Naayinɛ Na’am La Dela Bem?

Tara Vom Somɔ Daarewoo!—Baabule Zamesegɔ N Wan Soŋɛ Hɔ
- ZASEŊƆ 31
  
  Naayinɛ Na’am La Dela Bem?
  Baabule la yelezure dela Naayinɛ Na’am la. Yehowa yeti a dekɛ la Nabumɔ tum a suure n yuun boti tingɔŋɔ wa ana se’em la. Na’am la dela bem? To eŋɛ la wani baŋɛ ti bu pɔsɛ bisera nananawa? Bu puɣum deŋɛ tum la bem? Ge bu wan eŋɛ la bem beere sa’am? Zaseŋɔ wa la zaseŋɔ bayi la n taɣelɛ la wan basɛ ti to nyɛ sokere ana wa lebesego.
  
  1. Naayinɛ Na’am la dela bem ge ani n de bu Naba?
  
  Na’am la dela gɔmɛt ti Yehowa Naayinɛ dekɛ ze’ele. Yezu Krista n de bu Naba la wan bɔna saazuo ge sɔna bisera. (Matu 4:17; Yon 18:36) Baabule la tɔɣɛ Yezu yele ti: “A wan dɛna Naba bisera . . . daarewoo.” (Luke 1:32, 33) Yezu n de Naayinɛ Na’am la Naba la wan sɔna nɛra woo n boi tingɔŋɔ wa zuo bisera.
  
  2. Bani n wan naɛ la Yezu bisera?
  
  Yezu kan bisera a Na’am la a ma’a. Nɛreba n ze’ele “buuri woo, yetɔɣum woo la nɛreba woo la tisi woo . . . me wan dɛna nadoma bisera tingɔŋɔ wa.” (Liligere 5:9, 10) Nɛreba balɛ n wan naɛ la Krista bisera? Yezu n yuun sige tingɔŋɔ wa zuo na la, nɛreba tustusa n yuun wa’ana dɛna a podɔleba. Ge ba poan nɛreba 144,000 n wan ta naɛ la Yezu saazuo bisera. (Kaalɛ Liligere 14:1-4.) Kristakɔma sɛba woo n gee la wan bɔna tingɔŋɔ wa zuo.—Yooma 37:29.
  
  3. Naayinɛ Na’am la gani asaala gɔmɛtdoma la wani wani?
  
  Nɛresaala gɔmɛt san puɣum mɔɔra la se’em me ti ba eŋɛ som, ba ka tari pansɛka n wan eŋɛ sɛla za’a ti ba bɔta. Sɛba ta’an ni di Na’am mɛ ge ka ita sɛla n wan soŋɛ ba nɛreba la. Ge Naayinɛ Na’am la Bisegadaana n de Yezu la ka tari ti nɛra wan malum soe en. Naayinɛ ‘sɛ la Na’am n kan makɛ sa’am.ʼ (Daniel 2:44) Yezu wan sɔna tingɔŋɔ wa za’a bisera a me kan gasera nɛreba. A tari la nɔŋerɛ, ita som ge gãkera la tontɔɔ. A wan pa’ala nɛreba ti ba tara suma’asum la nɔŋerɛ la yelemɛŋɛrɛ bɔ’ɔra taaba.—Kaalɛ Isaiah 11:9.
  VIISƐ PA’ASƐ
  
  Geele bisɛ sɛla n sɔi ti Naayinɛ Na’am la nyana asaala gɔmɛt woo.
  
  4. Gɔmɛt n tari paŋa n wan sɔna tingɔŋɔ wa za’a bisera
  
  Yezu Krista ma’a n tari paŋa ti a sɔna nɛreba bisera gana nadoma woo n tabelɛ bɔna tingɔŋɔ wa zuo. Kaalɛ Matu 28:18 ge nyaa sɔsɛ sokere wa:
  
  Yezu paŋa gani nadoma woo la wani?
  
