Vom La Na’am Tuuma Zamesegɔ Viisegɔ Gɔŋɔ

MAY 3-9

NAAYINƐ TUULUM YƐLA | KANLƐ 27-29

“Tɔɣesa Yehowa N Ka Gãseri Nɛreba La”

w13-E 6/15 10 ¶14

Tara Pupeelum La Yehowa Hala La

Pugeto banuu la, yuun keŋɛ Moses zɛ’an ta soke en yeti: “Bene zuo te to sɔ yu’urɛ wan saalom yizuo la poan n ka tare bodibila la zuo?” Ge nyaa belum yeti: ‘Bo ya tɔ tɔ̃tɛ to sɔ suurɔ lɔɣɔrɔ la poan.’ Moses yuun zaɣesɛ mɛ yoi ge yeti, ‘Pa’alegɔ ka boi n yele bala’? Aayi, a yuun “tare ba yele la wa’an Na’ayenɛ zen’an na.” (Kan. 27:2-5) Yehowa yuun yeti bo? A yuun yele Moses yeti: “Zelopehad pɔyɔɔhe la n yele se’em la dela sera. Dekɛ ba sɔ tɔntɛ a sɔɔnrɔ lɔgɔrɔ la poan bo ba te la dɛna ba sɔ’ɔlom, lebehe dekɛ ba sɔ lɔgɔrɔ la bo ba.” Yehowa yuun le yele la sɛla pa’asɛ. A yuun basɛ ti pa’alegɔ wa lebege la lɔɔ ge nyaa yele Moses ti: “Se’em han ki ge ka bahɛ bodibila, ba dekɛ a lɔgɔrɔ la bo a pɔyɔa.” (Kan. 27:6-8; Yos. 17:1-6) Sankaŋa la, Israel pɔka woo san bɔna bɔnkaŋa taaba poan, a wan nyɛ a tɔ̃tɛ.

w13-E 6/15 11 ¶15

Tara Pupeelum La Yehowa Hala La

Bisɛ la yuun de yelesonɛ ge ti welesego ka bɔna bim se’em! Yehowa yuun zu’usɛ pɔɣesi wa n de tarendoma la mɛ wuu eŋa n yuun ani la ba Israel tadaandoma se’em la. (Ym. 68:5) Yeledena wa la yɛla zo’e zo’e n eŋɛ Baabule la poan basɛ ti to baŋɛ ti Yehowa ka gãseri a yamesi.​—1 Sa. 16:1-13; Tm. 10:30-35, 44-48.

w13-E 6/15 11 ¶16

Tara Pupeelum La Yehowa Hala La

To wan eŋɛ la wani ta’an tɔɣesa Yehowa n ka gãseri nɛreba la? Tɛra ti, yelebire la n de da gãsera la vuurɛ dela sugumnɔɔrɛ buyi. To san ka tara welesego bala n wan soŋɛ tɔ ti to kan gãsera. Yelemɛŋɛrɛ, to za’a waabi ni kɔ’ɔn yeti to dela sɛba n tari putɛsonɛ ge me ka gãsera nɛreba. Tomea mi soŋa soŋa ti, la daɣɛ naana ti to ta’an baŋɛ to suure la soŋa. Bala, to wan eŋɛ la wani baŋɛ nyaa to ka gãseri nɛreba? Tɔ, Yezu n yuun boti a baŋɛ nɛreba n mi en se’em la, a yuun soke la a zɔsonɔ la ti: “Nɛreba yeti Asaala Dayɔa dela ane?” (Mt. 16:13, 14) To kan bɔta ti to me tɔɣesa Yezu? Ho ta’an soke ho zɔ ti ho mina ti ba wan tɔɣɛ yelemɛŋɛrɛ bo ho ta’an baŋɛ nyaa ho dela mina n ka gãseri nɛreba. Ho san soke en ti a yele ho ti ho tari la sɛla fii n de buuri nɛ’ɛsegɔ bii ho gãseri la nɛreba, ho nari ti ho eŋɛ la bem? Mu’ɛ nini zusɛ Yehowa, yele en sɛla n boi ho suuren ge belum en ti a soŋɛ hɔ ti ho ta’an tee ti la makɛ la eŋa n ka gãseri nɛreba la.​—Mt. 7:7; Kol. 3:10, 11.

Vo’osum Poan Yɛla

it-2-E 528 ¶5

Bo’olum

Daam bo’olum. Israeldoma la n yuun ta bɔna Pu’ulumbiŋere Teŋa la, ba yuun ni dekɛ la daam bo’olum la bo’olum ase’a laɣum bo. (Kan 15:2, 5, 8-10) Bo’olum wa yuun dela daam (“sebo n kele”) ti ba ni ka’ɛ eŋɛ bimbine la zuo. (Kan 28:7, 14; dekɛ makɛ Yɛh 30:9; Kan 15:10.) Tuntuna Paul yuun gulesɛ bo Kristakɔma n boi Filipi ti: “Mam vom ka’ɛ wo daam kaanbegɔ bo’olom, te la bahɛ te yan nam Yesu se’em la zo’e, mam poore wan pee.” Kaalegɔ wa poan, eŋa n yeti daam bo’olum la, a yuun tɔɣeri pa’ala la eŋa n ãaregɛ amea se’em tuna bɔ’ɔra Kristakɔma. (Flp 2:17) Eŋa n yuun ta pɔ̃ra a kum la, a yuun gulesɛ bo Timoti ti: “La an me wo ba dekɛ mam mɛ ko la. Dena wa vɔnrɛ dela dabaherɛ la paɛ ya.”​—2Ti 4:6.

