Vom La Na’am Tuuma Zamesegɔ Viisegɔ Gɔŋɔ
© 2023 Watch Tower Bible and Tract Society of Pennsylvania
MAY 1-7
NAAYINƐ TUULUM YƐLA | 2 YELEBIŊ’A 17-19
“Gɛɛla Nɛreba Wuu Yehowa N Geele Ba Se’em La”
w17.03-E 24 ¶7
Ho Wan Basɛ Ti Ho Puti’irɛ Bɔna Gulesegɔ La Poan?
Asa dayɔa Yehosafat yuun ani la wani? A yuun tari la halesoma zo’e zo’e. Yehosafat n yuun dekɛ amea delum Naayinɛ la n sɔi ti a yuun tum tuunsoma zo’e zo’e. Ge a me yuun eŋɛ la yɛla ase’a ti yɛm ka bɔna bim. Makerɛ, a yuun basɛ ti a dayɔa di la saazuo bɔba Naba Ahab n de putɔya la bia. Yehosafat yuun naɛ mɛ la Ahab keŋɛ ta zabɛ la Siriadoma, la ka pakɛ la nɔdɛ’ɛsa Mikaiah n yuun kaɣɛ ba la. La yuun gee la fii wa la Yehosafat ki zaberɛ la poan, ti a yuun tulege lebe Yerusalem. (2 Yel. 18:1-32) Bala ti nɔdɛ’ɛsa Yehu yuun soke en yeti: ‘La ani soŋa ti ho soŋera tuunfɛ̃’ɛsadoma ge nɔŋɛ sɛba n yaɛ Yehowa?’—Kaalɛ 2 Yelebiŋ’a 19:1-3.
w15-E 8/15 11-12 ¶8-9
Ti’isa Taɣesa Yehowa Nɔŋerɛ La N Boi Wuusa La
Yehowa boti la to mina ti eŋa dela nɛresɛka n nɔŋɛ tɔ ge me ka bisera to tuure yɛla la ma’a. A kɔ’ɔn bisera la to tuunsoma la. (2 Yel. 16:9) Makerɛ, a yuun kɔ’ɔn bisera la Yuda Naba Yehosafat tuunsoma la. Saŋa kayima, Yehosafat yuun eŋɛ la sɛla ti yɛm ka bɔna bim. Eŋa la Israel Naba Ahab yuun keŋɛ ti ba ta fãɛ la Aramot Gilead, Siriadoma nu’usin. La boi bim ti pumpɔreŋɔ nɔdɛ’ɛseba kɔbesinaasi (400) yuun yeti Ahab wan zabɛ nyaŋɛ ge Yehowa yelemɛŋɛrɛ nɔdɛ’ɛsa Mikaiah yuun yeti ba wan nyaŋɛ en. Ahab yuun ki la zaberɛ la poan ge ti Yehosafat yuun zɔ pĩɛ. Eŋa n yuun lebe Yerusalem la, Naayinɛ nɔdɛ’ɛsa yuun zɛregɛ en mɛ la eŋa n soŋɛ Ahab la. Ge la bala za’a la, Hanani dayɔa Yehu n de nɔdɛ’ɛsa la yuun yele Yehosafat yeti: ‘Yelesoma boi ho poan mɛ.’—2 Yel. 18:4, 5, 18-22, 33, 34; 19:1-3.
Yehosafat n yuun di na’am la, la yuun ka yue ti a basɛ ti nabiisi, Levidoma la malemadoma doose Yuda tisi la woo poan pa’ala nɛreba la Yehowa Lɔɔ. Ba yuun pa’alɛ nɛreba la mɛ soŋa soŋa, ti hali tinse’esi n kaɛ ba mum la nɛreba yuun zɔta Yehowa. (2 Yel. 17:3-10) La boi bim ti Yehosafat yuun tum la gberetuunɛ ge Yehowa yuun kelum tɛ̃ra a tuunsoma la mɛ. Yele wa n boi Baabule la poan la basɛ ti to tɛ̃ra ti la boi bim ti to ka ani ma’a ge to san yese to suure za’a pu’usa Yehowa, a wan nɔŋɛ tɔ wuusa.
Vo’osum Poan Yɛla
w17.03-E 20 ¶10-11
Pu’usa Yehowa La Ho Suure Za’a!
Asa dayɔa Yehosafat yuun ‘doli la a sɔ Asa nataka.’ (2 Yel. 20:31, 32) Sodeni poan? Yehosafat yuun kpemese nɛreba la giila mɛ ti ba ɛ Yehowa wuu a sɔ n yuun eŋɛ se’em la. A yuun loe la nɛreba ti ba tara ‘Yehowa Lɔɔ gɔŋɔ la’ pa’ala nɛreba la. (2 Yel. 17:7-10) Hali a yuun keŋɛ la Israel saazuo bɔba sɔ’ɔlum la ta paɛ Efraim zɔya bɔba la za’a ti a ‘ŋmɛregɛ ba suure lebe Yehowa zɛ’an.’ (2 Yel. 19:4) Yehosafat yuun dela naba ‘n eeri Yehowa la a suure za’a.’—2 Yel. 22:9.
To za’a waabi ta’an dekɛ tomea pa’asɛ Yehowa pa’alegɔ kãtɛ tuuma la poan zina beere wa. Hon lu ho suure ti ŋmarega woo ho wan pa’ala nɛreba Naayinɛ Yelesum la ge soŋɛ ba ti ba pu’usa Naayinɛ? Ho san tiregɛ, Naayinɛ wan soŋɛ hɔ ti ho ta’an pɔsɛ pa’ala nɛra Baabule la. Hon zuseri Naayinɛ yele wa poan? Hon tiregeri ti ho nyɛ nɛra ti ya zamesa Baabule la, hali saŋa ase’a ni dekɛ ho vo’osego saŋa basɛ ti ho ta’an eŋɛ bala? Wuu Yehosafat n yuun keŋɛ Efraim sɔ’ɔlum la ta soŋɛ nɛreba ti ba lebe yelemɛŋɛrɛ pu’usegɔ poan na se’em la, tomam me ta’an soŋɛ sɛba n ma’ɛ la. Leyɛ’ɛsa, tansugere keendoma ni maasum mɛ keŋɛ ta soŋɛ sɛba ti ba yese ba tansugere la poan ge nyaa pɔsɛ ita teere la.
