Vom La Na’am Tuuma Zamesegɔ Viisegɔ Gɔŋɔ

SEPTEMBER 5-11

NAAYINƐ TUULUM YƐLA | 1 NADOMA 9-10

“Pɛɣɛ Yehowa La A Yɛm La”

w99-E 7/1 30 ¶6

A Yuun Nyɛ Kã’a Mɛ La Eŋa N Keŋɛ Ta Bisɛ En La

Pɔɣenaba la n yuun ta seke Solomon la, a yuun dekɛ la “sokese’a n kpe’em” soke en. (1 Nadoma 10:1) Hebru yelebire la ti ba dekɛ tum tuuma kalam wa la ta’an dɛna “maɣesa.” Ge bala ka pa’alɛ ti pɔɣenaba wa la Solomon yuun yeen sɔsa la yelese’a n ka nɛ nini. Yelekiriga la dela, Yooma 49:4, Hebru yelebire dene mea nɔɔ ti ba dekɛ tɔɣɛ be’em, kum la faarɛ yele. Daanse’ere, Siba pɔɣenaba la, la Solomon yuun sɔseri la yelese’a n kpe’em ti a ta’an baŋɛ eŋa n tari yɛm zo’e se’em. Baabule la yeti a “pɔsɛ yele en la sɛla woo n boi a suuren.” Ti Solomon me “lebese a sokere la za’a bo en. Yele daa ka gee kpe’em ti naba la ka nyaŋɛ tɔɣɛ pa’alɛ en.”​—1 Nadoma 10:2b, 3.

w99-E 11/1 20 ¶6

Yɛri Yɛri Bo’a San Zo’e

Pɔɣenaba la n yuun wum ge nyɛ yelese’a la, la yuun eŋɛ en la pakerɛ ti a sirege amea yeti: “Ho buraasi boi la pupeelum poan, ti ho yamesi n tuni bɔ’ɔra ho daarɛ woo ho nɛŋai ge wuna ho yɛm sɔsega wa boi la pupeelum poan!” (1 Nadoma 10:4-8) La yuun boi bim ti Solomon yamesi la yuun boi la taresum poan ge pɔɣenaba la yuun ka yeti bala wan basɛ ti ba tara pupeelum. Ge Solomon yamesi wa yuun nyɛ la kã’a la ba yuun ni zi’a ge kɛlesa Solomon yetɔɣum la. Bisɛ Siba pɔɣenaba la yetɔɣum la n de yelesonɛ se’em bɔ’ɔra Yehowa yamesi zina beere wa la bamam me n mɔɔri kɛlesa Naaŋɔdaana la, la a Dayɔa Yezu Krista yɛm la!

w99-E 7/1 30-31

A Yuun Nyɛ Kã’a Mɛ La Eŋa N Keŋɛ Ta Bisɛ En La

Siba pɔɣenaba la puurɛ yuun ba’ɛ pee mɛ ti ‘a ya nɔɔrɛ’ la Solomon yɛm la, la a na’am la n nyɛti nɛŋa tɔlega se’em la. (1 Nadoma 10:4, 5) Nɛreba basɛba pa’alɛ de vuurɛ ti pɔɣenaba wa yuun ka le tana “vɔ’ɔsa.” Hali gɔnmi’ila ayima yeti a yuun lige mɛ! La yeen dɛna se’em, pɔɣenaba la n yuun wum ge nyɛ yelese’a la yuun eŋɛ en la pakerɛ. A yuun yeti Solomon yamesi la tari la pupeelum la ba wuni naba la yɛm la ge me pɛ̃ɣɛ Yehowa la eŋa n basɛ ti Solomon dɛna naba la. A yuun nyaa dekɛ la bo’olum n eŋɛ laɣehɔ bo naba la, ti salema ma’a kãlɛ dɛna zina beere wa $40,000,000 (Gh₵251,200,000.00). Solomon me yuun bo pɔɣenaba la “sɛla woo ti a bɔta la.”​—1 Nadoma 10:6-13.

Vo’osum Poan Yɛla

w08-E 11/1 22 ¶4-6

Hon Mi?

Naba Solomon mea yuun tari salema paɛ la wani?

Gulesegɔ la yeti, Tyre naba, Hiram yuun dekɛ la salema tons sugumnɔɔrɛ bunaasi (bii salema tibesum n paɛ samɛtɔ bɔra 80) bo Solomon, Siba pɔɣenaba la me yuun bo en la bala mea nɔɔ ge ti Solomon ɔɔrenɔ la me yuun tari salema tons sugumnɔɔrɛ 15 (bii salema tibesum n paɛ samɛtɔ bɔra 300) ze’ele Ofir tiŋa wa’ana. Baabule la yeti: “Salema se’a ti Solomon tɔ’ɔsa yuunɛ woo dela salema ligekɔ̃ba bɔɔresi kɔbesi siyoobe la pisiyoobe la ayoobe,” bii la gaŋɛ tons sugumnɔɔrɛ 25 (bii salema tibesum n paɛ samɛtɔ bɔra 500). (1 Nadoma 9:14, 28; 10:10, 14) Wana dela yelemɛŋɛrɛ? Nadoma salema yuun zo’e paɛ la wani diimi sa?

Diimi gulesegɔ ayima ti gɔnmi’ileba me sakɛ ti la dela yelemɛŋɛrɛ yeti, Faro Tutmose III n yuun boi Egypt (yuun tusa ayi G.Y.B.) yuun tari la salema n paɛ tons sugumnɔɔrɛ 13.5 (bii salema tibesum n paɛ samɛtɔ bɔra 270) keŋɛ Amun-Ra pu’usegɔ deo la n boi Karnak tiŋa la. Yuun kɔbesi sinii G.Y.B., Tyre tiŋadoma yuun tari la salema n gaŋɛ tons sugumnɔɔrɛ 4 (bii salema tibesum n paɛ samɛtɔ bɔra 80) ta bo Asiria Naba Tiglat-pileser III, ti Sargon II me yuun tari salema bala mea nɔɔ ta bo Babilon baɣa. Ba tɔɣɛ pa’alɛ ti Makedonia tiŋa Naba Filip II (359-336 G.Y.B.) yuun ni tũ la salema n gaŋɛ tons sugumnɔɔrɛ 28 (bii salema tibesum n paɛ samɛtɔ bɔra 560) Pangaeum salema zɛ’ɛsi n boi Trace tiŋa la yuunɛ woo poan.

Se’em ma’a ti Filipi dayɔa Alexander Bunpaŋa La (336-323 G.Y.B.) yuun zabɛ nyaŋɛ Persia tiŋa n boi Susa la, ba yeti a yuun vaɛ la salema tons sugumnɔɔrɛ 1,180 bilam (bii salema tibesum n paɛ samɛtɔ bɔra 23,600) ge me nyɛ salema tons sugumnɔɔrɛ 7,000 (bii salema tibesum n paɛ samɛtɔ bɔra 140,000) Persia za’a poan. Bala la, to san dekɛ yele ana makɛ taaba, Baabule la n yeti Naba Solomon yuun tari la salema zo’e zo’e la daɣɛ sɛla n gaŋɛ nu’usi.

