Vom La Na’am Tuuma Zamesegɔ Viisegɔ Gɔŋɔ
MARCH 7-13
NAAYINƐ TUULUM YƐLA | 1 SAMUEL 12-13
“Pa’alɛ Mɛŋa Ni Basɛ Ti Nyanɛ N Di Ho”
w00-E 8/1 13 ¶17
Pa’alɛ Mɛŋa Ni Basɛ Ti Nyanɛ N Di Ho
Yia la, ho san bisɛ Saul itigɔ la ani me wuu a tari buurɔ mɛ la. Naayinɛ nɛreba n yuun nyɛ ti Filistiadoma la n “kɔ’ɔn pɔ̃ra ba se’em la,” ti ba mina ti “ba boi la dɛŋa poan la,” dabeem n yuun tari ba ti ba gɔ̃ɣera. (1 Samuel 13:6, 7) Bala la, sɛla san eŋɛ ti ho maalɛ yele la, la nari se’em la, la daɣɛ tuure. Tɛra ti Yehowa nyɛti sɛla n boi to suure poan mɛ ge me mina to ti’iseri yelese’a woo. (1 Samuel 16:7) Bala la, a yuun nyɛ la yɛla ase’a Saul suuren ti Baabule la ka tɔɣɛ de yele wana mɔpi. Makerɛ n wana, Yehowa yuun ta’an nyɛ ti Saul n yuun zɛkeri amea la n sɔi ti a yuun ka ma’ɛ amea gura la. Daanse’ere Saul sunsɔa yuun nyiie mɛ la eŋa n de Israel naba ge gura buranya’aŋa wa n de nɔdɛ’ɛsa, gu’una la! La yeen dɛna se’em, Saul yuun bisɛ ti Samuel n gu’uni la zuo ti eŋa zaɣesɛ pa’alegɔ la ge eŋɛ eŋa n boti se’em la. Bem n ze’ele bim na? Samuel yuun ka pɛ̃ɣɛ Saul la eŋa n eŋɛ sɛla la. Ge a yuun zɛregɛ Saul mɛ ge yele en yeti: “Ho na’am la kan yue . . . se’ere n sɔi la ho ka nam Yehowa nɔɔrɛ.” (1 Samuel 13:13, 14) Leyɛ’ɛsa, pa’alɛ mɛŋa n basɛ ti nyanɛ di en.
w07-E 6/15 27 ¶8
Yehowa Nini Tiɣɛ Mɛ La Hon Nani En La
Baabule gulesegɔ la n tɔɣɛ Naba Saul yele se’em la pa’alɛ la, la de ninmɔ’ɔrɛ se’em ti to nana. Saul yuun pɔsɛ siregera amea mɛ ge mina a tɔregɔ beene, ‘kɔ’ɔn ka bisɛ nyɛ amea.’ Pooren, zɛkɛ n mea la putɛbe’ero n yuun boi a suuren. (1 Samuel 10:21, 22; 15:17) Daarɛ deyima ti Saul yuun maasum ti a keŋɛ ta zabɛ la Filistiadoma. Samuel yuun yele naba la yeti a gura en ti a wa’ana eŋɛ kaabegɔ bo Yehowa ge pa’alɛ en sɛla n nari. Ge Samuel yuun ka wa’an a tɔtɔ na, ti nɛreba la nyaa yiregera. Saul n yuun nyɛ wana wa la “ti a kaabɛ nyɔ̃’a bo’olum la.” Wana wa yuun ka basɛ ti Yehowa puurɛ pee. Samuel n yuun ta paɛ pooren na la, naba la yuun bo la amea buurɔ ge yeti Samuel n ka wa’an tɔtɔ na la zuo ti eŋa eŋɛ kaabegɔ la ti Yehowa puurɛ pee. Naba Saul yuun ti’isɛ ti kaabegɔ la yele n pakɛ gana a gura Samuel ti a wa’ana eŋɛ kaabegɔ la. Samuel yuun yele en yeti: “Ho tum la gberetuuma. Ho ka nam Yehowa ho Naayinɛ la nɔɔrɛ la ti a dekɛ bo ho la.” Saul n yuun ka nam Yehowa la zuo, na’am la yuun piɛ a nu’usin mɛ.—1 Samuel 10:8; 13:5-13.
Vo’osum Poan Yɛla
w11-E 7/15 13 ¶15
Ho Wan Nana Yehowa Pa’alegɔ La?
