Beni N Sɔi Ti Be’em La Namesegɔ Bɔna?

Yelebe’o san ni eŋɛ sokere la ni dɛna la “Beni n sɔi?” Bisɛ to puurɛ n pee se’em ti Baabule la tari la lebesego n niɛ peelum bɔ’ɔra sokere dena!

1. Sitaana yuun eŋɛ la wani tara be’em wa’an tingɔŋɔ wa zuo na?

Sitaana n de Kolekpabɛ’a la yuun eŋɛ la kpenkpasi la Naayinɛ. Sitaana yuun boti la a sɔna nɛreba bisa, bala n sɔi ti a yuun pã’asɛ yia nɛreba la n de Adam la Hawa ti ba naɛ la en eŋɛ kpenkpasi. Sitaana yuun eŋɛ wana doose la eŋa n yuun tɔɣɛ pumpɔriŋɔ yele bo Hawa la. (Pin’ileŋɔ 3:1-5) A yuun basɛ ti a ti’isɛ ti Yehowa tari la sɛla n ani soŋa ka bɔta ti a bo en. A yuun boti a yeti nɛreba san ka nana Naayinɛ ba wan tara pupeelum. Sitaana n yuun parum sɛla yia bo Hawa dela a kan ki. Bala n sɔi ti Baabule la yeti Sitaana dela,“pumpɔrema la pumpɔreŋɔ la sɔ.”​—Yon 8:44.

2. Adam la Hawa yuun doose la nɔdeni?

Yehowa yuun bo Adam la Hawa lɔɣɔrɔ zo’e zo’e mɛ. A yuun yele ba yeti, ba ta’an dita tiisi woo n boi Eden gaadin la poan san daɣena la tia kayina ma’a. (Pin’ileŋɔ 2:15-17) Ge ba yuun zaɣesɛ mɛ ge di tia la wɔla. Hawa yuun “go’e tia la wɔla pɔsɛ dita.” Pooren, ti Adam “me pɔsɛ dita.” (Pin’ileŋɔ 3:6) Ba za’a yuun zaɣesɛ Naayinɛ nɔɔrɛ mɛ. Adam la Hawa n yuun ani kasi la zuo, la yuun dela naana bo ba ti ba tum sɛla n de tontɔɔ. Ge ba yuun mi fii ge zaɣesɛ Naayinɛ nɔɔrɛ la, ba yuun tum la be’em ge zaɣesɛ a bisega. Ba yuun eŋɛ sɛla la yuun basɛ ti namesegɔ zo’e zo’e n bɔna.​—Pin’ileŋɔ 3:16-19.

3. Sarɔkuni ti Adam la Hawa yele wa laɣum taɛ tɔ?

Se’em ma’a ti Adam la Hawa yuun tum be’em la, ba yuun ka le ana kasi bala la, ba yuun dekɛ ba be’em la taɛ la ba yaasi za’a. Baabule la tɔɣɛ Adam yele yeti: “Buraa ayima poan ti be’em bɔna tingɔŋɔ wa zuo ti kum doose be’em poan wa’ana, bala zuo la, kum paari asaala woo mɛ.”​—Arom 5:12.

Yɛla zo’e zo’e n sɔi ti to namesa. Saŋa ase’a tomea itigɔ ta’an basɛ ti to namesa. Basɛba me itigɔ ta’an basɛ ti namesegɔ paɛ tɔ. To me ta’an ta bɔna zɛ’an mɛ ti yeledi’ire paɛ tɔ ti to namesa.​—Kaalɛ Pa’ala 9:11.

VIISƐ PA’ASƐ

4. Se’em n ta’asɛ ti to namesa

Nɛreba zo’e zo’e ti’isɛ ti Naayinɛ n biseri tingɔŋɔ la. Bala dela yelemɛŋɛrɛ? Ŋmɛ VIDIYO la.