SEPTEMBER 12-18

NAAYINƐ TUULUM YƐLA | 1 NADOMA 11-12

“Doose Yɛm Sore Poan Loe Mina Ti Ho Wan Di Bii Ele”

w18.07-E 18 ¶7

“Ani N Boi Yehowa Bɔba?”

To wan ta’an zamesɛ yɛla zo’e zo’e Naba Solomon yele la poan. Solomon n yuun de bunbilipaalega la, a yuun tari la Yehowa pa’alegɔ tuna tuuma. Naayinɛ yuun bo en la yɛm zo’e zo’e ge me bo en yɔ’ɔ ti a mɛ pu’usegɔ deo kãtɛ Yerusalem tiŋa poan. Ge Solomon la Yehowa zɔtɔ nyɔka la yuun sa’am mɛ. (1 Na. 3:12; 11:1, 2) Naayinɛ Lɔɔ la yuun ka bo Hebru naba yɔ’ɔ ti a “di pɔɣeba zo’e zo’e, la wan eŋɛ se’em ti a suure da tee.” (Tɛɛ. 17:17) Solomon yuun zaɣesɛ mɛ ge di pɔɣeba 700. A yuun le tara la zɛbedoma 300. (1 Na. 11:3) A pɔɣeba la zo’e zo’e yuun daɣɛ Israeldoma, ba yuun kaaberi la baɣa. Bala zuo la, Solomon yuun le zaɣesɛ Naayinɛ lɔɔ la n yeti ba da di satima pɔɣesi la mɛ.​—Tɛɛ. 7:3, 4.

w19.01-E 15 ¶6

Ho Wan Eŋɛ La Wani Ta’an Gu Ho Suure?

Sitaana boti la to ana wuu eŋa n yuun zaɣesɛ Yehowa pa’alegɔ ge eŋɛ sɛla ti a bɔta la. Sitaana kan ta’an pɛ̃regɛ tɔ ti to ti’isɛ ge eŋɛ sɛla ti eŋa bɔta la. Bala la, a ni tiregɛ mɛ doose sarɔtɔ toseto poan ti a ta’an eŋɛ eŋa n boti sɛla la. Makerɛ, a puɣum sa’am tomam la nɛresɛba n laɣum bɔna la puti’irɛ mɛ. (1 Yon 5:19) A nyaa ni bɔta la to laɣum naɛ la ba sɔsa, la nɔɔ boi bim ti zɔtɔ be’ero ta’an ‘sa’am’ bii “burum” to puti’irɛ la to itigɔ. (1 Ko. 15:33; ty.) A yuun doose la bɛ̃regɔ kaŋa poan pã’asɛ Naba Solomon. A yuun di la pɔɣesɛba n yuun kaaberi baɣa, ti ba “nyaŋɛ pã’asɛ en” ge “basɛ ti a tue” Yehowa.​—1 Na. 11:3; ty.

w18.07-E 19 ¶9

“Ani N Boi Yehowa Bɔba?”

Ge Yehowa yuun ka tamɛ a be’em tuuma wa yele. Baabule la yeti: “Yehowa sunsɔa daa nyie Solomon mɛ la a suure n daa ka le bɔna . . . Yehowa poan la, se’em n daa niɛ amea sugumnɔɔrɛ buyi pa’alɛ en la ge kaɣɛ en yele dena wa la, ti a da pu’usa yina ase’a. Ge a zaɣɛ Yehowa n daa bo en nɔɔrɛ se’em la mɛ.” Bala zuo la, Naayinɛ puurɛ yuun ka le pee la en ge me yuun ka le soŋera en. Solomon kɔma yuun ka ta’an basɛ ti Israel tiŋa dɛna buyina ti wana wa yuun basɛ ti daaŋɔ zo’e zo’e n paɛ ba.​—1 Na. 11:9-13.

Vo’osum Poan Yɛla

w18.06-E 14 ¶1-4

A Yuun Ta’an Basɛ Ni Ti Naayinɛ Puurɛ Pee La En

Ba yuun isige zabera la en la zuo, Arehoboam yuun maasum la a lengima. Ge Yehowa yuun kɛ̃ yele la poan mɛ tɔɣɛ bo nɔdɛ’ɛsa Semaia yeti: “Da keŋɛ ya ta zabɛ la ya suurɔ Israeldoma wa. Nɛra woo kule a yire ge mam n basɛ ti la eŋɛ bala.”​—1 Na. 12:21-24.

Ba da puɣum zabɛ? Ti’isɛ bisɛ la yuun wan daam Arehoboam se’em! Nɛreba wan ti’isa naba wa yele la wani, la eŋa n vuuse a nɛreba la yeti a wan basɛ ti la “wuŋɛ” ba ge pilum sakɛ bo tubekakiregadoma wa? (Dekɛ makɛ 2 Yelebiŋ’a 13:7.) Hali la bala la za’a la, naba la, la a lengima la yuun “nam Yehowa nɔɔrɛ mɛ ge kule ba yire, wuu Yehowa n yele ba se’em la.”

Yele wa pa’alɛ to la bem? Yɛm boi bim mɛ ti to nana Yehowa hali bala san puɣum basɛ ti nɛreba zɛregera tɔ. To san nana Naayinɛ, a wan zu’usɛ tɔ ge kã bo to.​—Tɛɛ. 28:2.

Arehoboam yuun nyɛ nyuurɔ la wani? Eŋa n yuun nam ge basɛ ti a kan zabɛ la tiŋa la, bala yuun basɛ ti a ŋmɛregɛ a puti’irɛ mɛta la Yuda la Benyamin buuri tisi la ti a yuun sɔna bisera la. A yuun tebege tisi la mɛ ti ba “zɛ’a kankaŋi.” (2 Ye. 11:5-12) Sɛla n gani za’a dela, a yuun nani Yehowa lɔɔ la mɛ sankaŋa. Yeroboam bisega saŋa ti Israel buuri pia la yuun pɔsɛ kaabera baɣa la, nɛreba la zo’e zo’e yuun keŋɛ la Yerusalem ti la pa’alɛ ti ba yuun “soŋeri Arehoboam” mɛ ti yelemɛŋɛrɛ pu’usegɔ bɔna. (2 Ye. 11:16, 17) Bala la, Arehoboam n yuun nani la yuun basɛ ti a na’am la kpe’em mɛ.