Nɛreba wa yuun ti’isɛ ti asaala naba wan ta’an ana soŋa ti ba dekɛ bamea delum en gana Yehowa? La san dɛna bala, ba yuun eeri la yeleyooro! La yuun dela dɛŋa bɔ’ɔra ba, la ba eeri Sitaana bɛ̃tɔ la. La yuun dela naana ti asaala nadoma pã’asɛ ba kɛ̃ baɣa kaabegɔ poan. Baɣekaabereba ni pã’asa la bamea ti’isa ti baɣese’a ti ba dekɛ dɔɔrɔ bii kuga maalɛ la, tari paŋa mɛ ti ba wan ta’an dekɛ bamea delum ba gana Yehowa, Naayinɛ se’em n naam sɛla woo ti to ka nyɛta en la to nini la. Wuu tuuntuna Paul n yuun yele se’em la, baɣa dela “yoo.” (1 Ko. 8:4) Ba ka nyɛti, ba ka wuni, ba kan ta’an tɔɣɛ bii eŋɛ sɛla. To nyɛti ba la to nini ge me ta’an guta ba ge to san na’asera ba, to iti la yoo—bala me wan pa’alɛ ti sa’aŋɔ wan paɛ tɔ.—Ym. 115:4-8.
MARCH 14-20
NAAYINƐ TUULUM YƐLA | 1 SAMUEL 14-15
“Hon Nani Naayinɛ Nɔɔrɛ Nyani Nyɔ̃’a Bo’olum”
w07-E 6/15 26 ¶4
Yehowa Nini Tiɣɛ Mɛ La Hon Nani En La
Yehowa n de naaŋɔdaana la zuo eŋa n sɔi sɛla woo ti to tara la. Bala la, sɛla boi ti to wan ta’an dekɛ bo en? Ɛɛ, to wan ta’an dekɛ sɛla n tari tuulum paa bo en. Bem n bala? To wan ta’an nyɛ lebesego la ka’aŋɔ wa poan: “Tara yɛm n dayɔa ge basɛ ti n puurɛ pee, la wan eŋɛ se’em ti n ta’an lerege se’emdaana n ɛ̃regeri mam la.” (Magaha 27:11) To wan ta’an nana Naayinɛ nɔɔrɛ. La boi bim ti, to bɔŋa zɛ’an boi la to’ore to’ore ge tomam ayima ayima woo wan ta’an eŋɛ pa’alɛ ti Sitaana n yeti nɛresaaleba kan ta’an tara yelemɛŋɛrɛ bɔ’ɔra Naayinɛ gurebisɛ poan la, dela pumpɔreŋɔ. Bisɛ la de yɔ’ɔ se’em!
it-2-E 521 ¶2
Nana
To san bɔta ti Naayinɛ zu’usɛ tɔ, sɛla ka boi ti to wan ta’an dekɛ tee la nari ti to nana a pa’alegɔ se’em la. Wuu Samuel n yuun yele Naba Saul se’em la: “Yehowa ton bɔta la nyɔ̃’a bo’olum la kaabegɔ gana ba nana a nɔɔrɛ yoi? Bisɛ! Hon nani nyani kaabegɔ, ti kelesego nyana pikãra.” (1Sa 15:22) To san ka nana la vuurɛ dela to zaɣesɛ la Yehowa ge me ka tara sakerɛ bɔ’ɔra a yelesum la. Bala la, se’em n ka nani bɔ’ɔra la se’em n kaaberi baɣa bii bakolobɔɣera dela buyina. (1Sa 15:23; dekɛ makɛ Arom 6:16.) Nɛra san yeen tara nɔɔrɛ tɔɣera ti eŋa sakɛ sɛla mɛ ge ka tara de tuna tuuma, la dela yoo; la wan pa’alɛ ti a ka nam ge me ka tara gilema bɔ’ɔra mina n pa’ali en la. (Mt 21:28-32) Nɛresɛba n boti ba yeen kɛlesa ge sakɛ ba suuren ti yelemɛŋɛrɛ Naayinɛ la boi ge ka ita eŋa n boti ba ita sɛla la pã’aseri la bamea ge me kan nyɛ kã’a. (Yam 1:22-25) Naayinɛ Dayɔa la yuun basɛ ti la niɛ peelum ti nɛresɛba n iti yelese’a ti la wɔna la nɔse’a ti a bo la ge me tara nigum nigum ita sɛla ti ba bɔta la, kan kɛ̃ Na’am la poan ge ba wan tuɣum nyɛ la sa’aŋɔ.—Mt 7:15-23.
Vo’osum Poan Yɛla
it-1-E 493
Giile
To san basɛ ti nɛreba pɛregɛ tɔ ti to eŋɛ pa’alɛ ti to tari giile ge ti la ka makɛ la Naayinɛ puti’irɛ, yele wan paɛ tɔ. Wana wa niɛ peelum mɛ Naba Saul yele la poan. Saŋa la yuun paɛ mɛ ti Naayinɛ gakɛ Amalekdoma la n yuun pɔsɛ zaberɛ la Israedoma la se’em ma’a ti ba yuun yese Egypt la. Naayinɛ yuun bo Saul nɔɔrɛ ti a da tara giile bɔ’ɔra ba. A nɛreba la pɛregerɛ zuo ti a yuun ka nam Yehowa nɔɔrɛ la. Bala zuo la, Yehowa yuun zaɣesɛ Saul mɛ ti a ka le dɛna naba. (1Sa 15:2-24) Nɛra san nam Yehowa pa’alegɔ ge tara yelemɛŋɛrɛ bɔ’ɔra En, la wan soŋɛ en ti a kan tum be’em wuu Saul n yuun eŋɛ se’em ti Naayinɛ zaɣesɛ en la.
