Vom La Na’am Tuuma Zamesegɔ Viisegɔ Gɔŋɔ
JANUARY 3-9
NAAYINƐ TUULUM YƐLA | KEMA 15-16
“Hon Dɔ̃rɛ Nɛra Dela Yelegaaserɛ Paa!”
w12-E 4/15 8 ¶4
Ba’asegɔ Dabesa Wa Poan, Nɛreba Dɔ̃ti La Taaba!
Yia, geele bisɛ Kema Samson n yuun nɔŋɛ Delila ge ti a pã’asɛ en se’em la. Samson yuun kɔ’ɛ a puti’irɛ ti a bɔna Naayinɛ nɛreba la nɛŋa zabɛ la Filistiadoma la. Filistia nadoma banuu la n yuun ta baŋɛ ti Delila suure ka kɛ̃ Samson la, ba yuun mu’e en la salenpɛɛla zo’e zo’e ti ba ta’an baŋɛ sɛla n sɔi ti a tara paŋa bala ge ta’an ku en. Delila yuun to’e ba bo’olum la mɛ ge sugumnɔɔrɛ butã ti a yuun tiregɛ koŋe. A yuun kɔ’ɔn bɛlegera en mɛ ge “daana en daarɛ woo la yetɔgom.” Pooren ‘ti Samson sunsɔa nyie ti a puɣum ka mina eŋa n wan eŋɛ amea se’em.’ Bala ti a yele en ti eŋa ka tabelɛ kɛ a zuo zonto la ge ba san kɛ a zonto la eŋa kan le tara paŋa. Delila n baŋɛ bala la ti daarɛ deyima ti Samson ga’a gisa a nama zuo ti a sie Samson zuo ge nyaa dekɛ en bo a dinedoma la. (Ken. 16:4, 5, 15-21) Sɛla ti a yuun eŋɛ la dela yelegaaserɛ paa! Ligeri zuo, ti Delila dɔ̃rɛ nɛra n nɔŋɛ en.
w05-E 1/15 27 ¶5
Kema Gɔŋɔ La Yelekpina
14:16, 17; 16:16. Kaasega la nyunyɔm ta’an basɛ ti daaŋɔ bɔna nɛreba tiŋasuka.—Magaha 19:13; 21:19.
w12-E 4/15 11-12 ¶15-16
Ba’asegɔ Dabesa Wa Poan, Nɛreba Dɔ̃ti La Taaba!
Nɛra wan eŋɛ la wani tara yelemɛŋɛrɛ bɔ’ɔra a luɣerɛ kpɛ’a? Naayinɛ Yetɔɣum la yeti: “Nyeena la pɔgɔsɛka en pɔhɛ ho boraanɛ la” ge me, “Dita vom nyɛlom la ho pɔgɔsɛka [bii burasɛka] te ho nɔŋɛ la.” (Mag. 5:18; Pa. 9:9) Ba yi la za’a san ta kuregera, la nari ti “ba ti’isa taaba yele” ta’an bɔna la taaba ge me buɣela taaba suure. Bala pa’alɛ ti ba kɛlesa taaba, nyɛta nɛŋa bɔ’ɔra taaba ge me du’ura taaba. La nari ti ba basɛ ti ba pɔɣedire la ana kankaŋi ge me tara bɔnsoŋa la Yehowa. Bala la, la nari ti nɛra la a pɔɣa laɣum kaala Baabule la, laɣum naɛ taaba kena na’am mɔɔɔlegɔ saŋa woo ge me laɣum naɛ taaba zusera.
KELUM TARA YELEMƐŊƐRƐ BƆ’ƆRA YEHOWA
Mabiisi basɛba n boi tansugere la poan la tum la be’em ti ba dɔlegɛ ba tuberɛ ge “kan’an ba soŋa soŋa. Te bala te ba wan sɛ ze’ele soŋa soŋa ba sakerɛ Yesu sore dɔlɔga la poan.” (Titus 1:13) Basɛba itigɔ pa’alɛ ti, la nari ti ba yese ba tansugere la poan. “Sɛba n baŋɛ te la de ma’an” la, tubedɔlegerɛ soŋɛ ba mɛ ti ba malum tiresum ze’ele vo’osum poan. (Heb. 12:11) Ge to wan eŋɛ la wani ba san yese to suɔ bii to zɔ tansugere la poan? Bala poan, la nari to tara yelemɛŋɛrɛ bɔ’ɔra Naayinɛ ge daɣɛ nɛra la. Yehowa biseri to mɛ ti a baŋɛ nyaa to doli a nɔɔrɛ yelesum la n de to da naɛ la se’em ti ba yese en basɛ la.—Kaalɛ 1 Korint 5:11-13.
Vo’osum Poan Yɛla
w05-E 3/15 27 ¶6
Yehowa N Bo Samson Paŋa Ti A Zabera Nyaŋera!
