Nɛreba zo’e zo’e ka le kena pu’usegɔ ­sɛla n sɔi la ba ka nyɛti soŋerɛ bii ka’aŋɔ soŋa. Ge beni n sɔi ti la nara ti ho kena Yehowa Sɛɛradoma Krista zamesegɔ? Ho wan nyɛ la bem bini?

Ho wan nyɛɛna ho san naɛ la nɛreba n tari nɔŋerɛ ge ti’isa taaba yele. Yuun kɔbesɛka n deŋɛ nɛŋa la, Kristakɔma yuun tigese bamea la tansuga poan, pu’usa Naayinɛ, zamesa Gulesegɔ la ge kpemesa taaba giila. (Hebru 10:24, 25) Ba ni laɣesɛ bamea ti pupeelum bɔna se’em la, ba ni baŋɛ ti ba sirum laɣum naɛ la ba zɔdoma​—n de ba mabiisi bɔna. (2 Tesalonika 1:3; 3 Yon 14) Tomam me doli la bala mea nɔɔ tara nyɛɛma zina.

Ho wan nyɛ nyuurɔ ho san dekɛ Baabule naresum yɛla tum tuuma. Buraasi, pɔɣesi la kɔma za’a laɣum laɣesa taaba mɛ wuu la yuun ani se’em Baabule saŋa sa la. Pa’aleba n kumesɛ mina Baabule la, n pa’alɛ to wan dekɛ naresum yɛla tum tuuma to daarewoo vom poan se’em. (Tɛɛnhegɔ 31:12; Nehemia 8:8) Nɛra woo ta’an laɣum sɔsɛ ge yuuna ti la pa’alɛ to tari beere puti’irɛ Krista poan se’em.​—Hebru 10:23.

Naayinɛ kã’a wan basɛ ti ho sakerɛ kpe’em. Tuntuna Paul yuun yele tansugere ayima a dabeserɛ la poan yeti: ‘Mam bote n nyɛ’ ya mɛ, ta’an tɔgɛ ni bo ya. Te ya nyɛ paŋa pa’ahe ya sakerɛ poan, te mam mɛŋa me nyɛ paŋa pa’ahe n sakerɛ la poan.’ (Arom 1:​11, 12) To ni nyɛta to mabiisi zamesegɔ poan tɛm woo la basɛ ti to sakerɛ n kpe’em ge lu to suure ti to vɔna wuu Kristakɔma.

Ho kan bɔta ti ho wa’an to tansugere zamesegɔ na ti homea nini kɔ’ɔn nyɛ? To wan to’e ho soŋa. To zamesegɔ dela zaŋa​—to ka to’ori ligeri.

• Daami pa’alegɔ kuni ti to tansugere zamesegɔ dɔla zina?

• To wan nyɛ nyuurɔ la wani to san kena Krista zamesegɔ?

Hali la san puɣum dɛna ti to doli la goo poan bii wuntɛɛŋa la ɔɔrɔ n boi, to ni kelum kena Krista zamesegɔ mɛ saŋa woo. Hali dabeserɛ la poan yeledaaŋɔ bii to ni tarigɛ to tuuma poan se’em la, beni n sɔi ti Yehowa Sɛɛradoma kelum kɔ’ɔn tiregera ka basera laɣeŋɔ pooren la ba mabiisi?

La ani soŋa mɛ bo to. “Bahɛ ya te to tɛnra taaba yele,” Paul yuun tɔɣeri la to ni naɛ taaba bɔna tansugere poan se’em la. (Hebru 10:​24) Yetɔɣum wa vuurɛ dela “to ti’isa taaba yele” baŋera taaba soŋa. Bala la, tuntuna Paul yetɔɣum wa kpeŋe to giila mɛ ti to basɛ ti basɛba yele pakɛ tɔ. To san baŋɛ Kristakɔma deodoma basɛba, to wan baŋɛ ti ba zo’e zo’e nyaŋɛ ŋmibe ze’ele yele daaŋɔ ba zi’irego poan mɛ n ani wuu tomam la, ti la wan nyaŋɛ soŋɛ tɔ ti to me sɛ ze’ele soŋa.