MARCH 21-27
NAAYINƐ TUULUM YƐLA | 1 SAMUEL 16-17
“Zaberɛ La Dela Yehowa Zaberɛ”
wp16.5-E 11 ¶2-3
“Zaberɛ La Dela Yehowa Zaberɛ”
David yuun kpemese Saul giila mɛ la eŋa n yele en eŋa n zabɛ nyaŋɛ gbɛɣɛnɛ la saseŋa se’em la. A yuun paɣeri mɛ yoi? Aayi. David yuun mi se’ere n sɔi ti a yuun zabɛ nyaŋɛ mɛ. A yuun yeti: “Yehowa n fãɛ mam gbɛɣenɛ la saseŋa nu’usin basɛ la, a wan fãɛ mam Filistia buraa wa nu’usin basɛ.” Saul n yuun ta tɔɣɛ koŋe la, a yeti: “Keŋɛ ge Yehowa wan bɔna la hɔ.”—1 Samuel 17:37.
Ho wan bɔta ti ho tara sakerɛ wuu David? Tɛra ti David sakerɛ la yuun daɣɛ sɛla ti a yeen ti’isa. Eŋa n yuun nyɛ sɛla a zi’irego poan ge me mina Naayinɛ se’em la n sɔi ti a tara sakerɛ bɔ’ɔra en la. A yuun mi ti Yehowa dela Gu’ura ge me ni basɛ ti A yelesum la tum tuuma. To me san bɔta ti to tara sakerɛ kana taaba, la nari ti to kɔ’ɔn zamesa Naayinɛ yɛla. To san tara sɛla ti to zamesa la tuna tuuma to vom poan, bala wan basɛ ti to sakerɛ kpe’em.—Hebru 11:1.
wp16.5-E 11-12
“Zaberɛ La Dela Yehowa Zaberɛ”
Ta paɛ zina, David yetɔɣum la pa’alɛ la a sakerɛ n kpe’em se’em. Yeen ti’isɛ bisɛ, bunbilipaalega n yele Goliat yeti: “Hon tari la su’a la kanɛ la zaanɛ tu’usa mam na ge mam dekɛ la lengimadaana Yehowa Israel Naayinɛ la n zaberi pɔ’ɔra a nɛreba la, ti ho kɛsɛra en la ti n zabɛ la hɔ.” David yuun mi ti asaala paŋa la zaberɛ lɔɣɔrɔ yele ka pakɛ. Goliat yuun zɛɛni Yehowa Naayinɛ mɛ ti Yehowa me lerege. Wuu David n yele de se’em la, “zaberɛ la dela Yehowa zaberɛ.”—1 Samuel 17:45-47.
David yuun mi Goliat n tari zaberɛ lɔɣɔrɔ ge karegɛ zuna se’em mɛ. Ge David yuun ka basɛ ti dabeem tara en la yele aŋa. A yuun ka tue wuu Saul la a lengimadoma la n tue se’em la. David yuun ka dekɛ amea makɛ la Goliat. Ge a yuun tuɣum dekɛ Goliat makɛ la Yehowa. Goliat woko yuun dela santira awai la girego (m 2.9), nyaa kɔ’ɔn sura nɛreba zuo ge a kãtɛ la zuni la wani ti to wan ta’an dekɛ makɛ la So’olumdaana la n maalɛ saazuo la tingɔŋɔ wa la? Yelemɛŋɛrɛ, a dela nɛresaala n ka seke se’ere wuu bun-ɛɣela la—ti la pa’alɛ ti Yehowa yuun kɔ’ɔn yeti a naɛ en mɛ!
wp16.5-E 12 ¶4
“Zaberɛ La Dela Yehowa Zaberɛ”
Zina beere wa, Yehowa yamesi ka zaberi. Zaberɛ saŋa la tole mɛ. (Matu 26:52) Ge la nari ti to tara sakerɛ wuu David la. Wuu David la, la nari ti to bisa nyɛta Yehowa, tara zoolum bɔ’ɔra en ge pu’usa eŋa ma’a. Saŋa ase’a yɛla ta’an paɛ tɔ ti la ana wuu yele la kãregɛ gana to mɛ la ge to mina ti, to yɛla la pɔ’ɛ mɛ Yehowa zɛ’an. To san ana tapilapi la Yehowa to Naayinɛ la ge me tara sakerɛ wuu David la, yelese’a n daani to la kan dɛna yele bɔ’ɔra tɔ. Sɛla ka boi n zɔɛ Yehowa paŋa ti a kan nyaŋɛ dɛ!