MAY 8-14
NAAYINƐ TUULUM YƐLA | 2 YELEBIŊ’A 20-21
“Dekɛ Yamea Delum Yehowa Ya Naayinɛ La”
w14-E 12/15 23 ¶8
To Naɛ Ya Taaba Ŋmibe Ta Paɛ Tinbe’o Wa Ba’asegɔ
Naba Yehosafat saŋa la, Naayinɛ nɛreba yuun tari la dindoma n tari paŋa. Ba yuun dela ‘nɛreba zo’e zo’e’ n ze’ele tinse’esi n lɛm ba la. (2 Yel. 20:1, 2) Yelesonɛ la dela, Naayinɛ nɛreba wa yuun ka tiregɛ ti ba zabɛ la ba dindoma wa la bamea paŋa ge ba yuun dekɛ bamea delum la Yehowa. (Kaalɛ 2 Yelebiŋ’a 20:3, 4.) La me daɣɛ ti nɛra woo yuun ti’iseri la eŋa n wan dekɛ amea delum Naayinɛ se’em ti a soŋɛ en. Baabule la yeti: ‘Yuda buraasi za’a daa ze la Yehowa nɛŋan la ba bilɛɛsi, ba pɔɣeba la ba kɔma.’ (2 Yel. 20:13) Bunbilipaalesi la bunkureba za’a yuun tari la sakerɛ dɔla Yehowa pa’alegɔ ti Yehowa me yuun te’ele ba, ba dindoma nu’usin. (2 Yel. 20:20-27) Wana wa dela makesonɛ bɔ’ɔra tomam n de Naayinɛ nɛreba. La nari ti to ni naɛ taaba ta’an ŋmibe yeledaaŋɔ poan.
w21.11-E 16 ¶7
Yamam Sɛba N Nan Di Taaba La—Basɛ Ya Ti Yehowa Pu’usegɔ Dɛna Ninmɔ’ɔrɛ Ya Vom Poan
Yehowa yuun doose la Levi nɛra ayima yu’urɛ n de Yahaziel poan tɔɣɛ bo Yehosafat. Yehowa yuun yeti: ‘Yeen maasum yamea zɛ’a ge nyɛ Yehowa n wan zabɛ ya zuo se’em.’ (2 Yel. 20:13-17) Daɣɛ nɛreba n yuun ni zabera se’em n bala! La yuun daɣɛ nɛra n dekɛ amea puti’irɛ tɔɣɛ yele ana wa ge la yuun ze’ele la Yehowa zɛ’an na. Yehosafat yuun dekɛ amea delum la Naayinɛ ge eŋɛ sɛla woo ti a yele ba la. Se’em ma’a ti eŋa la a nɛreba la yuun kena tu’usa ba dindoma la, a yuun ka basɛ ti soogɛpa n mi zaberɛ la bɔna nɛŋa ge a yuun basɛ ti yuum yuuneba la n ka tari zaberɛ lɔɣɔrɔ la tuɣum bɔna nɛŋa. Yehowa yuun ka basɛ Yehosafat; A yuun zabɛ nyaŋɛ ba dindoma la mɛ.—2 Yel. 20:18-23.
Vo’osum Poan Yɛla
it-1-E 1271 ¶1-2
Yehoram
Daanse’ere Yehoram pɔɣa Ataliah halebe’ero la me n sɔi ti Yehoram yuun ka tɔɣesa a sɔ Yehosafat tontɔɔ tuuma la. (2Na 8:18) Yehoram yuun ku la a suurɔ bayoobe, la Yuda nabiisi basɛba ge me yuun basɛ ti a nɛreba la zaɣesɛ Yehowa ge kaabera baɣa. (2Ye 21:1-6, 11-14) A bisega la poan, suma’asum yuun ka boi la fii me. Yia, Edom yuun eŋɛ la kpenkpasi, ti Libna me yuun ka sakɛ bo Yuda. (2Na 8:20-22) Nɔdɛ’ɛsa Eliya yuun gulesɛ la gɔŋɔ bo Yehoram ge kaɣɛ en yeti: ‘Bisɛ! Yehowa yeti a ŋmɛ la ho nɛreba wa la nɔyalegerɛ, ho dayɔɔsi, ho pɔɣeba la ho lɔɣɔrɔ za’a. Ho wan bɛ̃ puurɛ bã’a ti ka tara ho daarewoo ti ho nyuurɔ ta foe yese na.’—2Ye 21:12-15.
Bala mea n yuun sirum eŋɛ. Yehowa yuun bo yɔ’ɔ ti Arabdoma la Filistidoma zabɛ nyaŋɛ tiŋa la ge dekɛ Yehoram pɔɣeba la a dayɔɔsi keŋɛ yamenɛ poan. Yehoram nu’usikãarɛ Yehoahaz (se’em n le dɛna Ahazia) la ma’a ti Naayinɛ yuun bo yɔ’ɔ ti a pĩɛ. Naayinɛ n yuun biŋe Na’am nɔbiŋere la David la n sɔi ti a yuun eŋɛ bala. ‘Wana woo n tole la, Yehowa ŋmɛ Yehoram mɛ la puurɛ bã’a n ka tari tibegɔ.’ Yuuma ayi pooren ti ‘a nyuurɔ foe yese na’ ti a nyaa ta ki. Putodaana wa n yuun ki se’em n bala ti ‘se’em ka kele.’ Ba yuun pĩ en la David Tiŋa poan ‘ge daɣɛ nadoma yɔɔrɔ la poan.’ A dayɔa Ahazia n yuun soe dɛna naba.—2Ye 21:7, 16-20; 22:1; 1Ye 3:10, 11.
MAY 15-21
NAAYINƐ TUULUM YƐLA | 2 YELEBIŊ’A 22-24
“Yehowa Kã’ari Bɔ’ɔra Sɛba N Tari Sukpe’ene Mɛ”
w09-E 4/1 24 ¶1-2
Zɔtɔbe’ero N Yuun Basɛ Ti Yoas Basɛ Yehowa
LA YUUN daɣɛ sansɛka n ani soŋa bɔ’ɔra Yerusalem n yuun de tinsɛka ti Naayinɛ pu’usegɔ deo bɔna la. Ba yuun ku la Naba Ahazia. La dela yelepakerɛ la Ahazia ma Ataliah n yuun eŋɛ sɛla bala pooren. A yuun basɛ ti ba ku la Ahazia dayɔɔsi n de amea yaasi! Hon mi sɛla n sɔi?— A yuun eŋɛ bala ti eŋa tee soe bisera.