La basɛ ti to lɛna la taaba dɛna zɔtɔ. To zamesegɔ poan to ni naɛ mɛ la to zɔdoma. Saŋa busebo, to ni nyɛ nɛŋa mɛ laɣum naɛ taaba dɛ’ɛna ge dita la pupeelum. To ni laɣum naɛ taaba se’em la tari la bem nyuurɔ? To ni pɛɣera taaba mɛ ge kpemesa taaba giila nɔŋerɛ sore poan. Bala la, yɛla san paara to tadaandoma, to ni soŋɛ ba mɛ la to puɣum dɛna zɔtɔ la zuo. (Magaha 17:​17) To laɣum naara la to tansugere nɛreba bɔna la, pa’ala ti ‘to boti taaba yele la bala mea nɔɔ.’​—1 Korint 12:​25, 26.

To wan bɔta ti ho nyɔɣɛ sɛba n tuni Naayinɛ puti’irɛ n boti sɛla la zɔtɔ. Ho wan nyɛ zɔtɔ bana taaba la Yehowa Sɛɛradoma poan. Soso, da basɛ ti sɛla gu ho la hon boti ho laɣum bɔna la to la.

• Beni n sɔi ti la dɛna nyuurɔ bo to ti to laɣesa taaba zamesegɔ zɛ’an?

• Ho wan bɔta ti ho baŋɛ to tansugere zamesegɔ la n ani se’em?

Daami Kristadoma zamesegɔ poan ba yuun ni zusa, yuuna, sɔsa ge kaala Gulesegɔ la​—ti malema yɛla ka pa’asɛ bini. (1 Korint 14:​26) Ho wan nyɛ la bala mea nɔɔ to zamesegɔ poan.

Pa’alegɔ la yese la Baabule poan ti to wan nyaŋɛ dekɛ tum tuuma. Asibidaarɛ bii Alaserɛdaarɛ woo, tansugere woo ni seke taaba mɛ dekɛ mita 30 kelese Baabule yetɔɣum n pa’alɛ to wan vɔna to vom se’em wuu Gulesegɔ la n pa’alɛ se’em la. To za’a waabi dela to dɔla tomea Baabule poan wuu yetɔɣum daana la n pa’alɛ se’em la. Sɔsega la san ba’asɛ, to ni dekɛ la karefa ayina eŋɛ “Watchtower” Zamesegɔ, ti nɛra woo n boi bini ta’an laɣum bo lebesego The Watchtower zamesegɔ la poan. Zamesegɔ wa basɛ ti to tara la Baabule pa’alegɔ la gu’ura tomea. Zamesegɔ kuna taaba nɔɔ ti tansuga n gaŋɛ 110,000 n boi teŋgɔŋɔ wa poan zamesa.

To nyɛti soŋerɛ ta’an pa’ala soŋa. To me le tara dabeserɛ bakwai woo poan zamesegɔ sugumnɔɔrɛ butã n de Our Christian Life and Ministry, ti la bɔna Life and Ministry Meeting Workbook. To ni pɔsɛ zamesɛ la Naayinɛ Tuulum Yɛla n soŋeri tɔ ti to bɔkera Baabule la bɔbese’ere ti to kaalɛ bakwai la poan la. Sɛla n taɣelɛ la dela Dekɛ Tum Tuuma Na’am Mɔɔlegɔ poan n pa’alɛ to wan eŋɛ se’em dekɛ Baabule la sɔsɛ la nɛra. Kuka zuo daana la n wan pa’alɛ to wan eŋɛ se’em kaala ge tɔɣera soŋa. (1 Timoti 4:13) Ba’asegɔ sɔsega bɔberɛ la dela To Bɔna Wuu Kritakɔma, n pa’alɛ tɔ to wan dekɛ Baabule naresum yɛla tum tuuma to vom poan se’em. Sokere sɔsega n laɣum pa’asɛ ti la soŋera tɔ ti to bɔkera Baabule la soŋa.