MAY 10-16

NAAYINƐ TUULUM YƐLA | KANLƐ 30-31

“Lebese Ho Nɔbiŋere La”

it-2-E 1162

Nɔbiŋere

Nɛra San Biŋe Nɔɔrɛ La Kɔ’ɔn Dɔla En Mɛ. Nɛra mea n yuun ni biŋe nɔɔrɛ. Ge a san kɔ’ɔn biŋe nɔɔrɛ, la dela pɛregerɛ bɔ’ɔra nɛra la ti a lebese nɔɔrɛ la wuu lɔɔ la n pa’alɛ se’em la. Bala la, ba tɔɣɛ nɔbiŋere yele ti ‘ku dela nɛra la vom,’ ti a san ka nyaŋɛ yɔ ba wan tee dekɛ a vom. (Kan 30:2; le bisɛ Arom 1:31, 32.) Nɛra la vom n wan bɔna dɛŋa poan la zuo ti Baabule la yeti nɛra san yeti a biŋe nɔɔrɛ, la nari ti a bisɛ amea soŋa ta’an baŋɛ yelese’a ti a yeti a eŋɛ la, la a pɛregerɛ tuunɛ. Lɔɔ la yeti: “Ho han pɔ nɔɔrɛ la Na’ayenɛ . . . Na’ayenɛ ho Yenɛ la gure de mɛ te ho wan tara tuure de zuo. Ya han ka pɔ nɔɔrɛ la dagɛ be’em.”​—Tɛ 23:21, 22.   

it-2-E 1162

Nɔbiŋere

La dela nɛra n yese a suuren tɔɣɛ bo Naayinɛ ti a eŋɛ sɛla, la ta’an dɛna bo’olum, a tum tuunɛ bii a gu amea yɛla ase’a poan n daɣɛ be’em. Nɔbiŋere dela sɛla ti nɛra la mea yuun ni ya’ɛ a nɔɔrɛ tɔɣɛ. Nɔbiŋere n de sɛla ti nɛra ni yese a suuren tɔɣɛ la, tari paŋa gana nɔpɔtɛ mɛ ge Baabule la zɛ’ɛsi ase’a poan, yelebɛa ana ayi wa ni kɔ’ɔn dɔla la taaba. (Kan 30:2; Mt 5:33) “Nɔbiŋere” pa’alɛ la nɛra n maasum ti a tum sɛla ge ti “nɔpɔtɛ” me dɛna nɛra n belegere kpɛ’ɛndoma ti a ta’an tɔɣɛ yelemɛŋɛrɛ bii la niɛ peelum pa’alɛ ti sɛla ti a yeti a yele la dela yelemɛŋɛrɛ. Ba yuun san biŋe nɔɔrɛ ba ni pɔ la nɔɔrɛ pa’alɛ ti ba wan dekɛ tum tuuma.​—Pin 26:28; 31:44, 53.

w04-E 8/1 27 ¶3

Kanlɛ Gɔŋɔ La Yelekpina

30:6-8​—Kristabia wan ta’an gu a pɔɣa nɔbiŋere? Zina beere wa to san tɔɣera nɔbiŋere yele, Yehowa nyaa biseri la a yameŋa woo nɔbiŋere. Makerɛ n wana, nɛra san kã amea bo Yehowa la dela amea nɔbiŋere. (Galatia 6:5) Sira la ka tari sore ti a gu a pɔɣa nɔbiŋere. La nɔɔ boi bini ti pɔɣa la ka nari ti a biŋe nɔɔrɛ ti la tara daaŋɔ la Naayinɛ Yetɔɣum la n pa’alɛ se’em la bii a sira la n nari ti a bɔna la en se’em.

Vo’osum Poan Yɛla

it-2-E 28 ¶1

Yepta

Ba ta’an basɛ ti nɛra dekɛ a vom za’a tuna bɔ’ɔra Yehowa sogorɛ la poan. La yuun dela yɔ’ɔ ti dɔɣereba wan ta’an dekɛ tum tuuma. Hana n yuun nan ka dɔɣɛ Samuel la, a yuun biŋe nɔɔrɛ ti a wan basɛ ti a ta bɔna sogorɛ la poan tuna. A sira Elkana yuun sakɛ nɔbiŋere wa mɛ. Samuel n yuun ta go’e bi’isum la, Hana yuun tari en keŋɛ la sogorɛ la poan. Hana yuun tari bia la mɛ keŋɛ ge dekɛ duŋa pa’asɛ ta kaabɛ. (1Sa 1:11, 22-28; 2:11) Samson me yuun dela bia ti ba dekɛ en bo Naayinɛ ti a dɛna Nazar nɛra.​—Ke 13:2-5, 11-14; bisɛ Kan 30:3-5, 16 n pa’alɛ sɔ nɔɔrɛ yelesum n tari paŋa gana a poyɔa se’em.

MAY 17-23

NAAYINƐ TUULUM YƐLA | KANLƐ 32-33

“Dige Ka Poan Nɛreba La Zan’an”

w10-E 8/1 23

Hon Mi?

“Kuŋkuma zuto” la yuun dela bem ti Hebru Gulesegɔ la tɔɣɛ i yɛla la?

Israeldoma la n yuun ta pɔ̃ra Pu’ulumbiŋere Teŋa la, Yehowa yuun yele ba yeti ba sa’am kunkuma zuto baɣa la ti Kanaandoma la yuun kaabera la. Naayinɛ yuun bo nɔɔrɛ ti, “sagom ba kuga la te ba kaanbera la, la ba yelese’a te ba mɛ ze’ele kaanbera la, ge sagom ba baga kaanbegɔ zen’enhe n boe kuŋkuma zuto la zan’an.” (Kanlɛ 33:52) Zɛ ana wa ti ba yuun tara kaabera baɣa wa yuun ta’an bɔna yiŋa kunkuma zuo bii bimbina ti ba mɛ ti la bɔna tiisi tila bii yɛa poan. (1 Nadoma 14:23; 2 Nadoma 17:29; Ezekiel 6:3) Ba yuun mɛ la bimbina ge me tara baɣa duɣerɔ, tuuta, tuko dɔɔrɔ, ko’ɛnka lɔɣɔrɔ la bãsi kaabera baɣa la.

w08-E 2/15 27 ¶5-6

Tɛra Israeldoma La N Yuun Tue Se’em La

Zina beere wa, yɛla zo’e zo’e paari to mɛ wuu la yuun paɛ Israeldoma la se’em la. Baɣa kaabegɔ kɔ’ɔn bɔna zɛ’an woo mɛ zina beere wa. Yele ana wa dela ligeri, de’endɛ’ɛneba, giilekpemesegodoma, nalɛɣereba, pu’usegɔ nɛŋadoma hali la to yidoma. Yele ana wa ta’an basɛ ti to puti’irɛ bɔna ba poan. To san nyɔɣɛ nɛrebana wa n ka pu’useri Yehowa la zɔtɔ, bala ta’an basɛ ti to ma’ɛ vo’osum poan.