Ge Ataliah yaasi la ayima yu’urɛ n de Yoas yuun ka ki ge ti a mayaaba la puɣum ka mina. Ho wan bɔta ti ho baŋɛ la yuun eŋɛ se’em ti a ka ki la?— Yoas puɣera n de Yehoseba n yuun suɣɛ en Naayinɛ pu’usegɔ deo la poan. A sira Yehoiada n yuun de Malema Nɛŋadaana la zuo ti a yuun ta’an eŋɛ bala. Bamam bayi la n yuun bisɛ Yoas ti daaŋɔ ka paɛ en.
w09-E 4/1 24 ¶3-5
Zɔtɔbe’ero N Yuun Basɛ Ti Yoas Basɛ Yehowa
Ba yuun suɣɛ Yoas la pu’usegɔ deo la poan paɛ yuuma ayoobe. Ba yuun pa’alɛ en la Yehowa Naayinɛ n ani se’em la a lɔɔ la za’a. Yoas n yuun ta paɛ yuuma ayopɔi la ti Yehoiada yuun bobe Yoas ti a dɛna naba. Ho wan bɔta ti ho baŋɛ Yehoiada n yuun eŋɛ bala se’em, la sɛla n yuun paɛ Yoas mayaaba Ataliah n tari putoo la?—
Yehoiada yuun yi la soogɛpa n boi ba to’ore n yuun gu’uri Yerusalem nadoma sankaŋa la. A yuun yele ba eŋa la a pɔɣa n fãɛ Naba Ahazia dayɔa la se’em mɛ. Yehoiada yuun dekɛ Yoas pa’alɛ soogɛpa wa mɛ, ti ba baŋɛ ti eŋa n sirum nari ti a dɛna naba. Ba yuun nyaa maasum ti ba eŋɛ la sɛla.
Yehoiada yuun tari Yoas yese mɛ na ge dekɛ muŋa vuge en. Bala ti nɛreba la yuun “pɔsɛ pa’ara nu’usi, yɛta yeti: ‘Vɔna wuusa naba!’” Soogɛpa la yuun zɔ kaɛ la Yoas ti ba te’ele en. Ataliah n yuun wum nɛreba la n nyɛɛni la, a yuun zɔ yese me na ge ka sakɛ. Ge Yehoiada yuun bo la nɔɔrɛ ti soogɛpa la ku Ataliah.—2 Na. 11:1-16.
it-1-E 379 ¶5
Laarɛ, Laarɛ Zɛ̃’ɛsi
Ba yuun na’asɛ Malema Nɛŋadaana Yehoiada n de tontɔɔdaana la mɛ ge laɛ en ‘David Tiŋa la poan, nadoma yɔɔrɔ poan.’ Eŋa ma’a n daɣɛ nabia ge ti ba laɛ en zɛ̃kana poan.—2Ye 24:15, 16.
Vo’osum Poan Yɛla
it-2-E 1223 ¶13
Zekaria
Malema Nɛŋadaana Yehoiada dayɔa. Yehoiada n yuun ki la, Naba Yoas yuun basɛ yelemɛŋɛrɛ pu’usegɔ mɛ. A yuun ka le kɛlesa Yehowa nɔdɛ’ɛseba la ge tuɣum kɛlesa ka’aŋɔ yooro. Zekaria n de Yoas puɣera bia la (2Ye 22:11) yuun kaɣɛ nɛreba la mɛ ge ba yuun ka tee ge tuɣum lobe en la kuga pu’usegɔ deo zinzaka la poan. Zekaria n yuun ta pɔ̃ra kum la, a yeti: ‘Yehowa, suure bisɛ yele wa ge lerege dɛ.’ Naayinɛ yuun kelese nɔdɛ’ɛsa wa yetɔɣum la mɛ se’ere n sɔi la Siria tiŋa yuun daam Yuda mɛ paa ge ti Yoas yamesi bayi yuun ku en, ‘eŋa n ka’ɛ Yehoiada n de malemadaana la dayɔɔsi ziim la zuo.’ Greek Septuagint la Latin Vulgate la yeti ba yuun ku Yoas ti ba lerege la Yehoiada “dayɔa” ziim. Ge Masoretdoma gulesegɔ la, la Syriac Peshitta la yeti “dayɔɔsi.” Daanse’ere ba yeti “dayɔɔsi” ti la pa’alɛ ti Yehoiada dayɔa Zekaria n yuun de nɔdɛ’ɛsa ge kelum dɛna malemadaana la yuun dela nɛrezure ge tara tuulum.—2Ye 24:17-22, 25.
MAY 22-28
NAAYINƐ TUULUM YƐLA | 2 YELEBIŊ’A 25-27
“Yehowa Tari Zo’e Mɛ N Wan Bo Ho Gaŋɛ Bala”
it-1-E 1266 ¶6
Yoas
Yoas yuun dekɛ la a soogɛpa tusekɔbega haɛ bo Yuda naba ti ba zabɛ la Edomdoma. Ge ‘Naayinɛ nɛra’ yetɔɣum zuo ti ba yuun basɛ ti soogɛpa wa lebe. La boi bim ti ba yuun te’ele yɔ soogɛpa wa la salenpɛɛlesi ligebɔɔresi kɔbega ($660,600) (Gh₵6,573,000.00) ge ba sunsɔa yuun nyie mɛ la ban yele ba ti ba lebe kule la. Daanse’ere ba yuun bisɛ ti ba kan nyɛ ban wan zabɛ ni fã lɔɣeseto la. Bala la, ban yuun lebe saazuo bɔba la, ba yuun ku nɛreba mɛ tiŋanɔɔrɛ sɔ’ɔlum la poan ge fã ba lɔɣɔrɔ, kɔ’ɔn zeele Samaria (daanse’ere n de zɛsɛka ti ba yuun bɔna la) ta paɛ Bet Horon.—2Ye 25:6-10, 13.
w21.08-E 30 ¶16
Sore Kani Poan Ti Ho Wan Ta’an “Lem” Yehowa Itisoŋɔ La?
Kuura homea tuna bɔ’ɔra Yehowa. La ka pa’alɛ ti to san bɔta ti Yehowa puurɛ pee, la nari ti to basɛ sɛla woo ti to nɔŋɛ. (Pa. 5:19, 20) Ge to san ka bɔta ti to tuna Naayinɛ tuuma zɔ’ɔra, ton ka boti to kuura tomea la zuo, to wan tue wuu Yezu makerɛ la poan ti buraa la tue se’em la. Buraa la yuun boti la a vom ana lumta ge tamɛ Naayinɛ yele. (Kaalɛ Luke 12:16-21.) Mabia Christian n kɛ̃’ɛri France tiŋa yeti, “Mam daa ka tari n tɛm la n paŋa za’a tuna bɔ’ɔra Yehowa la n deodoma.” Eŋa la a pɔɣa daa boti la ba pɔsɛ tuna sore ŋmɛ’a tuuma. La daa dela ba basɛ tuunse’a ti ba tuna ta’an eŋɛ bala. Ba daa pɔsɛ tuna la duusego tuuma fii ta’an bisa bamea. Ba me daa basɛ ti ban tari sɛla la seke ba. Nyuurɔ boi ba tuuma wa poan? Christian yeti, “Tomam tari pupeelum mɛ to na’am mɔɔlegɔ poan nananawa. To puurɛ me pee mɛ la ton nyɛti nɛreba ti ba zamesa Yehowa yɛla la.”
