To ka tari pu’usegɔ nɛŋa daana yɔɔra en to tigere la poan. Wuu daami Krista tansugere la n yuun pɔsɛ se’em la, ba loe la nɛreba n kumesɛ ti ba ‘behera Naayinɛ tansugere la wuu dunkeena’ la. (Tooma 20:28) Keendoma wa dela sɛba n bi vo’osum poan bɔna nɛŋa tansugere la poan ge bisera mabiisi la ge ‘ka ete ba wuu bamam dela nɛrekareba la.’ (1 Peter 5:1-3) Ba tuni la bem tuuma bɔ’ɔra tɔ?

Ba boti la to yele ge bisa tɔ. Keendoma pa’ali ge soŋera tansugere la mɛ dɔla gulesegɔ la poan ti ba du’ura Yehowa. Ba mi ti Naayinɛ dekɛ la tum katɛ bo ba la, ­keendoma la ka pɛregeri a nɛreba la ge ba tuɣum basɛ ti ba tara la nyɛɛma. (2 Korint 1:​24) Wuu dunkiina n ni mɔ’ɛ nini bisa a piisi se’em la, bala mea nɔɔ ti keendoma la me mina nɛra woo tansugere la poan.​—Magaha 27:23.

Ba pa’alɛ tɔ ti to tuna la Naayinɛ puti’irɛ n boti sɛla. Bakwai woo poan, keendoma n ni bɔna to nɛŋa tansugere zamesegɔ woo poan la ni basɛ ti to sakerɛ n kpe’em. (Tooma 15:32) Nɛrebana wa dekɛ bamea bo na’am mɔɔlegɔ tuuma la mɛ, ni naɛ la to tuna ge kumesa tɔ tuuma la n nari ti to dɔla se’em.

Ba kpemese la to giila. La wan eŋɛ se’em ti to tara bɔnsoŋa la Yehowa la, keendoma la ni ta’an wa’an to yɛa bii ze’ele Na’am Pu’usegɔ Deo la poan soŋɛ tɔ ti to nyɛta buɣelegɔ Gulesegɔ la poan.​—Yames 5:14, 15.

Keendoma basɛba n le tara tuunse’a pa’asɛ tansugere tuuma poan dela nasaara tuuma la ba deodoma zugbere yele, n me de ba dekɛ tɛm zo’e zo’e tuna. Mabiisi wa za’a waabi n mɔɔri se’em wa dela to bɔ’ɔra ba gilema.​—1 Tesalonika 5:12, 13.

• Tansugere keendoma tuunɛ dela bem?

• Keendoma la nɔŋɛ to yele la wani?

Baabule la tɔɣɛ pa’alɛ la Kristakɔma sugumnɔɔrɛ buyi n tari zugbere yele tuunɛ tansugere la poan​—“keendoma la keendoma soŋeredoma.” (Filipi 1:⁠1, NW) Tansugere woo tari keendoma la keendoma soŋeredoma mɛ. Keendoma soŋeredoma tuni la bem tuuma ti la dɛna nyuurɔ bɔ’ɔra tɔ?

Ba soŋeri la keendoma tigesego. Keendoma soŋeredoma dela bunkureba la bunbilipaalisi n boti vo’osum yɛla, dɛna sɛba ti ho wan ta’an delum ba ge mina yɛla. Ba tuni la ninmɔ’ɔrɛ tuuma saŋa woo la paŋa tuuma tansugere la poan. Wana wa bo’ori ­keendoma la yɔ’ɔ ti ba pa’ala ge kaara bisa mabiisi la soŋa.

Ba tuni la tuunse’a n pakɛ. Keendoma soŋeredoma basɛba ni nyɛ la tuuma n de wuu soŋereba, tɔ’ɔsa saama ­zamesegɔ poan. Sɛba me ni bisa la yetɔɣum magazim, gɔnɔ, tansugere ligeri ge ni tɔta na’am mɔɔlegɔ zɛ’ɛsi bɔ’ɔra tansugere la. Ba me le soŋera maala Na’am Pu’usegɔ Deo la mɛ. ­Keendoma ni ta’an yele ba ti ba soŋɛ sɛba n kuregɛ la. Keendoma soŋeredoma n ni yee inya tum tuunse’ere woo ti ba ni dekɛ eŋɛ ba nu’usin la, basɛ ti mabiisi tara la gilema bɔ’ɔra ba.​—1 Timoti 3:13.

Ba dela Kristakɔma n tari makesonɛ. Ba ni loe keendoma soŋeredoma doose la ba tari halisoma se’em. Ba san ni tara yetɔɣum zamesegɔ poan, to ni nyɛ giilekpeŋere mɛ to sakerɛ poan. To ni tuulegera mɛ la ba boi nɛŋa na’am mɔɔlegɔ tuuma la poan la. Ba soŋeri to se’em la, basɛ ti to tara la nyɛɛma la nɔyinɛ. (Epesus 4:​16) Pooren, bana n ni ta kumesɛ dɛna keendoma.