Ho san wa’an to zamesegɔ poan na, ho puurɛ wan pee la hon wan nyɛ Baabule pa’alegɔ se’em la.—Isaiah 54:13

• Bem ti ho wan wum Yehowa Sɛɛradoma zamesegɔ poan?

• Bakwai la poan to zamesegɔ kuni ti ho wan bɔta ti ho keŋɛ?

Ho nyɛ fɔɔra la n boi gɔnlɛmlɛm wa poan ti Yehowa Sɛɛradoma maalɛ bamea se’em yea tansugere zamesegɔ la? Bem zuo ti to ba’a maala tomea soŋa soŋa to lɔɣɔrɔ yɛa poan?

La pa’alɛ ti to tari la gilema bɔ’ɔra to Naayinɛ. La dela yelemɛŋɛrɛ ti Naayinɛ ka biseri la to ni yɛ lɔɣɔrɔ ana se’em. (1 Samuel 16:⁠7) Ge to san laɣesɛ taaba ti to pu’usɛ en, to ni bɔta la to tara gilema bɔ’ɔra en la to mabiisi to lɔɣɔrɔ yɛa poan. La san deni wuu to yeti to keŋɛ ta nyɛ la teŋa zuo bisega daana ti a maalɛ to yele bo to, to kan bisɛ to lɔɣɔrɔ yɛa soŋa ge keŋɛ a zɛ’an? Bala mea nɔɔ ti la nara ti to maala tomea soŋa to san yea zamesegɔ ti la tara gilema bɔ’ɔra “teŋhe zan’an Naba,” Yehowa Naayinɛ la to pu’usegɔ zɛ’an.​—Yeremia 10:⁠7.

La pa’alɛ la to doli yelese’a to vom poan. Baabule la tiɛsi Kristakɔma ti ‘ba tara yɛm yɛɛra ba lɔɣɔrɔ.’ (1 Timoti 2:9, 10) To maalɛ tomea ti la ‘makɛ ma’a’ se’em la’ pa’alɛ ti to ka boti to yɛɛra lɔɣɔse’a n weele to iŋa, pa’ala tomea bii nyiira nɛreba sunsɔa. Leyɛ’ɛsa to doli ‘yɛm sore’ poan la, soŋeri to mɛ ti to yɛɛra lɔɣɔseto n ani soŋa. Naresum yɛla wa kelum soŋera to mɛ ti to yɛɛra lɔɣɔseto ti to bɔta. To ni maalɛ tomea se’em soŋa soŋa to lɔɣɔrɔ yɛa poan la, ‘tara la gilema bɔ’ɔra to Fãara pa’alegɔ la’ ge ‘pɛgera Naayinɛ.’ (Titus 2:​10; 1 Peter 2:​12) Bala to maali tomea se’em la basɛ ti nɛreba tara la putɛsonɛ la Yehowa pu’usegɔ la.

Wana wa ka pa’alɛ ti ho basɛ ti lɔɣɔrɔ yele gu ho ti ho kan nyaŋɛ keŋɛ zamesegɔ Na’am Pu’usegɔ Deo la poan. Daɣɛ lɔɣɔseto ligeri n zo’e, n tari yu’urɛ bii lɔɣɔpaala ma’a n wan basɛ ti to maalɛ tomea ana soŋa.

• To maali tomea soŋa pu’usa Naayinɛ se’em la de ninmɔ’ɔrɛ la wani?

• To doli la bem naresum yɛla maala tomea ge yɛɛra to lɔɣɔrɔ?

