Vom La Na’am Tuuma Zamesegɔ Viisegɔ Gɔŋɔ

JULY 5-11

NAAYINƐ TUULUM YƐLA | TƐƐNHEGƆ 11-12

“Yehowa N Boti To Pu’usa En Se’em”

it-2-E 1007 ¶4

Sia

To Pu’usa Naayinɛ La To Sia Za’a. Wuu to puɣum pa’alɛ se’em la, “sea” la dela nɛra la mea. Ge gulesegɔ ase’a ka’am to yeti to ɛɛra Naayinɛ, to nɔŋɛ en ge me pu’usa en la ‘to suure za’a la to sia za’a.’ (Tɛ 4:29; 11:13, 18) Tɛɛnhegɔ 6:5 me yeti: “Nɔŋɛ Na’ayenɛ ho Yenɛ la la ho suunre zan’an la ho sea zan’an la ho paŋa zan’an.” Yezu yuun yeti, la yele pakɛ mɛ ti to dekɛ to sia za’a, to paŋa za’a la ‘to puti’irɛ za’a’ pu’usa Naayinɛ. (Mr 12:30; Lu 10:27) Sokere la nyaa dela sia la san dɛna la nɛra la mea, beni n sɔi ti ba purɛ yele ana wa za’a pa’asɛ. Makerɛ wa wan basɛ ti to bɔkɛ yele la: Nɛra ta’an dekɛ amea (a sia) bo nɛra dɛna yameŋa tuna bɔ’ɔra en, ti la pa’alɛ ti a dela a kpɛ’ɛma la bunɔ. Ge daanse’ere a kan kpɛŋera amea bii a yese a suure za’a tuna bɔ’ɔra a kpɛ’ɛma la ti a puurɛ pee. A ta’an kan dekɛ a paŋa la a puti’irɛ za’a tuna a kpɛ’ɛma la tuuma. (Dekɛ makɛ Ep 6:5; Kol 3:22.) Ba purɛ yele ana wa la, wan basɛ ti to tɛra a soŋa ta’an pu’usa Naayinɛ ge mina ti to dela eŋa la a Dayɔa la n yuun ki tomam zuo la denɛ. To pu’usa Naayinɛ la “to sea za’a” la pa’alɛ ti to wan dekɛ to iŋa lɔɣɔrɔ la za’a pu’usa en, to kan ãaɛ zɛ’an basɛ.​—Dekɛ makɛ Mt 5:28-30; Lu 21:34-36; Ep 6:6-9; Flp 3:19; Kol 3:23, 24.

it-1-E 84 ¶3

Bimbine

Naayinɛ yuun bo Israeldoma la nɔɔrɛ ti ba gbirege pumpɔreŋɔ pu’usegɔ kaabegɔ bimbina la za’a ge wɔ̃rɛ tuulum kuga la baɣa dɔɔrɔ la woo. (Yɛh 34:13; Tɛ 7:5, 6; 12:1-3) Ba yuun ka nari ti ba tɔɣesa Kanaandoma la bii ba tara ba kɔma nyɔ̃’ɔra bugum poan kaabera. (Tɛ 12:30, 31; 16:21) Israeldoma la yuun ka nari ti ba mɛ kaabegɔ bimbina zo’e zo’e ge la yuun dela ba tara kaabegɔ bimbine ayina ma’a pu’usa yelemɛŋɛrɛ Naayinɛ ayina ma’a la. Yehowa me n wan loe zɛsɛka ti ba wan mɛ kaabegɔ bimbine la. (Tɛ 12:2-6, 13, 14, 27; dekɛ makɛ la Babilondoma la n yuun tari kaabegɔ bimbina 180 pu’usa Istar baɣerɛ ma’a la.) A yuun bo ba nɔɔrɛ ti ba san yakɛ Yordan Kolaa la, ba dekɛ kuga mɛ kaabegɔ bimbine. (Tɛ 27:4-8) Yosua n yuun mɛ de Ebal Zoore la zuo. (Yos 8:30-32) Ba yuun ta tɔ̃rɛ teŋse’esi ti ba zabɛ to’e la, Areuben buuri la Gad buuri la Manase buuri basɛba yuun mɛ la kaabegɔ bimbine kãtɛ Yordan bɔba ti buuri ase’a la sunsua yuun nyie. Pooren ba yuun ta baŋɛ ti la daɣɛ ti ba yelege la bamea ge la dela sɛla n wan tiisa ba ti ba tara yelemɛŋɛrɛ bɔ’ɔra Yehowa Naayinɛ ma’a.​—Yos 22:10-34.

Vo’osum Poan Yɛla

it-1-E 925-926

Gerizim, Zoore

Moses n yuun bo pa’alegɔ la se’em la, Yosua yuun basɛ ti Israeldoma la laɣesɛ la Gerizim la Ebal Zɔya la zɛ’an ba yuun ta zabɛ nyaŋɛ Ai teŋa ba’asɛ la. Bilam ti ba yuun kaalɛ kã’a se’a ti ba wan nyɛ ba san nana Yehowa la toose’a n wan paɛ ba, ba san ka nana en. Simeon buuri, Levi buuri, Yuda buuri, Isakar buuri, Yosef buuri la Benyamin buuri la yuun keŋɛ ta ze’ele la Gerizim Zoore la nɛŋa. Levidoma la nɔbiŋere daka la yuun boi la bɔ̃’ɔ la poan ge ti buuri ayoobe la me zɛ’a Ebal Zoore la nɛŋa. (Tɛ 11:29, 30; 27:11-13; Yos 8:28-35) La niɛ peelum ti buuri se’a n yuun ze Gerizim Zoore la nɛŋa la n yuun wum kã’a yelesum la ba’asɛ la, bamam n sakɛ ge ti sɛba me n yuun ze Ebal Zoore la nɛŋa n wum too yelesum la ba’asɛ la, ti bamam me sakɛ. Nɛreba ti’iseri ti Gerizim Zoore la n yuun ani soŋa ti dia maala bim la n sɔi ti ba yuun kaalɛ kã’a yelesum la bilam la ge ti Ebal Zoore la me n yuun kɔ’ɔn dɛna tãsi ma’a ge me dɛna pɔgɔtia la n sɔi ti ba yuun kaalɛ too yelesum la bilam ge Baabule la ka pa’alɛ sɛla n sɔi. Ba yuun kaalɛ Lɔɔ la “bo Israel nɛreba la zan’an la ba pɔgɔba la ba kɔma la saama woo n lagom bɔna la ba.” (Yos 8:35) Nɛrekuuŋɔ wa yuun wuni yelesum wa mɛ zɔa ayi wa za’a poan. Sɛla n sɔi ti ba yuun ta’an wum la dela tangosi n yuun boi zɔa la poan.​—Bisɛ EBAL, MOUNT.