Baal pu’usegɔdoma la yuun nɔŋɛ la yalumtuuma bala n yuun sɔi ti ba nyaŋɛ pã’asɛ Israeldoma zo’e zo’e. Yele ana taaba kelum pã’asera Naayinɛ nɛreba la bala mea. Makerɛ, ho san bɔna ho ma’a ge di’e kompiita ti ho bisɛ sɛla ge ana lɛɛ bɔta ti ho nyɛ yɛla ase’a, bala ta’an basɛ ti ho ta sa’am ho putɛkeeŋa la. Bisɛ la wan dɛna nimbãalega se’em Kristabia san basɛ ti Intanɛt poan yalumfɔɔra pã’asɛ en!

it-1-E 404 ¶2

Kanaan

Yosua yuun dekɛ la yɛm tum tuuma “ka gee se’ere yelese’a te Na’ayenɛ daa bo Moses nɔɔrɛ te a tom la poan bahɛ” wuu Yehowa n yeti ba sa’am Kanaandoma la se’em la. (Yos 11:15) Ge Israeldoma la yuun zaɣesɛ mɛ ka doose a pa’alegɔ la n de ba kɔ’ɔn sa’am yelese’a n dɛɣeri teŋa la. Kanaandoma la n yuun kelum naɛ la ba bɔna la yuun basɛ ti Israeldoma la gãlum mɛ ti pooren ba zo’e zo’e yuun ki (ge ti tuunfɛ’ɛsa, yalumtuuma la baɣa kaabegɔ ka pa’asɛ) gana Kanaandoma la za’a ti ba yuun yeti ba ku la. (Kan 33:55, 56; Ke 2:1-3, 11-23; Ym 106:34-43) Yehowa yuun kaɣɛ Israeldoma la ti eŋa daɣɛ mina n gãseri nɛreba a tontɔɔ gãkerɛ tuuma poan yele yele wuu Israeldoma la n yuun dekɛ bamea ta laɣum la Kanaandoma la dita ba pɔɣeba, naɛ la ba pu’usa ge tuna ba malema la. Tuunfɛ’ɛsa ana wa dela yelese’a ti nɛreba la yuun tuna ti Naayinɛ yuun maasum ti a sa’am ba ti ‘teŋa la me zaɣesɛ ba la.’​—Yɛh 23:32, 33; 34:12-17; Mlm 18:26-30; Tɛ 7:2-5, 25, 26.   

Vo’osum Poan Yɛla

it-1-E 359 ¶2

Beene

Ba san ta ŋmɛ gbaŋa la baŋɛ buuri sɛka n wan sɔna zɛsɛka, ba nyaa ni bisɛ la ka nɛreba n zuni se’em ti ba ta’an baŋɛ ba wan bo ba zɛ’an la ti la yalegɛ paɛ se’em. “Ya ŋmɛ gbaŋa ya yizuto la woo zuo, tɔnrɛ teŋa la bo ya mɛhe, bo ya sɛba n zo’e la zo’e, ge bo sɛba n pɔ’e la me pɔ’ɛ. Te kaŋa n nyɔkɛ zen’an bo se’em, a daana tɔntɛ n bala.” (Kan 33:54) Ba san ŋmɛ gbaŋa, ba ni kɔ’ɔn sakɛ buuri la n wan zi’ire zɛ’an la mɛ ge ba ta’an tee yɛla ase’a doose la ka nɛreba n zuni se’em la zuo. Bala la, ba yuun ta baŋɛ ti Yuda buuri zɛ’an la yuun yalegɛ mɛ la, ba yuun ãaɛ zɛ’an la mɛ pa’asɛ Simeon buuri la.​—Yos 19:9.

MAY 24-30

NAAYINƐ TUULUM YƐLA | KANLƐ 34-36

“Basɛ Ti Yehowa Dɛna Ho Suka Zɛ’an”

w17.11-E 9 ¶4

Hon Suɣɛ Yehowa Zɛ’an?

Israeldoma la yuun ni eŋɛ la wani nɛra san ka mina ge ku nɛra? La boi bim ti la di’e en mɛ ge a kelum tara taalɛ mɛ la eŋa n ku nɛra la. (Pin. 9:5) Ge ba tari nimbɔ̃’ɔ bɔ’ɔra en la zuo, yɔ’ɔ yuun boi mɛ ti a wan ta’an zɔ keŋɛ suka tisi siyoobe la poan ti mina ti a ku la suɔ da paɛ en. Bilam ti a wan nyɛ te’elego. Nɛra la n ka mi ge ku nɛra la yuun dela a kɛ̃’ɛra teŋa la poan ta paɛ se’em ma’a ti malema nɛŋadaana la wan ki.​—Kan. 35:15, 28.

w17.11-E 9 ¶6

Hon Suɣɛ Yehowa Zɛ’an?

Nɛra san ka mina ge ku nɛra, la dela a zɔ keŋɛ suka teŋa la ta “ze’ele teŋa la nayaŋa nɔɔrɛn la a pa’alɛ lan eŋɛ se’em bo teŋa la keendoma la.” La yuun dela ba to’e en soŋa. (Yos. 20:4) Dabesa ayi poan, ba yuun ni tari en me lebe ta bo teŋsɛka ti a ku nɛra la keendoma ti ba gãkɛ yele la. (Kaalɛ Kanlɛ 35:24, 25.) Ba san gãkɛ nɛra la baŋɛ ti a ka mi ge ku nɛra la, ba wan basɛ ti a lebe suka teŋa la poan ta bɔna.

w17.11-E 11 ¶13

Hon Suɣɛ Yehowa Zɛ’an?