La san dɛna ti Yehowa Sɛɛradoma ayima n zameseri ho Baabule la, ho ni wan bɔta ti ho te’ele zamesɛ ge gura en. La wan eŋɛ se’em ti ho ta’an bɔkɛ soŋa, ho nari ti ho te’ele maasum ge keŋɛ tansugere zamesegɔ. La wan ana soŋa bɔ’ɔra tɔ, to san ta’an dɔla de saŋa woo.

Kɔ’ɔn lu ho suure ge mina tɛm sebo ti ho wan zamesɛ. Tɛm buni ti ho wan ta’an zamesɛ bɔkɛ soŋa? La dela bulika ge ti ho nyaa keŋɛ tuuma bii la dela yu’uŋɔ ti ho kɔma gã’a? Hali ho san kan nyaŋɛ zamesɛ yue, bisɛ hon wan dekɛ tɛm se’em zamesɛ ge da basɛ ti sɛla gu ho. Bisɛ zɛ’an ti voole ka bɔna ge kimese sɛla woo n tari voole n de wuu walesi, television, la mobal fon za’a. Ho san pu’usɛ ge nyaa pɔsɛ Naayinɛ Yetɔɣum la zamesegɔ, la wan soŋɛ hɔ ti ho puti’irɛ bɔna zamesegɔ la poan ti putɛyiila kan bɔna.​—Filipi 4:⁠6, 7.

Daalɛ sɛla ti ho zamesɛ la ge mina hon wan ta lebese se’em. Baŋɛ zamesegɔ zuo la za’a n de se’em. Ti’isɛ zamesegɔ la zuo n de se’em bisɛ, geele zupiɣesi la n tɔ̃kɛ zuo la se’em ge bisɛ fɔɔra me la soke se’a n pa’alɛ yeledaasi la se’em. Nyaa kaalɛ bɔberɛ woo ge bisɛ hon wan nyɛ ­lebesego bo sokere la se’em. Bisɛ Baabule gulesegɔ la kaalɛ ge ti’isɛ bisɛ la pa’alɛ zamesegɔ la se’em. (Tooma 17:11) Ho san lebese sokere ana wa, daalɛ yelebɛa se’a n boi kaalegɔ la poan ti ho wan ta’an tiɛ lebesego la kalam. Ho san ta bɔna zamesegɔ la poan ge bɔta ti ho bo lebesego, ho ta’an zɛkɛ ho nu’o ge tɔɣɛ wana fii wa.

Bakwai woo poan ho san geela bisa yelese’a ti to zamesa to zamesegɔ zɛ’an la, ho wan nyɛ Baabule mi’ilum n de ‘tuulum lɔkɔ.’​—Matu 13:​51, 52.

• Bem maaseŋɔ n de ho eŋɛ saŋa woo ho san yea zamesegɔ?

• Ho wan maasum homea la wani ta’an bo lebesego zamesegɔ zɛ’an?

Kɔ’ɔn dekɛ ze’ele daami sa, Yehowa boti la deodomawoo nyɛta yɔ’ɔ zi’ita sɔsa, kumesa ge kpemesa bamea vo’osum yɛla poan. (Tɛɛnhegɔ 6:6, 7) Bala zuo ti Yehowa Sɛɛradoma yese dabeserɛ bakwai woo poan ita deodoma pu’usegɔ​—ni laɣum zi’a sɔsa vo’osum yelese’a n pakɛ ba. Hali ho san bɔna ho ma’a, ho me ta’an dekɛ tɛm buna wa ti’isa ­taɣesa Naayinɛ yɛla dekɛ doose la sɛla ti ho bɔta ho zamesɛ Baabule poan.