Vo’osum Poan Yɛla
it-2-E 871-872
Saul
Saul n yuun tum be’em la ge ti Yehowa me basɛ ti ba loe David ti a ta dɛna beere sa’am naba la zuo ti a vo’osum la yuun ka le bɔna la Saul. Kɔ’ɔn pɔsɛ sankaŋa “ti Yehowa basɛ ti vo’osum bi’a tee kɛ̃ en tara en daana.” A vo’osum la n yuun ka le bɔna la Saul la zuo, Yehowa yuun bo yɔ’ɔ mɛ ti sibe’o kɛ̃ en, bala yuun basɛ ti Saul ana la bura, ka tara suma’asum ge me ti’isa putɛbe’ero. Saul n yuun ka nam Yehowa nɔɔrɛ la pa’alɛ ti a yuun tari la putɛbe’o, Naayinɛ vo’osum la me yuun kan le soŋera en. Ge Yehowa n yuun bo yɔ’ɔ ti “vo’osum bi’a” daana Saul la zuo, to wan ta’an yeti la dela “Yehowa vo’osum bi’a,” bala n sɔi ti Saul yamesi yuun yeti la dela “Naayinɛ vo’osum bi’a.” Saul yamesi n yuun ka’am en soŋa la zuo ti a yuun yeti David wa’ana bɔna a yire ŋmɛ’ɛra yuuma buɣela a suure ti “vo’osum bi’a” la da daana en.—1Sa 16:14-23; 17:15.
MARCH 28–APRIL 3
NAAYINƐ TUULUM YƐLA | 1 SAMUEL 18-19
“Kelum Siregera Homea Ho San Nyaŋɛ Eŋɛ Sɛla”
w04-E 4/1 15 ¶4
Dekɛ Homea Delum Naayinɛ Vo’osum La Ta’an Maalɛ Ho Yɛla
La kan yue ti bia wa n de dunkeena la wan ta dɛna nɛrezure tiŋa la poan. Ba yuun loe en mɛ ti a tuna bɔ’ɔra naba la ge me ŋmɛ’ɛra yuuma bɔ’ɔra en. Eŋa n yuun ku zabezabera Goliat, nɛrewaɣelɛ sɛka n yuun basɛ ti dabeem sãɛ Israel lengimadoma la. David n yuun de lengimadoma la kpɛ’ɛma la, a yuun zabɛ nyaŋɛ Filistiadoma la mɛ. Nɛreba la yuun nɔŋɛ en mɛ. Ba yuun yuuni la yuuma pɛɣera en. Naba Saul ka’aŋɔdaana ayima yuun tɔɣɛ David yele yeti a yeen daɣɛ la mina n “tã kɔlegɔ ŋmɛ’ɛra soŋa” ge a ‘me tari la sukpe’ene, dɛna zabezabera. A mi la yetɔɣum, ana soŋa ti Yehowa bɔna la en.’—1 Samuel 16:18; 17:23, 24, 45-51; 18:5-7.
w18.01-E 28 ¶6-7
Bisɛ Nɛreba N Boi Tɔka Tɔka Se’em
Nɛreba basɛba ni zɛkera la bamea la ba som se’em, ba tari yu’urɛ se’em, ba tã yuuna yuuma se’em, ba tari paŋa se’em bii ba tari kpe’eŋo se’em. David yuun tari yele ana za’a mɛ ge a vom poan a yuun siregeri amea mɛ. Eŋa n yuun ku Goliat ti ba yuun yeti ba dekɛ Naba Saul poyɔa bo en la, David yuun yeti: “Mam dela ani ge mam yidoma la mam sɔ yidoma n boi Israel dela bani, ti mam wan dɛna naba la dɛɛma?” (1 Sam. 18:18) Bem n yuun soŋɛ David ti a siregera amea? Naayinɛ n siregeri amea ge me soŋera en la n basɛ ti David yuun tara halesoma ta’an tara yɔ’ɔ ita yele ana. (Ym. 113:5-8) David yuun mi ti Yehowa n bo en sɛla woo ti a tara la.—Dekɛ makɛ 1 Korint 4:7.