  Asaala gɔmɛt ka yuuri ge tɛɛra, ba me ni sɔna la tingɔŋɔ wa zuo bɔberɛ deyina ma’a bisera. Ge Naayinɛ Na’am la me? Kaalɛ Daniel 7:14 ge nyaa sɔsɛ sokere ana wa:
  
  Beni n sɔi ti la ana soŋa ti Naayinɛ Na’am la “kan makɛ sa’am”?
  
  Beni n sɔi ti la ana soŋa ti bu wan ta sɔna tingɔŋɔ wa za’a waabi bisera?
  
  5. Asaala gɔmɛt nari la teere
  
  Beni n sɔi ti la nara ti Naayinɛ Na’am la tee soe asaala gɔmɛtdoma? Ŋmɛ VIDIYO la ge nyaa sɔsɛ sokere ana wa:
  
  VIDIYO: Naayinɛ Na’am La Dela Bem?—Ase’a (1:41)
  
  Asaala gɔmɛt ta’asɛ la bem yɛla?
  
  Kaalɛ Pa’ala 8:9 ge nyaa sɔsɛ sokere ana wa:
  
  Hon ti’isɛ ti Naayinɛ Na’am la nari ti la soe asaala gɔmɛtdoma? Bem zuo?
  
  6. Naayinɛ Na’am la tari la bisegadoma n bɔkerɛ to yɛla soŋa soŋa
  
  To Naba Yezu n yuun tabelɛ dɛna nɛresaala la zuo, a “wan ta’an bɔkɛ to tɔregɔ.” (Hebru 4:15) Nɛreba 144,000 la n de sakerɛdoma ge wan naɛ la Yezu bisera ti Yehowa loe ba la ze’ele la “yetɔɣum woo la nɛreba woo la tisi woo” poan.—Liligere 5:9.
  
  La ani hon la wani la hon baŋɛ ti Yezu la sɛba n wan naɛ la en bisera la, mi la ani nɛresaaleba se’em? Bem zuo?
  
  Yehowa loe la buraasi la pɔɣesi ti ba bɔŋa bɔna to’ore to’ore ti ba naɛ la Yezu bisera
  
  7. Naayinɛ Na’am la tari la lɔɔ n di mi’a
  
  Gɔmɛtdoma ni biŋe la lɔɔ n nari ti la soŋera ba nɛreba la ge tɛ’ɛla ba. Naayinɛ Na’am la me tari la lɔɔ ti bu nɛreba la nara ti ba dɔla. Kaalɛ 1 Korint 6:9-11 ge nyaa sɔsɛ sokere ana wa:
  
  Hon ti’isɛ ti tingɔŋɔ wa za’a wan ana la wani nɛra woo san doli ni Naayinɛ lɔɔ?a
  
  Hon ti’isɛ ti yɛm boi bim ti Yehowa bɔta ti Na’am la poan nɛreba la za’a dɔla lɔɔ wa? Bem zuo?
  
  Bem n pa’alɛ ti nɛresɛba n ka doli lɔɔ la wan ta’an tee?—Bisɛ kaalegɔ zɛ’an 11.
  
  Gɔmɛtdoma ni biŋe la lɔɔ ti la tɛ’ɛla ge soŋera ba nɛreba. Naayinɛ Na’am la me tari la lɔɔ n di mi’a ti la tɛ’ɛla ge soŋera ka nɛreba
  
  NƐRA TA’AN SOKE YETI: “Naayinɛ Na’am la dela bem?”
  
  Hon wan lebese la wani?
  YELEKPINE
  
  Naayinɛ Na’am la sirum dela gɔmɛt n boi saazuo sa n wan ta sɔna tingɔŋɔ wa za’a bisera.
  
  Tiisegɔ Sokere
  
  Bani n de Naayinɛ Na’am la bisegadoma?
  
  Naayinɛ Na’am la ani soŋa gana asaala gɔmɛt woo n boi la wani?
  
  Yehowa boti a Na’am la poan nɛreba ita la bem?
  