La dela sansɛka ti to lɛna Yehowa.“Vuruge ya lɛm Na’ayenɛ te a me wan vuruge lɛm ya.” ( Yames 4:8) Sɛla n basɛ ti to mina Yehowa soŋa dela to viiseri ti to baŋɛ a hala la a itigɔ n ani se’em Baabule la poan. Ho san wan nyaŋɛ pɔsɛ deodoma pu’usegɔ naana dela ho nyɛ yɔ’ɔ naɛ la ba kaala Baabule la. Ho ta’an dɔla Baabule kaalegɔ la n boi bakwai woo Life and Ministry Meeting la poan. Ho ta’an te’ele pa’alɛ zɛsɛka ti nɛra woo wan kaalɛ ge ti ya sɔsɛ sɛla ti ya nyɛ Gulesegɔ la poan.

La dela sansɛka ti deodoma lɛna taaba. Sireba la pɔɣeba bii dɔɣereba la kɔma san ni naɛ taaba zamesa Baabule la wuu deodoma, la ni basɛ ti ba suure n kɛ̃’ɛra taaba. Zamesegɔ la dela la tara pupeelum, suma’asum la yelese’a ti ba wan tum bakwai la poan. Dɔɣereba ta’an bisɛ ba kɔma yuuma n de se’em loe yelese’a n pakɛ ba The Watchtower la Awake! bii to intenɛt tuuma zɛ’an, jw.org poan ti ba sɔsɛ. Laɣum bisɛ ya JW Broadcasting (tv.jw.org) ge sɔsɛ de yele. Ya ta’an tɔɣɛ yelese’a ti ya kɔma tu’usa sukuu poan la ba wan nyaŋɛ ze’ele a poan se’em. Ya ta’an zamesɛ yuuma se’a ti ya wan ta yuum zamesegɔ poan. Wuu deodoma la, ya ta’an nyɛ sɛla ma’alɛ ya nɔɔrɛ zamesegɔ la san ba’asɛ.

Sankana wa ti ya zi’ita pu’usa Yehowa bakwai woo poan la wan basɛ ti ya deodoma nini tiɣɛ Naayinɛ Yetɔɣum la, a me wan kã bo ya la ya mɔɔri se’em la.—Yooma 1:1-3.

• Beni n sɔi ti to loe dabeserɛ ze’ele ita deodoma pu’usegɔ?

• Dɔɣereba wan eŋɛ la wani basɛ ti sankana wa tara pupeelum bɔ’ɔra ba deodoma?

Beni n sɔi ti nɛreba wa tara pupeelum bala? Ba ye la laɣesegɔ. Wuu daami ti Naayinɛ yamesi yuun ni laɣesa taaba sugumnɔɔrɛ butã yuunɛ woo poan la, tomam me ni maasum laɣesa taaba la bala. (Tɛɛnhegɔ 16:16) Yuunɛ woo poan, to tari la laɣesegɔ butã: teŋgirega laɣesegɔ n de daayinɛ sugumnɔɔrɛ buyi la teŋkatɛ laɣesegɔ n de dabesa atã. To nyɛti nyuurɔ la wani laɣesegɔ ana wa poan?

La basɛ ti to Krista mabinɔɔrɛ nyɛta la giilekpeŋere. Wuu Israeldoma n yuun ni pɛɣera Yehowa la pupeelum se’em “nɛreba teŋasoka” la, tomam me puurɛ ni pee mɛ la to ni laɣesɛ taaba dabesa ana n boi a to’ore wa pu’usa en la. ( Yooma 26:12; 111:1) Laɣesegɔ wa bo’ori to la yɔ’ɔ ti to sɛkera Yehowa Sɛɛradoma n boi tansuga bii tisi a se’a poan. To ni laɣum naɛ taaba dita ge sɔsera vo’osum yɛla laɣesegɔ wa poan wuntɛɛŋa la, ani la soŋa bɔ’ɔra nɛra woo. (Tooma 2:42) Laɣesegɔ wa poan ni le basɛ ti to tara la nɔŋerɛ bɔ’ɔra taaba “la sɛba n lagom sakɛ bo Yesu la” teŋgɔŋɔ wa poan.—1 Peter 2:17.