JULY 12-18

NAAYINƐ TUULUM YƐLA | TƐƐNHEGƆ 13-15

“Lɔɔ La Pa’alɛ Ti Yehowa Fabeli Nasedoma Yele Mɛ”

it-2-E 1110 ¶3

Pia Puregerɛ

La ani wuu pia puregerɛ la poan, puregerɛ ayima n le bɔna ti ba yuun ni dekɛ bo Malemadoma la ti ba dekɛ tum tuuma ase’a. Israeldoma la yuun ni san laɣesɛ ti ba de’em ba yuunɛ woo de’eŋo la, ba yuun ni tara la bo’olum buna dita la pupeelum. Zɛse’esi n yuun zãɛ la Yerusalem ti ba kan ta’an zɛ bo’olum la keŋɛ la, ba yuun ni dekɛ bo’olum la mɛ tee ligeri tari keŋɛ laɣesegɔ la poan ti deodoma woo ta dita la pupeelum. (Tɛ 12:4-7, 11, 17, 18; 14:22-27) Vo’osego yuuma ayopɔi la poan, a yuuma atã la a yuuma ayoobe ba’asegɔ poan, bo’olum buna wa ti ba yuun tara soŋera Malemadoma, saama, pɔkɔ̃pa la kiibesi n boi teŋa la poan la ge ba yuun ka tari bu yɔɔra teŋa la laɣesegɔ sama.​—Tɛ 14:28, 29; 26:12.

it-2-E 833

Vo’osego Yuunɛ

Vo’osego yuunɛ la yuun le dɛna la “sama bahega yuunɛ [hash·shemit·tahʹ].” (Tɛ 15:9; 31:10) Yuun denɛ poan la, ba yuun ka nari ti ba kɔ dia bii sɛla samana la zuo. (Yɛh 23:11) La me yuun dela yuunse’ere ti ba basera sama bɔ’ɔra. La yuun dela “Na’ayenɛ n loe saŋsɛka te ka dɛna sama bahega saŋa” ti la dɛna na’asegɔ bɔ’ɔra en. La boi bim ti gɔnmi’ileba basɛba puti’ira boi la tɔka tɔka yele wa poan, yɛta ti ba yuun ni kɔ’ɔn ka basɛ sanɛ la bo nɛra la ge sɛla n sɔi la dela ba yuun ka kɔɔri yuun denɛ la zuo, se’em n bo’ori laɣehɔ la ka nari ti a pɛregɛ a Hebru tadaana ti a yɔ ge a wan ta’an pɛregɛ saana ti a yɔ laɣehɔ la. (Tɛ 15:1-3) Pa’alegɔdoma basɛba yuun yeti nɛra san peŋe ligeri ti a dekɛ soŋɛ a suɔ n de nasa ba wan basɛ bo en ge a san peŋe ti a lɛɛbera mɛ denɛ boi la de to’ore. Yuun kɔbesɛka n deŋɛ nɛŋa Yɔɔma Beere la poan, pa’alegɔdoma wa yuun yeti Hillel yuun bo la pa’alegɔ ti se’em n peŋeri ligeri la ta’an keŋɛ kootin ta tɔɣɛ ti a ligeri la da lui ko’omi.​—The Pentateuch and Haftorahs, edited by J. Hertz, London, 1972, gɔn. 811, 812.

it-2-E 978 ¶6

Yameŋa

Lɔɔ n pa’ali nɛra n nari ti a bisera a yameŋa se’em. Israeldoma la poan, Hebru yameŋa yuun boi la a to’ore la sateŋa yameŋa. Se’em n yuun daɣɛ Hebru yameŋa yuun dela a kpɛ’ɛma la denɛ ge ti a kpɛ’ɛma la me wan ta’an dekɛ en bo a dayɔa ti a tuna bɔ’ɔra en (Mlm 25:44-46) ge yuuma ayopɔi poan bii Peraa Iila Peebego yuunɛ poan Israeldoma la yuun nari ti ba basɛ Hebru yamesi ti ba kule. Ba yuun nari ti ba ita Hebru yameŋa wuu ba yuun iti kaareba se’em la. (Yɛh 21:2; Mlm 25:10; Tɛ 15:12) Hebru nɛra yuun san koose amea bo saana, saana la yinɛra bii satena, a suɔ wan ta’an yɔ to’e en bii amea wan ta’an yɔ to’e amea sansɛka ti a bɔta. Ba yuun ni kɛkɛ la yuunse’a n gee la ge ti Peraa Iila Peebego yuunɛ bii yuuma ayopɔi la nyaa paɛ la, yɔ sanɛ la. (Mlm 25:47-52; Tɛ 15:12) Ba yuun san bo Hebru yameŋa yɔ’ɔ ti a keŋɛ, a daana la yuun dela a ee sɛla bo en ti a tari kule ta bisera amea. (Tɛ 15:13-15) Yameŋa la san di pɔɣa keŋɛ a daana la zɛ’an, la dela a doose a pɔɣa la lebe kule. Ge la san dɛna la a daana la n di pɔɣa bo en (la niɛ peelum ti satena pɔka ka tari yɔ’ɔ ti a bɔna fai yuuma ayopɔi yamenɛ la poan), pɔka la, la a kɔma la za’a wan dɛna la ba daana la denɛ. La san dɛna bala, Hebru yameŋa la ta’an kɔ’ɛ a puti’irɛ ti eŋa wan kelum bɔna la a daana la nu’usin. A daana la wan dekɛ piŋkpa’a voŋɛ a tuberɛ ti la pa’alɛ ti a wan kɔ’ɔn dɛna la a yameŋa wuusa.​—Yɛh 21:2-6; Tɛ 15:16, 17.

Vo’osum Poan Yɛla

w06-E 4/1 31

Sokese’a Ti Nɛreba Sɔkera

Yɛhega 23:19 yeti: “Da tare ya [duŋa] bin’ihom dogora ka bia nɛnɔ.” Bem ti to zamesɛ baŋɛ kisere wa poan?