Vo’osum Poan Yɛla
w07-E 12/15 10 ¶1-2
Hon Tari Nɛra Ti Ho Bɔta Ti Ho Tɔɣesa En Vo’osum Poan?
UZIA yuun dela yuun pia la ayoobe ge dɛna Yuda sɔ’ɔlum la naba. A yuun di na’am gaŋɛ yuun pinuu mɛ, kɔ’ɔn pɔsɛ yuun kɔbesiwɛi G.Y.B. ba’asegɔ bɔba ta paɛ yuun kɔbesinii G.Y.B. pɔsega bɔba. Kɔ’ɔn pɔsɛ Uzia n yuun de bunbila la, ‘a tuuma yuun tiɣɛ Yehowa nini mɛ.’ Bem n yuun soŋɛ en ti a tuna tontɔɔ tuuma wa? Baabule la yeti: ‘Ti Uzia mɔ’ɛ nini ɛ Naayinɛ, sansɛka ti nɔdɛ’ɛsa Zekaria n de mina n pa’ali nɛreba ti ba zɔta yelemɛŋɛrɛ Naayinɛ la nan vɔna la. Eŋa n mɔ’ɛ nini ɛɛra Yehowa la zuo ti yelemɛŋɛrɛ Naayinɛ la nu’o paɣa a zuo.’—2 Yelebiŋ’a 26:1, 4, 5.
To ka ba’ɛ mina naba wa ka’ana n de Zekaria la yele zo’e, san daɣena Baabule la n tɔɣɛ a yele kalam wa. Ge Zekaria n de ‘mina n pa’ali nɛreba ti ba zɔta yelemɛŋɛrɛ Naayinɛ la’ yuun soŋɛ naba wa mɛ ti a ita sɛla n ani soŋa. The Expositor’s Bible la yeti Zekaria yuun dela “buraa n bĩ vo’osum poan, mina tuulum yɛla, la pa’alegɔ.” Baabule gɔnmi’ila ayima tɔɣɛ Zekaria yele yeti: ‘A yuun dela nɛresonkɔ n tari yɛm, zɔta Naayinɛ ge me mina yetɔɣebiŋ’a soŋa soŋa. La ani wuu a yuun soŋɛ Uzia mɛ paa.’
MAY 29–JUNE 4
NAAYINƐ TUULUM YƐLA | 2 YELEBIŊ’A 28-29
“Ho Dɔɣereba San Puɣum Ka Uge Ho Soŋa, Ho Wan Ta’an Pu’usa Yehowa”
w16.02-E 14 ¶8
Tɔɣesa Yehowa Zɔdoma La
Hezekia yuun ka ani wuu Arut, se’ere n sɔi la ba yuun dɔɣɛ en la tinsɛka nɛreba n pu’useri Yehowa poan. Ge la daɣɛ Israeldoma za’a n yuun pu’useri Yehowa. Hezekia sɔ Naba Ahaz dela ayima. Putɔya wa yuun basɛ ti Yuda sɔ’ɔlum nɛreba la kaabera la baɣa, hali a yuun ka bo Yehowa pu’usegɔ deo la n boi Yerusalem la gilema. La yuun kpe’em bo Hezekia mɛ a bunbilimen, se’ere n sɔi la a sɔ yuun nyɔ a suurɔ basɛba mɛ kaabɛ bo baɣarɛ!—2 Na. 16:2-4, 10-17; 2 Yel. 28:1-3.
w16.02-E 14 ¶9-11
Tɔɣesa Yehowa Zɔdoma La
Hezekia yuun ta’an eŋɛ sunsɔa bii a basɛ Naayinɛ pu’usegɔ. Nɛresɛba ti wuŋerɛ kana taaba puɣum ka tabelɛ paɛ ba ta’an ti’isa ti ba tari buurɔ ti ba ‘eŋɛ sunsɔa la Yehowa’ bii a tigere la. (Mag. 19:3) Nɛreba basɛba ti’isɛ ti ban ka uge ba soŋa la n sɔi ti bamam tuna tuunbe’ero bii tɔɣesa ba dɔɣereba tuunbe’ero. (Eze. 18:2, 3) Bala dela yelemɛŋɛrɛ yoi?
Hezekia vom poan yɛla pa’alɛ ti la daɣɛ yelemɛŋɛrɛ la fii me! La daɣɛ Yehowa n basɛ ti be’em paara nɛreba. Bala, la ka nari ti to ita sunsɔa la Yehowa. (Yob 34:10) Yelemɛŋɛrɛ, dɔɣereba sareŋɔ ta’an soŋɛ ba kɔma bii sa’am ba. (Mag. 22:6; Kol. 3:21) Ge bala ka pa’alɛ ti ban uge nɛra se’em n wan pa’alɛ a vom n wan ana se’em. Yehowa bo to la tuulum bo’olum n de ton wan ta’an loe to wan eŋɛ sɛla, la to wan dɛna nɛresɛba. (Tɛɛ. 30:19) Hezekia yuun dekɛ bo’olum wa tum tuuma la wani?
La boi bim ti Hezekia yuun dela Yuda tiŋa naba ayima tuuma n fɛ̃’ɛ paa dayɔa ge a yuun ta dɛna la nasonkɔ. (Kaalɛ 2 Nadoma 18:5, 6.) Yelemɛŋɛrɛ, a sɔ yuun ka tari halesoma ge nɛreba basɛba yuun boi mɛ tara halesoma. Isaiah, Mikah la Hosea yuun dela nɔdɛ’ɛseba sankaŋa la. Ti’isɛ bisɛ Naba Hezekia n yuun mɔ’ɛ nini zamesa nɔdɛ’ɛseba wa yɛla se’em, ta’an tara Yehowa ka’aŋɔ tuna tuuma. Bala la, Hezekia yuun basɛ ti yelemɛŋɛrɛ pu’usegɔ malum bɔna mɛ. A yuun eŋɛ la maaseŋɔ sa’am baɣa tiŋa la poan, nyɔ be’em bo’olum bo nɛreba la ge me basɛ ti pu’usegɔ deo la le ana filam. (2 Yel. 29:1-11, 18-24; 31:1) Asiria naba Senakerib n yuun boti a zabɛ la Yerusalem la, Hezekia yuun eŋɛ pa’alɛ ti a tari sukpe’ene la sakerɛ. A yuun dekɛ amea delum la Naayinɛ ti a fãɛ ba ge yuun kpemese a nɛreba la giila la a yetɔɣum, la a makesonɛ. (2 Yel. 32:7, 8) Pooren, ban yuun ka’am Hezekia la eŋa n zɛ̃kɛ amea la, a yuun sirege amea mɛ ge tee. (2 Yel. 32:24-26) La niɛ peelumi ti Hezekia yuun ka basɛ ti ban uge en se’em la sa’am en. Ge a yuun eŋɛ pa’alɛ ti a dela Yehowa zɔ ti tomam me wan ta’an tɔɣesɛ en.