Nɛra san bɔna suka teŋa la poan, a boi la fai. Yehowa yuun tɔɣɛ tisi wa yele ti: “Zɔ keŋɛ gankerɛ teŋhe la poan ta kɛn’era.” (Yos. 20:2, 3) Yehowa yuun ka boti ba gãkɛ nɛra wa n ka mi ge ku nɛra la leyɛ’ɛsa; la me ka nari ti se’em ti a ku la suɔ kɛ̃ suka teŋa la poan ta ku nɛra la. Nɛra wa n ka mi ge ku nɛra la ka nari ti a fabela ti ba wan lerege sanɛ. A san bɔna teŋa la poan, Yehowa n te’eli en ti a bɔna fai. Zɛ’an wa yuun daɣɛ sarega. Nɛra san bɔna teŋa wa poan, a yuun tari yɔ’ɔ mɛ ti a tuna, soŋera nɛreba ge me pu’usa Yehowa la suma’asum. Sira, a wan tara pupeelum la vom somɔ!

Vo’osum Poan Yɛla

w91-E 2/15 13 ¶13

La Dela Lua Bunɔ Bo Nɛra Woo

Adam la Hawa yuun ka nyɛ nyuurɔ lua bunɔ wa poan. Moses Lɔɔ la tari la naresum yele wa: “Da to’e ligiri ge bahɛ se’em tuure n de a ki.” (Kanlɛ 35:31) Adam yuun mi la fii ge tum be’em, ba yuun ka pã’asɛ en. (1 Timoti 2:14) Eŋa n yuun eŋɛ sɛla la ani wuu a ku la a yaasi la, sɛla n sɔi la a be’em la taɛ ba za’a mɛ ti ba kiira. Bala la, Adam n ani kasi ge mina fii ge zaɣesɛ Naayinɛ nɔɔrɛ la, nari la kum. Yehowa yuun san basɛ ni ti Adam nyɛ lua bunɔ la nyuurɔ, la kan makɛ la a tontɔɔ tuuma la pa’alegɔ. Eŋa n yɔ Adam be’em la zuo ti kum kan le kuura Adam yaasi bala wuusa! (Arom 5:16) Yele la vuurɛ dela, be’em n tari paŋa sa’ana se’em la kan le bɔna. Yezu yuun ‘ki bo to za’a waabi’ mɛ nyaa yuun soe zɛ Adam yaasi la be’em.​—Hebru 2:9; 2 Korint 5:21; 1 Peter 2:24.

MAY 31–JUNE 6

NAAYINƐ TUULUM YƐLA | TƐƐNHEGƆ 1-2

“Na’ayenɛ N Bo Ya Sore Te Ya Gankera”

w96-E 3/15 23 ¶1

Yehowa Nɔŋɛ La Tontɔɔ Tuuma La Yelemɛŋɛrɛ

La dela keendoma zugbere yele ti ba gãkɛ nɛra n tum be’em tansugere la poan. (1 Korint 5:12, 13) Ba san ita bala, ba tɛri Naayinɛ n boti ba tara nimbɔ̃’ɔ se’em bɔ’ɔra nɛra la. Ba san bisɛ ti nɛra la ka boti a basɛ a be’em la, la ka nari ti ba tara nimbɔ̃’ɔ bɔ’ɔra en. La daɣɛ ti keendoma la ni yaɛ nɛra la mɛ zuo ti ba ni yese en tansugere la poan basɛ. Ba ni tara puti’irɛ ti ba san yese en basɛ, bala wan soŋɛ en ti a tee. (Dekɛ makɛ Ezekiel 18:23.) Krista n de ba nɛŋadaana la zuo, keendoma iti sɛla woo la tontɔɔ ti la pa’alɛ ti ba dela “soka zen’an te . . . sabekantɛ lɔbeha.” (Isaiah 32:1, 2) La nari ti ba tara putɛsonɛ ge me da gãsera nɛreba.​—Tɛɛnhegɔ 1:16, 17.

w02-E 8/1 9 ¶4

Kɔ’ɔn Nana Naayinɛ Kpe’eŋo

Nɛra yuun san mina Lɔɔ la ge dɛna gãkerɛdaana, bala ma’a ka seke. Ba yuun ka di mi’a la zuo, keendoma la yuun dela ba bisa bamea soŋa ta’an gu putɛbe’o ba suuren​—wuu punya’anɛ, nɛreba gãseka la nyika​—n wan ta’an basɛ ti ba kan gãkera yɛla soŋa la. Moses yuun yele ba yeti: “Da tare ya ninkɔɔra yɛla gankerɛ poan. Gankere ya nɛrekanreba la taromdoma boyena. Da zote ya nɛra se’em. Na’ayenɛ n bo ya sore te ya gankera.” Yelemɛŋɛrɛ, Israel gãkereba la yuun gãkeri bɔ’ɔra la Naayinɛ. Bisɛ la yuun de yɔ’ɔ kãtɛ se’em bɔ’ɔra ba!​—Tɛɛnhegɔ 1:16, 17.

Vo’osum Poan Yɛla

w13-E 9/15 9 ¶9

Yehowa Tiisegɔ Yɛla Dela Tuulum

Israeldoma la n yuun dekɛ yuun 40 bɔna sore zuo dɔla “pɔgɔtia zen’kantɛ la n daa de nyɔnpɔnhega zen’an” la, Yehowa yuun ka pa’alɛ ba wan eŋɛ se’em ta’an tɛ’ɛla bamea, bisa bamea ge tɔ’ɔsa a pa’alegɔ. Ge a yuun kelum tiisa ba ti la nari ti ba dekɛ bamea delum en ge dɔla a pa’alegɔ. Yehowa n yuun ni dekɛ sangbanɛ pa’ala ba sore dabeserɛ poan ge tara bugum pa’ala ba sore nyu’uŋɔ la, basɛ ti Israeldoma la baŋɛ me ti a boi me la ba ge tara ba dɔla pɔɣetia la poan. (Tɛɛ. 1:19; Yɛh. 40:36-38) A yuun bo’ori ba sɛla n pakɛ ba mɛ. “Ba futo ka makɛ aanhom, bii ba na’ma fuuhom ba kenɛ la zuo.” Yelemɛŋɛrɛ, ti “sɛla [yuun] ka kɔŋɔra ba.”​—Ne. 9:19-21.