Samson puti’irɛ yuun kɔ’ɔn bɔna la eŋa la Filistiadoma zaberɛ la poan. Bala zuo ti a yuun keŋɛ Gaza tiŋa ta bɔna tuutuudaana yire ti a ta’an zabɛ la Naayinɛ dinedoma la. Samson yuun eeri la ga’aregɔ zɛ’an a dinedoma la tiŋa poan a me yuun wan nyɛ ga’aregɔ zɛ’an wa la tuutuudaana yire. Samson yuun ka ti’iseri yalumtuuma yele. Yu’unsunsua ti a yese pɔka la yire nyaa ta vɔɛ tiŋa la yasi siyi tara keŋɛ zoore se’ere n lɛm Hebron la ti la zaarɛ dɛna miila 37 [km 60] la. Naayinɛ n yuun bo en yɔ’ɔ la paŋa ti a ta’an eŋɛ wana wa.—Kema 16:1-3.
JANUARY 10-16
NAAYINƐ TUULUM YƐLA | KEMA 17-19
“Ho San Zaɣesɛ Naayinɛ Lɔɔ, Yele Wan Paɛ Hɔ”
it-2-E 390-391
Mika
Efraim buraa. Mika yuun tue la nɔse’ere n pã’asɛ bunii Nɔya Pia (Yɛh 20:15) la poan la, la eŋa n yuun zu a ma salenpɛɛla 1,100 la. Eŋa n yuun pɔrɛ a be’em ge tari ligeri la lebe ta tisɛ la, a ma la yuun yeti: “Mam dekɛ sanlenpeelega la zan’an eŋɛ Na’ayenɛ nu’uhen, te n bia yagom bagarɛ. Nananawa n wan lebehe ba bo.” Ti a nyaa dekɛ sanlenpeelega kpila 200 tari ta bo kuta “te a kure te ba dɛna bagarɛ.” A tari ku ta ze’ele la Mika yire. Mika yuun “mɛ la. . .baga,” pɛ fugiriga ge maalɛ yaabedoma nyaa bo a bia ayima kpe’eŋo ti a dɛna malema nɛŋadaana. La boi bim ti a yuun ti’isɛ ti la wan tara na’asegɔ bɔ’ɔra Yehowa ge la yuun sa’am nɔse’ere n yeti ba da kaabera baɣa la mɛ. (Yɛh 20:4-6) A me yuun tamɛ Yehowa Suɣerɛ la, la malemadoma tuuma la yele mɛ. (Ke 17:1-6; Tɛ 12:1-14) Pooren, Mika yuun basɛ ti Yonatan n de Gersom dayɔa n ze’ele Moses buuri poan la ge me dɛna Levi nɛra la wa’an wa kɛ̃’ɛra la a yire dɛna a malemadaana. (Ke 18:4, 30) Mika puurɛ pee mɛ la sɛla ti a eŋɛ la ge nyaa tue yeti: “Nananawa n mi te Na’ayenɛ wan bo mam lɔgɔrɔ.” (Ke 17:7-13) Yonatan yuun ka ze’ele Aron tuusum la poan ge me ka nara ti a dɛna malemadaana, bala yuun le basɛ ti Mika yele la gaam la be’ero.—Kan 3:10.
it-2-E 391 ¶2
Mika
La yuun ka yue ti Mika la buraasi basɛba yuun digera Dandoma la. Ba yuun ta paɛ ba ti nɛreba la soke ba sɛla n sɔi ti ba digera ba la, Mika yeti: “Ya vaɛ la n baga te n mɛ la n malemadaana la, tare yɛ’ɛha. N eŋɛ la wanɛ?” Bala ti Dan dayɔɔsi la yele Mika yeti, a san dɔla ba ge nyɔna, ba wan zabɛ la en. Mika n yuun baŋɛ ti Dandoma tari paŋa gana a nɛreba la, a yuun viise lebe kule mɛ. (Ke 18:22-26) Dandoma la yuun ta zabɛ nyaŋɛ la Lais tiŋa, nyɔ ka la bugum ge nyaa mɛ tiŋa bim ti ka yu’urɛ dɛna Dan. Yonatan la a dayɔɔsi la yuun dela malemadoma Dan buuri la poan nyaa tari ‘Mika baɣerɛ la ti ba tari na la, sɛ ka ze’ele sansɛka ti Naayinɛ yire [Suɣerɛ] la kelum bɔna Silo tiŋa la poan la.’—Ke 18:27-31.