SEPTEMBER 19-25

NAAYINƐ TUULUM YƐLA | 1 NADOMA 13-14

“Bem Zuo Ti La Nara Ti Ho Mina Ho Tɔregɔ Beene Ge Me Basɛ Ti Sɛla Ti Ho Tara La Seke Ho?”

w08-E 8/15 8 ¶4

Kɔ’ɔn Tara Yelemɛŋɛrɛ La Ho Suure Za’a

Ti Yeroboam nyaa yele yelemɛŋɛrɛ Naayinɛ nɛra la yeti: “Doose mam kule ta nyu ko’om ge ti n bo ho bo’olum.” (1 Na. 13:7) Nɔdɛ’ɛsa la wan eŋɛ la bem nananawa? A sakɛ naba la beeŋo la, hali la eŋa n puɣum purɛ yelese’a n wan sige a zuo la? (Ym. 119:113) Bii a tuɣum zaɣesɛ naba la beeŋo la, hali la naba la n eŋɛ wuu a tee me la? Yeroboam yuun tari la bo’olum se’a n eŋɛ ligeri, ti a wan ta’an dekɛ bo a zɔdoma. Naayinɛ nɔdɛ’ɛsa wa yuun san tari ni lɔɣebɔrɛ konkoma’asum a suuren, naba la n yuun yeti a wan bo en sɛla la ta’an deni bɛ̃regɔ bɔ’ɔra en. Ge Yehowa yuun bo nɔdɛ’ɛsa wa nɔɔrɛ ti: “Da nyu ko’om bii ho di dia bilam. Da le doose sarɔseko ti ho doose keŋɛ la lebe na.” Bala la, nɔdɛ’ɛsa wa yuun kɔ’ɔn lebese naba la mɛ ti la niɛ peelum yeti: “Ho san puɣum puregɛ ho lɔɣɔrɔ pusuka bo mam, mam kan doose ho keŋɛ ta nyu ko’om bii n di dia kalam.” Ti nɔdɛ’ɛsa la tee doose sarɔɔ ayima lebe kule Betel. (1 Na. 13:8-10) Nɔdɛ’ɛsa la n yuun kɔ’ɛ a puti’irɛ se’em la pa’alɛ to la bem, la to nari ti to tara yelemɛŋɛrɛ to suuren la?​—Arom 15:4.

w08-E 8/15 11 ¶15

Kɔ’ɔn Tara Yelemɛŋɛrɛ La Ho Suure Za’a

To wan ta’an le zamesɛ la bem Yuda nɔdɛ’ɛsa la tuure la poan? Magaha 3:5 yeti: “Dekɛ ho suure za’a delum Yehowa ge da dekɛ homea delum homea bɔkerɛ.” Eŋa n wan tuɣum dekɛ ni amea delum Yehowa wuu eŋa n yuun eŋɛ se’em la, bɔnkana wa poan, Yuda nɔdɛ’ɛsa la yuun dekɛ amea delum la amea bɔkerɛ. A tuure wa yuun basɛ ti eŋa la Naayinɛ tiŋasuka sa’am mɛ ge ti a koŋe a nyɔvore. A yele wa basɛ ti to baŋɛ la de ninmɔ’ɔrɛ se’em ti to mina to tɔregɔ beene ge me tara yelemɛŋɛrɛ pu’usa Yehowa!

w08-E 8/15 9 ¶10

Kɔ’ɔn Tara Yelemɛŋɛrɛ La Ho Suure Za’a

Yuda nɔdɛ’ɛsa la yuun nari ti a baŋɛ nɔdɛ’ɛsa kɛka wa pã’asegɔ la. A yuun ta’an soke amea yeti, ‘Beni n sɔi ti Yehowa wan tum maleka se’em zɛ’an ti a tari pa’alegɔ na bo mam?’ Nɔdɛ’ɛsa la yuun ta’an soke ni Yehowa bɔkɛ yɛla soŋa ge Baabule la pa’alɛ ti a yuun ka eŋɛ bala. A yuun tuɣum “doose [buranya’aŋa la] mɛ kule ta nyu ko’om ge me di dia.” Yehowa puurɛ yuun ka pee. Nɔdɛ’ɛsa wa ti ba yuun pã’asɛ en nyaŋɛ la ge ti a nyaa lɛbera kula Yuda tiŋa la, gbeɣenɛ n yuun ãasum en ku. Nɔdɛ’ɛsa wa yuun ki la kum yaalega!​—1 Na. 13:19-25.

Vo’osum Poan Yɛla

w10-E 7/1 29 ¶5

A Biseri La To Halesoma La

Sɛla n gani za’a dela, yelese’a n boi 1 Nadoma 14:13 la n pa’ali Yehowa yele se’em la, la eŋa n eeri sɛla to poan. Tɛra ti a yuun “nyɛ la” yelesonɛ Abiya poan. La niɛ peelum ti Yehowa yuun viisɛ Abiya suuren mɛ nyaa ta nyɛ yelesonɛ. Gɔnmi’ila ayima yeti, ba yire la poan Abiya ma’a n yuun de salema, “kuga la za’a poan.” Yehowa suure yuun kɛ̃ a itisoŋɔ la mɛ ge me yuun kã bo en. A yire nɛreba la n yuun de putɔpa la, eŋa ma’a ti a yuun tara nimbɔ̃zore bɔ’ɔra en.

SEPTEMBER 26–OCTOBER 2

NAAYINƐ TUULUM YƐLA | 1 NADOMA 15-16

“Asa Dekɛ La Sukpe’ene Tum Tuuma Ge Hon Me?”

w12-E 8/15 8 ¶4

“Ho Wan Nyɛ Kã’a Ho Tuuma La Zuo”

Ba yuun pu Israel buuri la sugumnɔɔrɛ buyi la, yuuma 20 pooren Yuda buuri la yuun nyaa kɔ’ɔn kaabera la baɣa. Hali se’em ma’a ti Asa yuun dɛna naba yuun 977 G.Y.B. la, nayire la yuun kɔ’ɔn pirɛ mɛ la Kanaan dɔɣum baɣerɛ la ti ba kaabera dɛ. Ge ba gulesɛ Asa vom yɛla ti a yuun “tum la sɛla n ani soŋa ge me nara Yehowa a Naayinɛ la nɛŋai.” Asa yuun “gbi satiŋa baɣa bimbima, la zɔya zuto pu’usegɔ zɛ’ɛsi la mɛ, wɔ̃rɛ tuulum piila la ge ŋma baɣa dɔɔrɔ la basɛ.” (2 Yel. 14:2, 3) Asa yuun le sa’ɛ Yuda buuri “burasɛba n daa boi baɣa yire la poan tuna yalumtuuma” la mɛ. Ba yuun tuni yalumtuuma wa mɛ ti’isa ti bamam tari pu’usa la Naayinɛ. Asa yuun ka eŋɛ kɔɔl yele ana wa poan. A yuun le yele nɛreba la ti ba “ɛ Yehowa ba sɔyaabedoma Naayinɛ la” ge me dɔla Naayinɛ “lɔɔ la a nɔze’elego la.”​—1 Na. 15:12, 13; 2 Yel. 14:4.

w17.03-E 19 ¶7

Pu’usa Yehowa La Ho Suure Za’a!