VIDIYO: Ani N Biseri Tingɔŋɔ Wa? (1:24)

Kaalɛ Yames 1:13 la 1 Yon 5:19 ge nyaa sɔsɛ sokere wa:

• Naayinɛ n ta’asɛ ti namesegɔ la be’em bɔna?

5. Geele bisɛ Sitaana bisega la n ta’asɛ yelese’a

VIDIYO: Beni N Sɔi Ti Naayinɛ Bo Yɔ’ɔ Ti Namesegɔ Bɔna?​—Ase’a (3:07)

Kaalɛ Pin’ileŋɔ 3:1-6 ge nyaa sɔsɛ sokere ana wa:

• Pumpɔriŋɔ kuni ti Sitaana yuun parum?​—Bisɛ a kaalegɔ zɛ’ɛsi 4 la 5.

• Sitaana yuun eŋɛ la wani pa’alɛ ti Yehowa tari la sɛla n ani soŋa ge ka bɔta ti a bo nɛresaaleba?

• To san bisɛ Sitaana n yele se’em la, nɛresaaleba wan tara pupeelum Yehowa san dɛna ba Bisegadaana?

Kaalɛ Pa’ala 8:9 ge nyaa sɔsɛ sokere wa:

• Yehowa n ka Biseri tingɔŋɔ wa la, bem n eŋɛ?

1. A. Adam la Hawa yuun ani la kasi ge bɔna Paradiisi poan. Ge ba yuun kelese la Sitaana nɔɔrɛ ge eŋɛ kpenkpasi la Yehowa

2. B. Ba yuun eŋɛ kpenkpasi la basɛ ti be’em la namesegɔ la kum n nyaa pirɛ tingɔŋɔ wa zuo

3. D. Yehowa san yese be’em la namesegɔ la kum basɛ, nɛresaaleba wan le ana kasi bɔna Paradiisi poan

6. To san namesa, la daani Yehowa mɛ

To namesegɔ wa ka pakɛ Naayinɛ? Geele bisɛ Naba David la tuuntuna Peter n yuun gulesɛ sɛla. Kaalɛ Yooma 31:7 la 1 Peter 5:7 ge nyaa sɔsɛ sokere wa:

• La ani ho la wani la hon baŋɛ ti Yehowa nyɛti to namesegɔ la mɛ ge me fabela to yele la?

YELEKPINE

Sitaana n de Kolekpabɛ’a la, la nɛresaaleba sɛba n deŋɛ nɛŋa bayi la n kɔ’ɔn ta’asɛ ti be’em bɔna tingɔŋɔ wa zuo. Yehowa n ba’ɛ fabela to namesegɔ yele la zuo la kan yue, a wan yese namesegɔ basɛ.

Tiisegɔ Sokere

• Bem pumpɔriŋɔ ti Sitaana n de Kolekpabɛ’a la yuun parum bo Hawa?

• Adam la Hawa n yuun eŋɛ kpenkpasi la dekɛ be’em taɛ tomam za’a waabi la wani?

• To eŋɛ la wani baŋɛ ti Yehowa fabeli to namesegɔ la yele mɛ?

Ɛ BISƐ

Zamesɛ Baabule la baŋɛ be’em n de sɛla.

“Bem N De Be’em?” (La boi jw.org)

Viisɛ pa’asɛ baŋɛ yele la ti Sitaana Kolekpabɛ’a la yuun parum Eden gaadin la poan la.

“Beni N Sɔi Ti Naayinɛ Bo Yɔ’ɔ Ti Namesegɔ Bɔna?” (The Watchtower, January 1, 2014)

Viisɛ bisɛ sokese’ere n kpe’em lebesego n buɣeli suure.

“Beni N Sɔi Ti Nazidoma Yuun Siisum Kuura Nɛreba? Beni N Sɔi Ti Naayinɛ Ka Gu De?” (La boi jw.org)

Bisɛ buraa kayima n zamesɛ baŋɛ sɛla n sɔi ti namesegɔ bɔna a gingilega la poan.

Mam Ka Le Ita Mam Boti Se’em (5:09)