Vo’osum Poan Yɛla
w15-E 12/15 10 ¶6
Naayinɛ Yetɔɣum Leregere N Di Mi’a
Sɛla n sɔi ti ba basɛ ti Naayinɛ yu’urɛ bɔna Baabule la poan la dela sɛla n ka siregeri ge la malum pa’asa mɛ. New World Translation la ti ba malum demese dɛ 2013 poan la nyaa tari la Naayinɛ yu’urɛ la ti la paɛ 7,216, bala pa’alɛ ti zɛ’ɛsi 6 poan ti ba nyɛ yu’urɛ la ti la gana 1984 denɛ la. Naayinɛ yu’urɛ la ti ba nyɛ dɛ pa’asɛ ti la dɛna sugumnɔɔrɛ bunuu la boi la 1 Samuel 2:25; 6:3; 10:26; 23:14, 16. Sɛla n sɔi ti ba gulesɛ yu’ura la eŋɛ zɛ ana wa dela Yaarum Mɔɣerɛ Gɔnkila la n yue gaŋɛ Hebrew Masoretic text yuun 1,000 la, tari la Naayinɛ yu’urɛ la zɛ ana wa poan. Leyɛ’ɛsa, ba le viisɛ daami Baabule gɔnɔ la poan baŋɛ ti ba gulesɛ yu’urɛ wa ti la bɔna Kema 19:18 poan mɛ.
JANUARY 17-23
NAAYINƐ TUULUM YƐLA | KEMA 20-21
“Kɔ’ɔn Zusera Yehowa”
w11-E 9/15 32 ¶2
Hon Ani Wuu Finehas Yele San Paɛ Hɔ?
Gibea tiŋa buraasi n ze’ele Benyamin buuri la poan la n yuun pɛregɛ Levi nɛra zaba ga’arɛ ge ku en ti la dɛna nɔyaalegerɛ la, buuri bana la yuun isige mɛ maasum ti ba zabɛ la Benyamindoma la. (Ken. 20:1-11) Ba yuun zusɛ Yehowa mɛ ge nyaa keŋɛ ta zabɛ la ba ge Benyamindoma yuun zabɛ nyaŋɛ ba la sugumnɔɔrɛ buyi ti la ka tara makerɛ. (Ken. 20:14-25) Ba wan yeti a ka kelese ba zusega la? Yehowa yuun sirum boti ba maalɛ be’em la me yoi?
w11-E 9/15 32 ¶4
Hon Ani Wuu Finehas Yele San Paɛ Hɔ?
To zamesɛ la bem yele wa poan? Keendoma mɔɔri ge zusa Naayinɛ ti a soŋɛ ba mɛ ge ti yɛla kelum paara ba tansugere la poan. Wana san ita, keendoma nari ti ba tɛra Yezu n yele se’em la: ‘Kɔ’ɔn sɔkera ya [bii zusa] ge a wan bo ya; kɔ’ɔn ɛɛra ya ge ya wan nyɛ; kɔ’ɔn yi’ira ya ge a wan wum ya.’ (Luke 11:9) Hali la san ta ana keendoma wuu la yue mɛ ti ba ka nyɛ ba zusega la lebesego, ba wan tara puti’irɛ ti Yehowa wan lebese ba zusega la sansɛka n nari poan.
Vo’osum Poan Yɛla
w14-E 5/1 11 ¶4-6
Hon Mi?
Ba yuun tari kalɔbesi zabera la wani daami sa?
David yuun dekɛ la kalɔbega lobe Goliat n de nɛrewaɣelɛ la ku. David yuun mi kalɔbega lɔbega la sansɛka ti a yuun dɛna duunkeena la.—1 Samuel 17:40-50.
Baabule saŋa la Egyptdoma la Assyriadoma yuun ni dɔreŋɛ la kalɔbesi ba yɛa poan. Kalɔbega la yuun dela ganɛ bii tanɛ ge tara mi’isi siyi n lu a nɔgbama la. Nɛra la yuun ni dekɛ la kugesaalɛ bii kugekilega n kãregɛ paɛ wuu inches bayi ta paɛ batã (5 ta paɛ 7.5 cm) ge me tibegɛ paɛ wuu ounces bawai (250 g). Nɛra la ni yuulum kalɔbega la saazuo ge nyaa basɛ kalɔbega la mi’a ayima a nu’usin ti kugere la nyaa ni yese kalam la paŋa ka nyɔsegera.
Ba tu mɛ viisɛ Middle East tisi nyɛ kalɔbesi kuga ti ba yuun tara zaberɛ daami sa. Daanse’ere zabezabereba yuun ta’an dekɛ kalɔbega lobe ti la zaarɛ dɛna miila 100 ta paɛ 150 awa ayima poan (km 160 ta paɛ 240 awa ayima poan). Gɔnmi’ileba basɛba ka sakɛ ti nɛra yuun wan ta’an lobe kalɔbega ti la keŋɛ zaɛ wuu nɛra n tɛ̃ tãhɔ la ge nɛra yuun ta’an dekɛ kalɔbega lobe ti la dɛna kum nyuuŋo.—Kema 20:16.