JUNE 7-13

NAAYINƐ TUULUM YƐLA | TƐƐNHEGƆ 3-4

“Yehowa Lɔɔ Di La Mi’a Ge Me Ana Soŋa”

it-2-E 1140 ¶5

Bɔkerɛ

Nɛra san mu’ɛ nini zamesa ge tara Naayinɛ Yelesum la tuna tuuma bala n wan soŋɛ en ti a ta’an ti’isa nyɔkera yɛla gana sɛba n de a pa’alegɔdoma la ge me tara bɔkerɛ gana bunkureba. (Ym 119:99, 100, 130; dekɛ makɛ Lu 2:46, 47.) Bala dela yelemɛŋɛrɛ, se’ere n sɔi la yɛm la bɔkerɛ boi la Naayinɛ pa’alegɔ la bu kisa la n di mi’a la poan; bala zuo la Israeldoma la san sirum dɔla a pa’alegɔ la soŋa, la wan basɛ ti teŋse’a n lɛm ba la baŋɛ ti ba “dela yam la bɔkerɛ doma.” (Tɛ 4:5-8; Ym 111:7, 8, 10; dekɛ makɛ 1Na 2:3.) Nɛra n tari bɔkerɛ mi ti Naayinɛ Yelesum la ka tari tuure ge me wan bɔta ti a zusɛ Naayinɛ ti a soŋɛ en ti a vɔna a vom ti la makɛ la bala. (Ym 119:169) Nɛrekana ni ti’isɛ nyɔkɛ Naayinɛ yelesum la mɛ (Mt 13:19-23), ti la kɛ̃ a suure (Mag 3:3-6; 7:1-4) ti a yaɛ “be’em woo” (Ym 119:104). Naayinɛ Dayɔa la n yuun boi teŋgɔŋɔ wa zuo la, a yuun eŋɛ pa’alɛ ti a tari bɔkerɛ mɛ la eŋa n yuun sakɛ ti a wan ki dɔɔ la zuo ti Gulesegɔ la sirum tum tuuma la.​—Mt 26:51-54.

w99-E 11/1 20 ¶6-7

Yɛri Yɛri Bo’a San Zo’e

Pɔɣenaba la n yuun wum ge nyɛ yelese’a la, la yuun eŋɛ en la pakerɛ ti a sirege amea yeti: “Ho nɛreba boe la popeelom poan, ho [yamesi] n tone bɔ’ɔra ho daarɛ woo ho nɛŋan ge wona ho yam sɔnhega wa boe la popeelom poan!” (1 Nadoma 10:4-8) La yuun boi bim ti Solomon yamesi la yuun boi la taresum poan ge pɔɣenaba la yuun ka yeti bala wan basɛ ti ba tara pupeelum. Ge Solomon yamesi wa yuun nyɛ la kã’a la ba yuun ni ze’a ge kɛlesa Solomon yetɔɣum la. Bisɛ Seba pɔɣenaba la yetɔɣum la n de yelesonɛ se’em bɔ’ɔra Yehowa yamesi zina beere wa la bamam me n mɔɔri kɛlesa Naaŋɔdaana la, la a Dayɔa Yezu Krista yɛm la!

Pɔɣenaba la n le pɛ̃ɣɛ Solomon se’em dela: “Pɛnka dɛna Na’ayenɛ ho Yenɛ la.” (1 Nadoma 10:9) A yuun sirum baŋɛ ti Yehowa n bo Solomon yɛm la taresum la. Wana wa kɔ’ɔn makɛ la Yehowa n yuun pu’ulumbiŋe ti a wan eŋɛ sɛla bo Israeldoma la. ‘N pa’ali ya malema wa’ ti ya “dole ya a soŋa, ge bala wan bahɛ te ya yam bɔkerɛ la ya mi’ilom nɛɛ bo teŋhe. Ba han wom malema se’a woo te ya dɔla la, ba wan yeti, teŋa wa nɛreba seren dela yam la bɔkerɛ doma ma’an.”​—Tɛɛnhegɔ 4:5-7.

w07-E 8/1 29 ¶13

Hon Dela ‘Buntata Naayinɛ Nɛŋa’?

Yehowa san kã’ara bɔ’ɔra a nɛreba, la ni kɔ’ɔn dɛna la sɛla n di mi’a. (Yames 1:17) Makerɛ, Yehowa n yuun dekɛ teŋa la bo Israeldoma la, la yuun dela “teŋsɛka poan te iilom la seerom zɔta wo ko’om la.” La boi bim ti Egypt teŋa la yuun ani wuu bala la ge yele yinɛ zuo ti teŋkana wa ti Yehowa yuun dekɛ bo la yuun bɔna ka tɔka. Moses yuun yele Israeldoma la ti ku dela “teŋa te Na’ayenɛ ya Yenɛ la behera ka.” Bala pa’alɛ ti, ba wan dɛna buntateba Yehowa n biseri ba la zuo. Israeldoma la san tara sakerɛ bɔ’ɔra Yehowa, a yuun ni kã bo ba mɛ ti ba tara vom somɔ gana teŋse’a za’a n lɛm ba la. Sira, Yehowa kã’a “bo’ore la tarega”!​—Kanlɛ 16:13; Tɛɛnhegɔ 4:5-8; 11:8-15.