Pa’alegɔ wa n ze’ele Moses Lɔɔ la poan, ti la bɔna Baabule la poan sugumnɔɔrɛ butã la, soŋɛ tɔ ti to bɔkɛ ti Yehowa n mi sɛla n nari ge me tara giile la nɔŋerɛ. La le tɔɣera pa’ala la Yehowa n kisi pumpɔreŋɔ pu’usegɔ se’em.​—Yɛhega 34:26; Tɛɛnhegɔ 14:21.

To san dekɛ bua bii dunsɛka bi’isum duɣɛ ka bia nɛnɔ, la wan dɛna tuntula la Yehowa n naam a lɔɣɔrɔ se’em la. Naayinɛ basɛ ti ma la tara bi’isum la mɛ diisa a bia la ti a zɔ’ɔra. Gɔnmi’ila ayima yeti ho san dekɛ duŋa bi’isum duɣɛ ka bia nɛnɔ la pa’alɛ ti “ho sa’am bɔnsɛka ti Naayinɛ pi’ilum biŋe ti dusi la ba kɔma ana tapilapi la taaba se’em la basɛ mɛ.”

Leyɛ’ɛsa, nɛreba basɛba yeti ba yuun ni dekɛ duŋa bi’isum dɔɣɛ ka bia nɛnɔ kaabɛ la baɣerɛ ti saa ni. La yuun san dɛna la bala, kisere wa wan gu Israeldoma la ti ba kan kãbɛ suure tum gɔɔntuuma, kaabera baɣa wuu tinse’a n yuun lɛm ba la. Moses Lɔɔ la yuun basɛ ti la niɛ peelum ti Israeldoma la yuun ka nari ti ba tɔɣesa tinse’a n lɛm ba la.​—Malema 20:23.

Ba’asegɔ la, lɔɔ la basɛ ti to baŋɛ Yehowa n tari giile se’em. Yelemɛŋɛrɛ, Lɔɔ la yuun tari kisego ase’a mɛ ti la ka nara ti nɛra vɛ̃ɣena a duŋa bii tara en ita sɛla n ka ani soŋa. Makerɛ, Lɔɔ la yuun pa’alɛ ti la dela kisego ti ho dekɛ duŋa n ka paɛ dabesa ayopɔi kaabɛ, ho ku duŋa la ka ma daayinɛ, ho nyɔkɛ niiŋa la ka gɛla bii ka kɔma.​—Malema 22:27, 28; Tɛɛnhegɔ 22:6, 7.

La niɛ peelum ti, Lɔɔ la yuun yeen daɣɛ la kisa la nɔɔrɛ yelesum ma’a. Naresum yelese’a n boi bim la soŋɛ tɔ ti to bɔkɛ Yehowa hala la a pa’alegɔ la n di mi’a se’em.​—Yooma 19:7-11.

JULY 19-25

NAAYINƐ TUULUM YƐLA | TƐƐNHEGƆ 16-18

“Naresum Yelese’a N Basɛ Ti Ba Gãkera Yɛla Soŋa”

it-1-E 343 ¶5

Fɔɔnɛ

Sɛla n ta’asɛ ti kinkisum bɔna kootin poan dela nɛreba nini n ka nyɛti yɛla paara la ge me wɛlesa nɛreba, tɔ’ɔsa mu’ure ti la pĩ’ira gãkeriba nini ti ba ka ta’an gãkera yɛla soŋa la. “Mu’ure bo’olom pin’ire la nyɛta nini.” (Yɛh 23:8) Mu’ure fɔɔre la yamdoma nini.” (Tɛ 16:19) Gãkerɛdaana san puɣum mina tuuma ge tara yɛm la se’em me, bo’olum wan basɛ ti a puti’irɛ tee la eŋa n gãkeri nɛresɛba yɛla la. Naayinɛ kisere la ka tɔɣeri la bo’olum ma’a ge nɛreba welesego me wan ta’an pĩ nɛra nini wuu la yeti: ‘Da lila nasedoma buurɔ bii zɔta buntateba.’ (Mlm 19:15) Bala la, gãkerɛdaana ka nari ti a wɛlesa nɛreba bii a nɔŋɛ nɛresɛba n tari la gãkera bɔ’ɔra ba ti ba tari buurɔ.​—Yɛh 23:2, 3.

it-2-E 511 ¶7

Nɔmba

Bayi. Kootin sɔsega poan, ba yuun ni ɛɛra la nɛreba bayi. Sɛɛradoma bayi san tɔɣɛ sɛla ti ba nini nyɛ, la ni basɛ ti yele la tara la paŋa. Ba yuun ni ɛɛra la sɛɛradoma bayi bii batã ge nyaa ni ta’an gãkɛ yele. La me ani la bala mea Krista tansugere la poan zina beere wa. (Tɛ 17:6; 19:15; Mt 18:16; 2Ko 13:1; 1Ti 5:19; Heb 10:28) Naayinɛ n yuun yeti a dekɛ a Dayɔa la tisɛ ti a Faaɛ asaaleba basɛ la, a yuun dekɛ la naresum yele wa tum tuuma. Yezu yuun yeti: “La golehɛ eŋɛ ya Pa’alegɔ la poan te sɛla te nɛreba bayi nyɛ ge tɔgɛ te ba tɔgɔm la doohe taaba, sɛla te ba tɔgɛ la dela yelemɛŋɛrɛ. Bala, mam tɔgɛ po’e la n mea yele ge te N Sɔ se’em n tom mam na la me tɔgɛ po’e n yele.”​—Yon 8:17, 18.

it-2-E 685 ¶6

Malemadaana

Malemadoma la ma’a n yuun tari yɔ’ɔ ti ba pa’ala nɛreba Naayinɛ lɔɔ la ge me gãkera Israeldoma yɛla. Tinse’a ti ba yuun dekɛ tɔ̃rɛ Israel buuri la, malemadoma la n yuun soŋeri gãkereba sɛba n boi teŋa la poan la ge me ni laɣum gãkɛ kootin yelese’a n kpe’em la. (Tɛ 17:8, 9) Ba yuun nari ti bamam la teŋa la keendoma la laɣum gãkɛ nɛrekua yele la wan eŋɛ se’em ti ba ta’an doose pa’alegɔ yɛla la soŋa ti taalɛ da bɔna teŋa la poan. (Tɛ 21:1, 2, 5) Buraa n nyuuni san siisum bo a pɔɣa ti a tum la pɔɣedisa’aŋɔ tuuma, a tara pɔɣa la keŋɛ pu’usegɔ deo la poan, bilam ti malemadaana la wan eŋɛ malema ti Yehowa basɛ ti ba baŋɛ nyaa pɔka la sirum gãlum mɛ bii a ka gãlum. (Kan 5:11-31) Yele woo poan, ba yuun nari ti ba nam malemadoma la bii gãkereba la n gãkɛ yele la se’em la; ba yuun nari ti ba ku nɛrese’em n mi fii ge zɛregera ba bii ka nam.​—Kan 15:30; Tɛ 17:10-13.