  To zamesɛ ba’asɛ la:
  
  Mam Boti N Eŋɛ Sɛla
  Kaalɛ Yezu bisega la n boi Isaiah 11:1-10 ge geele bisɛ la boi de tɔka se’em la asaala bisega.
  
  Ase’a:
  Your other goal
  
  Ɛ BISƐ
  
  Geele bisɛ Yezu n yuun pa’alɛ Na’am la n wan bɔna zɛ’an.
  
  “Naayinɛ Na’am La Dela Sɛla N Boi Ho Suuren?” (La boi jw.org)
  
  Beni n sɔi ti Yehowa Sɛɛradoma tara sakerɛ bɔ’ɔra Naayinɛ Na’am la gana asaala gɔmɛt?
  
  Ba Kɔ’ɔn Tuna Bɔ’ɔra La Naayinɛ Na’am La (1:43)
  
  Viisɛ bisɛ Baabule la n pa’alɛ nɛreba 144,000 la ti Yehowa loe ba ti ba naɛ la Yezu bisa la yele se’em.
  
  “Bani N Wan Keŋɛ Saazuo?” (La boi jw.org)
  
  Bem n daa basɛ ti pɔka ayima n boi sarega poan sakɛ ti Naayinɛ ma’a n wan ta’an tee tingɔŋɔ wa?
  
  “Mam Yuun Baŋɛ Sɛla N Sɔi Ti Ŋmɛlema Tuuma Bɔna” (Awake!, November 2011)
  a To wan sɔsɛ sareŋɔ yɛla wa ase’a Bɔberɛ 3 la poan.

Naayinɛ Na’am La N Biseri Nananawa!

Tara Vom Somɔ Daarewoo!—Baabule Zamesegɔ N Wan Soŋɛ Hɔ
- ZASEŊƆ 32
  
  Naayinɛ Na’am La N Biseri Nananawa!
  Naayinɛ Na’am la yuun pɔsɛ bisera la saazuo sa yuun 1914 poan. Sankaŋa mea poan ti asaala bisega ba’asegɔ dabesa la me pɔsɛ. To eŋɛ la wani baŋɛ bala? Geele bisɛ Baabule yetɔɣebiŋere yɛla la sɛla n iti tingɔŋɔ wa poan la nɛreba hala n ani se’em kɔ’ɔn pɔsɛ yuun 1914 poan.
  
  1. Baabule yetɔɣebiŋere yɛla pa’alɛ la bem?
  
  Baabule gɔnseko n de Daniel la pa’alɛ ti sansɛka ti ba yi’ira “saŋa sugumnɔɔrɛ buyopɔi la” san ba’asɛ, Naayinɛ Na’am la wan pɔsɛ bisera. (Daniel 4:16, 17) Yuun kɔbesi pooren ti Yezu yuun le pa’alɛ ti sankaŋa mea la dela “sansɛka ti ba loe bo tisi la” ge me yuun le pa’alɛ ti saŋa la yuun nan ka ba’asɛ. (Luke 21:24) Wuu to wan nyɛ se’em la, saŋa sugumnɔɔrɛ buyopɔi la yuun ba’asɛ la yuun 1914 poan.
  
  2. Bem n iti tingɔŋɔ wa poan ge nɛreba hala ani la wani kɔ’ɔn pɔsɛ yuun 1914 poan?
  
  Yezu podɔleba la yuun soke en yeti: “Bem n wan daalɛ pa’alɛ ho saŋa la, la tingɔŋɔ wa ba’asegɔ yɛla?” (Matu 24:3) Yezu yuun yeti eŋa san pɔsɛ bisera Naayinɛ Na’am la poan, yɛla zo’e zo’e wan ita tingɔŋɔ wa zuo. Yɛla la ase’a wan dɛna la zabekãra, dipɔ’ɔsegɔ la tinmi’iŋo. (Kaalɛ Matu 24:7.) Baabule la me yuun tɔɣɛ biŋe ti nɛreba hala “ba’asegɔ dabesa la” poan, wan basɛ ti vom “ana biɣi biɣi” bo to. (2 Timoti 3:1-5) Yele ana wa la hala ana kɔ’ɔn niɛ peelum mɛ kɔ’ɔn pɔsɛ yuun 1914 poan.
  