• Nɛrebani n de keendoma soŋeredoma?

• Keendoma soŋeredoma wa tuni tansugere la poan la wani ti la kena soŋa?

Greek Gulesegɔ la tɔɣɛ Barnabas la tuntuna Paul yele zo’e mɛ. Nɛrebana wa yuun dela kaarɛ bisegadoma, bisa ­daami tansuga la. Beni n sɔi? Ba mabiisi vo’osum yɛla n yuun pakɛ ba la n sɔi. Paul yuun yeti eŋa boti la a “ŋmɛregɛ lebe” ta pu’usɛ a suurɔ ge bisɛ ba ani se’em. A yuun sakɛ kena la mɛɛla (kilometers) zo’e zo’e ti a kpemese ba giila. (Tooma 15:36) Putɛdena mea nɔɔ ti to kaarɛ bisegadoma zina beere wa me tara.

Ba kene kpemesa la to giila. Sugumnɔɔrɛ buyi ti teŋgirega bisega daana woo ni ɛɛ bisɛ tansuga 20 bii n gaŋɛ bala yuunɛ woo, ni dekɛ bakwai ayina a kaarɛ poan. To wan ta’an nyɛ nyuurɔ zo’e zo’e to mabiisi wa zɛ’an la ba pɔɣeba, wuu ba san tara. Ba tiregeri mɛ ti ba baŋɛ kɔma la bunkureba za’a ge bɔta ti ba doose to keŋɛ na’am mɔɔlegɔ ge ta’an nyɛ to Baabule zamesegɔdoma. Bisegadoma wa ni naɛ la keendoma la kaara to bisa, bɔ’ɔra yetɔɣum n kpemesi to giila zamesegɔ la laɣesegɔ poan.​—Tooma 15:35.

Ba boti la nɛra woo yele. Teŋgirega bisegadoma ni kɔ’ɔn bɔta la ba baŋɛ tansuga la vo’osum yɛla n ani se’em. Ba ni naɛ keendoma la keendoma soŋeredoma zi’ire sɔsɛ baŋɛ ba mɔɔri se’em ge pa’alɛ ba wan nyaŋɛ tum ba zugbere yele tuuma la se’em. Ba soŋeri sore ŋmɛ’adoma mɛ ti ba nyaŋɛ tuna na’am mɔɔlegɔ tuuma la soŋa. Ba puurɛ ni pee ti ba baŋɛ saama la n mɔɔri se’em tansugere la poan. Mabiisi bana wa woo dekɛ bamea bo ti ba ‘dɛna la to tadaandoma tomam inya zuo.’ (2 Korint 8:23) La dela to tɔɣesa ba sakerɛ la ba dekɛ bamea bo Naayinɛ se’em la.​—Hebru 13:7.

• Bem zuo ti teŋgirega bisegadoma bisa tansuga la?

• Ho wan eŋɛ la wani nyɛ nyuurɔ ba kaarɛ wa poan?

Yehowa Sɛɛradoma ni eŋɛ la kalam tigese bamea soŋɛ ba mabiisi yeledi’ire san paɛ ba. Ba ita ania se’em la pa’alɛ la ba tari nɔŋerɛ se’em bɔ’ɔra taaba. (Yon 13:34, 35; 1 Yon 3:17, 18) To soŋeri taaba la wani?

To laɣesɛ la ligeri. Kom n yuun sige Yuda teŋa la, daami Kristakɔma n yuun boi Antiok yuun laɣesɛ la ligeri ta soŋɛ ba mabiisi. (Tooma 11:27-30) Bala mea nɔɔ, to san wum ti wuŋerɛ n paɛ to mabiisi n boi zɛ’an teŋgɔŋɔ wa, to ni doose la to tansugere la poan bo ligeri ti ba soŋɛ sɛba ti la mɔ’ɔra ba la.​—2 Korint 8:13-15.

To ni bo la sɛla n nari. Keendoma n boi yeledi’ire zɛ’an la, ni ee tansugere nɛreba la woo mɛ bisɛ la paɛ ba se’em ge soŋɛ ba. Yeledi’ire bisegadoma n biseri ga’aregɔ zɛ’ɛsi, ko’om, bɔ’ɔra dia, lɔɣɔrɔ la imma’asum soŋerɛ. Sɛɛra­doma zo’e zo’e n tari nu’o tuunɛ ni laɣum dekɛ la bamea ligeri keŋɛ ta soŋɛ ti ba maala yɛa la Na’am Pu’usegɔ Deto. To tari nɔyinɛ se’em tigere la poan la ge ni naɛ la to mabiisi tuna se’em la, ni basɛ ti to ta’an maasum tomea kalam dekɛ soŋerɛ bo sansɛka n nari. To ka iti som bɔ’ɔra la sɛba “n de sɔɔnrɔ Yesu poan” ma’a ge to me soŋeri pu’usegɔ woo nɛreba mɛ to san wan nyaŋɛ.​—Galatia 6:​10.