Vo’osum Poan Yɛla

w04-E 9/15 25 ¶3

Tɛɛnhegɔ Gɔŋɔ La Yelekpina

4:15-20, 23, 24​—La yuun de kisego ti nɛra da maalɛ wɔ̃sum lɔkɔ la, bala pa’alɛ ti nɛra kan nyaŋɛ maalɛ lɔkɔ ze’ele a bɔ’ɔ poan ti la guŋɛ? Aayi. Kisego la yuun dela ba da maalɛ wɔ̃sum lɔɣɔrɔ wa ‘pɔ̃ta nama pu’usa a.’ Gulesegɔ la ka kiseri nɛra n maalɛ bii gulɛ sɛla ze’ele a bɔ’ɔ poan ti la guŋɛ.​—1 Nadoma 7:18, 25.

JUNE 14-20

NAAYINƐ TUULUM YƐLA | TƐƐNHEGƆ 5-6

“Pa’ala Ho Kɔma Ti Ba Nɔŋɛ Yehowa”

w05-E 6/15 20 ¶11

Dɔɣereba, Eŋɛ Ya Sɛla N Pakɛ Ya Deodoma

Yeledena wa poan, gulesegɔ ka boi zɛ’an ti to tɔɣera de yele zɔ’ɔra gana Tɛɛnhegɔ 6:5-7. Soso, lakɛ ho Baable la kaalɛ zɛ’ɛsi wa. Bilam yele dɔɣereba ti ba bĩ vo’osum poan, tara nɔŋerɛ bɔ’ɔra Yehowa ge me basɛ ti a yelesum la bɔna ba suuren. Sira, la dela ho nini mɔ’ɛ la Naayinɛ Yetɔɣum la zamesegɔ, kaala ge ti’isa taɣesa ta’an baŋɛ Naayinɛ sarɔtɔ, naresum yɛla la a kisa la. Bala n wan basɛ ti Baabule yelemɛŋɛrɛ la bɔna ho suuren ti ho tara nɔŋerɛ la zoolum bɔ’ɔra Yehowa ti ho puurɛ pee. Ho san ita bala, ho wan nyɛ yɛla zo’e zo’e tara pa’ala ho kɔma.​—Luke 6:45.

w07-E 5/15 15-16

N Wan Eŋɛ La Wani Ta’an Pa’ala N Kɔma Soŋa?

Yelese’a n pakɛ hɔ ti ho maasena ti ho eŋɛ la wan niɛ peelum doose la hon iti yɛla se’em daɣɛ la ho nɔɔrɛ yetɔɣum ma’a poan. (Arom 2:21, 22) Kɔma bunbilimen poan, sɛla ti ba dɔɣereba ita la ti ba tɔɣesa. Kɔma ni mina yelese’a n de ninmɔ’ɔrɛ mɛ bɔ’ɔra ba dɔɣereba ge me ni dekɛ yele ana ti la dɛna ninmɔ’ɔrɛ. Ho san sirum nɔŋɛ Yehowa, ho kɔma wan baŋɛ. Makerɛ, ba wan baŋɛ ti ho dekɛ homea zamesegɔ la Baabule kaalegɔ ti la dɛna la ninmɔ’ɔrɛ bɔ’ɔra hɔ. Ba wan baŋɛ ti ho basɛ ti Na’am la dɛna la yia ho vom poan. (Matu 6:33) Ho san kena zamesegɔ la Na’am mɔɔlegɔ daarewoo bala wan basɛ ti ba baŋɛ ti Yehowa tuuma la dela ninmɔ’ɔrɛ.​—Matu 28:19, 20; Hebru 10:24, 25.

w05-E 6/15 21 ¶14

Dɔɣereba, Eŋɛ Ya Sɛla N Pakɛ Ya Deodoma

Wuu Tɛɛnhegɔ 6:7 n yele se’em la, yɔ’ɔ zo’e zo’e boi mɛ ti yamam dɔɣereba wan ta’an dekɛ sɔsɛ vo’osum yɛla bo ya kɔma. Ya san laɣum ye’a sore, ya san laɣum duɣera bii ya san laɣum zi’a vɔ’ɔsa bala za’a dela yɔ’ɔ ti ya wan ta’an dekɛ pa’alɛ ya kɔma vo’osum yɛla. Ge bala ka pa’alɛ ti ya yeen kɔ’ɔn “tɔɣera” Baabule yɛla ti ya kɔma kɛlesa. Sɛla n nari dela, ya tiregɛ sɔsa kpemesa taaba giila vo’osum sore poan. Makerɛ, Awake! magazine la tari la zamesegɔ yɛla zo’e zo’e ti ya wan ta’an dekɛ tum tuuma. Zamesegɔ yele ana wa ta’an soŋɛ ya ti ya zamesɛ baŋɛ dusi, zɛse’a n ani soŋa teŋgɔŋɔ wa poan la asaaleba n boi buuri buuri se’em la ba malema. Ya san sɔsera bala, la wan basɛ ti kɔma la bɔta ti ba kaala gɔnɔ la ti sakerɛ la yɛm yameŋa la gulesɛ la.​—Matu 24:45-47.

Vo’osum Poan Yɛla

w19.02-E 22 ¶11

Nɔŋerɛ La Tontɔɔ Tuuma N Yuun Boi Diimi Israel Se’em

Zaseŋɔ: Yehowa ka biseri nyɛta la nɛra n maalɛ amea se’em ma’a. A biseri nyɛta la to suuren. (1 Sa. 16:7) Nɛra ka boi n wan eŋɛ sɛla bii ti’isa sɛla a suuren ti Naayinɛ kan baŋɛ. A biseri la to itisoŋɔ la ge me kpɛmesa to giila. Ge a boti la to mina ge ta’an gu yelese’a n wan pã’asɛ tɔ ti to tum be’em.​—2 Yel. 16:9; Mt. 5:27-30.