La soŋeri to mɛ ti to nyɛta nɛŋa tɔlega vo’osum poan. ­Israeldoma yuun le nyɛ nyuurɔ Gulesegɔ la poan la ba yuun “bɔkɛ sɛla te ba kaanlɛ” pa’alɛ ba la. (Nehemia 8:8, 12) Tomam me puurɛ ni pee mɛ la Baabule pa’alegɔ la ti to ni nyɛ laɣesegɔ wa poan la. Yetɔɣum tigesego woo yese la Gulesegɔ la poan. Yetɔɣum n toŋe taaba, n kɛ̃’ɛri suure la itipa’alegɔ ni basɛ ti to baŋɛ to wan tuna Naayinɛ puti’irɛ n boti sɛla to vom poan. To ni nyɛ giilekpeŋere mɛ la to Kristakɔma n ni tɔɣɛ pa’alɛ bamam nyaŋɛ ze’ele kankaŋi yeledaaŋɔ poan se’em la. Teŋkatɛ laɣesegɔ poan, Baabule de’eŋo ni basɛ ti Baabule yɛla niɛ la peelumi ge pa’ala to wan dekɛ a tom tuuma se’em. Laɣesegɔ woo poan, sɛba n ni puɣum deŋɛ kã bamea bo Naayinɛ la, ni nyɛ la ko’om musega.

• Beni n sɔi ti laɣesegɔ dabesa tara pupeelum bɔ’ɔra tɔ?

• Ho wan eŋɛ la wani nyɛ nyuurɔ laɣesegɔ poan?

Yezu n yuun pɔri kum la, a yuun yeti: “Ba wan ta mɔɔlɛ sɔ’ɔlom yelesoma bo teŋa wa woo nɛreba te la dena aseradaana bo teŋhe zan’an. Ge teŋa wa ba’ahegɔ wan nya paɛ.” (Matu 24:14) Ba wan eŋɛ la wani tum teŋgɔŋɔ wa na’am tuuma la ba’asɛ? Ba san dɔla Yezu n yuun boi teŋgɔŋɔ wa zuo la nataka.​—Luke 8:⁠1.

To mɔɔri mɛ ti to paɛ nɛreba ba yɛa poan. Yezu yuun kumesɛ a podɔleba ti ba mɔɔla na’am yetɔɣum la yire la yire poan. (Matu 10:​11-​13; Tooma 5:​42; 20:20) Yuun kɔbesɛka n deŋɛ nɛŋa na’am mɔɔlegɔdoma la yuun tari zɛ’an ti ba wan mɔɔlɛ. (Matu 10:​5, 6; 2 Korint 10:13) Zina beere wa me, to tigese tomea soŋa mɔɔla yetɔɣum la ti tansugere woo tara ka zɛ’an. Wana soŋeri to mɛ ti to ta’an tuna Yezu n bo nɔɔrɛ ti to “mɔɔlɛ yelesoma la bo nɛreba ge sɛ ze’ele yele nɛreba enŋa Yesu n de se’em.”​—Tooma 10:42.

To mɔɔri mɛ ti to paɛ nɛreba n boi zɛ’an woo. Yezu yuun eŋɛ la makesonɛ tɔɣera nɛreba zɛ’an, mɔɣerɛ nɔɔren teŋkpɛsi la lua zɛ’an. (Mark 4:1; Yon 4:​5-​15) Tomam me tɔɣeri Baabule yɛla bɔ’ɔra nɛreba mɛ zɛ’an woo​—sore zuo, leebego zɛ’an, peelumi la fon poan. To me le tɔɣera bɔ’ɔra to ­yikpɛ’ɛsi, to suurɔ, tuuma la sukuu tadaandoma wuu yɔ’ɔ san bɔna. To iti ania se’em wa n basɛ ti nɛreba n de tusa tusa kɛlesa to ‘mɔɔli a fãarɛ la yele la.’​—Yooma 96:2.