To tari la gulesegɔ la buɣela ba suure. Sɛba ti wuŋerɛ ni ­paɛ ba la, eeri la subuɣelegɔ. Sankaŋa la, to ni nyɛ la giilekpeŋere Yehowa, “[Naayinɛ] se’em n soŋore nɛreba yelese’ere woo poan.” (2 Korint 1:3, 4) To ni dekɛ la Baabule la soŋɛ sɛba woo yɛm n bɔi la mɛ ge basɛ ti ba baŋɛ ti la kan yue Naayinɛ Na’am la wan basɛ ti wuŋerɛ woo n paari to la mɛlum.​—Liligere 21:4.

• Yehowa Sɛɛradoma ni eŋɛ la wani nyaŋɛ soŋɛ nɛreba kalam yeledi’ima poan?

• Bem gulesegɔ yɛla ti to wan ta’an dekɛ buɣelɛ sɛba n piɛ la?

Yezu n yuun pɔri a kum la, a yuun naɛ la a podɔleba banaasi n de​—⁠Peter, Yames, Yon, la Andrew sɔsɛ. Yezu n yuun tɔɣɛ biŋe pa’ala a bɔŋa la poan n wan ta ana se’em ba’asegɔ dabesa la, a yuun soke yeti: ‘Yameŋa kane n de sakerɛ la yɛm yameŋa la, se’em ti a daana loe en ti a bisa a yire yamesi ge bɔ’ɔra ba dia dɔla la som ti ba dita se’em?’ (Matu 24:​3, 45; Mark 13:​3, 4) Yezu yuun boti a basɛ ti a podɔleba la baŋɛ soŋa ti ba “daana” la wan loe sɛba n wan bɔ’ɔra ba vo’osum dia saŋa woo ba’asegɔ dabesa la poan. Bani n wan dɛna yameŋa wa?

Ba dela Yezu podɔleba ti ba loe ba vo’osum poan la basɛba. “Yameŋa” wa dela Yehowa Sɛɛradoma Tigere Zuo Bisegadoma la. Bamam n tari vo’osum dia bɔ’ɔra sɛba n pu’usɛ Yehowa la. To boi la sakerɛ yameŋa wa n bo’ori to ‘dia se’em ma’an ti to bɔta’ la nu’usin.​—Luke 12:42.

Bamam n biseri Naayinɛ yire la. (1 Timoti 3:15) Yezu yuun bo yameŋa la tuunkatɛ n de ba bisa Yehowa tigere la bɔbese’ere n boi teŋgɔŋɔ wa zuo la​—bisa ka lɔɣɔrɔ, pa’ala mɔɔlegɔ tuuma la n nari ti la dɔla se’em ge pa’ala tɔ doose la to tansuga poan. Bala la, tɛm woo ba bo’ori to yelese’a n pakɛ to vom poan. ‘Sakerɛ la yɛm yameŋa la’ bo’ori vo’osum dia dɔla gɔnɔ poan ti to tara tuna to na’am mɔɔlegɔ, yelese’a za’a ti to wuna to zamesegɔ la laɣesegɔ poan.

Yameŋa wa tari la sakerɛ la Baabule yelemɛŋɛrɛ la ge me mina ti ba tuunɛ dela ba mɔɔlɛ yelesoma la. Ba me tari yɛm mina ba wan tum de se’em yɛm sore poan ta’an bisa Krista n boti sɛla teŋa wa zuo. (Tooma 10:42) Yehowa kã’ari bɔ’ɔra ba tuunɛ la ti la zɔ’ɔra ti vo’osum dia me buge.​—Isaiah 60:22; 65:13.

• Bani ti Yezu yuun loe ba ti ba bɔ’ɔra a podɔleba la vo’osum dia?

• Sarɔkuni poan ti yameŋa la tara sakerɛ la yɛm?

Yuun kɔbesɛka n deŋɛ nɛŋa la, nɛreba fii wa, ‘tuntuneba la keendoma n boi Yerusalem’ n yuun de tigere zuo bisegadoma. Ba yuun ze’ele la Kristakɔma sɛba ti ba yuun loe ba la nataka tuna ge pa’ala yelese’a n nari ti ba ita Krista tansugere la poan. (Tooma 15:2) Ba yuun san ni ku nɔɔrɛ yelese’ere woo poan, la ni dɛna la Gulesegɔ la n yele se’em ti Naayinɛ vo’osum la pa’ala ba. (Tooma 15:25) Bala mea nɔɔ ti to dɔla zina wa.

