ˈBheɔ ɔˈ ˈɲnɔn ɲnian ˈdhi ŋwɔn ˈjheɛ ʋanˈ dhɩsaɩn anˈ geiˈˈ

ˈBheɔ Akabʋ -ɲnan in ˈbho ɔɔˈ ˈˈgbu aˈ fenɛtrɩ ˈˈɩ -wɛeˈ ɔ ˈjhe viɲɩn -gle dhueˈ. Ɔɔ ˈbɔn viɲɩn -gle -ˈnɛn ˈmɛn ˈklaa ˈˈjhu dhueˈ -ˈbhleɛ ɔɔˈ ˈɲnɩn -nɩn Nabɔtɩ. Ɔɔ ˈbɔn ɔ ˈyeɛ dɩn ˈdhe Nabɔtɩ ˈkwa. ˈKlaa Nabɔtɩ ˈnaan ɔ se ˈbɔn ɔ ˈye ɔɔˈ gle ple. Dhɛ nɩan ˈo ɛ, Zoova aˈ ˈtee ˈnaan ɲɔn ɔnˈ ple ɔɔˈ ˈcɛ ˈɛ ˈˈghwliɛ -dhe. Akabʋ ˈjhe Nabɔtɩ ŋwɔn ˈmɛn dhɛ ɔɔ naan ˈdhe Zoova aˈ ˈtee ˈdhi ɛˈ dɩ? ˈˈƖɩn-. Ɔ ˈkpa ˈcɛn ˈjɛɛn-. ˈCɛn -ˈnɛn nʋɛnˈ ɔ ˈse ˈbɔn ɔ ˈye -ˈzɔn ˈˈsi, ɔ ˈse ˈbɔn mɔn ɔ ˈye dhɛ dhi -ke.

Ɔɔˈ ˈɲnɔn ɲnian ˈdhi ŋwɔn -ʋanˈ ˈɲnɩn nɩan Zezabɛlɩ -ghwluɛ- ˈdhe ɔ bho ʋn ˈnaan: Se ˈbheɔ -nɩn? Dhɩ aˈ klɛɛ -man ˈbɔan ˈbhɛɛˈ -ˈyɩ ˈbhle. Viɲɩn -gle -ˈnɛn ɛn muɛn -manˈ dhɛ -nɩn. ˈMan muɛn dɩ -ˈnɩn anˈ dɩ ˈˈdu-.’ Ʋn kpa ɲankɔʋn- nɩan ˈo ˈˈkwiglɔ- -ˈnɔn ˈdhi ˈsɛɛ-. Dhɛ ʋn ˈtmʋan ɛ ka: Aʋ bhla Nabɔtɩ dɩ ˈˈkpe aʋ ˈye ka nʋn ɔ ˈtmʋʋɛn- Ɲɔnsoa dɩ -saɩn- ˈˈkpei. Aʋ -tbhɔɔ ˈseiˈˈ dhi aʋ ˈyeɔ ˈdhbha. Dhɛ ʋn ˈtmʋan -mɛn ɲankɔʋn nʋn. ˈSʋ ʋn -ghwluɛ- ˈe ʋanˈ -kʋan Akabʋ bho ʋn ˈnaan: ‘Nabɔtɩ ˈmɛɛnˈ. -Mɔn ˈbhle viɲɩn -gle -ˈnɛn ˈbhodhe bhla.’

Ɲʋn ˈsea dhɛ nʋn -wɛeˈ Zezabɛlɩ ˈdhbha a, ɛ se Nabɔtɩ ɔˈ ˈsʋ -nɩn. Ʋn ˈdhbha ɲʋn -duuˈˈ -ʋʋ kman Zoova aˈ dɩ. Ʋan gbɛɛ -baadhɩ ˈˈjhibhaˈ, ʋan nʋɛn dhɩ -dhee -ˈnɩɩn -kenɛnˈ -ɩn -ɲnin ˈˈjhrii. Dhɩ aˈ klɛɛ ʋan nʋan Zoova ˈjhɩɩ. Dhɛwɛ- ɔɔ mun -nʋn -ɛn?

Akabʋ ˈmɛan, ɔɔˈ ˈˈjhu Zooramʋn -mɔn ˈkpa ˈbheɔ. ˈSʋ Zoova dhbhoɛ Zei ɔ ˈye Zezabɛlɩ -e ʋanˈ ˈˈgbuzɔncɛ ˈdhbha.

Zei ˈjha ˈbho ɔɔˈ ˈˈkpenaandhɛ- ɲʋn an kpa -tʋˈ ˈˈkpe ˈˈdhe ɔ mun ˈdhe Zezreɛlɩ ˈnɔn Zezabɛlɩ ˈˈtia. Zooramʋn ˈjha ˈbho ɔɔˈ ˈˈkpenaandhɛ- ɲʋn an kpa -tʋˈ ˈˈkpe -wɛeˈ ɔ -nɩn Zei -ˈŋmʋʋn ˈˈdhe ɔ deeɔ i ɔ ˈnaan: ˈFlɛ -nɩn ˈo mɔn -e ˈmɔn ˈɲnɩn?’ Zei ˈnaan: ‘ˈFlɛ se ˈbhɛɛ- ɛ ˈye ˈbho mɔn -e ˈmɔn ˈɲnɩn -nɩn -bho -manˈ ˈdhou Zezabɛlɩ a sa ɲiɔo- dhɩsaɩn ˈˈdhrui nʋn ɛnˈ.’ ˈSʋ Zooramʋn ˈˈbhilɛ ɔɔˈ ˈˈkpenaandhɛ- ɲʋn an kpa -tʋˈ i -wɛeˈ ɔ ye ple ɔ ˈye dhe mun. Zei ˈˈdhuɛ- ɔɔˈ plʋsɛn ˈmʋn ɔ -pooɛ Zooramʋn ɔ yeɔ ˈdhbha.

ˈBho ɛ ˈdhe ɛ, Zei muɛn ˈe ˈbheɔgbu ˈdhi ˈnɔn Zezabɛlɩ nɩan. Ʋn ˈŋwɩɩn -ka ɔɔ jhia ˈsʋ ʋn poɛ dhɩ ˈˈjhrii. Ʋn poɛ ʋanˈ ˈˈmɩɩn ˈkpa -wɛeˈ ʋn -ɲnan in ˈbho ʋanˈ ˈˈgbu aˈ fenɛtrɩ ˈˈɩ ˈˈdhe ʋan fuɔ. -Jɛn Zei jhia ˈsʋ ɛ, ʋn poɔ ghwlu -saʋn ˈˈjhrii. -Wɛeˈ Zei -ghwlu ˈe dhbhonʋʋn- nɩan ˈbho ʋn ˈˈbun bho ɔ ˈnaan: “Aʋ pʋ ˈzɔn.” Ɛmɛn- ʋʋ nʋn, Zezabɛlɩ ˈmɛɛnˈ.

ˈBho ɛ ˈdhe ɛ, ˈZei dhbha Akabʋ ɔˈ ˈˈɲnuun anˈ 70 ˈˈdhe ɔ -za Baalɩ ɛˈ ˈˈɲɩanˈˈ in ˈbho Israɛ -bhlʋa ˈdhi. ˈSrɩn -wɛ ɛɛ ˈˈdu -aʋ -ɛ? Zoova jhibho- dhɛ ooˈˈ dhɛ ˈmɛn. ˈDhe nɔnˈˈ nmɔan ˈo i ˈdhi ɛ, ɲʋn -ʋa- nʋan dhɩ ɲnian ˈˈjhrii ɛ, ʋa muɛn ɩanˈ geiˈˈ ˈjhe-.