JUNE 21-27

NAAYINƐ TUULUM YƐLA | TƐƐNHEGƆ 7-8

“Da Diti Ya Ba Bii Tara Ya Poyɔɔsi Ɛlesa Ba”

w12-E 7/1 29 ¶2

Beni N Sɔi Ti Naayinɛ Bo Nɔɔrɛ Ti A Yamesi Dita Taaba?

Ninmɔ’ɔrɛ yele la dela, Yehowa mi ti Sitaana boti la a sa’am A nɛreba ti ba pu’usa pumpɔreŋɔ yina. Naayinɛ ka’am a yamesi ti sɛba n ka pu’useri eŋa la “wan ta ŋmɛregɛ ya kɔma potɛn’ɛra yehe mam zen’an, te ba ta dɔla yena a se’a.” Ka’aŋɔ wa dela ninmɔ’ɔrɛ paa. Ba san pã’asɛ Israeldoma la nyaŋɛ ti ba pu’usa yina ase’a, Naayinɛ kan le bɔna la ba ge tɛ’ɛla ba, bala ti ba dinedoma la nyaa wan ta’an nyaŋɛ ba. La san eŋɛ bala, Messiah la wan eŋɛ la wani ze’ele teŋa wa poan wa’ana? La niɛ peelum ti, Sitaana mi sɛla n sɔi ti a pã’asa Israeldoma la ti ba di bii ele sɛba n ka pu’useri Naayinɛ la.

w15-E 3/15 30-31

La Kelum Nara Ti Ho Di Bii Ele “Se’em N Dole Yesu Sore”?

Yehowa kelum basɛ ti la niɛ peelum a Yelesum la poan ti to dita bii ɛla sɛba n dole Yezu sore la. Beni n sɔi? A mi sɛla n ani soŋa bɔ’ɔra a nɛreba mɛ. A ka boti la a yeen gu a yamesi ti wuŋerɛ da paɛ ba ge a boti la ba tara pupeelum ba vom poan. Nehemia saŋa la, ti Yudadoma zo’e zo’e yuun dita satema pɔɣesi n ka pu’useri Yehowa la, Nehemia yuun dekɛ la sɛla n yuun paɛ Solomon la ka’am ba. La boi bim ti “Yenɛ nɔŋɛ” Solomon mɛ “ge la bala zan’an sateŋhe pɔgɔdire n tare en ta kɛn be’em poan.” (Ne. 13:23-26) Naayinɛ n boti a yamesi la zuo ti a bo nɔɔrɛ ti to dita bii ɛla taaba. (Ym. 19:7-10; Isa. 48:17, 18) Yelemɛŋɛrɛ Kristakɔma suure sukɛ mɛ la Naayinɛ pa’alegɔ la ge me kɔ’ɔn dɔla dɛ. Ba nani en ti eŋa n de ba Bisegadaana la zuo, ba mi ti eŋa n sɔi Saazuo la Teŋgɔŋɔ wa za’a.​—Mag. 1:5.

w15-E 8/15 26 ¶12

Bisɛ Ho Zɔtɔ Nyɔka Soŋa Ba’asegɔ Dabesa Wa Poan

Kristakɔma n de nɛreyɔna ge bɔta ti ba di pɔɣeba bii ele nari ti ba bisɛ ba zɔtɔ nyɔka soŋa soŋa. Naayinɛ Yelesum la yeti: “Da zegere ya te ya lagom la sɛba n ka dole Yesu sore te ya de’a boyena tona. Se’ere n sɔe la, la kan ta’an eŋɛ. La wan eŋɛ la wane te sɛla n de yelemɛŋɛrɛ la sɛla n dagɛ yelemɛŋɛrɛ lagom dɛna boyena? La wan le eŋɛ la wane te sɛla n de nɛɛhom la sɛla n de lika lagom bɔna?” (2 Ko. 6:14) Baabule la ka’am Naayinɛ yamesi ti ba di bii ele “se’em n dole Yesu sore,” bala pa’alɛ ti, ba di bii ele mina n muse ko’om pu’usa Yehowa ge nana Baabule la pa’alegɔ. (1 Ko. 7:39) Kristakɔma san di bii ele ba pu’usegɔ nɛreba, ba wan tara la nɛresɛba n wan soŋɛ ba ti ba ta’an tara ba birikinte la pu’usa Yehowa soŋa.

Vo’osum Poan Yɛla

w04-E 2/1 13 ¶4

Yehowa Bo’ori To Sɛla N Pakɛ To Mɛ

To pu’useri ɛɛra sɛla n pakɛ tɔ daarewoo la tiɛ to la, la nari ti vo’osum dia me pakɛ to se’em daarewoo. La boi bim ti Yezu n yuun lu nɔɔrɛ la, a kom yuun duni mɛ ge a yuun zaɣesɛ Sitaana n yuun gurɛ en bisɛ ti a basɛ ti kuga lebege boroboro la. A yuun lebese yeti: “La golehɛ yeti, Asaala ka vɔe la boom ma’an, ge a vɔe mɛ la yelese’ere woo n ze’ete Na’ayenɛ nɔɔrɛn na.” (Matu 4:4) Yezu yuun yese a yetɔɣum wa la nɔdɛ’ɛsa Moses n yuun yele Israeldoma la se’em la poan: “[Yehowa] bote ya sigehe la ya mɛhe zuo te a bahɛ te kom sige ya zuo ge te a diihe ya la manna dia, sɛla te yamam bii ya sɔdoma ka tabelɛ mina. Te a pa’alɛ ya yeti, Asaala ka vɔe la boom ma’an, ge a vɔe mɛ la yelese’ere woo n ze’ete Na’ayenɛ nɔɔrɛn na.” (Tɛɛnhegɔ 8:3) Yehowa n yuun tari manna la bɔ’ɔra Israeldoma la se’em la daɣɛ la ba yeen dita ma’a ge la me pa’ali ba la vo’osum yɛla. Sɛla n yuun nari ti ba eŋɛ dela ba “vaɛ ba wan di se’em daanden daarɛ la ma’an.” Ba yuun san vaɛ zɔɛ ba wan di se’em dabeserɛ la poan, zunzɔa wan kɛ̃ sɛla n gee la ti la fɛ̃’ɛra. (Yɛhega 16:4, 20) Ge Vo’osego Dabeserɛ la ti ba yuun nara ti ba vaɛ sugumnɔɔrɛ buyi la, zunzɔa yuun ka kɛ̃ sɛla n gee dabesa ayoobe daarɛ la. (Yɛhega 16:5, 23, 24) Manna dia la basɛ ti ba baŋɛ ti daɣɛ dia la n wan basɛ ti ba vɔna ge la dela ba nana “yelese’ere woo n ze’ete Na’ayenɛ nɔɔrɛn na.”