Naayinɛ n tari ba tuna a puti’irɛ n boti se’em. Sɛba ti ba loe ti ba dɛna Tigere Zuo Bisegadoma la puti’irɛ za’a boi la Naayinɛ Yetɔɣum la poan ge me mina yɛla soŋa soŋa ta’an pa’ala pu’usegɔ la yɛla. Ba ni seke taaba mɛ bakwai woo poan sɔsɛ yelese’a n pakɛ to teŋgɔŋɔ wa za’a mabinɔɔrɛ la. Wuu la yuun ani se’em yuun kɔbesɛka n deŋɛ nɛŋa la, ba tari la Baabule pa’alegɔ bɔ’ɔra tɔ dɔla gɔnɔ gulesegɔ poan, kaarɛ bisegadoma bii basɛba pa’ala tɔ. Wana wa basɛ ti Naayinɛ nɛreba itigɔ la ba puti’irɛ za’a dɛna la buyina. (Tooma 16:4, 5) Tigere Zuo Bisegadoma la n ni maasum vo’osum dia, pa’ala Na’am mɔɔlegɔ tuuma la n nari ti la tuna se’em ge geela bisa mabiisi sɛba n nari ti ba loe ba ti ba tara zugbere yele tuunɛ.

Naayinɛ vo’osum la n pa’alɛ ba. Tigere Zuo Bisegadoma la basɛ ti Sɔ’ɔlum Daana, Yehowa, la tansugere la Zuo Daana, Yezu, n pa’ala ba. (1 Korint 11:3; Epesus 5:23) Nɛreba wa ka eŋɛ bamea ti bamam dela Naayinɛ nɛreba la nɛŋadoma. Bamam la Kristakɔma sɛba za’a ti ba loe ba la, “dole Pebila [Yezu] la yɛ’a zen’an woo ti a yɛ’a.” (Liligere 14:4) Tigere Zuo Bisegadoma la puurɛ ni pee mɛ la to pu’useri bɔ’ɔra ba la.

• Bani n yuun de tigere zuo bisegadoma la yuun kɔbesɛka n deŋɛ nɛŋa la?

• Tigere Zuo Bisegadoma la basɛ ti Naayinɛ pa’ala ba la wani?

Hebru yetɔɣum poan, Betel vuurɛ dela “[Naayinɛ] Yire.” (Pin’ileŋɔ 28:17, 19) Ku kɔ’ɔn dɛna la yu’urɛ n makɛ ma’a bo yɛa se’a ti Yehowa Sɛɛradoma mɛ teŋgɔŋɔ wa za’a waabi ti ba pa’ala ge soŋera mɔɔlegɔ tuuma la. Tigere Zuo Bisegadoma la boi la tigere la zuo n boi New York State, U.S.A. la, bamam n biseri tigere yila la za’a n boi tisi woo poan. Sɛba woo n tuni tigere yila wa poan la dela Betel deodoma. Wuu deodoma la, ba tari la nɔyinɛ laɣum kɛ̃’ɛra ge tuna, laɣum dita ge zamesa Baabule la.​—Yooma 133:1.

La dela zɛ’an n boi de to’ore ti deodoma la woo mɔɔra. Betel yire woo poan, Kristakɔma n dekɛ bamea bo tuna Naayinɛ puti’irɛ n boti sɛla la a Na’am tuuma la saŋa woo poan. (Matu 6:33) Ba ka yɔɔri ba ge ba bo’ori ba dia, ga’aregɔ zɛ’an la laɣehɔ wana fii ti ba wan ta’an maalɛ bamea yele. Nɛra woo n boi Betel tari tuunɛ mɛ, basɛba duɣeri la dia ti basɛba tuna ɔfisi. Sɛba me tuni la tuuma a se’a n de wuu gɔnɔ maalegɔ, deto duusego, futo peere, lɔɣɔrɔ maalegɔ la tuuma a se’a.

La dela zɛ’an ti ba kɔ’ɔn mɔ’ɛ nini soŋera Na’am mɔɔlegɔ tuuma la. Beteldoma woo puti’irɛ za’a dela ba basɛ ti Baabule yelemɛŋɛrɛ la paɛ nɛra woo. Bala zuo n sɔi ti ba gulesɛ gɔnlɛmlɛm wa. Tigere Zuo Bisegadoma la n bisɛ ti ba gulesɛ ku ge dekɛ doose kompiita poan bo leregere tigesegodoma  kɔbesi n boi teŋgɔŋɔ wa. Ti Betel se’a n tari magazim la, nyaa ni maalɛ gɔnɔ wa kalam ge dekɛ bo tansuga n gaŋɛ 110,000. Tuunɛ woo poan, Betel deodoma wa n soŋeri tuunse’ere n de ninmɔ’ɔrɛ gana za’a​—yelesoma mɔɔlegɔ la.​—Mark 13:10.

• Bani n tuni Betel ge ba biseri ba la wani?

• Betel yire woo soŋeri la bem ninmɔ’ɔrɛ tuunɛ?

Betel yidoma la tuni la zɛ’ɛsi zo’e zo’e, bisa na’am mɔɔlegɔ tuuma la teŋa ayina bii tisi zo’e zo’e poan. Basɛba tuni la leregere tuuma, maala magazines, tigesa gɔnɔ, tuna gɔnɔ biŋere zɛ’an, kɔa yetɔɣum/vidiyo bii tuna tuunse’a n pakɛ zɛ’an ti ba bɔna la.