  3. Beni n sɔi ti yɛla ba’ɛ kpe’em bala se’em ma’a ti Naayinɛ Na’am la pɔsɛ bisera?
  
  Yezu n yuun nyaa ta dɛna Naayinɛ Na’am la Naba la, la yuun ka yu’e ti a isige zabɛ la Sitaana la a kolekpabɛ’ɛsi la. A yuun zabɛ nyaŋɛ Sitaana mɛ. Baabule la yeti “ba daa saʼɛ en basɛ la tingɔŋɔ wa zuo na ge daa saʼɛ a malesi la paʼasɛ a poan basɛ na.” (Liligere 12:9, 10, 12) Sitaana sunsɔa ba’ɛ nyie mɛ se’ere n sɔi la a mi ti ba wan sa’am en. Bala n sɔi ti wuŋerɛ la namesegɔ kɔ’ɔn pirɛ tingɔŋɔ wa zuo la. Bala la, la daɣɛ pakerɛ la yɛla n wuni to se’em tingɔŋɔ wa zuo la! Naayinɛ Na’am la ma’a n wan maalɛ yele ana wa za’a.
  VIISƐ PA’ASƐ
  
  Viisɛ bisɛ to eŋɛ se’em baŋɛ ti Na’am la pɔsɛ bisega la yuun 1914 ge baŋɛ la pa’alɛ to sɛla.
  
  4. Baabule kãlɛ yɛla pa’alɛ ti la dela yuun 1914
  
  Ŋmɛ VIDIYO la.
  
  VIDIYO: Naayinɛ Na’am La Pɔsɛ Bisera La Yuun 1914 (5:02)
  
  Naayinɛ yuun basɛ ti diimi Babilon tiŋa Naba Nebukadneza nyɛ la yetɔɣebiŋere zaaseŋɔ. Zaaseŋɔ la vuurɛ ti Daniel yuun pa’alɛ la ze’ele bo la Nebukadneza na’am bisega, la Naayinɛ Na’am la.—Kaalɛ Daniel 4:17.a
  
  Kaalɛ Daniel 4:20-26 ge nyaa dekɛ sɛla n boi daka la poan lebese sokere ana wa:
  
  (A) Nebukadneza yuun nyɛ la bem a zaaseŋɔ la poan?—Bisɛ kaalegɔ zɛ’ɛsi 20 la 21.
  
  (B) Bem n wan eŋɛ tia la?—Bisɛ kaalegɔ zɛ’an 23.
  
  (D) Bem n wan eŋɛ “saŋa sugumnɔɔrɛ buyopɔi” ki’ileŋɔ la poan?—Bisɛ kaalegɔ zɛ’an 26.
  
  Tia Zaaseŋɔ La N Pa’alɛ Naayinɛ Na’am La Yele Se’em
  
  YETƆƔEBIŊERE LA (Daniel 4:20-36)
  
  Nadire
  
  (A) Tikãtɛ n wɔɣɛ
  
  Nadire burumŋɔ
  
  (B) “Lobe ya tia la” ge basɛ ya ti “saŋa sugumnɔɔrɛ buyopɔi tole”
  
  Nadire n le bɔna
  
  (D) “Ho wan le nyɛ ho na’am la”
  
  Yetɔɣebiŋere wa n tum tuuma se’em yia . . .
  
  (E) Ani ti tia la yuun ze’ele bo?—Bisɛ kaalegɔ zɛ’an 22.
  
  (Ɛ) A na’am la yuun burum la wani?—Kaalɛ Daniel 4:29-33.
  
  (F) “Saŋa sugumnɔɔrɛ buyopɔi” ki’ileŋɔ poan la, bem n yuun nyaa eŋɛ Nebukadneza?—Kaalɛ Daniel 4:34-36.
  