JANUARY 24-30
NAAYINƐ TUULUM YƐLA | ARUT 1-2
“Kɔ’ɔn Tara Suure Poan Nɔŋerɛ”
w16.02-E 14 ¶5
Tɔɣesa Yehowa Zɔdoma La
Arut yuun ta’an ti’isa ti eŋa tari a yidoma ti ba bɔna Moab tiŋa—a ma la a suurɔ ti ba wan soŋɛ en ti a bɔna. A tiŋa yuun dela Moab. A yuun mi tiŋa la nɛreba la ba malema la ge me wuna ba yetɔɣum la. Naomi yuun ka yele en yeti a wan nyɛ yele aŋa taaba Betlehem tiŋa poan. Yelemɛŋɛrɛ, a yuun yele Arut ti a yee Moab tiŋa. Naomi yuun mi ti a kan ta’an ee sireba bii yire bo a poyɔɔsi la. Arut wan eŋɛ la wani? Bisɛ eŋa n yuun boi a tɔka se’em la Orpah n yuun “lebere a nɛreba la a baga zen’an la.” (Arut 1:9-15) Arut yuun boti la a lebe a nɛreba la tiŋa ti ba ta kaabera baɣa? Aayi, a yuun ka lebe.
w16.02-E 14 ¶6
Tɔɣesa Yehowa Zɔdoma La
La yuun ta’an dɛna ti Arut sira la Naomi n yuun basɛ ti a baŋɛ Yehowa. Yehowa yuun ka ani wuu Moab tiŋa baɣa la. Arut yuun mi soŋa soŋa ti Yehowa ma’a n nari ti a pu’usa en la a suuren. Ge mi’ilum ma’a ka seke. Arut yuun dela a kɔ’ɛ a puti’irɛ. A wan loe Yehowa ti a dɛna a Naayinɛ? Arut yuun kɔ’ɔn loe la soŋa. A yuun yele Naomi yeti, “Ho nɛreba dela mam nɛreba n bala. Ho Yenɛ dela mam Yenɛ.” (Arut 1:16) Arut yuun nɔŋɛ Naomi la a suuren ge nɔŋerɛ se’ere ti a yuun tara bɔ’ɔra Yehowa la yuun gaŋɛ bala. Pooren, Boaz yuun pɛɣɛ Arut mɛ la eŋa n dekɛ amea delum Yehowa la. (Kaalɛ Arut 2:12.) Bala basɛ ti to tiɛ la niinbila n ni suɣɛ a ma kelumpaɣesi pulen ti a tɛ’ɛla en se’em la. (Ym. 36:7; 91:1-4) Yehowa yuun nyaa dela dɔɣera kaŋa taaba bo Arut. A yuun kã bo en la eŋa n tari sakerɛ se’em la mɛ, bala Arut yuun ka makɛ yeti a daa san baŋɛ ni.
Vo’osum Poan Yɛla
w05-E 3/1 27 ¶1
Arut Gɔŋɔ La Yelekpina
1:13, 21—Yehowa n yuun basɛ ti too sige Naomi zuo ti la wuna en? Aayi, Naomi yuun ka yeti Naayinɛ eŋɛ en la be’em. Ho san bisɛ sɛla woo n yuun paɛ en la, a yuun ta’an ti’isa ti Yehowa ka boti a yele. Bala yuun basɛ ti a suure sa’am ti a giila me kɔ’ɔsɛ. Leyɛ’ɛsa, sankaŋa la pɔɣesɛka n dɔɣeri yuun bisɛ ti la dela Naayinɛ kã’a ge ti kundɔɣerɛ dela yaalegɔ. Naomi n yuun ka tari yaasi ge ti a kɔma bayi yuun ki la, a yuun ta’an ti’isa ti Yehowa pɔ’ɛ en mɛ.
JANUARY 31–FEBRUARY 6
NAAYINƐ TUULUM YƐLA | ARUT 3-4
“Tiregɛ Dɛna Mina N Tari Zuo”
w12-E 10/1 22 ¶5
“Pɔka N Tare Zuo”
Boaz yuun tɔɣɛ la bãla bãla buɣelɛ Arut suure. A yuun yeti: “N pɔyɔa, Na’ayenɛ wan kan bahɛ ho zuo, la hom n dekɛ ho mɛŋa bo se’em wa. Ho toondena wa le gana ho yia toonɛ la, la hom n ka behɛ bodibila n de ho tadaana dɛna naha bii bontata loe wa.” (Arut 3:10) “Yia toonɛ la” pa’alɛ la Arut n tari nɔŋerɛ se’em bɔ’ɔra Naomi ta’an doose en lebe Israel tiŋa ta bisera en la. “Toondena wa” dela yelese’a ti a yuun ita bilam bilam la. Boaz yuun mi ti Arut ta’an loe a bunbilipaalesi tadaandoma n de buntateba bii nasedoma ayima ti a dɛna a sira. A yuun ka yeen bɔta la a eŋɛ som bo Naomi ma’a ge la ta’an paɛ Naomi sira n ki la ti ki’ima la yu’urɛ da saalum tiŋa la poan. Bala n sɔi ti pɔɣesa’arɛ wa itisoŋɔ la yuun sukɛ Boaz suure la.