Tigere Yile Bisegadoma n biseri tuuma la. Tigere Zuo ­Bisegadoma la dekɛ tuuma la n boi tigere yile woo poan eŋɛ la Tigere Yile Bisegadoma la n de wuu keendoma batã bii n gaŋɛ bala nu’usin. Bisegadoma wa, n yeti Tigere Zuo Bisegadoma tuuma la n ani se’em teŋa la poan la yeledaa­ŋɔ se’a n boi. Tigere Zuo Bisegadoma la n wuni yelese’a Bisegadoma zɛ’an la, n ni soŋɛ ba ti ba mina ba wan gulesɛ yelese’a ti to wan zamesa to zamesegɔ poan la to laɣesegɔ. Sɛba n ze’ele Tigere Zuo Bisegadoma nataka ti ba ni tum ba ti ba ­ɛɛra kaara tigere yila ge pa’ala Tigere Yile ­Bisegadoma ti ba tuna ba tuuma soŋa. (Magaha 11:14) Se’em ti Tigere Zuo ­Bisegadoma ni tum wa, ni maasum la yetɔɣum n bo de to’ore kpemese sɛba woo n boi teŋa la poan.

Ba soŋeri tansuga n boi teŋa la poan mɛ. Mabiisi n mi yɛla soŋa soŋa tigere yile la poan, n ni bo fole ti ba ta’an pɔsɛ tansuga. Mabiisi wa n le­ pa’ala sore ŋmɛ’adoma, ­sateŋa na’am yetɔɣum yalegerɛdoma la teŋgirega bisega­doma ba wan tuna ba tuuma se’em teŋa la poan. Bamam ­n ni maasum laɣesegɔ, bisa ti ba mɛta Na’am Pu’usegɔ Deto ge basɛ ti gɔnɔ paara tansuga woo. Sɛla woo ti ba tuna tigere yile wa poan la, basɛ ti na’am mɔɔlegɔ tuuma la kena la soŋa soŋa.​—1 Korint 14:33, 40.

• Tigere Yile Bisegadoma soŋeri Tigere Zuo Bisegadoma la wani?

• Tigere yile la bisɛ la bem zugbere yɛla?

La wan eŋɛ se’em ti to ta’an tɔɣɛ “yelesoma la” bo “teŋhe woo, la buuri woo, la yetɔgom sebo woo, la nɛreba buuri buuri woo,” to gulesɛ la gɔnɔ n gaŋɛ yetɔɣum 750 poan. (Liligere 14:6) To iti la wani ta’an tuna tuunkatɛ dena wa? To ta’an ita wana wa doose la to tari teŋgɔŋɔ wa za’a waabi sɛba n guleseri gɔnɔ la sɛba n leregeri—bana za’a dela Yehowa Sɛɛradoma.

Ba ni pɔsɛ gulesɛ la Solemiine poan. Tigere Zuo Bisegadoma la n bisɛ Gulesegɔ Wele la ti ba tuna ba tuuma soŋa to tigere la zuo sa. Gulesegɔ Wele dena n biseri sɛba n guleseri gɔnɔ bɔna tigere la zuo, la tigere yila a se’a. To tari nɛreba n boi tɔka tɔka gulesa gɔnɔ la, bo to la yɔ’ɔ ti to ta’an gulesa buuri woo yɛla soŋa soŋa ti to gɔnɔ la tari nimpiilum bɔ’ɔra nɛra woo teŋgɔŋɔ wa.

Ba ni dekɛ gulesegɔ la bo la leregeredoma. Ba san ni demese gulesegɔ la ba’asɛ ge nam sɛla woo, ba ni dekɛ doose la kompiita poan bo sɛba n de leregeredoma la teŋgɔŋɔ wa za’a waabi ti bamam me lerege, viisɛ bisɛ soŋa ge malum kaalɛ de soŋa. Ba ni eŋɛ la ania loe ‘yelese’a n de yelemɛŋɛrɛ’ ge tara vuurɛ wuu ­Solemiine la n de se’em la.​—Pa’ala 12:10.

Kompiita n soŋeri tuuma la ti la ita kalam. Kompiita kan nyaŋɛ soe nɛresɛba n guleseri gɔnɔ la sɛba n leregeri la. Ge kompiita ta’an soŋɛ ba tuuma doose la ku tari yelebɛa tigesego gɔnɔ, viisegɔ lɔɣɔrɔ la yɛla a se’a la. Yehowa Sɛɛradoma maalɛ la Multilanguage Electronic Publishing System (MEPS) ti la soŋera ba ti ba ta’an gulesa gɔnɔ yetɔɣum kɔbesi poan ge nyaa ni gulɛ ti la naɛ soŋa.