Vo’osum Poan Yɛla

it-1-E 787

Dige

Lɔɔ la poan, ba wan wum la sɛɛradoma bayi nɔɔrɛ ge nyaa ta’an bo nɔɔrɛ ti ba ku nɛra. (Tɛ 19:15) Sɛɛradoma wa n yuun nari ti ba lobe nɛra la n tum be’em la kuga yia. (Tɛ 17:7) Wana wan pa’alɛ ti ba kɔ’ɔn dɔla Naayinɛ lɔɔ la mɛ ge me bɔta ti Israel nɛreba la ana fa’a. Bala wan dɛna kaka bɔ’ɔra nɛreba ti ba kan parena, ita ba boti se’em bii ita kãbi kãbi dita sɛɛra kootin poan.

JULY 26–AUGUST 1

NAAYINƐ TUULUM YƐLA | TƐƐNHEGƆ 19-21

“Asaala Vom Dela Tuulum Bɔ’ɔra Yehowa”

w17.11-E 14 ¶4

Tɔɣesa Yehowa Nimbɔ̃zore La A Tontɔɔ Gãkerɛ

Suka tisi bayoobe la yuun ka zãɛ la nɛreba la. Yehowa yuun bo nɔɔrɛ ti Israeldoma la tɔ̃rɛ tisi la ma’a ma’a ti la bɔna Yordan Kolaa bɔba ayi la. Beni n sɔi? Bala wan basɛ ti se’em n ka mi ge ku nɛra ta’an zɔ keŋɛ bini kalam. (Kan. 35:11-14) Ba yuun maali sarɔtɔ se’a n kɛ̃’ɛri suka tisi la poan mɛ ti la ana soŋa. (Tɛɛ. 19:3) Yudadoma malema yeti, ba yuun ni dekɛ la dãalesum sele sarɔtɔ la kinkɛlesi ti la pa’ala suka tisi la. Suka tisi wa n yuun ka zãɛ la nɛreba la zuo, la yuun kan dɛna pɛregerɛ bɔ’ɔra se’em n ka mi ge ku nɛra ti a zɔ keŋɛ sateŋa, zɛsɛka ti la wan kpe’em bo en ti a pu’usa Naayinɛ.   

w17.11-E 15 ¶9

Tɔɣesa Yehowa Nimbɔ̃zore La A Tontɔɔ Gãkerɛ

Sɛla zuo ti ba yuun biŋe suka tisi wa yuun dela la soŋɛ Israeldoma la ti ba da tara taalɛ. (Tɛɛ. 19:10) Yehowa nɔŋɛ vom mɛ ge me yaɛ “nu’se’ehe n ka’ahe ziim sebo n ka tare taalɛ baha.” (Mag. 6:16, 17) Naayinɛ n de zilam ge me tara tontɔɔ gãkerɛ la, kan basɛ se’em n ka mi ge ku nɛra yoo. Yelemɛŋɛrɛ, ba yuun ni zɔ se’em n ka mi ge ku nɛra nimbɔ̃’ɔ mɛ. Hali la bala la, a yuun nari ti a yele keendoma la, la eŋɛ se’em ti ba san gãkɛ ti a sirum ka mi ge ku nɛra, a wan bɔna suka teŋa la poan ta paɛ se’em ma’a ti malema nɛŋadaana la ki. Daanse’ere wana wan pa’alɛ ti a wan bɔna teŋa la poan a vom dabesa za’a. Wana wan basɛ ti Israeldoma la tɛra asaala vom n de tuulum se’em. Ba yuun nari ti ba yese bamea yelese’a ti ba wan eŋɛ ti ba tadaana vom bɔna dɛŋa poan, wana wa me wan pa’alɛ ti ba na’aseri ba Vomdaana la mɛ.

it-1-E 344

Ziim

Asaala dela a vɔna vom somɔ wuu Naayinɛ n boti de se’em la. Se’em n ku nɛra wan eŋɛ kãlɛ bo Naayinɛ. Wana wa yuun niɛ peelum mɛ la Naayinɛ n yuun yele Kain se’em la. A yuun yeti: “Ho yebega la ziim n bala gan’an teŋa kɛla bɔ’ɔra mam na wa.” (Pin 4:10) Hali nɛra san yaɛ a suɔ, ɛɛra ti a ku en bii a siisum mɛ bo en bii a parum la yele bo en ti a nyɔvore bɔna dɛŋa poan, nɛrekaŋa tari la taalɛ.​—Mlm 19:16; Tɛ 19:18-21; 1Yo 3:15.

Vo’osum Poan Yɛla

it-1-E 518 ¶1

Kootin

Kootin la yuun boi la teŋa la yaŋa nɔɔren. (Tɛ 16:18; 21:19; 22:15, 24; 25:7; Arut 4:1) “Nayaŋa” la pa’alɛ la foligo la n boi teŋa la yaŋa nɔɔren la. Yasi la yuun dela zɛse’esi ti ba yuun kaala Lɔɔ la bɔ’ɔra nɛreba la ge pa’ala nɛreba la ba nari ba ita yelese’a. (Ne 8:1-3) Nɛreba n yuun ni zo’e ɛɛra bilam bɔba dabeserɛ la poan la zuo, la yuun ka kpe’em ti ho nyɛ nɛra ti a dɛna sɛɛradaana ho san yeti ho koose lɔkɔ bii ho eŋɛ sɛla. Leyɛ’ɛsa me, nɛreba n yuun ni zo’e yaŋa la zɛ’an kɛlesa ba gãkeri yɛla se’em la zuo, gãkereba la yuun ni viisɛ la soŋa ta’an kɔ’ɛ ba puti’irɛ gãkɛ yele la soŋa ti la dɛna tontɔɔ. Nɔkpe’ene ka boi bim ti gãkereba la yuun tari zɛsoŋa mɛ yaŋa la nɔɔren ta’an zi’a gãkera yɛla. (Yob 29:7) Samuel yuun ni keŋɛ ta kaɛ la Betel, Gilgal la Mizpa ‘gãkera Israel tisi ana wa woo’ ge nyaa ni lebe Aramah, zɛ’an ti a kɛ̃’ɛra la.​—1Sa 7:16, 17.