Ho wan ta’an baŋɛ mina ti ho bɔta ti ho tɔɣɛ Naayinɛ Na’am yɛla bo en ge pa’alɛ en la wan ana se’em beere? Da basɛ ti beere puti’irɛ yɛla wa bɔna ho ma’a zɛ’an. Kɔ’ɔn tɔɣɛ bo basɛba kalam ho san wan nyaŋɛ!

• Bem “yelesoma” n de to mɔɔlɛ?

• Yehowa Sɛɛradoma tɔɣeseri Yezu la wani mɔɔla yelesoma la?

Ba san yeti “sore ŋmɛ’a daana,” la dela sɛba n pɔsɛ  kɛ̃ zɛ’an yia ge nyaa yu’ɛ sore bo basɛba ti ba dɔla. Yezu yuun dela sore ŋmɛ’a daana ti Naayinɛ yuun tum en ti a wa’an teŋgɔŋɔ wa zuo na tɔɣɛ nyɔvore yɛla ge yu’ɛ sore bo nɛreba ti ba ta’an nyɛ nyɔvore. (Matu 20:28) Zina beere wa, a podɔleba la me tɔɣeseri en mɛ dekera tɛm zo’e zo’e tɔɣera bɔ’ɔra nɛreba ti ba dɛna ‘a podɔleba.’ (Matu 28:19, 20) Basɛba nyaŋɛ maasum bamea mɛ kɛ̃ sore ŋmɛ’a tuuma wa poan.

Sore ŋmɛ’a daana dela tɛm woo na’am mɔɔlegɔ daana. Yehowa Sɛɛradoma za’a dela na’am yelesoma la mɔɔlegɔdoma. Ge basɛba me nyaŋɛ maasum bamea mɛ dɛna sore ŋmɛ’adoma, dekera karefa 70 ŋmarega woo poan mɔɔla yetɔɣum la. Ba zo’e zo’e ni ee la tuunse’a n wan bo ba yɔ’ɔ ti ba nyaŋɛ tum dɛ. Ba ni loe basɛba mɛ ti ba dɛna sore ŋmɛ’adoma n boi ba to’ore ti ba bɔna zɛsɛka ti Na’am mɔɔlegɔdoma yele ba’a pakɛ. Ba ni dekɛ la karefa 130 bii sɛla n gani bala ŋmarega woo poan mɔɔla. Sore ŋmɛ’adoma wa ni basɛ ti sɛla ti ba tara la seke ba mɛ ge tara puti’irɛ ti Yehowa wan bo ba sɛla n pakɛ ba vom poan. (Matu 6:31-33; 1 Timoti 6:6-8) Sɛba n ni ka ta’an kɛ̃ sore ŋmɛ’a tuuma la poan la, ni ta’an dɛna sore ŋmɛ’a soŋeredoma ba san wan nyaŋɛ dekɛ karefa 30 bii 50 tum ŋmarega poan.

Sore ŋmɛ’a daana tari la nɔŋerɛ bɔ’ɔra Naayinɛ la nɛreba. Wuu Yezu la, to mi ti nɛreba zo’e zo’e kɔ’ɔn ana la lɛɛ ti ba baŋɛ Naayinɛ la a puti’irɛ n de se’em. (Mark 6:34) Ge tomam tari mi’ilum n wan ta’an soŋɛ ba nananawa, ti ba tara beere sa’am puti’irɛ. Sore ŋmɛ’a daana n tari nɔŋerɛ bɔ’ɔra a yikpɛ’ɛsi la n ni basɛ ti a tara a tɛm la paŋa soŋera nɛreba ti ba baŋɛ yelesoma la. (Matu 22:39; 1 Tesalonika 2:8) Wana ni basɛ ti a sakerɛ kpe’em mɛ, vurugera a mea du’ura Naayinɛ ge tara pupeelum a vom poan.​—Tooma 20:35.

• Ho wan ta’an pa’alɛ sore ŋmɛ’a daana n iti sɛla?