Beni n sɔi ti to tiregera tomea gulesa yetɔɣa ti nɛreba n yeen dɛna tusa ma’a tɔɣera? Sɛla n sɔi la, Yehowa boti “a fan nɛra woo bahɛ ge bɔta te nɛra woo baŋɛ yelemɛŋɛrɛ la.”​—1 Timoti 2:3, 4.

• Ba iti la wani gulesa to gɔnɔ la?

• Beni n sɔi ti to leregera to gɔnɔ la yetɔɣum zo’e zo’e poan?

To tigere la guleseri la gɔnɔ ge tara Baabula tusa tusa kɔbesi la gɔnɔ toseto tɔ̃ta zaŋa. To mɛti Na’am Pu’usegɔ Deto la tigere yila zɛ’ɛsi ge bisa a soŋa. To soŋeri Betel­doma la sateŋa na’am yetɔɣum yalegerɛdoma n de tusa ge le soŋera yeledi’ire poan. Daanse’ere ho ta’an ti’isa ti, ‘To nyɛti ligeri la bɛ tuna tuun ana?’

To ka to’oseri ligeri, kɛɛra nɛreba bii ita kɔlɛsin. To nɔɔ sa’ani la ligeri zo’e zo’e to na’am mɔɔlegɔ tuuma la poan ge to ka eeri zusa ligeri. Yuun kɔbega n tole la, Watchtower gɔŋɔ la n pa’asɛ buyi la yeti to mi ti Yehowa n soŋeri tɔ, bala la “to kan malum zusɛ kan bem ti to belum nɛreba ti ba soŋɛ tɔ”​—to me ka tabelɛ zusɛ!​—Matu 10:8.

Nɛreba n yeseri ba suure poan bɔ’ɔra. Nɛreba zo’e zo’e puurɛ pee mɛ la to Baabule zamesegɔ tuuma la ge ni yese ba suure poan bo sɛla. Yehowa Sɛɛradoma mea puurɛ pee mɛ la ba tari bamea tɛm, paŋa, ligeri la lɔɣɔrɔ soŋera Naayinɛ tuuma la teŋgɔŋɔ wa za’a. (1 Yelebiŋ’a 29:9) Na’am Pu’usegɔ Deo la laɣesegɔ woo poan, daɣesi boi mɛ ti se’em n boti a bo sɛla a ta’an bo. Ligeri la ti to nyɛta la ze’eti la sɛba n de nasedoma zɛ’an na, wuu pɔkɔɔrɛ la n yuun dekɛ ligekɔ̃ba ayi eŋɛ pu’usegɔ deo daka la poan ti Yezu yuun pɛɣɛ en la. (Luke 21:1-4) Bala la, nɛra woo ta’an ‘yehe ligeri’ bo “n tɛn’ɛhe a putɛn’ɛrɛ poan te a bo se’em.”​—1 Korint 16:2; 2 Korint 9:7.

To tari puti’irɛ ti Yehowa n boti a Na’am tuuma la tum ba’asɛ soŋa la, wan kelum kalum sɛba woo n ‘na’ase en la ba tuulum lɔɣɔrɔ’ la suure ti ba soŋɛ.​—Magaha 3:9.

• Bem n basɛ ti to tigere la bɔna de tɔka la pu’usegɔ woo?

• Ba tari ligeri la ti to laɣesa la tuna la bem tuuma?

Wuu Na’am Pu’usegɔ Deo la yu’urɛ n pa’alɛ se’em la, ­Baabule zamesegɔ la zuo yele za’a dela Naayinɛ Na’am​—zuo yelese’ere ti Yezu yuun tɔɣera de yele la.​—Luke 8:1.

I dela yelemɛŋɛrɛ pu’usegɔ zɛ’ɛsi teŋa la poan. Bilam ti ba ni pɔsɛ maasum ge nyaa keŋɛ ta mɔɔlɛ Na’am yelesoma la. (Matu 24:14) Na’am Pu’usegɔ Deto boi la tɔka tɔka ni makɛ ma’a ge ta’an tara tansuga n gaŋɛ ayina zamesa bim. Yuun se’a n tole la, to mɛ Na’am Pu’usegɔ Deto n de tusa pia zo’e zo’e (to san pu, ba mɛti la inuu daayinɛ) la wan eŋɛ se’em ti tansugere woo ta’an nyɛ zɛ’an. To eŋɛ la wani ta’an ita bala?​—Matu 19:26.

Ba laɣeseri la ligeri mɛta a. Ba ni dekɛ ligeri wa tisɛ la tigere yile la ti ba dekɛ bo tansuga n boti ba mɛ bii malum maalɛ ba Na’am Pu’usegɔ Deo.