AUGUST 2-8

NAAYINƐ TUULUM YƐLA | TƐƐNHEGƆ 22-23

“Lɔɔ La N Pa’alɛ Dusi Yele N Pakɛ Yehowa Se’em”

it-1-E 375-376

Zeero

Diimi sa la, ba yuun tari dusi zɛɛra la zeero. Naayinɛ yuun bo Israeldoma la nɔɔrɛ ti, ba san nyɛ nɛra n yaɛ ba ti a boŋa zi lɔɣɔrɔ ti la tibegɛ gaŋɛ en ti a lu gã’a, ba “da bahɛ ka” ge ba tuɣum “soŋɛ te ka ihege.” (Yɛh 23:5) Lɔɣeseto ti duŋa wan ta’an zi dela zeero, maɣesɛ wuu ‘yiiri siyi n vaɛ lɔɣɔrɔ.’​—2Na 5:17.   

it-1-E 621 ¶1

Tɛɛnhegɔ

Tɛɛnhegɔ gɔŋɔ la pa’alɛ ba nari ba bisa dusi soŋa se’em. Israeldoma la yuun ka nari ti ba nyɔkɛ niiŋa ka tukɔ poan, se’ere n sɔi la niiŋa la n boti a bisa a kɔma la zuo la n basɛ ti a bɔna tukɔ la poan. Israeldoma la yuun wan ta’an nyɔkɛ ka kɔma la ge basɛ ma la ti a keŋɛ. Niiŋa la wan ta’an le weke kɔma. (Tɛ 22:6, 7) Kaara yuun ka nari ti a yɔɣɛ boŋa la lɔlega kɔɔra, bala ta’an basɛ ti dunsɛka n ka tari paŋa la mɛlesa. (Tɛ 22:10) La yuun ka nari ti yaama gã’a ge ti ba garɛ lɔlega nɔɔrɛ ge tara ka tɔɔra ki. Ba san eŋɛ bala, ba wan basɛ ti naahɔ la namesɛ basɛ yoo.​—Tɛ 25:4.

w03-E 10/15 32 ¶1-2

“Da Zegere Ya Te Ya Lagom La Sɛba N Ka Dole Yesu Sore”

WUU hon nyɛ se’em la, yuɣenɛ la lɔlega san laɣum kɔɔra, ba nameseri mɛ. Yɔɣesega la​—ti ba ni dekɛ yɔɣɛ dusi bayi n zoni taaba ge me tara paŋa la​—wan basɛ ti ba za’a laɣum namesa. Naayinɛ n yuun boti dusi wa imma’asum yele se’em la n sɔi ti a yuun yele Israeldoma la ti: “Da yɔgɛ lɔlega la boŋa kɔɔra.” (Tɛɛnhegɔ 22:10) Naresum yele wa kelum dɛna la bala mea bɔ’ɔra lɔlega la yuɣenɛ.

Kaara kan bɔta ti a basɛ ti a dusi namesa. Ge a san ka tara lɔlesi siyi, a ta’an dekɛ dusi siyi laɣum yɔɣɛ taaba. La niɛ peelum ti kaara la ti ba tɔɣɛ a yele yuun kɔbesɛka n pa’asɛ 19 makerɛ la poan la, yuun eŋɛ la bala. Dusi la n ka zoni taaba ge ti ba paŋa me bɔna tɔka tɔka la zuo, dunsɛka paŋa n pɔ’ɛ la wan tiregera mɛ ti a tum tuunɛ la ge ti dunsɛka n tari paŋa la me, tuunɛ la wan bɔna eŋa zuo.

Vo’osum Poan Yɛla

it-1-E 600

Sanɛ, Sandita

Sanɛ dela hon to’e nɛra sɛla ti la dɛna pɛregerɛ ti ho yɔ bii ho tum tuunɛ tee yɔ. Israeldoma saŋa la, nɛreba n yuun ni ka tara ligeri la zuo ti ba dita sama. La yuun dela nimbãalega ti Israel nɛra dɛna sandita; sandita la yuun dela pɛmesa la yameŋa. (Mag 22:7) Naayinɛ yuun bo Israeldoma la nɔɔrɛ ti ba bɔ’ɔra ba Israel tadaandoma sɛba n de nasedoma la yɛri yɛri ge da basɛ ti ba yɔɔra dɔɣelega wuu ligipɛmeseba n yuun iti se’em la. (Yɛh 22:25; Tɛ 15:7, 8; Ym 37:26; 112:5) Ge ba ta’an basɛ ti saana yɔ dɔɣelega. (Tɛ 23:20) Yudadoma gɔnmi’ileba yeti, nɛra san peŋe ligeri ti a leebe ma’a ti bala tuna tuuma ge daɣɛ nɛra n naseri ge ɛɛra soŋerɛ. Saama yuun ka kɛ̃’ɛri Israel yuura se’ere n sɔi la, ba yuun dela lɛɛba ge me nara ti ba yɔɔra dɔɣelega yele yele wuu bamam me n yuun tari ligeri la pɛmesa nɛreba ti ba yɔɔra dɔɣelega la.