JUNE 28–JULY 4

NAAYINƐ TUULUM YƐLA | TƐƐNHEGƆ 9-10

“Na’ayenɛ Ya Yenɛ La Eere La Bene Ya Zen’an?”

w09-E 10/1 10 ¶3-4

Yehowa Boti La To Ita Bem?

Beni n wan soŋɛ tɔ ti to nana Naayinɛ to suuren? Moses purɛ la yeleyinɛ ti: “Zɔta Na’ayenɛ ya Yenɛ la.” (Tɛɛnhegɔ 10:12) Wana daɣɛ ti to san tum be’em a wan basɛ ti la wuŋɛ tɔ ge la dela to tari zoolum bɔ’ɔra Naayinɛ la a sɔratɔ la n di mi’a la zuo. To san tara zoolum bɔ’ɔra Naayinɛ, to kan bɔta ti to eŋɛ sɛla n wan dɛ̃ɣɛ a suure.

Bem zuo ti to nana Naayinɛ? Moses yuun yeti: “Nɔŋɛ [Yehowa] ge tona bɔ’ɔra Na’ayenɛ ya Yenɛ la la ya sunya la ya sea zan’an.” (Tɛɛnhegɔ 10:12) To ka nɔŋɛ Naayinɛ la to suuren ma’a. Ba eŋɛ viisegɔ baŋɛ ti: “Hebru itigɔ yelebire la n pa’ali la ani nɛra se’em a suuren la, tɔɣeri pa’ala la nɛra itigɔ n ani se’em.” Viisegɔ yɛla wa kelum pa’alɛ ti hon nɔŋɛ Naayinɛ vuurɛ dela “ho ita pa’ala” ti ho nɔŋɛ en mɛ. Ho san le bisɛ, to san sirum nɔŋɛ Naayinɛ, to wan ita sɛla woo ti a puurɛ pɛɛra.​—Magaha 27:11.

w09-E 10/1 10 ¶6

Yehowa Boti La To Ita Bem?

To san nana en to suuren, a wan kã bo to. Moses yeti: “Dɔla Na’ayenɛ nɔya la . . . te n bɔ’ɔra ya zina ya som zuo wa.” (Tɛɛnhegɔ 10:13) Sira, Yehowa nɔɔrɛ woo​—sɛla woo ti a yeti to eŋɛ​—dela tomea som zuo. Beni n sɔi ti la kan ana soŋa? Baabule la yeti “Yenɛ dela nɔŋerɛ.” (1 Yon 4:8) Bala zuo ti a bo to nɔse’a n wan basɛ ti to vom ana soŋa la. (Isaiah 48:17) To san tiregɛ ita sɛla woo ti Yehowa yeti to ita la, bala wan soŋɛ tɔ ti daaŋɔ kan paɛ tɔ nananawa ge me wan basɛ ti to ta nyɛ kã’a a Na’am la poan beere sa’am.

cl-E 16 ¶2

Ho Wan Ta’an ‘Vurege Lɛm Naayinɛ’?

Daami nɛra Abraham yuun vuregɛ amea lɛm Naayinɛ mɛ. Yehowa yuun yi’iri Israeldoma sɔyaaba wa ti “n zɔ.” (Isaiah 41:8) Sira, Yehowa yuun dekɛ Abraham ti a dɛna la a zɔ. Abraham yuun nyɛ yɔ’ɔ wa la eŋa n yuun “nam Na’ayenɛ” la zuo. (Yames 2:23) Zina beere wa me, Yehowa “nɔŋɛ” la sɛba n tari nɔŋerɛ bɔ’ɔra en la. (Tɛɛnhegɔ 10:15) A Yelesum la yeti: “Vuruge ya lɛm Na’ayenɛ te a me wan vuruge lɛm ya.” (Yames 4:8) Yetɔɣum wa poan, to baŋɛ ti la dela beeŋo la pu’ulumbiŋere.

Vo’osum Poan Yɛla

it-1-E 103

Anak

Nɛrebana wa buuri la yuun ba’ɛ dɛna la nɛrewaɣela ge me kɛ̃’ɛra Kanaan zɔya la zuto la ka bɔ̃’ɔrɔ la, yele yele wuu S bɔba la. Saŋa busebo, Anakdoma nɛrezureba batã n de Ahiman, Sesai la Talmai yuun kɛ̃’ɛri la Hebron. (Kan 13:22) La yuun dela teŋkana poan ti Hebru vɛɛseriba 12 la yuun nyɛ Anakdoma ti vɛɛseriba 10 la yuun lebe ta tɔɣɛ pa’ala Anakdoma la n ani se’em ti dabeem yuun kɛ̃ Israeldoma la. Ba yuun parum ti, nɛrebana buuri wa ze’ele la Nefilimdoma la poan ti ba san dekɛ bamea makɛ la ba, Hebrudoma la ani wuu ba dela “sonwa’ara.” (Kan 13:28-33; Tɛ 1:28) Ba ba’ɛ daɣelum se’em la, basɛ ti nɛreba tɔɣera la ba yele ge ni tara Emdoma la Arepadoma burawaɣela la maɣesa nɛreba. Ba yuun tari paŋa se’em la ni basɛ ti nɛreba makɛ yeti: “Ane n boe wan ze’ele la Anakdoma wa?”​—Tɛ 2:10, 11, 20, 21; 9:1-3.