan, tuntuna la yeti pɔka tari la zonwogoro ge daɣɛ zuvɔka. La tiiseri pɔka la ti a boi la a tɔka la buraa ge ti la me nara ti a sirege amea dɔla Naayinɛ pa’alegɔ. Bala la, pa’alegɔ la n de ba da kɛ ba zonto la (dela sɛla n ka nari bɔ’ɔra buraa). Ba ka nyuuri daam ge me ana filam ka gãlena bamea la, yuun basɛ ti Nazar nɛra bɔkɛ la de ninmɔ’ɔrɛ se’em ti a zaɣesɛ yele ana wa za’a ge tuna Yehowa suure n boti sɛla.​—1Ko 11:2-16; bisɛ HAIR; HEAD COVERING; NATURE.

Vo’osum Poan Yɛla

w05-E 1/15 30 ¶2

Sokese’a Ti Nɛreba Sɔkera

Samson yuun dela Nazar nɛra n boi a tɔka. Ge ti ba yuun dɔɣɛ Samson la, Yehowa maleka yuun yele a ma yeti: “Se’ere n sɔe ho wan nyɔkɛ poore dɔgɛ bodibila. Bia la baraga ka kalene a zuo. Ka pon bɔna pooren la, te mam yelege ka bo Yenɛ, te enŋa wan fan Israeldoma wa Pilistidoma nu’uhen bahɛ.” (Kema 13:5) Samson yuun ka biŋe nɔɔrɛ ti a dɛna Nazar nɛra. Naayinɛ n yuun loe en ti a dɛna Nazar nɛra a vom za’a poan. La yuun ka nari ti a dɔla kisego la n de ba da kalum kum la. La san dɛna ti la yuun nari mɛ ge ti a ka mina ge kalum kum, la wan eŋɛ la wani ti a wan le dɛna Nazar nɛra la eŋa n pɔsɛ bo a dɔɣum poan la? La niɛ peelum ti, sɛba n yuun de Nazar nɛreba ba vom za’a poan la, yuun boi la ba tɔka la sɛba mea n loe ti ba dɛna Nazar nɛreba la.