ZASEŊƆ 44
Malema De’eŋo Woo N Peeri Naayinɛ Puurɛ?
Yehowa boti la to tara pupeelum to vom poan ge me dɛ’ɛna saŋa ase’a. Ge malema de’eŋo woo n peeri a puurɛ? To wan eŋɛ la wani pa’alɛ ti to nɔŋɛ Yehowa yele ana taaba poan?
1. Beni n sɔi ti malema de’eŋo zo’e zo’e ka pɛɛra Yehowa puurɛ?
La wan eŋɛ ho pakerɛ ti ho baŋɛ ti malema de’eŋo zo’e zo’e ka boi Baabule la poan bii ba dela baɣa tuuma. Malema de’eŋo aŋa taaba ta’an ze’ele pumpɔreŋɔ pu’usegɔ poan. Ba ta’an ni dɛna kolekpatuuma bii ba tari la putɛsɛka n yeti sia ka kiire la. Malema de’eŋo ase’a tari la titɔ tuuma bii zusoŋɔ yɛla. (Isaiah 65:11) Yehowa kaɣɛ a nɛreba yeti: “Yelege yamea ge da kalam ya lɔɣedɛkɔ la.”—2 Korint 6:17.a
2. La ani Yehowa la wani la malema de’eŋo se’a n na’aseri nɛresaaleba?
Yehowa kaɣɛ tɔ ti to da dekɛ tomesi “delum nɛresaaleba.” (Kaalɛ Yeremia 17:5.) Malema de’eŋo ase’a na’aseri la tiŋa bisegadoma bii soogɛpa. De’eŋo ase’a me na’aseri la tiŋa lɔɣɔrɔ bii tiŋa la n zabɛ to’e bamesi se’em. (1 Yon 5:21) Ti de’eŋo ase’a me na’asa nalɛɣerɛ bii asaala tigere. La wan ana Yehowa la wani to san ba’ɛ na’asa asaala bii tigere, yele yele wuu nɛresɛba n iti sɛla ti la ka makɛ la A puti’irɛ?
3. Bem yɛla n wan ta’an basɛ ti malema de’eŋo kan ana soŋa?
Baabule la kɔ’ɔn tɔɣɛ zɛregɛ nɛreba n “[bugeri] daam, dɛɛna de’enyooro [ge] nyuura paɣera taaba” mɛ. (1 Peter 4:3) Malema de’eŋo ase’a poan, nɛreba ni tuna la zuku’urɛ tuuma la yalumtuuma. To san bɔta ti to kelum dɛna Yehowa zɔdoma, to nari ti to yese tomesi dɛɣerɔ yɛla wa poan.
VIISƐ PA’ASƐ
Zamesɛ baŋɛ hon wan ta’an dekɛ yɛm tum tuuma se’em malema de’eŋo poan ti Yehowa puurɛ pee.
4. Zaɣesɛ malema de’eŋo n ka na’aseri Yehowa
Kaalɛ Epesus 5:10 ge nyaa sɔsɛ sokere ana wa:
Bem n nari ti to mina soŋa soŋa to san kɔ’ɛ puti’irɛ ti to de’em malema de’eŋo?
Malema de’eŋo aŋa bɛɛ n kɔ’ɔn bɔna ho gingilega la?
Hon ti’isɛ ti malema de’eŋo wa peeri Yehowa puurɛ?
Makerɛ, hon tabelɛ ti’isɛ bisɛ Naayinɛ n geele dɔɣum daarɛ de’eŋo yɛla se’em? Baabule la poan, Yehowa yameŋa ka boi n di a dɔɣum daarɛ deʼeŋo ge la tuɣum tɔɣɛ pa’alɛ la dɔɣum daarɛ deʼeŋo buyi ti nɛreba n ka pu’useri Naayinɛ tabelɛ di. Kaalɛ Pin’ileŋɔ 40:20-22 la Matu 14:6-10 ge nyaa sɔsɛ sokere ana wa:
Bem n yuun eŋɛ dɔɣum daarɛ bayi la za’a poan?
Baabule la n yele sɛla wa poan, hon ti’isɛ ti la ani Yehowa la wani la dɔɣum daarɛ de’eŋo?
Ge ho ta’an kelum ti’isɛ ti, ‘Mam san di dɔɣum daarɛ bii malema de’eŋo seko n ka boi Baabule la poan, la yele ba’ɛ pakɛ Yehowa mɛ?’ Kaalɛ Yɛhega 32:1-8. Ŋmɛ VIDIYO la ge nyaa sɔsɛ sokere ana wa:
Beni n sɔi ti la nara ti to bisɛ tomesi soŋa ta’an ita sɛla n nari Yehowa nɛŋan?
Sore kani poan ti to wan ta’an eŋɛ bala?
To wan eŋɛ se’em ta’an baŋɛ malema de’eŋo seto n daani Naayinɛ suure
De’eŋo la makɛ la Baabule pa’alegɔ? Ho san bɔta ti ho baŋɛ, viisɛ baŋɛ ba pɔsɛ de se’em.