Vo’osum Poan Yɛla
w12-E 2/15 24-25
Natan Yuun Dela Buraa N Nɔŋɛ Yelemɛŋɛrɛ Pu’usegɔ
Natan n yuun de Yehowa yameŋa la zuo, a puurɛ yuun pee mɛ ti a sakɛ bo David n yuun boti a mɛ pu’usegɔ deo la. Yeledena wa poan, Natan yuun tɔɣɛ la eŋa mea n boti sɛla ge daɣɛ Yehowa puti’irɛ. Yu’unkuŋɔ, Yehowa yuun tum a nɔdɛ’ɛsa wa ti a ta yele David ti daɣɛ eŋa n wan mɛ Yehowa pu’usegɔ deo la. David dayɔa n wan mɛ pu’usegɔ deo la. Ge Natan yuun yeti Naayinɛ biŋe la nɔɔrɛ la David, la wan eŋɛ se’em ti David na’am kuka la ‘bɔna bala wuusa.’—2 Sa. 7:4-16.
Natan n yuun sakɛ ti David n wan mɛ pu’usegɔ deo la, yuun ka makɛ la Naayinɛ n boti sɛla. Nɔdɛ’ɛsa wa yuun ka nyɔm ge a yuun sirege la amea, sakɛ doose Naayinɛ puti’irɛ n de sɛla. Bisɛ bala n de makesonɛ se’em bɔ’ɔra tɔ Naayinɛ san ka’am tɔ! Nɔdɛ’ɛsa Natan n yuun eŋɛ sɛla bala pooren la pa’alɛ ti Naayinɛ puurɛ yuun kelum pee la en mɛ. La ta’an dɛna ti Yehowa n yuun tɔɣɛ bo nɔdɛ’ɛseba Natan la Gad ti ba pa’alɛ David eŋa n wan tigese yuum yuuneba tusa anaasi (4,000) pu’usegɔ deo la poan se’em.—1 Yel. 23:1-5; 2 Yel. 29:25.
JUNE 5-11
NAAYINƐ TUULUM YƐLA | 2 YELEBIŊ’A 30-31
“Laɣesegɔ Yele Pakɛ To Mɛ”
it-1-E 1103 ¶2
Hezekia
A Yuun Tuulegeri Mɛ Yelemɛŋɛrɛ Pu’usegɔ Poan. Hezekia n yuun de yuun pisiyi la anuu ge zi’ire na’am kuka la zuo la, a yuun eŋɛ pa’alɛ bilam bilam ti a tuulegeri mɛ Yehowa pu’usegɔ poan. Yia la, a yuun malum yu’ɛ pu’usegɔ deo la mɛ ge maalɛ ka. Pooren, a yuun yi la Levidoma, la malemadoma la ge yele ba yeti: ‘Nananawa, la boi la mam suuren ti n biŋe nɔɔrɛ la Yehowa, Israel Naayinɛ la.’ Ba yuun biŋe la nɔɔrɛ ti ba wan tara yelemɛŋɛrɛ ti la ana wuu ba malum biŋe la Lɔɔ nɔbiŋere la ti ba yuun zaɣesɛ ka dɔla la Yuda tiŋa poan. A yuun tiregɛ mɛ tigese Levidoma la ba tuuma poan ge me yuun basɛ ti ba le pɔsɛ maala bunŋmɛ’ɛla, tara yuuna pɛ̃ɣera Naayinɛ. La yuun dela Nisan, ŋmaresɛka ti ba dɛ’ɛna Azɔɔtole De’eŋo la ge pu’usegɔ deo la, malemadoma la, la Levidoma la yuun ka ani filam sankaŋa. Nisan dabesa pia la ayoobe poan ti ba yuun basɛ ti pu’usegɔ deo la le ana filam ge tari ku lɔɣɔrɔ la lebe na. Pooren, la yuun nari ti ba eŋɛ kaabegɔ n boi de to’ore duuse Israeldoma la za’a be’em. Yia la, nabiisi la yuun tari la lɔɣɔrɔ na ti ba wan dekɛ eŋɛ kaabegɔ duuse nɛreba la be’em ge basɛ ti suɣerɛ la ana filam. Bala pooren ti nɛreba la me yuun nyɔ nyɔ’a bo’olum zo’e zo’e.—2Ye 29:1-36.
it-1-E 1103 ¶3
Hezekia
Nɛreba la n yuun ka ani filam la zuo, ba yuun ka ta’an de’em Azɔɔtole De’eŋo la sansɛka n nari poan ge lɔɔ la yuun bo yɔ’ɔ ti sɛba n ka ani filam la ta’an de’em Azɔɔtole De’eŋo la ŋmarega pooren. Hezekia yuun dekɛ la bala tum tuuma. A yuun ka yi la Yudadoma ma’a ge a yuun gulesɛ la gɔnɔ soolum yi Israeldoma sɛba n boi Beerseba ta paɛ Dan. Nɛreba zo’e zo’e yuun zɛregɛ sɛba ti a tum la mɛ ge Aser, Manase la Zebulun nɛreba basɛba yuun sirege bamea mɛ keŋɛ. Efraim la Isakar nɛreba basɛba me yuun keŋɛ mɛ. Leyɛ’ɛsa, Yehowa yamesi zo’e zo’e n daɣɛ Israeldoma me yuun keŋɛ mɛ. La yuun kpe’em mɛ bɔ’ɔra sɛba n boi saazuo bɔba sɔ’ɔlum la ge bɔta yelemɛŋɛrɛ pu’usegɔ la ti ba keŋɛ. Wuu tuuntuneba la, ba wan yaɛ ba se’ere n sɔi la buuri pia sɔ’ɔlum la yuun boi la pumpɔreŋɔ pu’usegɔ poan ge ti Asiriadoma la me daana ba.—2Ye 30:1-20; Kan 9:10-13.
it-1-E 1103 ¶4-5
Hezekia
Azɔɔtole De’eŋo la pooren, ba yuun dekɛ la dabesa ayopɔi de’em Boroboro N Ka Tari Mi’isum De’eŋo la. Nɛreba la puurɛ n yuun ba’ɛ pee ti ba de’em dabesa ayopɔi pa’asɛ. Hali la wuŋerɛ la za’a la, Yehowa yuun kã bo ba mɛ ti ‘pupeelum kãtɛ sige Yerusalem poan, pupeelum sebo taaba n ka tabelɛ bɔna Yerusalem poan ze’ele Israel naba David dayɔa Solomon saŋa na la.’—2Ye 30:21-27.