Nɛreba buuri buuri n ni laɣum soŋɛ mɛa la. Tisi zo’e zo’e poan, Na’am Pu’usegɔ Deto Mɛa Tigesego n boi. Nɛreba n boi mɛa tigere la poan soŋera la, ni kena lumesa la tansuga hali paara teŋkpɛsi poan mɛta ge maala Na’am Pu’usegɔ Deto tisi la poan. Zɛ’ɛsi a se’a poan, Mabiisi n ­kumesɛ mina mɛa tuuma la ti ba loe ba ti ba bisa Na’am Pu’usegɔ Deto mɛa la maalegɔ. La nɔɔ boi bim ti ba mɛti zɛ’an woo sɛba n mi tuunɛ la n ni laɣum soŋɛ ge tansugere la nɛreba n ni zo’e soŋera. Yehowa vo’osum la, la a nɛreba n mɔɔri se’em la n ni basɛ ti la ta’an tum.​—Yooma 127:1; Kolose 3:23.

• Bem n sɔi ti to yi’ira to pu’usegɔ zɛ’ɛsi la, Na’am Pu’usegɔ Deto?

• To ita la wani mɛta Na’am Pu’usegɔ Deto zɛ’an woo teŋgɔŋɔ wa?

Yehowa Sɛɛradoma Na’am Pu’usegɔ Deo woo tari la Naayinɛ yu’urɛ n ani zilam. Bala, la dela yɔ’ɔ bo to ge me laɣum pa’asɛ to pu’usegɔ poan ti to bisɛ maalɛ to deo la ti ku ana soŋa, filam ge nara. Nɛra woo ta’an laɣum soŋɛ.

Zamesegɔ san ba’asɛ ni laɣum piisɛ ge duuse. Zamesegɔ woo san ba’asɛ, mabiisi ni dekɛ la pupeelum piisɛ ge duuse Na’am Pu’usegɔ Deo la. Saŋa woo, to piisɛ mɛ soŋa soŋa. Keenma bii keendoma soŋeredoma ayima n ni pa’ala ti ba dɔla yelese’a n nari. To ni ta makɛ tɛm sebo mɛ piisɛ, pee teŋa la, duuse ge malum ze’ele kuɣesi, ti basɛba me pɛɛra insɔɔseŋa, duusa takɔla, ka’asa sɔɣɔrɔ ge kɔɔra mɔɔ. Yuunɛ woo poan, to ni loe la dabeserɛ piisɛ ge duuse lipi. To san basɛ ti to kɔma laɣum tuna, to pa’ala ba la nari ti ba tara gilema bɔ’ɔra to pu’usegɔ zɛ’an la se’em.​—Pa’ala 5:1.

Laɣum soŋɛ maalɛ zɛse’esi n sa’am la. Yuunɛ woo, to ni bisɛ Na’am Pu’usegɔ Deo la poan la yiŋa za’a. Zɛ’an san nara maalegɔ, to ni eŋɛ la kalam maalɛ ti ku ana soŋa ge ti sanɛ la kan zo’e. (2 Yelebiŋ’a 24:13; 34:10) Na’am Pu’usegɔ Deo ti to wan piisa ge maala ti ku ana filam n de zɛ’an n nari ti to pu’usa to Naayinɛ. To laɣum tuna la, pa’alɛ to suure n kɛ̃ Yehowa la a pu’usegɔ zɛ’an la se’em. (Yooma 122:1) Wana wa basɛ ti nɛreba n pɛɣera tɔ teŋa la poan.​—2 Korint 6:3.

• Bem zuo ti la ka nara ti to tamɛ to pu’usegɔ zɛ’an maalegɔ yele?

• Bem maaseŋɔ ti ba eŋɛ ti to tara maala to Na’am Pu’usegɔ Deo la ti la ana filam?

Ho wan bɔta ti ho viisɛ Baabule la poan yɛla ti ho mi’ilum zo’e pa’asɛ? Ho boti ho baŋɛ gulesegɔ la soŋa bii nɛra yele, zɛ’an bii sɛla Baabule la poan? Hon tabelɛ ti’isɛ ti Naayinɛ Yetɔɣum la wan nyaŋɛ soŋɛ hɔ la yelese’a n pakɛ ho la? La san dɛna bala, dekɛ Na’am Pu’usegɔ Deo gɔnɔ zaaleŋa la tum tuuma.

La tari la gɔnɔ ti to viisa baŋera yɛla. Daanse’ere ho ka tari Yehowa Sɛɛradoma Baabule gɔnɔ la za’a ho yetɔɣum poan. Ge Na’am Pu’usegɔ Deo gɔnɔ zaaleŋa la tari gɔnɔ la mɛ zo’e zo’e. Sɛla n ta’an le bɔna bim pa’asɛ dela Baabula n boi tɔka tɔka, gɔnseto n pa’alɛ yelebɛa vuurɛ la gɔnɔ a se’a. Ho ta’an te’ele wa’an na bisɛ hon boti sɛla gɔnɔ ­zaaleŋa wa poan bii to san zamesɛ ba’asɛ. Kompiita san bɔna, Watchtower Library ta’an bɔna bim. Ku dela kompiita poan yelesom lɔkɔ n tari to gɔnɔ la zo’e zo’e ge ti la me dɛna naana ti ho wan ta’an dekɛ viisɛ baŋɛ yɛla zuto, yelebɛa bii gulesegɔ.