Tomam ayima ayima woo ta’an viisɛ to poan bisɛ nyaa to yese la to suure za’a pu’usa Naayinɛ. Soke homea yeti, ‘Mam lu n suure ti n ita yelese’a n wan basɛ ti Yehowa puurɛ pee, n tɔɣɛ po’e yelemɛŋɛrɛ pu’usegɔ ge me te’ele a nɛreba ti yelese’a n ka nari kan sa’am ba puti’irɛ?’ Ti’isɛ bisɛ Asa n yuun nari ti a tara sukpe’ene se’em ta’an sa’ɛ Maaka n yuun de “pɔɣenaba” tiŋa la poan la! Daanse’ere ho ka mi nɛra n ani wuu pɔɣenaba wa ge bɔŋa ase’a boi mɛ ti la nara ti ho tɔɣesa Asa sukpe’ene la. Makerɛ, ho wan eŋɛ la wani ho yire nɛra bii ho zɔ paa san tum be’em ge zaɣesɛ ti a tee, ti ba yese en tansugere la poan? Ho wan eŋɛ kalam zaɣesɛ kan naɛ la nɛrekaŋa sɔsa? Ho suure la wan bɔta ti ho eŋɛ la bem?

it-1-E 184-185

Asa

La nɔɔ boi bim ti saŋa ase’a Asa yuun ni tum la yɛmpɔ’ɔrɛ tuuma bii a ni ka bɔkɛ vo’osum poan yɛla soŋa ge hali la bala za’a, a halesoma la eŋa n yuun ka naɛ la ayelegenmeadoma la yuun zo’e gana be’em se’a ti a tum la mɛ. Wana wa yuun basɛ ti a pa’asɛ la nadoma sɛba n yuun tari yelemɛŋɛrɛ Yuda buuri la poan la. (2Ye 15:17) Asa yuuma 41 bisega la dela Israel nadoma banii: Yeroboam, Nadab, Baasa, Ela, Zimri, Omri, Tibni (se’em n yuun sɔi Israel bɔberɛ de se’ere bisera) la Ahab bisega n ta taaba. (1Na 15:9, 25, 33; 16:8, 15, 16, 21, 23, 29) Asa n yuun ki la, a dayɔa Yehosafat n yuun nyaa de naba.​—1Na 15:24.

Vo’osum Poan Yɛla

w98-E 9/15 21-22

Hon Sakɛ Ti Naayinɛ Sirum Boi?

Makerɛ, kaalɛ yetɔɣebiŋere la n pa’ali too se’a n wan paɛ sɛba n wan malum mɛ Yeriko tiŋa la ge bisɛ la tum tuuma se’em. Yosua 6:26 yeti: “Bala ma’a ti Yosua pɔ nɔɔrɛ yeti: ‘Too paɛ burasɛka n ze’ele Yehowa nɛŋai ti a malum mɛ Yeriko tiŋa wa. A dayɔkeema san biŋe ka ɛ̃berɛ, a wan ki ge ti a dayɔbila me san mɛ ka yasi, a me wan ki.’” La yuun tum tuuma la yuuma 500 pooren ti la bɔna 1 Nadoma 16:34 n yeti: “[Naba Ahab] saŋa la poan ti Betel buraa Hiel malum mɛ Yeriko tiŋa. A dekɛ la a dayɔkeema Abiram vom ɛ̃ɛbɛ zɛ’an la ge mɛ ka yasi la, la a dayɔbila Segub vom, wuu Yehowa yelesum la ti Nun dayɔa Yosua purɛ se’em la.” Naayinɛ ma’a n wan ta’an yele yetɔɣebiŋere wa ge basɛ ti la sirum tum tuuma.

OCTOBER 3-9

NAAYINƐ TUULUM YƐLA | 1 NADOMA 17-18

“Ya Wan Tara Puti’ira Ayi Ayi Yue Paɛ La Wani?”

w17.03-E 14 ¶6

Dekɛ Sakerɛ Kɔ’ɛ Ho Puti’irɛ Soŋa!

Diimi Israeldoma la n yuun ta bɔna Pu’ulumbiŋere Tiŋa la, ba yuun nari ti ba kɔ’ɛ ba puti’irɛ ninmɔ’ɔrɛ yele deyina poan: Ba pu’usa Yehowa bii yina ase’a. (Kaalɛ Yosua 24:15.) Ho ta’an ti’isa ti la wan dɛna naana bo ba ti ba kɔ’ɛ ba puti’irɛ. Ge ba wan kɔ’ɛ ba puti’irɛ se’em la ta’an dɛna vom bii kum yele. Gãkerɛba saŋa la, sugumnɔɔrɛ zo’e zo’e ti Israeldoma la yuun ni loe loore n ka makɛ. Ba yuun zaɣesɛ Yehowa mɛ ge kaabera baɣa. (Ke. 2:3, 11-23) Yeen ti’isɛ bisɛ bunkaŋa wa poan ti la yuun dɛna pɛ̃regerɛ ti Naayinɛ nɛreba la kɔ’ɛ ba puti’irɛ se’em la. Nɔdɛ’ɛsa Eliya yuun pa’alɛ ba sɛla n nari ti ba loe: Ba pu’usa Yehowa bii Baal baɣerɛ la. (1 Na. 18:21) Eliya yuun kaɣɛ nɛreba la mɛ la ba bu’uri la. Ho ta’an ti’isa ti la yuun wan deni naana ti ba loe Yehowa pu’usa se’ere n sɔi la, yɛm la nyuurɔ boi bim mɛ ba san pu’usa en. Yelemɛŋɛrɛ, nɛra n ti’iseri zãara ka nari ti a basɛ ti a suure bɔna Baal pu’usegɔ poan. Hali la bala la, Israeldoma la yuun kelum “tara puti’ira ayi ayi” mɛ. Eliya yuun kpemese ba giila ti yɛm wan bɔna bim ba san loe pu’usegɔ seko n ani soŋa n de ba pu’usa Yehowa la.

ia-E 88 ¶15

A Yuun Tɔɣɛ Po’e Yelemɛŋɛrɛ Pu’usegɔ Mɛ

Baal malemadoma la puurɛ yuun ba’ɛ pee gaŋɛ mɛ ti ba “nyabera vɔɔla ge ŋmata bamesi la su’usi la kana, wuu ba malema la n de se’em la, ti ziim ka’ara ba inya za’a.” Ge bala za’a yuun basɛ la yoo! “Lebesego ka boi, leregere ka boi, sɛla ka keleseri ba.” (1 Na. 18:28, 29) Yele la dela, Baal yuun ka boi. A yuun dela lɔkɔ ti Sitaana maalɛ tara pã’asa nɛreba ti ba zaɣesɛ Yehowa. Yelemɛŋɛrɛ la dela, to suure wan sa’am ti to zuo fakɛ to san ka loe pu’usa Yehowa.​—Kaalɛ Yooma 25:3; 115:4-8.