Sɛla n eŋɛ pooren la pa’alɛ ti la yuun daɣɛ la nɛreba n yeen laɣesɛ taaba la pupeelum ge la dela yelemɛŋɛrɛ pu’usegɔ n malum bɔna. Ge ti ba yuun nyaa lebe kule la, ba yuun sa’am la tuulum piila, wɔ̃rɛ kaabegɔ zɛ̃’ɛsi la kaabegɔ bimbina ge sa’am tuulum dɔɔrɔ Yuda la Benyamin za’a, hali la Efraim la Manase. (2Ye 31:1) Hezekia yuun eŋɛ la makesonɛ la eŋa n yuun wɔ̃rɛ nyɔɣum bunsɛla la ti Moses yuun maalɛ la, se’ere n sɔi la nɛreba la yuun kaaberi dɛ mɛ. (2Na 18:4) Hezekia yuun pu malemadoma la mɛ ba tuunɛ ba tuunɛ ge maasum yelese’a n wan soŋɛ pu’usegɔ deo tuuma la, la wan eŋɛ se’em ti yelemɛŋɛrɛ pu’usegɔ kɔ’ɔn bɔna. A yuun ka’am ba ti ba dɔla Lɔɔ la ge yɔɔra pia puregerɛ, la didɛɛŋa bo’olum bɔ’ɔra Levidoma, la malemadoma la. Nɛreba la yuun sakɛ mɛ la ba suure za’a.—2Ye 31:2-12.
Vo’osum Poan Yɛla
w18.09-E 6 ¶14-15
“Te Ya Han Mina Te Ya Soŋera Taaba, Tara Ya Popeelom La Ya Soŋera Taaba”
Ton ma’ɛ tomea kɛlesa nɛreba dela yele deyima ti to wan eŋɛ pa’alɛ ti to siregeri tomea. Yames 1:19 yeti to ‘kɛlesa yetɔɣum kalam.’ Yehowa mea eŋɛ la makesonɛ n ka tari makerɛ yele wa poan. (Pin. 18:32; Yos. 10:14) Bisɛ to wan zamesɛ sɛla, eŋa n yuun sɔsɛ la Moses se’em ti la bɔna Yɛhega 32:11-14. (Kaalɛ.) Yehowa yuun ka eeri Moses ka’aŋɔ ge a yuun basɛ ti Moses pa’alɛ a puti’irɛ n de se’em mɛ. Nɛra boi n wan sakɛ ma’ɛ amea kelese nɛra n tue en ge le sakɛ tum nɛra la n boti sɛla? Ge Yehowa ni ma’ɛ la amea kɛlesa sɛba n tari sakerɛ bɔ’ɔra en la.
To wan ta’an soke tomesi yeti: ‘Yehowa san sirege amea kɛlesa nɛreba wuu eŋa n yuun kelese Abraham, Arakel, Moses, Yosua, Manoa, Eliya la Hezekia se’em la, mam me ka nari ti n eŋɛ gaŋɛ bala ge na’asa n mabiisi za’a, kɛlesa ba puti’irɛ n de sɛla, hali tara ba ka’ansoŋɔ tuna tuuma? Nɛra boi mam tansugere poan bii n deo poan ti la wan nara ti n ma’ɛ n mea kelese en? Bem n nari ti n eŋɛ ge mam wan eŋɛ la bem yele wa poan?’—Pin. 30:6; Ken. 13:9; 1 Na. 17:22; 2 Yel. 30:20.
JUNE 12-18
NAAYINƐ TUULUM YƐLA | 2 YELEBIŊ’A 32-33
“Kpɛmesa Ho Mabiisi Giila Wuŋerɛ Poan”
it-1-E 204 ¶5
Asiria
Senakerib. Hezekia bisega yuun pia la anaasi poan (732 G.Y.B.) ti Sargon II dayɔa Senakerib yuun zabɛ la Yuda sɔ’ɔlum la. (2Na 18:13; Isa 36:1) Hezekia sɔ Ahaz zuo, nɛreba la yuun boi la Asiria nu’usin ge Hezekia yuun ka sakɛ bala. (2Na 18:7) Senakerib yuun zabɛ mɛ la Yuda tisi, nyaŋɛ tisi pinaasi la bayoobe (dekɛ makɛ Isa 36:1, 2). Pooren, a yuun boi la Lakis ge soolum bo Hezekia ti a yɔ salema ligebɔɔresi pitã (c. $11,560,000) (Gh₵115,022,000.00) la salenpɛɛlesi ligebɔɔresi kɔbesitã (c. $1,982,000) (Gh₵19,720,900.00). (2Na 18:14-16; 2Ye 32:1; dekɛ makɛ Isa 8:5-8.) Hali la ban yuun yɔ ligeri la za’a la, Senakerib yuun kelum tum la a tuuntuneba ti ba ta yele Hezekia yeti ba sakɛ bo eŋa ge da zabɛ. (2Na 18:17–19:34; 2Ye 32:2-20) Yehowa n yuun ku Asiria naba wa soogɛpa tusekɔbega la tusepinii la tusa anuu (185,000) yu’uŋɔ kuyima poan la, yuun pɛ̃regɛ en mɛ ti a zɔ lebe Nineveh. (2Na 19:35, 36) Bilam ti a dayɔɔsi bayi yuun ta ku en ge ti a dayɔa ayima yu’urɛ n de Esarhadon soe en dɛna naba. (2Na 19:37; 2Ye 32:21, 22; Isa 37:36-38) Diimi gulesegɔ siyi n tɔɣeri Senakerib la Esarhadon yele tɔɣɛ yele ana wa mɛ ge ba ka tɔɣɛ Asiria soogɛpa la kum yele.—FƆƆRA, Vol. 1, gɔn. 957.
w13-E 11/15 19 ¶12
Dunkeema Bayopɔi La Nɛŋadoma Banii La Vuurɛ N Dela Sɛla Bɔ’ɔra Tɔ Zina Beere Wa
Yehowa ni kɔ’ɔn bɔta la a tum ton kan ta’an tum sɛla bo to ge a ni kelum bɔta la to tum to paŋa beene. Hezekia yuun zi’ire mɛ la ‘a kpɛ’ɛndoma la a pɛɛntɛɛreba la’ kɔ’ɛ puti’irɛ ti ba wan ‘lĩ bulesi se’esi n boi yiŋa tara ko’om la. Ti Hezekia kpemese amea basɛ ti ba malum mɛ tiŋa la dangɔɔma se’a woo n lui la, mɛ limisego deto ta dangɔɔma la ge mɛ dangoone deyima yiŋa ge kure zaberɛ lɔɣɔrɔ la zaberɛ tɛ’ɛlesi kekeko.’ (2 Yel. 32:3-5) Sankaŋa la, Yehowa yuun loe la buraasi n tari sukpe’ene n de wuu Hezekia, a nabiisi, la nɔdɛ’ɛseba la ti ba bisa ge tɛ’ɛla a nɛreba la.