Ku ba’ɛ na’asa la asaala, tigere bii tiŋa lɔɣɔrɔ? Yehowa ti to na’asa gana za’a ge dekɛ tomesi delum en ti a maalɛ tiŋa wa zuo yeledaaŋɔ bo to.
Ku malema la ku yɛla makɛ la Baabule pa’alegɔ? La nari ti to ana filam to sareŋɔ poan.
5. Soŋɛ nɛreba ti ba bɔkɛ hon sakɛ bo sɛla
La ni kpe’em mɛ paa ti ho nyaŋɛ zaɣesɛ, nɛreba san pɛregera hɔ ti ho laɣum de’em malema de’eŋo n ka peeri Yehowa puurɛ. Doose gilema la mama sore poan tɔɣɛ ti ba bɔkɛ hon sakɛ bo sɛla la. Ho san bɔta ti ho nyɛ hon wan ta’an eŋɛ wana wa se’em, ŋmɛ VIDIYO la.
Kaalɛ Matu 7:12 ge nyaa sɔsɛ sokere ana wa:
Wuu kaalegɔ zɛ’an wa n pa’alɛ se’em la, la nari ti ho yele ho deodoma n ka pu’useri Yehowa ti ba da de’em malema de’eŋo?
Hon wan eŋɛ la wani basɛ ti ho deodoma tara suure lua ti hon kan laɣum de’em ba de’eŋo la ge ho nɔŋɛ ba mɛ?
6. Yehowa boti la to tara pupeelum
Yehowa boti la to nyɛta nɛŋa sɔsa la to deodoma la to zɔdoma la pupeelum. Kaalɛ Pa’ala 8:15 ge nyaa sɔsɛ sokere wa:
Bem n pa’alɛ ti gulesegɔ wa pa’alɛ ti Yehowa boti la to tara pupeelum?
Yehowa boti la a nɛreba tara pupeelum ge nyɛta nɛŋa nyɛɛna. Ŋmɛ VIDIYO la ge nyɛ yele wa n niɛ peelum se’em satiŋa laɣesegɔ poan.
Kaalɛ Galatia 6:10 ge nyaa sɔsɛ sokere ana wa:
La nari ti to doose la malema de’eŋo poan ta’an “ita sɛla n ani soŋa” bɔ’ɔra nɛreba?
Itisonkɔ kani n bo’ori ho pupeelum—la dela ba pɛregɛ hɔ ti ho bɔ’ɔra malema de’eŋo daarɛ bii homea n pee puurɛ bɔ’ɔra?
Sɛɛradoma zo’e zo’e saŋa ase’a ni eŋɛ la yelesonɛ n boi de to’ore bo ba kɔma ge me ta’an ni da lɔɣɔrɔ bo ba. Ho san tara kɔma, bem yɛla n boi de to’ore ti ho wan ta’an eŋɛ bo ba?
NƐREBA BASƐBA YETI: “Malema de’eŋo n pɔsɛ se’em la yele ka pakɛ ge sɛla n pakɛ la dela ho ta’an zi’ire la ho deodoma la ho zɔdoma ti ya tara pupeelum.”
Hon wan yeti bem?
YELEKPINE
Yehowa boti la to nyɛta nɛŋa sɔsa la to zɔdoma la to deodoma la pupeelum. Ge a me boti la to zaɣesɛ malema de’eŋo seto n daani a suure.
Tiisegɔ Sokere
Sokere ani ti to wan ta’an soke tomesi baŋɛ malema de’eŋo se’a n ka peeri Yehowa puurɛ?
To wan eŋɛ la wani ta’an soŋɛ to deodoma la to zɔdoma ti ba bɔkɛ tomam n geele malema de’eŋo yɛla se’em?
Hon eŋɛ la wani baŋɛ ti Yehowa boti la to dɛ’ɛna ge tara pupeelum?
Ɛ BISƐ
Bisɛ malema de’eŋo ase’a ti Kristakɔma ka dɛ’ɛna.
“Beni N Sɔi Ti Yehowa Sɛɛradoma Ka Dɛ’ɛna Malema De’eŋo Ase’a?” (La boi jw.org)
Bisɛ yɛla anaasi n basɛ ti to baŋɛ ti dɔɣum daarɛ de’eŋo ka peeri Naayinɛ puurɛ.
“Beni N Sɔi Ti Yehowa Sɛɛradoma Ka Dita Ba Dɔɣum Daarɛ?” (La boi jw.org)
Bisɛ kɔma n nɔŋɛ Yehowa n wan taʼan basɛ ti A puurɛ pee seʼem, malema deʼeŋo saŋa.
Kristakɔma zo’e zo’e zaɣesɛ mɛ ka dita Burenya. La ani ba la wani la ba loe wana wa la?
“Ba Daa Nyɛ La Sɛla N Ba’ɛ Ana Soŋa Gana Malema De’eŋo” (The Watchtower, December 1, 2012)
a Bisɛ Ki’ileŋɔ Yetɔɣum 5 ta’an zamesɛ baŋɛ hon wan ta’an eŋɛ se’em malema de’eŋo ase’a poan.