ia-E 90 ¶18

A Yuun Tɔɣɛ Po’e Yelemɛŋɛrɛ Pu’usegɔ Mɛ

Ge ti Eliya yuun nyaa pɔsɛ zusera la, nɛrekuuŋɔ la yuun ta’an ti’isa ti Yehowa wan pã’asɛ ba wuu Baal baɣa la n eŋɛ se’em la. Eŋa n yuun zusɛ ba’asɛ la, bumbu’um yuun ka le bɔna bim. Baabule la yeti: “Bilam ti Yehowa bugum ze’ele saazuo lu na, di kaabegɔ bo’olum la, la dɔɔrɔ la, la kuga la, la tontɔnɔ la ge me kiisɛ ko’om la n boi boko la poan la.” (1 Na. 18:38) Lebesego la yuun dela ɔmi’isa! Nɛreba la yuun nyaa eŋɛ la wani?

Vo’osum Poan Yɛla

w08-E 4/1 19, daka

A Yuun Pigeri Mɛ Ge Me Gura

Warɛ La Yuun Yue Paɛ La Wani Eliya Saŋa La?

Yehowa nɔdɛ’ɛsa Eliya yuun tɔɣɛ bo Naba Ahab ti la kan yue warɛ la wan fɔ̃regɛ. Yele wa yuun tum tuuma la “yuunse’ere n pa’asɛ butã la” poan​—kɔ’ɔn pɔsɛ se’em ma’a ti Eliya yuun tɔɣɛ warɛ wa yele la. (1 Nadoma 18:1) Eliya n yuun kɔ’ɔn yeti Yehowa wan basɛ ti saa ni la ti A yuun basɛ ti la ni. Nɛreba basɛba ta’an yeti, warɛ la yuun ki’ilum la yuuma atã la poan ti la pa’alɛ ti la ka ba’ɛ paɛ yuuma atã. Ge Yezu la Yames yeti, warɛ la yuun yue paɛ la “yuuma atã la ŋmaresi siyoobe.” (Luke 4:25; Yames 5:17) Ba tue mɛ?

La daɣɛ bala. Yele la dela, diimi Israeldoma uunɛ saŋa la yuun ni yue paɛ ŋmaresi siyoobe mɛ. Nɔkpe’ene kai ti se’em ma’a ti Eliya yuun tɔɣera warɛ wa yele bɔ’ɔra Ahab la ti uunɛ saŋa wa yuun ba’ɛ yuura mɛ ti la kpe’em bo ba. Wana pa’alɛ ti, warɛ la yuun puɣum pɔsɛ mɛ ŋmaresi siyoobe n tole. Bala la, Eliya n yuun nyaa ta tɔɣɛ ti warɛ la wan ki’ilum “yuunse’ere n pa’asɛ butã la” poan la, ti warɛ la puɣum bɔna mɛ ti la paɛ yuuma atã la girego. “Yuuma atã la ŋmaresi siyoobe” la za’a yuun puɣum paɛ mɛ ge ti nɛreba la za’a yuun nyaa laɣesɛ Karmel Zoore la zuo ti ba nyɛ yelekirega la.

Nyaa ti’isɛ bisɛ se’em ma’a ti Eliya yuun pɔsɛ keŋɛ Ahab zɛ’an la. Nɛreba la yuun ti’isi ti Baal n de “se’em n sɔi sangbama la bisera,” baɣese’ere n wan basɛ ti saa ni. Uunɛ saŋa la yuun san ba’ɛ yuura mɛ, daanse’ere nɛreba la yuun ta’an ti’isa ti: ‘Baal bɛɛ? Wani ma’a ti a wan basɛ ti saa ni?’ Eliya n yuun tɔɣɛ ti saa kan ni ti mɛɣelum me kan lu ta paɛ se’em ma’a ti eŋa wan yeti saa ni la, yuun dela sunsɔa nyiisum bɔ’ɔra sɛba n yuun kaaberi Baal la.​—1 Nadoma 17:1.

OCTOBER 10-16

NAAYINƐ TUULUM YƐLA | 1 NADOMA 19-20

“Zusɛ Yehowa Ti A Buɣelɛ Ho Suure”

w19.06-E 15 ¶5

Delum Yehowa Se’em Ma’a Ti Yele Paɛ Hɔ

Kaalɛ 1 Nadoma 19:1-4. Dabeem n yuun tari Eliya la Pɔɣenaba Yezebel n yuun boti a ku en la. Bala la, a yuun zɔ keŋɛ la Beer-seba. A suure n yuun ba’ɛ sa’am ti “a zusɛ ti a boti a ki mɛ.” Beni n sɔi ti a yuun bɔta a ki? Eliya yuun dela asaala n ka di mi’a “wuu tomam n ani se’em wa.” (Yam. 5:17) Daanse’ere a yuun ba’ɛ taregɛ mɛ ge ti a suure sa’am. Eliya yuun ta’an ti’isa ti yɛla ka tee sɔ̃na bɛ’ɛna Israel tiŋa poan, eŋa me n tiregeri ti a basɛ ti yelemɛŋɛrɛ pu’usegɔ bɔna la dela yoo. A me yuun ta’an ti’isa ti eŋa ma’a n kelum pu’usa Yehowa. (1 Na. 18:3, 4, 13; 19:10, 14) Nɔdɛ’ɛsa wa n yuun eŋɛ sɛla wa ta’an eŋɛ to pakerɛ. Ge Yehowa yuun bɔkɛ la ani Eliya se’em mɛ.

ia-E 103 ¶13

A Yuun Basɛ Ti A Naayinɛ La N Buɣelɛ A Suure

Hon ti’isi ti la yuun wan ana Yehowa la wani la eŋa n yuun boi saazuo sa ge bisera a nɔdɛ’ɛsa wa ti a gã’a tia tiŋa goo la poan ge zusera ɛɛra ti a ki la? To mi sɛla n yuun eŋɛ mɛ. Eliya n yuun zɛɛ guum ba’asɛ la, Yehowa yuun tum la a maleka a zɛ’an. Maleka la yuun wa’ana kalam Eliya la bãalam ti a niɛ ge nyaa yele en yeti: “Isige di.” Eliya yuun di mɛ se’ere n sɔi la, maleka la yuun eŋɛ la dia ze’ele en​—dia la yuun dela boroboro tuulega la ko’om. A yuun tiɛ pu’usɛ maleka la? Baabule la yeti, nɔdɛ’ɛsa la di mɛ ge nyu nyaa lebe zɛɛ guum. Daanse’ere a suure n yuun sa’am ti a ka bɔta ti a tɔɣɛ? La yeen dɛna se’em, maleka la yuun le niɛ en mɛ, daanse’ere beyeene poan. A yuun le yele Eliya ti, “Isige di” ge nyaa tɔ̃kɛ yeti, “ho tari la sarɔwoko.”​—1 Na. 19:5-7.