Zina beere wa, Yehowa yamesi mɔɔri mɛ siregera bamea wuu David la. La dela ɔmi’isa bɔ’ɔra tɔ la Yehowa n de Nɛresɛka n gani za’a saazuo la tingɔŋɔ wa poan ge kelum siregera amea la. (Ym. 18:35) La nari ti to tɛra Baabule ka’aŋɔ wa: “Dekɛ ya giile fuo, itisoŋɔ fuo, sirege mea fuo, nɛremama fuo la sugeri fuo nyɛ.” (Kol. 3:12) To me le mina ti, se’em n tari nɔŋerɛ ka ‘wakeri, bii zɛkera a mea.’ (1 Ko. 13:4) To san siregera tomea, daanse’ere bala wan basɛ ti nɛreba zamesɛ baŋɛ Yehowa. Wuu pɔɣesi itisoŋɔ n wan ta’an tee ba sireba se’em la, Naayinɛ yamesi san siregera bamea bala wan basɛ ti nɛreba vurege bamea du Naayinɛ.—1 Pet. 3:1.
Vo’osum Poan Yɛla
it-2-E 695-696
Nɔdɛ’ɛsa
La boi bim ti Yehowa vo’osum la n loe ba ge la yuun daɣɛ daarewoo ti vo’osum la ni sige ba zuo ti ba tɔɣera. Ge la yuun ni dɛna la saŋa ase’a ti Naayinɛ vo’osum la ni ‘sige ba zuo’ lilige pa’alɛ ba wan tɔɣɛ sɛla. (Eze 11:4, 5; Mik 3:8) Bala yuun ni kpemese ba giila mɛ ti ba tɔɣera. (1Sa 10:10; Yer 20:9; Am 3:8) Ba yuun ka tuni la tuunkiresi ma’a ge ba yetɔɣum la ba itigɔ yuun pa’alɛ ti ba sirum boi la ba to’ore. Wana wa pa’alɛ la nɛreba n “iti wuu nɔdɛ’ɛseba la” vuurɛ n de se’em (1Sa 10:6-11; 19:20-24; Yer 29:24-32; dekɛ makɛ Tm 2:4, 12-17; 6:15; 7:55.) Ba tuulegeri ge tara sukpe’ene tuna ba tuuma se’em la ta’an basɛ ti nɛreba ti’isa ti yɛm ka boi bim, wuu lengima nɛŋadoma n yuun ti’isɛ ti nɔdɛ’ɛsa ayima zãli mɛ se’em ma’a ti a yuun keŋɛ ta loe Yehu la. Ba yuun baŋɛ ti buraa la dela nɔdɛ’ɛsa la, lengima nɛŋadoma la yuun nam a yelesum la mɛ. (2Na 9:1-13; dekɛ makɛ Tm 26:24, 25.) Saul n yuun digeri David ti la ‘eŋɛ en wuu a dela nɔdɛ’ɛsa’ la ge ti David yuun piɛ la, a yuun yɛɛ la a futo ge “gan’an teŋa beele de daarɛ wontɛɛŋa la la yu’uŋɔ.” (1Sa 19:18–20:1) Baabule la ka pa’alɛ ti nɔdɛ’ɛseba yuun ni ɛɛra la beele saŋa woo. Yɛla ayi poan ti nɔdɛ’ɛsa la yuun ɛɛra beele la dela, putɛse’ere ti a tara la zuo ge me eŋɛ pa’alɛ a yetɔɣebiŋere la vuurɛ. (Isa 20:2-4; Mik 1:8-11) Baabule la ka pa’alɛ nyaa Saul n yuun eeri beele dela a eŋɛ pa’alɛ ti a dela buraa ti ba yɛɛ a na’am la, ti Yehowa paŋa la me yese a poan bii yelese’ere poan.
APRIL 4-10
NAAYINƐ TUULUM YƐLA | 1 SAMUEL 20-22
“Hon Wan Eŋɛ Se’em Ta’an Dɛna Zɔsonkɔ”
w19.11-E 7 ¶18
Basɛ Ti Hon La Ho Zɔdoma Bɔŋa La Kpe’em Ge Ti Ba’asegɔ La Nyaa Paɛ
Zina beere wa, daaŋɔ zo’e zo’e n paari to mabiisi. Makerɛ, yeledi’ima n paari basɛba. Yele ana san eŋɛ, to sɛba ta’an basɛ ti mabiisi wa wa’ana kɛ̃’ɛra to zɛ’an. Basɛba me ta’an dekɛ laɣehɔ soŋɛ. Ge to za’a waabi me ta’an zusɛ Yehowa ti a soŋɛ to mabiisi wa. To san baŋɛ ti sɛla n eŋɛ to mabia ti a giila kɔ’ɔsɛ, to ta’an kan mina to wan tɔɣɛ sɛla bii eŋɛ sɛla. Ge to za’a waabi wan ta’an eŋɛ yɛla zo’e zo’e soŋɛ. Makerɛ, to ta’an ee saŋa naɛ la en ti to sɔsa. To sɔsega la poan, to ta’an ma’ɛ tomea kɛlesa en. To me ta’an kaalɛ gulesegɔ n buɣeli suure bo en. (Isa 50:4) Sɛla n pakɛ paa dela, yele san paɛ ho zɔdoma ni eŋɛ kalam ta soŋɛ ba.—Kaalɛ Magaha 17:17.