  LA N TUM TUUMA SE’EM YIA
  
  Nadire
  
  (E) Babilon Naba Nebukadneza
  
  Nadire burumŋɔ
  
  (Ɛ) Yuun 606 G.Y.B. pooren ti Nebukadneza yuun zalɛ yuun mɛŋa ayopɔi ge ka le dɛna Naba
  
  Nadire n le bɔna
  
  (F) Nebukadneza ka le zala ge le pɔsɛ bisera
  
  Yetɔɣebiŋere wa n tum tuuma se’em yi’i poan . . .
  
  (G) Ani ti tia la yuun ze’ele bo?—Kaalɛ 1 Yelebiŋ’a 29:23.
  
  (H) Ba nadire la yuun burum la wani? To eŋɛ la wani baŋɛ ti nadire burumŋɔ la yuun kelum bɔna mɛ se’em ma’a ti Yezu yuun bɔna tingɔŋɔ wa zuo la?—Kaalɛ Luke 21:24.
  
  (I) Wani ma’a la bɛsa ti bisega wa yuun le bɔna?
  
  LA N TUM TUUMA SE’EM N YI’I
  
  Nadire
  
  (G) Israel nadoma n ze’ele bo Naayinɛ bisega
  
  Nadire burumŋɔ
  
  (H) Yerusalem sa’aŋɔ la yuun burum Israel nadoma bisega la mɛ yuuma 2,520
  
  Nadire n le bɔna
  
  (I) Yezu nyaa dela Naayinɛ Na’am la Naba pɔsɛ bisera saazuo
  
  Saŋa sugumnɔɔrɛ buyopɔi la yuun paɛ la wani?
  
  Baabule la zɛ’ɛsi ase’a soŋɛ to mɛ ti to bɔkɛ bɔba ase’a soŋa. Makerɛ, Baabule gɔŋɔ la n de Liligere la yeti saŋa batã la girego zuni mɛ la dabesa 1,260. (Liligere 12:6, 14) Bala buyi dela saŋa sugumnɔɔrɛ buyopɔi bii dabesa 2,520. Saŋa ase’a, Baabule la ta’an dekɛ dabeserɛ ti la dɛna yuunɛ. (Ezekiel 4:6) Yele la dela bala bɔna Daniel gɔŋɔ la poan. Saŋa sugumnɔɔrɛ buyopɔi la ze’ele bo la yuuma 2,520.
  5. Tingɔŋɔ la tee mɛ kɔ’ɔn pɔsɛ yuun 1914 poan
  
  Ŋmɛ VIDIYO la.
  
  VIDIYO: Tingɔŋɔ La Tee Mɛ Kɔ’ɔn Pɔsɛ Yuun 1914 Poan (1:10)
  
  Yezu yuun pa’alɛ eŋa san ta dɛna Naba yelese’a n wan ita tingɔŋɔ wa zuo. Kaalɛ Luke 21:9-11 ge nyaa sɔsɛ sokere wa:
  
  Yele ana wa poan, yele ani ti hon nyɛ bii wum?
  
  Tuuntuna Paul yuun pa’alɛ nɛreba n wan ana se’em asaala bisega ba’asegɔ dabesa la poan. Kaalɛ 2 Timoti 3:1-5 ge nyaa sɔsɛ sokere wa:
  
  Hala ani ti hon nyɛ ti nɛreba tara zina beere wa?
  
  6. Naayinɛ Na’am la bisega nari ti la kpemese to giila mɛ
  
  Kaalɛ Matu 24:3, 14 ge nyaa sɔsɛ sokere ana wa:
  
  Nananawa, ninmɔ’ɔrɛ tuundeni n pa’alɛ ti Naayinɛ Na’am la pɔsɛ bisega mɛ?
  
  Ho wan eŋɛ la wani ta’an laɣum tum tuunɛ wa?
  
  Naayinɛ Na’am la nyaa biseri mɛ ge se’em ma’a ti a nyaa wan sɔna tingɔŋɔ wa za’a bisa la pɔri mɛ. Kaalɛ Hebru 10:24, 25 ge nyaa sɔsɛ sokere wa:
  
  Tomam ayima ayima woo nari ti to eŋɛ la wani la to “nyɛ dabeserɛ la n pɔri la”?
  