w12-E 10/1 23 ¶1
“Pɔka N Tare Zuo”
Bisɛ la yuun de pupeelum se’em la Arut n yuun ti’iseri yetɔɣesebo ti Boaz tɔɣɛ la ti a dela se’em ti nɛreba mina en ge me dɛna “pɔka n tare zuo”! Nɔkpe’ene kai ti Arut n yuun maasum ti a baŋɛ Yehowa ge me pu’usa en la n yuun soŋɛ en ti a tara birikinte. A yuun eŋɛ pa’alɛ ti a ti’iseri Naomi la a nɛreba la yele mɛ ge me pee puurɛ ti a doose ba tiŋa la malema ti a ka tabelɛ mina a vom poan la. To san tɔɣesa Arut sakerɛ wa, to me wan bɔta ti to ita nɛreba som ge me tara gilema bɔ’ɔra ba malema la. To san ita bala, tomam me wan eŋɛ pa’alɛ ti to dela nɛreba n tari zuo.
w12-E 10/1 24 ¶3
“Pɔka N Tare Zuo”
Arut yuun ele la Boaz. Bala, gulesegɔ la yeti: “Te Na’ayenɛ bahɛ te a nyɔkɛ poorɛ, ta dɔgɛ bodibila.” Betlehem pɔɣesi la yuun kã bo Naomi mɛ ge me pɛɣɛ Arut la eŋa n naɛ la en bɔna ti la gana dayɔɔsi siyopɔi la. Pooren, to baŋɛ ti Arut dayɔa la n yuun nyaa ta dɛna Naba David sɔyaaba. (Arut 4:11-22) David me yuun dela Yezu Krista sɔyaaba.—Matu 1:1.
Vo’osum Poan Yɛla
w05-E 3/1 29 ¶3
Arut Gɔŋɔ La Yelekpina
4:6—Sodeni poan ti nɛra san di a suɔ pɔɣa ti la wan “sagom” amea? Yia la, nɔŋɔ san nyɔkɛ nɛra ti a koose a samanɛ, a yire nɛra san bɔta ti a to’e samanɛ la, la nari ti ba kɛkɛ yuun se’a n gee la Peraa Iila Yuunɛ la paɛ la bo en ti a yɔ. (Malema 25:25-27) A san eŋɛ bala, amea lɔɣɔrɔ la wan sigese mɛ. Leyɛ’ɛsa, Arut san dɔɣɛ budibila, budibikaŋa n wan tee soe sɔna samanɛ la ti yire nɛra la da la.
FEBRUARY 7-13
NAAYINƐ TUULUM YƐLA | 1 SAMUEL 1-2
“Zusɛ Yehowa La Ho Suure Za’a”
ia 55-E ¶12
A Yuun Yese La A Suure Za’a Zusɛ Yehowa
Hana yuun eŋɛ la makesonɛ bo Naayinɛ yamesi za’a zusega poan. Yehowa boti la a yamesi kɔ’ɔn tɔɣera ba suuren bɔ’ɔra en ge da suɣera sɛsɛla, ba tɔɣera yelese’a n daani ba la za’a bɔ’ɔra en wuu bia n ni tɔɣera se’em bɔ’ɔra a dɔɣeriba la. (Kaalɛ Yooma 62:8; 1 Tesalonika 5:17.) Tuuntuna Peter yuun gulesɛ la zusega yɛla n buɣeli suure ti to wan ta’an tɔɣɛ bo Yehowa: “Yele ya en sɛla woo n daane ya. Te a dela se’em n tare ya a potɛ’ɛrɛ poan.”—1 Pet. 5:7.
w07-E 3/15 16 ¶4
Hana N Yuun Nyɛ Suma’asum Se’em
To wan zamesɛ la bem yele wa poan? To san zusa Yehowa doose la yelese’a n daani tɔ, to wan basɛ ti a baŋɛ la ani to se’em to suuren la to eeri sɛla. To san ka nyaŋɛ eŋɛ sɛsɛla yele la poan, to dekɛ sɛla woo basɛ Yehowa. Sɛla ka boi n wan gana bala.—Magaha 3:5, 6.