AUGUST 9-15

NAAYINƐ TUULUM YƐLA | TƐƐNHEGƆ 24-26

“Lɔɔ La N Pa’alɛ Yehowa N Nɔŋɛ Pɔɣesi Yele Se’em”

it-2-E 1196 ¶4

Pɔka

Hali lɔɔ la n yuun pa’ali soogɛpa tuuma n ani se’em la, yuun yeti buraa n nan di a pɔɣa ka nari ti a keŋɛ zaberɛ yuunɛ poan. Wana wa yuun bo nɛra la a pɔɣa yɔ’ɔ mɛ ti ba wan ta’an dɔɣɛ bia, ti a sira la san keŋɛ zaberɛ bii a ki mɛ zaberɛ la poan, la wan dɛna subuɣelegɔ bɔ’ɔra pɔka la, la eŋa n tari bia la.​—Tɛ 20:7; 24:5.

it-1-E 963 ¶2

Yi’isegɔ

La niɛ peelum ti maaseŋɔ wa n yuun boi teŋa la poan la yuun soŋɛ nasedoma la mɛ. La yuun daɣɛ ti la basɛ ti nɛreba tara zinnyaɣerɛ ge la tuɣum basɛ ti ba bɔ’ɔra la yɛri yɛri, ba da tara n ma’a tara puti’irɛ ge me mina ti Yehowa wan kã bo ba. La me basɛ ti to bɔkɛ David n yuun yeti: “Mam ka tabelɛ nyɛ te Na’ayenɛ bahɛ tontɔɔdoma wa, bii ba kɔma ɛɛra soha dia.” (Ym 37:25) Hali la ba nɔŋɔ la za’a, nasedoma yuun san dekɛ Lɔɔ la n bo ba yɔ’ɔ se’em la tuna tuuma, ba wan ta’an tum ti kom kan tara bamam la ba kɔma ti ba ɛɛra zusa dia.

w11-E 3/1 23

Hon Mi?

Diimi Israeldoma saŋa la, buraa san ki ge ka tara bia, a suɔ yuun nari ti a di a pɔɣa la ti ba dɔɣɛ bia ti buraa la yu’urɛ da saalum buuri la poan. (Pin’ileŋɔ 38:8) Pooren, maaseŋɔ wa yuun laɣum pa’asɛ Moses Lɔɔ la poan mɛ ti ba mina ti nɛra ta’an di a suɔ pɔɣa. (Tɛɛnhegɔ 25:5, 6) Arut gɔŋɔ la n tɔɣɛ Boaz yele se’em la, basɛ ti to baŋɛ ti maaseŋɔ wa yuun nyaa paɛ la zɛ’an woo ti se’em n ki la suurɔ san ka bɔna, buuri la poan buraa wan ta’an di pɔka la.​—Arut 1:3, 4; 2:19, 20; 4:1-6.   

Sadduceedoma la n yuun yele sɛla ti la bɔna Mark 12:20-22 la basɛ ti to baŋɛ ti ba yuun diti ba suurɔ pɔɣeba mɛ Yezu saŋa la. Yuun kɔbesɛka n deŋɛ nɛŋa Yudadoma gɔnmi’ila Flavius Josephus yeti, maaseŋɔ wa yuun yeen daɣɛ la sɛla n basɛ ti nɛra la yu’urɛ kelum bɔna ge la basɛ ti buraa la lɔɣɔrɔ la kelum bɔna la yire la poan ti pɔka la tara bisa amea. Sankaŋa la, pɔɣesi yuun ka tari sore ti ba soe sɔna ba sireba lɔɣɔrɔ. Ge bia la ti eŋa la a sira suɔ dɔɣɛ la, n wan ta’an sɔna a sira la n ki la lɔɣɔrɔ.

Vo’osum Poan Yɛla

it-1-E 640 ¶5

Pɔɣelebesego

Pɔɣelebesego Gɔŋɔ. La ka nari ti to ti’isa ti nɛreba n nyaa iti ba boti se’em la pa’alɛ ti Moses lɔɔ la n yuun tɔɣɛ pɔɣelebesego se’em la dela naana ti Israel buraa wan ta’an basɛ a pɔɣa. Buraa san wan ta’an basɛ a pɔɣa, la dela a eŋɛ yɛla ase’a. La yele pakɛ mɛ ti a “golehɛ pɔgɔlebehegɔ gɔŋɔ” bo en. Buraa la yuun nari ti a dekɛ gɔŋɔ wa bo pɔka la ge nyaa ta’an “sa’ɛ ka a yire poan.” (Tɛ 24:1) La boi bim ti Baabule la ka tɔɣɛ yele wa nima nima. Ge ti buraa la nyaa gulesɛ gɔŋɔ wa la, la yuun nari ti a sɔsɛ yele la bo teŋa la kpɛ’ɛndoma ti bamam me tiregɛ bisɛ ba wan eŋɛ se’em maalɛ yele la. Tɛm sebo ti sira la wan dekɛ gulesɛ gɔŋɔ la ge doose naresum sore sɛka poan basɛ a pɔɣa la, wan bo sira la yɔ’ɔ ti a malum ti’isɛ eŋa n kɔ’ɛ a puti’irɛ ti a eŋɛ sɛla la soŋa. A yuun nari ti a mina sɛla n sɔi ti a yeti a lebese a pɔɣa la ge a san doose naresum sore la soŋa, la wan basɛ ti sɛba n ni ita kãbi kãbi ti ba lebese ba pɔɣeba la nyɔɣɛ yɛm. La me wan basɛ ti ba kan vɛ̃ɣena pɔka la. Baabule la ka pa’alɛ yelese’a n yuun boi “pɔgɔlebehegɔ gɔŋɔ” la poan.

AUGUST 16-22

NAAYINƐ TUULUM YƐLA | TƐƐNHEGƆ 27-28

“Kan’an Kana Wa Zan’an Wan Sige Ya Zuo”

w10-E 12/15 19 ¶18

Zilam Vo’osum La N Soŋeri Naba La Wan Basɛ Ti Ho Nyɛ Naayinɛ Kã’a!

To keleseri se’em la pa’alɛ ti to nani yelese’a n boi Naayinɛ Yetɔɣum la poan mɛ ge me dita vo’osum poan disɛka ti a bɔ’ɔra to la. (Mt. 24:45) La me pa’alɛ ti to nana Naayinɛ la a Dayɔa la. Yezu yeti: “La dagɛ te se’em woo n yi’ire mam yeti, n Daana, n Daana, wan kɛn’ɛre saazuo sɔ’ɔlom la poan. Ge sɛba ma’an n ete sɛla te mam Sɔ n boe saazuo ha la bɔta la, n wan kɛn.” (Mt. 7:21) To keleseri Naayinɛ la, me kelum pa’alɛ ti to siregera tomea dɔla maaseŋɔ seko woo ti a bɔ’ɔra to la ge me nana keendoma la n boi Krista tansugere la poan la ti ba dela “bo’olom.”​—Ep. 4:8.

w01-E 9/15 10 ¶2

Yehowa Wan Sirum Kã Bo Ho?