• Bem zuo ti basɛba dɛna tɛm woo sore ŋmɛ’adoma?

Tiokrasi sukuu dela sɛla ti Yehowa Sɛɛradoma puɣum pɔsɛ wunse’ere sa. Ba eŋɛ sukuu n boi de to’ore bo sɛba n tuni tɛm woo Na’am mɔɔlegɔ tuuma la ti la soŋɛ ba ti ba ta’an ‘mɔɔla yelesoma la ge ita sɛla n sone ti ba eŋɛ.’​—2 Timoti 4:5.

Sore Ŋmɛ’a Tuuma Sukuu. Sore ŋmɛ’a daana san paɛ yuunɛ tɛm woo na’am mɔɔlegɔ tuuma la poan, a ni keŋɛ la dabesa ayoobe sukuu ti ba ni eŋɛ Na’am Pu’usegɔ Deo poan. Sukuu wa dela la soŋɛ sore ŋmɛ’a daana la ti a lɛm Yehowa, tuulegera na’am mɔɔlegɔ tuuma la poan ge ti a sakerɛ me kpe’em.

Na’am Mɔɔlegɔdoma Sukuu. Ŋmaresi siyi sukuu wa dela la kumesɛ sore ŋmɛ’adoma sɛba n wan sakɛ basɛ bamea teŋa ge keŋɛ zɛ’an ti na’am tuuma la yele pakɛ. Ba ni kɔ’ɔn yeti, “Mam wana. Tom mam.” Ba tɔɣeseri la Yezu Krista, Sateŋa Na’am Yetɔɣum Yalegerɛ Daana n gaŋɛ za’a la. (Isaiah 6:8; Yon 7:29) Ho san basɛ ho yire ge keŋɛ sateŋa, la dela ho siregera homea ta’an naɛ la teŋa la nɛreba bɔna. Teŋa la poan dia, ba malema tuuma la ba bɔŋa n ani se’em la ta’an bɔna de to’ore. La nari ti ho zamesɛ ba yetɔɣum la. Sukuu wa kumeseri mabiisi, n ka tari pɔɣeba bii sireba la sɛba n tari pɔɣeba bii sireba dɛna yuun 23 ta paɛ 65, vo’osum poan ti ba ta’an tuna tuunɛ la wuu Yehowa la a tansugere la n boti se’em la.

Watchtower Gilead Baabule Sukuu. Kɔ’ɔn pɔsɛ yuun 1943 sa, Gilead sukuu kumesɛ na’am yetɔɣum yalegerɛdoma n gaŋɛ 8,000 ti ba mɔɔla yetɔɣum la soŋa satisi woo “teŋparɛ wa zuo.” (Tooma 13:47) Sateŋa na’am yetɔɣum yalegerɛdoma n yuun paɛ Peru teŋa la, to yuun ka tari tansugere teŋa la poan ge nananawa to nyaa tari la tansuga n gaŋɛ 1,000. To na’am yetɔɣum yalegerɛdoma n yuun pɔsɛ ba tuuma Japan teŋa poan la, to yuun ka tari Sɛɛradoma n paɛ pia ge nananawa to gaŋɛ 200,000. Ŋmaresi sinuu sukuu la ti ba ni keŋɛ Gilead la dela ba zamesa Naayinɛ Yetɔɣum la nima nima. Sɛba n de sore ŋmɛ’adoma n boi ba to’ore, Sateŋa na’am yetɔɣum yalegerɛdoma, sɛba n boi tigere yile la poan bii sɛba n de teŋgirega bisegadoma ti ba ni yi ba ti ba keŋɛ sukuu wa ta kumesɛ bamea ta’an tuna na’am tuuma la soŋa.

• Bem zuo ti ba ita Sore Ŋmɛ’a Tuuma Sukuu la?

• Bani zuo ti ba eŋɛ Na’am Mɔɔlegɔdoma Sukuu la?