w08-E 2/15 8 ¶7
Kɔ’ɔn Kena Yehowa Sarɔtɔ La Poan
Naayinɛ boti la to kɔ’ɔn dɛna yelemɛŋɛrɛ zɔtɔ. (Mag. 17:17) Naba Saul dayɔa Yonatan yuun nyɔɣɛ la David zɔtɔ. Yonatan n yuun ta wum ti David ku la Goliat la, “Yonatan la David daa ani la tapilapi la taaba ba zɔtɔ nyɔka la poan ge ti Yonatan nyaa nɔŋɛ en wuu a mɛŋa la.” (1 Sam. 18:1, 3) Yonatan yuun kaɣɛ David ti Saul boti a ku en mɛ. David yuun zɔ mɛ ti Yonatan ta seke en ge biŋe nɔɔrɛ la en. Yonatan yuun pɔsegɛ a nyɔɔrɛ mɛ la eŋa n yuun tɔɣeri David yele bɔ’ɔra Saul la ge bamam bayi la yuun kelum seke taaba mɛ basɛ ti ba zɔtɔ nyɔka la ana kankaŋi. (1 Sam. 20:24-41) Ba yuun ta seke taaba pooren la, Yonatan yuun ‘dekɛ la Naayinɛ yelesum’ kpemese David giila.—1 Sam. 23:16-18.
w09-E 10/15 19 ¶11
Kɔ’ɔn Tara Yelemɛŋɛrɛ Zɔtɔ, Tingɔŋɔ Wa Ti Nɔŋerɛ Ka Bɔna La
Tara yelemɛŋɛrɛ. Solomon yuun yeti, “Zɔ dela se’em n tari nɔŋerɛ saŋa woo ge me dɛna suɔ n boi la hɔ wuŋerɛ poan.” (Mag. 17:17) Solomon n yuun gulesɛ yele ana wa la, a yuun tɛri la a sɔ David n yuun nyɔɣɛ zɔtɔ la Yonatan se’em la. (1 Sam. 18:1) Naba Saul yuun boti la a dayɔa Yonatan soe di Israel na’am la. Ge Yonatan yuun sakɛ la Yehowa n loe David ti a dɛna naba la. Yonatan n yuun ka ani wuu Saul la, yuun ka tari nyuure la David. A sunsɔa yuun ka nyiie la ba pɛ̃ɣɛri David se’em la bii a dekɛ pumpɔreŋɔ yɛla la ti a sɔ zɛregɛ David se’em la eŋɛ a suuren. (1 Sam. 20:24-34) Tomam ani wuu Yonatan? To zɔdoma san nyɛ yɔ’ɔ tunse’ere poan, to puurɛ wan pee la ba? La san wuna ba, to wan soŋɛ ba ge buɣelɛ ba suure? Ba san bibisa to zɔ la yele, to ni kɔ’ɔn sakɛ la nu’usi siyi? Bii to wan ana wuu Yonatan tɔɣera pɔ’ɔra to zɔ la?
Vo’osum Poan Yɛla
w05-E 3/15 24 ¶4
Yia Samuel Gɔŋɔ La Yelekpina
21:12, 13. Yehowa boti la to dekɛ to puti’irɛ la to paŋa ta’an maalɛ yelese’ere n boi to vom poan. A dekɛ la a Yetɔɣum la bo to ti la soŋera tɔ ti to tara yɛm, mi’ilum la putɛsonɛ. (Magaha 1:4) To me le tara la Krista keendoma n boi ti ba soŋera tɔ.
APRIL 18-24
NAAYINƐ TUULUM YƐLA | 1 SAMUEL 23-24
“Ma’ɛ Homea Gura Yehowa”
w04-E 4/1 16 ¶8
Dekɛ Homea Delum Naayinɛ Vo’osum La Ta’an Maalɛ Ho Yɛla
David yuun ka kalum Saul. Eŋa n yuun tari sakerɛ ge ma’ɛ amea la zuo ti a yuun dekɛ sɛla woo eŋɛ Yehowa nu’usin. Naba la n yuun ze’ele yoko la poan yese la ti David nyaa nyabegɛ yeti: “Yehowa wan gãkɛ mam la hon, Yehowa wan lerege ho bo mam ge mam nu’o kan kalum hɔ.” (1 Samuel 24:12) La boi bim ti David yuun mi ti Saul tue mɛ ge a yuun ka lerege sanɛ bii a zɛregera en. Zɛ’ɛsi sise’esi poan, David yuun nyɔkɛ amea mɛ ka eŋɛ en sɛsɛla. A yuun tuɣum dekɛ amea delum la Yehowa ti a maalɛ yɛla la.—1 Samuel 25:32-34; 26:10, 11.
w04-E 6/ 1 22-23
Hon Basɛ Ti Ho Bɔŋa Poan Yɛla N Sɔna Hɔ?