Vo’osum Poan Yɛla
w05-E 3/15 21 ¶5
Yia Samuel Gɔŋɔ La Yelekpina
2:10—Beni n sɔi ti Hana yuun zusɛ Yehowa yeti “a wan bo a mɛŋa naba la paŋa” ge ti naba yuun ka bɔna Israel tiŋa poan? Ba yuun tɔɣɛ ti la bɔna Moses Lɔɔ la poan ti Israeldoma wan ta tara naba. (Tɛɛnhegɔ 17:14-18) Yakob n yuun pɔ̃ri kum la, a yuun tɔɣɛ biŋe ti: “Na’am gɔŋɔ la [n de kpe’eŋo la] kan malom yehe hom Yuda zen’an.” (Pin’ileŋɔ 49:10) Leyɛ’ɛsa, Yehowa yuun tɔɣɛ Sarah n de Israeldoma mayaaba la yele yeti: “Nadoma wan yehe la enŋa poan na.” (Pin’ileŋɔ 17:16) Hana yuun zuseri ɛɛra la beere sa’am naba wa.
FEBRUARY 14-20
NAAYINƐ TUULUM YƐLA | 1 SAMUEL 3-5
“Yehowa Zu’useri Nɛreba Mɛ”
w18.09-E 24 ¶3
Paŋa Za’adaana Ge Me Tara Zu’usegɔ
Samuel yuun pɔsɛ “tona bɔ’ɔra Na’ayenɛ” suɣerɛ la poan la bunbilimen. (1 Sam. 3:1) Daare deyima ti Samuel tum taregɛ ge ga’a yu’uŋɔ ti sɛla n de yelekirega eŋɛ. (Kaalɛ 1 Samuel 3:2-10.) A wum la nɛra n yi a yu’urɛ. Eŋa n yuun ti’isɛ ti la dela Malema Nɛŋadaana Eli la, Samuel yuun zɔ la kalam paɛ a zɛ’an yeti: “Hom n yi mam la mam n wana.” Eli yeti la daɣɛ eŋa n yi en. La yuun eŋɛ bala sugumnɔɔrɛ buyi la, Eli yuun bɔkɛ mɛ ti la dela Naayinɛ n yi’iri Samuel. A yuun pa’alɛ Samuel eŋa n wan lebese se’em ti a me yuun eŋɛ bala. Beni n sɔi ti Yehowa maleka yuun ka niɛ amea pa’alɛ Samuel yia la? Baabule la ka yele ge yelese’a n yuun eŋɛ la pa’alɛ ti Naayinɛ yuun zu’usɛ Samuel mɛ. Wani wani?
w18.09-E 24 ¶4
Paŋa Za’adaana Ge Me Tara Zu’usegɔ
Kaalɛ 1 Samuel 3:11-18. Yehowa Lɔɔ la bo nɔɔrɛ ti kɔma nana bunkureba yele yele wuu nɛŋadoma. (Yɛh. 22:28; Mlm. 19:32) Hon ti’isɛ ti Samuel wan ta’an dekɛ sukpe’ene isige bulika kɛŋɛ Eli zɛ’an ta yele en Naayinɛ gãkerɛ la? A kan ta’an eŋɛ bala! Yelemɛŋɛrɛ, gulesegɔ la yeti “te dabeem tara [Samuel] la a dekɛ yelehom wa tɔgɛ pa’alɛ Eli.” Ge Naayinɛ yuun yele Eli ti Eŋa n yi’iri Samuel. Bala zuo ti Eli yuun kɔkɛ yetɔɣum la ge nyaa yele Samuel ti a tɔɣɛ. Eli yeti, “Da sogɛ dɛ n zen’an.” Samuel yuun nam mɛ ge “yele en sɛla woo.”
Vo’osum Poan Yɛla
w05-E 3/15 21 ¶6
Yia Samuel Gɔŋɔ La Yelekpina
3:3—Samuel yuun sirum gã la Zilam Saraa la poan? Aayi, a yuun ka gã bim. Samuel yuun dela Levi nɛra ze’ele Kohat buuri la poan n yuun daɣɛ malemadoma la. (1 Yelebiŋ’a 6:33-38) Bala zuo la, a yuun ka tari yɔ’ɔ ti a “kɛn bini [ta] behɛ toolom lɔgɔrɔ la.” (Kanlɛ 4:17-20) Zɛsɛka ti Samuel tara yɔ’ɔ ti a bɔna bim dela suɣerɛ la zinzaka la. A yuun gã la bilam. La niɛ peelum ti Eli me yuun gã la zinzaka la zɛ’an kayima poan. Ba yeti zɛ’an “te Yenɛ nɔbiŋere daka la zɛ’a la” pa’alɛ ti suɣerɛ la poan.