  Ho san zamesɛ baŋɛ sɛla n wan ta’an soŋɛ hɔ ge me wan ta’an faaɛ basɛba basɛ, la nari ti ho eŋɛ la bem?
  
  NƐRA TA’AN SOKE YETI: “Beni n sɔi ti Yehowa Sɛɛradoma ba’ɛ tɔɣera 1914 yele bala?”
  
  Hon wan yeti bem?
  YELEKPINE
  
  Baabule yetɔɣebiŋere yɛla, la de kãlɛ yɛla la yelese’a n iti tingɔŋɔ wa zuo pa’alɛ ti Naayinɛ Na’am la sirum biseri mɛ nananawa. To wan eŋɛ pa’alɛ ti to tari sakerɛ yele dena wa poan, to san mɔɔla Na’am la yɛla ge me kena tansugere zamesegɔ.
  
  Tiisegɔ Sokere
  
  Beni n yuun eŋɛ saŋa sugumnɔɔrɛ buyopɔi ba’asegɔ la poan ti Daniel gɔŋɔ la tɔɣɛ de yele la?
  
  Beni n basɛ ti hon sakɛ ti Naayinɛ Na’am la yuun pɔsɛ bisa la 1914 poan?
  
  Ho wan eŋɛ la wani ta’an pa’alɛ ti ho sakɛ ti Na’am la biseri mɛ nananawa?
  
  To zamesɛ ba’asɛ la:
  
  Mam Boti N Eŋɛ Sɛla
  Tiregɛ dɛna na’am mɔɔlegɔdaana.
  
  Ase’a:
  Your other goal
  
  Ɛ BISƐ
  
  Geele bisɛ sɛba n gulesɛ diimi yɛla la nɛreba basɛba n pa’alɛ tingɔŋɔ wa n tee se’em kɔ’ɔn pɔsɛ yuun 1914 poan.
  
  “Sarum Be’ero Ma’a N Nyaa Kɔ’ɔn Bɔna” (Awake!, April 2007)
  
  Kaalɛ bisɛ yetɔɣebiŋere la n boi Matu 24:14 la n tee buraa ayima vom seem.
  
  “Mam Yuun Nɔŋɛ Baseball Ŋmɛ’a Mɛ Gana Sɛla Woo!” (The Watchtower No. 3 2017)
  
  To eŋɛ la wani baŋɛ ti yetɔɣebiŋere la n boi Daniel a zuo 4 la tɔɣeri la Naayinɛ Na’am la yele?
  
  “Wani Ma’a Ti Naayinɛ Na’am La Pɔsɛ Bisera? (Bɔberɛ 1)” (The Watchtower, October 1, 2014)
  
  Beni n pa’alɛ ti “saŋa sugumnɔɔrɛ buyopɔi” la ti Daniel a zuo 4 tɔɣɛ de yele la yuun ba’asɛ la yuun 1914?
  
  “Wani Ma’a Ti Naayinɛ Na’am La Pɔsɛ Bisera? (Bɔberɛ 2)” (The Watchtower, November 1, 2014)
  a Bisɛ watchtower bayi la n boi Ɛ Bisɛ zɛ’an zaseŋɔ wa ba’asegɔ poan la.

Na’am La N Wan Eŋɛ Sɛla

Tara Vom Somɔ Daarewoo!—Baabule Zamesegɔ N Wan Soŋɛ Hɔ

ZASEŊƆ 33

Na’am La N Wan Eŋɛ Sɛla

Naayinɛ Na’am la puɣum pɔsɛ bisera mɛ. La kan yue a wan tari teere zo’e zo’e wa’an tingɔŋɔ wa zuo na. Basɛ ya ti to geele ya bisɛ yelesoma ase’a ti to wan ta nyɛ Na’am la bisega la poan.