Tɛɛnhegɔ 28:2 n dekɛ Hebru itigɔ yelebire “nana” tum tuuma la pa’alɛ la sɛla ti ho wan kelum ita. La ka nari ti Yehowa nɛreba yeen nana en saŋa ase’a ge la dela ba nana en ba vom dabesa za’a. Bala ma’a n wan basɛ ti Naayinɛ kã bo ba. Hebru itigɔ yelebire la n de “sige” la dela sɛla n ani wuu gowɛa n ni ɛɛra dusi goo poan se’em la ti la pa’alɛ ti “la kɔ’ɔn digera ho mɛ” bii “la paɛ ho.”

w10-E 9/15 8 ¶4

Tiregɛ Ɛɛra Yehowa Kã’a

Israeldoma la yuun nari ti ba nana la wani? Lɔɔ la yeti Naayinɛ puurɛ kan pee la a nɛreba la ba san ka pu’usa en la “nyeema la popeelom.” (Kaalɛ Tɛɛnhegɔ 28:45-47.) Yehowa ka boti to yeen dɔla a nɔɔrɛ, sɛla n sɔi la dusi bii kolekpabɛ’ɛsi me wan ta’an ita bala. (Mr. 1:27; Yam. 3:3) To nɔŋɛ Naayinɛ la zuo ti to nana en to suuren. To san tara nɔŋerɛ dena wa, to wan sakɛ ti Yehowa nɔya la ka kpe’em ti “sɛba me n eere en la, a wan bahɛ ba te ba nyɛ en.”​—Heb. 11:6; 1 Yo. 5:3.

Vo’osum Poan Yɛla

it-1-E 360

Beene Kugere

Yehowa lɔɔ la yuun ka bo sore ti nɛra vurege a tadaana beene kugere. (Tɛ 19:14; le bisɛ Mag 22:28.) Yelemɛŋɛrɛ, wuŋerɛ wan paɛ se’em n vurege a “sɔɔn beene kugure.” (Tɛ 27:17) Sɛba n yuun tari samana la yuun tari la ba samana wa kɔɔra bisa bamea. Bala la, nɛra san vurege beene kugere la fii lebe pooren, a diti la ayima kɔa ti a kan tara sɛla n wan diisa amea. Diimi sa la, se’em woo n eŋɛ bala dela nayiga. (Yob 24:2) Ge nɛreyaalesi basɛba la Yudadoma nabiisi la n yuun boi Hosea saŋa la n yuun iti yele ana la, ba yuun dekɛ ba makɛ la nɛresɛba n vuti nɛreba bɛɛna kuga.​—Ho 5:10.

AUGUST 23-29

NAAYINƐ TUULUM YƐLA | TƐƐNHEGƆ 29-30

“Yehowa Pu’usegɔ Ka Ba’ɛ Kpe’em”

w09-E 11/1 31 ¶2

Yehowa Bo To La Yɔ’ɔ

La kpe’em mɛ ti to baŋɛ Naayinɛ n boti to ita sɛla ge me ita dɛ? Moses yuun yeti: “Nɔse’ere te n bɔ’ɔra ya zina wa ka ba kpe’em bo ya bii zaan la ya te ya kan paɛ.” (Tɛɛ. 30:11) Yehowa kan yele to ti to eŋɛ sɛla ti to kan ta’an eŋɛ. Sɛla ti a bɔta ti to ita la makɛ la ma’a ti to wan ta’an eŋɛ. La me dela naana ti to ta’an baŋɛ a. La daɣɛ ti to zom “saazuo ha” bii to keŋɛ “mɔgɔrɛ yakenɛ” ta zamesɛ Naayinɛ n boti to ita sɛla. (Tɛɛ. 30:12, 13) Baabule la kɔ’ɔn pa’alɛ tɔ sɛla n nari ti to ita mɛ.​—Mik. 6:8.

w09-E 11/1 31 ¶1

Yehowa Bo To La Yɔ’ɔ

MABIPƆKA ayima yuun ti’iseri ti yelese’a n paɛ en a bunbilimen la basɛ ti a kan ta’an le eŋɛ sɛla n ani soŋa a vom poan. A yuun yeti: “Mam ni kɔ’ɔn ti’isa saŋa woo ti mam kan ta’an tara yelemɛŋɛrɛ bɔ’ɔra Yehowa.” La dela bala yoi? To kan ta’an sirum eŋɛ sɛla to bɔŋa la poan? Aayi. Yehowa Naayinɛ bo to la yɔ’ɔ ti to wan ta’an bisɛ to wan vɔna to vom la se’em. Yehowa boti la to eŋɛ sɛla n ani soŋa, a Baabule la me pa’ali tɔ to wan ta’an doose sarɔseko eŋɛ bala. Geele Moses n yuun yele sɛla ti la bɔna Tɛɛnhegɔ a zuo 30 la bisɛ.

w09-E 11/1 31 ¶4

Yehowa Bo To La Yɔ’ɔ

La yele pakɛ Yehowa mɛ yoi la to loe loore se’a la? Ɛɛ, la yele pakɛ mɛ! Naayinɛ yuun basɛ ti Moses yeti: “Loe ya vom.” (Tɛɛ. 30:19) Ge to wan eŋɛ la wani loe vom? Moses yeti: “Nɔŋɛ Na’ayenɛ ya Yenɛ la kɛleha a nɔɔrɛ ge gin en kaŋkaŋe.” (Tɛɛ. 30:20) La san puɣum ana la se’em me, to wan nɔŋɛ Yehowa, kɛlesa en, nana en ge me kɔ’ɔn ana tapilapi la en. To san ita bala, la pa’alɛ ti to loe la vom​—wana wan basɛ ti to tara vom somɔ nananawa ge me wan ta vɔna wuusa Naayinɛ teŋpaalega la poan.​—2 Pe. 3:11-13; 1 Yo. 5:3.