w13-E 11/15 19 ¶13
Dunkeema Bayopɔi La Nɛŋadoma Banii La Vuurɛ N Dela Sɛla Bɔ’ɔra Tɔ Zina Beere Wa
Hezekia n yuun eŋɛ sɛla pooren la dela ninmɔ’ɔrɛ gana eŋa n yuun lĩ bulesi bii mɛ lalesi kaɛ tiŋa la. Hezekia n yuun fabeli nɛreba la yele la zuo la, a yuun laɣesɛ ba mɛ kpemese ba giila yeti: ‘Da tari ya dabeem bii ya inya kɔ’ɔsɛ la Asiria naba la, se’em n boi la tomam la gani se’em n boi la bamam la. Sɛba n boi la en la tari la inganɛ paŋa ge se’em n boi la tomam la dela Yehowa to Naayinɛ ti a soŋɛ tɔ ge zabɛ zaberɛ wa bo to.’ Bisɛ bala n yuun kpemese nɛreba la giila se’em ti ba mina ti Yehowa wan zabɛ bo ba! Yudadoma la n yuun wum wana wa la, ti ‘ba inya kpeŋe la Yuda naba Hezekia yelesum wa.’ Daalɛ basɛ ti la dela ‘Hezekia yelesum wa’ n yuun kpemese nɛreba la giila. Wuu Yehowa n yuun tɔɣɛ biŋe doose a nɔdɛ’ɛsa la poan se’em la, Hezekia, a nabiisi, a kpɛ’ɛndoma la nɔdɛ’ɛseba Mikah la Isaiah yuun sirum dela dunkeema n biseri nɛreba la soŋa.—2 Yel. 32:7, 8; kaalɛ Mika 5:5, 6.
Vo’osum Poan Yɛla
w21.10-E 4-5 ¶11-12
Bem N Pa’alɛ Ti Nɛra Sirum Basɛ A Be’em?
Pooren, Yehowa yuun lerege Manase zusega la mɛ. A zusega la yuun pa’alɛ ti a sirum tee mɛ a suuren. Manase zusega la yuun kalum Yehowa suure mɛ ti a yuun le dekɛ na’am la bo en. Manase yuun dekɛ yɔ’ɔ wa eŋɛ pa’alɛ ti a sirum tee mɛ. A yuun eŋɛ la sɛla ti Ahab ka makɛ eŋɛ. Manase yuun tee a halɛ mɛ. A yuun yese pumpɔreŋɔ pu’usegɔ mɛ ge basɛ ti yelemɛŋɛrɛ pu’usegɔ bɔna. (Kaalɛ 2 Yelebiŋ’a 33:15, 16.) La yuun nari ti Manase tara sukpe’ene la sakerɛ se’ere n sɔi la yuuma zo’e zo’e poan ti a yuun basɛ ti a deodoma, a kpɛ’ɛndoma la a nɛreba la ka tara halesoma. Ge Manase n yuun pɔ̃ri a kum la, a yuun tiregɛ mɛ ti a maalɛ yelese’a ti a sa’am la. Daanse’ere a yuun soŋɛ a yaaŋa Yosia mɛ a bunbilimen ti a yuun ta dɛna nasonkɔ.—2 Na. 22:1, 2.
To wan ta’an zamesɛ la bem Manase yele la poan? A yuun sirege la amea ge eŋɛ yɛla ase’a pa’asɛ. A zusɛ mɛ, belum Yehowa ti a di sugeri bo en ge me yuun tee a halɛ. A yuun tiregɛ mɛ maalɛ yelese’a ti a sa’am la. A yuun mɔ’ɛ la nini pu’usa Yehowa ge yuun soŋɛ nɛreba la ti ba me ita bala. Manase yele la pa’alɛ ti hali sɛba n tum be’em n gaŋɛ nu’usi ka basɛ yoo. Yele wa basɛ ti la niɛ peelumi ti Yehowa Naayinɛ dela ‘nɛresonkɔ ge kɔ’ɔn maasum ti a di sugeri.’ (Ym. 86:5) A wan di sugeri bo sɛba n sirum basɛ ba be’em.
JUNE 19-25
NAAYINƐ TUULUM YƐLA | 2 YELEBIŊ’A 34-36
“Hon Nyɛti Nyuurɔ Zo’e Zo’e Naayinɛ Yetɔɣum La Poan?”
it-1-E 1157 ¶4
Hulda
Ba yuun boi bim maala pu’usegɔ deo la, Hilkia n de malema nɛŋadaana la yuun nyɛ la ‘lɔɔ gɔŋɔ la.’ Yosia n yuun wum yelese’a n boi gɔŋɔ la poan la, a yuun tum la nɛreba ti ba ta soke baŋɛ Yehowa puti’irɛ. Ba yuun keŋɛ la Hulda zɛ’an, ti a tɔɣɛ Yehowa yelesum bo ba ti toose’a n boi ‘gɔŋɔ’ la poan la wan sige tiŋa la zuo la ban ka nani Naayinɛ nɔya la. Hulda yuun le yeti Yosia n sirege amea Yehowa nɛŋan la zuo, a kan nyɛ toose’a n wan paɛ tiŋa la ge ba wan laɛ en ti a ga’arɛ a yɔɔ poan la suma’asum.—2Na 22:8-20; 2Ye 34:14-28.
w09-E 6/15 10 ¶20
Basɛ Ti Ho Suure Kɛ̃ Yehowa Yire La!
Naba Yosia n yuun bo nɔɔrɛ ti ba maalɛ pu’usegɔ deo la, Malema Nɛŋadaana Hilkia yuun ‘nyɛ la Yehowa lɔɔ gɔŋɔ la ti a dekɛ bo Moses la.’ A yuun dekɛ gɔŋɔ la bo la naba gɔngulesa Safan, ti eŋa me yuun kaalɛ gɔŋɔ la bo Yosia. (Kaalɛ 2 Yelebiŋ’a 34:14-18.) Bem n yuun nyaa eŋɛ? Bilam bilam ti naba la suure sa’am ti a ãasum a futo ge tum nɛreba ti ba ta soke baŋɛ Yehowa puti’irɛ. Naayinɛ yuun doose la nɔdɛ’ɛsa n de pɔka ti a yu’urɛ dɛna Hulda poan zɛregɛ Yudadoma pu’usegɔ malema ase’a. Ge Naayinɛ yuun nyɛ Yosia n yuun tiregeri ti a yese baɣa tuuma se’em la mɛ. Too wan sige tiŋa la zuo ge Yehowa puurɛ yuun kelum pee la Yosia mɛ. (2 Yel. 34:19-28) To zamesɛ la bem yele wa poan? To boti la to tɔɣesa Yosia. To boti la to ni eŋɛ kalam dɔla Yehowa pa’alegɔ ge tɛ̃ra sɛla n wan paɛ tɔ, to san ka tara yelemɛŋɛrɛ to pu’usegɔ poan. Wuu Yehowa puurɛ n yuun pee la Yosia se’em la, to tari suure lua ti Yehowa puurɛ wan pee la tɔ la ton mɔɔri se’em yelemɛŋɛrɛ pu’usegɔ poan la.