ia-E 106 ¶21

A Yuun Basɛ Ti A Naayinɛ La N Buɣelɛ A Suure

Baabule la pa’alɛ ti, yelekirisi la woo n yuun eŋɛ la, Yehowa yuun ka boi bim. Eliya yuun mi ti Yehowa daɣɛ yinese’ere n ka boi wuu Baal baɣerɛ la ti ba yuun pɛɣera en ti “eŋa n basɛ ti sangbama bɔna,” bii se’em n basɛ ti saa niira la. Yehowa n de Se’em n basɛ ti pansɛka woo n boi naaŋɔ lɔɣɔrɔ poan la bɔna ge me le tara paŋa gana sɛla woo ti a naam la. Hali saazuo sa puɣum ka seke la dɛna a kɛ̃’a zɛ’an! (1 Na. 8:27) Yele ana wa za’a yuun soŋɛ Eliya la wani? Tɛra sɛla n yuun basɛ ti dabeem tara en la. Eliya yuun ka nari ti a tara dabeem la Ahab la Yezebel se’ere n sɔi la, Yehowa n boi la en, eŋa n de Naayinɛ sɛka n tari paŋa gana za’a!​—Kaalɛ Yooma 118:6.

ia-E 106 ¶22

A Yuun Basɛ Ti A Naayinɛ La N Buɣelɛ A Suure

Bugum la n yuun tole ba’asɛ la, la yuun nyaa ani la siim ti Eliya wum “kɔ̃a n tɔɣeri bãla bãla.” Naayinɛ yuun yele Eliya ti a tɔɣɛ sɛla n boi a suuren, a me yuun eŋɛ la bala, nyaa le yele Naayinɛ sɛla n daani en. Daanse’ere wana yuun basɛ ti a suure ana la buɣa buɣa. Nɔkpe’ene kai ti, Eliya yuun nyɛ subuɣelegɔ mɛ pa’asɛ se’em ma’a ti a wum “kɔ̃a n tɔɣeri bãla bãla” n yuun le yele en sɛla la. Yehowa yuun tɔɣɛ buɣelɛ Eliya suure mɛ ti a daɣɛ bumbasela la fii me. Sore kani poan? Naayinɛ yuun niɛ pa’alɛ en, eŋa n puɣum tara puti’irɛ se’em mɛ ti a zabɛ giisɛ Baal pu’usegɔ Israel tiŋa poan. La niɛ peelum ti, Eliya ka tum basɛ yoo se’ere n sɔi la, Naayinɛ yuun kɔ’ɔn tuna a puti’irɛ n boti sɛla la mɛ. Leyɛ’ɛsa, Eliya yuun tari tuunɛ n wan tum Naayinɛ n boti sɛla la poan mɛ se’ere n sɔi la, Yehowa yuun dekɛ la pa’alegɔ bo en ti a lebe ta tum.​—1 Na. 19:12-17.

Vo’osum Poan Yɛla

w97-E 11/1 31 ¶2

Hon Kuuri Homea Bɔ’ɔra Ge Tara Yelemɛŋɛrɛ

Zina beere wa, Naayinɛ yamesi zo’e zo’e me kuuri bamesi mɛ tuna. Basɛba basɛ ba “vatɔ,” bii ba tuuma mɛ ge keŋɛ ta mɔɔla yelesoma la tinse’esi n zaaɛ poan bii ba tuna Betel. Basɛba me keŋɛ la satisi ta tuna Tigere la mɛa tuuma. Ba zo’e zo’e me tuni la tuunse’a ti nɛreba ka bisɛ nam ba. Ge tuunsɛka woo ti nɛra tuna bɔ’ɔra Yehowa yele pakɛ mɛ. Yehowa puurɛ pee mɛ la se’em woo n yese a suure poan tuna bɔ’ɔra en, a me wan kã bo ba la ba kuuri bamea tuna bɔ’ɔra en se’em la.​—Mark 10:29, 30.

OCTOBER 17-23

NAAYINƐ TUULUM YƐLA | 1 NADOMA 21-22

“Tɔɣesa Yehowa N Tari A Kpe’eŋo La Tuna Tuuma Se’em La”

it-2-E 21

Pɛɛntɛɛreba Yehowa

Se’em ma’a ti maleka yuun wa’an Yosua zɛ’an na Yeriko tiŋa la, a yuun soke maleka la ti a boi la Israeldoma la bɔba bii ba dinedoma la bɔba. Maleka la yuun lebese yeti, “Aayi ge mam dela Yehowa pɛɛntɛɛreba nɛŋadaana n wa’ana.” (Yos 5:13-15) Nɔdɛ’ɛsa Mikaiah yuun yele Naba Ahab la Naba Yehosafat yeti, “Mam nyɛ la Yehowa n zĩ a na’am kuka la zuo ti saazuo pɛɛntɛɛreba la za’a kaɛ en, bɔna a zuɔ la a gɔbega,” ti la pa’alɛ ti Yehowa malesi la n bala. (1Na 22:19-21) La yeti “Pɛɛntɛɛreba Yehowa la” kɔ’ɔn makɛ mɛ se’ere n sɔi la, saazuo malesi la yeen daɣena la kerubdoma, serafdoma la malesi ma’a (Isa 6:2, 3; Pin 3:24; Lil 5:11) ge ba tigese ba mɛ tigere tigere n sɔi ti Yezu Krista yuun ta’an yeti eŋa tari la “malesi n gaŋɛ tusa” n wan ta’an soŋɛ en. (Mt 26:53) Hezekia n yuun beleni ti Yehowa soŋɛ en la, a yuun yeti “Pɛɛntɛɛreba Yehowa, Israel Naayinɛ la, se’em n zĩ kerubdoma la zuo.” Wana wa pa’alɛ ti a yuun tɔɣeri la nɔbiŋere daka la, la kerubdoma la n yuun yaɣɛ ka zuo n ze’ele bo Yehowa saazuo na’am kuka la yele. (Isa 37:16; dekɛ makɛ 1Sa 4:4; 2Sa 6:2.) Elisa yameŋa paleŋa n yuun ɛ̃ɣeri la, yuun nyɛ giilekpemesego mɛ la eŋa n yuun nyɛ wɔ̃sum poan ti zɔya la n boi Elisa yire la kɔ’ɔn pirɛ “la yiiri la i toroto n de bugum” la. Ba yuun dela Yehowa malesi zo’e zo’e.​—2Na 6:15-17.

w21.02-E 4 ¶9

“Buraa Woo Zuodaana Dela Krista”