La soŋeri la sɛba n boi Tiokrasi Sukuu Tuuma la poan. Ho san bɔna sukuu la poan, ho wan ta’an bisɛ Na’am Pu’usegɔ Deo gɔnɔ zaaleŋa wa poan maasum ho sukuu la poan tuuma. Se’em n bisɛ sukuu la n sɔi gɔnɔ zaaleŋa la bisa. Eŋa n ni basɛ ti ba dekɛ gɔnpɔɔlɔ woo tigese a soŋa biŋɛ bim. Sukuu bisega daana bii ho Baabule pa’alegɔ daana ta’an pa’alɛ hɔ hon wan eŋɛ se’em nyɛ yelese’a ti ho ɛɛra. Ge sɛla n de ti ho mina dela, la ka nari ti ho dekɛ gɔŋɔ Na’am Pu’usegɔ Deo la poan kule. To me wan bɔta ti to tara gɔnɔ la soŋa ti i da dɛɣɛ.

Baabule la pa’alɛ ti to san wan ‘baŋɛ Naayinɛ,’ la dela tomea ɛɛ en wuu, ‘tuulum lɔkɔ la.’ (Magaha 2:1-5) Na’am Pu’usegɔ Deo gɔnɔ zaaleŋa la wan ta’an soŋɛ ho ti hɔ pɔsɛ viisɛ baŋɛ yɛla.

• Bem gɔnɔ n boi Na’am Pu’usegɔ Deo gɔnɔ zaaleŋa la poan?

• Ani n wan ta’an pa’alɛ hɔ ti ho mina hon wan dekɛ gɔnɔ zaaleŋa wa tum tuuma se’em?

Yezu Krista yuun yele a podɔleba yeti: “La dela boyena te ya nɛɛhom la nɛɛ bo nɛra woo. Bala te ba wan nyɛ toon somse’a te ya eta la nya pɛngɛ ya Sɔ se’em n boe saazuo ha.” (Matu 5:16) Bala zuo, to tari kompiita la Intanɛt tuna tuuma zina beere me. To Intanɛt Tuuma zɛ’an, jw.org, n de zɛ’an ti ho wan nyɛ Yehowa Sɛɛradoma sakerɛ la ba tuuma yɛla. Bem yɛla n boi bim?

La tari la Baabule n lebese sokese’a ti nɛreba sɔkera. Ho wan ta’an nyɛ lebesego bo ninmɔ’ɔrɛ sokese’a ti nɛreba tabelɛ soke. Gɔnpiɣesi wa, Namesegɔ Wan Malum Tole? la Sɛba N Ki La Wan Sirum Le Vo’e? boi la yetɔɣum n gaŋɛ 600 intanɛt poan. Ho ta’an le nyɛ New World Translation yetɔɣum n gaŋɛ 130 la Baabule zamesegɔ gɔnɔ n de wuu What Does the Bible Really Teach? la Watchtower la Awake! Gɔnɔ wa zo’e zo’e, ho ta’an kaalɛ, kelese bii yese i doose MP3, PDF, bii EPUB formats poan. Ho me ta’an yese i se’a ta bo sɛba n boti yele la bamea yetɔɣum poan! Vidiyo gɔnɔ zo’e zo’e boi gɔɔnɔ yetɔɣum poan mɛ. Ho ta’an le dekɛ Baabule kaalegɔ n kɛ̃’ɛri suure, Baabule de’eŋo la yuunsoma eŋɛ ho kasɛt poan kɛlesa.

La pa’alɛ la Yehowa Sɛɛradoma n de nɛresɛba. Sɛla n le malum bɔna bim pa’asɛ dela lasebaarɛ yɛla la vidiyo n tɔɣeri pa’ala to teŋgɔŋɔ wa za’a waabi tuuma, yelese’a n paari Yehowa Sɛɛradoma la to iti ania soŋera nɛreba se’em yeledaaŋɔ poan. Ho wan ta’an nyɛ laɣesegɔ n wan bɔna zɛ’an la to tigere yila address pa’asɛ.

Doose wana wa poan, to basɛ ti yelemɛŋɛrɛ la niɛra paara teŋgɔŋɔ wa luɣerɛ woo poan. Nɛreba n boi zɛ’an woo teŋgɔŋɔ wa poan, hali ta paɛ Antarctica teŋa poan sa, nyɛti nyuurɔ mɛ. To pu’usɛ ti “[ Yehowa] Yelesoma la kɔ’ɔn kelom yeregera paara bɔbɔre woo” teŋgɔŋɔ wa poan, na’asa Naayinɛ.—2 Tesalonika 3:1

• Sarɔkuni ti jw.org soŋera nɛreba zo’e zo’e ti ba baŋera Baabule yelemɛŋɛrɛ la?

• Bem ti ho wan bɔta ti ho baŋɛ to Intanɛt Tuuma zɛ’an?