Vo’osum Poan Yɛla

it-1-E 665 ¶3

Tuberɛ

Yehowa yuun basɛ ti a yamesi yele Israeldoma la n yuun ka nani en la ti ba yɛla kpaɣelum mɛ ti ba ‘tuba lĩ ka wuna.’ (Yer 6:10; Tm 7:51) La ani wuu ba dekɛ la sɛla lĩ tuba la ti i ka le wuna. Ba dela tubese’esi ti Yehowa lĩ a ti sɛba n ka nani en la kan ta’an bɔkɛ vo’osum poan yɛla ge me basɛ ti sɛba n eeri en ge nana en la bɔkera vo’osum poan yɛla. (Tɛ 29:4; Arom 11:8) Tuntuna Paul yuun tɔɣɛ biŋe ti Kristakɔma sɛba n yelege bamea ka tara sakerɛ la, kan bɔta ti ba kelese yelemɛŋɛrɛ la n boi Naayinɛ Yetɔɣum la poan la ge ba wan tuɣum bɔta la ba kelese yelese’a n ‘za’asum’ nyaa ta kɛlesa pumpɔreŋɔ pa’alegɔdoma. (2Ti 4:3, 4; 1Ti 4:1) Leyɛ’ɛsa, basɛba tuba wan “kɛla wii” la yelese’a ti ba wuna la, yele yele wuu la san dɛna namesegɔ yɛla.​—1Sa 3:11; 2Na 21:12; Yer 19:3.

AUGUST 30–SEPTEMBER 5

NAAYINƐ TUULUM YƐLA | TƐƐNHEGƆ 31-32

“Zamesɛ Yelese’a N Boi Tɛɛnhegɔ 32 Yuunɛ La Poan”

w20.06-E 10 ¶8-9

“Bo Mam Suunre Deyena Te N Tana Zɔta Ho Yu’urɛ Wa”

La yuun gee fii ti Israeldoma la kɛ̃ Pu’ulumbiŋe Teŋa la, Yehowa yuun pa’alɛ Moses la yuunɛ. (Tɛɛ. 31:19) Moses me n yuun nari ti a pa’alɛ nɛreba la yuunɛ la. (Kaalɛ Tɛɛnhegɔ 32:2, 3.) To san ti’isa taɣesa a kaalegɔ zɛ’an 2 la 3, to wan baŋɛ ti Yehowa ka boti a suɣɛ a yu’urɛ la, ti la ana wuu ku ba’ɛ dɛna la zilam ti ho kan ta’an yi la. A boti la nɛresaaleba woo mina a yu’urɛ la! Bisɛ la yuun de yɔ’ɔ kãtɛ se’em ti nɛreba la wum ti Moses pa’ala ba Yehowa la A yu’urɛ la n tari ɔmi’isa la! Moses n yuun pa’ali ba sɛla la yuun ani la soŋa ge kpɛmesa giila wuu saa n niiri basa bunbula zuo se’em la. To wan eŋɛ la wani pa’ala nɛreba bala?

To san mɔɔla yire la yire bii to boi la nɛrekuuŋɔ zɛ’an mɔɔla, to ta’an dekɛ Baabule la pa’alɛ ba Naayinɛ yumɛŋɛrɛ, Yehowa la. To wan ta’an dekɛ gɔnɔ, vidiyodoma la lɔɣese’a n boi to intanɛt tuuma zɛ’an la pa’alɛ ba Yehowa yɛla. To san bɔna tuuma zɛ’an, sukuu poan bii to ye la sore, to ta’an dekɛ yɔ’ɔ la pa’alɛ nɛreba to Naayinɛ la n ani se’em. To san pa’ala nɛreba Yehowa n tari putɛsɛka bɔ’ɔra asaala la teŋgɔŋɔ wa la, to pa’ali ba la sɛla ti ba ka mina ti Yehowa wan eŋɛ. To san pa’ala nɛreba to nɔŋerɛ Sɔ la yele, to basɛ ti Naayinɛ yu’urɛ la ana la fa’a. To me wan basɛ ti ba baŋɛ ti nɛreba n zɛregeri ge parena yelese’a bɔ’ɔra Yehowa la daɣɛ yelemɛŋɛrɛ. To pa’ali nɛreba la sɛla n ani soŋa ge kpɛmesa ba giila ti la gana pa’alegɔ woo.​—Isa. 65:13, 14.

w09-E 5/1 14 ¶4

Baabule Pa’alegɔ Yɛla​—Hon Bɔkɛ A?

Baabule la me ni dekɛ la lɔɣɔrɔ tɔɣɛ pa’alɛ Yehowa yele. Ba tɔɣɛ a yele ti a dela “Israel Taŋa,” “taŋa” ti la dɛna ba “soka zen’an.” (2 Samuel 23:3; Yooma 18:2; Tɛɛnhegɔ 32:4) Yɛla wa makɛ taaba la wani? Wuu taŋa n karegɛ gã ka bikera se’em la, Yehowa Naayinɛ me ani la bala dɛna ho Suka Zɛ’an.

w01-E 10/1 9 ¶7

Tɔɣesa Yehowa Ho San Pa’ala Ho Kɔma

Geele bisɛ Yehowa n yuun tari nɔŋerɛ bɔ’ɔra Israeldoma la se’em. Moses yuun dekɛ Yehowa n tari nɔŋerɛ se’em bɔ’ɔra Israeldoma, ti la dɛna la makerɛ. A yuun yeti: “Wo selega n limihe a teko se’em ge kaara ka kɔma se’em la ne yeregɛ a kelompagehe nyɔgera ba se’em te ba yaga se zuo se’em la bini. Na’ayenɛ ma’an daa boe [Yakob] nɛŋan.” (Tɛɛnhegɔ 32:9, 11, 12) Silega tukɔ ni zãɛ mɛ ge a bia la san ɛ̃kɛ yese tukɔ la poan, a ma la ni yɛregɛ la a kelempaɣesi ɛ̃ɣera fii fii dɔla en. Bia la san ɛ̃kɛ yese tukɔ wa n boi taŋa zuo la ge yeti a lui teŋa, ma la ni ɛ̃kɛ la kalam kɛ̃ bia la pulin ti a ‘yaɣa a kelempaɣesi la zuo.’ Ba yuun nan de teŋpaalega la, Yehowa me yuun doose la nɔŋerɛ sore poan bisa Israeldoma la bala mea nɔɔ. A yuun dekɛ la Moses Lɔɔ la bo nɛreba la. (Yooma 78:5-7) Naayinɛ yuun nyaa basɛ ti a nini bɔna la a nɛreba la zuo, kɔ’ɔn maasum ti a faaɛ ba basɛ yele san paɛ ba.

Vo’osum Poan Yɛla

w04-E 9/15 27 ¶12

Tɛɛnhegɔ Gɔŋɔ La Yelekpina

31:12. Bunbilipaalesi nari ti ba zi’a la bunkureba zamesegɔ poan ge me kɔ’ɔn ana kɛli, zamesa.