Dhɩ -ɩanˈ dɩ ˈyea ˈtmʋɛn- ˈdhe ˈˈdhruigboɛ ˈmʋn ɛn, ka -ˈye ɩanˈ ˈcɩan sʋn nʋn -ɛn?

-Bho mɔn -e Zoova aˈ -Bobhlai- dhueˈ ˈye Biiblʋ ˈcɩan anˈ, dhɛ -ɛˈ dɩ aʋ ˈyea ˈtmʋn ɛn, ɛgwɛ -manˈ ˈˈjɛ ɛ ˈcɩɛɛnˈ ke tɛnˈˈ. -Bho -ˈye ˈe ˈˈdhruigboɛ ˈmʋn mun ɛnˈ, ˈka- -ˈye nʋn -ke. -Bho -man sa kaˈ nʋn jheejhee ɛˈ, -man muɛn ˈo dhɛjɛɛn ˈjhee-.

Nɔnˈˈ -e -da -ˈyea dhɩ ˈcɩaan- an, -naan ˈbho ɔˈ dɩ tɔˈ i. Nɔnˈˈ -wɛ ˈdhi -bho -man sa dhɛ ˈcɩan anˈ, -man -ˈŋwɔɛn in -kajɔɔnka -a? Ɛ zɔn ˈˈŋwɛn, -da sea -manˈ zɔn ˈdhi dhbho -dee ke ɛ? -Aeˈˈ ˈˈmaʋn -bho ˈˈɲnuun mɩɩnˈˈ anˈ klɛɛ ɛ sa ˈmʋn ɛnˈ? -Bho se ˈbhɛɛ- -ˈye nɔnˈˈ -duuˈˈ nʋn ˈbho dhɛcɩaan mɔn ˈdhe- ɛˈ, nɔnˈˈ -ˈbhɛa -ˈyea ˈo dhɛcɩaan po ɛ, poɔ ˈfɔ bho. -Manˈ ˈˈtai dhɛ ˈˈoo dhɛ i ˈdhe-, ɛɛˈ za -manˈ ˈˈjhri ˈsɔɔn -dhe. ˈBɔn -da nɩan ˈˈduaan, ˈˈdhe radio -e kpajhriɛdhebha -e ˈtmʋʋndheinˈˈ -e dhɩ -dhee -ˈnɩɩn -ˈbhɛa -ɩn -ˈyea -manˈ ˈˈjhri ˈsɔɔn -za a, -ˈmʋʋɩn. Bhae- -wɛeˈ -ˈye -dee. Ɛɛ muɛn nʋn- -ˈye -man -zɔɔnˈ dɩ aˈ klɛɛ -pɛɛ bho -za ˈˈdhe -manˈ tɔˈ ˈye ˈo Ɲɔnsoa aˈ Ghlu -man -ˈcɩaan ˈˈkpe nɩn-.—Filipi 4:6, 7.

Tri dhɩ kɔan dɩ dhɛ ˈzɔn, -naan dɩ -ˈyea ˈtmʋn tɔˈ i. -Bho -ˈye -dee ɛˈ, ˈsɛɛ ɛˈ ˈfɔ -ˈyea ˈcɩan an, -jhɔɔˈ klɛɛ ˈˈjhriɛ ˈˈkpe i. -Naan ˈcɩaandhɛ ɛˈ ˈˈdhru -e ɛɛˈ ˈˈdhri mɩɩnˈˈ tɔˈ ˈˈkpe i ˈˈdhe -ka ɩan nʋan imuun- sʋn ɛn, -ˈyeɛ ˈjhe. -Ŋmʋn fete aˈ klɛɛ jha. Dhɛ ɲʋn ˈyea -glɔˈ kpa ˈdhe ˈcɩaandhɛ ˈdhi ɛ, ideedɩ- -ɩan- deɛ -jɛ ˈˈkpe ɛ, zrʋɩ. ˈBho ɛ ˈdhe bhla a, zro ɛɛˈ kpɛ ˈdhii ˈˈdhe ideedɩ- -ˈcrea a, ˈbɔn ɩanˈ dhezaaˈ. Biiblʋ aˈ ˈˈjhri nɩan ˈo kpɔ -ˈnɔn ˈdhi ɛ, ˈbʋɩn in -ˈyɩ zro ˈˈdhe -ka ɩn nɩn- dɩ -ˈtmʋʋan ˈdhe ˈsɛɛ ˈdhi nʋan tɔˈ dhueˈ ˈbhle sʋn ɛn, -nɛɛn tɔˈ i. (Nʋʋdhɩ- 17:11) Dɩ -ɩn deea i ɛ, -bho -ˈjhe ɩanˈ dhezaaˈ aˈ, -ˈmɛn ghlu aˈ kpɔ -ɔ -ˈyea -ʋn dɩ -glʋˈ bho po ˈdhe ˈˈdhruigboɛ ˈmʋn ɛn, triɔ dhɛ ˈzɔn. ˈDhe ˈˈdhruigboɛ ˈmʋn bhla a, -bho -man sa ˈbɔn -ˈye ˈe dɩ -za aˈ, -to sʋn ˈˈjha. -ˈMɛn -ˈˈkwaan- dɩ ˈˈjhrii -ˈyɩ ˈtmʋn. Ɛ se dhɛ -ˈcrea mɛn- -ˈye zro nɩn-, -ˈtmʋɛn ˈdhe -manˈ ˈˈjɛ ɛˈ -ghlusʋn ˈdhi.

Dhɩ -ɩanˈ dɩ ˈyea ˈtmʋɛn- ˈdhe ˈˈdhruigboɛ ˈmʋn ɛn, -bho -man sɩ ˈcɩan ˈdhɔɔ ˈˈoo ˈdhɔɔ ɔˈ, ɛ nɩn -ka -manˈ poa dhɩ -dhee ˈdhe -manˈ Biiblʋ jhibhɛ ɛˈ ‘ˈˈghwliɛ -gbau-’ ˈdhi ɛ.—Matie 13:51, 52.

• -Bho -ˈye ˈˈdhruigboɛ ɛˈ dhɩ ˈcɩan anˈ, ka -ˈye -manˈ nɔnˈˈ ɔnˈ desʋn nʋn -ɛn?

• -Bho -ˈye ˈe ideedɩ aˈ -zaaˈ ˈbhɛɛ- ˈdhe ˈˈdhruigboɛ ˈmʋn ɛnˈ, ka -ˈye nʋn -ɛn?