Vo’osum Poan Yɛla
w17.03-E 27 ¶15-17
Ho Wan Basɛ Ti Ho Puti’irɛ Bɔna Gulesegɔ La Poan?
To wan ta’an zamesɛ la bem, sɛla n yuun paɛ Nasonkɔ Yosia la poan? Basɛ ti to bisɛ sɛla n yuun ta’asɛ a kum. (Kaalɛ 2 Yelebiŋ’a 35:20-22.) Egypt Naba Neko yuun yele Yosia ti a ka tari yele la en ge Yosia yuun kelum keŋɛ ta ‘zabɛ’ la en mɛ. Baabule la yeti Neko yetɔɣum la yuun ‘ze’ele la Naayinɛ nɔɔren.’ Ge beni n sɔi ti Yosia yuun zabɛ la en? Baabule la ka pa’alɛ.
Ge Yosia wan eŋɛ la wani baŋɛ ti Neko yetɔɣum la ze’ele la Yehowa zɛ’an? A yuun wan ta’an soke nɔdɛ’ɛseba la ayima n de wuu Yeremia. (2 Yel. 35:23, 25) Ge Baabule la ka pa’alɛ ti a yuun eŋɛ bala. Leyɛ’ɛsa, Neko yuun ye la Karkemis ti a ta zabɛ la ‘nɛreba basɛba’ ge daɣɛ Yerusalem. Neko me yuun ka zɛregɛ Yehowa bii a nɛreba la ti la pa’alɛ ti a sa’am la Naayinɛ yu’urɛ. Bala la, Yosia yuun tue mɛ la eŋa n yuun zabɛ la Neko la. To wan ta’an zamesɛ la bem yele wa poan? Yele san paɛ tɔ, la wan ana soŋa ti to geele Yehowa puti’irɛ n de se’em de poan.
Yele san paɛ tɔ, to ni bisɛ la Baabule naresum yɛla n pa’alɛ se’em ge me dekɛ a tum tuuma. Yɛla ase’a poan, to ta’an soke keendoma la ti ba soŋɛ tɔ. La ta’an dɛna ti to puɣum geele ton mi sɛla yele la poan mɛ ge me viisɛ yele la tansugere gɔnɔ poan. Ge keema ta’an soŋɛ tɔ ti to geele Baabule naresum yɛla ase’a pa’asɛ. Makerɛ, mabipɔka mi ti la nari ti a mɔɔla yelesoma la. (Tm. 4:20) Makɛ bisɛ ti mabipɔka wa maasum mɛ ti a keŋɛ na’am mɔɔlegɔ daarɛ deyima ge ti a sira n daɣɛ sɛɛradaana bɔta ti a yee yire, a wan eŋɛ la wani? Mabipɔka la sira yele en yeti la yue mɛ ti ba ka nyɛ nɛŋa bo taaba. Bala zuo la, eŋa wan bɔta ti ba naɛ taaba eŋɛ sɛla. To mabipɔka la ta’an geele Baabule gulesegɔ se’esi n pa’alɛ ti to nana Naayinɛ ge me ɛɛra podɔleba. (Mt. 28:19, 20; Tm. 5:29) Ge la nari ti a me ti’isɛ bisɛ pɔka n nari ti a tara bɔkerɛ ge me siregera amea se’em bɔ’ɔra a sira. (Ep. 5:22-24; Flp. 4:5) A ta’an soke amea nyaa, a sira la kɔ’ɔn giisa en mɛ ti a da kena na’am mɔɔlegɔ bii a sira la yeen bɔta la a naɛ la en mɛ ti ba eŋɛ sɛla daandindaarɛ? To san bɔta ti to ita Naayinɛ n boti sɛla ge me tara putɛkeeŋa n ani soŋa, la nari ti to ita yɛla ti la makera.
JUNE 26–JULY 2
NAAYINƐ TUULUM YƐLA | EZRA 1-3
“Bo Yehowa Yɔ’ɔ Ti A Tara Ho Tuna Tuuma”
w22.03-E 14 ¶1
Hon Nyɛti Zekaria N Yuun Nyɛ Sɛla La?
NƐREBA la puurɛ n yuun pee. Israeldoma la yuun dela yamesi bɔna Babilon tiŋa yuuma zo’e zo’e ge Yehowa Naayinɛ yuun ‘kalum la Persia tiŋa Naba Kirus suure’ ti a basɛ ti ba lebe ba tiŋa. Naba la yuun bo la nɔɔrɛ ti Yudadoma la lebe ba tiŋa ta ‘malum mɛ Yehowa, Israel Naayinɛ la yire.’ (Ezr. 1:1, 3) Bisɛ la yuun de yelesonɛ se’em! Bala pa’alɛ ti Naayinɛ yelemɛŋɛrɛ pu’usegɔ wan le bɔna tinsɛka ti a dekɛ bo a nɛreba la poan.
w17.10-E 26 ¶2
Yiiri Toto La Muŋa N Te’ele Ho
Zekaria yuun mi ti Yudadoma sɛba n sakɛ lebe Yerusalem la yuun tari la sakerɛ. Bamam ti ‘yelemɛŋɛrɛ Naayinɛ la yuun kalum ba suure’ ti ba sakɛ basɛ ba yɛa la ba tuuma. (Ezr. 1:2, 3, 5) Ba yuun dekɛ la tinsɛka ti ba mina basɛ ge keŋɛ tinsɛka ti ba zo’e zo’e ka tabelɛ mina. Hali la, lan yuun kpe’em la za’a ti ba yuun kelum sakɛ keŋɛ mɛɛla n paɛ wuu tusere (km 1,600) la, pa’alɛ ti pu’usegɔ deo mɛ’a tuuma la yuun dela ninmɔ’ɔrɛ bɔ’ɔra ba.
Vo’osum Poan Yɛla
w06-E 1/15 19 ¶1
Ezra Gɔŋɔ La Yelekpina
1:3-6. Israeldoma basɛba yuun yee la Babilon. Bala mea nɔɔ ti Yehowa Sɛɛradoma zo’e zo’e kan ta’an tum tɛm woo na’am tuuma la bii keŋɛ zɛ’an n eeri soŋerɛ ta soŋɛ. Ge ba soŋeri ge kpɛmesa sɛba n tuni tɛm woo na’am tuuma la giila mɛ ge me ni yese ba suuren bɔ’ɔra bo’olum ti la soŋera Na’am mɔɔlegɔ, la podɔleba eeri tuuma la.