FEBRUARY 21-27
NAAYINƐ TUULUM YƐLA | 1 SAMUEL 6-8
“Ani N De Ho Naba?”
it-2-E 163 ¶1
Naayinɛ Na’am
Ba Yuun Eeri La Naba. La paɛ wuu yuun 400 Israeldoma yamenɛ Yɛhega poan ge ti la me gaŋɛ yuun 800 ti Naayinɛ biŋe nɔɔrɛ la Abraham la, Israeldoma la nyaa yuun eeri la naba ti a bisera ba wuu tisi la me n tari nadoma se’em la. Ba yuun eeri sɛla la pa’alɛ ti ba ka boti Yehowa dɛna ba naba. (1Sa 8:4-8) Yelemɛŋɛrɛ, nɛreba la yuun mi ti Naayinɛ wan tum eŋa n pu’ulum a na’am la yele se’em bo Abraham la Yakob la mɛ. Sɛla n yuun le basɛ ti ba tara putɛdena dela Yakob n yuun ta pɔ̃ra a kum ge tɔɣɛ Yuda yele se’em la (Pin 49:8-10), Yehowa n yuun tɔɣɛ sɛla bo Israeldoma ba yuun ta yese ba’asɛ la (Yɛh 19:3-6), yelese’a n boi nɔbiŋere Lɔɔ la poan la (Tɛ 17:14, 15), hali la yɛla ase’a ti Naayinɛ yuun basɛ ti nɔdɛ’ɛsa Baalam tɔɣɛ la (Kan 24:2-7, 17). Samuel ma Hana n yuun tari sakerɛ la, yuun tɔɣɛ putɛdena wa yele mɛ zusega poan. (1Sa 2:7-10) La se’em me, Yehowa yuun ka lilige Na’am la “suɣelum yele” ge me ka pa’alɛ sansɛka ti na’am la wan pɔsɛ bisera bii gɔmɛt la n wan ta ana se’em—daanse’ere la wan bɔna la tiŋa wa zuo bii saazuo. Bala la, nɛreba la yuun tari la zɛkɛ n mea la ba nyaa eeri ti a bo ba naba la.
w11-E 1/1 27 ¶1
A Yuun Ŋmibe Mɛ Susa’aŋɔ Poan
Bisɛ Yehowa n yuun lebese se’em sansɛka ti Samuel tɔɣɛ yele wa bo Yehowa la: “Nɛreba wa n yele ho se’ere woo sakɛ bo ba. Ba ka zagahɛ la hom. Ba zagahɛ la mam te n da dɛna ba naba.” Bisɛ Yehowa lebesego la n yuun buɣelɛ Samuel suure se’em ge ti nɛreba la itigɔ la me zeem Gaŋɛ Za’a Naayinɛ la se’em! Yehowa yuun yele a nɔdɛ’ɛsa la ti a ka’am Israeldoma la daaŋɔ se’a n wan paɛ ba, naba san bisera ba. Samuel yuun yele ba ge ti ba sina ge kelum yeti: “To kɔ’ɔn bɔta la to tara to naba.” Samuel yuun nam a Naayinɛ la mɛ ge loe naba sɛka ti Yehowa bɔta la.—1 Samuel 8:7-19.
w10-E 1/15 30 ¶9
Yehowa Bisega N Di Mia Se’em!
Daami yɛla eŋɛ pa’alɛ ti Yehowa ka’aŋɔ la dela yelemɛŋɛrɛ. Israeldoma la n yuun tari naba ti a bisera ba la yuun basɛ ti ba kɛ̃ la yɛla poan, yele yele wuu sansɛka ti naba la ka tara yelemɛŋɛrɛ la. To tɛri Israeldoma yele la se’em la, la daɣɛ yelepakerɛ bɔ’ɔra tɔ la saŋa woo poan ti asaala gɔmɛtdoma n ka mi Yehowa la zuo ti ba ni ta koŋe ti ba eŋɛ sɛla n ani soŋa. Yelemɛŋɛrɛ, nalɛɣeriba basɛba ni zusɛ la Naayinɛ ti a kã bo ba la ba tiregeri ti ba nyɛ suma’asum la gu’a se’em la ge Naayinɛ wan eŋɛ la wani kã bo nɛresɛba n zaɣesɛ a na’am la?—Ym. 2:10-12.
Vo’osum Poan Yɛla
w02-E 4/1 12 ¶13
Beni n sɔi ti la nara ti ho muse ko’om?