Sɛla n pa’asɛ butã ti to zamesɛ dela to ma’ɛ tomea gura Yehowa ge da eŋɛ sɛla n ka makɛ la gulesegɔ la maalɛ yele la. Yezu podɔla Yames yuun gulesɛ yeti: ‘Ya san ŋmibe ta ba’asɛ, la wan kumesɛ ya mɛ ti ya puti’irɛ ana kasi sɛla woo poan ti ya kan koŋe sɛla.’ (Yames 1:4) La nari ti to basɛ ti ŋmibega ‘tum a tuuma ba’asɛ’ doose la to wan bo yɔ’ɔ ti wuŋerɛ se’ere n paɛ to la tum a tuuma ba’asɛ ge kan eŋɛ sɛla n ka makɛ la Baabule pa’alegɔ la ti to maalɛ yele la kalam. Bala la, gurebisɛ wan basɛ ti to sakerɛ la ta’an di mi’a niɛ pa’alɛ bu tari paŋa se’em. Yosef la David yuun tari la ŋmibega kana taaba mea nɔɔ. Ba yuun ka eŋɛ sɛla n wan sa’am Yehowa suure maalɛ ba yɛla la. Ba yuun tuɣum bisɛ la ba bɔŋa la n ani se’em la ge tiregɛ eŋɛ sɛla. Ba yuun ma’ɛ la bamea gura Yehowa ge bisɛ eŋa n yuun kã bo ba se’em! Yehowa yuun dekɛ ba mɛ tum tuuma fãɛ a nɛreba ge me basɛ ti ba bisa a nɛreba la.—Pin’ileŋɔ 41:39-41; 45:5; 2 Samuel 5: 4, 5.
Bɔnkaŋa taaba me ta’an paɛ tomam mɛ ti to ta’an ta ɛɛra ti to eŋɛ sɛla n ka makɛ la Baabule pa’alegɔ la. Makerɛ n wana, hon dela se’em ti ho giila kɔ’ɔsɛ la hon nan ka nyɛ se’em n de ho suure bɔno ti ho wan di bii ele la? La san dɛna bala, da eŋɛ sɛla n wan giisɛ Yehowa n bo nɔɔrɛ ti ho di bii ele “Daana la poan ma’a” la. (1 Korint 7: 39) Hon dela mina ti yɛla paara hɔ, ho pɔɣedire bii sire ele poan? Ya wan tuɣum ti’isa wuu tingɔŋɔ wa nɛreba n boti welesego la pɔɣedibasega se’em la, tuɣum mɔ ya laɣum tum maalɛ ya pɔɣedire la soŋa. (Malaki 2: 16; Epesus 5:21-33) Nɔŋɔ n basɛ ti la kpe’em bo ho ti ho ka ta’an ugera ho deodoma? Ho san ma’ɛ homea gura Yehowa, ho kan eŋɛ sɛla n ka nari ti ho nyɛ ligeri. (Yooma 37:25; Hebru 13:18) Yelemɛŋɛrɛ, to za’a waabi nari ti to mɔ to mɔa za’a ta’an tum to paŋa tɛka beene ti Yehowa kã bo to. To san ita bala, bala wan basɛ ti to lu to suure ge gura Yehowa ti a maalɛ to yɛla la bo to.—Mika 7:7
Vo’osum Poan Yɛla
w17.11-E 27 ¶11
Da Basɛ Ti Sɛla Giŋɛ Hɔ Ti Ho Koŋe Yɔɔrɛ La
To san tara nɔŋerɛ la itisoŋɔ to kan nyuuna. Naayinɛ Yetɔɣum la yeti: “Nɔŋerɛ tari la sugeri la itisoŋɔ. Nɔŋerɛ ka nyuuni. A ka paɣeri, a ka zɛkeri amea.” (1 Ko. 13:4) To san bɔta ti to gu ti nyuure da bɔna suuren, la nari ti to gɛɛla yɛla wuu Yehowa n geeli a se’em la ge me bisɛ to mabiisi la za’a ti to dela Kristakɔma n de inyiŋɔ. Wana wan soŋɛ tɔ ti to tara giile bɔ’ɔra taaba wuu a yelesum n yele se’em la: ‘Ba me san pɛɣera luɣese’ere, luɣese’a woo n gee la me puurɛ wan pee.’ (1 Ko. 12:16-18, 26) To wan tuɣum tari ni nyuure la, to puurɛ wan pee la sɛba n nyɛ yɔ’ɔ la. Geele Naba Saul dayɔa Yonatan yele la bisɛ. A yuun ka nyuuni ba yuun bobe David ti a dɛna naba la. A yuun kpemese David giila mɛ. (1 Sam. 23:16-18) To wan bɔta ti to tara nɔŋerɛ la itisoŋɔ wuu Yonatan?