Sirege N Mea. Yehowa yɛm n gani nɛra woo; ge a keleseri a yamesi puti’irɛ mɛ. (Pin. 18:23, 24, 32) A bo yɔ’ɔ mɛ ti eŋa n biseri sɛba la ta’an tɔɣera ba puti’irɛ n de se’em bɔ’ɔra en. (1 Na. 22:19-22) Yehowa ani la kasi ge a ka ti’iseri ti a yamesi me ana bala nananawa. Ge a tuɣum soŋera la asaaleba n ka di mi’a la ti ba ta’an pu’usa en soŋa soŋa. (Ym. 113:6, 7) Hali Baabule la yeti Yehowa dela to “soŋera.” (Ym. 27:9; Heb. 13:6) Naba David yuun sakɛ ti Yehowa sirege n mea la zuo ti eŋa yuun nyaŋɛ tum tuunkãra la.​—2 Sam. 22:36.

it-2-E 245

Pɔmpɔreŋɔ

Yehowa Naayinɛ ni bo yɔ’ɔ mɛ ti “Sitaana paŋa la” nyaŋera la sɛba n boti pumpɔreŋɔ “ti ba ta’an sakɛ bo sɛla n de pumpɔreŋɔ” la wan tuɣum deni ti ba sakɛ Yezu Krista yelesoma la. (2Te 2:9-12) Yele dena wa taaba yuun paɛ diimi Israel Naba Ahab mɛ. Pumpɔreŋɔ nɔdɛ’ɛsadoma yuun yele Ahab ti a wan zabɛ nyaŋɛ Aramot Gilead ge Yehowa nɔdɛ’ɛsa Mikaiah me yuun yeti too wan sige a zuo. Wuu Mikaiah n yuun nyɛ wɔ̃sum poan se’em la, Yehowa yuun basɛ ti a maleka wa’ana dɛna la “pumpɔreŋɔ vo’osum” bɔna Ahab nɔdɛ’ɛsadoma la nuuren. Wana wa vuurɛ dela, maleka wa dekɛ la a paŋa basɛ ti ba tɔɣera sɛla n daɣɛ yelemɛŋɛrɛ, tɔɣera la bamea n boti sɛla la Ahab me n boti a wum sɛla. La boi bim ti ba yuun kaɣɛ Ahab mɛ ge a yuun tuɣum bɔta la ba pumpɔreŋɔ la nyaa ta ki bala zuo.​—1Na 22:1-38; 2Ye 18.

Vo’osum Poan Yɛla

w21.10-E 3 ¶4-6

Bem N Pa’alɛ Ti Nɛra Sirum Basɛ A Be’em?

Yehowa n yuun di’ise suure se’em la yuun wa’an de ba’asegɔ mɛ. A yuun tum Eliya ti a ta tɔɣɛ gãkerɛ yele bo Ahab la Yezebel. Ba yizuo la za’a wan suɛ. Eliya yetɔɣum wa yuun daam Ahab mɛ! Ge yele pakerɛ la dela, buraa wa n zɛkeri amea la yuun “sirege a mea mɛ.”​—1 Na. 21:19-29.

La boi bim ti Ahab yuun sirege a mea mɛ sankaŋa la ge eŋa n yuun eŋɛ se’em deni pooren la yuun pa’alɛ ti a yuun ka basɛ a be’em la. A yuun ka tiregɛ yese Baal pu’usegɔ a sɔ’ɔlum la poan. A me yuun ka basɛ ti Yehowa pu’usegɔ tɔla nɛŋa. Ahab yuun le eŋɛ la yɛla ase’a pa’alɛ ti a yuun sirum ka basɛ a be’em la.

Pooren, Ahab n yuun ta beem Yuda nasoŋa Yehosafat ti a wa’ana soŋɛ en ti ba zabɛ la Siriadoma la, Yehosafat yuun yeti a basɛ ti ba soke Yehowa nɔdɛ’ɛsa la yia. Ahab yuun nan zaɣesɛ mɛ ge yeti: “Buraa kayima gee ya ti to wan ta’an soke Yehowa bisɛ ge mam yaɛ en mɛ se’ere n sɔi la a ka malum puta yelesonɛ bɔ’ɔra mam saŋa woo san daɣɛ la be’em ma’a.” Hali la bala za’a la, ba yuun kelum sɔsɛ mɛ la nɔdɛ’ɛsa Mikaiah. Wuu to puɣum mina se’em la, Naayinɛ nɔdɛ’ɛsa la yuun purɛ la be’em bo Ahab! La wan tuɣum deni ti Ahab zusɛ Yehowa ti a di sugeri bo en la, a yuun bo la nɔɔrɛ ti ba nyɔkɛ nɔdɛ’ɛsa la ta paɣɛ. (1 Na. 22:7-9, 23, 27) La boi bim ti Naba wa yuun nyaŋɛ basɛ ti ba paɣɛ Yehowa nɔdɛ’ɛsa wa mɛ ge a yuun ka ta’an gu ti nɔdɛ’ɛsa la n tɔɣɛ sɛla biŋe la da tum. Ahab yuun nyaa ki la zaberɛ la poan.​—1 Na. 22:34-38.

OCTOBER 24-30

NAAYINƐ TUULUM YƐLA | 2 NADOMA 1-2

“A Eŋɛ La Makesonɛ Kumesegɔ Poan”

w15-E 4/15 13 ¶15

Keendoma N Kumeseri Basɛba Se’em Ti Ba Tuna Soŋa

Elisa, se’em n yuun tee soe Eliya la, yele la pa’alɛ la mabiburaasi n wan ta’an bɔ’ɔra keendoma n kumesɛ gilema se’em. Eliya la Elisa n yuun ta kaɛ nɔdɛ’ɛsadoma la n yuun boi Yeriko ba’asɛ la, ba nyaa yuun keŋɛ paɛ la Yordan Kolaa la. Bilam ti “Eliya yɛɛ a fuo, nyure ku, dekɛ ŋmɛ ko’om la zuo, ti ko’om la yelege buyi gã’a zuɔ la gɔbega.” Ba yuun yakɛ ba’asɛ la, buraasi wa yuun kelum “sɔsera mɛ ge kena.” La niɛ peelum ti, Elisa yuun ka ti’isɛ ti eŋa nyaa mi sɛla woo mɛ. Elisa yuun kelum kɛlesa a pa’alegɔdaana la pa’alegɔ mɛ ta paɛ se’em ma’a ti Eliya yuun keŋɛ la. Sabeeo kãtɛ n yuun nyaa zɛɛ Eliya keŋɛ. Pooren ti Elisa yuun lebe paɛ Yordan Kolaa la, a yuun dekɛ la Eliya fuo la ŋmɛ ko’om la ge kaasɛ yeti: “Yehowa Eliya Naayinɛ la bɛɛ?” Ti ko’om la yuun yelege.​—2 Na. 2:8-14.