1. Naayinɛ Na’am la wan eŋɛ la wani basɛ ti suma’asum la tontɔɔ gãkerɛ le bɔna tingɔŋɔ wa zuo?

Yezu n de Naayinɛ Na’am la Naba la wan sa’am nɛrebɛ’ɛsi la gɔmɛtdoma basɛ Armagedon zaberɛ la poan. (Liligere 16:14, 16) Sankaŋa la, Baabule nɔbiŋere wa wan tum tuuma soŋa soŋa: “La gee fii wa ti putɔpa la kan le bɔna.” (Yooma 37:10) Yezu n de Na’am la Naba la wan basɛ ti suma’asum la tontɔɔ gãkerɛ bɔna tingɔŋɔ wa zuo.—Kaalɛ Isaiah 11:4.

2. Vom wan ana la wani se’em ma’a ti Naayinɛ puti’irɛ n boti sɛla tum tuuma tingɔŋɔ wa zuo?

Naayinɛ Na’am bisega la poan la, “tontɔɔdoma la n wan sɔna tingɔŋɔ la, ba wan bɔna ka poan daarewoo.” (Yooma 37:29) Ti’isɛ bisɛ ti ho boi la tingɔŋɔ poan ti nɛra woo dɛna tontɔɔdaana ge ti ba za’a nɔŋɛ Yehowa ge me nɔŋɛ taaba! Nɛra kan le bɛ̃ ge ba wan tuɣum vɔna daarewoo.

3. Naayinɛ Na’am la wan tum la bem se’em ma’a ti ba sa’am putɔpa la?

Ba san sa’am putɔpa la, Yezu wan dɛna Naba bisera yuun 1,000. Sankaŋa la, eŋa la a nɛreba 144,000 la wan soŋɛ nɛreba tingɔŋɔ wa zuo ti ba ana kasi ge me kan tara be’em. Bala pooren, tingɔŋɔ wa wan dɛna paradiisi n ani soŋa ge me pirɛ la nɛreba n doli Yehowa kisa. Ba wan tara pupeelum. Yezu nyaa wan le dekɛ a bisega kpe’eŋo la bo a Sɔ, Yehowa. La nyaa wan basɛ ti Yehowa “yu’urɛ la ana zilam” ka tara makerɛ. (Matu 6:9, 10) La wan niɛ peelum ti Yehowa dela Bisegadaana n sirum fabeli a nɛreba yele. Yehowa nyaa wan sa’am Sitaana la kolekpabɛ’ɛsi la, la sɛba za’a n wan eŋɛ kpenkpasi giisɛ A bisega la. (Liligere 20:7-10) Naayinɛ Na’am la wan basɛ ti tingɔŋɔ wa dɛna tinpaalega.

VIISƐ PA’ASƐ

Bisɛ sɛla zuo ti to wan ta’an sakɛ ti Naayinɛ wan doose la Na’am la poan basɛ ti yelesoma la woo ti a pu’ulumbiŋe la tum tuuma beere sa’am.

4. Naayinɛ Na’am la wan sa’am asaala gɔmɛtdoma la za’a

‘Asaala n sɔi a tadaana bisera ge basɛ ti wuŋerɛ paara en.’ (Pa’ala 8:9) Yehowa wan doose Na’am la poan yese ŋmɛlema tuuma wa basɛ.

Kaalɛ Daniel 2:44 la 2 Tesalonika 1:6-8 ge nyaa sɔsɛ sokere ana wa:

Yehowa la a Dayɔa Yezu wan eŋɛ asaala gɔmɛtdoma la sɛba n pa ba poore la wani?
Hon zamesɛ Yehowa la Yezu yele se’em la basɛ ti hon sirum sakɛ ti ba tuuma za’a wan dɛna tontɔɔ ge me nara la wani?

Yezu n de Naayinɛ Na’am la Naba n biseri paradiisi tingɔŋɔ wa zuo.