APRIL 25–MAY 1
NAAYINƐ TUULUM YƐLA | 1 SAMUEL 25-26
“Hon Iti La Kãbi Kãbi Ho Yɛla Poan?”
ia-E 78 ¶10-12
A Yuun Dekɛ La Yɛm Tum Tuuma
Lengimadoma wa n yuun mɔɔri se’em la yuun eŋɛ dunkeendoma la, la bem? La yuun wan dɛna naana bo ba ti ba loe pehego ayima ku obe ge ba yuun ka eŋɛ bala. Ge ba yuun tuɣum gu’ura Nabal piisi la a yamesi la mɛ. (Kaalɛ 1 Samuel 25:15, 16.) Dɛŋa zo’e zo’e paari dunkeema la piisi mɛ. Goo dusi se’a n oberi nɛnɔ yuun zo’e mɛ ge ti fãareba la nayigeba me yuun bɔna Israel tiŋanɔɔrɛ beene bɔba la daana.
La yuun kan dɛna naana ti ba nyaŋɛ uge buraasi la n boi goo la poan la. Bala la, daarɛ deyima ti David yuun tum nɛreba pia ti ba keŋɛ Nabal zɛ’an ti a soŋɛ ba. David n yuun tum ba se’em ma’a la kɔ’ɔn makɛ mɛ. La yuun dela sansɛka ti ba ni siira piisi la kɔberɔ ge me duɣera dia tɔ̃ta. David me yuun maasum a yetɔɣum la mɛ ti la tara guŋerɛ la gilema. Hali a yetɔɣum la poan, a yuun sirege amea yeti “ho dayɔa David,” a yuun tɔɣɛ wana guŋɛ Nabal n de bunkutɛ la zuo. Nabal yuun eŋɛ la wani?—1 Sam. 25:5-8.
A sunsɔa yuun nyiie mɛ! Buraa la yuun yele Abigail yeti, “ti a nyabera ge tuura ba.” Nabal n de nɛreyaalega la yuun kɔ’ɔn nyabera mɛ fabela a dia, ko’om la a nɛnɔ la yele. A yuun ɛ̃regɛ David mɛ ti a ka tari vuurɛ ge me ɛɛra nyaara. Nabal puti’irɛ la yuun ani wuu Saul n yuun dini David se’em la. Ba se’em sa’am ka tari Yehowa puti’irɛ. Naayinɛ yuun nɔŋɛ David mɛ ge bisɛ nyɛ en ti a dela Israel beere sa’am naba ge daɣɛ yameŋa tuba n kpirɛ.—1 Sam. 25:10, 11, 14.
ia-E 80 ¶18
A Yuun Dekɛ La Yɛm Tum Tuuma
Abigail yuun bisɛ ti yele la pakɛ la eŋa ge yuun belum David ti a di sugeri bo en. A yuun tɔɣɛ yelemɛŋɛrɛ yeti eŋa sira la ka tari yɛm wuu a yu’urɛ la vuurɛ n pa’alɛ se’em la, hali ge yuun yeti David wan pɔ’ɛ amea a san isige zabera la nɛrekana taaba wa. Abigail yuun tɔɣɛ yeti eŋa mea mi mɛ ti David tuni bɔ’ɔra la Yehowa, a ‘zaberi la Yehowa zaberɛ.’ A yuun le yeti eŋa mi Yehowa n biŋe nɔɔrɛ se’em ti a bo David na’am la mɛ, nyaa tɔɣɛ yeti: “Yehowa . . . [wan] loe ho ti ho dɛna Israel nɛŋadaana.” Leyɛ’ɛsa, a yele David yeti a da eŋɛ sɛla ti taalɛ bɔna a zuo bii eŋɛ sɛla ti a putɛkeeŋa wan ta “daana” en. (Kaalɛ 1 Samuel 25:24-31.) Yetɔɣesomɔ n kɛ̃’ɛri suure!
Vo’osum Poan Yɛla
ia-E 80 ¶16
A Yuun Dekɛ La Yɛm Tum Tuuma
Wana wa pa’alɛ ti Abigail yuun ka nani a sira la n de a zuodaana la? Aayi; tɛra ti Nabal yuun tum la putotuuma giisɛ nɛresɛka ti Yehowa loe la. A itigɔ la yuun ta’an basɛ ti kum paɛ a yire nɛreba zo’e zo’e n ka tari taalɛ la. Abigail yuun san ka vaɛ ni isige eŋɛ sɛla, a sira la be’em la yuun kan paɛ ni en? Yele kana wa poan, la yuun nari mɛ ti a ga’arɛ tiŋa bo Naayinɛ gana a sira.