La nari ti nɛra eŋɛ teeri ge ta’an muse ko’om dɛna Yehowa Sɛɛradoma ayima. Nɛresɛka n eŋɛ teeri la mea n ni yese a suuren kɔ’ɛ a puti’irɛ ti a wan dɔla la Krista Yezu. Nɛrebama ni basɛ ba tuunbe’ero la mɛ ge lu ba suure ti ba wan ita la sɛla ti Naayinɛ bɔta. Baabule la poan, Hebru la Greek itigɔ yelebɛa se’a n tɔɣeri teeri yele la pa’alɛ la nɛra n ŋmɛregɛ, bure poore. Bala pa’alɛ la nɛra n basɛ a be’em ge ŋmɛregɛ lebe Naayinɛ zɛ’an. (1 Nadoma 8:33, 34) Nɛra n eŋɛ teeri nari ti a “ton toonse’a n wan pa’alɛ te [a] seren tee” mɛ. (Tooma 26:20) La nari ti to basɛ pumpɔreŋɔ pu’usegɔ, dɔla Naayinɛ nɔya la ge pu’usa Yehowa ma’a la to suure za’a. (Tɛɛnhegɔ 30:2, 8-10; 1 Samuel 7:3) Nɛra san eŋɛ teeri, a puti’irɛ la a yɛla tee mɛ. (Ezekiel 18:31) To ‘ŋmɛregɛ’ eŋɛ pa’alɛ ti to basɛ to halebe’ero la mɛ ge tara halesoma.—Tooma 3:19; Epesus 4:20-24; Kolose 3:5-14.
FEBRUARY 28–MARCH 6
NAAYINƐ TUULUM YƐLA | 1 SAMUEL 9-11
“Saul Yuun Siregeri Amea Mɛ Ge Mina A Tɔregɔ Beene”
w20.08-E 10 ¶11
Mina Ho Tɔregɔ Beene Ge Siregera Homea Dɔla Ho Naayinɛ La
Ti’isɛ bisɛ sɛla n yuun eŋɛ Naba Saul. Eŋa n yuun de bunbilipaalega la, a yuun mi a tɔregɔ beene mɛ. A yuun mi a tɔregɔ beene mɛ hali ka bɔta ti ba dekɛ tuunɛ pa’asɛ en. (1 Sam. 9:21; 10:20-22) Ge pooren, Saul yuun zɛkeri la amea. Eŋa n yuun de naba la ti a halebe’o wa yuun niɛ peelum. Daarɛ deyima, a yuun ka ta’an di’ise suure gura nɔdɛ’ɛsa Samuel. Eŋa n tuɣum wan sirege amea delum Yehowa ti a soŋɛ ba la, Saul yuun eŋɛ la kaabegɔ, sɛla ti la ka nari ti a eŋɛ. Ba’asegɔ la, Yehowa yuun zaɣesɛ Saul mɛ la a na’am la. (1 Sam. 13:8-14) To zamesɛ ya sɛla makerɛ wa poan ge da zɛkera tomesi.
w14-E 3/15 9 ¶8
To Wan Eŋɛ Se’em Kɔ’ɔn Kuura Tomea
Naba Saul n de Israel naba itigɔ la dela makesonɛ pa’ala punya’anɛ n wan ta’an sa’am to kuuri tomea se’em la. Saul n yuun pɔsɛ a na’am la bisega la, a yuun mi la a tɔregɔ beene ge siregera amea. (1 Sam. 9:21) Israel nɛresɛba n yuun tɔɣɛ zɛregɛ a na’am la, a yuun ka eŋɛ ba sɛsɛla. A yuun tari sore n wan ta’an eŋɛ ni ba sɛla, sɛla n sɔi la Naayinɛ n dekɛ na’am la bo en. (1 Sam. 10:27) Naba Saul yuun doose Naayinɛ vo’osum la n pa’alɛ en se’em la mɛ la eŋa n yuun boi Israeldoma la nɛŋa ti ba zabɛ Ammondoma la. Bala pooren la, a yuun sirege la amea pɛɣɛ Yehowa la eŋa n zabɛ nyaŋɛ la.—1 Sam. 11:6, 11-13.
w95-E 12/15 10 ¶1
Ammondoma La—Nɛresɛba N Dekɛ Be’em Yɔ Som
Ammondoma la yuun dekɛ la be’em yɔ Yehowa itisoŋɔ la. Yehowa yuun ka tamɛ ba putotuuma wa yele. “Saul n wom [Nahas n yele sɛla] yele la ba’ahɛ la, te Yenɛ Sea perɛ en la paŋa, te a suunre nyie gaŋɛ.” Naayinɛ vo’osum la n yuun sige Saul zuo la, ti a laɣesɛ soogɛpa 330,000 ti ba keŋɛ ta zabɛ la Ammondoma la ku ba lipi “te ba nɛra ka bɔna dɔla a tadaana poore.”—1 Samuel 11:6, 11.
Vo’osum Poan Yɛla
w05-E 3/15 22 ¶8
Yia Samuel Gɔŋɔ La Yelekpina
9:9—Gulesegɔ la n yeti “behera mea n bala n de nɔtɔgɔha zina wa” la vuurɛ? Yelesum wa pa’alɛ ti nɔdɛ’ɛseba tuuma n yuun zo’ori Samuel la Israel nadoma saŋa la, bala n yuun sɔi ti “behera” la yu’urɛ yuun tee dɛna “nɔtɔgɔha.” Samuel n yuun de yia nɔdɛ’ɛsa.—Tooma 3:24.