w15-E 4/15 13 ¶16

Keendoma N Kumeseri Basɛba Se’em Ti Ba Tuna Soŋa

Hon daalɛ basɛ ti, yelekiriga sɛka ti Elisa yuun pɔsɛ tum la kɔ’ɔn dɛna la Eliya n yuun tum yelekiriga sɛka la taaba? Beni n sɔi ti yele wa pakɛ tɔ? Daanse’ere, Elisa yuun ka ti’isɛ ti eŋa n nyaa boi nɛŋa la zuo la, a ta’an pɔsɛ tɛɛra yɛla bilam bilam. Ge Elisa n yuun kelum tuna a tuuma la wuu Eliya n yuun tuni de se’em la pa’alɛ ti Elisa yuun tari gilema bɔ’ɔra a pa’alegɔdaana wa mɛ, bala me yuun dela yelesonɛ bɔ’ɔra Elisa nɔdɛ’ɛsa tadaandoma la. (2 Na. 2:15) Pooren, se’em ma’a ti Elisa yuun dekɛ yuun 60 tum a nɔdɛ’ɛsa tuuma la, Yehowa yuun basɛ ti a tum yelekirisi zo’e zo’e mɛ gaŋɛ Eliya. Ba san kumesa hɔ zina wa ho wan ta’an zamesɛ la bem, yele wa poan?

Vo’osum Poan Yɛla

w05-E 8/1 9 ¶1

Yi’i Nadoma Gɔŋɔ La Yelekpina

2:11​—“Saazuo” kani n bala ti “sabeeo kãtɛ ɔbegɛ Eliya zɔna” la? La daɣɛ saazuo mɛnka la ti to nyɛta ti la bɔna zãzaarɛ la bii saazuo sɛka ti Naayinɛ la a malesi la bɔna bim la. (Tɛɛnhegɔ 4:19; Yooma 11:4; Matu 6:9; 18:10) “Saazuo” sɛka ti Eliya yuun zom la dela sangbama la zuin zuin sa. (Yooma 78:26; Matu 6:26) Bugum toroko la n yuun ɔbegɛ Eliya zɔna la, ku yuun tari en keŋɛ la tingɔŋɔ wa bɔberɛ de se’ere ti a ta bɔna bilam saŋa fii wa. Hali yuuma pooren, Eliya yuun gulesɛ gɔŋɔ mɛ bo Yuda naba Yehoram.​—2 Yelebiŋ’a 21:1, 12-15.

OCTOBER 31–NOVEMBER 6

NAAYINƐ TUULUM YƐLA | 2 NADOMA 3-4

“To’e Ho Bia La”

w17.12-E 4 ¶7

“Mam Mi Ti A Wan Isige”

Kum isigere se’ere n pa’asɛ buyi ti Gulesegɔ la tɔɣɛ de yele dela mina ti nɔdɛ’ɛsa Elisa, se’em n yuun tee soe Eliya la, yuun eŋɛ la. Israel pɔka n boi Sunem tiŋa dɛna nɛrezure la yuun to’e Elisa mɛ soŋa soŋa. Naayinɛ yuun doose la nɔdɛ’ɛsa wa poan kã bo pɔka wa n ka dɔɣeri la, la a sira ti ba dɔɣɛ budibila. Yuuma fii pooren ti bia wa yuun ki. Yeen ti’isɛ bisɛ a ma wa suure n wan sa’am se’em. Pɔka wa sira yuun bo en yɔ’ɔ mɛ ti a keŋɛ wuu miila 19 (km 30) ta paɛ Elisa zɛ’an Karmel Zoore la zuo. Nɔdɛ’ɛsa wa yuun tum la a tuuntuna Gehazi ti a diŋɛ keŋɛ Sunem ti bamam nyaa wa’an pooren na. Gehazi yuun ka nyaŋɛ isige bia wa kum poan. Denɛ pooren ti pɔka wa suure n sa’am la nyaa doose Elisa paɛ na.​—2 Na. 4:8-31.

w17.12-E 4 ¶8

“Mam Mi Ti A Wan Isige”

Sunem yire la poan, Elisa yuun ze’ele la kum la zɛ’an nyaa zusɛ. Yelekiriga la dela, bia wa n ki la yuun le vo’e mɛ nyaa naɛ la a ma wa suure n sa’am la! (Kaalɛ 2 Nadoma 4:32-37.) Daanse’ere a yuun tiɛ la Hana n yuun zusɛ Naayinɛ, se’em ma’a ti a yuun dɔɣɛ Samuel nyaa tari en wa’ana ti a tuna suɣerɛ la poan ge yeti: “Yehowa . . . n basɛ ti nɛra sigera Yɔɔ poan ge me isigera nɛra.” (1 Sam. 2:6) La niɛ peelum ti, Naayinɛ yuun isige bia wa n boi Sunem wa mɛ ti la pa’alɛ ti A tari paŋa n wan ta’an isige nɛreba kum poan.

Vo’osum Poan Yɛla

it-2-E 697 ¶2

Nɔdɛ’ɛsa

“Nɔdɛ’ɛsadoma La Dayɔɔsi.” Wuu Gesenius’ Hebrew Grammar gɔŋɔ la n pa’alɛ se’em la (Oxford, 1952, gɔn. 418), Hebru yelebire ben (dayɔa) bii benehʹ (dayɔɔsi) ta’an dɛna “nɛra n laɣum pa’asɛ tigere bii tigesego (bii buuri) poan.” (Dekɛ makɛ Ne 3:8, n yeti “nɛra n laɣum maala kaam somɔ” pa’alɛ ti a dela “sɛba n maali kaam somɔ la dayɔa.”) “Nɔdɛ’ɛsadoma la dayɔɔsi” ta’an ze’ele bo sɛba ti ba loe ti ba kumesɛ ba bii nɛreba n pa’asɛ nɔdɛ’ɛsadoma tigesego la poan. Ba tɔɣɛ nɔdɛ’ɛsadoma tigesego wa yele ti ba yuun boi la Betel, Yeriko la Gilgal. (2Na 2:3, 5; 4:38; dekɛ makɛ 1Sa 10:5, 10.) Samuel yuun biseri la Aramah tiŋa nɛreba (1Sa 19:19, 20), ti la ana wuu Elisa me yuun tari la kpe’eŋo kaŋa mea a dabesa la poan. (2Na 4:38; 6:1-3; dekɛ makɛ 1Na 18:13.) Gulesegɔ la pa’alɛ ti ba yuun mɛ la bamea kɛ̃’a zɛ’an ge me yuun pɛmesa lɔɣɔrɔ ti la pa’alɛ ti ba vom yuun dela naana. La boi bim ti ba yuun laɣum kɛ̃’ɛra mɛ ge me tɔ̃ta ba dia bɔ’ɔra taaba ge nɛra woo yuun ta’an tara a nɔdɛ’ɛsa tuuma ti a ni keŋɛ ta tum.​—1Na 20:35-42; 2Na 4:1, 2, 39; 6:1-7; 9:1, 2.