5. Yezu dela Nasonkɔ n boi a to’ore

Yezu n de Naayinɛ Na’am la Naba la, a wan tum tuuma zo’e zo’e ti la tara nyuurɔ bɔ’ɔra tingɔŋɔ wa zuo nɛreba. Ŋmɛ VIDIYO la ge nyɛ Yezu n puɣum deŋɛ eŋɛ pa’alɛ ti a tari la Naayinɛ paŋa n wan ta’an soŋɛ nɛreba ge me bɔta ti a eŋɛ dɛ.

VIDIYO: Yezu Yuun Pa’alɛ Naayinɛ Na’am La N Wan Tum Tuunse’a (1:13)

Se’em ma’a ti Yezu yuun bɔna tingɔŋɔ wa zuo la, a yuun puɣum deŋɛ eŋɛ pa’alɛ Na’am la n wan eŋɛ sɛla. Kã’a kani ti ba gulesɛ kalam ti ho wan bɔta ti ho ta nyɛ? Kaalɛ Baabule gulesegɔ la n boi kã’a la zɛ’ɛsi la.

SE’EM MA’A TI YEZU YUUN BƆNA TINGƆŊƆ WA ZUO LA A YUUN . . .	YEZU N BOI SAAZUO LA A WAN . . .
gu tingɔŋɔ wa yeledi’ima n sa’ani lɔɣɔrɔ la.—Mark 4:36-41.	maalɛ tingɔŋɔ wa lɔɣɔrɔ ti ba sa’ana se’em la.—Isaiah 35:1, 2.
doose la nyalema poan diisi nɛreba tusa.—Matu 14:17-21.	yese kom tingɔŋɔ wa zuo.—Yooma 72:16.
tibɛ nɛreba zo’e zo’e mɛ.—Luke 18:35-43.	basɛ ti nɛra woo tara imma’asum.—Isaiah 33:24.
isige nɛreba kum poan mɛ ti ba le vɔna.—Luke 8:49-55.	yese kum basɛ.—Liligere 21:3, 4.

6. Naayinɛ Na’am wan tari yelesoma na bo to beere sa’am

Na’am la wan basɛ ti Yehowa n yuun tari putɛse’ere bɔ’ɔra asaaleba la tum tuuma. Ba wan ta vɔna daarɛ woo paradiisi poan tingɔŋɔ wa zuo. Ŋmɛ VIDIYO la ge nyɛ Yehowa n doli a Dayɔa Yezu poan basɛ ti A puti’irɛ tuna tuuma se’em.

VIDIYO: Beere Sa’am N Wan Ana Soŋa Se’em (4:38)

Kaalɛ Yooma 145:16 ge nyaa sɔsɛ sokere wa:

La basɛ ti la ana hon la wani la hon baŋɛ ti Yehowa wan basɛ ti “bunvɔa woo nyɛ eŋa n boti sɛla”?

NƐREBA BASƐBA YETI: “To za’a san tara nɔyinɛ to wan ta’an maalɛ tingɔŋɔ wa yeledaaŋɔ za’a.”

Naayinɛ Na’am la wan ta’an maalɛ la yeledaaŋɔ ani ti asaala gɔmɛtdoma ka nyaŋɛ?

YELEKPINE

Naayinɛ Na’am la wan tum eŋa n boti sɛla la. A wan tee tingɔŋɔ wa za’a ti la dɛna paradiisi ti nɛresomdoma pirɛ bim pu’usa Yehowa daarewoo.

Tiisegɔ Sokere

Naayinɛ Na’am la wan eŋɛ la wani basɛ ti Yehowa yu’urɛ la ana zilam?
Beni n sɔi ti to sirum sakɛ ti Naayinɛ Na’am la wan basɛ ti Baabule pu’ulumbiŋa yɛla la za’a tum?
Na’am la yele deni ti ho kɔ’ɔn ana lɛɛ gura ti la tum?

To zamesɛ bɔberɛ wa ba’asɛ la:

Mam Boti N Eŋɛ Sɛla

Dekɛ Naayinɛ Na’am La Dela Bem? gɔnpika la pɔsɛ sɔsega.

Ase’a:

Your other goal